رواية الموروث نصل حاد – الفصل الثالث عشر
♛ 13 ♛
شكو حقد ونار بگلبي شبت بهل ساعة دفعت باب الغرفة
وانزل على درج اكفكف ردان دشداشتي ام ضـلـيل
كاعدة مستمتعة الخبيثه تنتظر خبر موت بنتي
رفعت راسها شافتني ولزمت راسها وعاطت
_ يبوووو علينا يبوووو كفكفت ردنها
ناويه نيه مووو خوش بنت المووو خوووش .
عضيت اصبعي وتقدمت عليها اهز براسي
نزلت روحي لمستواها وهمست بتحذير
لا شنو تحذير تهديد من هذا الزين طگيته بوجهه
_ شوفي كوثر اذا بنتي ماتت واحترك گلبي
عليها يابه وروح ابوووووي ذياب وروح ابوهن عابد
اطلع مو بنت ابوي اذا ما موتت ابنچ ضـلـيل شيخكم
شيخ ال ضـلـيل اموووته والله واذا انا يحترك گلبي
انتِ يوگف على اخيرررررر انهي عليكم كلكم .
ما دامت هل عنفصه والنفخه فشيت بس
باوعت ورايَّ وتناشغ وتصيح
_ سمعتهااا يمهههههه سمعت تهديدهاا بأذنك
ودحكت بعينك البغدادية شني من اسلوب تستخدم ويانا .
درت وجهي عيوني جحظت على ملامحه وجموده
ململم ردن الدشداشة متوضأ ويبوس بيده ويخليها
على راسه ومن صدمته ايده بجمود متصلبه على راسه
گلبي باقي قليل ويطلع من مكانه من تقدم
حصرني بين الحايط وبين امه على يميني
وهو صار گدامي رجع ايده خلف ظهره
احمرت ملامحه كز على اسنانه وهمس مستفسر
_ بالله عيدي حوار العرامة ؟
تكتفت لا بيه اتراجع وافلت افشل وكلهن ملمومات
ينتظرن يتشمتن ، واريد افهم بي قافل مايل جسمه
وناطيني نص وجهه مقدم أذنه عود حتى يسمع
غـاليـة : هيَّ السبب ؟
ضـلـيل : منو ؟
غـاليـة : امك .
ضـلـيل : انتِ ما گلتي امك وكفتي صحتيها بشنو ؟
غـاليـة : دمي فاير .
ضـلـيل : صحتيها بشنو ؟
غـاليـة : كوثر .
ضـلـيل : يصير وترضيها اصيح امچ بأسمها
تقبلين اروح اقلل منها واتجاوز حدودي وياها .
غـاليـة : امي تصلح وتعمر ، امك تهجم وتخرب .
فك عيونه بحدة ثبتت على موقفي
غـاليـة : تركوا بنتي .
ضـلـيل : احجيها مثل ما حجيتيها .
غـاليـة : ضـلـيل اسمعني بنتي هي رادتها
تموت گالت احرگ گلبچ على بنتچ وصدك
كاعدة تسعي بيها حتى تفجعني ببنتي .
فر اصبعه ما يهتم يريد اعيده
غـاليـة : وحتى گدامك احجيها اذا تحرگون
گلبي على بنتي امـ ..
غصيت بالكلام وعجزت انطق بي وبخجل نزلت راسي .
ضـلـيل : تموتيني ؟ احجيها ليش تسكتين .
دگات گلبي تضرب براسي نزلت ايدي
بعد ما جنت مكتفتها وثابته بس ماردت هو يسمع
نيتي جانت اخوف هل حرباية المتلونه موتتني
وشلت حالي ، تراجع كم خطوة
باوعت بوجهه هز راسه وطلع .
وامه تصيح وراه ما تحملت خزرتها
ام ضـلـيل : هاي كل قوتك يمه لو نجيب واحد يعاونك .
تحفظ بالرد وطلع رجع للديوان ، اريد اصعد بناتها
بالباب وحدتهن تريد تبلعني دفعتهن بكل حيلي
وعبرت ركض صعدت وطبگت بابي اكل بنفسي
شلون صارت بوجهه وسمعني يا فشلتي .
عصرت راسي من الوجع هاجت الشقيقة عرفتها
ومن تهيج تتلف كل اعصابي بعد وتضرب على عيوني
وحتى خشمي يدخن أضغط واغمض عيني
وندفع الباب ذيچ الدفرة المرعبة دخلت ام ضـلـيل
وبناتها اثنين وياها وقفلت الباب من كل عقلها
عرفتها ما ناوية اطلعني سلامات منها .
ام ضـلـيل : حذرتچ ماتحطين راسچ براسي لو لاله .
وكملت على كلامها بنتها الجبيرة نبراس وكمشتني
من ايدي تهزني ومنا راسي مهتز من الوجع
_ تهددين بآمي الـ*** تموتين جبيرنا تريدين ؟
خايبه تروحين فدوة لطولو من الشوارع سحلچ
سحول ما بقيتي بنفس واحد اخرهم هذا
ساجر شبع بيچ وهسة دزيتي بنتچ حتى يشبعون
بيها ولدوووووو مُـرجانـة منّ دمچ تحبن تعدد الزلم .
هي تحچي ما ظل عقل براسي من طريقتها وحركاتها
مال بنات الشوارع تروح الف فدوة لبنات الشارع
حركاتها مقرفة وتغمز وتكمش بجسمها تسوي حركات
جريت العطر وطگيته براسها خليتها ترافس .
عصرت عيني من الدنيا افترت بيَّ لزمت الكنتور
ما شفت حتى ما لحگت ألمحهن جرتني امهم وبنتها
الثانية بكل حيلهن نومني بالگاع ونامن عليَّ دگ بوكسات
وبحل حياها تملش وتگطع براسي هاي السافلة
ضربتها وما بين بيها ، بقيت ادفع واقاوم واعض بيدهن
واملخهن بأظافري يزيدن صريخي على صريخهن
الباب تفلش تفلش من الضرب وصوت شاهين
ومقتدر برا يهددون بيهن حتى يعوفني ويفتحن
الباب ونقش برا تهدد بضليل واختفى صوتها
رفعت راسي دبگته بالگاع والثانية ترفع بيدها
تقبضهم اثنينهن وتضرب على جسمي
تلاثة على وحده وراسي غدرني لو مهما ادافع
اضعف واتعب گدام قوتهن وحقدهن .
بين الجرباية وبين الكنتور يضربن ردت افقد
اخر شي عدها وهيَّ هاي غايتها شگگت ملابسي
وجردتني منهن بقيت بس بالداخليات وراحت
فتحت الباب وانا اجلب بيدي ورجلي حتى اتنفس
ضاق صدري وكفت اريد اكعد على چرباية وشاهين
ومقتدر وتمار يطافرون منا ومنا ، فات ضـلـيل يركض
نزع العباية من اجتافه يلفني بيها مصدوم .
قبق راسي يريد يطگ كضيت بيده ورفعت عيوني
غـاليـة : لحگلي ضـلـيل راح اموت .
حجيتها وگعت ادگ على راسي من الوجع
حتى سنوني توجعني من قوة الألم الشقيقة والضرب .
طبگت الباب عزيزة ونقش يبدلن بملابسي
ويلبسني عباية ضـلـيل اختفى بعد
حتى اصواتهم ماكووو ولا صوت سمعت
لا منه ولا منهم ، رجع شاهين من شافني كملت
يريد ينزلني وصلت للدرج واشوفه نازع العگال والشماغ
والعباية وباقي بطرگ الدشداشة شعره مبعثر
وجهه ما يتفسر وانا انزل وطلعت ما لمحت وحده بيهن .
الطريق كله يفشر ويسب اريد اعرف على منو ماكو
كلّها شملهم بالسانه حتى السيارات بالشارع
همست بصوت تعبان وضربت راسي
_ اشششش اشششش راح اتخربط اسكت .
شغل جگارة ينفث الدخان بصوت مسموع
وبقدرة قادر مسيطر على سيارة وصلنا عزيرة
سندتني ونزلتني تمسح بوجهي دخلت طوارئ
يشكلون بالمغذيات ولا على بالك الوجع نفسه
فحوصات وركض منا ومنا وبعدني نفس الألم
تزرف راسي وضغط صار على عيوني وضجيج
المستشفى توسلت بي يرجعني للبيت اريد انام
رجعني على اعصابه دخلت للغرفة ملخت
راسي تملخ اضرب بي وهوَّ يفتر ويايَّ
اروح منا يجي ويايَّ اروح هناك يروح ويايَّ حاير بزمانه .
فاتت نقش تحضن براسي تمسح على عيوني
خليت راسي على جتفها وهي تشهگ وتهمس
_ حبابة صيري قوية گلبي راح يوگف من الخوف عليچ .
عفتها ورحت على مخده واهز برجلي اون وهز براسي
صعدن خواته اثنينهن يريدن يعتذرن اني شفتهن
لو كرهت حتى روحي درت وجهي وصرخت
_ خليهن يرووووحن طلعهن ما اريدهن طلعهن .
_ غـاليـة نريد نعتذر ساعة شيطان .
غـاليـة : انتن شياطين روحن ما متندمات والله
هذا بس خوووف محتارات تريدن تلغمطنها .
رفع ضـلـيل إيده يأشر حتى يطلعن بدون كلام زايد
صدت عيني على نقش تكف ردنها وخازرتهن
بس طلعن حتى ما لحگت اصيح لا واشوف
البنية ركضت وكمزت على ظهر نبراس
عمتها الجبيرة تصرخ بعالي صوتها
_ تضربين امي ولچ تشگين ملابسهاا
اليوووووم اشرب من دمچ الخااااايسة .
نقش ..
دمي ما يبرد غير بسيل دمهن نبتت سنوني
براسها عضيتها من كل حيلي وفتحت ايدي
اكفخ بوجهه راشديات واختها تضرب بكل حيلها
بظهري وتجر بشعري الحد ما وگع بيدها
ولزگت براس هل سافله اليوم الدنيا احرگها عليهن .
صراخي على صراخهن البيت انذار دخل
ركضوا عمي تمار ومقتدر واخر واحد صعد
شاهين وامي اشوفها وگعت ما تحملت تشوفني
وتسمع هل صريخ وعمي ضـلـيل حار بيها
عفت هاي وكمزت على ثانية فلشتني هل حيوانه
ظهري فلشته عتيت دشداشتها شگيتها من الطول
للطول وكضيت ايدها اعضها وادفر بيها وهي تدفر .
حسيت بروحي طرت وضغط صار على خصري
درت وجهي شفت شاهين شالني خلاني ارفس
بيدي ورجلي الحد ما هدني وركضت عليها اضربها
نقش : خلوووني اموووتهن ما افكهن هل جلبات
يضررربن بأمي يغارن منها الخايساااات تروحن
فدوة لكل خصلة بشعرهااااااا .
دفعني شاهين على حايط وطبگ ايدي حيل ويصيح
_ ول كافيييييي تخبلتي .
