رواية احفاد عمران – الفصل الرابع عشر
#احفاد عمران
بارت_14_
الاخو بروح الفه وبرمنه
وبد ما يوم اعوفه وبرمنه
لون شريان مني وابره منه
اكيف من يخيط جروحه بيه
………………………..
“”ليان””
بالك جان منتضرها مني كبل شمرها
عليه اخذتها وبستها بخذها وصلنا البيت
فتح الباب أسمر ودخلنا بس انصدمت من
شفت ليث كاعد بصف عمه سناء وريم
موجوده وحتى ياسمين كاعدات يمه
راح عليه أسمر وسلم عليه سلام وكأن
همه اخوه
باوعت على ريم لكيته تباوع
عليه تقربت عليها وحضنتها حيل
اشتاقيتلها وإني صالي هواي ماشايفته
همست الها
ليان:: تعالي نصعد بالغرفه احسن
ريم بضحكه ودموع:: أي أي
صعدت إني قبلها وصعدت هي ورأي
ولا كأن جان يمنه شخص حتى مالتفتت
عليه وسلمت تجاهلته وصلنا الغرفه
ودخلنا خليت جمانه تلعب على السرير
وكعدنه إني وريم
ريم بدموع:: والله مامصدكه جاي اشوفج
من بعد كل هاي الفتره
ليان بتكابل:: ديله هسه شنو صار همزين
جنت خلصنه وحدي انتن ماموجودات
ضحكنه ثنينه وبقينه نسولف إني وياها
ونضحك ونذكر أيام قبل بس فجأة
صارت تحجيلي على الياس
ليان:: ريم يجوز سوء فهم لا اكثر
ريم:: ولج ياسوء فهم اكللها جاوبتني
بنيه وتكول حبيبي
ليان:: كلهم نفس الشي كلهم حقيرين
وهسه أنتِ شنو راح تسوين
ريم:: ماسوي شي لأن بالأساس إني مارجع بعد
ليان:: بس لا تنسين أنتِ حامل هسه…..
ريم:: ماعرف ليان افكاري ملخبطه
ردت ارد عليها بس كل عاده لازم شخص
يقاطع الحديث اندك الباب ودخلت ياسمين
حتى قبل مانكول إلها ادخلي وجتي كعدت
يمنه
ياسمين:: يي شنو جنتن تحجن
صارت عندي لحضه ادراك وكلت خلي اسئلهن
ليان:: صدك منو هذا الولد ليث
ياسمين بغمزه:: شنو عجبج
ريم:: شنووووووو
ليان وهي تباوع عليهن:: وجع أنتِ……. وانتِ الثانيه شنو هذا الكلام
ياسمين:: لعد شعندج اسئلين عليه
ريم:: ترا ليان ماتعرفه وسئلت وين المشكله
ليان هذا ليث يصير اخو ياسمين الجبير
ليان بصدمه::: شنوووووووووو
ريم:: صوتججج وججج صوتججج
ليان:: شلون يعني أخ ياسمين وأمي ماعرفته
ريم:: ليش عمه سناء وين شايفته
باوعت على ياسمين جانت صافنه بوجوهنه ومتانيه احجي بس همزين انتبهت بسرعه وماحجيت
ليان:: ها…. هههه ماذكر نسيت
ضلت ياسمين تباوعلي بشكوك وكأن تكلي
تره كل شيء اعرف بس ماهتميت النضراتها وضليت اسولف إني وريم وأبدا مافتحنه
موضوع بخصوص حياتنه كدامها
وهيج مر سبوع ريم يمنه ودائما عمه
سماح تسئلها شعجب هاي المره مطوله
لان إلي عرفته من جانت تجيهم تضل
يوم يومين وهاي المره لأن سبوع كلها
مستغربه إلياس من يدك عليها تجاوبه
وتكله مارجع
ياسمين من اجه ليث بليل الصبح راحو
