رواية بنات المنشاوي الجزء الثالث – الفصل الثاني
بارت ٢
بقلم خلود وائل 🌻
في منزل عاصم وورد كانو يجلسون سويا يتبادلون اطراف الحديث عن اليوم واحداثه
ورد:البت وحشتني اوي ياعاصم
عاصم بدهشه:جرالك ايه ياورد دي متجوزة مبقالهاش كام ساعه لحقت توحشك
ورد بأذعان:ايوة طبعا لحقت توحشني دى بنتي وحته من قلبي وبعدت عني انا بجد مش مصدقه اني هقعد في البيت من غير منال طول اليوم لا وكمان هتسافر اسبوع بحاله لدهب تقضي شهر العسل يعني هفضل اسبوع مشوفهاش
عاصم بقهقهه:ياحبيبه قلبي بنتنا كبرت وخلاص اتجوزت المفروض تفرحيلها وتدعيلها ربنا يسعدها هي وجوزها ونفرح بذريتهم الصالحه وبعدين انا روحت فين بقي والشيخ محمد كمان
ورد بأبتسامه: ربنا ميحرمني من وجودكو حواليا ابدا… ثم اردفت ببريق ارتكز بمقلتيها….هنبقي جد وتيته ياعاصم
امسك عاصم بكفي يديها بحنو ونظر بداخل عينيها بحب قائلا:هتبقي اصغر واحلي تيته في الدنيا ياقلب عاصم ربنا ما يحرمني منك ابدا ياوردتي
ورد بحب:هو انا قلتلك النهاردة اني بحبك؟!
عاصم بتصنع الحزن:ولا مرة والله
ورد وهي تدغدغ خدة بحنان:ياخلاثي دة انا وحشه خالص بقي
عاصم بأبتسامه: انتي ست الناس ياروحي
__________________________
في فيلا الحديدي وتحديدا في المطبخ دلفت نغم تتسلل علي اطراف قدميها وتقدمت ناحيه الطاوله الرخاميه التي تتوسط المطبخ دون ان ينتبه لها حمزة لتهتف بحدة وهي تجوب بناظريها فيما يفعل:حمزاااا
حمزة بفزع:بسم الله الرحمن الرحيم … ثم نظر اليها بغيظ مكملا:في ايه يازفته انتي مفيش سلام عليكم مفيش احم ولا دستور
نغم بسماجه:في كاتشب ومسطردة هاهاها
نظر لها بضيق ثم اكمل مايفعل بينما هتفت هي بتصنع البراءه:ميزو .. بقولك
حمزة:متقوليش
نغم:مخلاص بقي ياحج انت
نظر لها بطرف عينيه ثم اردف:اخلصي يانغم مش فايقلك
نغم:طب انا كنت عاوزة اشرب شاي
حمزة:متعملي لنفسك ولا اتشليتي ولا تكونيش عامله مكسوفه
نغم بغيظ:اعوذ بالله منك ياشيخ متعرفش تقول جمله عدله للأخر ابدا
ترك حمزة ما بيدة واعتدل ثم نظر اليها وهو يشير بسبابته للطاوله التي خلفها :الكاتيل هناك اهوة والعلبه ال جمبه البيضا دى فيها السكر وال جمبها فيها الشاي وكل المشروبات اسمائهم مكتوبه علي العلبه ولا انتي بصمجيه ومبتعرفيش انجلش
نغم بغرور:اققف معوج واتكلم عدل ياابن خالتي ال قدامك دى وبعون الله هتطلع الاولي علي المحافظه انت بس استني لما النتيجه تطلع
حمزة ساخرا:هأأو .. ايوة انشاء الله دى الشهادة هتيجي مزيته
نغم بعدم فهم:مزيته !!
