رواية الاعمى – الفصل الثالث
البارت الثالث(كل عيد سعيد وانت طيب يا حبى الاعمى)
الفصل الثالث
مطار القاهرة
يقف مروان و منير و ماجى أمام عربية مروان ويقوم السائق بحمل الشنط داخل العربية
ماجى …تنظر لمروان : حمدا لله على سلامتك يا مروان
مروان : الله يسلمك
يدخلون العربية كان يجلس مروان وماجى بالخلف ومنير بجوار السائق و أثناء سير العربية
منير (يلتف وجهه للخلف إلى مروان ) : مروان .. مروان… أنت يابنى سرحان فى إيه؟
مروان : نعم
منير : مالك
ماجى ( بلا مبالاة ) : منير سيبه هو أصلا من بعد الحادثة مبقاش بيتكلم مع حد
ينظر مروان من نافذة السيارة كأنه مش سامع حديثهم
شقه نور 6 م
البلكونه .. أميرة و نور يسكنون فى نفس العمارة وحمزة وياسر أيضا اميره ونور يجلسون على مروجيه فى البلكونة بجوار بعضهم وتقوم أميرة بكتابة مذكراتها ؛ نعم فهى تكتبها من زمان تدون بها كل شئ حدث معها وكل شئ عن أحلامها
نور : ميرو
أميرة : عايزة إيه يابت
نور : أنتى جاية عشان تفضلى تكتبى في مذكراتك هنا؟!!!
أميرة : اطلع يعنى؟
نور : لا انتى بتصدقى ؛ حمزة زعلان منى
أميرة : أقسم بالله حقه
نور : ليه يعنى؟!!
أميرة : بقى الواد يقولك امتي هناخد خطوة فى موضوعنا تروحى مغنياله خطو يا صاحب الخطوة
نور : ههههههه كنت بهزر معاه بعدين ما الحيوان بعدها عملى بلوك ملحقتش أكمل الأغنية
أميرة : هى دى مشكلتك ؟!.. هو عملك بلوك واتس بس صح؟
نور : اه شفتى
أميرة : الحمد الله إنه مش عملك بلوك من الحياة يابت بلاش برود
نور : مش برود بس فعلا مش عايزة أتجوز دلوقتى بعدين سيبك منى أنا بعرف أصالحه…. الكراش بتاعك
أميرة : ماله
نور : رجع من السفر ؛ ياسر حكالى
أميرة : عارفة (ثم تنظر إليها بحزن ) وحشنى اوى
فيلا مروان 12م
عند دخول مروان وماجى ومنير إلى داخل الفيلا كان كل الخدم يقفوا لاستقبال مروان والترحيب به
ماجى (بعجرفة ) : يلا خلاص هى صورة كله على شغله ؛ عوض طلع الشنط فوق مروان أنا خارجه عايزة أروح المعرض اللى بقالى سنة معرفش عنه حاجة ده
مروان … ينظر لها دون تحدث ثم تخرج ماجى الى الخارج
منير : بص بقى أنا كلمت الناس وحضروا لك الأوضة اللى تحت وجهزناها لك تمام
مروان : شكرا يا منير تعبتك معايا الفترة اللى فاتت و أخدتك من ولادك وبيتك ومراتك
منير : عيب الكلام ده أنت أخويا ..بعدين أنت ليه بتعمل كده فى نفسك
مروان : بعمل إيه؟!
منير : ساكت مش بتقابل حد سجاير وقهوة على طول إن شاء الله العملية الجاية هتنجح
مروان( بصوت حزين ويأس) : تنجح ؟! عملت اربع عمليات كلهم فشلوا لسه بتقول اجرب تانى؟ لا خلاص أنا ولا عايز أعمل عمليات ولا عايز حاجة ؛ ممكن تسيبونى فى حالى بقى؟
منير : أنا مش مصدق بقى الدكتور مروان عزت اللى بيعطى الناس طاقة إيجابية وحب الحياة يبقى يائس كده؟!!!!