وبعد ماجتي أحس حياتنه صارت احسن
بدونها جانت مقيدتنه
أني وريم انام بالغرفه واسمر رجع ينام
بغرفه ريم صرت ارتاح
أزيد لأن هو
ماموجود حتى عمه سناء صارت تحجي
وياي وحتى صارت دائما تفتح مواضيع
ونضل نحجي
جنه فارشين فرشه برأ وكاعدين على
الفي إني وريم وعمه سناء وجمانه هم
مخليتها يمنه ودنسولف بس فجأة اندك
الباب حيل دخلت عمه سناء البيت وطلعت
لابسه جادر الصلاة وريم رفعت الشال على
راسها راحت عمه سناء فتحت الباب باوعنه
صارت تحجي بس مانسمع شنو الحجي بس تفاجئت وإني أشوف حمزه دخل
كمت وكفت على حيلي وأخيرا رجع مشيت خطوات إله وهو تقدم عليه حضني حيل
وهو يهمس باذني
حمزه:: اجيتج اجيتجج
ليان بدموع:: حمزهه
حمزه:: اشش
وخرني من حضنه وهو يباوع بعيوني
رفع ايده ومسح دموعي
حمزه وهو يدير عيونه الريم:: شلونج ريم
ريم:: زينه
رجع التفت عليه وهو يكول
حمزه:: يله
ليان:: شنو حمزه
حمزه:: يله وياي
ليان:: وين
حمزه:: لجهنم…… امشي ليان وياي البيت
ليان بفهاوه:: شسوي
حمزه بعصبيه:: شلون راح تخليني
اضربها
على حلكها…… امشيييي
كل بالي عود يريد ياخذني ويا دخلت
جوه
على السريع ولبست نفنوف لأن
جنت لابسه
تراك طلعت ويا سحبني
من أيدي بقوه ومشاني ويَ البيت دخلنا
جوه باوعت أمي تباوع عليه وتعض
بصابيعها وكأن دتنبهني على شي
اشرت الها بس ماكدرت تحجي لزمت
ايده
اريد يفلت أيدي بس ضغط عليها
بقوه
وصعدني فوك الغرفه دخلني
الغرفتي
وصاح بوجهي
حمزه:: أنتِ مو مال واحد ينطيج وجه
ابقي
اهنا واذا الكاج طالعه من هاي
الغرفه رجليج اكسرهن الج
ماحاجيته بس درت وجهي منه طلع هوه
ولطخ الباب بقوه هذا الشبي وبعدين
شوكت اجه شو محد كايلي
ضليت شويه كاعده بالغرفه بس مليت
خليت وطلعت نزلت جوه لكيت أبوي
موجود رحت سلمت عليه بس سلام بارد
رجعت دخلت المطبخ لكيت امي واكفه
على السنك تغسل مواعين رحت وكفت
يمهه واردفت…
ليان:: يمهه شبي حمزه
امي:: ولج شنو شبي اجه عصبي كلب
علينه البيت بالصياح
ليان:: شنو السبب
امي:: لأن عرف أنتِ راجعه الاسمر
باوعت عليها وصفنت
ليان:: يعني حمزه ماجان يدري
امي وهي تهز راسها بمعنى لا
ابتسمت لأن أعرف جدي مستحيل
يخلي يعرف حتى خاف يوكف بوجها
ساعدت امي بالمطبخ
باوعت برأ لكيت حيدر كاعد بالحديقه
غسلت أيدي وطلعت يمه وكفت ورا
وحجيت واني الخوف محتلني صرت
حتى من حمزه أخاف
ليان:: حمزه
حمزه بهمس:: صعدي الغرفتج
ليان:: خلي نحجي شويه
حمزه:: ماريد حسج….. كتلج الغرفتج
نزلت دمعتي التفتت ومشيت دخلت البيت
شافتني امي حاجتني واني ولا يمها صعدت
الغرفه ودخلت وسديت الباب كعدت وضليت ابجي حتى حمزه بعد مايريدني…………..
