رواية راعوث – الفصل الثالث والأربعون
part 43 ”
راعوث :- فتحت عيوني شفت عُقاب نايم باوعت على الساعه بـ 4 ونص الفجر احس مخنوكه احس ضيقه بصدري كمت علكيفي اخذت ملابس ودخلت اسبح
– لبست دشداشه جوه الركبه قماشها فالينه ارتاحيت اخذت نفس وزفرته رجعت نمت بمكاني حسيت معدتي تتكطع من الجوع باوعت على عُقاب جذبني شواربه الي من اشوفهن تتخربط احوالي
– بقيت اباوع على وجها احفظ تفاصيله احس ماكدر ادير وجهي اريد اباوعله بقيت مركزه بملامحه واتذكرت الصار ومن ابجي ماريد اتزوجه ومن ساعدني وجابلي اكل غراضي الضامهن بالمجر تذكرت زينب كلبي رجف
– فتح عيونه عض شفته الجوه وابتسم تك خد
راعوث :- ادنيت عنه غطيت وجهي باللحاف وابتسمت
عُقاب :- صارلك ساعه تباوعلي تتوحم عليه
راعوث :- جنت نايمه
عُقاب :- ادري بيك ابد ما باوعتلي
راعوث :- جوعانه
عُقاب :- تعال اوكلك
راعوث :- شتوكلني
عُقاب :- تعاي يمي
راعوث :- ادنيت عنه واباوعله بخوف ، شبيك
عُقاب :- وج تعاااي
راعوث :- والعباس ما اجي
– راد يجرني كمت من مكاني وطلعت من الغرفه نزلت للمطبخ غسلت واباوع للباب خاف يجي فتحت باب المطبخ على الحوش الدنيا بارده الفجر اخذت نفس وزفرته براحه
– بكل خطوه بكل نضره بكل كلمه حلوه من عُقاب احس جاي يزيد شعور بكلبي شعور حلو تلمست بطني دنكت مبتسمه حسيت بطوله وضخامته وراي
– درت وجهي باوعتله مرخي جسمه على الطاوله وشابك ايده وبين اصابعه الجكاره
راعوث :- رحت فتحت الثلاجه و أردفت ، الفجر جكاير؟
عُقاب :- نعم سيدي ممنوع !؟
راعوث :- ممنوع منعاً باتاً بس بليل ومن تضوج ومو بالبيت اطلع بالسياره وروح يم الشط دخنها وارجع للبيت
عُقاب :- ضروري يم الشط
راعوث :- اي حتى ترتاح
عُقاب :- اريد ارتاح بشطج
راعوث :- ماعندي شط
عُقاب :- اخخخ يراعوث
راعوث :- عُقاب
عُقاب :- امممم
راعوث :- شو كول راعوث
عُقاب :- راعوث
راعوث :- غمضت واخذت نفس مبتسمه
عُقاب :- والله احبها
راعوث :- منو
عُقاب :- طولها شكلها عطرها رمادها التبغ البداخلها
راعوث :- سحبت باكيت الحليب من الثلاجه وخازرته بطرف عيني طلعت كلاص وركعته حيل على الميز
عُقاب :- چوعان ام فريخاتي
راعوث :- اكل الجكاير
عُقاب :- اويلي اويلي هوه المقصود ومايدري
راعوث :- اخذت كلاص الحليب حطيته على الطاوله طلعت بسكت وكعدت على الكرسي اكلت عُقاب كعد على الكرسي المقابيلي رخه جسمه على الكرسي ومضيق عيونه ويدخن ويباوع عليه
عُقاب :- الحليب بارد
راعوث :- احب البارد
عُقاب :- والحار
راعوث :- احبه بس هسه مشتهيه بارد
عُقاب :- انتي وين جنتي عايشه
راعوث :- بغداد
عُقاب :- ادري ضاميج بالكنتور
راعوث :- لا شلون يعني
عُقاب :- ليش كلشي ماتفهمين
راعوث :- افهم
عُقاب :- لا كلشي ماتفهمين سوالف المتزوجين سوالفي حتى كلامج التحجي ماتفهمي
راعوث :- سوالفك مالت كبار افراح ماتخليني اسمع سوالف الكبار وما افهمهن
عُقاب :- انعل ابو الخلف فراحه مدري شسمها
راعوث :- اسمها افراح
عُقاب :- اخخخ لو عايشه ام افراح جا بستها من حلكها على هاي الخلفه