مروان (مش عجبه الكلام ): منير اطلع بره .. روح روح شوف عيالك
منير : امممم مفيش فايدة بقالى سنة بحاول معاك وأنت بردو مفيش فايدة فيك أنا ماشى سلام … أقفلك االنور؟
مروان (بسخرية) .: هى هتفرق؟!!!
(ثم يخرج منير)
♥️____ليلةعادل____ ❤️
الجاليرى 8 م
تجلس ماجى على كرسي مكتبها ثم يظهر ساق شخص ما تسير داخل الجاليري ببطء ! ثم يظهر الشاب مرة أخرى من ظهره فقط فمن هو ؟
الشاب (بصوت غير واضح ) : حمدا لله على سلامتك يا غالية
ماجى (.بنظرات إغراء) : وحشتك؟
الشاب :يعنى مش عارفة ؟!
ماجى (تمسك ايده وتشدها نحوها ) : طب تعالى بقى ورينى وحشتك قد إيه
(بعد مرور أيام)
فيلا مروان 11م
مروان جالس سرحان فى غرفته فى الدور الأرضي المطلة على المسبح والحديقة يدخل عليه عوض يطرق الباب ويدخل
عوض : مروان أنا عوض
مروان : (بنرفزة) على فكرة أنا والله مش محتاج كل شوية حد يدخل عليا يقولى هو مين أنا ببقى عارف
عوض : أنا آسف يابنى مقصدش
مروان (بهدوء ) : أنا اللى آسف حقك عليا يا عم عوض فى حاجة ؟
عوض : لا بس كنت عايز أسألك لو محتاج حاجة عشان فاطمة نامت والمدام لسه مجتش
مروان : لا شكرا ادخل أنت نام تصبح على خير
وبالطبع مر أكثر من شهر على رجوع مروان من السفر بعد أن فقد بصره – لكن مروان كان يائس محبط عصبى جدا على غير عادته الطبيعية الهادئة المبتسمة دائما ومحبته للحياة فقد تغير كل شى ف ماجى اصبحت أسوأ من قبل بكثير فاليوم سيكون عيد ميلاد مروان لكن لا أحد يتذكره ولا ماجى
فيلا مروان 10 ص
مروان يجلس على الكرسى الهزاز أمام الباب الزجاجى المطل على حمام السباحة
(الخادمة تطرق الباب)
مروان : اتفضل
الخادمة : دكتور جات لك العلبة دى
مروان (بابتسامة ولهفة) : طب حطيها هنا ؛ بقولك منير جه؟
الخادمة : أيوه يا دكتور و جاي ورايا
منير (يقترب منه وباهتمام ) : سامحنى أتأخرت عليك يا حبيبى بس أنت عارف الزحمة
مروان : ولا يهمك تعالى افتح شوف إيه ده
منير : هتكون إيه يعنى أكيد علبة كل سنة ؛ هى بتنسى ؟!
مروان (باهتمام وحزن) : عارف دى الإنسانة الوحيدة اللى لسه فاكرانى ؛ بقولك ما تحاول تعرف مين دى
منير : سهلة .. يفتح منير العلبة مع نظرات إعجاب وانبهار من الهدية.
اوباااااا يا سيدى يا سيدى جيبالك نظارة غالية
مروان : (بشغف) كتبه ايه على الكارت؟
منير : اه كاتبة نفس الأغنية بس كاتبة حاجة تانى
مروان : ايه؟
منير ( ينظر إلى الكارت ويبدو عليه أنه مستاء جدا من الكلام المكتوب ) : أنت مش …
مروان : أنا مش ايه؟
منير (بعصبية ) : دى قليلة الذوق والأدب أنا هعرف شغلى معاها وهوصلها
مروان : منير متعليش صوتك متتعصبش بالله عليك فى ايه؟
منير : معلش بس مستفزة
مروان :كاتبة إيه؟
منير (وهو متردد ) : انك مش محتاج تلبس نظارة أنت فعلا لابسها كل سنه و أنت طيب يا حبى الأعمى
مروان ( بصوت حزين) : هات الكارت و حط العلبة مع الباقى
منير : انت مش مضايق؟!!!
