رواية شاهد قبر – الفصل الرابع
ثبتت نوال عنيها على وشى، رغم البعد والخصام مكنتش محتاج كلام عشان اعرف الحقيقه، مفيش حاجه يا ناصر
فتحى كويس معايا، ممكن تتغدى معايا النهرده ؟
كان نفسى اسأل نوال اسأله كتيره، بس كنت عارف جوايه ان الاجابه مش هتقنعنى ومش هتعجبنى ومفيش فى ايدى حاجه اعملها، قلتلها مره تانيه ان شاء الله يا نوال انا لازم امشى دلوقتى، نوال مجادلتش معايا كتير عند الباب قالت
ناصر متحرمنيش من زيارتك ،انا روحى رجعتلى لما اتكلمت معاك.
رجعت الشقه وانا فى عالم تانى، فتحى بيضرب نوال
طيب يا نوال ليه مفكرتيش تغضبى ؟ تسيبى البيت ؟
بعدها ابتسمت وسخرت من حالى ،يعنى يا ناصر عايز نوال تلجاء للبيت إلى باعها ؟
لوالدك العاجز ولا امك إلى شغاله بتبيع على الرصيف ولا صبى الورشه ؟
كنت مخاصم نوال اكتر من سنه ونصف ومن جوايا عارف ان نوال عملت كده عشانى وعشان اخواتى ،كان جوايا دين لنوال مش عايز اعترف بيه.
فى ورشة عم سعيد الوضع كما هو عليه، عم سعيد مش بيحاول يطور من نفسه ،ورشه تقليديه ورغم انى كنت بلقط رزقى من الورش إلى جنبنا الا ان حال عم سعيد كان مزعلنى
العدد قل جدا والناس إلى بتيجى الورشه بتيجى عشان أسمى انا وسمعتى، بس انا لسه صغير وفيه ميكانيكيه كتير مشهورين وسنى كان مسببلى ازمه، فى ناس كتير مش بترضى تخلينى اكشف عن عربيتها ،بس انا طورت نفسى
عملت طريقه خاصه بيا
كنت بدخل على العربيه ذى الدكتور إلى بيكشف على عيان
حتى الصناعيه كانو بيستغربو منى
اسمع صوت المحرك الاحظ اهتزاز العربيه ،لو كان صوت طقطقه يبقى الصمامات غالبا ،صوت ضرب اوى يبقى البساتم او الكرنك ،صفير يبقى السير او البلى ،بشوف لون الدخان
ولما العربيه تعصلج معايا المس المحرك اشوف سخونته
واهتزازه فى كل يوم كنت بجرب حيله جديده
اسمع صوت الفتيس وصلت لمرحله كنت بحلم بالعربيات
كنت بشوف نفسى شغال فيها العربيه مصابه وانا بعالجها
احيان لم كانت ورش تطلبنى واوصل هناك المعلم يقول وسع للدكتور، معلمين كبار كانو مسمينى الدكتور اه والله
كنت بعرف العطل واطلب من الصناعي يصلح هنا أو يشيك هناك.
فى مره قلت لعم سعيد انحنا محتاجين معدات جديده
تساعدنى انفذ الأفكار إلى فى دماغى
عم سعيد وافق لما شرحتله الخير إلى هيجى من وراها
بس عم سعيد مات بعدها باسبوع الورشه إلى كنت باكل منها عيش ابنه قرر يبيعها رغم انى عرضت عليه اشتغل فيها واسدد الايجار، لكن أبنه كان مستعر من شغلانة العربيات
كان نفسى اشترى الورشه بس مكنش معايا فلوس ،اشتغلت فى ورشه تانيه بس ورشة عم سعيد كانت طالعه من عينى
اشتراها فتحى جوز اختى وعرض عليا اشتغل فيها
ولما رفضت قالى يعنى ايه إلى اتغير ؟
انت كنت صبى عند سعيد وهتبقى صبى عندى وهديك مرتب اكتر من إلى كنت بتاخده، كرهى لفتحى مش من قليل
كنت حالف بالله لاخد حق نوال من فتحى مهما طال بيا العمر.
وفى يوم وانا قاعد فى الورشه إلى شغال فيها وفقت عربيه فخمه ،كانت راكبها راجل
صوت الشوكمان كان عالى اوى ومكنش عاجبها ،المعلم وقف معاها وطلب منه ينزل من العربيه عشان يشوف المشكله
كان راجل كباره مش من المنطقه، المعلم حسونه قال ان الشوكمان عايز يتغير، انا سمعت صوت الشوكمان
كنت قريب منهم ،الراجل قال خلص بسرعه انا عايز امشى
قربت اكتر من العربيه حطيت ايدى عليها وغمضت عنيه
والراجل مستغرب ،عربيه جديده ذى دى مش معقول الشوكمان يكون مكسور ،قلت يا معلم حسونه دى علبة الكاتلايزر مسدودة نضفها وهتبقى كل حاجه تمام
المعلم قال لا الشوكمان عايز يتغير، ومع نقاشنا
الراجل قال طيب اتحرك خلصنى بسرعه، فى خلال خمس دقايق حليت المشكله والراجل مشى .
