رواية بنات المنشاوي الجزء الثالث – الفصل السادس عشر
بارت ١٦
بقلم خلود وائل 🌻
سيف : هجبلك عربيه ياحمزة بس بشرطين
حمزة ممازحا : من عيوني لوز اؤمر ياحجيجه
سيف : اول حاجه هتنزل مع يونس الشغل وقت ماتكون اجازة من الجامعه او حتي راجع بدري وتاني حاجه هتوصل هايا ونغم كل يوم وتجيبهم من جامعتهم
حمزة : نعم !! طب اذاي دة ؟ شغلي معاكو في وقت فراغي تمام مفيش مشكله مع ان عندي مذاكرة وكدة بس حضرتك مش واخد بالك اني مش معاهم في جامعتهم اصلا وبيني وبينهم ساعه بالعربيه ! دة غير اختلاف مواعيد محاضرتنا ؟ ايه يابابا حضرتك مش شايف الموضوع غريب شويه
سيف وهو يحتسي القهوة : لا غريب ولا حاجه قدامك اسبوع تعرفو مواعيد محاضرتكو فيه وتنظمو اموركم سوا واليوم ال مش هيظبط السواق موجود معاهم
حمزة : وايه الحكمه في الليله دى مفهمتش
سيف : الحكمه اني مش هدي لحضرتك فرصه للصرمحه هنا وهناك بالعربيه لازم تعتمد علي نفسك وتتحمل مسؤليه وتتعلم الالتزام بمواعيد ومن هنا ورايح اي مشوار للبنات انت ال هتروحه معاهم
حمزة بضيق : وحياتي يابابا ومذاكرتي وانا من امتي بخرج مع بنات لا وكمان هلف معاهم في اي حته يروحوها متقولي حاجه ياماما
آيه بتعجب من قرار سيف : ال بباك يقوله يمشي ياحمزة
حمزة : ياسيدي خلاص شكرا مش عايز عربيه انا هروح مع السواق زي منا
سيف وهو يمط شفتيه : خلاص مش مشكله وفرت تمن ال جيتور x70
اتسعت عيني حمزة بفرحه مهللا : الله اكبر يحيا العدل ربنا يخليك لينا ياابو السيوف والله انا عارف ان معندك قدي من زمان وبعدين مشاوير ايه ياراجل دي ال مروحهاش مع اختي وبنت خالتي يااااه دى متعه اي بالله دة انا هبقي السواق الخصوصي بتاعهم انت بس شاور حبيبي اسيفوو والله
ابتسم سيف ودفن وجهه بكف يده يقهقه علي هيئه حمزة وسعادته المفرطه
نغم بهمس : اخوكي باينه لسع
هايا بهمس : ششش اسكتي بقي سبيه فرحان دة مش هينام النهاردة
حمزة ليونس : ونوس صحصح معايا انا عاوزها زيرو ها زيرو
يونس : انت مش طماع خالص صح
حمزة : مليش فيه وهاتهالي لونها سيلڤر او زهري ومتنساش بقي طقم المساچ بتاع الكرسي الرئيسي ها
يونس وهو يحك ذقنه : ناوي تسافر ليبيا بيها ولا ايه
حمزة : دة انا هخربها يابني استني انت عليا بس هو الاسبوع دة مش راضي يخلص ليه النهاردة ايه ياجماعه
قهقهت نغم علي هيئته فهتف هو بغيظ : انتي بتضحكي كتير ليه كدة
نغم وهي تهز كتفيها : لما ابقي اضحك من بوقك ابقي اتكلم
حمزة : باردة
نغم : باردة دافيه ملكش فيه انت هتشربني !!