مروان : هتضايق ليه ؟
منير : مش شايف قلة الادب؟!!
مروان : لا يا حبيبى أنت فاهم غلط هى متقصدش إنى مش بشوف و أعمى البصر هى تقصد إنى لابس نظارة عن اللى حوليا ومش شايف الحقيقة مش شايف حبها ليا وأنها قريبة منى , حد جنبى يعنى أعرفه كويس بس مش شايفه
منير : يااااه ؛ كل ده من الجملة دى
مروان : شفت بقى منير حاول تعرف دى مين من فضلك
منير : حاضر
فى هذة الفترة ماجى كانت تتعامل مع مروان بشكل سئ جدا و انقطعت العلاقة الزوجية بينهم هل بسبب الشاب أم بسبب قلة شهرته وعماه ؟
♥️_________بقلمي_ليلةعادل__________❤️
فيلا مروان 3م
مروان كعادته يجلس فى حديقة الفيلا ثم يسمع صرخات يذهب إلى الداخل ليعرف ماذا يحدث وعند دخوله يتفاجأ بماجى تتشاجر مع فاطمة
ماجى (بعصبية ) : يعنى نشغلك عندنا ونديكى مرتب عمرك ما تحلمى بيه وفي الآخر تسرقينا وياترة سرقتي كام مرة؟
مروان (باستغراب ) : فى ايه ؟!!
دادة : الحقنى يا مروان شوف مراتك بتعمل ايه
ماجى : اسمها مدام ماجى ست هانم و لا أنتي نسيتي نفسك؟
مروان ( بنرفزة ) بس بس فى ايه؟
ماجى : الست اللى حضرتك قال إيه بتقولها يا ماما حرامية بنت ك …..
مروان : (يقطعها بحسم و غضب ) : ماجى بس
ماجى : بس ؟ بتقولى أنا بس خايف على إحساسها وأنا طظ
مروان (بنرفزة) : بس زعيق محبش الصوت العالى ولا العصبية فهمينى براحة
ماجى : الست دى
مروان (بقوه وحسم) : قولت صوتك يوطى
ماجى : بص بقى مرة خاتم ألماظ يضيع أقول يمكن نسيته فى مكان ؛ مرة 10 آلاف جنيه يختفوا أقول يمكن صرفتهم وأنا ناسية وحاجات تختفى أقول لا لا مافيش حاجة من اللى فى دماغك, لكن لوحة رسماها بقالى 6 شهور طالع عينى فيها وتيجى الست دى توقع عليها القهوة و أزعق لها ترد عليا ,لا و كمان ألقى الأسورة الألماظ فى الأوضة بتاعتها
مروان (بستغراب) : ايه اللى انتى بتقولى ده ؟!!
مروان : ماما فاطمة فهمينى
دادة ( وهى تبكى) : والله ما أععرف ولا وقعت حاجة
ماجى : يعنى أنا بكدب طب اطلعى بره أنتى وجوزك مش عايزة أشوف وشكو تانى
مروان : بس بقى مفيش كلام من ده اللى ضاع هرجعهولك أكيد فى حاجه غلط أكيد كنتى شاربة ما أنتى مقضية حياتك شرب وسهر
ماجى (بسخرية) : والله !! ؛ يعنى أنا لقيت حاجة اعملها غير كده وقولت لا… أنا حاسة إنى متجوزة مع إيقاف التنفيذ أصلا
مروان : تقصدى إيه بكلامك ده
ماجى : ولا حاجة , بقولك إيه أنا بقى ست شريرة معايا شهادة من إبليس و بكدب يانا يا هما ؛ لما تفكر ابقى رد عليا سلام
(تخرج ماجي من باب الفيلا إلى الخارج )
مروان : ماما فاطمه بجد أنا آسف
دادة (تبكى) : بص يابنى بعد اللي حصل ده مينفعش نعيش هنا
مروان : حقك عليا ؛ عم عوض متزعلش
عوض : مروان احنا من وقت الجوازة دى و احنا بنتهان بس مكناش بنحب نقولك بنخاف نخرب البيت بس توصل للسرقة خلاص يابنى
مروان : الكلام ده مش هيحصل أنا هرجع لماجى اللى ضاع هى أكيد متضايقة من حاجة
عوض (بحسم ) : مروان لو سمحت كفاية اوى لحد كده ، المرة الجاية هتجيب لنا البوليس
مروان (بقلق ) : ماما فاطمة قولى حاجة
دادة : ده الحل الصح احنا كده هنكون مرتاحين
مروان : هتسيبونى لوحدى فى أكتر وقت أنا محتاج لكم فيه؟ بالسهولة دى بتتخلو عنى ؟!!