راعوث :- شنو من حلكها
عُقاب :- من راسها انتي تسمعين غلط
راعوث :- اممم
عُقاب :- تذكرين
راعوث :- هزيت راسي بمعنى شنو
عُقاب :- نفس الموقف كاعده مقابيلي وبيناتنه الطاوله وتكليلي والله اني بريئه
راعوث :- والعباس بريئه
عُقاب :- جذااابه احجي الحقيقه
راعوث :- والله بريئه همه خطفوني
عُقاب :- حبيبي شلون جنت خايف
راعوث :- اخذت حسره وشربت حليب حسيت سنوني كامن يوجعني كمت غسلت حلكي سمعته حجه
عُقاب :- رجفت جسمج نضرت عيونج اصابع ايدج الصغار تمسحين بيهن دموعج شعرج الحجل الصليب اخخخ كلهن اخذن ركن بكلبي وكعدن بي
راعوث :- ابتسمتله وهمست ، شكراً لان نقذتني وصدكتني
عُقاب :- تعاي
راعوث :- وين
عُقاب :- يمي تعاي محتاجج
راعوث :- اني يمك مو بعيده
عُقاب :- كلت .. تعاي لا تعاندين
راعوث :- رحت وكفت يما باوعت بعيونه يباوعلي دنكت
عُقاب :- حلوه الدشداشه
راعوث :- بقيت مدنكه ساكته
عُقاب :- هذا اللبس يشعل الكره الارضيه يسوي دمار شامل للباشا
راعوث :- كعدت على الطاوله مقابيله ، منو باشا اريد اشوفه
عُقاب :- تريدين تشوفي
راعوث :- اي ليش تحجي عليه هواي شيصير منك
– كام قفل باب المطبخ تقرب مني وكف كبالي يريد ينزع الشورت فتحت عيوني على وسعهن وصحت
راعوث :- لااااا
عُقاب :- غير اشوفج الباشا
راعوث :- شكو تنزع
عُقاب :- اشوفج الباشا بويه
راعوث :- ليش هوه شنو الباشا ووينه
عُقاب :- بربوگه بطلي فهاوه
راعوث :- بس كلي منو الباشا
– تقرب مني ايده حاوطت خصري عيونه بعيوني تقرب من اذاني شواربه يدغدغن خدي قشعر بدني همس
عُقاب :- شنو ال يأذيج
راعوث :- حجيت بصوت يرجف ، بطني
عُقاب :- وبطنج ليش تأذيج
راعوث :- بيها فريخ
عُقاب :- والفريخ مين اجه
راعوث :- منك
عُقاب :- واني شلون سويتلج الفريخ
راعوث :- صفنت ثواني استوعب ، اي والله انته شلون سويتلي فريخ؟
عُقاب :- وسيراميك الحمزه اله ما اكلج منو باشا *** بحسام واثنين بهيفاء الكح**
راعوث :- حباب بس كلييييي منو باشاااا ماريد اعرف مين الفروخ بس الباشا حبااب
– مضيق عيونه وعاقج حواجبه بعصبيه ويباوع بعيوني اخذ نفس من الجكاره وايده الثانيه حاضني بيها
راعوث :- ما راح تكلي
عُقاب :- لا تلحين
راعوث :- عُقاب
عُقاب :- احجي تكلم انطق يرحولك فدوه عُقاب واهل عُقاب
راعوث :- حلمت حلم
عُقاب :- بالباشا
راعوث :- كلي منو باشا حباااب
عُقاب :- اششش احجي الحلم
راعوث :- حلمت شسمه
عُقاب :- احجي شلعتي گلبي
راعوث :- حلمت عندي اربع الماسات
عُقاب :- اجيبلك الماس
راعوث :- لا هوه حلم
عُقاب :- كملي
راعوث :- حابتهن حيل وفرحانه بيهن بس اجت زينب واخذت وحده منهن
عُقاب :- زينب السكط
راعوث :- مرتك هذيج
– صفن عليه نضرته تغيرت للتوتر والخوف عليه
عُقاب :- اي كملي بابا
راعوث :- اخذت وحده مني واني كمت ابجي اريدها وهيه ماتنطينياها بس عصرتها بيدها اتكسرت لقطع صغيره صارت مثل الرماد وجها يخوف وتضحك بصوت عالي
عُقاب :- كملي
راعوث :- فزيت مرعوبه ومخنوكه رحت سبحت ارتاحيت وراحت الخنكه
