رواية احفاد عمران – الفصل الثلاثون
أحفاد عمران
بارت_30_
………………….
أنتَ اخر نفس
وشگد عزيز تصير
وبلحضة الموت تريدنا نملك؟
خيط ؏ـلى الجرح للحم كل لحضة صرت ويلي
لـو كل الجروح تطيب مافلك
…………………..
كلشي صار أسود كدامي ما أدري شنو
صار بعد صرختي حسيت نفسي يروح
شوي شوي
صاح عمر عليه صوته يرجف
عمر: ليان شبيج
لكاني واكعه بنهايه الدرج الدم ملوّث
ملابسي وجهه صار أصفر شالني بسرعة
وصاح على امي
عمر: يمههههه ليان طاحت
أمي ركضت ومن شافت المنظر
صرخت بصوت هز البيت
أمي: يايمهه ليان بسرعة عمر
ناخذها للمستشفى
كلشي صار ضبابي ما أسمع غير أصواتهم
متقطعة بطني توجعني وجع ما يوصف
دموعي تنزل غصب
عمر شالني بحضنه ونزلني للسيارة
حاولت أتنفس بصعوبة وصرخت
بصوت
ليان: طفليييي… عمر طفلييي
لزم وجهي وهو يفتح باب السيارة
بصعوبه صوته مبحوح
عمر: لا تحجين لا تحجين إن شاء الله
مابي شي
وصلنا المستشفى مثل الهوا الممرضين
هرولو ويه الكرسي المتحرك أخذوني
عالسريع لغرفة الطوارئ
أمي واكفة برا تبجي وتدعي بحركه
أمي: يا الله يا ساتر نجّي بنتي وطفلها
عمر واكف يتصل بإيده ترجف
عمر: أسمر تعال للمستشفى بسرعة
ليان طاحت وصارت عدها نزيف
بعد مافحصتني الدكتوره كبل كالت
الدكتوره:: لازم تدخل عملية قيصرية
فوراً وضع الطفل ما مستقر
أمي غطت وجهها بطرف شالها
ودموعها نزلت مثل المطر
أمي: يا الله سترك
دخلوني غرفة العمليات آخر شي أتذكره
إيدي تدور تدور، أدور على عمر
ليان: لا تعوفني
لزم إيدي وضغط عليها بكل قوته
عمر: ماعوفج أنا وياج اهنا
وبس… كلشي انطفى
—
صحيت على صوت خافت جسمي ثكيل
وراسي يوجعني فتحت عيوني شوي
شوي أول شي شفته وجه عمر عيونه
محمرة وكأنه صار له أيام ما نام
ليان بصوت مبحوح:عمر
لزم إيدي بسرعة عيونه مليانة دموع
عمر: الحمد لله عالسلامة ليون… خوفتينا عليج
دموعي نزلت واني اسئل عمر
ليان: طفلي
ابتسم رغم تعبه وعيونه الحمرة
عمر: بخير… اجاج ولد حلو مثل القمر
بس هو بالخدج لأن سابق أوانه شوي
دموعي صارت أكثر
ليان: أريد أشوفه
مسح دموعي بحنية
عمر: إن شاء الله تشوفينه بس تستقرين
دخلت أمي وجهها متعوب وعينها مورمة
من البجي أول ما شافتني صحات بصوت
مختنك
أمي: الحمد لله يا ربي الحمد لله على
سلامتج يمهه
باستني من راسي وكعدت يم راسي
تمسح شعري بحنية تخلي الكلب يوجع
فجأة انفتح الباب وضهر إلي اسمر باوعت
بوجه شاحب وعيونه محمره مثل عيون
عمر باوع عليه وتقدم تحمدلي بسلامه
اسمر:: الحمدلله على السلامه
ماحجيت بس هزيت راسي شويه ودخل
حمزه شايل بيده كلاص على ماااضن جان
يشرب جاي ابتسم وتقرب عليه
حمزه:: الحمدلله على سلامتج ليونه