بچيت متأذية من ضربهن وگلبي عطب من القهر
نقش : شاهين كتلني ضربن امي يريدنها تموووت .
طبگ حاجبة بقهر وهمس بخفوت
شاهين : راح اكضهن سوي ليلهن صبح .
ما استوعبت كلامه صفنت وتوضحت من فكني
وانا منا اسمع بالفشار مالتهن والتهديدات
تريد تنزل جريت شعرها وصرخت
_ ياهي بنت ال*** اناااااا امي ****
لچ تعالي اذبحچ .
شاهين : ول عمه نبراس ختولي هل زعطوط
كبري عقلچ عوووووفيهااااا فكيهاااااااا
احنا نذبحهااا وناخذ حگچ منهااااا فكيهاا .
حجاهن وهوَ يرجع ايد نبراس خلف ظهرها
يمنعها من ضرباتها بحجة يحميها ضربتها
بوكس على سنونها بقيت اهز بيدي اصابعي
تفلشت اويلي على حال جهرتها الخايسة .
تمار ومقتدر نزلوا يشغلون السيارة من عاط بيهم
عمي ضـلـيل حتى يرجع امي على مستشفى
بس سمعوا رجعت اصواتنا ردوا صعدوا
شمر شاهين نبراس بالگاع يمكن فقدت الوعي
وجرني بكل حيله بالحمام فوتني وقفل الباب
وظل برا يتصايح هو وابو وعمي مقتدر .
تمار : افتح الباب لا اشمرك من فوك ول ولتنا هاي .
شاهين : بوية يحاسبها ابوها يحاسبها عمي ضـلـيل .
تمار : فك المهجووووووم فكووووووو وين السلاح
اخلي چيله براسوووو هل چلب ابن الچلب .
شاهين : يماااااا سلاح ابوي يمااااااا حتى يكتلني .
تمار : انطيهاااا فك وانطيهااااا .
شاهين : ما انطيها لا وحق دين محمد روح بوية
لا تلوي ذراعي انا بظهرهـا تضربها
تخسرني وتخسر اخوك .
ضربت الباب بكل حيلي اريد يفتحه
اريد اشوف امي شصار بيها وهذا ملتهي يتعارك
هو وابو اختنگت دفر الباب وعاط بصوت لصمني لصم
_ نقشششششش صوووووتچ ول صووووتچ .
هو عاطها وابو منا يضرب ويتگلب عليه بالكلام
ومقتدر يسب بيَّ من ينزل بيها الحقيرة مقهور
على اخته بس ما استعظم اهانة حرمة اخو الشيخ
من امه واخواته ضربوها الله لا يوفقهمممم
سديت شفايفي من سمعت صوت عمي ضـلـيل يدوي
ضـلـيل : طالع للمستشفى اذا ارد وألمح **** بيكم
احرك البيت اشمر نفط وحق الله واشغله
واقفل الباب واخلص منكم ومن شركم
الظاهر انتم **** مو مال احترام ولد ال *****
انعل ****** سفله سقوووووط انتوا سقوووط .
هوَ راح ونزلوا تمار ومقتدر وهذا فتح الباب
طلعت ركضت اخذت بطل ماي اشرب
وامسح بوجهي ألهث من التعب وشاهين خازني
يستمع لكلامهم من فوك نزل نص الدرج يشوفهم
اقتربت واسمع بهمسات الخوف منهم
تمار : يسويها انا اگلك يسويها
خلونا نطلع ييرد ونرد .
مقتدر : نحجي حق الله حقو امنا تلم بناتها وتكتل
حرمتو وتعرفين ابنچ مهبول رسمي عليها
ورها من المستشفى مابيكم واحد يحترم صوتنا
واصل لعبور حدود المنطقة تخزينا وتعزينا .
ظلوا بيناتهم يتفقون اخذوا اخواتهم طلعوهن
وعفاف ودلال لزمن بالخبيثة جدتي واخذهن مقتدر
وطلع من البيت نزلت البيت فارغ وشاهين
يحجي هو وعزيزة همست
_ حتى احنا نطلع ؟
شاهين : وين نولي تبقين هين .
عزيزة : بس يرجع شردني شاهين لا تخلي يلمحني .
كعد ولازم طرف خده ورفع عيونه يخزرني
شاهين : ملختني كتلتني هل غضب .
نقش : انتَ لزگت ودگيت صدرك ما جبرتك .
شاهين : عجل اخليهم يمرعدون راسچ تمرعد ؟
نقش : اعرف ادافع على روحي .
شاهين : انا كلب ابن كلب طلعت اناااا كلب ابن كلب .
اجت عزيزة تدفع بيدي ودتني على مطبخ منه
وهوَ طلع برا نسخة عمه يمشي ويكسر بالغراض
استلمتني رزايل شربت ماي ولازمه راسي وهيَ
فاتت على غرفة تصلي تعبانة من الصياح
سحبت بطل ماي وطلعت على كراج ادوره
لمحته واكف بصف باب الديوان يشرب جگارة
شافني وشمرها ، ابتسمت ومديت ايدي
_ هاك اشرب ماي .
شاهين : روحي نقش روحي لا تحرگين روحي روحي .
نقش : اسفة .
صوفر عقله لأن ثواني مرت هوَ صافن بوجهي
حركت ايدي على عيونه بعد نظراته ليغاد ورد جواب
شاهين : تهون ونتحملچ انتِ وعيبوبچ .
نقش : بنت غـاليـة العالية انا منين تلوحني عيوب .
شاهين : امچ مريضة نقش غلط تصرفچ .
نقش : ضربنها تريد اسكت وضاربات امي
شاهين اريد اموت من القهرررر تعرف شنو
اموت من القهر على امي .
شاهين : اشربي ماي وفوتي ارتاحي .
نقش : شاهين انا ما غلطت ردت اخذ حتى لو قليل امي .
شاهين : انتِ صح وكلها غلط ، بظهرچ انا لا تخافين .
نقش : صح ماعندي اخوان بس الله عوضني بيك
وصرت احسن واطيب اخ شاهينو الذهب .
كملت ورحت ركض من انفك الباب الخارجي
ودخلت سيارة عمي ضـلـيل ركضت اسند امي
نامت على كتفي صعدتها فوك وعمي ضـلـيل ويايَّ
خفت منه بگد ما صاير نار من العصبية
طفرت جوة واشوف البيت بكبره
يصوصي محد موجود حتى عزيزة وشاهين
فص ملح وذاب هذولي وين عافوني يا .
غـاليـة ..
دخلات المستشفى والتعب ما يفيد والوجع
يزيد مايقل كعدت على چرباية اهز بروحي
فزيت من ثنه ضـلـيل رجله وگعد مقابيلي
ضـلـيل : غـاليـة .
_ ها .
_ شلون بهل وجع ما راضي يروح .
_ ضـلـيل روح انتَ ارتاح انا هسة انام واصير زينة .
_ ارتاح وغالية تفرفح من الوجع گدامي
شلون اخذ هل صخام من راسچ واخلي براسي شلون .
غمضت عيوني حيل وكفت من الدمار
ضغطت على راسي وافتر بالغرفة منا ومنا
تعداني يطفي الأضواء ورجع سحب ايدي
ضـلـيل : تعالي نامي بحضني .
غـاليـة : عوفني فدوة عوفني روح .
ضـلـيل : ماتصيرين زينة اذا ما تنامين تعااي انومچ .
عگط الغطوة نام ومد ايده وجرني غصب
نومني عليها وبطرف اصبعه يمسد على عيني
لمني لم بين أيده بدون ما يحچي على دفو حضنه
وظلام الغرفة غفيت والوجع ينهش براسي نهش .
وبعد ثلاث ساعات كعدت كل وجع ما بيَّ
الغرفة فارغة بس انا بيها وهدوء غريب جوة
نهضت تعبانة اخذت ملابس وسبحت حتى
جسمي يرد نشاطه ما طولت طلعت عدلت
شالي ورشيت عطر ونزلت اطمئن على بناتي
شفت نقش بنص الصالة ننوس نايمة على ايدها
ونايمات بسابع نومه رايحات سودة علية
غطيتهن وبقيت افتر بالبيت وحدي عبالك مهجور
فارغ باقية بي بس انا وبناتي .
تعجبت وريحة نفط بكل مكان ، على استغرابي
اخذتني رجلي على ديوان الخارجي
وكفت بالباب وبس ضليل موجود يخابر ومنزل راسه
يشغل بالجگارة ويهز براسه يرد على متصل
_ شيّخ فؤاد هذا فوكاها يهدد انا مو فنجان وانهز
من كلامووو چانك نسيت اذكرك شيخ ال ضـلـيل اناااااا
چان هوَ يريد يطرنا بليل اظلم انا اطرهم بنهار واعلن
ذبحتهم واكسررر عيونووو وراسو
هل منبوذ طلع صوتو ويهدد .
سكت لثواني يسمع وردت اطفر وافوت من جلجل
الديوان بكبره بصوته وتحذيره
_ اي عفية هيچ حاجيني لا تگلي ها عصبي
ها ما يگابل احد غريب خطية بي توحد شني
لا صدك بي توووووووحد وما يگابل غرب
تراني گلبي ورم منو وانا گلبي اذا يورم من قندرة
اخلي البارود يصيح الويل عليهم وحق الله
اسمعععععع اسمععععع اطشر دمهم على حياطين
واخلي عبرة وسالفة تداولها الأجيال على مر السنين .
حس بوجودي من شافني مسح وجهه بكف ايده
رحت قريب منه أشرت وهمست بأذنه
_ هذولي من طرف الموروثين .
هز راسه اي ورفع اصبعه على شفته حتى اسكت
رجعت همست ولحيت واصريت بسؤالي
_ شلونها مُـرجانـة بس اسأل عنها حباب .
خزرني رافض وبعدني حتى يستمع لكلام الشيخ
ضـلـيل : اتفاهم وياكم ولو ما اريد اتفاهم
ما ارد عليك وصار ساعة اخذ وانطي خلي
يعقد عليها اگلك حتى بنص الديوان عقد زواج
البت موجود وظلتها عندو أصولية ما تنزل الراس
هسة هو لا يرضى يسلمها ولا يرضى يعقد عليها
ولا يرضى واحد مـن اخوانو يعقد عليها عود شني عناد ؟
گعدت بصفة وسحبت ايده وفتحت الصوت
ما يرضى ويعت صار بيدي عصبي توسلته
بعيوني وبقيت مثبته ايده اسمع شيخ فؤاد يجاوبه
_ شيخ ضـلـيل مقدر عصبيتك وگلت انا وياك وحقك
بس البت دخيلة عنده ما يسلمها لو مو تضغطون
بأخو وهذا مو تهديد بس بلغتك بكلامه
هو اليوم يطلع اخو منكم برضاكم غصب عنكم .
ضـلـيل : زين واخذ اخو وبعدين البت شنو موقعها ؟
_ ما يزوجها لواحد من اخوانو .