– رفع شعري وره اذني حضني حيل وباس راسي
عُقاب :- لا تخافين ولا تفكرين هواي بالحلم مجرد كابوس ماخلي زينب تأذيج يروح عُقاب انتي يابعد امه وابو
راعوث :- يابعد امي وابوي
عُقاب :- منو
راعوث :- محد بس اريد اجرب اكولها
عُقاب :- ****
راعوث :- لا تفشر عليه شكد ما تستحي
عُقاب :- تحبين يا لون
راعوث :- شنو
عُقاب :- راعوث من تحجين كلمه فكري بيها اول وبعدين احجي خوش
راعوث :- شحجيت اكلك شنو يعني احب يا لون لو شي معين واختارله لون
عُقاب :- انتي يا لون تحبي
راعوث :- احب الوردي والازرك الغامق وهسه كمت احب الاسود لان ملابسك السود حلوات
عُقاب :- يابويه شحلات المعجب بملابسي
راعوث :- ها
عُقاب :- تحبين الوردي لو الازرك اكثر
راعوث :- مادري الوردي
عُقاب :- شنو تتمنين تصيرين
راعوث :- محاميه
عُقاب :- بربج عوفي المحاماة على صفحه صيري معلمه مال روضه يلوكلج
راعوث :- اي ذكرتني احب دكتوره أطفال ومحاميه
عُقاب :- اخ يابه اني اول واحد اجيج داوي جروحي بشفايفج
راعوث :- دنكت راسي مبتسمه
عُقاب :- شنو امنياتج
راعوث :- اروح مدينة العاب واروح لسوك اشتري كلشي كلشي يعجبني والفلوس كون مايخلصن واكل بمطعم والبس فستان وردي واصير فراشه
عُقاب :- امنياتچ كلش محدوده
راعوث :- ليش اكو امنيات اكثر من الطلبتهن
عُقاب :- طبعاً تكدرين تتمنين طياره سياره تسافرين
راعوث :- اممم ، باوعتله ودنكت
عُقاب :- تريدين بنيه لو ولد تجيبين
راعوث :- بنيه نسميها سيسي وبعد ماريد لان بطني توجعني ماتحمل
عُقاب :- واذا تريد اخو
راعوث :- لا ماتريد نزوجها علوش وتلعب ويا
عُقاب :- شيلعبون
راعوث :- لعابات مو مثلك
عُقاب :- اني شلعب وياج
راعوث :- كافي عُقاااب
عُقاب :- ارفع الدشداشه
راعوث :- عُقاااااب
عُقاب :- اريد اشوف شنو جواها
راعوث :- والله اصيحح اذا رفعتها
عُقاب :- نجرب بالمطبخ يكولون اذا الحامل جربت بالمطبخ بعد ماتوجعها بطنها
راعوث :- شنجرب شبيك عُقاب وخر
عُقاب :- تمددي على الطاوله
راعوث :- والعباس ما وخر عنييي
عُقاب :- لا تعاندين
راعوث :- ادنيت لوره علكيف لزمني قوي من خاصرتي
راعوث :- وخر ايدك اريد انزع
عُقاب :- عود صايره لوتيه
راعوث :- والعباس اكلب الدنيا اذا سويتلي شي
عُقاب :- شني يابه اني زوجج لو واحد حاصرج
راعوث :- حاصرني والعباس
عُقاب :- تسوين ريوك لو اشوفلي وحده بالشارع تسويلي
راعوث :- هوه اني اسويلك بس شسمه تريد حليب بارد لو لفه كيمر او جبن
عُقاب :- اريد شفه
راعوث :- مركز بشفايفي عض شفته الجو وتقرب من وجهي دنيت راسي عنه تقرب اكثر حط ايده على راسي وقرب وجهي من وجها باوعت على شفايفه انفاسي بدت تعلى عيوني بعيونه شواربه يطخن طرف شفتي غمضت عيوني اخذ شفايفي بين شفايفه دفعته من صدره حيل مايوخر كمت ادفع بي حيل وخر من شفايفي تقرب من اذاني ضربني على ضهري بخفة ايده وعاط
عُقاب :- كااااافي رااااعوث
راعوث :- حباب ماريد عليك الله عوفني اريد انزل عُقاب لا تبوسني ادوخ والله
– ما اهتم لكلامي اخذ شفايفي ثواني بس و احس بعد ماكدر اتحرك ذبلت بين ايده ماكدر احجي نفسي نكطع