عوض : مروان متزعلش يابنى بس حط نفسك مكاننا
مروان : وانا اعتذرت لكم وهجيب لكم حقكم بس استنوا عليا
عوض : ده قرار مش هنرجع فيه
دادة : هنجيلك من وقت للتانى
مروان : يشعر بحزن عميق وإن الكل أصبح يتخلى عنه …. طب براحتكم . عن إذنكم
♥️____ليلةعادل____ ❤️
بعد كام أسبوع من مشكلة الدادة اتغيرت ماجى 180 درجة أصبحت تتعامل مع مروان مثل أول الزواج وفترة الخطوبة لكن مروان كان لا يبادلها أى شئ لكن لماذا هذه التغير المفاجئ ؟! 🤔
– فيلا مروان الساعة 5 م
داخل غرفة النوم مروان يجلس فى غرفته يستمع الى أحد أغانى عبد الحليم ثم تدخل ماجى إلى الغرفة وهى سعيدة جدا ثم تجلس على طرف كرسى مروان وتحوط ايدها على رقبته !!!
ماجى : حبيبى حبيبى وحشتنى
مروان : ايه الرضا ده كله
ماجى : بتعمل ايه ؟
مروان : ولا حاجه بسمع عبد الحليم
ماجى (تتصنت للاستماع وبعد دقايق قليلة ) : يا سلام الله سامع الكلام الحلو
مروان : كنتى عايزة حاجة ؟
ماجى : اه كنت هقولك إن هادي هيرجع من السفر كمان شهر
مروان (بسعادة) : بجد حمدا لله على سلامته مقدما.,. بس هو انتو مش متخانقين أنا فاكر إنك حكيتيلى كده ؟
ماجى : اه ما احنا اتصالحنا خلاص أنت عارف إنه أخويا الوحيد
مروان : أنا ياما قولتلك اتصالحوا ملكمش غير بعض
ماجى : أهو سمعت كلامك
مروان : طب هتجهزي له أنهى أوضه أنا عارف إنه أخوكى من الأب و مامتك هترفض تستقبله
ماجى : لا ده هيقعد فى فندق و بعدين فأي مكان بقى هبقى أشوفه
مروان : لا طبعا عيب يجى ينور هنا المكان كبير
ماجى : ربنا يخليك ليا يا حبيبى
– فيلا مروان الساعه 6 م
يقوم مروان باستقبال هادي بعد عودة من السفر فهو كان مسافر منذ 15 عام
هول الفيلا
يقف مروان فى هول الفيلا بابتسامة و اهتمام ثم يدخل هادي وماجي
(هادى)
هادى من أهم شخصيات روايتنا شاب فى منتصف العشرينات قمحاوى لون عيونه سودا و شعره اسود طويل القامة
ماجى : معلش أتأخرنا عليك أنت عارف الإجراءات
مروان : لا ولا يهمك حمدا لله على السلامة يا هادى
هادى : الله يسلمك يا دكتور بجد شكرا إن حضرتك بتستقبلنى فى بيتك
مروان : دكتور وشكرا وحضرتك بلاش الكلام ده أنت أخويا الصغير قول لى مروان ..نورت بيتك
هادى : شكرا
( ثم يصافحان بعض .. بعد مرور كام شهر )
مركز مروان عزت
داخل أحد الممرات كان ييقف منير يتحدث مع شخص ويقلب فى الأوراق ثم تدخل عليه أميرة
أميرة : ( بابتسامة ) أستاذ منير
منير : (ينظر لها بابتسامة و اهتمام ) : ازيك
أميرة : الحمد الله ؛ إيه ده حضرتك فاكرنى ؟!!