ليان بصوت ناصي:: الله يسلمك
ضلو فوك راسي وكل ساعه واحد طافر
ويسئل بيه إذا زينه واني بس اكول أي
زينه بس وجه بطني ملخني تملخ بس
ماحجيت ولا كلت وفسرت وجعي
ضليت ساعات اكثر بالمستشفى وطلبت
منهم ياخذوني اشوف سند بس إلي
فاجئني من سئلت
جانو اهلي كلهم موجودين ووياهم اسمر
بس والي عرفته ما كايلين لأحد اني دخلت العمليات وجبت وكالو من اطلعين بخير أنتِ وطفلج نسوي عزيمه
اسمر وحمزه وعمر وحتى أبوي
كاعدين ويلعبون بجهازاتهم إلا امي
كاعده تسبح
ليان:: حمزه
كبل ضم الموبايل بجيبه وطفر عليه
وعمر واسمر ثنينهم ذبو جهازاتهم من اديهم
حمزه:: ها ليونه محتاجه شي عندج ألم
ليان:: لا لا بس أريد اشوف سند
التفت حمزه العمر واسمر وكال
حمزه:: منو سند
ليان بستغراب:: ابني سند
اجه عمر كدامي يطكطك بصابيعه
وهوه يكول
عمر:: ليان ماسمينه سند
ليان:: شنو ماسميتو سندد
اسمر:: مو أنتِ رردتي اسم جود
وماتردين اسم سند
بهاي الحضه كبل باوعت على عمر
بصدمه اني شوكت كلت هيج اني
اريد اسم سند و ماريد اسم جود
شديصير
ليان:: عمر
عمر:: هااا ليان مو أنتِ إلي كلتي اريد
اسمي جود ماريد سند بطلت
رفعت ايدي بصعوبه وفركت عيوني بعصبيه
رجعت باوعت الأمي وكلت
ليان:: يمههه يعني أنتِ مو تدرين اريد
اسمي سند
امي بضحك:: يايمه هسه هوه اسم
ضجت لأن ردت اسمي ابني سند اجه
عمر يمي وكعد على حافه السديه
وحضن وجهي وهو يكول
عمر:: ميخالف يله على طفلج الثاني سمي سند
غميت كصتي بيدي وضحكت على كلامه
ضلو همه يسولفون ويضحكون واني
اباوع على الباب هسه يجي أحد
ويجيبلي سند بس تذكرت اخويه
حبيبي مسمي جود
شويه ودخلت الممرضه علينه عيوني
راحت على الطفل الملفلف ببطانيه بيضه
بحضنها كلبي دك بسرعه حسّيت انفاسي
تنكطع من الفرح والخوف بنفس الوقت
تقدمت عليه وابتسمت
الممرضه:: الطفل جوعان يريد يرضع
التفتت الهم بخجل حسيت وجهي احمر
وهمه خطيه كبل سوو نفسهم ملتهين
عمر بابتسامه:: هاي محمد جاي يدك عليه
حمزه وهو يتثاءب:: خلي اروح اشرب
كهوه حتى اصحصح
ابوي:: خلي اروح اشم هوى
طلعو همه وبقيت امي ويانه باوعت
على اسمر وضحكت وكالت
امي:: وانت ما عندك وحيده منه منه تخابرها
اسمر حرك ايده بتوتر وعيونه ضايعه:: ها.. لا
انا رايح اخابر ريم داشوف جمانه
طلع هو هم وحسيت المكان هدي شوي
امي قربت مني وساعدتني اسند ضهري
على السرير لزمت ايدها راسي بحنان
حسيت دمعتي تنزل من غير ما احس
الممرضه قدمت جود الي اخذته
على كيفي وبخوف حسيت كل شي
توكف واني اشوفه لأول مره، ريحته
جديده صوته الخفيف كأنه يطمن روحي
دموعي نزلن اكثر حضنته بكل وجع