– دفعني على الطاوله عيوني ذبلانه نمت على الطاوله اباوعله اريد اكعد احس ماكدر جسمي مكسر ردت اصرخ حط ايده على حلكي مرد حلكي مرد
– لزمت ايده وادفع بيها واهز راسي بـ لا
عُقاب :- ما أذيج لا تصرخين
– هدأت روحي وخر ايده بسرعه عدلت دشداشتي وكعدت رجعت لوره راد يلزم رجليه شردت من الجهة الثانيه ركضت للباب افتحها واباوعله تقدم مني انفاسي عاليه كلبي يدك سريع فاتحه عيوني على وسعهن
– تقرب مني حصرني بين الباب وبين الحايط دنك عليه ومبتسم تك خد احس صدري راح ينشك ويطلع كلبي غمضت عيوني ومن الخوف همست
راعوث :- اشهد ان لا اله الا الله واشهد ان محمد رسول الله
– سمعت صوت ضحكته فتحت عيوني شفته يضحك حسيت راح ابجي حضني
عُقاب :- اشششش ابني عبالك راح اخذك للاعدام مو اريحك
راعوث :- شنو تريحنيييي ماااااريد جاي تأذيني
عُقاب :- لككككك مو جنت خانس وتصيح اخ
راعوث :- اي اصيح لان حلكي يوجعني
عُقاب :- متأكد
راعوث :- اممم
عُقاب :- النبره تكول غير شي
راعوث :- اريد اروح
– شالني رجليه حاوطت خصره فتح الباب واخذني للغرفه كعد على الجربايه سحب موبايله من الكومدي فتحه باوعت على الموبايل طلع محادثات كلهم ولد
عُقاب :- لا تخافين ماعندي بنات
راعوث :- هاي منو
عُقاب :- وينها
راعوث :- هاي الكح** اسمها
عُقاب :- هذا رائد
راعوث :- جا شنو كح**
– ضحك بصوت عالي حضني لصدره ويضحك دخل لمحادثته رائد دازله صوره مشغل فلم بالتلفزيون وحاط رجل على رجل بس بالشورت الصوره تضحك بسرعه نزل بالمحادثه
عُقاب :- انشهرت يرائوديييي
راعوث :- حطيت راسي على صدره وباوع ويا اتصل عليه فتح سبيكر شفت صورت رائد واكف بمكان شبه الصحراء لابس اسود ونضارات شمسيه ايده على شواربه وايده الثانيه عليها صكر جبير
راعوث :- حلو هذا الصكر جيبلي منه
عُقاب :- اي بابا
راعوث :- حبيبي شوف عيونه والله حلو جيبلي منه
– فتح الاتصال رائد عاط عُقاب ، اشششششش
رائد :- ها خدرتنه هسه انته
عُقاب :- شعندك اونلاين ما تنام وتجي لشغل مطفي جاوبني جاي احجي وياك
رائد :- سيدي جدي مات وكال اول ليله اليه بالكبر لازم تسهرون يمي اخاف وحدي
عُقاب :- شنو سبب وفاته ؟
رائد :- ماكدر احجيها من الصبح فال مو زين
عُقاب :- هذا الصكر بالصوره اخذتها من رحنه للانبار ؟
رائد :- اي بشرفك دخذني بعد وياك شو انته اتزوجت بعد ماشوف وجهك اوفف مشتاقله بالعباس
عُقاب :- لدوخني اريد تجيبلي صكر لبيت المزرعه
راعوث :- باوعتله بصدمه ، لا ماريد اشاقه وياك يخوف
عُقاب :- منو كال حلو وحبيبي شوف ط*** ؟
راعوث :- حطيت راسي على صدره ردت ابجي
رائد :- ها خير خير
عُقاب :- بالشغل مالحك اشوفك اريد احجي وياك
رائد :- احجي خير تريد كيك وعلي امي مسويته يخبل
راعوث :- باوعت لـ عُقاب واشم ريحه كيك مالت بيت همست
راعوث :- عُقاب
عُقاب :- ها بويه
راعوث :- شاورته ، اريد كيك من هذا العنده ركبتي تحكني
راعوث :- باوعتله خزرني خزره بقه ثواني اني اباوعله بخوف وهوه خازرني هدوء تام ورائد ساكت ويانه
