رواية الحرباء – الفصل الثالث
خرجت من المستشفى مع نرمين وفى الطريق اشترت لها هدوم للبيت والخروج وداخليه
حنان : والحاجات دى حادفع تمنها ازاى ؟
نرمين : لا دى هديه منى واى حاجه تعوزيها قوليلى انتى دلوقت بتشتغلى عندى وملزومه منى
حنان : كتر الف خيرك ربنا يقدرنى على رد جمايلك
وصلوا عند الفيلا ونرمين دخلت بعربيتها وحنان شافت جنينه كبيره فيها الورود فى كل مكان بتنسيق بديع واشجار فاكهه وزينه وبرجوله وحمام سباحه متغطى بحاجب رؤيه من كل الاتجاهات وعند المبنى ما كانش كبير قوى لكن كان مبنى بطراز بسيط هادى مريح للعين بدون بهرجه
اول ما دخلوا لقت اكتر من شغاله بيجروا على نرمين واحده تاخد شنطتها وواحده تجيب عصير ونرمين قعدت فى الهول وقالت
نرمين : اسمعى انتى حتشتغلى عندى هنا واحعمل لك شهريه الف جنيه زى باقى البنات واكلك وشربك وكسوتك عليا وتقدرى تفتحى حساب فى البوسطه تحطى فيه فلوسك وتاخديهم فى اجازاتك
حنان : طيب حاعمل ايه فى الاجازات واروح فين ؟
نرمين : روحى بلدكم زورى اهلك
حنان : ماليش اهل انا مقطوعه من شجره وعمرى ما سمعت عن واحد قريبى والبلد دى مش عاوزه اروحها تانى انا مش عاوزه اجازات
نرمين : خلاص خدى يوم فى الاسبوع تنزلى تتمشى فى محطة الرمل او اى حته تشترى فستان او حلق براحتك فلوسك وانتى حره فيها عاوزه تحوشيها براحتك حتنفع لما تتجوزى
حنان اترعشت ولونها اتخطف
حنان : ات .. اتجوز ؟
نرمين : اه طبعا مسير كل بنت للجواز ويمكن حد كويس يتقدملك وانا برضه حاساعدك فى جوازك مش حاسيبك اعتبرينى انا اهلك
حنان ركعت على الارض قدام نرمين ومسكت ايدها تبوسها وعيطت ونرمين سحبت ايدها وطبطبت على شعرها بحنيه
نرمين : الله مالك بيعيطى ليه ؟
حنان : مش مصدقه نفسى ربنا يخليكى يا ست الكل انا حاعيش خدامه تحت رجليكى طول عمرى
نرمين : طيب بلاش العمايل دى وقومى انا قلتلك ما باحبش بوس الايادى ياللا روحى الحمام غيرى هدومك وتعالى شوفى شغلك
جت بنت من البنات جايبه لنرمين شبشبها وحطته جنبها على الارض وقالت
سعاد : عاوزه حاجه تانى يا دكتوره ؟
نرمين : ايوه يا سعاد خدى حنان معاكى دخليها الحمام وبعدين ابقى عرفيها البيت
حنان : ودى تيجى ؟ اومال مين يقلعك الجزمه
ومسكت رجل نرمين عاوزه تقلعها الجزمه ونرمين سحبت رجلها منها وقالت
نرمين : انا ما باحبش حد يقلعنى الجزمه انا مش صغيره
حنان : ازاى يا ست الكل احنا كلنا خدامين تراب رجليكى
ورجعت مسكت رجلها قلعتها الجزمه ولبستها الشبشب ونرمين سابتها وقالت
نرمين : المره دى بس ماشى بس انتوا مش خدامين انتوا بتشتغلوا بشرفكم وانا ما باحبش كده خالص
…………………………..
حنان كانت بتبذل مجهود كبير فى الشغل علشان تكسب رضا نرمين عنها لكن العيب اللى فيها انها كانت بتراقبها ليل نهار وعينيها وقلبها مليانين غيره من نرمين اللى عندها كل حاجه وهى ما عندهاش اى حاجه وخصوصا وهى شايفه الحب اللى بينها وبين ادهم جوزها اللى كان واضح انه بيعشقها ويغير عليها وخصوصا من ابن عمتها الممثل المعروف والدونجوان صاحب المغامرات النسائيه كريم رشدى وحصل بينهم خناقات كتير بسببه وكل الشغالات سمعوهم وحنان فكرت تستغل غيرته لصالحها لحد ما جتلها الفرصه
حنان لاحظت ان نرمين وامانى اتعودوا يسافروا العزبه خميس وجمعه من كل اسبوع واحيانا ادهم يسافر معاهم واحيانا يستنى علشان شغله
بعد مرور شهر تقريبا بدات حنان تحس باعراض الحمل لكن كتمت سرها عن الكل بعد ما عملت اختبار واتاكدت وكان لازم تتصرف بسرعه وفى الفتره دى كان ادهم مشغول فى مشروع كومباوند قرب برج الغرب وبيرجع دايما متاخر وفى يوم الخميس نرمين وامانى سافروا العزبه ومعاهم نهى الشغاله وحنان سهرت للخدمه لحد ما وصل ادهم متاخر وحضرت العشا وراحت اوضته
حنان : العشا يا سيدى يلزم خدمه تانى ؟
ادهم : لا شكرا حطيه عندك وروحى نامى انا مش محتاج حاجه تانى النهارده
حنان : الا قوللى يا سيدى هو قريبكم الممثل ده اسمه ايه ؟
ادهم : انتى قصدك على مين ؟
حنان : الممثل الابيضانى الامور قوى ده اللى بيمثل افلام حب وكده
ادهم : قصدك كريم رشدى ؟ هو بييجى هنا ؟
حنان : يووووه كتير قوى بييجى للهانم اومال انا عرفت انه قريبكم منين اصل الهانم بتاعتنا ست محترمه مش ممكن تدخل حد غريب بيتها الا لو كان قريبها وعارفاه وواخده عليه
ادهم : واخده عليه ازاى يعنى ؟
حنان : اصل شكله دمه خفيف قوى لما بييجى بيقعدوا فى الجنينه وما بتبطلش ضحك ربنا يفرح قلبها كمان وكمان الهانم بتاعتنا دى سكره واى حد يشوفها لازم يحبها بس هى بنت اصول ومتربيه ومش اى حد تدخله بيتها وتقعد معاه وتضحك كده الا لو كان قريبها وعارفاه ومتعوده عليه قوى تصبح على خير يا سيدى انا صاحيه ولو عاوز حاجه تحت امرك
الفصل التالي اضغط هنا
يتبع.. (رواية الحرباء) اضغط على اسم الرواية لتجد الفهرس كاملاً بجميع الفصول.