_ عجل خلي يردهااااااااااااا .
_ هو رايدها .
جر ايده وسد الصوت وكف بعيد يتصايح
وياه ونهاها بتهديد بلا تفاهم شمر التلفون
ظل يسب بيهم ، ومن بين غضبه صاح
_ شلووووووون صرتي .
_ تمام .
_ عجل ردي جوة خليني وحدي .
غـاليـة : ومرجانة .
ضـلـيل : لا تدخلين غـاليـة لا اصب غضبي بيچ .
شغل جگارة يجر بيها من كل گلبه وكعد
غـاليـة : ماعرفت منه شلونها زينة لا ؟
ضـلـيل : كلو منچ خليتي واحد *** مثل وارث يهددني
اذا يوگع بيدي دخيل الله وعبادوووووو اذا ما نهش لحمو .
خفت واعرفه اذا بعد احچي بموضوع مُـرجانـة
يزيد بعصبيته ما يقل هاي اذا ما ضربني لان فاقد
كل ضبط اعصابه بهل دقيقة ، تماسكت وهمست
غـاليـة : البيت فارغ .
ضـلـيل : عساه دووووووم فارغ ومهجوم .
مشيت بتجاهه كاعد مدري شيسوي بالتلفون
يتصفح سريع بدون تركيز ، بلا تردد كعدت على
رجله وخليت راسي برگبته طبعت بوسة بعد بوسة
بعد بوسة بكُل هدوء وحذر ، وبيدي افك اول دگم دشداشته
تاركته يحلل قيدوه ويحس براحة ، وبعدني على حالي
بدون ما اشوفه سحبت الشماغ وعگاله وشمرتهم على صفحة .
رفعت جسمي اخذت التلفون خليته بصف الأغراض
مسحت على صفاح راسه منا ومنا بحركات دائرية
رجع راسه على ديوان يتنفس براحة
غـاليـة : تعبان .
_ تعبان اي والله تعبان .
_ هاك بوسة .
_ ههههههه .
ضحك متذكر الموقف وفتح مركز بيَّ وسحبني اكثر
غـاليـة : انقهر من اشوفك عصبي .
ضـلـيل : هو اكو غيرچ يوصلني لهل صخام العصبية .
غـاليـة : وعدتني تضبط اعصابك .
ضـلـيل : هذا صخام البين الهدوء انا وياه مو صحبه .
اشرت على بيت وسألته بفضول
_ وينهم .
_ طردتهم واذا يرجعون رشيت البيت نفط
اشغله بيهم وانعل خيرهم موتوني تعبت .
رسم خط تحت عيني اعرفها صار بيها سواد من الوجع
_ تشوفين هذا البيت غـاليـة .
_ متعبني هل بيت .
_ والنآس كلها العايشين بي وطردتهم ؟
_ شبيهم ؟
_ انتِ أغلى منهم .
اخذ ايدي باسها وحضنها بتملك
_ انتِ بيدچ تموتيني وبيدچ اطفيني .
عرفت قصده على الكلام الصار بيني وبين امه
وتهديدي بموته نزلت راسي مرتبكه رفعه بطرف
اصبعه مقهور قهره مبينه بعيونه بكل وضوح
مكسور خاطرة مني وكاره حتى روحه
غـاليـة : وروح ابوية جنت عصبية وما اتذكر
كلامي صح جفصت بس مو قصدي .
اريد اكمل رفع ايده يمنعني وكمل
ضـلـيل : بيني وبينچ اقبل اموت وانتِ ذابحتني .
غـاليـة : لا بس .
ضـلـيل : تريدين موتي ، تفضلين الدنيا كلها
عليَّ ادري وحق الله ، ومتقبلها دام انا احبچ
واعرف ما مقصر وياچ وشني يجي بيدي
حتى احصل فرحتچ أسعى بي بس بالمقابل
شغله وحده رايدها منچ ترفعين شاني بين الناس
واهلي لا تصغريني لا تبينين ضعفي .
غـاليـة : انتَ اذا صدك تحبني تعذرني
انا گلب ام وبنتي بين الحياة والموت
ضـلـيل اذا مُـرجانـة تموت اموت روحي
وادفني وياها بنفس الحفرة .
ضـلـيل : اشششش لا تحچين هيچ وتفورين دمي .
غـاليـة : بس اسمعني مُـرجانـة صغيرة وفقيرررررة
افقر بناتي وعاشت مظلومة بين موت ابوها وفقد نطقها
والمشاكل الصارت وشردتها راحت للمجهول شحالها
والله كل يوم اموت الف موته عليها شلون ادبرها
فقيرة تعرف شنو فقيرررررررة .
ضـلـيل : قبل لا تطلع شافت ننوس بحضني
گالت اتمنى انتَ ابوي وتحميني لليوم منظرها
هنااااا طمغ برررراسي .
غـاليـة : ما اتجاوز حدودي بعد واطلب حمايتها
منك بس اختصرها وياك ، تحبني صدك تحميني
وتحمي بناتي وفر أمانهن وأماني ، مُـرجانـة تشتريها
تحبني اشتري بنتي من الموت لا تفجع گلبي
بيها ، ومني ألك مثل ما تريدني اصير ، بيوم ألي افقد
بي أمانك وحمايتك تعذرني على افعالي بعدها .
ضـلـيل : جنت اعرف مكانها وما بلغت
أذا تظنين سهلين غلطانة شيوخ كبار عرفت
وطش خبرها بكل العشيرة ثار الصغير قبل الجبير
تردين شلون اسكتهم اكعد بنص ديوان واگلهم
” والله امها شردتها ، وتگول عوفوها عند الموروثين
صح ما يقبلون يعقدون عليها بس عادي امها تگول
عوفوها هيچ سبيل گاعدة بيتهم شرفكم مطشر عادي
غـاليـة تگول وانتوا تنفذون وانا صح شيخكم بس
اسمع كلام غـاليـة حتى ما تنقهر عوفوها يلة عوفوها ”
كيكي اني كيكي مركبهن وگاعد بنص الديوان .
صفنت محتارة شحچي ذب حسرة وكمل
_ انا افكر بمنطق ، تفكيرچ بالعاطفة
تعرفين كلامي صح ، بس عاطفتچ تتحكم بيچ
تريدين حل فكري بالمعقول وبالمنطق وانا خادم .
غـاليـة : حلها اتوسل بيك حلها .
ضـلـيل : كلشي بيدي اسوي ما اقصر
وصغرت روحي الخاطرچ ورديت عليهم
يستنكف وارث يحاجيني حتى بالتلفون مدري مسودن
مدري شماله ما يحچي سودني ، اعقد عليها
ماكو رد اخوك عدنا يهدد ويتوعد اليوم بليل
يصيح اعلمهم شلون ياخذون اخوي عجل يـ*** حرنا وياك .
تلمس وجهي من شاف الحيرة ملتني والحزن
تمكن مني حضني يبوس براسي وما اسمع
غير عيطه هزت الديوان
ام ضـلـيل : البغدادية گاعدة بحضنووووو
تاكل براسو حلاوة طبعاً يطرد كل اهله
ويخلي البيت البيت لمطيرة طارت بي فرد طيره . .
نهضت بسرعة مخبوصه اعدل بروحي
وضليل يدگم بالدشداشة ويلف بالشماغ
عفتهم وطلعت بقت هيَّ وياه خدرت جاي
حتى يصحصح والله گلبي ممرود عليه وعلى حالنا
اخذته وفتت عليهم زعلان منها ما يقبل يحاجيها
وهيَّ بيدهـا تلفون مدري منين ويباع ودار منها
خليت الجاي قريب منه فرت التلفون وصاحت
_ حلوة هل بت اصغر منچ اريدها لضليل .
غـاليـة : ما مكسورة عينچ عجيبة تضربين
وعادي تحچين وانتِ ام الراهي تخطبين .
اخذ الجاي وابتعد ليغاد
ضـلـيل : كافي راح يرجعنا نتخبل ما نرررتاح شلووون .
ام ضـلـيل : اريدك ترتاح .
ضـلـيل : شاكي حالي عندچ .
غـاليـة : اندري ؟
ام ضـلـيل : لا عفاف ودلال بيهن خير ولا هاي تريد راحتك .
ضـلـيل : اي وهاي شنوووو تضمنيها .
ام ضـلـيل : وروح ابوك تستاهلك .
ضـلـيل : يماااااااااااااا ، محدّ يستاهلني غير غـاليـة
ويا النفسسسس هنااا هناااااا ويا النفسسسسسس .
غـاليـة: تهجمين بيووووت والله .
ام ضـلـيل : العرمة اخاف على شيخنا منچ .
غـاليـة : لا تخافين مرتاح وينتظر ولي العهد مني
كفونا شركم نريد نعيش براحة دوختونا وتعبتونا .
ام ضـلـيل : عشنا براحة والله اذا منچ ولي العهد
جبتي البت هججنا من البيت ويتراعش عليچ
اذا تجيبين ولي العهد شيسوي .
دفع علاء الباب وصاح وراسه يجري دم
_ عمي كتلونا ذبحوا ولدنااااااااا .
ضـلـيل : منووووو احچي بهداي فهمني .
علاء : شيخنا واحد مشوهه طرنا بنص اراضينا ..
مُـرجانـة …
ام بيرغ : اي بعيني هاااي اللي راح ياكلها الدود شفتكم
تريدها عوووف الحرام يا ابن ساجر وتزوجها .
وارث : احب اخذچ على گد عقلچ ، فد وحده مخرفه
والخاطر امي وابنچ صابر بس شوفي لا تندگين
ويايَّ اخليچ مخبلة تفتريد بالشوارع ولا سگط بحالچ .
بيرغ : لا تتجاووووز ما گالت غلط شعندك فوك .
تقدم عليها رفع اصبعه يحذرها
وارث : ما اخليچ تلوين ذراعي ومو بكيفچ اعقد
البيت بيتي والدخيلة دخيلتي اصعد فوك اختل بيها
اعقد عليها البيت بيتي ماتريدين حرام ولي طلعي
حجي زايد بنص بيتي ما اريدددد اسمععع
وانتَ قندرة عاجبك حجي امي اطلع وياها
لا ألزمك اخلي ضيم گلبي بيك .
رفع ايده يطرد بيهم عبالك يكش ذبان
وارث : يلة بررررو منااااا برووووو لا وبدر الهواشم
اشمركم من فوك ، تسوي روحها زينة غايتچ
ما احققها على گص رگبتي .
ام بيرغ : هو هذا الشريف ما يعيش بيناتكم .
وارث : تسكتين لا اسويها الطف عليچ اجرد تاريخچ ؟
ام ببرغ : تاريخي هذا شماله ول يمااااا بيرغ .
وارث : وغمه تفزعين اخوي عليَّ ههههههههه
ادوس راسه بقندرتي شوفي لچ سكتت هواي
همااااااااااااام وينك هماااااااام امك افرغها
من ذمتي واحب ابلغك بندر ام بيرغ دخلته على ميمونة
حتى تحمي ابنهاااا شهاااب لان عرفت كاعد يدور
عليه واذا يوگع بيده يسوي مقبلات هررس هرررس .