عُقاب :- الحجيه تسويلك من تكعد
راعوث :- اشتهيت الكيكه العنده
عُقاب :- **** بيك وبكرايبك شلع قلع اله هسه تحجي اليوم **** صفح انصحك لاتجي للمركز
رائد :- هاي ليش ممنوع ناكل كيك
عُقاب :- سم وزقنبوت
راعوث :- والله تره اكول اله مسميك الك**
عُقاب :- رائد مسميك الكح**
رائد :- *** بيبيتي جا مادري
راعوث :- فتحت عيوني على وسعن هاي اثنينهم هيج يفشرون
عُقاب :- انشهرت شهرتين
رائد :- لا صدك على يا قناه
راعوث :- سد السبيكر وحجه ويا
عُقاب :- رائد ضملي من الكيك جيبه وياك اي كون نضيف ادري بيك اي واليوم محتاجك بشغله ضروريه
راعوث :- ابتسمت لان كال ضملي كيك بقه يحجي ويا على حمايه مدري شنو ايدي حاوطت ركبته وباوع بعيونه وعلى شواربه بست خده باوع على شفايفي عض شفته الجوه
عُقاب :- كافي ابني ، لا مو وياك اي انته و باقر لبس مدني المسدس لا يبين …
راعوث :- تلمست شواربه اريد اسوي مثل حركاته اشوف شيسوي تقربت من خده تحركت علكيف لاذانه بستها عصر خاصرتي قوي
عُقاب :- اخخخ رائد اي رائد حطه بط*****
راعوث :- همست مثل كلامه ، شطالع اليوم
– طفه الاتصال شمر الموبايل كلبني على الجربايه نام عليه وشك الدشداشه من صدري صرخت بصوت عالي
راعوث :- يممممممممممممممه
– طك فخذي حيل حسيت رجليه انكسرت وخر مني يريد ينزع كمت ركض طفرت يم الكنتور اجه عليه صرخت بصوت اعلى
راعوث :- فرحححححححح
– يريد يلزمني ركضت بكل قوتي اكمز بايتين تلاثه شردت لغرفه عمتي فتحت الباب وطبيت درت وجهي شفته وراي ردت اسد الباب لزمها رحت ركض يم عمتي الكعدت مخروعه وصرخت
راعوث :- ساعدينييييييييي
ابتسام :- اللهم صل على محمد وآل محمد يمه سوده بوجهي شمسويه يمه منو طب علينه صخام الصخمني راح ينفجر البيت ولج يمه عبايتي
راعوث :- باوعت لـ عُقاب مخصر يباوعلي ويباوع لامه
ابتسام :- يمه هبط ضغطي ولج يمه راسي راح ينفجر شكو يعمه شبيج طبيتي عليه مفجوعه ولج معزايه منو شاك ثوبج ولج يمه مو زين تشكين دشداشتج من صدرج
راعوث :- ختلت وره ضهرها حاضنتها واباوع لـ عُقاب
ابتسام :- فهمني عُقاب شصاير من صباح الله
عُقاب :- وسيراميك الحمزه الزمج الزمج
راعوث :- حبابه حاجييي
ابتسام :- غير تفهموني شكو
راعوث :- بسته وهوه شك ملابسي بس هوه يبوسني جا اني ما اشك ملابسه من يبوسني
ابتسام :- يا يا صخام الصخمني سكتي لا يسمعج واحد ها هسه ارتاحيت عُقاب من كلتلك صغيره هوه هذا قصدي هسه اني امك باجر تحجيها للغريب
راعوث :- والعباس شني احجي كلشي اذا يخوفني
عُقاب :- والعباس التحلفين بي اليوم عقوبتج غير
راعوث :- عليج الحسين حاجي
– طلع من الغرفه بدون مايسمعنه
ابتسام :- لا تخافين انتي ليش تسوين هيج مو عيب هاي غرفه اسراركم وحدكم ماطلعيهن بره عيب يكولون عليج زعطوطه ماعدها عقل انتي ورجلج كلشي بيناتكم خصوصاً هذا الشي لازم مايطلع من غرفتكم شلون تنزلين هيج دشداشتج مشكوكه بالله زيد كاعد واحد من الجهال
راعوث :- ما طالع شي لازمتها
ابتسام :- ادري بس شيكولون منو شاكها لا يحبيبتي عيب
راعوث :- اخاف من عُقاب
