رواية تاني مجرة على اليمين الفصل الثالث 3 – بقلم ميمي عوالي

الكوماندا باعجاب : احييك

عزرا : خلاص ، ماتضيعش وقت اكتر من كده

الكوماندا : تمام .. انا هبعت ردي لجمعة حالا

الكوماندا قفل شاشته ، و خرج من مكتبه نده على رامي و وائل و قال لهم : روحوا لجمعة خلوه يحضر البيض ، و بلغوه ان الفابريكان موصيين على الجودة العالية ، و خدوا مسعد معاكم و خلوه يبص على البيض و يتأكد انه تمام و جودته عالية

مسعد باستغراب : طب و انا هتأكد ازاى من الحكاية دي يا جناب الكوماندا

الكوماندا : انت اكتر حد هنا يا مسعد اتعاملت مع البيض بحكم عيالك و عيشتك ، فاكيد عندك خبرة عن غيرك ، و عشان كده اعتبر نفسك من هنا و رايح ريس العمال ، و يوميتك من النهاردة و من هنا و رايح زادت بيضتين

مسعد بذهول : انت بتتكلم جد ، اقصد يعني سعادتك بتتكلم جد

الكوماندا بتصنع الطيبة طبطب على كتف مسعد و قال بود مصتنع : طول عمري و انا عيني و قلبي معاك يا مسعد ، انت بالذات ماقدرش استغنى عنك ، ياللا اتوكلوا انتو و شوفوا اللى قلتلكم عليه

بسنت : طب و انا يا جناب الكوماندا

الكوماندا : انتي ايه مش فاهم

بسنت : مش هروح معاهم عشان لو هيحملوا .. احمل معاهم

الكوماندا : اما نبقى نعرف الاول هترسي على ايه

مسعد : ماتسيبها معانا جنابك ، دي حتى ليها دلال على عم جمعة ، و بتعرف تحافظ على البيض و هى بتغلفه

الكوماندا : انت بقيت ريس العمال يا مسعد ، و انت حر ، اللى انت شايفه فى مصلحة الشغل اعمله

مسعد التفت لبسنت و قال لها : خلاص يا بسنت تعالي معانا

مشي مسعد و بسنت مع رامي و وائل فى المكوك بتاعه و فضلوا ساكتين طول الطريق ، و لما وصلوا عند جمعة ، و طلبوا على البوابة انهم يقابلوه .. خرج لهم و قبل ما ياخدهم على المزرعة من جوة قال لهم

لازم تسيبوا كل اجهزة الاتصال بتاعتكم برة ابواب المزرعة

وائل باستغراب : اشمعنى يعني

جمعة بابتسامة : اجهزة الاتصال بتأثر على المكن بتاع التفريخ

كلهم سابوا اجهزة الاتصال بتاعتهم فى خزنة صغيرة و هم مستغربين و لقوا موظف الامن ادى مفتاحها لرامي ، اللى لما استغرب جمعة قال له ببساطة : عشان تبقوا متطمنين على خصوصية الاجهزة بتاعتكم

بعد ما دخلوا .. و اول ما وصلوا لمكان مافيهوش غيرهم بسنت قالت : نقدر نتكلم دلوقتي

جمعة قال لهم : كده نقدر نتكلم بأمان اكتر

رامي : انا فهمت قصدك من اللى عملته فى المصنع

بسنت : انا كمان فهمت

مسعد : كلنا فهمنا ، بس اللى انا مش فاهمه .. ليه الكوماندا ماكانش عاوز يديلك العلف فى الاول

جمعة بابتسامة : افهم من كده انه وافق يديهولى دلوقتى

مسعد: وافق و باعتنا عشان نتفق معاك و نجهز الطلبية ، بس برضة مش فاهم .. ليه ماكانش بيوافق فى الاول

جمعة : عشان يعجزوني مش اكتر

وائل : طب و هيستفيدوا ايه

جمعة : اني احتاج لهم ، و ده هيخلي صباعي تحت ضرسهم

بسنت : طب انت ليه ماخليتش التعامل بينك و بين الفابريكان على طول ، ليه سيبت الكوماندا يفضل وسيط بينكم