حمزة وهو يومئ برأسه:ايوة مزيته من كتر الكحك ال هيبقي فيها
نغم وهي تضيق عينيها :بقي كدة طايب…
اتجهت نحو الطاوله لتقوم باعداد كوب من الشاي ثم اتجهت نحوة مرة أخري محمحمه:حمزة
حمزة وهو يتناول الطعام:اممم
نغم:معلش ممكن تجييلي مج من الرف ال هناك دة علشان انت نخله وانا قصيرة مش هطول
زفر بضيق وفرك كف يدة في وجهها قائلا:الله اكبر من عينك المدورة دى
اتجه نحو الجهه الاخري واحضر لها مرادها بينما عبثت هي سريعا بطعامه دون ان ينتبه لها ثم عاد اليها واعطاها الكوب
حمزة:خدي يختي
نغم:ميرسي
حمزة بتريقه:ميرسي!!! طب يختي وريني جمال خطوتك بقي وبالسلامه هويني
نغم وهي تطالعه بدهشه:والله اسلوبك دة بيثبتلي انك _____
حمزة. مقاطعا بملل:بيثبتلك اني سرسجي و تربيه ارصفه وعديم الزوق وجاهل بالتعامل مع الجنس الناعم .. ها حاجه تانيه
ابتسمت نغم لكلماته التي تفوة بها فهي جملتها التي دائما ما تلقيها علي مسامعه
حمزة بحدة:يلاااا عاوز اتعشي بروقان
نغم وهي تنصرف من امامه بهمس:دى خامس مرة تتعشي وياريت بيبان عليك
حمزة:بتقولي حاجه
نغم وهي تغادر المطبخ بأبتسامه ماكرة:بقول مطرح ميسري يمري ياحموزة
ابتسم لها بسماجه واكمل تناول طعامه بينما هرولت هي سريعا للأعلي واغلقت باب الغرفه بأحكام
هايا وهي تعتدل علي السرير:اتأخرتي كدة ليه
نغم:ولا حاجه
هايا:رديتي كرامتك ياستي ولا لسه
نغم بأبتسامه وهي تناولها كوب الشاي:لسه صاحبك بلع الطعم اما نستني ونشوف النتيجه
هايا:عملتي ايه يامجنونه
نغم:هتعرفي الوقتي اشربي الشاي دة ونامي او استني معايا
هايا:لا شاي ايه اشربيه انتي انا مبحبش الشاي اصلا
نغم:انا مبعرفش اشربه من غير نعناع
هايا : طب تصبحي علي خير وربنا يعينك علي عملتك ال عملتيها
نغم بتصنع الجمود:انا ولا يهمني منتي عرفاني
هايا:بس انتي متعرفيش حمزة لما بيقلب علي قد طيبته وخفه دمه بس قطه جمل وانتي غلبانه
نغم :بت نامي واسكتي انا ناقصه قلق
هايا:تصبحي علي خير
غفت هايا بينما ظلت نغم تجوب الغرفه ذهابا وايابا منتظرة رد من حمزة ولكن مرت ساعه بأكملها ليتسرب القلق بداخلها وهمست بتوتر:ليكون جراله حاجه ولا اوفر دوس ياخبر ابيض استر يارب
ارتدت حجابها وفتحت الباب ومضت بضع خطوات ثم اقتربت من غرفه حمزة فوجدت الباب مفتوح وصوت يونس بالداخل
يونس:ياابني اسمع الكلام كان زماني جبت الدكتور يطمن عليك ونعرف مالك
حمزة بتعب:انا كنت ذي الفل معرفش بطني اتقلبت وجسمي ساب كدة اذاي فجاه
يونس:طب جرب تنام وترتاح
حمزة بأرهاق:مش قادر كل دقيقه بدخل الحمام جري بطني بتوجعني اوي يايونس
يونس بحزن:طب انادي ماما ولا خالتو دعاء
حمزة:لا متقلقش حد الله يخليك …ااااه ااه يابطني
يونس:طب انت اكلت ايه وعمل فيك كدة
حمزة :انا عملت سندوتشين وكوبايه سحلب ذي كل مرة
يونس:يادي السحلب يابني ارحم نفسك تلاقيه هو ال عمل فيك كدة
حمزة وهو يضم بطنه بكلتا يديه بألم :لا… ااه ياني ….دي اكيد عين نغ_____ ابتلع باقي الكلمات وتذكر ابتسامتها الغير مببرة وهي تغادر ثم هتف بغيظ:اه يابنت المنشاوي