ابتسام :- دنامي يمي بين مايصير الصبح يروح لشغل
راعوث :- نمت يمها تغطيت وباوع لسكف خايفه وجسمي كله يرجف وثواني اريد اضحك باوعت لعمتي فاتحه حلكها وراحت بسابع نومه شبسرعه نامت حطيت ايدي على حلكي واضحك انداريت لجهة الثانيه حطيت وجهي بالمخده وبعد ماتحمل طكيتها بضحكه قويه فزت عمتي من نومها
ابتسام :- ها يمه ليش تبجين ليش شبيج
راعوث :- باوعتلها واضحك ماكدر احجي
ابتسام :- لا وعلي ابد مو صاحيه انتي انام احسن اليه
راعوث :- دارت وجها لجهة الثانيه ونامت اني وره الضحك غمضت عيوني وذبيتها نومه لحد الساعه 12 الضهر
– كعدت اشم ريحه تشريب لحم كمت امطك شفت ملابس يمي على الجربايه كمت لبستهن وطلعت للمطبخ رحت بسرعه على الكدر فتحته شفت التشريب والدهن عليه يموت وريحه تكتل دخلت فرح للمطبخ جانت بالحوش
فرح :- هاي اول ما كعدتي اجيتي على الاكل
راعوث :- عليج العباس اريد
فرح :- صبي واكلي مستوي
راعوث :- اخذت طاسه وصبيت سويت ثريده وكعدت اكل بشهيه اجه علوش كعد ياكل وياي
راعوث :- وين عُقاب طالع
علي :- اي طلع من الصبح واجه جابلج كيكه من رائد وراح
راعوث :- صدك
علي :- والله هاي الكيكه بالثلاجه
راعوث :- كمت من مكاني شفت الكيكه بعلبه فتحتها وكعدت اكل
علي :- شلون تاكلين ثريده وكيك
راعوث :- والله طيب
علي :- هاي شبيج
راعوث :- ما اكدر اشتهيتهن اثنينهن تقبل يطلع بـ سيسي كيك لو ثريده
علي :- لا لا اكلي تريدين اجيبلج بعد شي
راعوث :- ماريد شكراً
– اكلت من الكيكه ورجعتها طلعت لبن شربته اكلت ثريده حسيت بلعبان نفس كمت بسرعه صعدت لفوك غسلت وجهي طلعت ملابس وسبحت كملت نزلت جوه لكيتهم يتغدون رجعت اتغده وياهم
ابتسام :- عفيه يابعد روحي اكلي خطيه الطفل يحتاج تغذيه ايشي تشتهي اطلبي ديربالج على روحج لا تركضين اليوم شلون ركضتي وعلي لازمه كلبي لزم خايفه على الطفل علكيفج يروحي
راعوث :- اي خوفني عُقاب
– خزرتني عمتي وعضتلي شفتها
ابتسام :- اي ديربالج لا تضلين تتمركضين
راعوث :- اي
فرح :- اليوم منو متريك حليب وبسكت
راعوث :- اني
فرح :- شعجب شوكت كعدتي
راعوث :- الصبح كعدت جوعانه واكلت
فرح :- شو عايفته
راعوث :- صفنت ، مو شسمه بعد ما اشتهي وهاي سنوني أذتني
فرح :- هاهيه بالعافيه شلونه حملج خو ما متأذيه تريدين اخذج دكتوره نسائيه
راعوث :- لا زينه
فرح :- دومج زينه انشاء الله
راعوث :- ابتسمت وكملت اكل كمت غسلت ورحت للغرفه كعدت على الكرسي المتحرك قلدت حركاته فتحت اللابتوب دخلت على الصور كلبت بصوره يجنن يم الشلال وعلى الجبال ملابسه يخبلن نضاراته شواربه حركاته تقربت من الابتوب وبست صورته
– طلعت فلم وبقيت اباوع على النص وكفته ورحت جبت نساتل وجبس وعصير ومصاصات حطيتهن يمي على الميز اكلت يكمل فلم وطلع فلم ثاني ختمت كل الافلام فتحت النستله واكلت منها رفعت رجليه على الميز ورخيت جسمي على الكرسي حسيت راح اغفه حطيت النستله على الميز باوعت لساعه بـ 4 العصر بقيت اباوع عيوني تغمض لا ارادي غمضت انام وافز على صوت الفلم بعدها غمضت وانتهيت نمت بمكاني
