رواية قضية سعدية – الفصل السادس
سعديه…بديت شويه شويه ارجع الوضعي الطبيعي
كمت اطلع واشتغل بلبيت اطبخ واخبز العب ويا جهال اخوني اقريهم اذا عدهم دروس
اخواني باااخر فتره اشترو كاع بصف كاعهم الي يزرعون بيها وصار شغلهم اكثر من قبل
قررو ياخذون نسوانهم وياهم للكاع
لان همه يطلعون من صلاة الفجر ويرجعون المغرب
عدهم تيوتا حمل زغيره قديمه من وكت ابوي
يخلصون بيها شغلهم
ياخذون نسوانهم وياهم يساعدنهم
هاي التويوتا يخلصون بيها شغلهم كله
مرات ياخذون بيها حلال يبيعونه
من هذا الي بيتنا يعني يبعون عجل لو هايشه
لو كثرن النعجات يبيعون منهم
الدجاجات يعني هاي السياره استخدام يومي
يخلصون بيها شغلهم
قبل أربع اشهر الله مكنهم وكدرو يشترون هاي الكاع
جمانه السعيدي
هاي الكاع الجديده الي اشتروها بيها بيت طين
يكعدون يرتاحون بي
يطلعون الفجر هما ونسوانهم وياخذون وياهم متاع
خاف يجوعون
تمر وجاي وخبز ولباقي من الكاع
الخيار والطماطه هما زارعيهن بلكاع
مرات ياخذون زبد عرب ودهن حر وياهم يتغدون بي
من نكعد من الصبح يعني ويا صلاة الفجر
نتريك كلنا اخواني يطلعون للكاع هما ونسوانهم
واني ابدل للجهال يرحون للمدارس
اعجن واطبخ غده
واروح للمحصار كتلكم قطعه بصف بيتنا احنا
مربين بيها الحلال اكو الها باب خارجي خاص بيها
وباب طالع من بيتنا
قريب على باب الشارع
يعني من ندخل من باب بيتنا باب المحصار يصير على ايدنا اليسرا كلش قريب
ادخل للمحصار احلب الهوايش ألم البيض
انضف مكان الحلال اطيهن علف وماي
ألم الزباله من بيتنا ومن الحصار بطشت فافون
واطلع اذبها
مكان الزباله بعيد عن بيتنا شويه قريب على الشط
هناك اكوووو
كوم مال زباله كل الناس تشمر بي الزباله
اشيل الطشت على راسي واروح اشمر الزباله وارجع
هذا الوقت الي اطلع بي من البيت وارجع يكون مترصدلي
ابو هادي
الله لايوفقه مو كاعد بلشارع لاشغل ولا عمل
والمصيبه سمع بيه اني بعدني بنيه وزواجي كان زواج فاشل
حس نفسه ممكن ياااثر عليه من هاي الناحيه
رجال لاعنده ذمه ولا ضمير ولا يراعي حرمة الجيره
من اطلع من البيت لمن ارجع يمشي وراي
ويضل يحجي حجي حقير مثل وجهه
ابو هادي…. شلونج
سعديه…ودي اركع راسه بلطشت واغطي بلزباله
لان هو زباله بس كلت خل اسكت اكيد هسه يمل ويبطل يمشي وراي
ابو هادي…مو جاي احجي وياج حلوه وشايفه نفسها
حقج الحلو مرغوب
ردي عليه ياحلوه انتي
عمت عين الزلم الي ما تقدر انتي كدامي ومااصير رجل حديدي
همزين عفتي اصلا كلها الناس تدري بي مورجال
انتي تستاهلين زلمه مثلي يخليج بعيونه
المهره الاصيله تريد خيال
واني خيالها لاتكولين جبير ولله احسن من احسن شاب
انتي بس اقبلي
واني اشوفج الزلم شنو
حقج اضوجين الي ماشايفه زلمه حقيقي حقها
اضوج