حمزة : لا يختي بعد الشر عليا دة وقعته مطينه ال هيتجوزك امه دعت عليه في ليله ابواب السما كانت مفتوحه فيها
نغم بغيظ : ملكش دعوة بال هتجوزة يارخم
آيه : باااس كل واحد علي اوضته يلا
اتجه كل منهم لغرفته بينما جلست آيه بجوار سيف وهتفت بحنو : ليه ال انت قولته لحمزة دة ؟
سيف : متنكريش ان ابنك مستهتر وواخد الدنيا لعب وتنطيط
آيه : تمام بس انت كدة متقل عليه
سيف : لا متقلقيش انا بس عاوزة يبقي عندة حبه التزامات حتي ولو بسيطه
آيه : بس انت بتحط البنزين جمب النار ياقلبي
حمزة : لا اطمني حمزة هيعقل انا متأكد
بالأعلي دلفت نغم للغرفه برفقه هايا واعينها تنطلق منها السعادة الغامرة
هايا : ايه مالك منشكحه ليه كدة
نغم : دة انا هموت من الفرحه
هايا : لا استهدي بالله كدة مصر محتاجه خدماتك
نغم : انا وحمزة مع بعض في بيت واحد وهنروح الكليه سوا ونرجع سوا واي خروجه هنكون مع بعض فيها لا كدة كتير اوووي عليا وفي يوم واحد كمان
هايا : ويرزق من يشاء بغير حساب
نغم بأعين تلمع من شدة الفرحه : انا مش مصدقه بجد ياهايا حاسه اني بحلم والله نفسي اغمض وافتح عيني الاقيني بطل بالابيض جمب اخوكي
هايا بابتسامه : بتحبيه اوي كدة يا نغم ؟
نغم : لا طبعا الحب دة مستوي ابتدائي خالص دة انا غرقانه فيه هيمانه في بحر عنيه والله انا ببقي علي عيني اني انكشه وازعله بس هو مستفز اوي وعلي طول بيوجعني لما يفضل يقولي وجودك مش فارق من عدمه او انتي ذي هايا اختي بجد بيحرق دمي نفسي الفت نظرة ليا ويفهم اني بحبه لكن من زي اخويا انا بتمناه يبقي نصي التاني وابو عيالي وشريك عمري كله
هايا : حيلك حيلك ياحجه انتي دة انتي لسه سنه اولي جامعه ايه احلام اليقظه دى اتقلي بقي يامدلوقه
نغم : اسكتي انتي بلا احلام يقظه بلا احلام مستغانمي
هايا : 😂😂😂😂
__________________________
اتجهت منال نحو الاريكه التي يجلس عليها عز وجلست بجوارة
منال : عزوز
عز وهو يتابع المسلسل : ها ياقلب عزوز
منال : متركز معايا وسيبك من البتاع دة
عز : استني بس دي اهم حلقه وهنعرف مين ال سرق الكنز
منال : طب اسيبك انت والكنز سوا
عز وهو يمسك بيدها : استني بس تعالي هقولك
جذبها لتجلس بجوارة ثم هتف وهو يتابع التلفاز : كنتي عاوزة حاجه ياقلبي
منال : مفيش حاجه مهمه يعني كنت بس هقولك اني طلعت حامل بس انت مش مهتم وعاوز تشوف الكنز فهسيبك علي راحتك وادخل انام احسن
صمت عز لدقائق مرتبا كلماتها ليتفهم ماتفوهت به منذ برهه ثم نظر اليها والتفت بجذعه نحوها هاتفا : انتي قولتي ايه ؟!
