رواية أوتار أحد من السيف – الفصل الرابع
فيه بنيه هنه عندك اسمها اوصاف انا رايدها وهدفعلك فيها قد ما تطلب المهم نخلص قوام قوام
نعيم ارتبك جدا وقال…مهو..احم…اقولك ايه فيه بنات احلى كتير بس لو تشوفهم…
فياض قاطعه وقال بضيق….انا كلامي واضح يا ريس نعيم..عايز البت اللي اسمها اوصاف …مجايش لجل اختار
نعيم لسه هيرد اوصاف اتقدمت عليه وقالت بغضب….بقى عايز اوصاف ….اممم….وهتدفعله اللي عايزه كمان…. يا حلاك اللي قواك
فياض ابتسم وقال بمشاكسه…وانت بتتدخلي ليه…عايزه تحلي محلها….متقلقيش يمكن متبقاش اخر طلعه…. عقارب الجبل عجبوني قوي
اوصاف قالت بغضب…عقربه لما تلوشك ماتقوملك قومه …خد بعضيك وغور من هنه …منقصاش بلاوي …معندناش بنات تتباع ..جاتكم القرف
قالت كده ولسه هتمشي بس فياض مسكها من هدومها من ورا رقبتها وقال..وانتي مال امك انتي باللي يبيع واللي يشتري تكونيش واصيه عليهم ولا هو رمي بلا وخلاص
اوصاف بلعت ريقها بتوتر وبقت تزقه وهيه بتقول بزعيق…هملني يا جدع انت… هملني العبايه لتتقطع في يدك وانت كيف الطور كده هملني
فياض كان ماسكها مسكة حراميه و بيخبطها في الحيط وراها ويشدها عليه ويدفعها تاني بلا مبالاه كانها لعبه في ايده وهو بيقول…ما تلم حريمك يا عم نعيم ….مشرسهم علينا كده ليه
نعيم قال بتوتر..اصل دي..تبقى..احم تبقى….او..اوصاف
فياض اتسعت عنيه بدهشه وسابها فورا فاندفعت من كتر ما كان بيحركها ووقعت على الارض
عند دياب كان قاعد على الكنبه والدموع محبوسه في عيونه وهو بيبص ل غفران اللي نايمه على الارض وحالتها توجع الكافر كان وشها وارم من كتر الضرب وجسمها وهدومها متبهدله وشعرها واقع منه حواليها وجبينها بينزف وماسكه دراعها ودموعها بتنزل بصمت مش قادره تتألم حتى شبه مغمى عليها
بلع ريقه وقرب منها وقال بهمس ووجع…غفران…غفران سمعاني…قومي وياي اوديكي المستشفى
غفران مكانتش قادره ترد ابدا وتقريبا مش سمعاه
دياب مد ايده لمس دراعها ببطأ وقال بندم..غفران…قومي حقك عليا
غفران شهقت اول ما لمس دراعها وصرخت من جواها بتعب والم شديد
دياب بعد بسرعه وقال بتوتر….دراعك…دراعك تقريبا اتكسر …انا….انا هجيب الدكتور هنه …مش هتقدري تروحي مستشفيات ..انا هتصرف متخافيش
وجري جاب تليفونه واتصل بسرعه على الغفير وقال …فين فياض خليه يجيب دكتور بسر….
