رواية القسوة تشع من عيناه – الفصل الأول
غَريب انتچي أعلىٰ البيبان
محَد يدري برسومي
انه المنسي انه التَعبان
انه الملتَم سَواد الدنيا بهدومي !
______________________
فزيت ؏ لمسات ايدها الصغيره التفتت عليها افرك بعيوني بعدها النومه بعيني
ورده :- كعدي ترف كعدي بابا گـال اذا ما كعدت اجي اضربها
ترف :- اي گاعده ، وين امي
ورده :- كعدت تكح وبابا صيح عليها يريد ينام عافته وطلعت للحوش
كمت ؏ حيلي طلعت من الغرفه شفت ابوي الي بس بالاسم اب نايم ايده ؏ عيونه والگاع مليانه حب الشمس وبطاله كحول اثنين بصفه الصاله هوسه من سهرته هو وجماعته
يوميه يدخلهم علينه بنص الليل نبقى قافلين باب الغرفه وخانسين خوفًا منهم يأذونه وهمه فاقدين وعيهم ..
طلعت للحوش لگيت امي كوه واگفه ؏ حيلها ملزمه بالمغسله تكح مخنوكه ركضتلها لزمت ايدها اسألها ، شبيج
انتبهت عليها تكح دم فركت ضهرها عقدت حاجبي بخوف اتوسل بيها تحجيلي شبيها
منى :- مابيه شي ، مابيه شي روحي روحي لا يخبصج ابوج روحي لشغلج يمه
ترف :- شنو مابيج شي شنو هذا الدم
منى :- لان كحيت هواي بلاعيمي تجرحت
ترف :- يلا تعالي جوا مو زين عليج تبقين تكحين اسويلج ريوك جوعانه تردين شي
منى :- بس روحي والله ماريد منج شي والله اموت اذا اشوف ابوج يطكج روحي يمه روحي اني اكدر اسويلي لگمه واكلها لا يضل بالج
اخذت النفس وزفرته بعصبيه غسلت ودخلت بدلت خليت شال ؏ راسي وطلعت ؏ صوت ورده تصيح وراي
ورده :- جيبيلي مصاصه ام الطكطاكه
بدون ما جاوبها رگعت باب الشارع ومشيت نار واچه بروحي اشفت من عمري 14 سنه اشتغل بالبيوت خدامه
ابوي بطلني من الدراسه حتى اشتغل واجيبله فلوس يشتري بيهن الحرام ويعزم جماعته بفلوس تعبي ، لبسه بيها حظ تنلبس ماعدنه
امي هواي انظلمت وعاشت طفوله مثل طفولتي وبالنهايه اتزوجت بابا بالبدايه فكرت كلشي راح يتغير للأفضل
بس جانت غلطانه كلشي صار اسوء من قبل ولان هيه يتيمه وعايشه يم عمها جانت كل ماترجعله يطردها ويرجعها غصب البيت زوجها
وبعد ما كبرت وتمرضت نست شي اسمه طلاك وتأقلمت ويا وضع ابوي في سبيل تاكللها لگمة وتنستر هيه وبناتها جوا سگف يحميها من ظلم الناس وكلامهم
ابوي جان يشتغل يدفع عربانه بس بعد ما نعرض عليه شغل بنته تشتغل خدامه بالبيوت وافق واول راتب استلمته ابوي ترك شغله واعتمد عليه
بقيت اشتغل يم مره جبيره بالعمر وحدها بالبيت عدها ابن واحد مامتزوج قبل لا يجي من شغله اني طالعه من البيت وراجعه البيت اهلي
كل ماطلع من البيت اشوف البنات بعمري رايحات للمدرسه الغصه توكفلي بلعومي احاول ما ابجي بس ماكدر جنت كل ما اروح اوگف باب البيت امسح دموعي وادخل
حلمي ادرس وانجح واتوظف واختلط ويصير عندي صديقات واشتري ملابس مدرسه وجيب الشهاده لامي وابوي واشوف الضحكه ؏ وجهم ويبوسوني بحنيه وفخر
بس كل هذا جان مجرد حلم وما صار ولا راح يصير ..