///////////////////////////
“”ريم””
بعد مااجه حمزه وأخذ ليان شحط راحو واني وامي ضلينه وحده تباوع على الثانيه باوعت جمانه كاعده تلعب دنكت على كيفي وشلتها دخلتها جوه رجعت فرشت الها بالكاع لأن ماكدر افرش الها على التخم خاف تنكلب على بطنها وتوكع أخاف عليها جتي امي ورأي وهي تسئل
امي:: هم تعرفين شعجب اجه اخذها
ريم:: لا وين اعرف اني
امي:: هممم….. وانتِ شعجب رجلج
ماسائل عليج
ريم بهمس:: لا جاي يخابرني يوميه
امي:: هممم….. ريم
باوعت عليها وحجيت
ريم:: ها يمه
امي:: شنو رئيج أخذ ياسمين ال اسمر
ريم بصدمه:: شنووو تاخذيها ترا اسمر
مزوج وعنده زوجه
امي:: واذا يمه شكو بيها وبعدين ترا ياسمين خوش بنيه
ريم بضحكه:: أي خوش بنيه ومابيها شي
اخذيها ال أمجد
امي:: هههههههه أمجد لا ماترهم
ريم بضحكه خباثه:: ترهم ترهم بس أنتِ
تردين تلزكيها باسمر
ضحكت امي وهزت ايدها ماعاجبها كلامي
واني اعرف كلش زين هيه كوه تريد ياسمين
لاسمر من ياسمين صارت بنيه شابه وصارت
تفتهم هيه كالت اخذها لاسمر وماافوتها
وعبالك بس ياسمين بساحه برغم جانت
أمل وليان بكدها بس لا هيه رادت ياسمين
راحت أمي دخلت غرفتها وإني ضليت
كاعده بالنص ساعه يم جمانه بس بعدين
صارت تغفي وتفز لأن ايدها تتحرك
مامتعلمه إذا ماتتلفلف ماتنام لفلفتها
و
شلتها وصعدت على كيفي بالدرج لأن
هم حامل وهم شايله طفله ماكدر اتوازن
صعدت دخلت غرفه اسمر لأن احنه انام
بيها خليت جمانه بكركوتها واني كعدت
العب بتلفوني شويه ونفتح الباب على
كيف باوعت اسمر دخل عدلت كعدتي
وبتسمت اله وكلت
ريم::الله يساعدك
أسمر:: ويساعدج
باوع على الحمام ورجع باوع عليه مستغرب
اسمر:: ليان وين !
ريم:: مووو……
اسمر:: مو شنو شو لا جوه موجوده
ولا أهنأ وينها
ريم:: اجه حمزه واخذها
اسمر بصدمه:: حمززههه ؟؟!
ريم:: أي
عافني وراح طلع ضليت اني العب بجهازي
بس مليت منه ذبيته وكعدت افكر بحياتي
وشلون افتح الموضوع ويا اهلي وراح
يتفاهمون لو يسوون بيه مثل ليان
طردت الافكار من راسي
وكمت ردت انزل بس دك موبايلي
تقربت عليه جان المتصل “”اليأس “”
سويته كتم ونزلت جوا ………
//////////////////////////////
“”ليان””
مرن يومين واني يم اهلي حمزه مايحجي
وياي وعمر ماعرف شنو سالفته بهل كم
يوم اسمر ماشفته ولا سمعت شي عليه
وماعرفت شلون كدرو ينومون جمانه
بليل لأن اعرف بيها ماتنام
امي تكلي احجي ولا سكتين وإذا تردين
الطلاك اني احاجي ابوج واخوتج بس
اني ماعندي اي كلام الحجيها ومااكدر
اواجه الكل ولا اكدر احجي حتى الحمزه
لأن اخاف منه واخاف خاف يسوي شي
جدو عمران ماشايفته ابدا صالي شكد