ما لحگت حتى تبرر بيرغ يدفع بهمام
وامه شگد هلكانه من التعب على بتها
وگعت عليها تكتل بيها وام بيرغ تملخها
وام وارث تفاكك بيهن وتصيح بوارث حتى يتدخل
التفت عليَّ وابتسم بتلاعب
_ ها خوش استعراض ؟
مُـرجانـة : عزا ألزمهم ميصير .
وارث : يصير ليش مايصير .
قبل لا يطلع اقترب غمز وبصوت ثگيل كمل الكلام
_ اكرز بيهم مشاكل اذا يخططون يقهرون مُـرجانـة .
ماتحملت اخفي ابتسامتي وهمست
مُـرجانـة: اوي جنتل مان .
جر بيرغ من ايده ودفعه بغرفته
وقبل لا يسد الباب صاح
_ كملوا عركتكم جوة ، يمه عينچ على مُـرجانـة .
ظل وياه ختلت بالغرفة وام بيرغ نزلت تسب
وتهدد بأم وارث وهي تتجاهل بيها وام همام
ما خلت غلطه تعتب عليها ، من طلع بيرغ
يخوووف يخووووف بگد ما عصبي اخذ امه
بالغرفة وشوية وطلع هو وياها من كل البيت
صعدت ام وارث شافتني وراحت مستهمه
على غرفة وارث دخلت مداهمة صاحت
_ هاااا وارث شگلت اناااااا شحچيت ليش تعصي كلامي .
تلمست رجلي ونزلت على صوت حمامة وغريب
يبچون اثنينهم وزهرة تحاول تسكتهم وتقنعهم
طلعت ام همام تحچي وتنطيهم حلويات ما يسكتون
بجت وعينها على همام
_ ميمونة سودة بوجهي جانت تعرف تسكتهم .
سَــهم : جانت تشتغل رقاصة حتى تضحكهم .
وصلت لنص الدرج همام شال حمامة وغريب
بيد سَــهم يركضون برا رغم خوفهم وحزنهم
شغلوه اغاني بالسيارة وتركوا الباب مفتوح
مخلين الأطفال على سيارة ويتمايلون وياهم
يضحكون ويهوسون الحد ما سكتوا وخربوا
ضحك التفتت همام شافني اجه باتجاهي
يصفك ويحرك براسه منا ومنا ورفع ايده
فوك راسي عود يفرني بخياله خليت ايدي
على شفايفي وضحكت احس خدودي اشتعلت
نار هز اجتافه ورجع على حمامة وغريب
شال غريب يشمر بي ، وسهم حاضن ايد حمامة
يفر بيها ، صد رجع همام صاح
_ ول مُـرجانـة صفگي خليهم يضحكون .
رفعت ايدي صفگت أجاهد ما تنزل دموعي
احس بگلبي مقبوض ابد ما مرتاحة هنا
رجع همام تقرب يلطف جو يطگ اصبع
ومن عيونه وملامح الحزن ينقري قرايه
رفع أيده مدري شبي عبالك يگول مستسلم
نظراته ورايَّ درت نفسي شفت وارث .
واكف قريب مني بظهري رجعت اشوفهم
ظل ما متحرك خفيت توتري اريد ابتعد
بس ترددت صبرت روحي ولميت ايدي الصدري
حتى ما ابين رعشت ايدي بقربة مني
غمضت عيني من حسيت بدخان الجگارة
قريب مني ضرب بنص وجهي مر مني وصاح .
وارث : زهرة .
زهرة : ها عيني .
وارث : يلة أردكم .
زهرة : دقايق عيني بس اجمع اغراضنا .
نزل حمامة وغريب وبدون وهو يطفي السيارة صاح
_ روحوا بوسوا جدتكم حتى نرجع على بيت .
رجعت خطوتين للخلف راقبت زهرة تلملم بالأغراض
وابتسامتها ما غابت ، دخلوا همام وسهم تعبانين
يسبون بأم بيرغ مقهورين منها
همام : مُـرجانـة نريد جاي راسنا راح ينفجر .
تحركت سريع اشغل بالطباخ وخليت الجاي
وطلعت إسكانات طلعت زهرة بيدها جنطة
ورجعت اخذت بعد كم غرض ، ظهري على باب
واسمع بس صوته يسألنيمن راحوا همام وسهم
وارث : شكو هنا شصاير ؟
مُـرجانـة : اجهز جاي لهمام وسهم .
وارث : احمممم شلون صارت رجلچ ؟
جاوبته بلا نفس وبصوت حتى يمكن ما ينفهم
_ زينة .
_ بيچ شي ؟
_ لا .
_ بالله عايني وحاجيني .
سويت روحي احوم بالمكان الحد ما طلعت زهرة
ركبت السيارة اشرت عليهم وبكل برود حجيت
مُـرجانـة: اطفالك وزوجتك ، العفو المربية ينتطرون برا .
وارث : ارجعهم وارجع .
رفعت اكتافي بمعنى مايهم ورحت على باب
مُـرجانـة: سَــهم همام تحبون الجاي حلو لو مر .
سَــهم : وسط .
همام : حلو حلوووو والله حلووو .
رديت شفت القوري ولاحظت قلقه بالوسط صايرر
بين يروح وبين يظل ، رجعت زهرة وهمست
_ كملت وارث .
طلع يروح ويرد بالگراج تالي شغلها وراح
قدمت الجاي وام وارث طلعت من غرفتها
_ يمه مُـرجانـة تعرفين تسوين كنافة ؟
خفت افشل واستحيت ارفض بقيت اتذكر
الطريقة وجاوبتها بين الرفض والقبول گلت
_ اي مايحتاج الها شي سهلة تحبيها بالقشطة .
ام وارث : إي والله، يمه سَــهم هاي القائمة نريدها
من هاي الأسواق حتى اخيتك تسويها .
اخذها منها وضم تلفونه وطلع رحت غسلت
ورجع يطلع بالأغراض وهيَّ فرشت السجادة
تصلي بالغرفة وهمام رجع الاستكان وسألني
_ ها ضاربه دغله مبوزة يولو .
مُـرجانـة : اكلك هو اثرم الشعرية مالتها مو ؟
طلع تلفونة بحث وتقرب يخليني اقرا وياها
همام : اي ثرميها وخليها تتلابس بالزبدة المذوبة .
مُـرجانـة : اذوبها بجدر ؟
همام : بالفرن .
مُـرجانـة : يا اخاف ميصير .
همام : وحق الله كلشي يصير جيبيها افتحها .
اخذها وخلاها بنص بايركس صغير وشغل الفرن
بقيت ادور على خلاط وهوَ ويايَّ وسهم اجه ويانا
بعدين صاحت ام وارث بينا ودلتنا بالملحق بصف الطباخ
بثيت اثرب بالشعرية وهمام يذب عليها زبد وسهم
يدعك بيها ، اخذتها ارص بيها حسب تعليمات
همام وهوَ يفتح بالقشطة ويعدل بيها
سَــهم : هيو احنا شكو نشتغل .
همام : بعدها صغيرة تروح تنجرح
تگب نار ويصير بيها واوا .
أبتسمت وابد ما درت من رجع وسمعت
السيارة تدخل بقيت اشتغل وهمام يوزع بالقشطة
ويرش جبن وانا اعدل بالجوانب
سَــهم : ها وروثي رجعت ما تأخرت .
وارث : شصاير ؟
همام : نجهز كنافة ، مُـرجانـة هنا بعد كنافة زيديها .
مُـرجانـة: تصير مطيبة اذا شعرية هواي .
همام : رأيچ هوَ رأيي ما نختلف .
وارث : مُـرجانـة .
مُـرجانـة: ها .
وارث : چاي .
همام : عمي عيب البت ما تشتغل عدنا
امشي سَــهم جهز جاي زين منها تسوي كنافة .
مُـرجانـة : همام شغلت الفرن ؟
سَــهم : شغلته بس خليها .
همام : انا اخليها كملتي اخذها .
مُـرجانـة : بس قلل النار حتى ما يخرب لونها وتذوب .
وارث : سهمممممم طفي ما اررررريد چاي صاعد انااام .
طرنا بلحظه عبرنا وصعد عقلي تخربط
وضاق حتى النفس بصدري صار كل تفكيري
بصوته وعصبيته وعيني تعلگت بالدرج
اجت امه طلعتهم وبقت يمي خدرت جاي
صبت اثنين اخذت واحد وكعدت على كرسي
بصف ميز الطعام واشرت على ثاني
_ خالة مُـرجانـة ركباتي توجعني ادري
تعبتچ بس جانت ميمونة شايلتنا شيول
بندارتها ضعنه بدونها وعلي ، ما اريد اتعبچ
بس صعدي هل جاي لوارث فدوة لطولچ .
بلعت ريگي ومشيت اخذته وصعدت رجلي
خيوط امشي واغلط على روحي ادردم
على وضعيني اذا ما تجرين عدل يا مُـرجانـة
ياا حتى عقلي ما يجمع هسة شبيه عادي
افوت اخلي الجاي واطلع ركض ركض
ما ارفع راسي وعبالك ما شايفته
أحسن حتى هذا انوب الحساس الخايس
اخلص منه وارجع طبيعيه اي لازم ارجع
على طبيعتي قابل فد نمونه هل وارث
شايف روحه فرد شوفه عبالك الله خلقه
وكسر القالب من بعده .
ضربت الباب كذا مرة ماكو رد فتحته
متردده ودخلت لمحته گاعد على سرير
ما يشوفني لابس سماعات مقابيله
لابتوب يشتغل عليَّ وايباد مشتغل
على صفحة ومرفوع اتقرب وتتوضح
صورته وسعت عيني بصدمة
من شفت فاتح كاميرا الغرفة وكل كم
ثانية يسرق النظر عليهم منتظر ادخل يمكن .
تراجعت كم خطوة ونزلت بلغت امه
گالت ميخالف فوتي هو گاعد ما ينام
ورجعت اضرب بالباب تالي مشيت
سريع خليت الجاي هو شافني
وعبالك شاف جني طبّك الأيباد بالمكتب
وصدر صوت كلش عالي غمضت على اثره
فتحت بطيء يشمر بالسماعة
وارث : ماكو احم دستور .
مُـرجانـة : دكيت الباب نزلت خالة كالت رجعي
واحتاريت شنو اصعد وانزل حتى ضعفت .
وارث : شدعوة عصبية ؟
مُـرجانـة : صار بارد اغيره .
وارث : احب البارد خلي هنا .