نغم وهي تدلف للغرفه:شبيك لبيك نغم قدام عنيك… احم السلام عليكم اذيك يا يونس
يونس:وعليكم السلام تعالي يانغم
حمزة وهو يحاول النهوض من علي السرير:اه يامؤذيه عملتي ايه في الأكل انطقي
نغم ببراءه: انا!!! حرام عليك انا اعمل كدة لا اله إلا الله
حمزة بحدة وتعب: اطلعي من دول يانغم وانطقي حطيتي ايه في الاكل
يونس وهو يحول بينهم:براحه ياحمزة انت تعبان مش كدة
حمزة:هي ال عملت فيا كدة
نغم:اخص عليك بتتبلي عليا يرضيك كدة يايونس
يونس:لا ميرضنيش عيب كدة ياحمزة
حمزة وهو يحاول تخطي يونس:عيب.. هو انتي لسه شفتي عيب . ثم اكمل بتألم :والله لندمك يانغم استني بس عليا
يونس:بس بقي ياحمزة
نغم:ال تطوله اعمله ياموزة .. ثم اخرجت طرف لسانها بعناد دون ان يراها يونس
حمزة بغيظ:ياعم سيبني شوف بتعملي اذاي البت دى سوابق انا ال عارفها
يونس :يابني عيب كدة
دلفت نغم لخارج الغرفه وهي تبتسم بنصر بينما تبعها حمزة وهو يصيح:استني هنا ياشر والله مهسيبك استني عليا ليكي روقه يانغم
نغم دون ان تلتفت له:هات اخرك يابن الحديدي
دلفت للغرفه وصفعت الباب خلفها وهو يتبعها مهرولا ليصتدم بجبهته في الباب ويتألم بشدة ويهوي للخلف قليلا
يونس بقهقهه وهو يقف امام باب غرفته:اجمد يابطل هتضحك الناس علينا
شعر حمزة برغبته الملحه لدخوله المرحاض والألم يعتصر بطنه فهرول سريعا عائدا لغرفته وهو يزمجر:والله لمزعلك يانغم وانتي ال جبتيه لنفسك
يونس وهو يصفع كف بالأخر بتعجب ويقهقه : هي وصلت لبنت المنشاوي وابن الحديدي دة انتو ايامكو طويله
حمزة بتوعد وهو يلقي بجسدة علي السرير:ااااه اه ياني ااااه والله مهرحمك يانغم انتي جيتي تحت درسي وهفرمك استني بس عليا اااه
انهي جملته وعاد سريعا للمرحاض حيث امضي الليله لتشرق شمس الصباح وتجتمع العائله علي مائدة الافطار قبل عودتهم للبلدة
هايا بهمس:بت انتي عملتي فيه ايه صابح وشه اصفر كدة
نغم بأبتسامه:حبه زيت خروع صغننين خالث مالث قامو بالواجب وزيادة
هايا بدهشه:نهارك ابيض … وهو عرف انك ال ورا العمله دي !!
نغم :ايون
هايا:امممم استني بقي يابيضه ال هيعمله فيكي دة انتي جيتي عند ال مبيرحمش
نغم:ولا هيلحق يعمل حاجه انا هطلع اجهز شنطتي واغير هدومي علشان نمشي ابقي وريني هيعمل ايه
علي الجهه الاخري من المائدة كان يرمقها بنظرات ناريه تحمل في طياتها الغيظ والتوعد بالانتقام من فعلتها بينما هي تجاهلتها بغرور وتشفي وصعدت للأعلي بينما هتف هو :انا طالع برة اجهز العربيات يابابا
سيف:ماشي ياحبيبي خد أنس معاك
أنس: يلا ياغالي
حمزة:حبيب الغالي بالله انت ال فيهم ياأنوس
بالاعلي******
نغم:اوووف راحت فين ياربي
هايا بتعجب:مالك يابنتي
نغم:كانت اهنيه
هايا:هي ايه دي؟!
نغم: الطرحه بتاعه فستان فرح منال انا حطاها اهنيه بيدي من امبارح
هايا :كانت فعلا هنا قبل ماننزل للفطار انا شيفاها
نغم:ياربي اكدة هتأخر عاد
هايا:رجعتي تتكلمي صعيدي ايوة بقي للأصل نعود
نغم:هايا الله يخليكي اسكتي دلوك ودوري معايا ع چذمتي كانت اهنيه هي كمان
هايا:دى كمان. مش لقياها !!