وفرح وكأنه كل التعب اختفى بلحظه
الممرضه:: راح اطلع شويه واجي اخذه
ليان:: خلي عندي
الممرضه:: لا احسن يضل بالخدج
هزيت راسي أي لأن فعلاً لازم يضل
بالخدج وتحت عناية الممرضين أحسن
لأن جود اجا بشهر السابع ويحتاج
اهتمام أكثر
امي علمتني شلون ارضعه وادير بالي
عليه ضلت ايدي تداعب شعراته الثخينه
السودا ردته بس يفتح عيونه حتى اشوف
لونهن مثل عيون جمانه بس تذكرت بعده
صغير ومايفتح عيونه
اجت الممرضه اخذت جود من حضني
وطلعت ووراها دخلو أسمر وعمر حمزه
رايح يوصل أبوي للبيت لأن مايكدر يضل بالمستشفى
مر يومين وتحسنت شويه صرت احس
نفسي اقوى عمر وحمزه كل ساعه يكوموني ويمشوني وامي ماعافتني لحظه أبوي يجي الصبح شويه وبليل شويه وباقي الوكت
احنا انا وامي
أسمر يجي يطمئن عليه ويطلع ماعرف
اذا يرجع للبيت أو لا بس بالغرفه
مايتواجد هواي
عمامي وخوالي درو بيه ورادو يجون بس
أبوي منعهم وكال من تطلع صحته زينه
تعالوا شوفوه
مر اليوم الرابع صحتي وصحة جود
احسن، وسووا اجراءات الخروج حمزه
وصلنه للبيت انا وامي استغربنا شنو
عمر وأسمر ماكو وهمه بهل اربع ايام
ماعوفونه لحظه
وصلنه للبيت ماكو أحد استقبلنه نزل
حمزه ولوف على ماما شايله جود نزلني
على كيف وطلع تلفونه دك، ماعرف على
منو بس كال
حمزه:: هممم….اي
وضحك لزم ايدي ومشينه للباب
فجأه انفتح الباب عمر طلع بوجهه
ابتسامه عريضه
عمر:: اتفضلي ست ليونه
ضحكت ودخلت فجأه فشخ راسي
الجكليت شفت الكل موجود عمه اقبال
اطش جكليت عليّ فرحت وحسيت
كلهم يحبوني حتى جدو عمران جاي
كلهم جوي يباوسوني ويتحمدولي
بالسلامه حتى بنات خالي بس ميس
جانت صافنه على أسمر وهو شايل
جمانه ومن شافتني اجت تتحمدلي
بالسلامه
ميس:: الحمدلله على السلامه
ليان:: الله يسلمج
رادت تحجي بس جدو صاح
جدو عمران:: شنو موكفين البنيه على
الباب ادخلو جوه
عمر لزمني ومشاني كعدني على القنفه
راح اخذ جود من امي وهو يضحك امي
راحت للمطبخ عماتي وزوجه عمو ماجد
راحن وياها إلا عمه سناء كاعده
ميس طول الكعده نظراتها لأسمر وهو
ولا معبرها يلعب بجمانه عمر رجع
وكعد يمي شايل جود
عمر:: شوفي شلون يشبهني
ضحكت وتقربت
ليان:: وينه يشبهك
عمر:: جدييي جود يشبهني
موو
جدو عمران:: لا يشبه أسمر
التفتت لاسمر باوع علي وضحك
ضلينا سوالف وضحك لحد ما كملو
الغده جابولي على القنفه لأن ماكدر
اكعد وياهم
خلصو الغده غسلن المواعين كلنه
تجمعو الكبار بالاستقبال بس احنه
تجمعنه بالصاله عمر شايل جود ومايذبه
أسمر:: كاافي ذبه للطفل
عمر بضحك:: انا خاله
أسمر:: واني ابو
ضرغام:: شلونج ليان ان شاء الله زينه
هزيت راسي اي وابتسمت بس شفت