ولا حتى بيت عمو ماجد وامل حيل
مشتاقتلها واريد اشوفها
اني كضيتها بالغرفه لان حمزه كالمره
يشوفني بيها يكول “لا تشوفيني وجهج “”
واني ماخذه على خاطري حتى الاكل مانزل
اكل وياهم اكل وحدي عمر يجي يسولف
وياي ويطلع
جنت كاعده بالغرفه وداارتب بجرارات
الميز لأن متروكات وصايراتخ وصخات
فاكلتح ارتبهن وانضفهن احسن ماكاعده
لا شغله ولا عمله
واني جاي انضف انفتح الباب ودخل
حمزه تجاهلني وكعد على حافه الجربايه
درت وجهي عنه اني هم ماحجيت شي
وضليت أرتب بالغراض بس كسر
السكوت وكال
حمزه:: اي ليان
ليان وهيه تلتفت اله:: ه…ا
حمزه:: احجي
ليان:: شنو احجي
حمزه بخزره:: شلون ترجعين إله وأنا
آخر من يعلم
ماعرفت شنو اجاوبه شنو اكله جدك
هيج وهيج يحجي وياي وهو إلي
رجعني غصب عني لو شنو احجي
ضليت مدنكه راسي والعب بصابيعي
اجه يمي كعد رفع راسي بايده صارت
عيوني بعيونه ذب حسره واردف
حمزه:: احجيلي يله ليان
ليان بتلثم:: ش… نو احج..ي
حمزه:: أعرف بيج مستحيل ترجعين
براضاتج ولج أنتِ أنتِ ردتي تنهين
حياتج من ورا هسه تردين اصدك
بيج أنتِ راجعتله
ليان:: حمزه كافي
حمزه بصياحه:: شنوووو هوه الكااافيييي
هااا شنووووو
ليان بهدوء:: إلي صار صار مانكدر نغير شي
باوعت عليه رفع راسه ليفوك وضحك
ضحكه طالعه من كل كلبه باوع عليه
وضربني على راسي بايده وهوه يحجي
حمزه:: إذا جان عندج احتمال واحد بالميه
اخليج ترجعين الهذاك البيت شيلي من بالج
ضليت صافنه بي بس بنفس الوقت فرحانه
بكلبي لأن وأخيرا شخص راح يدافع عليه
بس بس هم خايفه إذا جدو دره بحمزه
عافني حمزه وطلع رجعت ارتب بالغرفه
والضحكه مافارقت وجهي “بس اشتاقيت الجمانه”
وهيج مر سبوع كامل واني يم أهلي
سمع جدو عمران بحمزه
وجان يريد يقنع حتى حمزه
بس حتى ارجع بس جان جواب
حمزه نفس الجمله”ماعدنه مره لاسمر”
أيام مرت حلوه عليه واني بين عائلتي
ومن حمزه وكف وياي صرت ماخاف
منهم وإذا شخص حجه ماهتمله
ومااشيله بال بس…
جنت واكفه بالمطبخ وكل عاده جدو
عمران وعمو ماجد وعمو جاسم موجودين
يمنه وكالعاده يردون يقنعون حمزه وصوتهم يوصل الجيران صار عندي فضول اسمع كل حجيهم عفت أمي بالمطبخ ورحت على كيفي
يم باب الاستقبال خليت أذني على الباب
وصرت اتصنت عليهم سمعت جدو يحجي
بصوت ومبين موجه الكلام الحمزه
جدو عمران:: اشو أنتَ تحجي بكيفك
ولا تكول احنه كبار موجودين
حمزه:: كبار على عيني وراسي بس كلت
الكم وارجع اكول مره ثانيه وثالثه والف
مره أسمر ماعدنه مره يمنه
جدو عمران بصياح:: وأنتَ بكيفك تقرر
حمزه:: رجآء ليان أختي وأنا اعرف
بمصلحتها أكثر منكم
ماجد:: حمزه ترا ليان مزوجه لا تنسي…..