منال بأبتسامه وهمس : حاامل
انتفض عز من مكانه وسحبها نحوة ثم امسك بكتفيها وهزها بقوة : اوعي تكوني بتهزري بالله عليكي يامنال
منال بقهقهه : والله مبهزر انا فعلا حامل
عز بابتسامه عريضه واعين تلمع بالدموع : دة أحلي يوم في حياتي انا بحبك اوووي ياعمري كله بحبك قد الجنه ياجنتي
ضمها لصدرة بحنان وامسد علي شعرها وهو يهتف : الف حمد وشكر ليك يارب ❤️
بعد لحظات جلس الاثنان سويا والسعادة تحاوطهم
منال : ها عاوز بنوته ولا ولد مشاكس ذيك كدة
عز : كل ال يجيبه ربنا نعمه انا اصلا لسه مش مصدق انك حامل ياااه يا منوله مكنتش اعرف انها بتبقي فرحه جامدة كدة
منال : ربنا يقدرني واسعدك ياحبيبي
عز : صدقيني انا سعيد بوجودك في حياتي
منال : ربنا يديمك ليا
عز وهو يقبل جبهتها : ابوكي مش هيصدق انه هيبقي جد
منال : انا لازم اكلمه هو وماما اعرفه وانت كمان كلم عمي فريد وطنط ثناء
عز : استني متكلميش حد احنا نعملها مفاجئه ونعزمهم كلهم بكرة ويبقي تجمع عائلي ونتغدي سوا وفي اخر اليوم نعرفهم ايه رايك
منال : فكرة جامدة جمودة
عز : طب يلا كل واحد فينا يكلم اهله ونعزمهم
منال : استني تعالي ياعم انت انا هطبخ لكل دول مشاء الله اذاي
عز : حبيبي ميهونش عليا بردو هنطلب اكل من برة
منال بمداعبه طفوليه : يحيي عزوز اللزوز
عز بضحكه رجوليه : عزوز اللزوز 😂😂 !!
__________________________
مساء كان يجلس يونس بحديقه الفيلا يهاتف مليكه
يونس بحنق : قلت كام مرة انك لازم تعرفيني قبل ماتتنيلي تخرجي من البيت بس كلامي مبيتسمعش
مليكه : اوووف بقي يايونس انت بقيت خنيق اوي ليه كدة متخرجيش متأخر متخرجيش غير لما تعرفيني متلبسيش دة متسيبيش شعرك متكلميش دة متضحكيش مع دة أييييه ارحمني انت مش فرض عليا اسمع كلامك غير لما نتجوز
يونس بضيق : بس علي الأققل تحترميني ياهانم
مليكه : اتس تو ماتش يايونس بجد المفروض انك اوبن مايند عن كدة سبت ايه للرجعيين المتخلفين
يونس بسخريه : هي الاصول بقت رجعيه وتخلف اليومين دول
مليكه : لا بص انا مش هخوض الحوار بتاع كل مرة دة انا بجد طاقتي خلصت للنهاردة اتس انف فور توداي
يونس : لا هي اتس انف خالص سلام يامليكه
مليكه بملل: سلام
اغلق هاتفه بأستياء ثم وضعه بجوارة وأسند راسه علي ذراعه وظل يتأمل السماء بفتور ثم افاق من شرودة علي صوت حمحمه سيف
سيف : احمم هتفضل سرحان طول الليل
يونس : بابا !! حضرتك هنا من امتي
سيف : من شويه … بتفكر في ايه
يونس : لا ابدا مفيش
سيف وهو يعقد زراعيه أمام صدره : عامل ايه مع مليكه
يونس بأستغراب : تمام الحمدلله !
سيف : طب مش ناوي تتجوز قريب وتفرحنا بيكو
يونس : ها … ربنا يسهل
سيف : بص ياحبيبي لو مش مرتاح خليك صريح مع نفسك قبل اي حد علشان الجواز مش يوم ولا اتنين دة عمر بحاله والاختيار الغلط بيرسم ملامح صعبه لبقيه حياتك
يونس : ومين قال ان اختياري لمليكه غلط يابابا
سيف وهو يهز كتفيه باستنكار : انا مقلتش ان اختيارك لمليكه غلط بس دى مجرد دردشه بين اتنين صحاب مش اب وابنه ولا تتضايق ؟
يونس بأبتسامه : هو انا اطول يابابا اتكلم براحتك
سيف : بقالك فترة متغير ومنطوي علي نفسك وتقريبا انا نسيت شكل ضحتك عامله اذاي فقلت لازم أسأل طالما انت مش هتحكي
يونس : مفيش حاجه تتحكي يابوب صدقني
سيف : عمتا لو فكرت تاخد اي خطوة اتأكد اني هدعمك ودايما هكون في ضهرك لأن اهم حاجه عندي راحتك
يونس : خطوة من اي نوع ؟
سيف :قولي يايونس انت اختارت مليكه ليه بالذات
يونس بحيرة من سؤال والدة : مليكه بنت مؤدبه وجميله وذكيه واهلها ناس محترمين واحنا نعرفهم من زمان
سيف : بس كدة ؟
يونس : مش فاهم حضرتك تقصد ايه ؟
سيف : اققصد انك مذكرتش في وسط الصفات دى انك مثلا بتحبها !