بس قطع كلامه وقال بحرج…لاه ..هاتو انت يا محمود..اتصرف وهات دكتور بسرعه
وقفل معاه وبص لغفران اللي كانت مرميه زي الجثه وبص لهدومها المتبهدله اتنهد وراح جاب لها عبايه وقرب منها وقال…يلا يلا ياغفران علشان تلبسي الدكتور جاي
ولسه هيقرب يساعدها نطقت بالعافيه وهيه بترتعش وقالت ….ابعد…ابعد مت..متقربش
دياب اتنهد وقال…متخافيش هلبسك العبايه بس …متخافيش واصل مش هأذيك لازم تكشفي دراعك شكله مكسور …متعانديش في صحتك
غفران بقت تهز راسها بالرفض بتوهان والم مكانتش قادره ترفض او تتكلم ودياب قرب منها قلعلها عبايتها المقطوعه ولبسها التانيه وهيه لاحول ليها ولا قوه بترفض من جواها اي مساعده منو بس مش قادره تحرك اي جزء منها علشان تمنعه
بقلم…زهرة الربيع
عند فياض كان بيبص لاوصاف بدهشه ومكانش متخيل الحظ يوقعه معاها وتطلع البنت اللي فضل يضايق فيها هيه نفسها اللي محتاج يكسب رضاها علشان ياخدها معاه ..بقى يبصلها من فوق لتحت بذهول صحيح خطاب قاله انها جميله بس متوقعش تكون بالجمال ده ..وازاي واحده بالجمال ده تقبل تتجوز راجل زي خطاب
حاول يبعد اي افكار عن دماغه و حمحم وقال …اوصاف…انتي اوصاف
اوصاف وقفت وهيه بتنضف هدومها وقالت بغضب…ايوه انا هباب ..خير ان شا الله معجبتكش وغيرت رأيك في الشروه..يا الف بركه عموما البنات هنه كتير قوي ورخاص قوي هيعجبوك لان الرخيص بيميل للرخيص
ولسه هتمشي مسك ايدها واتجاهل كل كلامها رغم انه عصبه وقال..بس انتي سمعتي قولتله ايه …انا عايز اوصاف وبس
وبص لنعيم ومهتمش لرفضها وقال..ها ياريس عامله كام دي
اوصاف اتسعت عنيها بذهول من طريقته ودفعت ايده وقالت …هيه ايه اللي عامله كام …انت بتشتري بقره …متطلعش جناني عليك يا جدع انت وغور من هنه لغورك على نقاله
فياض مردش عليها وقال لنعيم جرى ايه يا ريس هو انتو فصالكم بيبقى مع الحريم ولا ايه…مناويش تقول كلمتك
اوصاف كانت مصدومه من التجاهل والبرود بتاعه ونعيم كان متوتر وقال …شوف يا ولدي مكدبش عليك اوصاف غاليه عندينا وهيه اللي ممشيالنا شغلنا والناس بتاجي من كل مكان علشانها مقدرش ادهالك اكل عيشي يتعطل ..انت بس لو تشوف بقية البنات يمكن حاجه تعجبك و…
فياض قاطعه وقال بحزم..اسمع ياريس نعيم…انا جاي وناوي اخلص وكيف ما قولتلك مش عايز غير البنيه دي …ولو على رزقك مش هيوقف ولا حاجه انا هعوضك باللي متتخيلهوش
نعيم لمعت عيونه بطمع وقال …كام يعني
اوصاف بصتله بحده فقال بسرعه…..بناخد فكره بس يعني
فياض لسه هيرد اوصاف قالت بزعيق……على راحتكم انتو الاتنين اوجعو راسكم واتفقو على الفاضي…وابقو وروني هتجبروني اروح معاه كيف …انا تعبت من المناهده ومهقعدش وياكم دقيقه تاني … تصبحو على الهم والغم وحرقة الدم
قالت كده ودخلت تنام وفياض اتنهد بضيق وحس ان فكرة انو يدفع الفلوس ويمشي دي مش هتنفع لانها رافضه جدا وهتعمل مشاكل…. وكمان جوز عمتها شكله طماع ومش هيقبل باي حاجه ومحتاج يتفاوض معاه اتنهد وقال…طيب ياريس …انا بلدي بعيده وعايز اخدلي يومين هنه اتبسط وافك عن نفسي ومش هينفع انزل وارجع اطلع كل ليله ..مفيش مكان قريب ابيت فيه يومين كده لحد ما اشوف يمكن اختار واحده تانيه او البت دي ربنا يهديها
