رواية قضية سعدية – الفصل السابع والأخير
سعديه….بعدها بيوم طلعت شايله الطشت على راسي
وامي جانت طالعه بشغله وياي
ماشفت ابو هادي بلباب
فرحت كلت اني لقنته درس بعد مستحيل يمر بيه
خلي يعرف النسوان مو كلهن سوه
رجعت شفته واكف باباهم بس ما قرب عليه ولا حجا وياي كلمه وحده
حسيت نفسي انتصرت وكدرت اخذ حق كل وحده تحرش بيها وضوجها
اليوم الي بعده ما طلعت من البيت
لان ماعدنا زباله هواي وجنت عاجنه خبزت
امي…باجر انزل للولايه ابيع البيض والدهن الحر
هم تردين اجيبلج شي وياي
سعديه….لا مااريد شي
امي…اريد اذبين الاسود كافي وباجر اخذج تحفين وجهج
بلكت تجيج قسمه زينه صايره جنج عجوز
سعديه…قسمه اني شفت قسمتي شلونها وبعد ماازوج
امي…ليش يمه بعدج زغيره بلكت تحصلين طفل
سعديه…قبل كلتي جبيره وشمرتيني على رحيم
وهسه ازغيره
ماعرفت اني جبيره لو زغيره
امي…يايمه كافي تاكلين بروحج رحيم وله وراح
وانتي الناس كلها تعرف اخلاقج
وبعدج بنيه هسه تجيج قسمه زينه
شني رحيم اخر زلمه انغشينا بي وبااهله
انسي كلشي وشوفي نفسج
بلكت تحصلين طفل جاا اضلين هيج
جمانه السعيدي
سعديه…اي اضل هيج اني جربت حظي مره وبعد كافي
امي…مو بكيفج اني مادايمتلج ابد
باجر اشتريلج هدوم حلوات والعصر اخذج للحفافه
اني ماعاجبني وضعج هذا
سعديه…الله كريم
ابو هادي جان متربص بيتنا
سمع صوت سيارة اخواني من طلعت الفجر
بعدها شاف امي طلعت اخذت البيض والدهن تبيعه
وشاف جهال اخوني طلعو للمدرسه
اني من طلعو الجهال عبرت للمحصار مثل كل يوم
الجهال من طلعو عافو باب بيتنا الخارجي مفتوح
اني ماانتبهت دخلت للمحصار اشوف شغلي مثل كل يوم
هو هنا اتأكد اني بقيت وحدي بلبيت
والباب كان مجرد مسدود ما مقفول
دفع الباب ودخل للبيت سمع حركتي بلمحصار
كتلكم باب المحصار قريب باب الشارع
اجا يمشي على كيف شافني مدنكه وانضف بلكاع
اني ابد ما منتبه
ومئمنه محد بلبيت غيري والباب مطبوك
مااحسه اله طفر عليه ولزمني تفاجئت بي
دفعته لزمني بقوه
ابو هادي…اليوم اريد اشوفج الزلم شسوي
اليوم مااعوفج اذا ما أخذ شرفج اني سوين بيه هيج
يحجي ولازمني اضربه وادفعه ما اكدر علي
ولا تكول ضعيف بي كل الحيل
لزمني بقوه يريد يوكعني بلكاع حتى يغتصبني
مفكر اذا اغتصبني راح يكسر عيني
واخاف منه وهيج راح ياخذ راحته يمتى مايريد
راح اخاف منه واسمحله
وهو هذا الي يريده لان حقير تفكيره حقير مثله
دفعني يريد يوكعني ملت شويه ورجعت عدلت وكفتي
بقيت واكفه ودفعته هوا
الكاع الي جوا كانت رطبة ولزجه
بسبب فضلات الحيوانات
ازحلك ووكع على ركبه
سعديه.. ماكو يمي غير الكرك هذا الكرك كل يوم انظف بي هذا المكان
سحبت الكرك هو حاول يوكف بس الكاع ازحلك
وبعده ما مسيطر بلوكفه
شلت الكرك وهبدته على راسه قبل لا يعدل نفسه
هبدته مره ثانيه وثالثه
جنت شايله بكلبي علي اكرها وحاقده علي
هلكد مامضوجني وقاهرني
جمانه السعيدي
بلضربه الثالثه وكع وراسه كام يخر دم
بعد مارفع راسه ابد رجعت ضربته بقوه على راسه
ردت اسيطر علي حتى لا يرجع يوكف مره ثانيه هاي الضربه الاخيره انهت حياته للابد
سعديه…جنت فحطانه وخايفه ومقهوره من منضره
وهو واكع على وجها والكاع انترست دم
رجعت ليوره جسمي كله يرجف
اني ماجنت ناويه اقتله بس ردته يبتعد عني
لان هو جان ناويلي نيه كشره لو شويه مسيطر عليه جان اغتصبني وضعت
الله انطاني القوه حتى اكدر ادافع عن نفسي
بس هسه شلون
مات بيتنا شلون شراح اسوي
رجعت ليوره وكعدت بلكاع وكمت ابجي
