رواية شاهد قبر – الفصل الخامس
شاهد قبر
صوت فتحى ارتفع فى المستشفى والممرضات والمرضى بدأو ياخدو بالهم وهو بيبص عليه ويشاور على جزمتة
هتاخد اختك وانت عيل صبى فى ورشه؟ وياريت صبى فالح ؟
صبى خالى شغل ومفيش معلم فيكى يا حارة يقدر يكسر كلام المعلم حسونه ويشغلك ؟
_قلتله انا مش صبى انا أسمى المعلم ناصر
صرخ طيب ابقى كفى بيتك يا معلم ناصر وهات الفلوس إلى عند ابوك وانا اوعدك لما تسدد الفلوس هرميلك اختك فى الشارع.
امى وصلت وقعدت تهدى فى فتحى وانا ايدى على المفك ،هطحن دماغه بالمفك والى يحصل يحصل، خدت خطوة ونوال لاحظت ،صرخت فى اخواتى وامى الحقو ناصر الحقو ناصر وقبل ما اوصل فتحى امى واخواتى مسكونى
الشرر كان طالع من عنيه
بقا عايز تقتلنى يا ناصر ؟ صرخ فتحى وهو فاتح صدره
انا هوديك فى داهيه ،كل ده وامى عماله تهدى فيه وتتأسف
وانا دمى بيغلى لكن جسمى مش مساعدنى اوصل عنده
فتحى مسكتش قال يلا نوال، احنا هنرجع شقتنا علاجك هتكمليه فى الشقه
صرخت بغضب نوال مش هترجع معاك آبدآ
بص فتحى على نوال وشفت بعنيه نوال بترتعش ،يلا يا مراتى يا حبيبتى.
صرخت بكل صوتى وانا بسحب نفسى منهم نوال ؟، لو رجعتى معاه لا انتى اختى ولا اعرفك، الراجل دا بيضربك ويعذبك مترجعيش للعذاب برجليكى.
آمى قالتلى كفايه فضايح يا ناصر يا ابنى ووطت على ودن نوال قالتلها كلمتين ،مسمعتش الكلام ،لكن نوال قامت بأيدها المتجبسه وجسمها المكسر ومشيت مع جوزها.
مقدرتش استحمل، بصيت لامى بغل ،أنتى السبب فى كل ده
بنتك بتتعذب بسببك، سايباها تعيش مع حيوان بيضربها
انتى ام انتى ؟
خدت بعضى ومشيت من المستشفى لكن المره دى مرجعتش على البيت ،مش هرجع البيت تانى، هرجع ليه ؟
ايه فايدة انى افضل عايش من غير لازمه ؟
ودى كانت آخر مره اشوف فيها نوال وامى واخواتى لمدة اكتر من سنه.
بعد ما مشيت من المستشفى جيبى مكنش فيه غير متين جنيه، قعدت اتنقل من قهوه لقهوة وعقلى مش فيا
فكرت اروح شقة فتحى واقتله لكن عرفت انا ده مش الحل
يومين على الحال ده، سبحان الله وانا قاعد على القهوه عربيه عطلت قدامى ،السواق نزل منها وقعد يحاول يشغلها معرفش ،روحت عنده وقلتله هصلحلك العربيه
قال بسخريه يا ابنى العب بعيد مش نقصاك
بس انا كنت اشتغلت خلاص، حطيتى ايدى على العربيه عرفت العطل وسألته معاك مفتاح تسعه ؟
الراجل جاب المفتاح نزلت تحت العربيه صلحتها
قلتله دور!
العربيه اشتغلت معاه، قلتله العربيه محتاجه تروح الورشه
خدنا على ورشه قريبه وانا هصلحهالك، ركبت جنبه
ووصلنا ورشه بيتعامل معاها ،صاحب الورشه يعرفه
نزلت من العربيه وقلت للمعلم محتاج كذا وكذا وكذا
الراحل حس انى فاهم خلى الصبى يديني الحجات إلى انا عايزها، سبتهم قاعدين مع بعض ونزلت تحت العربيه خلصتها
وبقيت ذى الفل.