منير : طبعا هو أنتى تتنسى ؟
أميرة : ههههه طب كويس ممكن بقى طلب صغير ؟
منير (يمزحها) : أنتى تاااانى ؟ ها الخناقة المرة دى هتكون فين ؟
أميرة : هههههههههه فى بيت الدكتور بص أنا و أصحابي كنا عايزين نقابل دكتور مروان يعنى من وقت ما رجع من السفر من أكتر من 6 شهور ما شفناهوش
منير ( بضيق ) : والله ياريت بس للأسف مروان ولا بيخرج ولا بيشوف حد
أميرة (بحزن ) : ليه يعنى ؟
منير : يعنى نفسيته صفر ويائس خصوصا بعد ما رجع من السفر وعرف إن البرنامج اتوقف والعقد اتلغي والناس شبه نسيته
أميرة .(بحزن) : ليه يعنى هما يطولوا إن دكتور مروان عزت يروح لهم والله معندهمش دم بعدين مين اللى قال نسيناه أنا عمرى مقدر أنساه
منير : اها كان نفسى أساعدك
أميرة (بحماس ) : طب بص عندى فكرة ماتقولوش حاجة و نعملها مفاجأة ها ؟
منير : مممم عجبنى حماسك بس…
أميرة (بجنان ) : ولا بس ولا حاجة هى ربع ساعة وهنمشى قولت بقى هنيجى الساعه 11 ماشى ؟!! يلا سلام باى باى باى
تتركه وترحل يقف منير يضحك على جنان أميرة
منير : هههههه ايه البت دى ؟! يارب بس يا مروان ربنا يهديك ما تعملش أى حاجة مجنونة
♥️____ليلةعادل____ ❤️
– فيلا مروان 11 ص
صباح تانى يوم فى حديقة فيلا أميرة معاها أصدقائها نور وحمزة وياسر ونهلة يجلسون على أحد الترابيزات منتظرين مروان يبدو على ملامحهم الزهق
ياسر : بقالنا نص ساعة محدش جاب لنا حتى مياه 😤
حمزة : تقريبا صايمين
أميرة (بنرفزة ) : ما تخف أنت وهو انتو جايين تملوا كرشكم
نهلة : ههههه بتجيبو الكلام لنفسكم
(يدخل منير عليهم)
منير : ازيكم يا شباب
أميرة ( تقف بلهفة ) : الحمد الله هو الدكتور فين ؟
منير : نازل بس انتو جيتو فجأة ها زى ما اتفقنا
حمزة : مفهوم معلش ممكن كوباية مياه أصل حاسس إنى بتعذب عذاب الكفار
منير : واضح إن الشلة كلها فكة حاضر يابني
بعد قليل يدخل مروان عليهم وعندما يشاهدوه يقفوا لاستقباله باهتمام
كلهم : ازيك يا دكتور
نهلة : حمدا لله على سلامتك يا دكتور
نور : والله كلنا زعلنا
مروان : (بقله ذوق و حدة ) : انتو مين؟!!
أميرة : ازيك يا دكتور أنا أميرة كنت طالبة عندك جيت أنا وأصحابي عشان نسلم عليك
مروان (بقلة ذوق) : اها أنا كويس حاجة تانى ؟
أميرة (باستغراب ) : نعم!!
