رواية ما بين حضنين – الفصل الثالث
خالد: بفكر اشتري شقه تانيه اعيش فيها
ندى: ايه دا ليه يعني
خالد: عادي يعني ي ندوش وكمان عشان لو اتجوزت
ندى بصدمة: انت عاوزة تتجوز ي خالد!
خالد: هو حرام ولا اي…. بصي ي ندى انا مش بقولك هتجوز بكرا ولا القرار انا واخده انا بس بقول لبعدين يمكن بعدين اتجوز واهي كمان تنفعني اعيش فيها و..و كمان اخد حور تعيش معايا
ندى: بلاش ي خالد
خالد حط كوبايه الشاى ع الترابيزة وبصلها باستغراب
: بلاش اي بالظبط
ندى: بلاش تطلب ان حور تعيش معاك
خالد: لي يعني دي بنتي!!
ندى: فاهمة بس الموضوع دا ممكن يسبب مشاكل اكيد مروة عاوزاها معاها و هي اصلا هتختار مروة…. البنت ف الفترة دي بتبقى محتاجه مامتها اكتر
خالد بصلها شويه وقال: مماشي بس اكيد يعني هتجيلي شويه وتروح لمامتها شويه
ندى: بصي ي خالد اعمل الي تعمله ما دام انت مبسوط….. وانا مليش دعوة بموضوع الجواز دا عشان انت عارف مروة صحبتي
خالد: ندى انتِ عارفه ان انا ومروة مكانش ينفع نكمل مع بعض اكتر من كدا.
ندى فونها رن وكان طارق
ندى لخالد: طب هروح اوضتي انا بقى
خالد: طارق مش كدا
ندى: اه
خالد: اه يعم م هو اول م يرن نجري على طول نرد وانا مش مستحملالي كلمتين
ندى ضحكت وباسته وطلعت
اللهم صلّ على محمد ♡
ـــــــــــــــــــــــــــــــــــــــــــــــــــــــــــــــــــــــــــــــــــــ
تاني يوم ف النادي
ندى لحور: ساكته ليه؟
حور: عادي
ندى: طب انتِ كويسه؟
حور: ندى انا مش عيله عشان تعملوا كدا
ندى: نعمل اي مش فاهمة
حور: بتخرجوني وتفسحوني و فاكريني طفله عشان تعملوا معايا كدا!!…… بس الي محدش يعرفه اني كدا مرتاحه انا لما هما انفصلوا ارتحت انتِ متتخيليش انا كنت بتمنى اليوم دا يجيي من امتى واخلص بقى هما كدا مرتاحين وانا اه مش احسن حاجة ليا بس انا كدا مرتاحه عن الاول.. الاول كنت بصحى على خناق وانام على خناق مكانش في تفاهم بينهم اا انا…. انا تعبت منهم بجد
بتعيط وتكمل: انا بحبهم جدًا بس كل واحد وحده مش مع بعض بس هما الي عمرهم م فكروا فيا مفكروش هما لما يتخانقوا قدامي هيحصلي ايه من و انا طفله فاهمة يعني اي طفله يعني من وانا 4،5 سنين وهما كدا….. طب انتِ عارفة انا نفسي كل واحد فيهم يعيش حياته بقى ويتبسطوا عشان.. عشان انا كنت شايفه قد اي هما مش مبسوطين
ندى: يعني انتِ مش هتتدايقي لو حد منهم اتجوز
حور سكتت شويه وبصت ف الفراغ: انا ممكن ابقى متدايقه بس انه حد تاني هياخدهم مني بس لو هما مبسوطين خلاص
ندى ابتسمتلها وحضنتها وقالت: طب اي رايك نجيب ايس كريم وندخل سينما
حور ضحكت: اوكي
حور وندى قعدوا في الكراسي بتاعت السينما، والأنوار كانت لسه مطفية نص مطفيه قبل ما الفيلم يبدأ.
ندى بصتلها وابتسمت: مبسوطه؟
حور هزت راسها وهي بتبتسم ابتسامة خفيفة:اه… بصراحة أنا بحب السينما.
بعد شوية الفيلم بدأ، وكان فيه مشهد لعيلة قاعدة مع بعض وبتضحك على السفرة.
حور فضلت باصة للشاشة شويه وقالت بصوت واطي:
ندى… هو العيلة لازم تفضل مع بعض عشان تبقى عيلة؟
ندى سكتت لحظة وكانت بتفكر في الرد، بصتلها وقالت:
لا يا حور… العيلة مش شرط تبقى في بيت واحد… العيلة إنهم يفضلوا بيحبوا بعض حتى لو كل واحد في مكان.
حور بصتلها شوية وبعدين ابتسمت ابتسامة صغيرة.
ندى حاولت تغير الجو بسرعة وقالت وهي بتشاور على الشاشة:
طب ركزي في الفيلم بقى… أنا دفعت فلوس عشان نتفرج مش عشان نتفلسف.
حور ضحكت وقالت:حاضر
سبحان الله ♡
ــــــــــــــــــــــــــــــــــــــــــــــــــــــــــــــــــــــــــــــــــــــ
بعد م حور روحت البيت.