وجه أسمر متغير يظغط على ايده
ويباوع الضرغام بخزره حسيت
راح يكوم عليه
ميس تقربت
على اسمر
ميس:: انطيني جمانه الاعبها
أسمر:: لا عوفيها يمي
حمزه:: جيبها
حبيبه خالها
أسمر ابتسم وانطه جمانه حسيت بفرحه
جوه كلبي لأنهم متجاهلين ميس
دخلوا ريم والياس ريم ركضت عليه
ريم:: يمهه ليان الحمدلله على سلامتج
ليان:: الله يسلمج
الياس:: الحمدلله على سلامتج ليان
يتربى بعزكم ودلالكم
ليان:: الله يسلمك تسلم
ريم ظلت تتناكر ويا عمر على جود
ريم:: عمر انطيني يا
عمر:: روحي لعبي على ابنچ
ريم:: يا عمر انطيني غير اني عمته
عمر:: واني خاله
ليان بهدوء:: عمر انطي جود لريم
عمر:: انتي ماعليج انا خاله واقرر لمن انطي
سكتت لان ماكو فايده كام أسمر من
مكانه وتقرب على عمر اخذ جود منه
لمه بحضنه وهو يبتسم ريم راحت
تلعب بخدود جود
ريم:: فدوه يشبه جمانه
عمر:: يشبهني طالع على خاله
ريم:: لا عمر يشبه جمانه وحتى ينطي
شبه الأسمر
واني صافنه على أسمر شلون يباوع
على جود بحنيه الابتسامه بعدها على
وجهه فجأه
انفتح باب الاستقبال
وأمي جتي عليه همست إلي
امي:: يمه صار وكت رضاعه جود خطيه
هزيت براسي اي ساعدتني اكوم رحت
الغرفه، امي جابت جود رضعته نام بحضني
واني من التعب تمددت على كيفي وغفلت
يمه
غفيت يم جود ماحسيت بنفسي غير
حسيت كأني واكفه بمكان مظلم اسمع
صوت بجي طفل قوي يهز اذاني
دورت يمين يسار ماكو أحد فجأه
شفت جود ملفلف ببطانيته مرمي
بالأرض ويصيح
ركضت عليه شلته بحضني بس ماوكف
بجي كلتله
ليان:: شبيك يمه ماما يمك هدي
بس صوته يصير اعلى وعيونه صارت
سودا حسيت رجلي تثقل وماجنت اكدر
احركهن صرت اصيح
ليان:: أسمررر عمررر تعالو
بس ماكو أحد فجأه كلشي انطفه
حسيت بخوف قوي وبجيت فزيت
من النوم ودموعي على خدي
امي جانت كاعده عالطرف
الجربايه
اطبطب على راس جود
امي:: يمه ليان شبيج حلمتي
ليان ومسحت دموعي:: اي يمه حلمت
حلم مو زين
امي ضمتني
امي:: استهدي بالرحمن يمه لا تفكرين
هواي الحلم من كثر التعب
باوعت على جود نايم بهدوء تنفسته
ريحته حطيت راسي على صدره وكلت
بيني وبين نفسي
ليان:: الله يخليك الي ولا يحرمني منك
امي:: اساعدج تكومين وياي
ليان بستغراب:: وين
امي:: بيت عمج جاسم اهنا إذا تكدرين
تكعدين وياهم
ليان:: ساعديني اكوم
جتي ساعدتني امي وكمت على كيف
مشيت واني لازمه بطني من الألم
دخلنا الاستقبال جانو بس بيت
عمو جاسم موجودين ووياهم
جدو عمران من دخلت كلها التفتت عليه
ليان:: السلام عليكم
الكل:: وعليكم السلام
جدو عمران:: تعالي جدو تعالي يمي كعدي
يحجي وياشر على البكان اليمه رحت
على كيفي وكعدت بصفه وصارو كبالي