– فتحت عيوني شفت عُقاب فوكاي يريد يشيلني بسرعه كمزت من مكاني
راعوث :- والله بس شفت افلام
عُقاب :- اي بويه اخذي يمج نامي على الجربايه وباوعي
راعوث :- صفنت نسه الصار ، لا حلو الكرسي
عُقاب :- كلش حلو
راعوث :- طيبه الكيكه
– راح يم الكنتور طلع ملابس
عُقاب :- صدك
راعوث :- والله تجنن
عُقاب :- بدلي نطلع وره شويه
راعوث :- وين نروح
عُقاب :- اونسك
راعوث :- كول والله ماتضربني
عُقاب :- ليش اضربج
راعوث :- انته كلتلي اعقبج
عُقاب :- هسه مو يمي العقاب
راعوث :- كول والله
عُقاب :- وداعتك
راعوث :- وين نروح
عُقاب :- مفاجأة
راعوث :- سكتت راح طلعلي بدي زيتوني غامق وبنطرون جلد بُني على احمر غامق وكعب نفس لون البنطرون وستره لحد ركبة رجلي لونها زيتوني
– حط الملابس بيدي وراح للحمام لبست بالغرفه شديت حزام الستره مشطت شعري خليت شويه حمره بخيت عطر لبست الكعب باوعت لروحي بالمرايه هيبه واحس روحي طاكه وعايشه بنص الدولارات من جمال اللبس بقيت اتمشه بالكعب اتعلم بين مايجي عُقاب
– انفتح الباب دخل عُقاب اول مره اشوفه بالشفقه بقيت صافنه على جماله بالشفقه و لابس بنطرون جينز وتيشيرت اسود وكف كدام المرايه دنك باوع لروحه باوعلي
عُقاب :- بعدني عُقاب لو غيره
راعوث :- عُقاب
عُقاب :- **** بحسام يعني بعدني اشبه عُقاب
راعوث :- اي عُقاب بس مو ملابسك وماتلبس من هاي الشفقه ليش تريد تتغير
عُقاب :- شلون اتغير
راعوث :- تقربت منه لابسه كعب وبعدني ما طوله رفعت جسمي وحطيت ايدي على شواربه باوعتله ماتغير
راعوث :- بعدك عُقاب
– نزع الشفقه شمرها راح طلع لبس رسمي اسود نزع درت وجهي
راعوث :- عاد كول راح انزززع ماتستحييي
عُقاب :- بطرانه
راعوث :- مو بطرانه عيب
عُقاب :- شنو هالجمال شنو هاللبس شنو هالجسم غير تكتلين غير تجلطين
راعوث :- دنكت راسي مبتسمه لبس واجه يمي حضني اخذني يم المرايه باوعت على المرايه
راعوث :- والله حلوين
عُقاب :- انته محلي كلشي
راعوث :- درت وجهي اله حضنته بست صدره وحطيت راسي على صدره
راعوث :- شكراً
عُقاب :- على شنو بابا
راعوث :- باوعتله ابتسمت ومشيت ، يله نروح
– نزلت جوه شافتنه عمتي صلت على النبي
ابتسام :- فدوات يمه والله اخاف عليكم تنحسدون
عُقاب :- بعد روحي حجيه تحتاجون شي قبل لا اطلع
ابتسام :- سلامتك اريد راحتكم
راعوث :- رحت صعدت بالسياره صعد وحرك الستيرن بقيت خايفه طول الطريق خاف جذب عليه مثل هذيج المره لمن وصلنه سوك ارتاحيت
– نزلنه من السياره لزم ايدي هاي اول مره اليه ادخل لهذا السوك مشينه باوعت لـ عُقاب يباوع بطرف عينه ونضرته حاده باوعت للمكان اليباوعله ماشفت شي ناس يمشون دخلني لمجمع ملابس
عُقاب :- اخذي التريدي ولا تباوعين لسعر
راعوث :- اول شي احس مستحيه هوه بدأ يكلب ويطلعلي واني بس اهز راسي بـ اي دخلنه كم مجمع وبديت اني انطلق اختار كلشي يعجبني ملابس احذيه جنط مسكات شعر اكسسوارات مكياج ايده انترست علاليك بين ما باوع بالمكياج تقرب مني همس
عُقاب :- هوه انته حلو بدون مكياچ