حمزه وهو يقاطع حديث عمه:: مزوجههه
هههههههه لا والله صدك ضحكتوني
يوسف بصيحته:: حمزههههه
حمزه بصوت عالي:: هوه شنووو حمزه
هااا ويننن جنتوووو ويننن من عافهااا
بيوم العرس ويينننن أنتم هاا حايرين
بحجي النااسسس وين عنها لووو ها
لو من اجه وجايب طفله ويا مانعرف
عنها شي وووينننن جنتووو لو كلههه
صار شي عاددييي عدكم ولا چن
صاير شيييي
جدو عمران بهدوء:: حمزه أختك رجعت
من وحدها إله ومثل مارجعت قبل
هسه هم ترجع
حمزه:: ليان ماترجع لاسمر وهذا العندي
ومن هسه ابلش بيها وباجرائات الطلاق
الكل سكت صار هدوء تام وبس صوت
النفس ينسمع بس كسر الهدوء جدو
عمران وهو يصيح لابوي
جدو عمران:: يوووسففف شوف جاره ويا
ولددك راح يجلطوني
حجه عمو جاسم وهو يحاول يسيطر
على الوضع
جاسم:: ياحمزه ياوليدي ليان مرته لاسمر
ومانكدر نغير هذا الشيء بعد
حمزه بصياح:: لااا نكددر نغير بسسس
انتوووو شنووو هااا كل همكم الناسسس
والله شنوووو حجت النااااسسسس
ولكممم اختتتييي ياناااسس اختيييي
انحبستت سنه ونص بالبيت حرمتوهااا
من اكثرر شي تحبهههه دراستهااا وووومن بنااتتت عمهااا ولككممم ماخليتووو احد
يوصل اللهاااا وكل هذاااا وأنا ساكت
وماحجيتتت بس شنوووو انتووو هاااا
كلشي تريدونه تضمون سوالف أسمر
إلك*** تحلمووننن والله تحلموننن
حمزه يحجي واني ابجي أول مره شخص
يوكف كدام الكل ويصير يدافع عليه أول
مره حسيت عندي سند بهل حياة وما
خاب ضني بي أبدا إلي ماسوه أبوي
سوه أخوي
فجاة وماحسيت غير انفتح الباب وصار
بوجهي حمزه مسحت دموعي ومشيت
أريد أعبر اروح المطبخ بس استوقفني
صوته وهو يكول
حمزه:: ليان ورأي
عافني وصعد فوك ضليت صافنه اني وخايفه
_بس لا احصلي كتله
_لا شنو اني شعليه
_يله اصعد واشوف تاليتها
خليت وصعدت بس صرت امشي خطوه
خطوه حتى مااوصل بسرعه بس بنهايه
وصلت الغرفه حمزه دكيت الباب واجاني
صوته
حمزه:: فوتي فوتي
دخلت واني الخوف محتلني ورجليه
صارت رجل اطك برجل
باوعت عليه
وجان هو ياشر إلي بمعنى تقربي تقربت
عليه وهو تقدم خطوتين إلي نزلت راسي
بسرعه واتاني بي يحجي بسرع
حمزه:: ارفعي راسج وباوعيلي
رفعت راسي إله وباوعت بعيونه إلي
جانن يباوعت بعيوني بكل حب وحنان
ضل صافن عليه بس عض شفته السفليه
واردف بهدوء
حمزه:: تردين ترجعين
ليان وهي مافاهمه شي:: هااا… وين ارجع !؟
حمزه:: لل تقشمين روحج وكليلي تردين
ترجعين لاسمر
هزيت راسي بنفي واني اكول
ليان:: لا ماريد ارجع لا لاسمر ولا لهذاك
البيت بس..