اسمر وعمر وحمزه تلاثتهم مقابيلي ضلو
أبوي وجدو وعمو جاسم يسولفون واني
بس كاعده بس فاجئني من اسمر كسر
سكوته وكال
اسمر:: من رخصتكم اريد احجي انا
صافنين بي ومستغربين شنو يريد
يحجي بس خلو يحجي ويكول العنده
جدو عمران:: احجي اسمر
اسمر وهوه يباوع عليه:: أنا رايد ليان
ترجع البيتها
صار هدوء وكلها ساكته احس بس كلبي
ينبض بسرعه وكلها تسمع دكاته باوعت
على عمر بس عمر طمني ان هو وياي
رجعت على اسمر واردفت
ليان:: ماريد ارجع
اسمر:: ليش ليان ليش ماترجعين
عمه سناء:: ضلي انت يم اهلك بس أنا
حفيدي اريده يتربه يمي
جدو عمران:: ام امجد بلا زحمه عليج
خليهم همه يتفاهمون
باوعت على جدو عمران مستغربه منه
هذا نفسه جدي لو غيرو رجعت
عمه سناء تحجي من ورا خشمها
عمه سناء:: عمي شنو لعد صار الها اشهر
كاعده يم اهلها وماسائله على زوجها
ولا حتى على عيالها كلت ميخالف
عود ترتاح وهسه شكو جابت وهم
تريد ماترجع وتبقى يمهم على يا اساس
عمو جاسم:: ام امجد ياريت تخليهم
همه ياخذون القرار
عمه سناء:: أنا مادخل بينهم لو شنو جان
قرارهم بس حفيدي جود اخذه مايضل اهنا
اسمر كسر حجيهم وكال
اسمر:: ليان كومي نحجي وحدنه
حاجاني اسمر واني باوعت الحمزه وعمر
اثنينهم هزه وبروسهم يعني روحي اجى
اسمر وساعدني اكوم رحنا لغرفة اهلي
كعدت على الجربايه وهو ضل واكف
اسمر:: كافي ليان ارجعيلي
ليان:: اسمر ماريد ارجع
اسمر:: شنو السبب ها شنووو
ليان:: ماكو سبب بس اني من البدايه
ما احبك ولا حبيتك وما اضن راح
احبك مستحيل تكون لنا حياه
سعيده سوا
اسمر بضحكه:: اي طبعا لان ناويه
تبلشين حياه جديده وسعيده ويا
غيري ولهذا ما تردين ترجعين الي
باوعت اله مستغربه منه هاذا شبي
شنو يحجي
ليان:: شنو هذا الكلام اسمر شنو وي
غيرك متخيل الكلام الجاي تحجي
اسمر:: أي أي أنا أعرف شنو إلي جاي
احجي بس قسم بالله العظيم ياليان
تحلمين اخليج تروحين الغيري
سندت نفسي على الجربايه على كيف
علمود عمليتي وكمت مشيت وكفت
كباله باوعتله بخزره
ليان:: وضح كلامك شنو تقصد
ماحس على نفسه وكبل تقدم عليه
لزم اكتافي بثنين اديه وضغط عليهن بقوه
ليان:: اسمر ايدي
اسمر:: اشش خلي احجي كافي مليت
كل يوم اجي اتوسل بيج ترجعين وانت
ماكو احساس ولا مشاعر عندج ولج
مليت وانا اشوفج فاتحه حلقج للرايح
ولجاي تتمضحكين ولجج كاافيي
شوكت تحسين بنار كلبي
نزلت دمعتي على خدي واني اسمعه
يحجي بحركه كلب بس بنفس الوقت
ضاغط على ايدي بقوه وموجعني
ليان:: اسمر جاي توجعني
اسمر:: نوب فوكاها تردين تزوجين والله
العظيم احركج بمكانج ومااخليح
تصيرين الغيري
بيه مابيه رفعت ايدي ودفعته من
صدره وصحت بي