نزلته وطلعت من الغرفة كلها شفت
الكنافة لگيت ام وارث تسقي بيها
وخلتها بالثلاجة ، نص ساعة وزعتها على كل
محد بيهم عنده نفس ياكل وهمام يخابر
برا يريد يوصل لعنوان ميمونة ، تعبت وصعدت
كعدت بالحمام فكرت شخص يراقبني تخنگني
بقيت لا ساعة ولا ساعتين صافنة بزماني
بجيت وانا اتذكر ايامي بعز امي
وضحكت غ ذكريات ننوس
ياترى بعدها تحب اسم ننوس عابد
لو اقتنعت ؟ نقش شحالها ؟
الف فكرة تصير براسي ، هلكت وقررت انزل
دگيت باب ام وارث جاوبتني وصوتها مبين نايمة
فكيت الباب وصدك نايمة لگيتها فد متت بدمي من
الخجل تقدمت قريب منها وبضياع حجيت
_ خالة عادي انام بغرفتچ ؟
گعدت على حيلها شغّلت الضوه وتتلمس بوجهي
_ منو وياچ بس لا هاي ام بيرغ ضربتچ .
مُـرجانـة: ليش رجعت ؟
_ اي قبل ساعة .
درت عيني اشوف بيش الساعة صار ساعتين
ونص بالحمام ومتعجبة ليش جسمي يوجعني
مُـرجانـة: لا محد ويايَّ بس اخاف وحدي .
طلعت فراش ومخده وبطانية فرشتهم
وجرتني من ايدي نومتني وتنزع بشالي
_ نامي خالة لونچ مخطوف نامي مرتاحة
وهذا حتى الباب راح اقفله حتى محد يزرگ علينا
اربعة وعشرين ساعة مخنوگه بهل شال .
تلمست حز الشال عبالك مذبوحة من الوجع
مددت جسمي ظهري واكف طگطگته وغمضت
ضايع حيلي بعد نمت براحة ساعة وساعتين
واربعة مرت فزيت على ضربات قوية
على باب وصوت وارث وهمام وسهم يتصايحون .
صحيت مستنده على حايط لميت رجلي لصدري
وافرك بعيوني نعسانة مطفيه على أخير
ام وارث : خيركم يمه شمالكم بهل ليلة اصواتكم ترعد .
بيرغ : هذا يگول مُـرجانـة شردت .
سَــهم : بيدي قفلت البوب شلون طلعت .
ام وارث : يا وينه هذا امشي صيح بي .
سَــهم : هو وهمام طلعوا يمكن شغلوا السيارة .
بقيت على وضعي وعضيت شفتي
ام وارث : صيحهم لا يطلعون البنية عندي .
ركض سَــهم وبيرغ يسب بيهم خربوا نومته
وهوَ تعبان وعلى فد ركضه صار ايام هو دخل عاط بي
_ مُـرجانـة بغرفة امك خبصتنا .
ام وارث : والله هبطتني من نومتي السكر صعد .
ركضت على حمام وطبگت الباب وبلشت اصواتهم تبتعد
رجعت راسي على مخده نعسانة ، انفتح الباب
گلت هاي خالتي وبقيت مغمضه وجهي على حايط
درت جسمي على دگات الباب جريت الشال
غطيت شعري ورفعت جسمي من الفراش
وارث : مُـرجانـة .
مسحت على عيني ورديت
_ خالة بالحمام بعدها .
ترك الباب مفتوح ودخل وكعد على چرباية امه
دك على صدره مزعوج من ملامحه عكس صوته
والهدوء والتودد الي حسيت بيَّ
وارث : انا سويت شي يزعلچ مني .
مُـرجانـة : ها .
حجيتها وامسح بعيوني وانزل بشالي
اغطي برگبتي واجر بجسمي بالبطانية
مُـرجانـة : لا ماسويت شي ليش شصاير .
رجع شعره وسند ايده على ركب رجله
الله لا يوفقچ عيوني انزلي ولچ انزلي
لا تشوفي خلي يمل ويطلع .
يحيط بي سكون غريب
ساكت حذر بكلماته مايريد يغلط
وارث : نايمة هنا صاير شي
اختفيتي من الغرفة دورت ماكو .
مُـرجانـة : وانتَ شلون عرفت انا ما موجودة بالغرفة .
وارث : رحت وشفتچ ماكو .
مُـرجانـة : ليش تروح على غرفة انام بيها بليل ميصير .
وارث : مريت على حمام وشفت الغرفة قارغة .
مُـرجانـة : ميصير تجذب .
وارث : مُـرجانـة الكاميرات ما اشيلها
وترجعين تنامين فوك ، وجودهن يأمن على حياتچ .
مُـرجانـة : ما اصعد بعد ولا أعتب عتبة الغرفة
دام الكاميرات بيها ، بنية ملزمة وتربيت ما انكشفت
على احد ، مو حيوانة وتراقبني، ولا رخيصة واخليك
تكشف ستري ، انام والنايم مثل الميت شلون
تراقبني اخليك شلوووووون .
هز راسه ورد فعلي صدمته طلع من الغرفة
وصعد رجله ادگ بالدرج يطلع صوت قوي
رجعت امه قفلت الباب وشغلت انارة صغيرة
وفتحت القران تقرا بصوت هامس
غطيت راسي ودموعي تتسابق على خدي
وايدي على گلبي .
اريد يروح من بالي ربي دخيلك اتوسلك اني اتوسلك
رافضه افكررر بي رافضه انتظر شوفته
اكره لهفتي لكلامه وحركاته ومراقبتي
هاي مراقبتي أكرها شهگت بصوت عالي غصب عني
حسيت بخالة تقترب لابسة جادر صلاة
وبيدها القران درت بحضنها مسحت على گلبي وهمست
_ الله ومحمد وعلي يبردون گلبچ
أم البنين تحرسچ ، وابو اليتامى يعطف
على حالچ ويسخر ناس تهجم وتبني لأجل عيونچ .
مليت ابچي وافرفح تعبت شلت قهر بعمر
المفروض أعيشه براحة والله گلبي يوجعني
على ضيمي شوكت ارتاح بس اريد اعرف شوووكت
غمضت عيني وبيني وبين نفسي دعيت عليهم
دعيت على ال ضـلـيل كلهم وأولهم ضـلـيل
كرهته مثل ما يكرهني كرررهته ، مثل ما دمروني
هو واهله الله يدمرهممم .
مسحت ام وارث دموعي وقبل لا ترجع رددت
_ ارتاحي وريحي عيونچ خالة
وديري بالچ على گلبچ .
مسحت على راسي ورجعت على سجادة بلغتني
_ بعد اربع ايام عرس بيرغ وراح
تصير خبصه من باجر نامي خالة نامي .
ملِكه ..
امسح برمشي دموعي تجري ، ماكو بعد رحمة
بعد الصار بيَّ عرفت الناس ما ترحم وكلمن ومصلحته
دفرت الفستان برجلي وشمرته ليغاد عني
جنى حضنتني رفضتها وجريت نفسي
_ ليش ملِكه تزعلين مني انا شسويت .
ملِكه : بس يخلوني البس هذا الفستان واطلع
من هذا البيت ويعرفون ما طايقتو يزفوني الحذاء
ما رايدتو ، تخسروني كلكم وبعد ما أرد هين لو اموووت .
خلت امي الصينية بصفي واخذت ايدي بيدها جريتها
مسحت دمعتها وداست على روحها تحاجيني
_ اذا ما تاكلين يفوتون يضربوچ ول شلعتي
گلبي ملِكه يمه ليش هل عناد .
ملخت وجهي تملخ متعمدة اشوهه بروحي
وشعري متفته تنتف صرت مهبولة واصرخ
_ وافقووووووا ول يا مصيبتي يزوجوني
قنعوا ابوي شلووون اقتنع وينووووو
هووو وينووووو مو يگولون طلع من السجن
وينو بس اريد اعاتبو شلون يقبل بكسرتي .
دفعت الصينة وكلشي بيها يطشر دفر
عمي الباب ودخل على طوتي نامت امي
عليَّ وتحلف بي يطلع وهوَ يسب وانا اسب
بيهم فقدت عليهم ولو عندي حيل وحق الله
لو كاتل لو مكتول هل جبنان ، رجفهم الخايس
هل حذاء هذا رجفهم خلاهم يتراگعووون راس براس
ينطوني بتهديداتو ينطوني ، ما فكروا همَّ زلام عود
وما يگدرون لهل سويقط كون اكضه اشرحو
ادحگ شني نايم براسو قندرة ابن القنادررررر سويقط .
مقهورة من اهلي بس خفت على امي واخواتي
وسكتت منهم وبعد حتى ما تنفست بس كورت
روحي ورجعت اناشغ بيني وبين روحي
الثاني يوم ، من دخلن نسوان اثنين اعرفهن
بالمنطقة من وحدة تتزوج يدفعون لهم فلوس
وتجي تنظف العروس وترتبها هي واختها
لعبت بيهن لعب وأمي وجهه شحب من قهرها
ملِكه : اروح هيچ شبيه قابل انا عروووس
مو عروس اول تالي أرمل روحي اذا ما اجلطو
مو بنت ابووووي خوووش .
ام ملِكه : مو عروس بس رايحه الحياة جديدة
وعالم غربة يمه رتبي روحچ كلشي عليها الدنيا .
وعركة منا والنسوان اثنينهن كل شوية
وها خطية امي وشكد عرمة وشلعتي گلب امچ
سلمتهن روحي على اعصابي وكل ساعة اعيط
بيهن حتى يعوفني الحد ما طلعن يمكن استلمني
دعاوي وسب ، صعبت عليَّ نفسي من دخل ابوية
يدير بعيونو مني ما يگدر يشوف الدمعة بعيوني
_ قنعوك بوية رضيت بكسرتي ؟
ابو ملِكه : كون تطلع جنازتي بوية قبل لا تنزفين
بهاي حالتچ وكسرتچ ، لو جنت راضي ولو قطرة
على هدم فرحتي كون بهل دقيقة الله ياخذ عمري
وتعيشين اليتم قبّل عرسچ .
ملِكه : ما اريدو بوية راح ..
نزل لمستواي ما يگدر يخلي عينه بعيني
فتح ورقة ومن رعشت ايده شي اقرا وشي ما اقراها
ابو ملِكه : اخو وقع تعهد اذا يخدش هل بيرغ
طرف اظفرچ اخو يتحاسب وهوَ يدمرو
دگ صدورو انتِ بحمايتو .
لطمت شرد ما اقتنع لا بورقة يسموها تعهد
ولا بحلفان منهم ، عمامي اكلوا روسنا
زواجها سترها حتى لا ننفجع خلوها تنستر
لا نتجهول بالحبوس وحتى ببيوتنا ما يخلونا
وابوية بين الرافض وبين المقتنع من خوفو
تأيد يمكن وياهم ويمكن تهدد .
كلها باعتني هل كلمة بيوم عقد زواجي
بأنسان اقل ما يقال عنو فاقد الرحمة
متربي هو وابليس ، مدمر نفسي وجسدي
دمرني وبعدني ما عايشة وياه لو عشت شيصير.
