رواية القسوة تشع من عيناه – الفصل السادس عشر
بارت 16
مهاب راح يسكتها ويوعدها يشتريلها كلشي بالها ويسويلها احلى غرفه ويصيرلها اب وام وهيه ماتسكت تبجي نزلها جوا واجه بدونها
تقرب يمي حضني بحنيه يرفع شعري ورا اذني همست بتعب
ترف :- حتى اني اريد امي منين اجيبها
كومني نيمني ؏ جربايه وحضني الصدره سكتت مغمضه عيوني للصبح اله غفيت عيوني ورمن من البجي جانت ليله من ضمن اسوء الليالي !
فتحت عيني الساعه ب11 هم رجعت كعدت الهاي الحياه التفتت شفت مهاب بعده وراي فتح عينه يباوعلي
ترف :- ليش كعدت شوكت اموت
ساكت صافن بعيوني عفته وكمت نزلت جوا لكيت فاطمه عدنه جاي اسوي بالغده خزرتني ودارت وجها
غسلت ورحت لغرفة ام رافت لكيت ورده كاعده تلعب بتلفون ام رافت لعبة الحيه
بقيت كاعده يمها واسمع ام رافت وفاطمه يسولفن ومهاب طلع من البيت لمن استوه الغده صاحتلي ام رافت كمنه نتغده وفاطمه تتحركن كوه عليها كاعده وياي بنفس المكان مدري شمسويتلها هسه هم يطلع ابوي كاتل رجلها ومادري
ام رافت شبعت وكامت وفاطمه شبعت بس بقت كاعده بمكانها تراسل
اخذت المواعين وكمت اغسلهن ورده كامت يم ام رافت بس طلعت ورده رفعت راسها فاطمه وگـالت
فاطمه :- بس لو افهم شبسرعه حبلتي
ترف :- سألي اخوج
فاطمه :- صارلي جم سنه متزوجه ولا حبلت وانتي بسم الله يمكن من اول يوم
ترف :- ماتزوجتي اخوج هسه يحبلج بهاي اللحظه
فاطمه :- احترمي نفسج ولج مو حرام هذا الحجي ثول حتى ثول لهذا العقل
ترف :- استغفرالله
فاطمه :- زين هاي خلصنه منها شلون خليتي يتزوجج
ترف :- شبيج انتِ شو ضايجه
فاطمه :- اي ضايجه ماطيق وحده جانت خدامه بالبيوت تتزوج اخوي
ترف :- على اساس هسه منو اخوج مخترع الخاشوكه
فاطمه :- غصبًا عليج اخوي يسواج ويسوه راسج
ترف :- اسمع يا ****
فاطمه :- هسه ارتاحيتي احتليتي البيت انتِ واختج
ترف :- مو هوَ دوله حتى احتله
فاطمه :- شو صايره فد نوب ما تاكلين *** وتكعدين راحه يرادلج تربايه من جديد انتِ
ترف :- والله بكيفي روحي ربي اخوج كل ساعه فشر ونزع ما مرباي
ترف :- اخوي ولد انتِ بنيه عيب تفشرين عيب استجني
ترف :- انتي استجني انتي واخوج جنج عكروك طفرين طفر بالكلام وثاني شي حتى لو بنيه غصبًا على الكل افشر واغلط وما احترام
فاطمه :- والله وطالعلج السان يبت مناوي
ترف :- غصبًا عليج وعلى الخلفج اطلعه والله اشكم شك ماخلي واحد يطب الهذا البيت اريد اسويها صدك واحتله
عفتها وطلعت روحي مفرفحه مغص بطني كافي عليه انوب تجي فاطمه تلفظ اسم امي بلا احترام ولا رحمه ؏ روحها
فاطمه :- اني رايحه
ام رافت :- وين هستوج اجيتي
فاطمه :- ضاكت نفسي اريد اروح هاي خابرت رجلي
ام رافت :- حاجتج شي ترف
فاطمه :- بالله هاي فد مره صايره ينرادلها كص لسان
ام رافت :- يمه عوفيها انتي ليش تحاجيها هسه اني عفتها شسويلها بس احاجيها كلمه ترد عليه بعشره تخبلت البت من مهاب مدري شبيها
فاطمه :- شبيها اني مخبله كل خبال مابيها يلا مع سلامه اذا ابقى هنا اطك روحي واموت
درت وجهي وصعدت لفوك اهمس ، خفة وراحه
للـ2 اجه مهاب سمعت صوت جوا شويه وصعدلي شمر علاكه ؏ جربايه وتقربلي ايده حاوطت خصري
مهاب :- اكل حبيبي
ترف :- اي
مهاب :- اممم ، اطلعج وياي بابا؟