ليان:: شبيككك تخبلتتت شنو تحجي انت
اسمر:: ههههههه عبالج مايوصلني الحجي
راح اعرف شنو تردين تسوين
ليان:: لا انت صدك تخبلت شنو جاي تحجي
ومنو هاذا إلي يوصلك الحجي الجذابي
اسمر:: ماعليج انت شنو تردين تعرفين
حتى تروحين تحاسبي لأن خرب خططج
ليان:: اسمر
اسمر:: اشش كتلج بحلامج اخليج
تصيرين الغيري
انتبهت عليه منفعل ومو مال واحد هسه
يحجي وياه لان ما راح تصغر المشكله
وراح تكبر رحت كعدت على الجربايه
بس هو على وكفته وكتف ايديه
لصدره وكال الي
اسمر:: ماتحجين لو ماعندج حجي
ليان:: باوع اسمر وال
اسمر:: اشش اشش ماريد اسمع صوتج
ليان:: غير انت كتلي احجي
اسمر:: كتلج ماريد اسمع صوتج
سكتت ماحجيت ويا هاذا مايتفاهم
بالحجي ضلت عيني على جود شلون
نايم وفجأة جتي على بالي جمانه
التفتت اله وكلت
ليان:: جمانه وين
اسمر:: مادخلج وهسه راح اكلج شغله خليها ترجيه باذانج
ليان بدون قصد:: اسمر دتشوفني لابسه ترجيه وين اخليها
اسمر بعصبيه:: ليااانننن
ليان:: هاي هيه سكتت احجي
اسمر:: عشر ايام فقط الج عشر ايام
ليان بستغراب:: الشنو
اسمر:: إذا مارجعتي بهل عشر ايام البيت
جود أنا ماخلي عندج تردين اهلج ابقي
يمهم شكد ماتريدين بس جود لا مايضل
اهنا أنا اخذه
ليان:: بسس
اسمر:: لا بس ولا شيء أنا كلت العليه
بقه القرار يمج
طلع من الغرفه وعافني نزلت دمعتي
على خدي واني احجي
ليان:: يعني هم خيروني ليش هيج يسوون بيه
مرن يومين محد سائلني شنو جان يريد
اسمر أو شنو راد بس اني نهار كله صافنه
على جود وافكر معقوله يسويها ويبعد
ابني عليه ماتحملت كلت بس يجي عمر اكله
وفعلاً من كعدنه اني وعمر حجيت اله
كل شي وهوه كعد يحجي وياي
عمر:: ليان أنا مادخل لأن هاي حياتج
أنت وانت واعيه وتفتهمين بس أنا
اكلج ياها إذا جنتي ماتريدين ترجعينح
أنا أول واحد اوكف بطريقهم وماخلي
احد يحجي عليج بس ليان أنت هم
فكري لا تاخذين قرر سريع
ليان:: شنو اسوي عمر اني ضايعه
عمر:: لا لا ليان كلت الج فكري زين
وانا وياج بكل قراراتج
خليت راسي على كتفه وهوه ضل
يحاجيني على اسمر ويحجي عليه
ولان اني هم مايصير ابعد جود عليه
بس بعدين سكت واردف
عمر:: الله هم يجي يوم واشوف رهفتي
ببدلتها البيضه
وخرت راسي من كتفه وضربته بخفه
ضحكت وكلت اله
ليان:: شجاب الحيه وبدلتها بنص حجينه
عمر:: لجج ليان احبها احبهااا أنا احبهااا
ليان:: خههههههه نعرف والله نعرف
باوع عليه وضحك
عمر:: أرد ازوج اريد اشوف رهفتي ببدلتها
ليان:: هسه خلي نزوج حمزه وبعدين
نزوجك وتشوف رهفتك الحيه
عمر:: الله اريد اشوفها ببدلتها
ليان:: عمرر بطل شبيكك جلبتتت بالحيه وبدلتها