مسحت دموعي جريت النفس وزفرته مخنوكه الباب يعوفه ابنها مهـاب مفتوح ويروح لشغله لان ام رافت ماتكدر تكوم تفتحها الي
دكيت الباب ودخلت اكح حتى اسمعها صوتي رفعت راسي لگيتها كاعده ؏ الكرسي بالحوش بيدها عكازتها عينها عليه
ترف :- صباح الخير
ام رأفت :- مو بعد وكت ليش اجيتي هسه خليها لل12
ترف :- اعتذر اخذتني النومه
ام رأفت :- سويلي سم اكله مو روحي بهتت من الجوع
هزيت راسي موافقه دخلت للمطبخ وهيه تخنزر بيه سويت ريوك خليته ؏ طاوله ورحت اكومها جرت ايدها مني وكامت كوه تمشي ؏ عكازتها
دخلت للمطبخ كعدت ؏ الكرسي سمت واكلت ردت ادخل انظف البيت الجوا وگفني صوتها
ام رأفت :- تعاي اكلي
ترف :- بالعافيه متريكه
ام رأفت :- وتكول اخذتني النومه
غلست ودخلت انظف احاول اغلس عليها كد ماكدر لان دائمًا امي تكلي مره جبيره مو بوعيها شتحجي ماتحجي ف لا تاخذين حجيها بجديه
بقيت يمها للعصر كملت العشه وطفيت الچدوره طلعت للصاله لگيتها كاعده ؏ كرسي المصلايه رافعه ايدها عينها ؏ التلفزيون طالع دعاء تقرأ ويا
ترف :- كملت كلشي بس يجي مهاب يحمي الاكل واكلو بالعافيه اني رايحه
هزت راسها اي بدون ما تباوعلي هزيت ايدي وطلعت خليت الشال ؏ راسي شلون ما جان ورجعت لبيتنه
لگيت ابوي كاعد بالحوش ياكل رگي ويتفل البذور بالگاع والجوامع تكبر
صفاء :- طبي سويلنه اكله بطونه اتكطعت من الجوع
عفته ودخلت غسلت وگليت طماطه وسويت جاي وخليته بالصاله صبيت النه ودخلت للغرفه خليت الصينيه ورحت يم امي نايمه ورده كاعده ترسم
خليت ايدي ؏ كصتها واچه نار كعدتها بهدوء فزت خايفه لزمت بطنها و غمضت عيونها بوجع تون
منى :- بطني كطعتني يمه
ترف :- خاف جوعانه كعدي اكلي
كعدت كوه لازمه بطنها تون كعدنه ناكل امي اكلت شويه ورجعت نامت تبجي من الوجع البطنها
عفت الاكل وگفت باب الغرفه اباوع ؏ ابوي ياكل ويتابع هندي بالتلفون
ترف :- بابا
صفاء :- هممم
ترف :- ما تاخذ امي للطبيب
صفاء :- الله كريم
ترف :- عفيه والله بس هاي المره اخذها خطيه والله تبجي بطنها مدري شبيها
صفاء :- الله كريم
ترف :- حباب بويه
صفاء :- نعلعلا ابوج
ترف :- بويه اخذها كافي ولو مره وحده اصرف فلس علينه كافي تشتري هذا الخ**
صفاء :- شنوا شنوا
ترف :- امي اذا ماتت انتَ تفيدني انطيني فلوس تعبي لو اني اتعب وانته تاخذ حقي ؏ الخالي بلاش
صفاء :- جديده هاي يطلع صوتج عليه
طفه الموبايل وكام ؏ حيله يعلس باللگمه بحلكه ابتعدت خايفه
منى :- عوفها صفاء عوفها اني اصلاً ماروح للطبيب لا تخاف
لزم وجهي بيده وضربني راشدي دفعت ايده روحي لاعبه من شكله
ترف :- الله ياخذك
رجع ضربني طفالي عيني لزمت عيني اصيح موجوعه وهوه يتفل ويغلط ويشتم دفرني بضهري ودخل واكف باب الغرفه يباوع لامي تفل عليها وگـال
صفاء :- هيه هاي تربيتج بت الفكور
امي سكتت ما جاوبته مدنكه تهز بجسمها مقهوره تحير شتسوي
وكفت گباله وتفلت بوجه روحي شايطه
ترف :- الله ياخذك ويخلصنه منك الله ياخذك كافي ظلم كاااافي حرام عليك شوف وجهك بالمرايه شلون صاير اتقي ربك وراك حساااب
صفاء :- شو انتِ ما خايفه
لزمني يطگ ويفشر ويغلط وامي تجر بي تريده يعوفني بس امي ضعيفه يم قوته لحد ان شافني مستسلمه اله تركني وطلع يرگع بالبيبان
التفتت ؏ ورده ساده اذنها كاعده بالزاويه تبجي بلا صوت الدم ينزل من خشمي ابتسمتلها كعدت عدل امسح بخشمي كانما كلشي مابيه
ترف :- لا تخافين
ورده :- خاف يضربني
ترف :- ماخلي ماخلي
اهز راسي لا عيوني فاكتهن عليها ابتسامه مرسومه ؏ شفتي امي كعدت يمي تمسح بالدم وتسمي عليه تجر بيه لحضنها واني ابتعد
مسحت الدم بضهر ايدي وكمت للحوش غسلت ومن لكيت روحي وحدي انفجرت بالبواجي ابجي وامسح بدموعي اخنك بصوتي ماريد واحد يسمعني
كعدت بالگاع الوي بطني موجوعه من الدفر الاكلته من ابوي التفتت ؏ باب الصاله شفت ورده واگفه مرخيه راسها ؏ الباب دموعها ؏ خدها تباوعلي
مسحت دموعي واشرتلها تعاي اجتني تركض ختلت بحضني بجت بصوت عالي
ترف :- لا تخافين اني يمج
كل دمعه نزلت من عينها تذكرني بمشهد من طفولتي جنت بكدها اشوف امي وابوي يتعاركون اختل ورا الباب وابجي خوفًا من ابوي يجي يضربني
لحد ما صرت انطك بدال امي واشوف ترف الطفله بورده جنت احتاج واحد يكلي اني يمج لا تخافين وصرت اكولها لاختي ورده حتى ما تخاف حتى تحس اكو ضهر يحميها من ابوي ..