نعيم قال بسرعه وفرحه …فيه امال..حداي…الدور اللي جنبي دي كلها بتاعتي وباجرها بالليله كيف ما انت شايف كل دار احلى من اللي جارها ويشرحو القلب
فياض بص للبيوت اللي جنب بيته وكان كل بيت عباره عن اربع حيطان ملفوفين زي اوضه ومسقوفه باعواد النخيل زي العشش بالظبط ومتصلحش لسكن المواشي حتى… اتنهد وقال…صدقت …يشرحو القلب والمعده كمان
عند دياب كان واقف بتوتر والدكتور كان بيجبس دراع غفران لانه لقاه مكسور وطلب ادوات تجبيس وجبوهاله وجبسلها دراعها وكمان ضمد لها كدماتها وجرح دماغها اللي احتاج غرزتين والدكتور خيطه بدون بنج
كانت غفران بتتألم جدا وبتبكي بصوت سمعه البيت كله ودياب كان في اشد حالات الندم وبيساعد الدكتور وكان ماسكها بقوه علشان الخياطه
استمر الدكتور في شغله لحد ما خلص وغفران كانت اغمى عليها من شدة الالم ببن ادين دياب اللي كان حاضنها بقوه
الدكتور وقف وقال بحزن وشك ….ربنا يشفيكي يا بنيتي…والله امر غريب غفران طول عمرها بنيه عاقله وبتاخد بالها زين وبتطلع السطح يوماتي كيف وقعت كده يا دياب بيه
دياب بصله بحده وفهم انه شاكك فيه وقال بغضب…قدر…قدر يا دكتور…ساعة القدر بيعمى البصر …عموما خطاويك للجنه شكرا انت كده
الدكتور اتنهد بضيق وقال …..لا شكر على واجب …وبعدين غفران كيف بتي وابوها الله يرد غيبته كان صاحب عمري…خد بالك ليها ..انا بعت الغفير بباقي الادويه والمضاد والمهم الحقن تتاخد في معادها علشان الجرح ميلتهبش ..بالاذن
قال كده ومشي ودياب بص لغفران اللي اديها ماسكه في جلابيته بضعف…كانت ماسكه فيه من شدة الالم لحد ما اغمى عليها
مسك ايدها وباس كفتها بتردد وقال بحزن….غلطتي قوي يا غفران….انتي عرفاني …عرفاني يابت الناس بمبتحملش وطبعي قاسي كيف الحمار …ليه تجري شكلي …ليه تخليني امد يدي عليكي
وضمها بقوه واتكأ على السرير وهو بيفتكر اللي عمله فيها ومش قادر ينسى الحاله اللي اتلبسته لما اهانته ولا قادر ينسى كلامها وبيتردد في ودنه كلمه كلمه
الخدام ده ارجل منك مليون مره اكبر بس انت وحصل ضفره ..ولا انزل اقعد معاه خليه يعلمك كيف تكون الرجوله اللي متسمعش عنها
هنا دياب اسودت الدنيا قدام عنيه مراته من شويه كانت بتعرض على راجل من خدمهم انها تهرب معاه وبتقوله انها بتحبه ..ودلوقت بتمدحه وتعليه قدامه حس ان الدم غلى في عروقه رجعلها وقال بغضب ميتوصفش..انتي قولتي ايه
غفران خافت جدا من نظراته وقالت بتوتر…قولت الحقيقه…انا بحب فياض ومهحبش غيره …وبعتبر نفسي مرته كمان
قالت كده وحبت تمشي من قدامه لانها مش مطمناله بس اول ما بعدت خطوات صرخت بقوه لما جابها من شعرها وهو بيزعق وبيقول بغضب…..اه يا بت الكلب يا بت الرفضي
ونزل فيها ضرب بغشوميه كانو بيضرب راجل في نفس قوته
غفران اتصدمت بمنظره وبقت تصرخ وتستنجد بس محدش طلعلها ابدا