عمر:: لججج ليان لتحجين عليها
ليان:: اهوووو كوم اصعدد الغرفتك دوختني
ضلينه كاعدين ونسولف وبعدين انضم
النا حمزه وهم ضلينه نحشش على عمر
ورهفته ام البدله البيضه
مرن ثلاث ايام وودوني حمزه وامي
شلت خيط العمليه وهسه يله ارتاحيت
وحسيت نفسي صدك رجعت طبيعيه
لأن جانت امي تغسل راسي على المغسله وماخلتني اغسل جسمي تخاف العمليه
تلوحه مي
جودي بلش شويه شويه ينشنش ومن
صار يفتح عينه اكتشفنه عيونه على
اسمر زرق كلش ضجت لأن ماطلع يشبهني
فكرت بجود وقررت ارجع ماعندي
خيار ثاني مو علمودي بس علمود
ابني لأن ماريده يتربه بدون حنان
الاب وهم يتربه يم اخته
لميت ملابسي وعزلتهن وخطيه امي
مامخليها شي ماجايبته الجودي مجهزته
تجهز بس كلهن نقلتهن البيت عيالي إلي
همه بيت عمو جاسم وبالحضه ودعت
اهلي ورجعت البيتهم كلش نقهرت ماريد
افارقهم بس بالنهايه الام كلشي تسوي
حتى ابنائها يعيشون بأمان
مر سبوعين على رجعتي عمه سناء نهار
كله مخليه جود يمها وماتنطي إلي بس
بوقت الرضاعه صرت اضوج وانقهر شنو
ابني ومااشوفه صرت احجي الأمي
وهيه تكلي
امي:: ميخالف يمه عادي ابن وليده
وفرحانه بي المهم أنت لا تنفعلين
يايمه مو زين عليج وانت ترضعين
وليدج
دائما اسكت واكول ميخالف على
حجايه امي اسمر مانشوفه بس باليل
من يرجع من العياده وكبل يلف راسه
وينام وجمانه اخخ ياجمانه صاره
تمشي بخطوات ويمكن اني الوحيده
الفرحانه بيها خوب عمي ولا متواجد
بالبيت الله اعلم وين يروح ودائما
اكول يجوز اتزوج على عمتي ههه
جنت بالحمام اغسل بملابس جود لأن
طفل انفاس امي تكلي اغسليهن
بصابونه احسن كاعده واغسل بيهن
فجأة سمعت بجي جمانه وهيه تصيح
جمانه:: اما اما
صحت عليها واني احاول بسرعه
اخلص الملابس
ليان:: اجيت ماما اجيتج
ضلت هيه تبجي واني اغسل الملابس
على السريع واخير شي خلصت خليتهن
على صفحه وكلت بعدين اشرهن طلعت
لكيت جمانه كبال الباب وتبجي بس
من شافتني رفعت اديها عود شيليني
دنكت عليها وشلتها واني ابوس بيها
ليان:: يمه يمه بنيتي جوعانه
اخذتها يم الميز لأن اني مخليه ترمزها
وحليبها اهناك سويت إلها الممه واني
شايلتها خليتها على الجربايه ونطيتها
الممه ونوب بجه عليه جود شلته وكعدت
على الجربايه رضعته هم رجع جود
نام بس جمانه لا ضلت كاعده تلعب
كمت خليت بكركوته واخذت جمانه
الحمام سبحتها ورجعت طلعت الها
ملابس خليتها تلعب بالغرفه واني
اخذت ملابسهم اشرهن بص سمعت
صوت عمتي
عمه سناء:: بعد بعد النص اليل يله تنزلين
ماهتميت ضليت انظف بالغرفه واعزل
بيها لحد ماخلصت شلت جمانه ونزلت
لكيتها كاعده بالصاله أول ماشافتني
صاحت بيه
عمه سناء:: ماتكليلي شبيج أنت