يونس بتوتر : انا لما طلبت خطوبتها من حضرتك قولتلك اني معجب بيها وبشخصيتها
سيف : تمام بس في وسط كلامك كله كنت مستني اسمع منك مثلا انك بتحبها او علي الأققل مشدود ليها
يونس بحيرة : انا بحبها اكيد يابابا بس في شويه حجات في شخصيتها هما ال مسببين فجوة مابينا
سيف : ذي ايه مثلا
يونس : مثلا مليكه اه محترمه جدا بس فري اوي في التعامل مفيش حدود مع زمايلها ولبسها ياضيق ياقصير وسبق وطلبت منها تلبس واسع وتتحجب بس لا حياه لمن تنادي
سيف : طيب… انت لما روحت خطبتها مش كنت عارف ان دة اسلوب حياتها ودي طريقتها ؟
يونس : ايوة بس انا فكرت اني ممكن اغيرها ذي ماحضرتك غيرت ماما زمان وخليتها تتحجب
تنهد سيف بهدوء ثم اردف : يابني امك حاجه ومليكه حاجه تانيه خالص الاتنين مينفعش يتحطو في مقارنه نهائي انت كدة بتظلم نفسك في النص
صمت يونس مهتما لحديث والدة ليكمل سيف : امك زمان كانت طايشه بس اصلها وتربيتها في الصعيد كان لبسها واسع ومحتشم ودايما كانت الطرحه علي راسها اي نعم مش ملتزمه بيها لكن كان في اصول وهي ماشيه عليها لكن لما جت القاهرة تقدر تقول ساقت العند علي نفسها وكابرت علشان ثبت ان مفيش حد متحكم فيها ودى مش قله تربيه وانما عقد وترسبات نفسيه وغياب لحد مسؤل عنها يوجهها ويعرفها الصح من الغلط والدليل علي كلامي ان خالاتك ورد ودعاء ستايل لبسهم متغيرش نهائي واتحجبو في النهايه وانت مش ذيي ولا هتقدر تصبر وتستحمل ال انا استحملته سنين طويله عما قدرت أطمن مامتك واعرفها الصح من الغلط واحدة واحدة لحد مافي النهايه هي ال اتغيرت واتحجبت من نفسها اما بالنسبه لمليكه فالغلط من عندك انت مش منها خالص
يونس بدهشه : من عندي انا ؟!!
سيف : ايوة يابني .. مينفعش تروح تخطب واحدة وهي تخينه وتفرض عليها انها تخس علشان تعجبك ولا واحدة سمرا وتقولها لاء انا عايزك بيضه ذي فلانه وفلانه وبردو مينفعش تبقي عارف ان واحدة طول عمرها لبسها بنطلون وتفرض عليها تلبس جلباب علشان تنول رضاك التربيه ال البنت اتربت ونشأت عليها مينفعش انت تيجي بكل سهوله وفي غمضه عين تهدها وتشكلها علي كيفك ومتنساش ان اي بنت ليها شخصيه وكيان ذيك بالظبط وزمن سي السيد دة انتهي من زمان ومليكه انت شايف وعارف كويس قوي الوسط ال هي اتربت فيه ولما انت تيجي تغيرها بالأجبار لازم تلاقي رد فعل مش هيعجبك وتحصل الفجوة ال انت قولت عليها
يونس بضيق : انا مبطلبش المستحيل يابابا ولا بجبرها علي حاجه هي مش عيزاها بس انا مش هقبل ان مراتي تبقي فرجه للناس ويشاركوني فيها بنظراتهم ليها
سيف : حقك طبعا بس لما تكون اختارت واحدة من الأساس تتوفر فيها شروطك
يونس بضيق : يعني اسيبها ماشيه كدة واقفف مبسوط ياأما افركش واسيبها
سيف : انا مقلتش كدة بس الصبر مطلوب والنكد والخناق كل ساعه دة بيقصر العمر فاهمني