لمن هديت رجعت للغرفه لگيت امي كاعده ؏ سجاده تبجي رافعه اديناتها تدعي
ابوي طلع من البيت للـ1 بليل اجه يهيع بصوته السكران ويا جماعته صوت البطاله تتراكع والاغاني مشتغله للصبح
كعدت من الفجر ؏ صوت امي تبجي من ألم بطنها كمت فتحت الباب لگيت بس ابوي نايم والزبل واصل للسكف طلعت للمطبخ سويتلها مي وهيل شويه يخفف من وجعها
شربته ونامت ع فراشها عينها ؏ باب الغرفه تون
ترف :- اليوم اذا كدرت اجي من وكت ونروح للطبيب
منى :- لا يمه ماريد اروحن
هزيت راسي موافقه بعدم اهميه بقيت يمها لمن طلع الصبح هيه غفت واني كمت بدلت ورحت البيت ام رأفت
فتحت الباب ودخلت ادور عليها بعيوني مالكيتها طبكت الباب ودخلت للمطبخ اكح اسمعها اني اجيت حضرت الريوك
واكفه ضهري للباب الي ع صاله و التفتت ؏ صوت خطوات وراي دخل واحد لابس رسمي ؏ ايده جاكيت وبيده الثانيه لازم جنطه سوده مال لابتوب
رجعت انداريت ؏ طباخ ساكته افكر هذا منو رأفت لو مهاب لان ما شايفتهم
مهاب :- ماعندج ايد ادكين الباب
التفتت عليه عيني بعينه بلعت ريگي متوتره
ترف :- كلت خاف خاله نايمه وافززها
مهاب :- مو خوش عذر كملتي الريوك
التفتت نار واچه بروحي شنو هذا الأسلوب جنت عبالي بس ابوي هيج طلعو كل الزلم نفس الشي
ما جاوبته كملت الريوك خليته ؏ طاوله وهوه فاتح لابتوبه وكاعد اصابعه تتحرك ؏ الكيبورد بشكل سريع
مهاب :- جاي
صبيت جاي وقدمته اله رفع راسه عينه بعيني خليت الجاي يمه و ابتعدت اسوي روحي اطلع بالخبز من العلاكه همس ..
مهاب :- اغدي فدوه للخلقج
هديت كلشي من ايدي وركضت لغرفة ام رأفت فتحت الباب ودخلت عيني وراي خايفه يجي
ترف :- خاله خاله
فزت خايفه فكت عينها عليه ايدها ؏ گلبها
ام رأفت :- ها ها شكو احجي شبيج اكو شي احجي وج احجي وگفتي گلبي
ترف :- لا لاتخافين ماكو شي بس ، بس كملت الريوك وابنج گال كعدي امي تاكل وياي
ام رافت :- ابني؟
ترف :- اي كاعد يتريك بالمطبخ
لفت شيلتها وكامت دخلت للمطبخ بقيت واگفه بالصاله خايفه سمعتها صاحت
ام رافت :- وينه تضحكين عليه انتِ
دخلت بخطوات بطيئة انتبهت ؏ كرسيه ماهوه والاكل ؏ حطيته
ترف :- والله جان هنا
ام رافت :- اني هم ضليت صافنه ابني واعرفه مايتريك غلطانه انتِ
ترف :- والله العظيم صدك جان هنا
هزت راسها اي بعدم مبالاة وكعدت تاكل قبل لا اطلع گالت
ام رافت :- ماطول مخليه كلاصين تعاي اكلي
ترف :- لا ماريد
ام رافت :- دتعاي تردين عزيمه
جريت الكرسي وكعدت اكل جوعانه بس استحي منها لمن شبعت كمت نظفت البيت وكفت اسوي غده وهيه كعدت تلكط خضره وتسولف ؏ جنتها متعبتها قاطعتها وگلت
ترف :- خاله
ام رأفت :- ها
ترف :- تكدرين اداينيني فلوس والله ارجعهن او اخذيهن من الراتب
ام رافت :- المن ترديهن هسه
ترف :- امي مريضه وماعدنه والله
ام رافت :- ابوج وين فلوسه لو عايشين ؏ راتبج
ترف :- خاله ماكو شغل خطيه ابوي هم تعبان وكاعد بالبيت ومحتاجه كلش والله
