رواية القسوة تشع من عيناه – الفصل الرابع والعشرون
العشق الحرام
بعد لا اجت ولا شفتها فتحت الباب وصحت النور بنت مياسه اجتني ركض ورده وراها
ترف :- جيبيلي موبايل امج
نور :- شتسوين بي
ترف :- اريده بس لا تكليلها حبابه
نور :- ميخالف هسه
راحت شويه واجت فتحت الباب ودخلت خلت الموبايل بيدي وبقت واكفه فوك راسي
ترف :- طلعيلي مهاب خالج
نور :- ؏ النت او رصيد
صفنت بوجها ثواني
– مادري أي شي
طلعتلي حسابه ؏ ماسنجر دخلت ؏ المحادثه وانطتنيا
ترف :- روحي شويه واجيبه التلفون
شبكت ايدها تباوعلي مبتسمه
ترف :- شبيج شنو
عافتني وطلعت دزيتله صوت
– اني ترف تعال اخذني اريد ارجع للبيت
دزيتها وفضولي خلاني اقرا بالمحادثه كل ساعه اكول هسه اطلع والكه روحي مكمله حرفيًا كل الحجي عليه وصوري يصيرن ألبومين كاملات من كد ما هواي مصورتني حركه حركه حتى المغوشات دازتهن اله
ماكو شويه وجاوب رساله
– اللهم صلى على محمد وآل محمد
ترف :- يلا بسرعه
شافها وما جاوب كمت لميت ملابسي وبقيت كاعده لحد ان اندك الباب
بقيت كاعده بمكاني شويه وانفتح الباب ودخلت مياسه باوعتلي خجلانه
مياسه :- زعلتي سوده عليه
ترف :- لا شنو شكو
مياسه :- مخابره مهاب حتى يجي ياخذج زعلتي ترا محمد تعبان والله العظيم ومن يتعب بعد مايعرف شيحجي حسبيها عليه
ترف :- لا والله ما زعلت بس غير ارجع البيتي انتِ مو جنتي تلحين عليه حتى ارجع
مياسه :- اي بس ماريدج اطلعين زعلانه
ترف :- ما زعلانه والله
مياسه :- تبقين اليوم يمي وباجر يجي ياخذج
مهاب :- ها يابه حضرتي روحج
ترف :- اي هاك شيل غراضي
اجه اخذ غراضي كمت ؏ حيلي مياسه جرتني تبوس بيه
مياسه :- والله تعودت عليج شلون بيه
ترف :- انتِ تعاي يمي هناك
مياسه :- ميخالف والله جا شلون اكدر بدونج
ترف :- شيل بنتك
مهاب :- أمر واحنه انفذ
طلعت اخذت ورده وهيه كامت تبجي مجلبه بالجهال لمن كلتلها راح اعوفج كامت تمسح بدموعها ساكته بوستنه مياسه ورجعنه للبيت فارغ لا ام سلام ولا فاطمه
سكتت ما حجيت شي البيت فارغ يخنك ورده كاعده بالصاله تبجي ؏ جهال ومهاب كاعد يسكتها وبحضنه قاهره تبجي عفتهم ورحت للغرفه نمت ؏ جربايه عيني بالسكف يابه شكد اكره هاي الغرفه كره ماينوصف
المشكله كل ركن بي ذكرى تلچم الروح لچم ريحة هذا البيت اتذكرني باهلي تذكرني بام رافت تذكرني بالعشته ويا مهاب دخيلك ربي نسيني والله محد يتحمل احد وين اروح اذا ما صبرتني
ورا شويه دخل مهاب كعدت اعدل ملابسي خله قاهره بحضني وگـال
مهاب :- طالع اني ورده 5 دقايق واجي ديربالج عليها
ترف :- اخذها وياك
مهاب :- لا بويه خطيه طفله وين اخليها بحضني واسوق
ترف :- اروح وياك
مهاب :- اششش اش
طلع وطبك الباب وقاهره تتحرك بحضني كوه تفك عينها وتحرك شفايفها
بقيت خانسه خاف تبجي وراهم بشويه وخبصتني تبجي مفرفحه كعدت بالكاع اسكتها ماكو ماتسكت واني كعدت ابجي حالي حال مخبله
ترف :- شتردين شبيججج
نهائيًا ماسكتت ومن انطيها مميه ماتاخذها بحلكها واني ادحس بالممه بحلكها
