رواية شاهد قبر الفصل الثالث 3 – بقلم اسماعيل موسى

فى الأيام الاحقه لزمت غرفتى ،خاصمت اختى ووالدتى وكل البيت، لا اتحدث معهم، لا أاكل معهم، اسرق بعض اللقمات بعد أن ينام الجميع.

تزوجت نوال فتحى وكان بعمر ابى عبد الحميد،سمعت الجيران بيقولو، عبد الحميد باع بنته.

اعتقدت أن مراة فتحى هتخرب الدنيا بعد ما جوزها اجوز عليها ،لكن مراة فتحى كانت حاضره الفرح

انا قاطعت الفرح، شاهدته من الشرفه ،نوال سألت على ولم اذهب لرؤيتها.

فى الصبحيه كانت آمى بتجهز الزياره ،فتحت باب غرفتى

وقالت ناصر هتيجى معانا ؟

قلت لا

بعد ما الشقه فضيت دخلت غرفة نوال وقعدت ابكى

نوال كانت شاطره جدا فى المدرسه، دايما كانت بتقول انا هطلع دكتوره عشان اساعد والدى ووالدتى، نوال كانت بتكدب على ،مسحت دموعى ونزلت الشارع ،مشيت فى الشارع مدة طويله جدا ،شارعنا كل ورش عربيات ،حتى فتحى نفسه جوز اختى وصاحب العماره معاه ورشه

مشيت لحد ما تعبت، قعدت على الرصيف، شفت راجل كبير شغال فى عربيه لواحده، بيطلع من تحت العربيه يجيب مفكات ويرجع تانى تحت العربيه، قمت وروحت عنه

وقفت جنب العربيه وشافنى واقف حاطط ايدى على خدى

ناولنى مفتاح خمسه من عندك

جريت على العده وجبت اكتر من مفتاح قربتهم منه اخد واحد وقال دا نمره خمسه!!

قعدت اليوم كله اساعد الراجل، كان طيب جدا معايا، ولما كنت بغلط مكنش بيأنبنى كان باله طويل اوى وصبور

بعد ما خلص طلع من تحت العربيه وعمل شاى ليه وليا

سألنى انت عايز تشتغل ؟

قلتله ايوه

سألنى طيب ومدرستك ؟

قلتله مش عايز اروح المدرسه عايز اساعد أهلى

بصلى وابتسم وقال كلمه واحده، لو مفيش مدرسه مفيش شغل عندى.

من يومها واشتغلت مع الراجل ده بعد المدرسه، كنت بخلص ومرجعش على الشقه ،اروح الورشه اغير هدومى واشتغل معاه ،مع الوقت حفظت المفاتيح، فهمت شغل الميكانيكى

وعم سعيد كان بيخليني اقفل الشغل وراه وكنت شاطر

هم سعيد كان بيقول كده، كان بيدينى مرتب ثابت ،وبعد المدرسه كنت بلاقيه سايبلى اكل اتغدى بيه ،المرتب مكنش كبير، كنت باخده واحطه فى ايد آمى من غير كلام

مر شهرين وتلاته وانا مخاصم البيت كله، بروح المدرسه واشتغل ومرتبى احطه فى ايد آمى ،كنت برجع البيت هلكان من التعب، يدوبك استحم وانام ،ايدى بدأت تاخد على الشغل، عم سعيد بقا يخليني أصلح عربيات ويكتفى بالتعليمات بس انا كنت شاطر جدا لدرجة احيان هم سعيد كان بينادى عليه ويقولى شوف يا ناصر العربيه دى فيها ايه؟

ومن نظره واحده كنت بعرف العطل فين ويتصلح إزاى ست شهور حفظت فيها شغل الميكانيكى ، عم سعيد كان بيقول انا مش مصدق انك اول مره تشتغل فى ورشه إلى يشوفك يقول انك مولود فى ماتور عربيه ،مرتبى زاد لكن مش بالقدر إلى انا محتاجه، جانى اكتر من عرض شغل فى ورش تانيه براتب أكبر من عم سعيد وكنت برفض، بس انا كنت محتاج فلوس بأى طريقه، كان فيه عربيات فى ورش بيتقال عليها ميته، يعنى مفيش فايده من تصليحها او تكلفة تصليحها اكتر من تمنها ،العربيات دى بقت لعبتى، انا كنت فنان، رسام، اروح للعربيه واصلحها بقطع غيار رخيصه وأحيان بتغير فى الميكانيكا بتاعتها ،المعلمين والصناعيه كانو بيبعتولى العمال لما تقف قدامهم عربيه ،هاتو ناصر ،بعد سنه بقيت المعلم ناصر وانا عمرى يدوبك 14 سنه ،قدرت اجيب العلاج لوالدى من خارج راتبى، قدرت ادخل على اختى بدريه بفستان جديد

او جزمه واختى هدى بحاجه بتحبها

بدريه إلى فرحها اتلغى لأننا معرفناش نجهزها ،سنه كامله وانا مقاطع نوال لحد ما جيه اليوم إلى نوال جاتنى فيه الورشه

وقفت بعيد وانا شفتها، صعب عليه وقفتها فى الشارع

روحت عندها، عايزه ايه وايه إلى جابك هنا ؟

نوال، قالت لسه زعلان منى ؟

قلتله عمرى ما هسامحك يا نوال

نوال سكتت، وقالت العمر الطويل ليك يا ناصر

حسيت ان نوال عايزه تقول حاجه، مخنوقه ،مضايقه

نوال مش بس كانت اختى دى كانت عمرى كله انا حافظها اكتر من نفسها

همست، ناصر ممكن تزورنى فى الشقه ؟

قلتلها انا حالف رجلى ما تلمس شقتك لحد ما اموت

نوال عنيها دمعت، قالت ربنا يسهلك يا اخويا ومشيت

عارف نوال من يومها قليلة كلام مش بتعرف تعبر عن إلى جواها، فضلت واقف لحد ما نوال ما اختفت ورجعت على شغلى.

وانا مروح عديت على شقة نوال، كنت عايز اعملها مفاجأه

وقفت على باب الشقه متردد اخبط ولا لا

وسمع صراخه ،فتحى جوزها كان بيصرخ فيها ،يشتم وكان بيضربها ،خبطت على الباب بقوه وبعد شويه نوال فتحت الباب، وشها كان احمر من الضرب وايدها بترفعها بالعافيه

فتحى شافنى وقرب من الباب ،قال وادى المحروس اخوكى وصل ،عيله تجيب الفقر ،كنت هتكلم لكن نوال ضغطت على ايدى، فتحى ساب الشقه ومشى وانا دخلت الشقه

نوال عملت عصير وشاى وقهوه مكنتش عارفه تعمل معايا ايه، كانت مبسوطه اوى انى زورتها.

قلتلها نوال فتحى كان بيضربك ؟

قالت متشغلش بالك يا ناصر كل الرجاله على كده بس كانت بتحاول تدارى وشها بالطرحه ،مكنتش محتاج كلام، كان فيه جرح كبير فى وش نوال، رجلها بتعرج عليها وايدها مهزوزه

نوال اختى ؟ هو فتحى بيكتفك ويضربك ؟