غمضت عيوني خايفه وابجي
اني قتلته شلون بيه بقيت كاعده بمكاني اكثر من ساعه
وهو طايح على جها والدم ترس الكاع
لازم اكوم اتحرك بسرعه قبل لايرجعون اهلي ويشوفون بهذا المنظر
كمت اريد اقرب علي مااكدر كمت ابجي اني وويني ووين القتل شسويت بنفسي
عدنا كوم مطال الكوم عالي مسفطي بصف الحايط
كمت اوخر بلمطال اوخر بي الحد ما وصلت للكاع
رجعت لزمت ابوهادي من ادي وسحبته
شكد ثكيل ولاتكول ضعيف
الكاع لزجه ساعدتني اسحبه اسرع
قربته ودفعته من جتفه وضهره كلبته الحد ما وصلته للحايط وكمت اخلي على المطال حتى اغطي
ومحد يشوفه من اهلي لمن افكر شلون راح اتخلص منه
غطيته حيل كام ماينشاف
ورجعت اخذت الكرك وكمت اشيل الدم هو التراب للي جوا
واخلي بلطشت
الطشت انترس طين كله دم
بعدين جبت الصونده وكمت ارش ماي على المكان
مااريد يبين بقايا الدم بلمكان
تعبت تعبت حيل احس نفسي ثكيله بسبب الخوف من الي سويته
رجليه واديه صارن ثلج
طلعت من المحصار وقفلت الباب دخلت للحمام
نزعت كل ملابسي وغسلت جسمي
كمت ابجي ماجنت اريد اقتله اني مو قاتله
جنت اريد ادافع عن نفسي
مستحيل اعوفه يقرب عليه ويغتصبني
طلعت من الحمام وكبل الغرفة امي لفيت نفسي بطانيتين
كمت ارجف كلي ارجف مدري من الخوف
مدري من الندم رجعت امي بس دخلت وشافتني
خافت
امي…هااا يمه سعديه شبيج
سعديه…مريضه
امي…يااا مريضه توني طلعت مابيج شي
سعديه…مصخنه وتعبانه
امي…ليش صخنتي ششتغلتي
سعديه…بس نضفت المحصار حتى الغده بعده ماكامل
امي.. نامي وارتاحي انتي هليام تعبانه حيل
هاج هاي جبتلج دشدايش ثنيين وحجاب
اني راح اكمل الاكل
سعديه…كلت بكلبي شلون انام واني سويتلي مصيبه ماتتسولف ياربي شلون بيه شلون ووين اودي هاي الجثه
بس اهلي يشيلون المطال راح تطلع
شلون بيه اني شسويت بروحي
جمانه السعيدي
سعديه…مغطيه راسي وافكر شلون بيه اني شسويت بروحي شلون راح اتصرف قابل راح ابقه ضامه جثته
بيتنا لازم الكه حل
بقيت بمكاني حتى ماطلعت للتواليت فكره تاخذني وفكره توديني امي حابتلي اكل صارت صورة ابو هادي كدامي
شلون طاح على وجها والدم ترس الكاع
دفعت الصينيه كتلها مااشتهي
للعصر بيت ابو هادي كامو يدورون على ابوهم
هو ابد مايطلع من البيت كاعد بلباب يدخل ينام وياكل ويرجع يكعد بلباب
المغرب من رجعو اخواني كالو الشارع مخبوص يكولون ابوهادي ماكوووو
راح نطلع اندور وياهم عيب زحمه منهم
الشارع كله يدور على ابو هادي حتى اخواني مابقا مكان مادورو علي واني بمكاني بس يعيوني يفترن
افكر شلون راح اخلص من هاي الجثه
فكرت بليل من اهلي ينامون اسحبه واشمره بلشارع
قابل هما يعرفون اني كتلته الصبح من يطلعون اهله يلكونه مشمور بلشارع شمدريهم اني كتلته
بس اهله لا نامو ولا بطلو يدورون علي ولده خمسه
لازمين الشارع وإخوانه ثنيين وولد عمه واقاربهم
ونسابته الشارع متورس زلم
شلون راح اطلعه بلشارع راح يشوفوني اخلي على باجر بليل بلكت يرجعون لبيوتهم خاف اهلي يرحون للمحصار
ويشكون المطال مبين صاير مخربط وعبالك هواي
اكثر من قبل
شلون ورطه ياربي هاي
اخواني الصبح ما راحو للكاع واكفين ويا ولد ابو هادي
والشارع متروس ناس وكل واحد جاي ينطي افتراح
اكثر شي جانو شاكين رايح على وحده ولزمو وقتلو بيتها
لان هو عنده هيج سوالف
جمانه السعيدي
امي.. اروح اني اليوم انضف المحصار بمكانج انتي تعبانه
سعديه…كمت عليها لا لا لا اني انضف مابيه شي
اني اروح انظفه
امي…شبيج انخرعتي