مروان : أنا عندى مواعيد عن إذنكم ياريت بعد كده محدش ييجى من غير ميعاد
( يتركهم ويغادر )
حمزة (بغضب ) : ايه ده بدل ما يحمد ربنا إن فى حد بيعبره
نهلة معرفش يابنى ده ماشوه من كل حاجة حتى الصفحة بتاعته الفانز قل منها ولا بقى حد فاكره أساسا وبيتنك على إيه ده ؟
أميرة (تزعق ) : بس بقى عيب هو أكيد متضايق
حمزة (بعصبية ) : بقولك إيه يا سندريلا ده طردنا عايزه تقعدي هنا , تيجى تانى مع نفسك احنا عندنا كرامة يلا بينا
نور ( بعقل ) : أميرة يلا مش هيقابلنا يلا
أميرة : (يبدو على ملامحها الحزن ) : ماشى
وعند سيرهم للخروج كانت أميرة تنظر إلى الخلف فى نفس الوقت كان مروان يقف خلف زجاج الشباك فى غرفته ينظر إليهم ثم يدخل منير على مروان و هو ينظر من الزجاج
منير (باستغراب تام ) إيه اللى أنت عملته ده ؟!!
مروان ( يلتفت له بانفعال ) عملت إيه ؟ أنت ازاى أصلا تدي ميعاد من غير ما أعرف وتستأذني ؟!
منير : أنا ماكنتش عارف إن فى حد جاى
مروان : منير أنا مش عيل معاك عشان تحطنى قدام الأمر الواقع أنت اتصرفت من دماغك يبقى اتحمل نتيجه أخطائك
منير : (بقوة ) أنت بقيت غريب أنت بتعمل فى نفسك ليه كده يابنى فوق أنت بتخسر كل حاجة
مروان : منير أعتقد أنا مش محتاج حد يبقى واصى عليا أنت غلطت لو مش هتعمل شغلك صح ممكن تصفى حسابك و أكلم لك المحامى تشوف محتاج إيه أنت بردو خدمتنى سنين
منير (بدهشة ) أصفى حسابى ؛ أنت خلاص مابقيتش باقى على حد ؟ اتجننت ؟ أنا مش هحاسبك دلوقتى بعدين هنتحاسب , بس أحب أقولك الناس اللى أنت طردتهم دول بيحبوك بجد خصوصا البنت اللى اسمها أميرة ماشفتش عملت إيه في المستشفى عشانك وباتت معايا ؛ و مراتك سابتك ؛ و أنت كده يا مروان بتخسر كل الناس اللى بتحبك, بسبب يأسك وضعفك عشان حاجة ربنا اللى عملها مش بايدك أنا همشى
قعد مروان حزين عيونه غرقانة بالدموع ثم قام بزق الترابيزه برجله
♥️____ليلةعادل____ ❤️
– فيلا مروان 1ص
غرفة نوم ماجى تقف أمام المرآة وتصفف شعرها وهى ترتدى لانجيرى ثم تبدأ بالحديث
ماجى : حبيبى اعمل حسابك بكره هتيجى معايا الشهر العقارى
يخرج من الحمام ببطء شخص يمسك فوطة يجفف وجهه ثم يظهر ظهره نفس الشاب ثم يقوم بعناقها من الخلف. ويقبلها فى خديها وفجأة يظهر وجهه إنه هادى؟.؟؟ وهنا هى الصدمة !! ماجى تعيش علاقه محرمة مع أخيها ؛ ما هذا الفجور إنها تخون زوجها فى بيته وهو موجود تحت سقف البيت لا يبتعد عنها سوى أمتار و مع من ؟ أخيها أى عقل و أى إنسان يستوعب هذه القذارة أنا لا أصدق ماذا سيحدث هل سيظلون يستغفلون مروان سنعرف قريبا؟؟؟
هادى : أنا ملك ايدك لو مش فاضى افضالك يا حلو أنت
ماجى (بإغراء ) : طب يلا على أوضتك بلاش شقاوة
هادى : ليه كده بقى ما احنا كنا حلوين زهقتى منى ؟!