بحثت نغم في اركان الغرفه لتقع بنظرها علي الحذاء الخاص بها (هيلز) وبجواره الطرحه ملقاه ارضا
نغم بفرحه:لقيتهم
هايا :طب الحمدلله انا قلت بردو ايه الحرامي ال جه سرق الطرحه والجزمه بس دة
امسكت نغم بالطرحه وقامت بطيها لتشهق بقوة
هايا بدهشه:ايه مالك يابنتي فيها دبوس !!
امسكت نغم الطرحه وهي تنظر لها بقهرة علي منظرها فقد اصبحت قماشه باليه مليئه بالقصات والفتحات العجيبه والخيوط المنسدله منها بجميع اتجهاتها بينما رفعت هايا حاجبيها قائله:اوبا الحرب الباردة ابتدت
نغم بغيظ:حمزااااااه
جلست علي الاريكه ترتدي حذائها وعلامات وجهها لا تنذر بالخير لتهم بالوقوف وتلتوي ساقها سريعا وتسقط رغما عنها بينما تسارع هايا بأمساكها وتسقط برفقتها
كلتاهما:اااااه
اعتدلت نغم في جلستها علي الارض وخلعت حذائها بتعب بينما حاولت هايا النهوض والجلوس على الاريكه مرة أخرى لتستعيد توازنها بينما تفحص نغم الحذاء بتمعن
هايا بسخريه:انتي لو بتتعلمي المشي مش هتقعي الوقعه دى
رفعت نغم الحذاء لمستوي بصر هايا والقته امامها ونهضت من مجلسها تهندم هيئتها بشر مستطر
هايا : الكعبين مكسورين بفعل فاعل امممم وانا عارفه مين الفاعل
نغم بشر:هيبقي مفعول به الوقتي
هايا وهي تمسك بها بتروي:اهدي بس كدة وطولي بالك انتي ال بداتي وانا حذرتك من الاول
نغم:عوزاني افضل قاعدة ومشغله علي قلبي مراوح وهو عمال يعاكس في البنات الرايحين والجايين قدامه
هايا:ياكتكوت ياصغنن متبقاش حمقي كدة وخلقك ضيق
نغم:اوعي ياهايا متنرفزنيش
هايا:ياحبيبه قلبي اعقلي نفسي تفهمي ان طول ماانتي بتعامليه ذي القط والفار كدة هو عمرة مهياخد باله منك وهيفضل شايفك بنت خالته العيله الصغيرة ال بتمسك في خناقه كل ماتشوفه
نغم:امسك في خناقه بس!! دة انا هقتله انتي عارفه الطرحه دي بكام ولا الجزمه دى انا قعدت قد ايه اقنع في خالتك انها تخليني البسها !!
هايا:كعبها اوڤر اوي اصلا
نغم:علشان اطول اخوكي يختي اوعي من وشي
هبطت نغم درجات السلم وتبعتها هايا ثم انضمو للعائله وهم يودعون بعضهم امام البوابه الداخليه
آيه:طب مش كنتو تستنو نطمن علي منال اول وتسافرو مرة واحدة
فارس:ربنا يسعدها يارب وتعيش وتتهني هي وچوزها لما يرچعو من سبوع العسل هنيچي طوالي ونباركلهم ونهنيهم
سيف:تأنس وتنور في اي وقت يافارس
فارس:تسلم يخوي
دعاء:اعملو حسابكم لما نتيچه نغم تبان كلياتكم لازمن تنورونا في القصر سبوع بحاله
آيه:انشاء الله ربنا يطمنا عليها
نغم بهمس لريان:ريان.. بقولك مشفتش حمزة ؟
ريان :واقف برة عيمسح ازاز العربيه هناك اهه عوزاة بحاچه؟
نغم:لاه .. اني بس بسأل اكمني مشيفاهوشي واصل
نظرت نغم بأتجاهه فوجدته يمسك بقطعه من طرحتها التي قام بأفسادها ويمسح بها زجاج السيارة وهو يطالعها بنظرات ناريه لتزفر هي بتوعد .