سعديه…عمي انت شتريد مني تراعيب عليك
اني بكد بناتك ليش تخليني اغلط عليك
ابو هادي…اغلطي عليه سبيني اتعاركي وياي
غير اموت عليج اغلطي واحجي بكيفج يابعد طوايفي كلهن
سعديه…ترا احجي لخواني وتصير مصيبه شكبرها
ويصير كتلك حلال
ابو هادي…نزوج نزوج اني وياج بعد شتردين
اني اموت على البنات الفرافير الي مثلج
سعديه…لا انت حيل زودتها
ابو هادي…مو بيدي عاشك والعشك بلوه
واموت على عيونج الحلوه
سعديه….ليش ما تحترم عمرك لا انزل اشيل النعال
واخلي الناس تتفرج عليك
ابو هادي…كلشي من ايدج حلو ياحلوه
سعديه…سكتت وكمت امشي بسرعه شمرت الزباله
ورجعت وهو بعده يمشي وراي ويحجي
بله هذا هسه شلون ويااا
رجعت للبيت وطبكت الباب
الرجال من سمع اني رجعت البيت اهلي وبعدني بنيه
تخبل عليه
خلاني بعقله عباله اني ميته على الزلم
هذاالكلام تكرر اكثر من مره عبالك منتظرني بس اطلع للشارع يجي وراي
سعديه…يمه شلون ويا هذا خره ابو هادي مللني
حسره اطلع اشمر الزباله يجي وراي
امي.. مالج شغل بي هسه يمل ويبطل
سعديه..ما يمل يمه ما يمل وكل شويه يذكرني
بزواجي الفاشل
عبالك ماكو فحل غيره بهاي الدنيا
تخبل رسمي
امي…. هو عوينجي من زمان
سعديه…اريد احجي لخواني علي هما يكدرون يوكفونه عد حده
جمانه السعيدي
امي….ممنوع تحجين كدام اخوانج
بس يسمعون يتعاركون وياا ويحبسونج مثل قبل بلبيت
وبعد ما اطلعين
الشيطان شاطر هو زلمه جبير وجسمه ضعيف
كلمه منا كلمه منا يموت باديهم
يضيعون اخوانج ثنيينهم بسببج
عوفي جنج ما تسمعين هسه يمل ويبطل
سعديه…مايمل ولا يبطل شكد اله خلك وبي حيل
اني بكد بناته ومابيه حيل مثله
اغلط علي احجي مايفيد وياااا
هسه هو يقبل واحد من اخواني يباوع على بناته
ليش ما يحترم نفسه
عيب على شيباته
امي…ذاك اليوم لكو وياا وحده واخوانها هدو علي ومشيه وفصل والناس كلها كامت تسولف بي
اني كلت هاي هيه بطل بعد حتى من الباب ما يطلع
بس لا بعينه ولا خايف ولا يستحي
سعديه…اي كلشي ما يفيد بي ما يعرف الغيره والمستحه شنو
امي…اسكتي منه يمه فدوه لا تجيبيلنا طلابه
اني اخاف على خوانج هذا الزلمه بايع ومخلص
اذا على الزباله عوفيها اني اطلعها
سعديه…اي وشلون انحبس بلبيت من ورا شلون
امي…هذا حظنا كل واحد وعلي ابتلاء واحنا ابتلائنا
ابو هادي
سعديه…وين الله ياخذه ويخلصنا منه
لو يطيحله بوحده تعلمه الادب لان مايعرف شنو الادب
اليوم الي بعده امي رادت تطلع الزباله
شألتها على رأسها كوه طلعتها
لليل كامت تبجي من راسها وركبتها
امي…اليوم اريد اموت ركبتي توجعني وراسي
سعديه….لان شلتي طشت الزباله
جبت دهن وكمت ادهن بركبتها وراسها
سعديه…بعد مااخليج اطلعين الزباله حتلو تخيس بلبيت
قررت اطلع من البيت اغير جو اروح للكاع ويا اخواني