رفضت أقابلو بهل يوم وقفلت باب غرفة
حتى ما يحبطون تجاهلي وعنادي ورفضي
وراح وهو وشيوخهم عمامو واقارب اهلو
كلهم زلام مابيهم حرمة ، وكفخوني كفخ على هامتي
من سمعت العرس بعد ايام معدودة واروح
عند شخص مثلو ادمرت تركت الاكل عشت
على سوائل وعيوني صارت تغوش گد ما ابچي .
انهيار ما بعدو انهيار ، ضعف ما بعدو من ضعف
انهيارات داخلية وخارجية ، يرتبون بوجهي
يلبسون بالبدلة ودموعي تخرب المكياج
اهز براسي ما يعرف انا شنو من مصايب مخططة
اسبوع واخلي يرجعني لهل بيت .
كعدت على كوشة وترتيبات المكان نسوان عمامي
اهل ابوي واهل امي ملمومين، وأصوات عراضات
وسيارات تشخط بالشوارع تعلن عن وصولهم
حلفت بداعت ابوي عزيز گلبي دموعي ما تنزل
مو هل ساعة وانكسر ويشوفني ويتشمت بحالي
دخلن نسوانهم مو جثيرات قليلات ومبين كلهن
متمكنات وحالتهن توب لان عماتي والصوبي
من اهل امي وابوي متعجبين على الرقي
وكمية الذهب لابساته يصفن المطي مو بس هذني .
بقيت مبوزة على حالي انوح بصوت سألتني وحده
_ ليش ما تضحك وفرحانة عروستنا .
ملِكه : لأن مجبورة العروس وتكره العريس
حجيتها وكلهن فكن حلگهن وعيونهن عبالهن
اجذب اكدت على كلامي الحد ما دخل بيرغ
هو من بعيد يهف لابس رسمي وجهه اذا اجيب
سيف حاد اگصه بي ما ينگص خاب الخايس عليمن
اخخخخخ يا ناررررر گلبي اخخخخخ .
رفع ايدو وامو من فات تهوس صارت جانت
مادة البوز والنسوان يضربن بيها عكس
حتى تحس وتهوس وتفرح حتى لو جذب
ويا سبحان الله من اول ثواني لا حبيتها ولا حبتني
عدلت البدلة وكفت هذني نسوان عمي الحقيرات
عود احتراماً هو دخل كعدت رافضه اقدم احترامي
لواحد مثله ، يمشي ويباركون وصل يمي
والمصورة تريد تصور اجت حرمة بعمر جبير سألته
_ صدك عمه البنية ما تريدك ومجبورة على زواجها .
بيرغ : منو گال ؟
حسيتو يدحگ عليَّ درت وجهي لذاك الصوب
جاوبها وهوَ يمد ايدو على خصري ويجرني
رفعت راسي ادحگ بوجهه وادفع بأيدو بدون
ما يحسون فد ضخمه وهوَ كلو طولو وضخامتو
مو قانونية مثل البشر شكبرك تصير بعد امداك
بيرغ : ماكو هيچ اخذتها على حب بيناتنا زعل
حبايب وهيَّ ماعدها سلطة على لسانها .
ملِكه : شيل ايدك مني شيلها لا اصيح .
بيرغ : شعملتي يولووو مخزيتناااا .
ملِكه : انا انسانة ماحب الجذب
يريدني ارگص وانا اريد اموووت .
بيرغ : تعاي خلي نسوي روحنا
نتهامس مثل باقي العرسان .
_ خاب احنا جنايز مبين ذاك هووو .
_ عجل راح اصيح يزفوني عليچ ارگصچ على طريقتي .
_ مقهورة عليك .
_ مقهور عليچ جثيررررررررر .
_ تعرف شنو ينتظرك .
_ لا بس اعرف شنو ينتظرچ .
_ سويقط .
_ بربوئه .
امو وام اخو وارث ركضن يدگن على خدهن
يريدن نسكت عتيت الورد واشرت على ابنها
_ ابنچ ما متربي يگول عليَّ بربوئه .
ام وارث : يا عيب ولك هاي مرتك .
بيرغ : هيَ گالت عليَّ شسمه استغفررررر الله .
انطم وسكت ما يگدر يكول شنو اگول عود حتى
ما يخرب البرستيج وهوَ شخصية قوية ومرموقة .
ملِكه : اي بالله شنو حچيت حتى تگول بربوئه .
بيرغ : زفوني يما طلعونا وينهم هذولي
بعد ما اتحمل اذا ما اررررربيهاااااا .
راحت امو تنطيهم خبر دخلوا اثنين شيوخ
وقبل لا يطلعوني ابوية فات مكسور مهضوم
حالتو تصعب على عدو ترخص منهم واخذني من
ايدي دخلني على غرفة كعدني ودموعي سبحت
خدودي تجري وتشكي واهز براسي عطت
_ ما اريدووووووو بوية راح امووووت دخيلك
اكرهه اكره ادحگ بخلقتو ما اتحمل اعيش وياه .
ابو ملِكه : الشاهد الله كلها ضدي بوية لو گلت
ما تتم هل زواج يساعدونا بكسرتچ وهمَّ يدخلونو
لان يخافونهم ، اعرضچ واعرض خواتچ لخطر .
دخلت امي گعدت يم رجلي تبوس بيدي وخالتي
فتحت الباب هو يريد ياخذني واخوانو اثنين
منهم موجودين وعمامو محد همني من الناس
ومن نزلت دموع ابوية صحت بعجز
ملِكه : ريتني ما نزلت من السيارة بووووووية
ريتني ما رفعت صوتي وتعاركت ريت بذيچ الساعة
ميته لو مشلولة درس واخذتو بوية بعمرو الصوت
العالي ما يحل مشكلة بس يبلينه بليت روحي
دمرتها بصوووتي بوية ريتني خليتك انتَ
تحلها بطيبتك واسلوبك وهدوئك چان مرت وانتهت
شسووويت برووووحي اناااا شسووويت .
بوية : وهل درس امشي بي بحياتچ الجديدة
اعرفي الصوت العالم مو قوة هذا ضعف
اعرفي الاحترام احسن من قلة الأدب
وتعاملي بأصلچ بطيبتچ صيري مثل ابوچ .
جريت عيوني حتى اشوف ابوي
دموعي حجبت شوفتهم
اخذت ام وارث ايدي وگعدت بصفي
_ خالة صح بيرغ عصبي بس گلبه طيب
وعنده اخت ومثل ما يخاف الله بأخته يخاف الله بيچ .
ملِكه : هددني قبل دقايق هددني بوية .
ام وارث : هو يهدد بس متربي على ايد
ابو وابوهم الله يرحمة معلمهم قاعدة الحرمة
ما تنضرب ولا تنهان .
ملِكه : خالة انتِ ما سمعتي كلامه .
ام وارث : وهوَ يعرف شنو ينطيچ يحصده
ينطي حب يحصله
ينطي كره يحصده .
تمسكت بأيد ابوية وحضني يبچي وانا ابچي
ام وارث : توكلي على الله ابوچ راح يوگع وامچ
مريضة سكر لا تخسريهم من هل يوم
انا وام بيرغ بمكانها واعتبري وارث أخوج
اذا بيرغ صاح بيچ اوف يمرعد راسه
امشي يمه امشي لا تخافين ولا تبجين .
طلعوا كلهم حتى ابوي وجهي خريطة
جنى عدلت بي قليل فكت الباب وطلعت
ميته والله ميته وصلت بصفه وام وارث سمعتها
تهمس : ولك البت راح تموت من الخوف فك وجهك .
بيرغ : هانتني بما فيه الكفاية اليوم لا تزيدها
فكونا طلعونا يلة بساعكمممممم .
اقاربهم ملتهيات ركص وضحك واكل
ما يسمعون بس هو سامع كلشي واخوانو
من ملامحهم مبين سامعين وامو بودها تذبحني
تقدم شيخهم وعمامي اثنين يباركون اخذ ايدي
بين ايدو اجر بيها مردها مرد رافض يعوفها
صعدنا بسيارة العرسان صعدوني فحطت
من البچي فرفحت فتح واحد من اخوانو الباب
قدم بطل ماي وبضحكة گال
همام : يولو البچم بالضيم الكحل مصخموووو .
ضحكت وامسح بوجهي وايدي تلغمطت كحل
همام : لا تخافين احنا نعاونچ عليَّ بس تصيحين
علينا نقيدو واوگع يدگ مثل اول مرة .
بيرغ : ياهوووو دگني ولك غير انتوا لازميني
خاب هيَّ غيررر بگد الهامسترررررر ايدها
ايد هامسترر ادحگ جلب ادحگ هاي ايدها تكتلني
بيها هامستررر لو مووو هامستررررر .
ملِكه : عوفها ايدي لا تنكسر عوفها
ما شايف ايد بنية ناعمة حقك انتَ وهاي ايدك
ينام بيها ثور تكفي وزايد .
بيرغ : راح تنام عليها هامسترررررر .
همام : صار بيها نوم بعد اخوك انا اترخص
وتونس خوية تونس سد البردة وسد الباب .
سَــهم : اريد ارگص رگص اكسر الكاشية
انا اخو الولد مو اخووو البنية .
صعد همام يسوق السيارة اخذتني الرجفة
ودموعي ما وكفت من اسمع الهورنات ودك الطبول
ازيد واصير اشهگ لزمت راسي وانود
همام : على فندق .
بيرغ : عجل على گبرررر ابوك .
ملِكه : لا وحق الله ما ادخل انا وياك فندق .
بيرغ : مووو بكيفچ .
ملِكه : اشهرك گدام الرسبشن مدري استعلامات
هذولي يوكفون بداية الفندق اشهرك يهمهم رجعني .
بيرغ : ها دكچ الخوف موووو ؟
همام : ذكروا الله انتوا عرسان ول متوهمين مو حرررب .
بيرغ : كمل طريقك .
عاندت وهو عاند وصلنا ماقبلت انزل طرف رجلي
كل عقلهم ابات بفندق انا وهل روغان وين يخلوني
وياه وين وحدنا لو اموت ، كلمة مني
كلمة من اخو كلمة منو عناد صياح تهديدات
تالي راح يخابر ورجع صعد قبض ايدو
بوجهي وعض شفتو قوي
بيرغ : رجعنا على مهجووووم .
رجعنا ساعة كاملة يسوق طفاها مقابل بيت
جبير لونو ابيض ساطع ماكو هوسة ولا علامات
عرس ولا ناس موجودة بالباب ، نزلت من دخلها بالكراج
وامو من الباب تسأل ليش رجعنا ، طلعت البنية
ألي شفتها قبل فاقدة النطق بقيت صافنة عليها من همست
مُـرجانـة: الف مُبارك تتهنون يارب .
باب الاستقبال مفتوح لمحت اخو وارث
گاعد مرجع ظهرو وطابگ رجل على رجل
بيده استكان جاي بهدوء رجعو على طبلة
وتقدم مخلي ايدو بجيوب البنطلون وصوت رزين تكلم
وارث : مبارك هنيئاً لكم حياتكم الزوجية الجديد .