حمزه بتسائل:: بس شنو احجي
ليان:: اريد جمانه
حمزه بستغراب وهو مافاهم شي
_جمانه منهي هاي
ليان:: جمانه بنته لأسمر
فتح عيونه على وسعهن وصاح بوجهي
حمزه:: تخبلتتتتييي انتِتِتِ
ليان:: حمزه
حمزه:: اششش كاافييي
ليان:: حمزه شبيك
حمزه:: شنووو شبيهه ولجج تردين بنت
رجلجج انتِ عاقلههه
ليان:: ترا احبهااا
حمزه:: وحبتججج حيههه كوننن
بس لا مفكره صدك اسويها واجيبها
الج
ضحكت بخبث وهزيت راسي بمعنى أي
حمزه:: بنتي روحي صايره تحلمين احلام
العصر
ليان:: حمزههههه
حمزه:: وجعع طلعي
ليان:: بس خلي نحجي
حمزه:: طلعي
هزيت راسي بأي وطلعت واني برطمه
لأن صاح بيه بس هم حقه شنو دااكله
روح جيب بنت زوجي وهو ياخذني
بلاحضان مثلآ رحت الغرفتي وضليت
كاعده………
/////////////////////
“”ريم””
مر سبوع كامل وحمزه مارضه يرجع ليان
واني دائما اكول حقه وين اكو أخ يقبل
هذا الشي على اخته وبلاخص حمزه لأن
هو إلي يدير باله عليها من هيه وصغيره
وما اختلف عليها من كبرت
جمانه تعبتنه بهل سبوع ونوم باليل
ماتنام أبدا وكلها حاجه وياها حتى
اسمر بس اني مكيفه على هذا الشي
لأن لأن مخليه حجتي عود ضاله علمود
جمانه
رجع أسمر ينام بغرفته واني ماخذه
جمانه يمي بغرفتي اما أمي دتحاول
تفتح موضوع ياسمين وي أسمر
وتريده يزوجها
جمانه توها صارت تفتهم وتباوع على
إلي يروح ويرجع ومرات تبتسم إذا
شخص حاجاها وكركر الها
أسمر مرات احسه ايريدها ومايريد
يبتعد عليها بس مرات احسه يعتبرها
كان وحده غريبه عليه ولا بالك بنته هيه
دخلت إني بالشهر الثامن وبطني برزت
اكثر واكثر صارت أمي تروح السوك
واوصي بيها تجيب إلي غراض الطفل
الياس يدك مرات اجاوبه واحجي
كلمتين واسده ومرات ماجاوب عليه
أبدا مرتين اجه عليه بس اكعد خمس
دقايق واكول جمانه تبجي ومانكعد
نحجي سوه وهو يلوب يريد يعرف
ليش لحد الآن ماجاي اقبل أرجع ويا
مر كم يوم كاعدين كالعاده بصاله أمي
واني ومخليه جمانه يمي دك جهاز أمي
اخذته وفتحته ومن بعد سلام وكلام
عرفتها عمه زهور زوجه عمو ماجد
بس فاجئتني من كالت أمي
أمي:: أي بالخير عليكم عيوني ….. شوكت الخطوبه….. منين همه….. وعمي رضه…… ها شعجب خيه……. بس شدعوه مستعجلين…… أي هم صدك
ضليت صافنه بوجهه ومافاهمه شي
واريدها تسد الخط وتحجيلي
وأخير شي سدت الخط من بعد نص
ساعه اسئله وتحقيق باوعت عليها
لكيته تباوع عليه وتضحك استغربت
شبيها
ريم:: أي شنهي ماشنهي
أمي:: أي
ريم:: شنو أي منو جان يحجي وياج
أمي:: شبيج هاي زهور
ريم بتسائل:: يي وشتريد وليش دتباركين
أمي:: يا ماتدرين
ريم:: شنوووو
أمي:: امل خطبوها
ريم بصدمه:: شنوووووو شوكتتتت
أمي:: هوه شنو شوكت خطبوها
ونطوها بعد شنو
كامت ودخلت الغرفتها واني شلت
جمانه وصعدت فوك الغرفتي خليت
جمانه على الجربايه واخذت تلفوني
اتصلت على امل مره مرتين الثالثه
يلا ردت
ريم:: ها خطبوج
امل::: أي ههههههه
ريم:: نفسه
امل:: ممممم أي نفسه
ريم بضحكه::: ووافقوووو
امل::: إي أي ولج ريم ماتتخيلين فرحتي
شكدها
ريم:: ولج شلون جدو عمران قبل
امل بضحكه:: غير ياسر جاب شيوخ كبار