جمعة : ببساطة شديدة لانى مش عاوز يبقى فيه تعامل من الاساس

بسنت : مش فاهمة

جمعة : مش عارف ان كنتم فهمتم و اللا لسه ، لكن الفابريكان كانوا عاوزين يطلعوني طماع و اناني قدام شعب بكر ، و اني مش عاوز غير مصلحتي لوحدي

بسنت : فعلا احنا فهمنا ده ، لكن كمان معظم العمال فهموا ، و طلبوا منه يتعامل مع حد تانى غيرهم

جمعة : بس انا هتعامل

رامي : ازاى بقى

جمعة : انا اتعاقدت على شحنة علف من صاين ، و مستنى وصولها فى اي لحظة

مسعد: اومال ليه طلبت شحنة تاني من الكوماندا

جمعة : لان لما الاهالي كمان تربي البهلوان ، هم كمان هيحتاجوا للعلف ده ، فلازم يبقى فيه فائض ، و كمان هم لازم يفهموا ان كل شئ و له تمن

بسنت : بس انت كده هتفرط فى جزء كبير من بيض الفقس بتاعك ، و كمان انت عارف هم عاوزينه ليه و طمعانين فى ايه

مسعد : ماهو اكيد هيديهم من البيض العادي مش من اللى بالكم فيه

جمعة : فعلا .. هو ده اللى هيحصل

بسنت : بس برضة هيأثر على الانتاج بتاعك ، يبقى ليه

جمعة : محتاج شوية وقت كمان يا اولاد

رامي : لإيه

جمعة : مش عاوز اتفاجئ بغدرهم قبل ما ابقى مستعد لهم

بسنت : طب ماتفهمنا عشان نستعد معاك

جمعة : الفابريكان مش هيهدالهم بال الا اما يحطوا ايدهم على المزرعة و يقدروا يوصلوا لسر الدهب ، و دلوقتي هم كل همهم ان حد فيهم او تبعهم يدخل هنا و يعرف السر ده ، و كمان هم معتقدين اني بضيف حاجة معينة على القشر عشان يتحول لدهب بدليل ان البيض اللى بياخدوه أما بيفقس بيتكسر و ينتهي و كمان الفراخ بتموت مابتعيشش

مسعد : بس هم كده كده عارفين ان الطير كله هيموت لانه مابيعيشش عندهم

جمعة : ده كان قبل الصوبات اللى عملها موشيه مخصوص عشانهم فى قلب مستوطاناتهم فى عدنان

بسنت : و هى الصوبات دى هي اللى هتحييهم

جمعة : ماحدش فينا يقدر ينكر تقدم المعامل و الابحاث بتاعتهم ، و اللى بيها قدروا يكتشفوا ان الغلاف الجوي لكوكب بكر فيه غاز مش موجود على اي كوكب تاني غيره فى كل المجرة ، و بالاكتشاف ده قدروا يكونوا فكرة ان الغاز ده هو الغاز الرئيسي اللى بيعتمد عليه البهلوان فى تنفسه ، و قدروا كمان يفهموا ان سر السحاب اللى بنمشي وسطه و حوالينا فى كل مكان ده مش اكتر من تكوينات من الغاز ده بعد ما بيستنشقه طيور البهلوان و يرجعوا يخرجوه من تاني فى عملية الزفير و هو مقرون بكذا غاز تاني ، فبيخرجوا مكونين الكتل اللى تشبه السحاب اللى انتو شايفينها حواليكم دى

بسنت : سبحان الله ، و عشان كده البيض اللى تحت السحاب ده بيفقس بطريقة غير اللى اللى بيفقس اعلى منه

جمعة : بالظبط كده

رامي : طب تفتكر الصوبات اللى عملوها دى ، هتنجح انهم يعرفوا سر الدهب

جمعة : هتنجح فى حالة واحدة بس

بسنت : ايه هى

جمعة : انهم ينجحوا فى انهم يربوا عندهم البهلوان فى غلاف جوي زى غلافنا اللى فوق السحاب بالظبط ، و الطير يكبر و يبيض هناك و البيض يفقس ، ساعتها هيبقى عندهم الدهب اللى بيجروا وراه