ماجى : لا بس احنا اتفقنا إنك لازم تنام فى أوضتك
هادى : لازم ليه مروان تحت مش بيطلع فوق والشغالات بتوعك ميقدروش يتكلموا حتى لو حد اتكلم ولا شك أخ نايم جنب أخته الحلوة اللى بتخاف تنام لوحدها فى الضلمة
ماجى : ههههههههههه أنت شيطان
هادى : تلميذك يا حياتى
فيلا مروان ساعه 4 م
السفرة
..هادى و مروان و ماجى يجلسون على ترابيزة السفرة لتناول العشاء مع بعض نظرات إغراء بين هادى وماجى ثم يقبلها من خدها ثم شفايفها!! نعم ماذا سننتظر من هؤلاء الفجرة سوى هذة الاشياء القذرة
مروان : هادى
هادى (بخضة) : أيوه
مروان : أنت هتعمل إيه فى حياتك بقالك شهر فى مصر شايف طريقك هيمشى ازاى؟
هادى( بلا مبالاة يضع ايده على كتف ماجى ثم يقبلها من خدها ) والله مش عارف يعنى الواحد يريح شوية كده أصل الغربة تعبتنى بس أكيد هشتغل مع ميجو
مروان : اه بس أنت بتفهم فى شغل الفن ؟!
هادى : أتعلم (ينظر لها) ميجو ممكن تعلمينى ؟
ماجى : (بدلع ) عينيا
مروان : ربنا يخليكم لبعض؟
– فيلا مروان 12م
صباح اليوم الثانى تظهر أميرة وهى تطرق باب الفيلا تفتح لها كيلا خادمة ماجى
أميرة : دكتور مروان هنا ؟!
وهى تتحدث تنظر ترى مروان جالس فى الرسبشن تذهب إليه
أميرة : عامل ايه يا دكتور ؟
مروان : أنتى تانى ؟!
أميرة ( باستغراب) : حضرتك عرفتنى ازاى ؟
مروان (يقف بنرفزة ) أنا قلت مش عايز أشوف حد أنتى ما بتفهميش
أميرة : لا بفهم
مروان : امال ده اسمه إيه؟
أميرة (بمزح) : تقدر تقول عني معنديش دم على فكرة أنا مش همشى مهما عملت حتى لو جبت لى الأمن ورمونى بره هاجيلك كل يوم لحد ما تزهق وتتقبل الأمر الواقع , لا أنت متعرفنيش أنا رخمة جدا وعنيدة جدا جدا جدا
مروان (باستغراب ) ة أنتى قولتيلى اسمك ايه ؟
أميرة : أميرة وحيات ربنا أميرة بقالى استنى كده …
( تحسب على ايدها 3 ثانوى و 4 جامعة كمان قول 4 سنين خطوبة و جواز وحادثة يبقا كام يا مرمر (هى لسه بتحسب )
مروان : 11
أميرة : ايوة صح والله ماشاء الله عليك11 سنة كل مرة أعرفك اسمى احفظه بقى
مروان : عايزه إيه يعنى ؟
أميرة : أشوفك يا دكتور
مروان : مش شفتينى خلاص أنا كويس اطلعى بره
أميرة : أنت بتعمل كده ليه معايا ؟ أصلا بتعمل كدا ليه فى نفسك ؟ ايه دقنك دى ؟ و كمية السجاير دى ؟ (قبل متكمل كلامها)
مروان : (بانفعال ) : أنتى مالك ؟!! كيلا .. كيلا
كيلا : ايوة يا فندم
مروان : وصلي الآنسة لحد الباب
أميرة (بحسم ) : والله أنا هطلع بس هاجى تانى كلامى معاك مخلصش
♥️____ليلةعادل____ ❤️
شقة أميرة 8 م
مكتب الأب ( خالد )
فى أول الستينات يعمل دكتور جراح يمتلك مستشفى باسمه
تطرق أميرة باب غرفة المكتب ثم تدخل كان يجلس الأب على كرسي مكتبه يقرأ كتاب علمي عندما ينظر لأميرة يبتسم لها تجلس أميرة بالكرسى الأمامي
أميرة : بابا وحشتنى
الأب : (يغلق الكتاب و يضعه على المكتب) : أخيرا ظهرتى ؟!