ترف :- وين نروح ووحدنه لو ويانه ورده
مهاب :- ويانه ورده والحجيه
ترف :- ليش وين نروح
مهاب :- عقد قران عبيس صاحبي
ترف :- اي اروح
مهاب :- حضري نفسج
هد خصري وابتعد رحت طلعت ملابس ودخلت اسبح ومن طلعت شفت ورده لابسه فستان كلوشه ابيض ومهاب ثاني رجله وكاعد يشكللها فيونكه بيضه بشعرها
ورده :- حلوه؟
واني واكفه بمكاني فاكه حلكي فرحانه الفرحتها
مهاب :- لك بابا انتَ وين اكو بجمالك
اجتني تركض تضحك حضنتها وبستها جانت بدلة احلامي وللاسف ما لبستها بس اختي تعوضت ولبستها
ورده :- اروح اشوفها لبيبي
نزلت تركض ومن صرنه وحدنه اختفت ابتسامتي كعدت ؏ كرسي امشط شعري وگف وراي وسحب المشط مني يمشطلي
مهاب :- ليش خربت شعرك هيجي ها بويه
ترف :- بكيفي اني الاريده اسوي
مهاب :- ك**
ترف :- هوَ انتَ منيلك
مهاب :- والله صايره ****
ترف :- انتَ ****
مهاب :- هههههه هاي وين لكيتيها
ترف :- شتريد هسه انتَ
مهاب :- اريدج
اتقرب يم اذني يحرك اصابعه بهدوء ؏ ركبتي يباوع بوجهي بالمرايه يشوف رد فعلي همسلي
مهاب :- ترافة كلبي لا تكسريني
ورده :- ترررف
ابتعد عني يسوي نفسه يعدل بقميصه
ورده :- يلا شوكت نروح
مهاب :- هسه بويه انطي صبر
راح فتح العلاكه جايبلي صايه لبسني سكتت مالي خلك مجادله ولمن ردنه نطلع خله شال ؏ راسي وصلنه البيت البنيه وجان شارعهم مليان زلم فرنه من الباب الخلفي ونزلنه
دخلت ويا خالتي ام رافت اله شويه الزم عبايتها اول مره ادخل هيج تجمع بحياتي الرهاب العندي مو طبيعي
كعدت بصف خالتي وساره خطيبه عبيس ايه من الجمال عدها اثنين اخوات لبسهن يموت ورده اندمجت ويا الجهال بعد ماشفتها اختفت بيناتهم
؏ كعدتي اجت ريحه طرشي بخشمي لو تخبلت نسيت ام الرهاب الاجتماعي كعدت ادغ بخالتي وهيه ماتدري مندمجه تسولف
ترف :- خاله خاله
ام رافت :- ولج مصگوعه شتردين
ترف :- اشتهيت طرشي عفيه راح اموت
ام رافت :- سباوي بعد الگلب والعين عدكم طرشي البنيه حامل واشتهته
سبا :- اي خاله بعيني غالي والطلب رخيص تعاي وراي حبيبتي
كمت وياها دخلنه للمطبخ فارغ فتحتلي الثلاجه وطلعت طاسه طرشي اخذتها منها وكعدت اكل بالمطبخ ميته عليه كانما اول مره اكل طرشي وهيه تباوعلي بعيونها حجي
سبا :- صدك انتِ حامل
ترف :- اي
سبا :- شتصيرين من خاله ام رافت
ترف :- مرت ابنها انتِ منين تعرفيها
سبا :- غير امي وياها الروح بالروح جانت تمر علينه يوميه من جان بيها حيل بس انتِ مرت منو منهم مو اعتقد رافت متزوج؟
ترف :- لا مو رافت مرت مهاب
سبا :- مهاب متزوج؟
ترف :- اي
سبا :- ليش من شوكت هذا الحجي واضح من زمان وحامل
ترف :- شسمج انتِ
سبا :- سبا وانتي
ترف :- ترف اختج العروس؟
سبا :- اي اختي ساره
ترف :- شكد عمرها
سبا :- 19 سنه
ترف :- وعبيس
سبا :- ههههه 25
ترف :- امممم
سبا :- انتِ شكد عمرج
ترف :- راح ادخل 15 سنه
سبا :- اوي صغيرونه حبيبتي
لفتت انتباهي مره تنظف وتعدل بالبيت تركض منا وترد منا
ترف :- هاي المره منو
سبا :- هاي نجاح تجي تساعد امي بالبيت لان كلنه دوامات والولد مامتزوجين
ترف :- ياروحي الله عليج ديربالكم عليها لو ما العوز جان ماشتغلت هيج شغل
سبا :- بعيونه مخليها يشهد الله اخوتي يصيحولها يمه
ترف :- كم اخو عندج
سبا :- سبعه