ام رافت :- ماعندي لو عندي جا انطيتج
دنكت خجلانه فشلت روحي وحجيت وكلشي ماحصلت
كملت اليوم واني معبسه روحي طالعه شلون ارجع شلون اشوف امي تتوجع واكعد اكل واشرب واعوفها تتوجع ياربي دخيلك ساعدني
قبل لا ارجع ام رأفت صبتلي كدر تمن عليه حشو ونص دجاجه وروبه وخضره وفواكه وبطل لبن وطلعتلي من المجمده الماتريده مرك مجمد ولحم لمتهن الي بعلاكه هيه وتشد بيها باوعتلي وگالت
ام رأفت :- ما ناكله حرامات واذا يبقى يعفن ونذبه احمو واكلو والله كلشي مابي نظيف
ترف :- لا والله خاله ماريد
ام رافت :- معليج معليج مو الج لاميمتج
ترف :- بس خاف مالتكم
ام رافت :- تعاي لزمي دتعاي
رحت شلت العلاكه ثكيله شلتها بحضني وابتسمتلها
ترف :- شكرًا
ام رافت :- بالعافيه ، ديربالج مو توكع منج وكبل البيت اهلج ديربالج ؏ روحج
هزيت راسي موافقه وطلعت رجعت البيت اهلي دكيت الباب فتحتها ورده من شافت العلاكه ضحكت فرحانه
ورده :- شجبتيلي شجبتيلي
ترف :- اشكال
دخلت للغرفه خليت العلاليك يم امي وكعدت الضحكه ؏ وجهي
منى :- ولج شجايبه
ترف :- خاله ام رافت انطتني كالت وديهن لامج
امي فتحت العلاليك طلعت الاكل ورده اخذت تفاحه غسلتها وكعدت تاكل تباوع للاكل بشهية
منى :- والله فشله شلون اخذتيهن
ترف :- والله ماقبلت بس هيه كالت حرامات يبقى وينذب وما ناكله ومدري شنو
منى :- الله يترس ايدها ويفرحها بوليدها ويشافيها ويعافيها
كمت حميت الاكل وكعدنه ناكل ومن كملنه خليت كلشي بالمطبخ سمعت باب الشارع انفتح رحت كعدت يم امي عيني ؏ باب الغرفه خاف يجي يضربني دخل للصاله وعاط
صفاء :- صبيلي اكل
منى : شنو تصبلك هوه انته شجبت حتى نطبخ
صفاء : واني شمدرينيي دبروها ايشي جوعااان يلااا
دخل ابوي للغرفه يباوع علينه ويشم يدور بالغرفه
منى : ماعدنه شي
شبكت ايدها مدنكه راسها اجه عليها لزم وجها حيل عاط
صفاء :- شنو ماعدنه سوو ايشيييي العالم تاكل من الزبل حمدو ربكم وشكرو عدكم ثلاجه ومطبخ شوفو شنو اكو وسولي اريد اتزقنببب
كمت بسرعه جريت ايد ابوي من وجه امي
ترف :- عوفها راح اسويلك كافي عوفهااا
هدها وراح كعد بالصاله شغل تلفونه يتابع افلام صبيتله ونطيته كعد ياكل دخلت للغرفه و امي ماده راسها تباوعله من الغرفه گالت
منى :- هضيمه والله
صفاء : اووو هاي شنو منين جبتو الاكل
ترف : من خاله ام رافت
صفاء : اي اي جيبي وياج كلما تجين خوما تشتغلين خالي بلاش بشهر ينطوج ومايكفينه
منى :- وانته شبيك ماتشتغل وتجيبلنه لگمه استحي ع روحك ينطونه العالم المايردو
ترف :- كافي يمه اسكتي ميخالف
اسكتها لان اعرف ماعنده شي اسمه تفاهم ايده والطك واحنه مابينه حيل نظفت البيت وسويت جاي ورحت كعدت لمن طلع ابوي من البيت
كمت فرشت وقفلت الباب لان اعرف من راح يجي ما يجي صاحي حضنت ورده وغفيت هلكانه ..
الفصل التالي اضغط هنا
يتبع.. (رواية القسوة تشع من عيناه) اضغط على اسم الرواية لتجد الفهرس كاملاً بجميع الفصول.