قلت للسواق عربيتك بقت تمام تقدر ترجع لاكل عيشك ومشيت
المعلم نادى عليه رايح فاين ؟
قلتله ماشى
قال والله ما انت ماشى
اسمك ايه ؟
قلتله المعلم ناصر
سكت شويه وقال المعلم ناصر بتاع السيده ؟
قلتله اه انا من السيده لكن يمكن شخص تانى تقصده
ضحك ،وقال سبحان الله، مش شخص تانى ولا حاجه، فيه واحد كلمنى عليك نفس وصفك وعمرك
طلع التليفون وعمل اتصال وهو عمال يضحك ويقول المعلم بتاعك عندى فى الورشه.
ووصل الراجل نفسه بعد ساعه لما شافني قعد يضحك
اهلا يا معلم ناصر
قلتله اهلا وسهلا
انت وصلت هنا ازاى يا ناصر؟
قلتله حصلت شوية مشاكل معايا فى البيت ورجليه جابتنى هنا ،ورغم وجاهته وشكله ولبسه قعد معايا
وسألني مشاكل ايه ؟
حكتله هن الديون وعن شغل والدتى بس مجبتش سيره عن نوال.
الراجل قال انت شاب مكافح، تعرف انا كنت فاكر مشاكلك من مشاكل الشباب بتوع اليومين دول
إلى عايز يشترى موبايل ،إلى استلف من البنك لكن انت حاجه تانيه، سابق عمرك بكتير
بص يا سيدى انا فكرت فى عرضك بتاع الورشه ولقيت مكان حلو، ايجاره عالى شويه لكن العربيات والناس إلى بتوصل هناك هاى كلاس، هتعرف تتعامل مع الناس المهمه دى ومتكسفناش!؟
قلتله عيب يا بية انت شفت بنفسك
قال يا ناصر الناس دى مختلفه، عربياتة مختلفه، واعطالها مختلفه ؟
قلتله انا بطور نفسى كل يوم يا بيه وملم بكل التطورات الحديثه والاعطال
لما سمع كلمة بطور نفسى قعد يضحك وقال طيب تعالى اركب معايا اوريك الورشه.
وصلنا الورشه، مكان راقى، شوارع نضيفه ،عمارات وهيبارات ومولات ،نزلنا وقال هنا هتبقى الورشه ايه رأيك ؟
قلتله تمام التمام
قال شوف نفسك محتاج ايه وانا هشتريه، كتبتله إلى احنا عايزينه وانا بوضحله ان شغلانة الورشه بتعتمد على ايد الصناعى اكتر من المعدات.
الراجل عمل اتصالاته قال هنحتاج يومين تلاته لحد ما نجهز الورشه عندك مكان تنام فيه؟
قلتله لا
قال طيب انا هاخد بيتى
قلتله مستحيل انا هنام فى الشارع او اى قهوه
بصلى بصه لسه فاكرها وقال هتبات اليومين دول فى بيتى يا ناصر.
مكنتش متخيل ان بيته بالشكل ده وفى المكان الراقي ده
ومقدرتش اتخيل نفسى بستعمل حمام فى البيت ده
ولا حتى باكل اكلهم ،قلت يا بيه معلهش اعفينى مش عايز احرجك قدام اهلك.
الراجل قال بضحك مفيش احراج ولا حاجه يا سيدى ، هسمع شوية كلام من الهانم لكن مش مهم كله هيمشى تمام
الباب انفتح وطلعت من خدامه اول ما شافتنى عاينتنى من تحت لفوق بقرف وقالت دى الخدامه الجديده ؟
انا دمى غلى لكن الراجل قلها وسعى يا توفى دا ضيفى
وانا داخل مسكت فيا ذى ما تكون هتتخانق معايا وهى عماله تقول اقلع الشوز اقلع الشوز
قلعتنى الكواتش بالعافيه ودخلت وكانت اول مره اشوفها
بنت من نفس عمرى او اقل شويه لما شفت وشها مقدرتش ابطل بص وتركيز جمالها جذبنى بطريقه غريبه ،كانت قاعده فى الصاله مشغوله فى التليفون ،وقفت مبلم كأنى عارف ان اللحظه هتغير حياتى للأبد.
الفصل التالي اضغط هنا
يتبع.. (رواية شاهد قبر) اضغط على اسم الرواية لتجد الفهرس كاملاً بجميع الفصول.