بسنت : على كده ندعيلهم انهم ينجحوا ، عشان على الاقل يسيبونا فى حالنا

رامي : غلط يا بسنت

بسنت باستغراب : غلط ليه بقى ، ماهم خلاص كده ، مش هيبقوا عاوزين مننا حاجة تاني

جمعة : بالعكس ، ده طمعهم هيزيد اكتر ، الناس دي مشكلتها مش فى انها يبقى عندها اللى هي عاوزاه و بس ، لأ .. الناس دى هدفها ان مايبقاش حد عنده اللى عندها ، بتبقى عاوزة تكوش على كل حاجة ليها لوحدها ، حتى لو الحاجة دى اصلا مش بتاعتها .. تاريخهم كله بياكد الكلام ده

وائل : فعلا .. التاريخ مليان بجرا/يم جدودهم على الارض

جمعة : و التاريخ علمنا انه دايما بيعيد نفسه

مسعد : طب دلوقتي الكوماندا باعتنا عشان نبلغك موافقته و كمان عشان نعاين بيض الفقس اللى هتديهولنا و جودته

جمعة ضحك و قال : و ماله ، عاينوا براحتكم

بسنت : بصحيح يا عم جمعة ، مش تبارك لمسعد ، اترقى و بقى ريس العمال ، و الكوماندا زود يوميته بيضتين بحالهم

جمعة بص لمسعد بتمعن و قال : بس دي مش ترقية يا مسعد ، يا ترى انت عارف كده

مسعد بتنهيدة مصحوبة بامتعاض : عارف يا عم جمعة انها مش ترقية

بسنت باستغراب : مش ترقية ازاى يعني ، ماهو قال قدام كل العمال انك بقيت ريس عليهم

مسعد : و ما سألتيش روحك اشمعني النهاردة يا بسنت ، مانا متمرمط فى المصنع ده طول عمري ، ايه اللى جد يعني

بسنت : انا مش فاهمة حاجة ، طب ماتفهمني انت يا عم جمعة

جمعة : انا عاوز اسمع من مسعد نفسه ، على الاقل اتاكد انه فهم مظبوط

مسعد بامتعاض : و عاوز تسمع ايه يا عم جمعة ، عاوز تسمع ان الكوماندا بيرشيني عشان افتن له عليك

جمعة : لا يا مسعد ، هو مش عاوزك تفتنله عليا ، هو عاوزك تبقى له جاسوس عليا و على المزرعة بتاعتي .. رأيك ايه

مسعد باستنكار : و انت برضة تصدق فيا اني اعمل حاجة زي دي يا عم جمعة ، انا برضة هبيع ذمتي و ضميرى ببيضتين زيادة و اللا حتى عشر بيضات

جمعة : البيضتين دول مش اكتر من عربون يا مسعد ، حاجة كده زي فتح نفس و جر رجل

مسعد : حتى لو كان يا عم جمعة ، انا عمرى ما اورث ولادي عار الغدر و الخيانة ابدا ، و لا عمري ااكلهم من حرام ، ده انا حتى مش عارف اعمل ايه بالبيضتين الزيادة اللى هيدهوملى دول

بسنت : بس البيضتين دول انت هتشتغل بيهم يا مسعد

جمعة : و طالما انه ماطلبش منك اي حاجة لحد دلوقتى تخالف ضميرك ، فمالك حلال

وائل : المشكلة لما يطلب ، هيعمل ايه

مسعد بقلق : ماهو ده اللى انا خايف منه

بسنت : تفتكروا هيطلب منه امتى ، و هيطلب منه ايه

جمعة : فى الاول مش هيطلب منه حاجة ، بس هيحاول ياخد منه معلومات على انه كلام عادي و دردشة ، و كلام بيجيب كلام

مسعد بفضول : و بعد كده

جمعة : بعد كده ده … ردودك عليه هي اللي هتحدد ان كانت تيجي بسرعة و اللا براحتها و اللا ماتجيش اصلا

رامي : تقصد انهم مش هيجندوه صراحة الا اما يلاقوا ان المعلومات اللى عايزينها مش عارفين يستخلصوها من كلامهم العادي

جمعة : بالظبط كده

مسعد : انتو كده بتخوفوني زيادة

رامي : مش المفروض تخاف

بسنت : بس المفروض يبقى مستعد و عارف هيرد يقول ايه

وائل : و لازم يبقى فى وسيلة اتصال سريعة و امنة مابيننا

بسنت : صحيح يا عم جمعة ، انت ليه حجزت مننا وسايل الاتصالات كلها برة المزرعة

جمعة : لانهم اكيد هيتصنتوا على كلامنا مع بعض من خلالها

رامي : بس انت المرة اللى فاتت ماعملتش كده

جمعة : ده لان المرة اللى فاتت ماكانتش متدبرة من الكوماندا و لا مترتبلها ، و كمان ماكانش معاكم اجهزة الاتصال بتاعة المصنع ، كان معاكم اجهزتكم الشخصية و بس