تنهد يونس بعدم ارتياح بينما اكمل سيف : عارف ان كلامي احتمال يضايقك بس انا وعدت مامتك اني هكلمك وكلام بين راجل والتاني راحتك فوق كل شئ ولو علي منصور الشهابي فمتقلقش احنا حبايب من زمان
نظر له يونس بحيرة بينما نهض سيف وربت علي كتفه وهتف بحنو ابوي : خد وقتك وحاول مرة واتنين اهم حاجه تكون مرتاح تصبح علي خير
يونس : تلاقي الخير
__________________
بالأعلي كانت الفتاتين تضعان احدي الماسكات علي وجههم استعدادا لليوم التالي اول ايام الجامعه ويتبادلون الحديث والمزاح
هايا : بس بجد انا عاوزة اعرف طريقه كيكه الطاسه دي عجباني اوي
نغم : يابنتي ماانتي كنتي واقفه الله
هايا : نسيت واصلا انتي بتعملي بسرعه بسرعه فلخبطيني استني هجيب نوت اكتب فيها علشان الدراسه بدأت وجوع اخر الليل وحش اوي 😂
نغم : اكتبي ياستي … في مقلايه عميقه مقاس ___
هايا مقاطعة : شيف شربيني انجز المقادير علي طول الماسك قرب ينشف عاوزة اغسل وشي
نغم : شوفي مهما تعملي هتفضل الخلقه هي هي
هايا : قمررز خلقتي قمررز انجزي
نغم : اكتبي ياقمررز انتي كوبايه دقيق و معلقه بودر و ٢معلقه كبيرة كاكاو وفانيلا و نص كوبايه لبن ومعلقه كبيرة زيت ( هعدل الوصفه لما اتأكد من المقادير علشان بصراحه نسيتها 😥)
هايا : تمام وقلب قلب قلب وارفع علي النار في الطاسه ونسوي علي نار هاديه ونغطي الطاسه
نغم : شطورة قومي بقي اغسلي وشك عما اسرح شعري وبعدها اغسل الماسك
دلفت هايا للمرحاض بينما بدات نغم بتمشيط خصلات شعرها لتتفاجئ بالمشط يتوقف في منتصف شعرها فامسكت به وهنا انقبض فؤادها فقد اصبحت أطراف شعرها جميعا ملتصقه ببعضها بصعوبه فصرخت مناديه لهايا التي هرولت نحوها سريعا
نغم : هايااااا
هايا : في اييييه
نغم ببكاء : شعري ..شعري بصي
هايا بشهقه : الله اكبر ايه دة !!
نغم : دة شايط ولازق في بعضه
هايا : انتي حطيتي عليه ايه دة
نغم : محتطش عليه النهاردة غير كريم للاطراف
هايا : اول مرة تحطي منه ؟
نغم ببكاء : لا بقالي فترة بستخدمه
هايا : ياستير يارب دة ذي مايكون ملزوق بغراء
نغم بقهرة : شعري اااه ياربي
بعد فترة من البكاء امسكت نغم بالمقص ودموعها تنسدل علي خديها بصمت وقصت الكثير والكثير من خصلات شعرها المتضررة وبداخلها ألم لا تعرفه سوي أنثي مثلها 💔 ثم بهدوء اتجهت للسرير وتصنعت النوم وبداخلها تعزم الانتقام ممن تيقنت انه الفاعل 🙏🏻🔥
هايا من خلفها : اكيد مش هو يانغم مش معقول هيعرف منين اصلا ان دة بتاعك مش بتاعي
نغم بأقتضاب : تصبحي علي خير
__________________________
دعوة حلوة من القلب علشان ضرس العقل مطلع نن عيني 💔😥
الفصل التالي: اضغط هنا
يتبع.. (رواية بنات المنشاوي الجزء الثالث) اضغط على اسم الرواية لتجد الفهرس كاملاً بجميع الفصول.