لحد ان طخت بالي رضاعه طبيعيه وفعلًا سكتت وهاي اول مره بحياتي اعيش هيج مشاعر اقبل ؏ وجعي بالمقابل تسكت وترتاح
انكسر ضهري اله غفت نيمتها بالكريكوت وعدلت ملابسي كاعده مكابلتها مبتسمه مدري شبيه
واول ماسمعت الباب انفتح وصوت ورده اختفت ابتسامتي وحسيت خلصت مسؤوليتي
طلعت برا ومهاب يباوعلي صفح
– شو البنيه لا حس ولا نفس
عفته وكعدت اكل هوَ راح اطمن عليها وطلع مبتسم راح للمطبخ حضر صينيه وجاب شكو شي بالثلاجه واجه واني اكل من العلاكه صبلنه وكعدنه ناكل ورده تسولف وين راحو وششترالها وشلكت بالطريق واني راسي طبل واسلك الها
لمن شبعنه مهاب لم المواعين وراح للمطبخ واني ورده غسلنه وكعدنه نباوع ؏ تلفزيون وفزيت ؏ صوت ماعون انكسر كمت وكفت باب المطبخ رخيت راسي اباوعله
مخلي ايده ؏ حلكه و فاك عينه ؏ الماعون مكسور بالكاع
ترف :- عدل عدل شبيك ماتعرف
باوع بعيني وشال الكزاز ونظف الكاع ورجع يغسل المواعين واني كعدت ؏ الكرسي اباوعله التفتلي لام شفته كوه لازم الضحكه خزرته اباوع ؏ الماعون شلون يجلفه
لمن كمل صب جاي وكعد كبالي يدخن ويشرب جاي يباوع بعيوني
عفته وكمت للغرفه نمت ؏ جربايه افرك براسي تعبانه وحيلي مهدود ما اجه مهاب لحد ان غفيت وفزيت ؏ صوت قاهرة تبجي الغرفه ظلمه ومهاب نايم بصفي
كمزت من مكاني شغلت الضوه ومهاب كعد يفرك بعيونه رحت اشيلها ونداريت ؏ مهاب فاك عينه عليه تراجعت كعدت ؏ جربايه
ترف :- بنتك
كام ؏ حيله شالها بحضنه يسكتها اخذ حفاظه وكعد يبدللها وخلاها بحضني وهوه طلع يغسل
خليت بطانيه مالتها صغيره ؏ كتفي وكعدت ارضعها واجر بالبطانيه ؏ صدري دخل مهاب وشافنه بقى واكف ثواني وگـال
مهاب :- اطلع تاخذين راحتج
ما جاوبته صافنه بالفراغ ثواني وحسيته وراي مد ايده ؏ كتفي يمرغهن بهدوء حضنه اثنينه يبوس براسي
مهاب :- تعبان
ترف :- واني شعليه بيك
مهاب :- جاي تأذيني بابا
ترف :- شسوي هسه اني
مهاب :- سمعيني كلام حلو
ترف :- ماعرف ماتذكر علمتني كلام حلو كل الاتذكره نعال قندره بنت صفاء **** *** *** ***
خله ايد ؏ حلكي يسكتني
– اششششش
ترف :- مجذبه
مهاب :- مشتاق لامي تعبان محتاج حضنج
ترف :- خطيه امك ميته وصاحبك مات ماعندك واحد بعد حتى ابوك ميت
اخذ حسره وابتعد عني لمن غفت قاهرة نيمتها والتفتت عليه اعدل بملابسي ايده ترجف بشكل مو طبيعي يفرك بكصته يستغفر
كعدت بصفه اباوعله التفت اليه راد يكوم لزمت ايده التفتلي ورجع كعد بمكانه تقربتله رفعت شعره اعدل بي اباوع بعيونه
ترف :- هسه امك مرتاحه وهيه مو وحدها ابوك هناك يمها جانت هنا دوم وحدها حتى هناك تنام براحه وهدوء ماكو صوت صياحي ولا صوت بواجي اكيد جانت ما تنام من ورا صوتنه جنت دائمًا من انزل الكه ايدها ؏ خدها وصافنه وانته هسه مو وحدك عندك مياسه وفاطمه ورافت وقاهرة
مهاب :- وترف
ترف :- وترف وورده
مهاب :- سامحتيني
ترف :- لا
مهاب :- ليش بس فهميني