خدت بقشيش كويس ،لكن المعلم حسونه طردنى عشان قليت منه قدام الزبونة، زعقلى وكان هيمد إيده عليه ويضربنى وحرج على كل ورش المنطقه محدش يشغلنى عنده.
قعدت فى الشقه يومين من غير شغل كنت فيهم عامل ذى المدمن، ايدى بترتعش وكل ما اسمع صوت عربيه عقلى يكون معاها، العربيه دى كذا، لا العربيه دى كده كنت بقف فى البلكونه وعينى مع كل متوسيكل توكتوك جرار إى حاجه
وانا واقف لقيت صبى شغال عند المعلم حسونه جاى يجرى على البيت ولما شافنى قعد يصرخ المعلم حسونه عايزك عنده فى الورشه، قلتله مش رايح، مش هشتغل عنده تانى
الولد قال الراجل إلى انت صلحتله العربيه هناك وطالبك انت
قولتله ودا عايز ايه كمان ؟
العربيه عطلانه يلا ؟
الصبى قال لا
طيب هو عايز ايه؟
الولد قال مقلش حاجه واقف هناك وعايزك انا بلغتك الرساله وبراحتك.
غيرت هدومى ومشيت على الورشه ودماغى شغال هو انا غلطت فى ايه ؟
صوت الشوكمان كان واضح انه مريض، بيسعل مكنش فيه اى عطل تانى، نسيت ايه يا ناصر؟
وصلت هناك ،الراجل نزل من العربيه وبصلي بصة غريبه وطلع من جيبه فلوس حطها فى ايدى
قلتله ايه دا يا بيه؟
قالى انت فنان يا ابنى، انا روحت التوكيل بعد ما مشيت من هنا عشان اشيك على العربيه وهناك اكدولى ان العطل دا صعب حد يكتشفة كمان العربيه مكنتش محتاج ميكانيكى من التوكيل يصلحها لانك عملت اكتر من إلى كانو هيعملوه
قولتله طيب خلينى اكشف على العربيه طالما وصلت هنا
الراجل بص عليه من غير فهم، قلتله اركب يا بيه خلينى اسمع صوت العربيه، ركبت جنبه وسمعت صوت العربيه كان تمام، قلتله العربيه دى بعد شهرين هتحتاج تغير البوجيهات يا بيه ،نزلنى هنا دا بيتى
الراجل انت مش راجع الورشه ؟ قلتله انا سبت الورشه بسببك
استغرب من طريقة كلامى لكنه ضحك وسبت الورشه ليه يا معلم؟
قلت، المعلم حسونه خد على خاطره لانى اكتشفت العطل وقليت منه ،كلمه من هنا وكلمه من هنا طردنى
سألنى ومشتغلتش تانى ؟
قلت لا، حسونه حذر الورش كلها تتعامل معايا
طيب وهتعمل ايه ؟
قلتله خليها على الله يا بيه هتفرج
بنفس الابتسامة الراجل قال إيه رأيك اشفلك ورشه اعرفها تشتغل فيها ؟
قلتله طيب متأجرلى ورشه والى يطلع بالنص
الراجل قعد يضحك اوى قال انت تعرف انا شغال ايه!؟
قلت هعرف من فين يا بيه؟
رد وقال ماشى يا سيدى ادينى وقت افكر، نزلت من العربيه رجعت الشقه وانا عارف ان كله كلام ومش هشوف وشه مره تانيه
يدوبك دخلت ولقيت امى عماله تبكى وتصرخ ،صرخت مالك يا امى؟
قالت فتحى ضرب نوال ونقلوها المستشفى!
دخلت اوضتى جيبت مفك خبيته وسط هدومى ونزلت جرى على المستشفى وانا ناوى أقضى عليه واقتله.
وصلت المستشفى، فتحى مكنش هناك، بس شفت وش نوال المتبهدل وايدها المكسوره وجسمها المتشلفح
وحلفت بالله لاقتله، نوال شافتنى ونادت عليه وهى بتبكى
اخدتها فى حضنى ،متبكيش يا اختى مش هرجعك هناك تانى
وببص لقيته فى ضهرى ،فتحى جوز اختى بيصرخ
وانت مين انت عشان تقول كده؟ دا انت حتت عيل ودى مراتى.
مبقتش مراتك خلاص صرخت بكل صوتى نوال ههتتطلق
بصلى بسخريه وانت بقا يا سبع البرمبه إلى هطلقها عافيه ؟
طيب هتصرف عليها من فين؟
قلتله انت شغال والحمد لله مستوره، قعد يضحك
هو ابوك مقلكش عن الشيكات إلى ماضى عليها
انت فاكر الملاليم إلى بتاخدها جوزت اختك بدريه ؟
أصح يلا انا خيرى مغرقكم والمفروض تشيل جزمتى من على الأرض فوق دماغك.
الفصل التالي اضغط هنا
يتبع.. (رواية شاهد قبر) اضغط على اسم الرواية لتجد الفهرس كاملاً بجميع الفصول.