دعاء:يلا ياحبايبي نشوفكو تاني بالسلامه
نغم:دقيقه واحدة يما نسيت تلفوني فوق هچيبه وارجع علي طول
دعاء:ماشي ياحبيبتي متتأخريش ابوكي عيستني برة
صعدت نغم للأعلي ودلفت لغرفه حمزة وغابت لدقائق ثم عادت لهم مرة أخري وعلي وجهها ابتسامتها الماكرة ثم انضمت لعائلتها واتجهت نحو السيارة لتقف بمحاذاته قائله:الطرحه ال انت دمرتها دي من ايما ب٥٠٠ جنيه و كانت اول لبسه ولونها صعب الاقيه تاني بس ولا يهمك حقي هاخدة وانت ال جبته لنفسك ياحمزة
حمزة وهو يهندم ياقه قميصه بدون اهتمام لكلماتها:صياحك طرب
نظرت له بأختناق ودلفت لداخل السيارة بغيظ طفولي وشبح الدموع يخيم علي مقلتيها لتمر الدقائق وتنطلق السيارات بطريق العودة لقصر المنشاوي…. اما علي الجانب الأخر استيقظت منال بنشاط وهبطت من فراشها دون ان توقظ عريسها وامضت فترة لا بأس بها إلي ان تململ عز بفراشه يبحث عنها ثم اعتدل في جلسته وهو يناديها بصوت ناعس
عز:ميموو…. منوله…. قلبي
دلفت منال لداخل الغرفه وهي تمسك بيدها وردة حمراء اللون واتجهت نحوة بخطوات ناعمه وهي ترتدي فستان قطنيا ذو طابع هادئ وجلست بقربه بحنو ممزوج بالخجل
عز:أحلي صباح في الدنيا دة ولا ايه
ناولته الوردة وهي تهتف:صباح الورد الچوري علي عيونك
عز وهو يمسك الوردة وكف يدها بحنو:انا عاوز من دة كل يوم مليش دعوة
منال :مش فاهمه !
عز:عاوز اصحي كل يوم علي الابتسامه الحلوة دى والورد دة والجو الحلو اوي ال انا عايشه دلوقتي ممكن
منال بأبتسامه:طب متخليك طماع وتطلب فطار في السرير بالمرة
عز:ياريت والله وبالمرة تلبسي الروب ال كله ريش دة ذي مابشوف في الافلام عشان تبقي اللقطه اكتملت
منال وهي تقضب حاجبيها:ريش!! انت شايفني فرخه ياعز بقي انا مس منال صقر علي اخر الزمن البس ريش
عز بدلال يخصها به:منوله قلبي دي أحلي وأشطر كتكوت
منال بأذعان:لا دة كلامي انا ل عمر ابن اخوك في الحضانه جاي انت تقولهولي وانا عروسه
عز :مهو أسلوبك الحلو ودلعك لكل طفل في الحضانه ومن بينهم عمر هو ال شدني ليكي يامنال أنتي كتله من الحنيه دخلتي حياتي خليتي ليها طعم جديد بتمني افضل عايش فيه لأخر عمري
منال بمرح:بس بقي اصل بتكثف
عز :دة بجد والله طب استني اتأكد كدة
اقترب منها بضع سنتيمترات بينما ارتفعت طرقات الباب لتقطع خلوتهم طرقات الباب
عز :يووووة هو دة مين دة ال جاي في الوقت دة اما صحيح مفيش دم ولا نظر
منال :اوعا دة اكيد بابا
عز بتهكم:بابا ! ودة وقته دى صباحيتي ياناس اعمل ايه بس علشان اققعد معاكي علي راحتي اخطفك
منال وهي تهندم هيئتها :تخطفني اذاي يامجنون وانا مراتك
هبط عز من السرير واتجهه نحوها ليهمس لها:قمر منور سمايا
منال بخجل:عز بقي عيب كدة
عز: بحبك والله
الباب:⚡⚡⚡
عز:يوووة جاي جاي يلي بتخبط اوف
اتجه عز نحو الباب ليفتحه وماكان الطارق سوي ورد وعاصم
عز بغيظ مكتوم:صباح الخير يا عمي اذيك ياطنط اتفضلو