ترف :- حباب والله ماكدر انسى الصار
مهاب :- عدديلي شسويت
ترف :- اغتصبتني اشتريتني ب600 الف من ابوي وبقيت تستهزء الموس الضرب الاهانه الحزام امي ماتت بسببك وابوي انتَ كتلته حطمت حياتي كلها وهسه عندي بنيه منك ومجبوره غصبًا عليه ابقى وياك واتحمل مسؤولية واصير ام
مهاب :- الاغتصاب اني اسف اعتذر حسبي زواج عادي ، اشتريتج ب600 هاج اشتريني بربع والقران اقبل ابيع روحي الج بربع ابقي استهزئي هاج اخذي ربع وشتريني هاجج
ترف :- بنعال ماشتريك
فك عينه ارتخت اكتافه دار وجه يستغفر رجع باوعلي وگال
مهاب :- هاي خلصنه منها اشتريتيني بربع
كام ؏ حيله طلع موس خلاه بيدي
– جرحيني
هزيت راسي لا
مهاب :- جرحيني ترف
ترف :- ما راح اسامحك هيجي لان جاي اتأذه
سحب الموس مني وكعد يجرح بطنه والدم صار ينزل بجيت لا ارادي متوجعه بداله جريته منه شمرته بالكاع متخبله
ترف :- شجاي تسوي
مهاب :- سامحتيني
ترف :- ما اسامحك لو تموت مهاب لو تموووت
كام ؏ حيله وطلع مسدس من كنتور فكيت عيني التفتت ؏ قاهره ساده حلكي باديه رفع ؏ راسه يضحك ؏ رد فعلي
مهاب :- كلشي ماوصيج بس وصيه وحده اذا كبرت قاهرة وسألتج وين بابا لا تحجيلها شسويت بيج ماريد تشوهين صورتي كدامها وبنتي تكرهني اريدها تغسل كبري بيدها وتقرالي الفاتحه وتفتخر بيه يم كل صديقاتها
ملخت روحي اصرخ بعلو صوتي قاهرة فزت فحطت ومهاب شمر المسدس واجه يهديني يحلف المسدس فارغ واني متخبله اصرخ بعلو صوتي وملخ بشعري
كوه سكتني يحير يبقى يمي لو يروح القاهرة لمن دفعته وكمت شلت قاهرة بحضني طلعت ولكيت ورده باب الغرفه فاكه عينها
ورده :- ليش تصيحين ليش وجهج مخرمش عمو يضربج مثل بابا وماما
ترف :- لا قاهرة خرمشتني وكمت اصيح
ورده :- ليش قاهرة عدها اظافر
ترف :- اي تعاي اشوفهن الج
كعدت اسكت قاهرة ورده كاعده تباوع ؏ وجها مبتسمه
ترف :- كومي نامي يمه ليش لهسه كاعده
ورده :- عبالي عمو يضربج اخاف افتح الباب ترف اني احبج اذا عمو يضربج كليلي بس هوَ حباب
ترف :- والله مايضربني والله
ورده :- بعد لا تخليها تخرمشج اني احبج اذا يوجعج شي اكوم ابجي
ترف :- حبيبي وين اكو منج انتِ
ضحكتلي خجلانه بستها وراحت الغرفتها لمن نامت قاهرة رجعتها المكانها التفتت ؏ مهاب
ترف :- تريد اسامحك؟
مهاب :- اطلبي انطيج روحي
ترف :- طلكني
مهاب :- ترف تعوفيني؟
ترف :- لا تبقى تحجي زايد اطلكني اسامحك ما طلك ابقى بعذابك
ردت امشي وهوه جرني لحضنه لمني حيل يغطيني ويبوس براسي اله شويه يضمني بطنه جاعصني جعص
ترف :- عمليتي
مهاب :- اشششششش اش انتِ ملكي وماحب واحد يتقرب لممتلكاتي
غمضت عيني ساكته لمن نام دفعت ايده وكمت فرشت بالكاع ونمت ملفلفه روحي صافنه بالفراغ
لمن غفيت وفزيت ؏ ايد مهاب ادغ بيه فتحت عيني دموعه ؏ خده يجر بيدي يبوس بيها كعدت ؏ حيلي عاقده حاجبي مستغربه شبي ..
الفصل التالي اضغط هنا
يتبع.. (رواية القسوة تشع من عيناه) اضغط على اسم الرواية لتجد الفهرس كاملاً بجميع الفصول.