حاولت تدفعه بكل قوتها بس مقدرتش وقعها على الرض ونزل فيها ضرب بقوه ومسكها من شعرها وبقى يضرب دماغها في الارض لحد ما تفتحت وهو بيقول بجنون…مين ده اللي ارجل مني يا بت ال *** دا انا لولا اني قرفان منك كنت وريتك الرجوله يا فاجره يا عايبه..بس هعرف اربيك زين واعلمك الادب على اصوله ..هعرفك واعرفه مين هو دياب الخطاب يا انجاس
غفران كانت بتصرخ برعب منو وجبينها اتفتح وبقت تنزف مدت ايدها تمسك حاجه تضربه بيها بس كان اسرع منها ومسك دراعها لواه بقوه اتكسر في ايده
هنا غفران صرخت بشده والم ميتوصفش وغابت عن الوعي فورا من الالم ومن جبينها اللي بينزف
دياب اول ما اغمى عليها حس باللي بيعمله بقى يضربها على خدودها بتوتر وهو بيقول..غفران..انتي يا زفت..قومي ما تستعبطيش
بس اتوتر جدا لما لقى دمها سايح من جبينها ووشها شاحب زي الاموات قال بخضه…بت يا غفران..غفران ردي عليا ..غفران
وبقى يفوقها وهو مخضوض جدا وحاسي بوجع في اديه من كتر ما ضربها
جاب علبة برفان بسرعه وبقى يفوقها و يطمن انها عايشه واول ما لقاها بتتنفس وبتفتح عيونها وتقفلها بتعب
قدر ياخد نفسه وحس ان كل جسمه بينهار من كتر الخوف واترمى على الكنبه وهو بيجذب شعره بندم ودموعه محبوسه بالعافيه
فاق من شروده على دمعه خانته ووقعت على خده بلع ريقه بوجع وقال….الله ياخدني..الله يلعني وينتقملك مني
في الوقت ده غفران فتحت عيونها بتعب شديد وقالت …اااه
دياب بصلها بلهفه وقال..غفران…انتي زينه…اعملك حاجه…فيه حاجه بتوجعك
غفران بصتلو بحقد وعيونها مليانين دموع ووجع
دياب اتنهد وقال …سؤال غبي عارف..اكيد موجوعه..اصلا مفيش فيكي حته سليمه….بس متقلقيش هنجيبو العلاج وهتتحسني انا مش ههملك غير لما تبقي كيف الاول واحسن
غفران بعدت عنه وهيه بتتألم ومسحت دموعها ونطقت بالعافيه وقالت….لا هملني ..شاكره افضالك…انا مش عربيتك اللي كل يوم تكسرها وتوديها للصنايعي يصلحها
دياب اتنهد ووقف وقال …بلاش نتكلم دلوك انتي تعبانه ارتاحي وهنتكلمو اكيد
ولسه هيمشي قالت بتعب وهيه حازمه امرها…مفيش حاجه نتكلم فيها…عايزه اطلق يا دياب…طلقني دلوك
دياب اتفاجأ وبصلها بدهشه وقال ..ايه…تتطلقي
بقلم…زهرة الربيع
تحت خطاب دخل البيت اخر الليل وهو مبسوط لقى مراته قاعده بضيق اتنهد وقال..ايه لساتك لاويه وشك كيف البومه
نعمات قالت بضيق….الويه ولا افرده مالك ومالي…انت دلوك مش محتاج وشي ولا قفايا
خطاب اتنهد وقال…اللهم طولك ياروح…..طب صاحيه لحد دلوك ليه
نعمات ابتسمت بمكر وقالت…ييوه هو انت فاضيلنا….ده انت فاتك العجب وصيام رجب..هو ولدك كان مخلي حد ينام…وهمست وقالت..متشاكل ويا مرته وشكله اداها علقة موت علشان كان جايب الدكتور
خطاب بصلها بدهشه وقال..دكتور..ليه هو عمل فيها ايه
نعمات قالت بلامبالاه..وانا اش عرفني ..انا ربك والحق سمعتهم بيتعركو وهيه كانت بتصرخ بس مرضيتش اطلع ..لانك قبل سابق قولتلي متدخلش بيناتهم ..شوفت انا بسمع كلامك كيف