لكن طبعا دلوقتي الأأمن اننا نعزل كل اجهزة الاتصال بعيد عننا

مسعد : طب برضة ماعرفتش المفروض هتصرف ازاى لو كلمني او سألني على اى حاجة

جمعة بص لمسعد و قال له : انت النهاردة اخر اليوم بعد ماتخلص شغل ، تقفل سماعة الشغل بتاعتك و تجيبهالى و تديهالي

مسعد : اجيبهالك هنا

جمعة : لا ، النهاردة انا هبقى موجود معظم اليوم فى ورشة تصنيع المفارخ اللى بنعملها عشان اهل بكر اللى هيربوا البهلوان ، و انت هتجيلي على هناك زيك زي اهالى كتير تتطمن على المفرخة بتاعتك ، و اول ما تشوفني تديهالي من غير كلام و انا هتصرف

وائل : هتعمل ايه يا عم جمعة

جمعة : عندي اللى يقدر يزود موجة على الجهاز بتاع المصنع ، و الموجة دي تبقى خاصة بينا احنا و بس

بسنت بترقب : و دي مافيش منها خطورة ، اقصد يعني مش ممكن الكوماندا و اللى معاه يكشفوها

جمعة بابتسامة ثقة : الموجة دى بنستعملها النهاردة بقالنا اكتر من تلت سنين و ماحدش قدر يكشفها ، خصوصا انها بتتعدل كل فترة صغيرة

رامي : انا فهمت من كلامك ده ، ان العملية مش بيننا احنا و بس ، ده فى ناس تانية معانا

جمعة : و مش قليلين

بسنت : طب مش المفروض نعرف هم مين

جمعة : وقت ما اتطمن انكم قدرتوا تنجحوا و تعدوا من اللى بيحصل ده من غير ماحد يشك فيكم ، اكيد هتتعرفوا على زمايلكم كلهم

رامي : طب هي سماعات مسعد بس هي اللى هتتعدل

جمعة : النهاردة مسعد و بسنت ، و بكرة انت و وائل ، علي حسب مواعيدكم فى الجدول اللى عملتهولكم و علقته على باب المزرعة من برة

مسعد : طب انا المفروض هتعلم اتعامل ازاى مع السماعة دي و اللا ايه

جمعة : ماتقلقوش ، المهندس هيظبط كل حاجة و انت من نفسك هتفهم ، كل الحكاية انك اول ماهتلبسها هتلاقينى يا انا يا المهندس بيشرحلك تعمل ايه ، بس اهم حاجة .. ان مايصدرش من اي حد فيكم اي رد فعل يلفت له الانظار .. هتقدروا

كلهم : ان شاء الله

جمعة : تمام ، المطلوب منكم دلوقتي انكم ترجعوا المصنع و تبلغوا الكوماندا ان كله تمام ، و اني مشغل العمال فى تغليف الطلبية و تعبئتها ، و خدوا ادوله شوية الصور دول

وائل : صور ايه دي

جمعة : دي صور للبيض و هو بيتغلف و بيتحط فى العبوات بتاعته ، عشان بس يفهم انكم ماكنتوش بتلعبوا

بسنت : بس ممكن يعرف ان الصور دي مش من الاجهزة بتاعتنا

جمعة : مانتو هتفهموه ان كل الاجهزة بتتصادر منكم على بوابة المزرعة ، لكن مسموحلكم تعملوا كل اللى انتو عاوزينه باجهزتنا البدائية للغاية و اللي يا دوب بتقضى الغرض من غير ما تأثر على الانتاج و لا اجهزة التفريخ

رامى : تماام .. اتفقنا

رامي و وائل رجعوا بيهم على المصنع من تاني ، ولقوا الكوماندا قاعد مستنيهم و وشه باين عليه التجهم ، و اول ما وصلوا ، بسنت سابتهم و راحت على العنبر بتاعها ، و مسعد مد ايديه بالصور للكوماندا عشان يوريهاله و هو بيقول : كله تمام يا جناب الكوماندا ، التغليف و التعبئة ابتدوا