أميرة : أنت عارف بقى شغلى فى المركز واخد كل وقتى ؛ بابا كنت عايزة أستشيرك فى حاجة
الأب : قولى
أميرة : حضرتك عارف دكتور مروان عزت ؟
الأب : أكيد طبعا مين ميعرفهوش ده من أفضل وأشهر 10 أشخاص مؤثرين فى العالم
أميرة : تخيل بقى الراجل ده اللى كله طاقة وحيوية بقا مكسور وحزين عايش شبه ميت
الأب : ازاى ؟!! فهمينى
أميرة : هحكيلك … تتحدث معه عن كل شى حدث معها ثم تقول له بحيرة .. ها إيه رأيك أعمل إيه أنا نفسى أساعده
الأب : حقيقى مش عارف بس أنتى مش هتقدرى تعملى حاجة لإنسان رافض إنه يتغير هو مش بس مستسلم هو رافض يتغير فهمانى , هو بالنسبة ليه إنه انكسر والكل اتخلى عنه هو محتاج حد يحسسه إنه عايش وإنه لسه دكتور مروان مش مجرد راجل أعمى ميعرفش يعمل حتى كوباية شاى لنفسه فهمانى ؟
أميرة : أيوة بس هو مش مدينى الفرصة بقى عصبى رافض حتى يسمعنى
الأب : جربى حاولى مره وألف أنا عارف بنتى عنيدة هتوصل للى عيزاه
أميرة : حاضر ؛ ممكن ابوسك ؟
الأب : تعالي يلا , (تقبله من خده ) روحى اعملى اجتماع مع الفاقدين أصحابك وشوفوا لكم حل سبينى بقى أكمل شغل
أميرة : حاضر
تخرج أميرة من باب الغرفة ثم تتصل بأصحابها حمزة ونور ثم يتقابلوا فى سطح العمارة
سطح العمارة 8 م
يقف نور حمزة بجانب سور ويتحدثون ثم تقترب أميرة منهم وتقف للاستماع لحديثهم
حمزة : وحشتينى اوى
نور : وأنت كمان اوى اوى
حمزة : عارفه يا لمبة حياتى ؟!
نور : إيه يا حزومة عمرى؟!
حمزة : بحلم باليوم اللى هنتجوز فيه ونجيب الوزة الصغيرة
تدخل عليهم أميرة وهى تنظر لهم باشمئزاز
أميرة : إيه الحوار اللى يخلى الواحد يرجع ده؟!
حمزة : دى رومانسية يا جاهلة
أميرة : والنبى ؟! بت يا نور اوعى تصدقى ده بيحور عليكى
نور : عجبنى ياختى خليكى أنتي فى عبقرينو بتاعك لما نشوف هيقولك إيه
حمزة : هيقول لها فى عيد الحب كل عيد حب و أنتى بألف خير يا زوجتى الغالية هههههههههههه
أميرة (بنرفزة ) : تصدقوا أنا غلطانة إني بتكلم معاكم والمصحف ؛ غوروا
حمزة : استنى بس بتقفشى ليه ؟!
أميرة : ما انتو بتستظرفو
نور : خلاص يلا الاجتماع علي إيه
أميرة : هحكيلكم ونحط الخطة ؛ قشطات؟
يا ترى أميرة هتقدر تقرب من مروان وتنجح في خطتها ؟!!!
هنعرف
تابع
#الاعمى
#تاليف_ليلةعادل
الفصل التالي: اضغط هنا
يتبع.. (رواية الاعمى) اضغط على اسم الرواية لتجد الفهرس كاملاً بجميع الفصول.