نبلع لساني مقابل هدوء هل شخص
وخجلت حتى اجاوب ، ام بيرغ اعصابها ما تنوصف
ام وارث تسكت بيها وبيرغ دخل على استقبال
وارث : مُـرجانـة اخذيها على غرفتها ترتاح .
ساعدتني بالبدلة من مرت مُـرجانـة منو
بين ألي سمعتها صح او غلط بس همست
مُـرجانـة: لازم نفتش الغرفة اخاف هم بيها كاميرات مو ؟
وارث : لو باقية بدون لسان ارحم طنطني
بعد نحلة طنطني صرعي راسي الطنانة .
صعدت بالإكراه اريد اهج منهم وما اكمل ابد
تضايقت اول ما فتحت الغرفة دخلت واستمع لكلامها
مُـرجانـة : وصلن ملابسچ البارحة بليل
سَــهم اخذهن من اهلچ رتبتهم بعشوائية اني
وخالة ام وارث بعدين انتِ عدليهم على راحتچ .
ملِكه : عفية الحمام وين .
اشرت على برا هزيت راسي وهيَّ وراحت
مشيت على حمام قفلتو وذبيت البدلة نقذتني
بس سحاب بدون حبال وربط وشعري تاركتو
مفتوح تسريحة عروس على اساس فتحت
الماي ودخلت اغسل شكو مكياج وماشات
بشعري وگعتها بجيت الحد ما حسيت
واسي انتهى واذا استمر اوگع هنا
منتظر اكون عروستو هل ليلة لو يموت .
لفيت نفسي ورجعت على غرفة دورت على شي
اسود بملابسي ماكو تذكرت لمحت دشداشة لون
اسود على محجر اخذتها وبصفها شال
اخذتها لبستها يدخلون ويايَّ اثنين بيها بعد
ولفيت راسي بشال اسود تعصبت من الوجع
طلعت جواريب صغار لبستها لون اسود
دحگت على روحي بالمرايا المكياج كلو رايح
بس هاي الكحل الأسود شكد غسلتها تسيل
وما تخلص بعدها وخدي مصخم منها تعاجزت
وتقصدت ما تنمسح مني ورحت على چرباية
تمددت وتغطيت اريد انام وانفك الباب دخل
روغان وشهگ ذيچ الشهگه ومن الصدمة
ضرب على صدرو ورجع ضرب راسو .
بيرغ : انتِ ياهووووووووو .
_ طفي الضوه راسي ألم وجع اريد انخمد .
بيرغ : احچي ويااااااااچ يول شهل حال مات زلمتچ
أرملتي روحچ بيووووووم عرورررررسچ
لااااااا لاااااااا مستحيل وين البدلة وين المكياج .
صار بصفي عيونو تريد تطلع من مكانها
يحتار يدحگ على ملابس لو الشال براسي
وكفشتي وعطوبي بگد ما املخ بي وما تمشط
مكنكر منا ومنا مهوس لو وجهي ما يتفسر
خليت عيوني بعيونو بقمة الهدوء رديت
ملِكه : شنو تزوجتني بالإكراه وجابرني
وفكرت أتقبلك واصير حرمتك
وبدلة ومكياج وتسريحة ، لو تموتني اكرهك
وحاقدة عليك هذا گلبي نااار منك نار شبت بي
اتقزز من صوتك ومن اسمعو اريد اذب من راسي .
بيرغ : شمرررري هل مهزلة منچ لا .
ملِكه : لا شنو تذبحني اذبحني .
_ تكفي شري .
_ ما اريدك اكررررهك اكرررهك .
_ وانا اكرررررررهچ يولوووو وانا اكرهچ .
حط ايدو على راسو يفتر بالغرفة ومن يرجع
يشوفني يتقزز ويرجع ينهار ويصيح
اجت امو وام وارث وياهن وحدة ثالثة
بعمرهن من شافني عجزن عن الكلام والرد
وام وارث تغطي بوجهه بالشيلة وحمرت من الضحك
مشت بصف الدرج وهوَ طلع متخبل
طلع وارث من غرفتو يحچي وياه وهذا متهستر
من بعيد لمحني شلون كاعدة ومبدلة
واخوانو هم غاصين ضحك ومرجانة دخلت
ما تگدر تلزم ضحكتها همام صار قريب منها وصاح
همام : ول بيرغ امك من مات ابوك ما حزنت هيچ .
بيرغ : احذها واكتلهااااا هسااااع وارث
وخلي هذا التعهد مالتك يفيدك ويدخلك سجن
طبكم مرررررض ما اتحمل لاااا ما اتحمل
هيچ تخبث عليَّ هل هامستررررر واسكت لااااا .
وارث يمسد على شواربو ولحيتو صار ازرگ
بگد ما يضم بضحكته وام بيرغ تريد تهجم
مقهورة على ابنها المسكين خطية تريدو يتونس
على حساب اجباري .
بيرغ : ما تحچي نبلعععع لسانك .
وارث : شگول شحچي ههههههههههههه
اعذرني بس ههههههههه استغفر الله
تعال يمي اسكت همااااام لك سَــهم ولي انزلوووا
يمهههه ههههههههههههه اخذي ضرايرچ وانزلي .
بيرغ : اضحك اضحكوا مهرجان صرت سينما
تالي عمري انا بيرغ ابن ساجر اصير مضحكة .
وارث : تحمل نتيجة اخطائك خوية انتَ
من طلبتها ما ردتها حركتك عروستك
طلبتها وجبرتها بهدف انتقام
وهيَّ اخذتك بطلب ثار هي تكرهك حسب ما
فهمت منك انتَ تكرهه وتموت منها هذا
واقعك وحياتك وياها تحمل ما تتحمل رجعها .
بيرغ : وين ارجعها ؟
وارث : البيت ابوها .
بيرغ : املخهاااا هووو هدفها ارجعها املخهااااا .
وارث : اذا تضربها حجيت جوة كا اريد اكررر
اريد انام ، تريدها تظل ما تريدها رجعها
ضرب تجاوز ميصيررررر بيرغ انتهى .
عافهم كلهم ونزل وطلع من البيت بكبرو
طبگت الباب ورجعت لفيت روحي ونمت
وجع بعيوني صاير ما تحمل بعد
وقبل لا انام تذكرت من هددني بالمزرعة وگال
بيوم عرسچ راح اخليچ تبرسين بيدي وتتوسلين
يحلم يحلممممم زايد الروغان .
كعدت على أصوات عالية شمرت الدشداشة
وجريت من ملابسي دشداشة ثانية واخذت شال
بعشوائية ونزلت على نحيب والزلم اصواتهم مخيفة
همام : وارث جـبر راح من بين ايدنا جبررررررر
وسهم ماكوووو اخوووناااااا ماكوووووو .
ام وارث لطمت لطم على وجهه ومرجانة ايدها
على گلبها دافعه روحها على حايط تهز براسها ” لا ”
وارث يلزم بأيد امو ويصيح ويرجف
_ مابي شي يماااا اخذوا حتى يضغطون عليَّ .
ام بيرغ : رجعهااا ولدنا تذبحت رجعهااا .
يرجع منوو ، ومنو مات ومنو مختفي
لگيتها كلها ملتمين وانا ما افهم منهم شي
نزلت ركض على مُـرجانـة احس البنية اختنگت
وجهه انطعن احمرررر وگعت وارث يهز بيدها
يضرب بخدها ويسب بأم بيرغ
وارث : مُـرجانـة تسمعيني مُـرجانـة لا تخافين
خررررررب اهلچ ام قندررررررررة ملِكه مااااي ماااي .
ما اندل المطبخ وبيرغ يخابر من لمحني عاط
_ منااااا المطبخ هذذذذا .
ركضت اخذت كلاص ماي ورجعت اخذه
مني ياخذ قليل بيده ويرشه وش خفيف خايف تفز
ملِكه : كلو ذب المي كلو .
وارث : لا اخاف تنصدم وتفقد النطق .
اخذ قليل من الماي يمسح بيدها ورگبتها
ويرجع على وجهه ، واحنا بهل هوسة
دخلوا عمامهم اثنين ولدهم اثنين
يخوفون من العصبية واحدهم يصيح
خلف : اذا ابني جـبر مات يا وارث اجتل اخوتك كلهم .
شال وارث مُـرجانـة يصعد بيها ويردهم
_ لا تحاول قافل ما اردها يعني ما اردهااااااا .
خلف : عجل احسن نتذبح همَّ ال ضـلـيل
اذا غضبوا رعدددددووووووووو .
وارث : وانا وحدي ابرررررق واجرد تاريخهم
وادخل بنصهم واخذ اخوي وابجي زلمهم ونسوانهم
مو وارث ينضغط عليَّ ويتخير بين اخو ودخيلته .
مال بيرغ راسو يريد اصعد وراهم رفعت دشداشتي
عبرت الغراض مشمريها بالگاع وركضت على درج
دخلها على غرفته ونومها على فراش وراح
مخبوص على ايباد ولابتوب شمرهم بالكنتور وقفلو
وباستعجال يسألني : خوية تگدرين تبقين عدها .
ملِكه : روح لا تشيل هم ابد هسة
اخليها تصحصح هيَ بلشت تگعد .
وارث : اطردهم وارد اخذها للمستشفى
اذا اطلع هسة يأذوني بأمي ، عينچ عليها امانة الله .
روصل للدرج ورد يفتح المفتح من المدالية
– خوية هذا مفتاح احتياط قفلي الباب ما اريد
كائن من يكُن يصعد عدها ، واذا ام بيرغ صعدت
ورادت تأذيها سمعت عليچ سباعية
وانتِ حرمة ما عليچ عيب حطيها ودگيها .
ملِكه : مو روغـ اقصد بيرررغ بيرررغ امو و ..
وارث : بحمايتي وحگ جفوف العباس بحمايتي
بس دگيها دگه محترمة كون تصيح الووويل منها
بردي گلبي بعد اخوچ .
ملِكه : تجرالك روح توكل .
اخذت المفتاح هوَ قفلها علينا من برا
رحت عليها تهذي وتريد امها ترجف وتبجي
خليتها على رجلي احاول اخليها تگعد
جسمها ينفض من الخوف نمرد گلبي عليها
بعدها صغيرة ليش هيچ خافت من فاتوا
وشنو علاتها بهذولي ال ضـلـيل يمكن سامعة
بيهم من ابوية وشايفة عنهم كم منشور بالفيس
عشيرة تصگر الي ما ينصگر من شرهم وغضبهم .
فتحت عيونها بصعوبة لازمة بلاعيمها
ملِكه : گعدتي واخيراً .
مُـرجانـة : وين وارث ؟ راح يرجعني مو ؟
ملِكه : وين يرجعچ .