ورد بحرج:معلش ياحبيبي صحيناك من النوم
عز:لا ابدا ولا يهمك اتفضلو
دلفو للداخل برفقه عز وجلسو في الصالون وانضمت لهم منال وأمضو سويا بضع دقائق وانصرفو بعدما اطمئنو عليهم …
منال بتريقه:حبيبي ياعم عاصم بحبك يا عم عاصم … مش دة عم عاصم ال كان رخم ومفيش دم ولا نظر
عز وهو يحك مؤخرة راسه:كله يهون علشانك ياقمر وبعدين هو أنا عندي كام عم عاصم يعني
منال :ايوة جر ناعم
عز : دة انتي النواعم كلها ياقلبي تعالي نجهز الشنط يلا
منال بأبتسامه:يلا
_____________________
في منزل هناء ارتفعت طرقات الباب ⚡⚡⚡لتدلف من المطبخ متجهه نحو الباب وتفتحه لتجد الطارق يوسف
هناء بحبور:يوسف… تعالي اتفضل ياحبيبي حماتك ال هيا انا بتحبك
يوسف ببشاشه:ما دي حاجه مفروغ منها ياطنط
هناء:دقايق و خالك زياد يرجع من الشغل ونتغدي كلنا سوا
يوسف وهو يدلف للداخل :لا ياطنط انا كلمت خالو واستأذنت منه أني اخد فيروز ونتغدي برة النهاردة سوا
هناء:ومالو ياحبييي ربنا يحلي ايامكو
يوسف وهو يبحث عنها بمقلتيه:أمال هي فين ؟
هناء:جوة في اوضتها ثواني هناديلها
يوسف:براحتك ياطنط
طرقت هناء باب غرفه ابنتها ودلفت للداخل تهتف بأسمها
هناء: فيروز… فيروز
فيروز وهي تغلق الكتاب من بين يديها وتخلع نظارتها : ايوة ياماما
هناء :البسي وتعالي قابلي يوسف قاعد برة مستنيكي
اشاحت فيروز بوجهها للناحيه الأخري وملامح الضيق تكسو وجهها بينما دلفت هناء لداخل الغرفه واغلقت خلفها الباب
هناء:بقي اسمعي اما اققولك يافيروز انا شايفه اسلوبك الهباب مع يوسف من زمان وساكته واققول بكرة تعقل لكن لابكرة دة بيجي ولا انتي بتعقلي
فيروز بأختناق:مبحبهوش هو بالعافيه ياماما
هناء:ايوة بالعافيه طالما مش عاوزة تفتحي وتشوفي مصلحتك
فيروز وهي تنهض من مجلسها وتتجه نحو والدتها لتقف بمحاذاتها:ياماما الله يخليكي علشان خاطري اطلعي قوليله اني نايمه انا بجد بزعل من نفسي لما بتعامل معاه بجفا بس والله مش قادرة بجد بقالي سنه بحالها بحاول اني احبه بس مش عارفه قلبي مدقش ليه وولا مرة بحس أنه وحشني مهما غاب عني مش دة الانسان ال ممكن اقضي معاه بقيه حياتي مستحيل
هناء:بطلي كلام الافلام والروايات ال لحس عقلك دة أنتي كبرتي يافيروز وواعيه كفايه لأنك تفهمي ان يوسف ميتعيبش وفوق كدة بيحبك وشاريكي وعلي رأي المثل خد ال يحبك يدلعك ولا تاخد ال تحبه يلوعك
فيروز بقله حيله:بجد مش عارفه أنا ال بنتك ولا هو ال ابنك
هناء بحنو:ياحبيبه قلبي انا عاوزة راحتك و يوسف ابن حلال ويستاهل انك تحبيه ومن خبرتي في الحياه صدقيني هو دة الإنسان ال هيصونك طب دة حتي جاي مخصوص ومفضي نفسه علشان تتغدو سوا برا شفتي عاوز يفرحك اذاي
فيروز بأختناق:نعم!!
الفصل التالي: اضغط هنا
يتبع.. (رواية بنات المنشاوي الجزء الثالث) اضغط على اسم الرواية لتجد الفهرس كاملاً بجميع الفصول.