ترف :- كولي والعباس
سبا :- كولي يالله صلي ؏ نبيج والله احنه 7 ولد و3 بنات
ترف :- ما شاء الله ما شاء الله
اباوعلها صفح مبتسمه تك خد وطاسه الطرشي بيدي انفتح باب المطبخ ؏ الحوش التفتتنه اثنينه شفت ولد دخل مد راسه وبقى مركز بيه فاك عينه بسرعه رفعت الحجاب ؏ شعري دايره وجهي وسبا ركضت وكفت كبالي تصيح بي
طلع وطبك الباب خليت الطاسه ؏ الكاونتر وغسلت ايدي بسرعه بسرعه خاف يرجع
سبا :- عذري مايدري والله ما شافج يمكن
ترف :- اخوج؟
سبا :- اي اخويه ليث بي دوده مايكعد راحه بس يحوس
ضحكت وطلعت للصاله وطلعت كبالي ساره لابسه فستان ضيك ابيض گـالت
ساره :- شجنتي تسوين ؟
ترف :- كاعده ويا اختج سبا بالمطبخ
ساره :- خوش حجي يلا روحي كعدي بمكانج لا تضلين تفرين بالبيت
ترف :- شبيج تصيحين؟
ساره :- مابيه شي سلامتج
عدهم بزونه بالبيت تفتر بالصاله ولزكتلي جوا رجلي تلعب روحي من البزازين وهاي تفتر جوا رجلي
ترف :- هاي شبيهاااا دشيلي بزونتكم جنها مطي رصاصي
ساره :- شبيج عيني ماتتحملين ما شايفه بزونه لا تصيرين نازوكيه براسي
عفتها ومشيت والبزونه تصيح وراي كعدت ع درجات وساره بقت تخزر بيه لمن اختفت من يمي
السيد بعده ما جاي حتى يعقدلهم والخطار كرايبهم يدخلون شويه شويه واني اتذكر عقدي وزواجي الافشل منه ماكو شويه وكعدت بصفي ساره تراسل واني ماكدر اخلي عيني بتلفون خاف ماتقبل
لمن طكت روحي الفضول كتلني لو ماتقبل جان ماكعدت بصفي شفتها تراسل عباس بقيت اقرا وياها لحد ان كللها
– تعاي ورا البيت اشوفج بروح اهلج والله طكت روحي ؏ شوفتج
التفتت الي درت وجهي مسويه نفسي ماشفت شي دغتني برجلي وگالت
ساره :- ترحين وياي
ترف :- لا
ساره :- حبابه بسرعه والله
هزيت راسي موافقه خليت شالي ؏ راسي وطلعت وياها بدون ما احد يدري بقت واكفه تراسل واني اتلفت اريد اشوفه منين يجي
بقو يصيحون الها جوا وهيه تخربط حالها مدري شتسوي
ساره :- هسه اجي الله عليج ابقي هنا واذا اجه كليله هسه تجي
عافتني وركضت بدون حتى ما اجاوبها بقيت واكفه ساكته التفتت اباوع ؏ جلب مربوط ماينوصف جماله يباوعلي مطلع السانه ابتسمت اتقرب منه
ترف :- شحلاتك مخلين البزونه جوا وانته برا ياروحي هاي العيون
ليث :- عجبج؟
هستوني ردت الزم الجلب وفزيت مبتعده فاكه عيني عليه ولد واني وحدي ويا كلشي انعاد بذاكرتي حتى لو جانت نيته طيبه
ردت امشي ولزمني ساد حلكي يمد ايده ؏ جسمي بجرئه عقل ما بقى براسي حرفيًا منا وعقلي طار صرت رسمي مخبله
جعل ايده تحترك بنار جهنم مستحيل راح انسى شكل وجها وهوه يضحك شعره كفشه وجها مليان حب واضح عليه هتلي درجه اولى
اديه يرجفن بشكل مو طبيعي نص وجهي خدر وگلبي حسيته طلع من مكانه اسوء شعور جربته بحياتي هوَ التحرش الجسدي فقدني كل طاقتي وتحملي وصبري سلب روحي وعقلي مني
لحد ان اندفر مني وانضرب بوكس كسر خشمه كعدت بالكاع اباوع لاديه الماكدرن يدافعن عني شكد رجفتهن قويه اسمع انفاسي القشعريره ال ما جاي تفارك جسمي
رفعت راسي وشفته عباس فوك ليث وليث وجه عباره عن دم واكع ماد اديناته لا حول ولا قوة فاقد من الضرب الاكله …
الفصل التالي اضغط هنا
يتبع.. (رواية القسوة تشع من عيناه) اضغط على اسم الرواية لتجد الفهرس كاملاً بجميع الفصول.