مُـرجانـة : عمامي يريدون يموتوني اخذوا اخووو
اخذوووا اخووو ما راح يضحي بأخو وراح يرجعني
حبابة ابوس ايدچ ساعديني اطلع منا ، شوفي اريد
بس اطلعععع حباية حتى اطلع من الغربية كلهااا
لازم اطلع ابوس ايدچ ملِكه الله يطول بعمر ابوچ .
صوتها تعبان مبحوح وبصعوبة تحجي
وتسحب بيدي لازمتها بكل قوتها تتوسلني
ملِكه : راح اجيب ماي وارجع بسرعة واذا وارث
موجود ابلغو تريدين تحچين وياه بس انتِ هدي .
انزل وادحگ منا ومنا ماكو احد بالصالة
دخلت على مطبخ من الشباك لمحت كل ولدهم
بيرغ لابس عسكري واثنين دوريات بالباب
يحچي هو والضباط ، وعمو هذا اسمو خلف
گاعد يتهادد وارث ماكو مختفي لا هوَ ولا همام
اخذت ماي وجريت عصير من الثلاجة
وركضت صعدت واسمع صياح مُـرجانـة
وام بيرغ تسحب بيها من الچرباية وتصيح
_ انزلي ويايَّ الشيوخ تريدچ تحت انزززلي
خلصينا ما عايززززين شررررررر راح
تتذابح الزلام عليششش تتذابح على زعطوط
مبتلين بيچ مخلفيچ ونااااسيچ امشي .
ملِكه : عوفيها .
دارت عيونها عليَّ ما اهتمت ورجعت تسحل بالبنية
وهاي روحها مخلصه مُـرجانـة تريد توگع
عيونها كل شويَّ تنگلب كضيت
ايد ام بيرغ وعليت حسي
ملِكه : هدي ايدها اگلچ هددددديهاااااااااا .
دفعتني من صدري رجعت على طرف الميز
ونبت بظهري شصرخت وشاطت روحي من الوجع
ومرجانة وگعت من فوك الچرباية للگاع وهاي
الحقيرة ترفس بيها ومرجانة تدفع بيها
غديت نار واشتعلت براسي تذكرت ابنها
من فلش سيارة ابوية ويهين بينا
نمت على جتفها ولگطتها بعضه خليتها
مصرع وتزاگط وبيدي اضرب وهي تملخ
وانا اضرب وهيّ تصيح وتستنجد بيهم
رجعت عضيها وانا مثلها اصرررخ
نومتها بالگاع وبمعصم ايدها نبتت سنوني وكفختها .
فكت عينها مو مصدومة لا رادت تنجلطط
راحت بوسط الصالة تلطم وتصيح بأسم
بيرغ الحد ما صعد ، قفلت الباب علينا اني
ومرجانة قبل لا يوصلني واسمعها تبچي
_ ول يمه بيررررغ كتلتني ول حرمتك تضرررب امك .
بيرغ : وينها ؟ وهاي هيَّ سوت هيچ بحالچ ؟
ام بيرغ : بغرفة وارث المنبووووووووذ
بغررررفة المنبووووووذ يبووووووو على حظي يبوووو .
بيرغ : ملِكه ؟
_ ها .
بيرغ : فكي الباب .
ملِكه : ضربتها لان ملخت مُـرجانـة وتريد تنزلها و .
بيرغ : فكي الباااااااااب ملِكه .
ملِكه : افكو ما اخاف بس اسمع رادت تنزلها
للشيوخ والبنية متخربطة بعدين دفعتني
وانضربت بظهري هي بلشت واني ضربتها حقي .
اختفى صوتهم لا هوَ ولا امو رجعت على بنية مهبوطة
بالزايد گعدت بالگاع على ارضية الباردة ادگ على
راسها من اجيت يمها خلت عينها بعيني وتهمس
مُـرجانـة: حقهم ترا حقهم شنو ذنبهم حقهم
وين احصل امي تعرف شنو صاير بحالي
وينهاا خليها تخلصني اريد امي تساعدني .
سمعت صور المفاتيح دخل وارث خشمه
يجري دم وعيونو بيها زراگ وايدو رافعها على صدرو
نزل على ارض مقابيل مُـرجانـة آخذ ايدها وهمس
_ مُـرجانـة والكفل زينب اكفلچ انا
لو كل البشر تصير ضدي اواجههم وما ارجعچ .
مسح دموعها بطرف اصبعو وابتسم
وارث : وارث ابن ساجر فدائي البنت عابد ال ضـلـيل .
مُـرجانـة : اخوك وارث ما اريد اخليكم بهيچ
موقف حقهم عمامك واهلك حقهم شوف وارث اسمعني.
وارث : اشوف واسمع بس هدي مُـرجانـة
گلبي يوجعني عليچ من تبچين لا تخليني انزل احرگهم .
مُـرجانـة: شوف شردني وصلني على بيت جدتي
ها وهيَّ تخليني عدها كم يوم بلكي اگدر اوصل
على امي واحچي وياها لازم احچي وياها
اريد امي الله يخليك وارث اريد امي .
وارث : ارجع واگلج دخلتي بقناعتچ طلعتچ
بأمري وقراري لا تقررين بگيفچ لا تفكرررين .
مُـرجانـة : اخوووووك سهمممم اخوووك
راح يذبحون اخوك انوب تصيررر دم
وجبرر انوب ويه عمامك وعمامك يذبحون
الباقي من اخوتك طلعني ما اريد هيچ ما اريد .
خطف نظرة على ممر ورجع رفع وجهه بطرف
اصبعو واشر على عيونو حتى تركز وياه وهمس
بخفوت ما يريد غيرها يسمع
وارث : هل ليلة نطر اراضيهم ونخسفها بيهم
انا وبندر نرجع سَــهم كلنا بأمان كلهم
اگدر عليهم بس انتِ اذا طلعتي شلون اردچ .
البنية من سمعت اسم بندر جمدت بعد
وبصوت يرتعش همست : بـ بندر زوج ميمونة .
وارث : اي وصلت وتواصلت وياه ماكو غيره
يگدر يرعد گلوبهم رعد ويركضهم بهيمه .
صعد بيرغ مشيت سريع صرت قريبة على وارث
نزل ردن البدلة العسكرية يعدل بيها وصاح
_ وينك وارث خلف راح ادخل بخطيتوووو
وانثر دموووو وحق الله وصلت حدهاااا .
نهض وارث جر كلينكس يمسح بالدم وجاوبو
وارث : خلي يخربط طيزه هوَ غايته نتجاوز
حتى ينشرها بالعشاير ولد ساجر يضربون
قندرتهم عمهم بس تفض بليلة ظلمه نفوت
عليه ونبرد گلوبنا بي هل سافل .
طلع وارث وبيرغ كضني من ايدي عض اصبعو
_ تضربين امي بربوئه .
ملِكه : امك طلعت سويقطه مثلك .
يريد يطلعني ومرجانة عاطت بصوت عالي
_ ووووووارث .
بيرغ : ها يولوووو طلع صوتچ .
مُـرجانـة : عفية عوفها والله امك ضربتني
هاك شوف ايدي وشمري كله بالگاع ملختني
وضربت ملِكه شوف ظهرها خطية نزرف .
دخل وارث يسب بيرغ وسحبو وطلعو
وارث : خوية خليها تنام وغطيها زين
وقفلي الباب راح اتعبچ بس تحملينه .
طلع وانا اقفل الباب همست
_ عرفتهم مو خوش والله من اول ما شفت هل روغان
طلعوا مصايب ونصايب وگصايب .
وارث ..
خليت الهوسة كلها ورانا وركبت سيارة وطلعت
خابرت مرة ومرتين اجاني صوته
بندر : منتظرك ، شوف وارث اذا يطلع
اتفاق بينك وبين اخوتك يعلم الله اخلي الغربية
بكيرها تبچي على حالكمممم .
وارث : وبدر الهواشم مو اتفاق
ثواني وصلت هاي انتِ اي شفتك تعال اصعد .
صعد بصفي فتح جنطة وطلع سلاحو
وارث : شلونك يمتى دخلت الغربية .
بندر : من خابرتني .
وارث : ميمونة وين .
بندر : مالك شغل انطم وسوق .
وارث : ضربتها ؟
باع بطرف عينه ورجع يترس الشاجور طلقات
بندر : نرمي مباشر نكتل لو نحذر ؟
وارث : تحذير وطلع سَــهم .
بندر : تحبها ؟
_ ياهي ؟
_ الدخيلة .
_ لا .
_ امشي گ*** .
ضربته بوكس على ايده وحذرته
_ اذا تسب بعد اشمرك من السيارة .
بندر : صاير خير يحميها لله سبيل فاتح
يدقووووووني ولد ساجر يدقووووني .
وراث : اكو اثنين يعرفوني خابروا عود يساعدوني
بس اعرفهم يريدون يساعدوني حتى يدخلون
اراضينا ، المهم عرفت منهم مكان سَــهم
وهسة الوقت تأخر الحراسة قليلة
والعيون نايمة احمي ظهري وانا ادخل
اطلع سَــهم وانتظرك هنا بالسيارة .
بندر : طلع اخوك وروح انا اكمل منهم وارجع لا تنتظرني .
نزلنا من السيارة راح قبلي طگ واحد
على راسه بطرف السلاح وگع ودفر الباب
ركضت دخلت وبندر ورايَّ الحد ما وصلنا
بنص المزرعة فكيت الباب شفت سَــهم
نايم على گاع الباردة بعدني افك بيده
والرمي صار مطر فوك روسنا
بندر : وارث اخذ سَــهم واطلع ارررركض لك اركضضض .
وارث : لا تمووت احد ولك دير بالك تسويها دم .
راح بين الزرع يرمي باتجاهات عشوائية يشغلهم
كعد سَــهم مهبوط من الطلق كضيت ايده
وطلعنا بسرعة صعدته بالسيارة
ورجعت اركض على بندر رميت من بعيد
خليتهم يشوفوني حتى بندر يفتر على سياج
افتهم وركض طفر من فوك السياج
وانا طريتها ركض للسيارة صعدت ومريت
من جهة بندر راح بين اراضيهم على جهة الثانية رعبهم
ضحكت على سوالفه الحيوان سَــهم
دايخ دخلته مستشفى وخابرت على همام
اجاني خليته عنده ورديت للبيت
وارث : فضت خلصت سَــهم صار عندي
ولدهم عدهم ما صار دم بس طريناهم
وصل كلامي لهذا شيخ ال ضـلـيل
خلي يبطل لعب حتى لا يتعب .
وقبل لا ادخل كملت كلامي
_ وعلاج جـبر اني اتحمل تكاليفه كاملة
هذا اخوي حرامات انتَ ابووو مع الاسف .
فتت على بيت خالي ما راضي وامي
ما تباع بوجهي كعدت قريب منه تعبان
وارث : اعقد عليها واتزوجها بس عندي شرط .
شيخ فؤاد : شنو شروطك يا ابن ساجر .
وارث : بحضور وموافقة امها غـاليـة بنت ذياب
اتزوج مُـرجانـة بنت عــابد .
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.