يومين عفت مرت حسين بلبيت وطلعت ويا اخواني للكاع
صح حلوه الأجواء بس الشغل يموت هناك
تعب حيل تعب
رجعت للبيت ورجعت مرت حسين تروح وياهم
اليوم الي بعده باوعت بلشارع ماكو ابو هادي
شلت الطشت على راسي وطلعت
عبالك شم ريحتي
طلع واجا وراي يركض
ابو هادي…وينج صار جم يوم ماكوو
ليش هيج الكطيعه مو حلوه اشتاقيتلج
ولج اني احبج
سعديه…استغفر الله
ابو هادي…حتلو تصيرين عصبيه عليه ميخالف
اني حتى عصبيتج اتحملها
على كلبي مثل العسل اني من اشوفج ارتاح
مشيتج طولج عطرج
سعديه…صرت عصبيه علي التفتت بسرعه
ونزلت الزباله على راسه
كلبت الطشت على راسه وهو اكثره فضلات حيوانات
سعديه…وزبالتي هم تحبه
بقه واكف ومصدوم وهو صار عباره عن زباله من راسه الحد رجلي
ما متوقع مني هاي الحركه ابد
يعرفني ويعرفه اخلاقي ما متوقع راح اشمر الزباله علي
رجعت للبيت امشي بسرعه واضحك
على منظره
هو يصيح وراي ليش هيج الله لايوفقج
لا يا زباله يابت الزباله
الله ينتقم منج بسيطه اني اعلمج
اني تشمرين عليه الزباله بس شكول عليج
عدج عله من الزلمه لان الزلمه الي اخذتي ططططططوط ( يفشر عليه بلشارع، )
جمانه السعيدي
صح ضجت من كلامه بس حسيت نفسي انتصرت علي
حيل بي حتى بعد لا يعترض طريقي ابد
عباله من اسكت راضيه بكلامه
اليوم الي بعده ماطلعت ماجان عدنا زباله هواي
ولا فتحت الباب ابد
بليل حجيت الامي
امي….ليش ولج عيب خاف يجي الخوانج يحجيلهم عليج
سعديه…خلي يجي حتى اكلهم على كلشي سوا وياي
بعدين هما وينهم خواني
يرجعون بليل تعبانيبن وينامون كبل
الله يساعدهم على شغلهم شكد متعب
يومين ما تحملت وشردت منهم
امي…اي ولله تعب
سعديه…كل ضني بعد هاي الحركه مني ابو هادي
بعد ما يقرب عليه ابد
لان فعلا صار مهزله بلشارع وهو ينكط فضلات الحيوانات
كلت خلاص اني وكفته عد حده
وبعد حتى مراح يرفع عينه عليه
شسويله حذرته الف مره مايفيد بي العتب
ولا الغلط
مصمم يجاوز عليه خلي يعرف ويامن يحجي
الي ما خله قدر للعشره ولا للجوره
عباله كل اصابعه سوه
عباله سعديه ذيج الطفله الي تخاف منه قبل
لو يكدر يضحك عليه
مايدري اني كلبي مات من الزلم كلهم
بعد الي شفته وياا رحيم
اني بعد تجربتي الاخيره من شفت حقي ضاع ويا رحيم واهله بسبب سكوتي
قررت بعد مااسكت
اخلي اصابعي بعيون السبع
هاي الناس ما يفيد بيها الطيب
الساكت ينوكل حقه
بعد مااسكت ابد ولا اخاف من اي واحد
لا ابو هادي ولا غيره
ابو هادي قرر ينتقم مني وجاي يخطط شلون ياخذ حقه مني
بس منتظر الوكت المناسب
واني اتوقعت انكسرت عينه وبعد مايقرب عليه ابد
عبالي اخذت حقي منه
ومراح يقرب عليه ابد
الفصل التالي اضغط هنا
يتبع.. (رواية قضية سعدية) اضغط على اسم الرواية لتجد الفهرس كاملاً بجميع الفصول.