خطاب رفع حاجبه وقال بسخريه.. …انت مطلعتيش عشان قولتلك متدخليش بينهم ولا علشان كان عاجبك الموضوع وعيزاه يضربها
نعمات قالت بكدب ..انا..طب انشاله اعدمك ان كنت…
خطاب قاطعها وقال بسرعه…بس اتكتمي قبر يلمك… وكمان عايزه تحلفي بيا انا ناقص…غوري نامي وليه سو تموتي في اللت والعجن
قال كده وطلع ينام وهو بيقول…..ماشي يا دياب الصباح رباح
نعمات لوت بقها بسخريه وقالت بصوت عالي…نوم الهنا يا…يا عريس
عند اوصاف كانت قاعده في اوضتها بتوتر وهيه بتفكر في فياض ووقت ماشافتو وكل شويه تفتكر الحلم بتاعها وعيونه مش مفارقه خيالها اتنهدت وقالت…هو انتي هتتجني يا اوصاف ولا ايه…مش معقول يعني مهو قالك انو اول مره ياجي هنه بطلي تفكير بطلي بقى
في الوقت ده دخلت عمتها وقالت بضيق…قومي يا ست الحسن والجمال …عمك عايزك تودي وكل للضيف الجديد
اوصاف بصتلها باستغراب وقالت.ضيف ..ضيف ايه
عمتها قالت ..اصل الجدع اللي كان رايدك اجر بيت حدانا ..ونعيم بيقول شكلها هتبقى لقمه طريه وهنكسبو من وراه زين
اوصاف وقفت وقالت بغضب…هو جوزك عايز ايه مني…ما قولتلكم مهروحش ويا حد ..اسيبلكم الجبل كله واطفش علشان تستريحه
عمتها قالت بدهشه واه…هو حد جيه جارك…الجدع اجر وهيحضر السهر كيف اي زبون..يمكن تعجبه واحده غيرك ولا فاكره ربنا خلقك واستكفى
اوصاف قالت بخنقه…اممم..مصدقاكم…خلاص طالما قاعد علشان يشوف واحده غيري خلي واحده غيري توديلو الطفح انا مريحاش
عمتها قالت ….لاه ياغندوره مفيش غيرك البنات كلهم نايمين …ولا ناسيه انهم بيشتغلو طول الليل ولازم يريحو مفيش غيرك اللي نايمه ومتهنيه ليل نهار
اوصاف نفخت بخنفه وقالت بسخريه..ايوه ايوه بيتعبه اخر تعب…جاتكم القرف كلكم ان شاله ربنا ياخدني ويريحني منكم
قالت كده وطلعت علشان تجهز الاكل وعمتها قالت بصوت عالي..انشاله …بت فقر كيف اللي خلفتك
عند فياض كان مع نعيم بيفرجه على الاوضه وقال..ها ايه رأيك في الدار عجبتك
فياض بص للمكان بقرف وقال…فيه حمام
نعيم شاور على ستاره في الاوضه وقال..اها ورا الستاره دي فيه قاعده وبرميل ميه لو حبيت تستحمى بس قبل ما تخلصه تقولنا نعبهولك
فياض مسح على وشه بخنقه من الوضع والتفت لنعيم وقال..بقولك ايه ما تساعدني اخد البت يومين كده وهرجعهالك …اسمع مني هتاكل لقمه حلوه قوي من الموضوع ده
نعيم قال..انا اتمنى….بس انت شايف البت راسها كيف قالب الطوب
فياض قال بسرعه..انا هلينه متقلقش..انت بس ساعدني اخدها داري والباقي عليا انا هعرف اخليها تلين
نعيم ارتبك وقال …طيب هترجعها اكيد
فياض قال بكدب…عيب عليك انا اصلا مالي بيها …هما يومين كده نتبسطه وهرجعها وهعبيلك جيوبك ..ها قولت ايه
نعيم فكر شويه وقال ..عندي الحل ….بس جيبي واسع قوي …هتقدر تعبيه
فياض ابتسم وقال …طلباتك اوامر
نعيم ابتسم بطمع وقال….يبقى تسمع بقى وتنفذ بالحرف..لو عملت اللي هقولك عليه اعتبرها بقت في دارك ووووو
الفصل التالي اضغط هنا
يتبع.. (رواية أوتار أحد من السيف) اضغط على اسم الرواية لتجد الفهرس كاملاً بجميع الفصول.