مروة دخلت اوضه حور وقعدت ع السرير جمبها
: اتبسطتي مع ندى
حور: اه انبسطت اوي المرة الجايه تعالي معانا
مروة فرحت ان حور بقت احسن، ابتسمت : اتفقنا… بكرا عندك دروس؟
حور: اه عندي ماث
مروة: اوكي ي حببتي تصبحي على خير
حور: وانتِ من اهل الخير
مامتها طلعت وهي مسكت الفون شويه تكلم ياسمين وحكتلها الي حصل
حور: متتخيليش يا ياسمينا ارتحت ازاي لما اتكلمت
ياسمين بغيظ: اه م انتِ مبتتكلميش غير مع ندى
حور ضحكت: انتِ بتغيري من ندى دي عمتي يا عبيطة
ياسمين: برضو م انا صحبتك
حور: يابنتي عادي والله لو كنت شوفتك كنت اكيد اتكلمت معاكي وبعدين م انا بتكلم معاكي على طول وبحكيلك ف اكيد مكانش قصدي
ياسمين: خلاص ي ستي كنت بهزر
حور: يعني مش زعلانه
ياسمين: لا
حور: شور؟؟
ياسمين ضحكت: يابنتي م خلاص قولت مش زعلانه ويلا تصبحي على خير عشان عاوزة انام
حور: وانتِ من اهل الخير ي روحي
الحمد لله ♡
ـــــــــــــــــــــــــــــــــــــــــــــــــــــــــــــــــــــــــــــــــــــ
تاني يوم بعد الحصة كانت واقفه حور وياسمين و خديجه جت وحده زميلتهم (سارة) وكان معاها وحدة تانيه (مريم)
سارة: هاي ي حور عامله اي انتِ كويسه
حور باستغراب: الحمد لله كويسه هو في حاجة ولا اي
سارة: اصل انا عرفت ان باباكي ومامتك اتطلقوا يا عيني
سارة: متعرفيش ي مريم اتطلقوا لي
مريم: انا سمعت كدا انهم كانوا بيتخانقوا دايما
سارة: يااا عيني ي رورو انتِ اكيد محتاجة ثيرابيثت
ياسمين: اي الهبل دا دا انتو ناس مريضه امشوا يلا دا اي القرف دا
سارة: متتحمقيش اوي كدا على صحبتك انا بقول الحقيقه… ولا انتِ مكنتيش تعرفي لا دا انا احكيلك
ياسمين بزعيق : ملكيش دعوة يلا امشي بدال م هدخل اقول للمستر
حور: انا عاوزة اروح
خديجة: طب يلا يلا ملكيش دعوة بيهم دول هما الي ناس مريضهه بجد
حور روحت وكانت متداايقه جدااا من الي حصل دخلت البيت بهدوء غير العادة، رمت الشنطة على الكنبة ودخلت أوضتها وقفلت الباب وراها.
قعدت على السرير وهي باصة في الأرض، كلام سارة كان بيرن في ودانها:
“يا عيني ي رورو… أكيد محتاجة ثيرابيثت.”
حور مسكت المخدة وحضنتها جامد وقالت بصوت واطي:
هو أنا فعلاً حالتي صعبة للدرجة دي؟
قامت من على السرير ووقفت قدام المراية، فضلت تبص لنفسها شوية وكأنها بتحاول تفهم حاجة.
افتكرت أيام زمان لما كانت صغيرة وباباها ومامتها بياخدوها النادي مع بعض… كانوا بيضحكوا وبيهزروا، وساعتها كانت فاكرة إن كل حاجة هتفضل كدا على طول.
دمعة نزلت من عينها فمسحتها بسرعه بإيدها وقالت لنفسها:
خلاص… مفيش حاجة اسمها زمان.
وفجأة سمعت صوت مامتها بتنادي من برا: حور… حور انتِ جيتي؟
حور أخدت نفس عميق وردت بصوت حاولت تخليه طبيعي
:اه يا ماما… جيت.
مروة : يلا العشاء برا
حور: حاضر
حور طلعت بصت على السفرة: اممم اي الحلاوة دي بس
مروة ضحكت: بالهنا والشفا يحببتي
حور: تسلم ايدك……. كنت عاوزة اقولك حاجة
مروة بصتلها بانتباه بمعني احكيي
حور: عاوزة اروح اقعد عند بابا شويه واشوف البيت الجديد
مروة: حور ي حببتي اكيد براحتك وقت م تحبي تروحي عند بابا
حور: طب مادام كدا بقى هروحله بكرا اشطاا؟
مروة ضحكت: اشطاا………. كملي اكل يلا بقى
حور: حاضر
استغفر الله ♡
ـــــــــــــــــــــــــــــــــــــــــــــــــــــــــــــــــــــــــــــــــــــــ
تاني يوم عند خالد
خالد: حور زي م انتِ شايفه كدا انا لسه مخلصتش توضيب البيت ف طبعاً مش عامل اكل ف هجيب اكل من برا
حور بتضحك على خالد: ٠بابا هو انت بتعرف تعمل اكل اصلاً
خالد: طب يا ستي ماشي تحبي تاكلي ايه
حور: مش عارفة
خالد: بيتزا؟
حور: ماشي بيتزا
خالد نزل يجيب الاكل وحور كانت بتتفرج ع البيت ودخلت اوضه باباها لقت دفتر على وش كرتونه مفتوحه اخدت الدفتر وفتحته ولقت حاجة صدمتها
خالد جه : يلا ي حور جبتلك الاكل اهو
حور طلعت م الاوضه: هو ايه دا يبابا
خالد اتصدم واتوتر………………………….
الفصل التالي اضغط هنا
يتبع.. (رواية ما بين حضنين) اضغط على اسم الرواية لتجد الفهرس كاملاً بجميع الفصول.