واجه طلبني منهم
ريم:: ماتتخيلين شكد فرحتلج ولي يلا
خلي اكول اليان
امل:: اوكفيييي
ريم:: ها شكووو
امل:: ليان اشترت جهاز لو بعدها
ريم:: أي اشتره إلها حمزه
امل:: لججج انتِ فد وحدههه ليان
مشتريه جهاز واني مادري
ريم:: ديله هسه شصار
امل:: يله ولي بس بوسيلي جمانه
سديت الخط واني الابتسامه على وجهي
باوعت جمانه بعدها تلعب خليت ودكيت
على ليان جاوبت اول مارن عدها
ريم:: شنووو كاعده على الموبايل
ليان بصيحه:: ولجج صدككككك خطبوها لأمل
ريم بضحك::: أي
ليان:: وأخيرا راح نخلص منها
ريم::: يا يا يا
سكتت بس بعدين كالت
ليان:: ريم وين أنتِ كاعده
ريم:: بالغرفه مالتي
ليان بهمس وصوت ناصي:: جمانه يمج
ريم:: أي يمي كاعده تلعب
ليان:: أريد اشوفها
ريم:: يله خلي نفتح كامره
ليان:: هههه يله
وخرت التلفون من اذني وفتحت الكامره
بس خليتها سلفي ورحت تمددت على
الجربايه بصف جمانه وخليت الكامره
عليهاباوعت على ليان إلي جانت تباوع
الها بلهفه وتحجي وياها
ليان:: جمانه حبيبتي
ضلت تحجي وياها وهاي جمانه بس
صافنه بيها وليان لو بيدها تدخل الها
من التلفون وتبوس الها بالنص ساعه
وهي تحاجي جمانه بس بعدين
ودعتها وسديته……………………
////////////////////////////
“” ليان””
مرت فتره وبعد يومين الخطوبه أمل
كلش فرحت الها لأن راح تاخذ شخص
تحبه ويحبها وماتنضلم مثلنه
الكاتبه::..””طبعا أمل ماحبت تكتب
قصه حبها “”
من بعد هذاك اليوم ومحد بعد فتح
موضوعي اني واسمر وكأن انسد بس
حمزه راد نطلك واسمر رافض هاي الفكره
وماقابل يحضر أي جلسه اشتاقيت الجمانه
صرت بين فتره وفتره اخلي ريم تفتحلي
كامره احجي وياها بالرغم هيه ماتفتهم
بس اني احسها تحاجيني وتفتهمني
رحنه السوك اني وأمي اشتري فستان
الخطوبه أمل وطبعا مايعجبني شي
دخلنا المحل نفسه إلي اشتريت منه
فستان خطوبتي ضليت اكلب بالفساتين
لحد ماوكفت عيني على واحد جان من
جهه الصد** ضيك ومن جوه فارش
وجانت اردانه نص وهو طويل وجان
عليه تطريز حلو ولونه ازرق
ضحكت واخذته بايدي وامي وياي
حاسبنه الولد ونوب رحت أخذت
حذاء_تكرمون_ لون ذهبي لأن هيج
لون يكعد وي الفستان
ونوب أخذت عنايه البشره وهواي
سوالف وامي “” يلا اتاخرنه “”
ورجعنه…
مرن اليومين واليوم خطوبه امل طبعا
مارحت وياها الصالون لا اني ولا ريم
اني ماكدرت اروح لأن ماقبل حمزه وريم
ماتكدر من جهه حامل ومن جهه يمها
جمانه والجهه الثالثه إلياس ماتكدر
تحجي ويا وتطلب هي طلب منه
واني وياها اتفقنه انروح البيت عمو
ماجد وهناك انجهز نفسنه احسن
رحنه تقريباً الساعه 10 ونص الصبح
وهم جانو يمهم خوال وخالات امل
وهواي همه ومن بعد كلام وسلام وأخيرا
اجتي ريم وخلصتني جانت لابسه نفنوف
حوامل بس شنو بطنها واصله الحلكها
وشايله جمانه كوه ضحكت عليها
وركضت الها سلمت عليها واخذت
“” جمانتي”” وضليت ابوس بيها حيل
رحنه اني وريم كعدنه على صفحه
وجمانه بحضني ضلينه انسولف ونضحك
وأخير شي صبو الغدا كلها تغدت واحنه
هم وفلتنه فوك بغرفه أمل
جنت لابسه تراك عادي كلت خلي امكيج