سعديه…اخاف عليج تتعبين اني اروح
دخلت للمحصار عيني بس على مكان ابو هادي ومااعرف اشتغل شلون بيه شسويت بنفسي من مصيبه
اذا يبقى الوضع بلشارع هيج مراح اكدر اطلعه برا
واذا بقى بهذا المكان راح تطلع ريحته ياربي ساعدني
اني موقصدي اكتله
طلعت من المحصار امي هااا اليوم ماكو بيض وين بيض الدجاج
سعديه…هسه اروح اجيبه نسيته
امي…مو كتلج اني اروح بمكانج ما قبلتي
سعديه رحت جبت البيض وكعت منهن ثنيين وكسرتهن
بس دخلت البيتنا سمعت صوت سياره الشرطه
كلبي كام يدك بسرعه شلون بيه اجت الشرطه
دخلو بيت ابوهادي يحققون وياهم ويسئلوهم كم سؤال حتى يعرفون مكانه
تقريبا نص ساعه اني كاعده بلمطبخ وخاله اذني يم الباب
اخاف اريد اسمع الاخبار شنو
جان اجو الشرطه البابنا وياهم اخواني
اسمع حسين يكول ادخل فتش شنو احنا ضامينه بيتنا
الشرطه. اي لازم نفتش
دخل حسين كال البسن عبي راح يفتشون بيتنا
امي.. ليش احنا شعلينا
حسين.. حمودي ابن ابوهادي ( حمودي طفل معوق رجله عوجه عمره ٨ سنوات ازغر طفل بيت ابو هادي من زوجته الزغيره هذا مادخل للمدرسه يخافون علي لان مايكدر يمشي ويخافون الجهال يضربونه )
حمودي من طالع ابو هادي بلباب طالع ورا يريد ابو يشتريله بس طالع من باب بيتهم شاف ابو دخل بيتنا
باقي ينتظره لان مايكدر يجي ورا صعب علي المشي
باقي اكثر من عشر دقايق وابو ماطلع
راجع الامه كاللها ابوي ماكو ما طلع
هي مامركزه ويااا وحتى من ابو هادي اختفى ابد مافكرو يسئلون حمودي علي
بس الشرطه من اجت هسه سئلت كل الي بلبيت
منو شافه اخر واحد ومنو حجا وياا اخر واحد
حمودي كال اني شفته دخل بيت ابو حسين وبقيت منتظره ما طلع
الشرطه اعتبرت هذا خيط تمشي ورا بلكت تلكه ابو هادي
وخاصه هو صار اكثر من ٢٤ ساعه مختفي
حسين….البسن عبيجن خل الشرطه تدخل تفتش البيت
ولله ماادري شلون ياخذون حجي حميد واني شسوي بي ضامه بيتي شلون عقل ضاملي زلمه بيتي
سعديه من سمعت هذا الكلام كمت مااكدر اوكف على رجليه
كلبي كام يدك الف دكه بلساعه
دخلو الشرطه دورو بيتنا بلاول كلشي مالكو
دخلو للمحصار واني بطني كامت تلويني حيل
بس شافو الذبان مجمع على المطال وشكل المطال مخربط
راسا بدو يرفعون المطال لان مبين اكو شي
طلعوابو هادي سابح بدمه
لزمو حسين انت متهم بقتل ابو هادي
حسين بقه مذهول وصافن شنو قاتل ابو هادي
ابو هادي شجابه بيتنا
سعديه…كمت على حيلي وطلعت عليهم
عوفو حسين اني قتلته اني قتلت ابو هادي وضميته
بلمطال
اخذوني اني وحسين للمركز
حجيتلهم كلشي صار وياي وشلون جان يتحرش بيه
وهجم عليه بيتي حتى يغتصبني
دافعت عن نفسي وقتلته
اهلي كانو مصدومين مني ومامصدكين اني قتلت ابو هادي
خلولي محامي واخذو عطوه من بيت ابو هادي
بقيت ست اشهر كل يوم محاكمه وكل يوم تحقيق
منا لمن حكمو عليه بلاعدام
اخواني باعو بيت اهلي ودفعو فصل البيت ابو هادي
لان بعد مايكدرون يسكنون كبالهم بعد جريمة القتل هاي
بنو بيت بلبستان وكعدو بي
هنا انتهت قصة سعديه
اني اكول سعديه ما تستحق الاعدام لان دافعت عن شرفها
بعد ماحذرةابو هادي الف مره لايقرب منها
يستحق القتل يمكن سعديه لو محكومه خمس سنوات افضل من الاعدام
بس القانون يبقى قانون
تعلمنا دروس هواي من هاي القصه الحزينه
تمت النهاية ..
- اقرأ ايضا روايات عراقية عبر كوكب الروايات
الفهرس كاملاً بجميع الفصول عبر الرابط التالي (رواية قضية سعدية) اضغط على اسم الرواية لتجد الفهرس كاملاً بجميع الفصول.