الكوماندا : انتو ماكنتوش بتردوا على اجهزتكم ليه و انتو هناك و قفلتوها ليه

مسعد و هو بيحاول يحافظ على هدوئه : ممنوع حد يدخل المزرعة باى اجهزة اتصال

الكوماندا بتهكم : و ليه بقى ان شاء الله ، خايفين على اعصاب البهلوان و اللا خايفين لا البيض مايفقسش

رامي بثبات : قالولنا هناك ان اجهزة الاتصال بتشوشر على الحضانات و التفريخ ، و خلونا حطيناها فى خزنة عند الامن برة

الكوماندا بحدة : و هى اجهزتنا تتساب كده برضة فى ايد شوية امن و احنا مش عارفين ممكن يعملوا فيها ايه

وائل : لأ طبعا يا جناب الكوماندا ، الاجهزة بتاعتنا اتحطت فى خزنة و رامي استلم مفتاحها فى ايده ، و اول ماخلصنا و خرجنا ، رامي برضة هو اللى فتح الخزنة بنفسه و طلع الاجهزة من الخزنة وزعها علينا من تاني

الكوماندا كان بيبصلهم بترصد ، و قال لرامي : عاوزك تاخد المكوك بتاعك و تروح انت و وائل على صوامع الفابريكان ، هتستلموا اول شحنة

رامي : يعنى اخد معايا باقي القافلة عشان نحمل على طول

الكوماندا : لأ ، الفابريكان المرة دى هيوصلولنا الشحنة بنفسهم

رامي باستغراب : اومال احنا هنروح نجيب ايه

الكوماندا : هتجيبوا عينة من العلف لجمعة ، و ودوهاله على المزرعة على طول ، ماتجيبوهاش على هنا

رامي و وائل و مسعد بصوا لبعض و هم بيحاولول يداروا القلق اللى سيطر عليهم ، فمسعد قال : طب اروح معاهم با جناب الكوماندا

الكوماندا : لا يا مسعد ، خليك انت ، انا عاوزك فى شغل تاني ، ياللا انتو يا رامي عشان ماتتأخروش

رامي و وائل قبل ما يمشوا بصوا لمسعد بصة مساندة و تحذير فى نفس الوقت ، و اول ما خرجوا مسعد قال : اوامرك يا جناب الكوماندا .. تؤمرني اعمل ايه

الكوماندا : اقعد يا مسعد

مسعد : العفو جنابك ، المقامات محفوظة

الكوماندا : اقعد يا مسعد عشان تفهم و تركز معايا فى اللى هقولهولك

مسعد قعد بتردد و هو بيبص للكوماندا برهبة ، فالكوماندا ابتسم و قال له : انت شغال معايا هنا بقالك اد ايه

مسعد : خمستاشر سنة جنابك

الكوماندا : يعني من الناس القدام اللى يهمها مصلحة المصنع ، و انه يفضل دايما شغال و مفتوح و فاتح بيوت اللى عايشين من خيره

مسعد : ااه طبعا جنابك

الكوماندا : و لو حد فكر يهدد استقرار المصنع و شغله ، و فكر انه يقفل لنا باب رزقنا ده ، تفتكر نتصرف معاه ازاى

مسعد بحذر : و هو فى حد ممكن يتجرأ و يقف قدام جنابك

الكوماندا بغرور : لأ طبعا ، بس فى ناس غبائها ممكن يصور لها انها ممكن تقف قصادى

مسعد : تبقى فعلا غبية و مش عارفة مصلحتها

الكوماندا : و تفتكر دول ممكن نعمل معاهم ايه

مسعد : اللى جنابك تؤمر بيع يتنفذ على طول

الكوماندا : مهما ان كان هو مين

مسعد : كله الا الرزق جنابك ، اللى ييجى جنب قوت عيالنا لا يمكن نسكت عليه

الكوماندا : يعنى افهم من كده انك معايا

مسعد : و اعتبرني دراعك اليمين

الكوماندا : يبقى عاوزك تسمعني كويس و تفهم كل كلمة هقولهالك و تنفذها بالحرف الواحد ، و تعمل حسابك .. ان لو حرف واحد من اللى هقولهولك ده طلع برة ، انى زى ماعملتك ريس للعمال .. مش هخليك حتى تتفع انك تنضف صوامع التقاوى