نفسي وارتب شعري يلا ألبس الفستان
ضلينه اني وريم نرتب ونمكيج وأخير
فقره وصلت الها الايناينر مااكدر اخلي
اني على نفسي باوعت على ريم وضحكت
ليان:: ريمم ساعدينييي ورسمي الييي
ريم:: اهووو ليان رسمي أنتِ النفسج
وخليني اخلص
ليان:: مااخذ منج وقت بسرعه تخلصين
ريم:: دتعالي وامري الله
كعدت كدامها وهي رسمت لايناينر على
عيوني جنه كاعدين بس احنه بالغرفه
ويمنه جمانه فقط خلصنه المكياج وبلشنه
بشعرنه اني سويته ذيل احصان بس
خليت خصلات نازلات وريم سوته كعكه
خلصنه وباوعت عليها
ليان:: اني راح ادخل الحمام إغير ملابسي
ريم:: يلا روحي واني راح اغير ملابسي
اهنا وهم اغير ملابس جمانه
هزيت راسي بمعنى أي واخذت فستاني
ودخلت الحمام……. لبسته وعدلته عليه
باوعت بالمرايا وابتسمت على شكلي
طلعت بس جانت الصدمه اهنا جانت
ريم دتغير ملابس جمانه وجانت عباره
عن بدله اطفال صغيرونه بالون الازرق
معقوله صدفه هاي اني وياها لابسين
بالون الازرق ضحكت وتقربت عليها
واردفت…
ليان:: شنو هذا الازرق الجميل يابه
رفعت راسها ريم عليه وباوعت على
فستاني وضحكت
ريم:: شنو انتن متفقات عليه
ليان:: شنوو إنتو تغارون مني
ريم بضحكه:: وجج لا هذا اسمر البارحه
جابه الها كال بلون عيونها
ابتسمت الها واني أتذكر هو أصلا مامتقبل
بنته دنكت عليها وشلتها ونزلنه جوه
جان الكل موجود وحتى أمل على جيه
شغلن البنات الديجي وصار الكل يركص
ماعداي اني وريم بقينه واكفين على
صفحه إلا أن اجت أمل من الصالون
وشتغلت الهلاهل وشمر الجكليت عليها
رجعن البنات يركصن بس هلمرا اجني
عليه كوه سحبني وياهن اركص صرت
اصفك بأيدي واتمايل بخصري بس بعدين
رحت على ريم اخذت جمانه منها وصرت
اتمايل وياها وانتبهت الها صايره تبتسم
صرت كل شوي اطبع بوسه على خدها
ضليت اركص واتمايل وي جمانتي بس
تعبت أخير شي استسلمت ورحت كعدت
جتي ريم يمي هم كعدت
ضلينه اني وريم كاعدات بس
صارت حاره الدنيا كلت اطلع
برأ احسن الي خليت وكمت
طلعت برأ وجان اشوف….
/////////////////////////
“”ريم””
ضليت اني كاعده وجمانه بحضني
طلعت برأ صار وكت العقد وراحت
أمل يم باب الاستقبال وعقدو الهم
وصارت تركع صوت الهلاهل والمباركه
وأمل الفرحه ماسايعتها……
بس كل هذا وليان ماكو من طلعت
برأ بعد مادخلت شوي واجت بنيه
صغيره عليه واني كوه فتهمت الها
_حال مو ثمر يحو.. ل حل ثثي
الترجمه:: خاله عمو اسمر يكول خل تجي
ضحكت بكلبي لأن جانت طفله صغيرونه
ومبين عليها مو هذاك الحجي تحجي
كمت واني شايله جمانه طلعت بباب
المطبخ واجه عليه اسمر ابتسم إلي
واردف
اسمر:: ريم إلياس يريد يحجي وياج
ريم:: اسمر مو هسه فدوه
اسمر:: دتعالي هسه وياي
مشيت ويا واني شايله جمانه بيدي
دنروح ورا البيت وجان نشوف ليان
واكفه هي وليث وماعرف ليث
شنو ديشوفها بموبايله وهيه
تضحك وماخذها الواهس
باوعت على اسمر إلي جان يباوع
عليهم والشر يطاير من عيونه…..
يتبعععع………
///////////////////
الفصل التالي: اضغط هنا
يتبع.. (رواية احفاد عمران) اضغط على اسم الرواية لتجد الفهرس كاملاً بجميع الفصول.