ليان بستغراب:: شبيه
عمه سناء:: ترا احنه مانتشغل عندج
وانت نهار كله على الحاضر تنزلين
ليان:: ولا اني اشتغل عدكم عندي طفلين
اهتم بيهم هاي اكبر واجباتي
ماخليتها ترجع تحجي عليه رحت المطبخ
وصرت اسوي العشه سويت بتيته الجمانه
حتى تاكل لأن غير شي ماتاكل واني
واكفه على الطباخ طب اسمر
اسمر:: مساء الخير
ليان:: مساء النور
جانت جمانه جايبه لاعبتها وكاعده
بالمطبخ تلعب شالها يبوس بيها
ودخل الصاله خلصت اني وصرت
انقل بالمواعين على الطبله إلا أن
خلصت اسمر جان فوك بالغرفه
شويه ونزل
تعشينه وخلصنه غسلت المواعين
وكبل الغرفتي ماخلي جمانه كاعده
الوقت متاخر نومتها وجود ماكعد
أصلا بس بدلتله وهم نومته ضلينه
بس اني واسمر كاعدين هوه يباوع
على التلفزيون واني كل شويه أريد
اكله بس متردده بس ثاري هو منتبه إلي
اسمر:: احجي
ليان:: هاا
اسمر:: احجي شنو تردين تكولين
ليان:: وأنت شمدريك أريد اكول شي
اسمر:: احجي ليان شنو تردين
ليان:: أريد أروح لاهلي
اندار عليه مستغرب من حجيي
اسمر:: من قبل يومين رحتي
ليان:: لا مو أريد أروح الغير شي
اسمر:: شنو هاذا الشي
ليان:: أريد انروح نحتفل بعيد ميلاد عمر
ضحك اسمر وعبالك شو شكتله
ليان:: شبيك تضحك
اسمر:: شنو بكد البقره وتريدن تحتفلين بي
ليان:: اهووو اسمر هسه شكلت
اسمر:: هاي هيه شنو تردي اعتبري صار
ضحكت ولفيت راسي ونمت
وفعلا بيوم ميلاد عمر اتفقت وي فرح
تجي يمنه ريم كلت الها بس ماكدرت
تجي نرجس يمهم مريضه وتفقنه اني
وفرح وحمزه واسمر مايخلونه يجي
البيت
وفعلا اخذو وطلعو ماعرف وين بس
اني وفرح حضرنه كل شي امي ماضلت
يمنه بالاستقبال وكالت جاي تلعبون بس
احنه وين ماهتمينه حضرنه كل شي
النفاخات وتزينه بسيطه سويت
أخير شي جبت الكيكة وخليتها على
الطبلة جمانة إجت بخطواتها البطيئة
وصوتها يرن
جمانة:: أما أما
مدت إيديها تريدني أشيلها ضحكت
ودنكت عليها شلتها وبوست خدها
ليان:: ها يا روح الماما إنتِ
فرح:: شو ذولي لسه ما جوي
ليان:: هسه على جيه حمزة كال بهل
وقت أجيبه وأجي
كعدت ألاعب بجمانة شوي ونزلتها من
حضني نطيتها النفاخة حتى تلعب بيها
ظلت تطك بيهن وأني أضحك عليها لحد
ما نفتح الباب التفت بسرعة شفت
اسمر واكف
استغربت مو كالو نجيب عمر هسه
عيوني عليه راسه مدنك دموعه تنزل
على قميصه كلبي نزل من مكانه حسيت
الدنيا كلها وكفت حسيت ببرود يجري
بجسمي اقتربت منه بخوف
ليان:: اسمر شصاير وينهم…
يتبععع………
•~•~•~•~•~•~•~•~•~•~•~•
الكاتبه ضحى اليوسف
الفصل التالي: اضغط هنا
يتبع.. (رواية احفاد عمران) اضغط على اسم الرواية لتجد الفهرس كاملاً بجميع الفصول.