راعوث :- حلوات ماكدر شوف هاي الحمره بيها طعم
عُقاب :- اشكك اذا حطيت منها اريد طعم شفايفك
راعوث :- بس حلوه
عُقاب :- اخذيها بويه ، رايح اخذ الغراض لسياره ثواني واجي مو طلعين من المحل ابقي يم البنيه خوش بويه هسه اني اوصيها عليج
راعوث :- لا اخاف لا تعوفني خاف يصير انفجار ماريد اشتري اخذني وياك
عُقاب :- بعدچ خايفه
راعوث :- اخاف عُقاب حباب لا تعوفني
عُقاب :- اشتري بويه كملي
راعوث :- ماريد اشتري اخاف خلي نطلع من المحل
– حسيت بدوران اشوف كلشي يدور حسيت المحل راح يوكع اذاني ثكلت لزمت ايد عُقاب حسيت روحي بحضن عُقاب بعدها مادري شصار اشوف غواش كاعده على الكرسي و عُقاب بيده مي ويغسل وجهي
عُقاب :- ها بويه لا تخافين اني يمج ماكو شي صحيتي راعوث بويه وداعتج مايصير شي ماطول اني يمج
راعوث :- لزمت ايد عُقاب وكمت اشوف احسن
عُقاب :- ها شلون صرتي تكدرين تكومين
راعوث :- صرت احسن شويه
عُقاب :- اجيبلج شي تاكلي
راعوث :- لا بس اريد اطلع من المحل اختنكت
عُقاب :- تكدرين تمشين
راعوث :- هزيت راسي بـ اي
– كمت و عُقاب لازم ايدي قوي اخذ الغراض الي اشتريتهن دفع السعر وطلعنه بايده اثنينهن علاليك و لازم ايدي
عُقاب :- بويه طلعي موبايلي بالجيب مال البنطرون
راعوث :- طلعته وباوعتله
عُقاب :- فتحي ودخلي على محادثة رائد
راعوث :- اي
عُقاب :- كتبي وين انته
راعوث :- كتبتله ، هوه جاي ويانه
عُقاب :- رد ؟
راعوث :- لا
عُقاب :- اخخخ اذا الزمه
راعوث :- يكول ضيعتك
عُقاب :- فشري
راعوث :- شلون
عُقاب :- اقوه فشوره عندج كتبيها
راعوث :- دزيتله بس ، فشوره ، ما فشرت
عُقاب :- ها بويه شدزيتي
راعوث :- رفعت الموبايل شوفته
عُقاب :- جا غير تكتبين شنو هيه الفشوره شو بس كاتبه فشوره
راعوث :- باوعت على المحادثه رد
رائد :- والعباس هلهلت اول مره بحياتك بعد 32 سنه من الفشاير واخيراً بعد ماتفشر والله الزواج بي خير
عُقاب :- كتبي راح اخلي العلاليك عند مجمع ……. تعال اخذهن من الولد واخذهن لسياره
راعوث :- ليش ما تخابره
عُقاب :- ماكدر بويه
راعوث :- اني الزمه على اذانك واحجي ويا
عُقاب :- ما اخابره بنص هاي الزحمه كتبي بلا لغوه زايده
راعوث :- كتبتله
رائد :- هاهيه متفقين
راعوث :- اخذني عُقاب رحنه لمجمع كام الولد سلمو ايد بايد حجه ويا شويه وحط العلاليك يم الولد وكاله راح يجي رائد ياخذهن سلم وطلعنه
عُقاب :- بعد ششتريلج
راعوث :- اريد من هاي الحلويات وعصير بالرمان ثلج وكرزات مالحه
– اخذني يم الحلويات بقيت اباوع وابلل بشفتي اريد اكل الريحه تجنن
عُقاب :- انطيني من كل نوع كيلو
راعوث :- عُقاب
عُقاب :- طلبي
راعوث :- بس اريد اضوك الكنافه ماتحمل راح اموت
عُقاب :- حبيبي بلا زحمه انطيني اول شي كنافه حامل وتتنسه
– تدلل
راعوث :- كص الكنافه واني ردت اموت انطاني ماعون وشوكه اكلت منها الطعم يموت
راعوث :- ضوكها تجنن
عُقاب :- بالعافيه
راعوث :- بقيت اكل بيها بين مايكمل الرجال و عُقاب ايده على خاصرته والثانيه يدخن بيها ومركز بيه يباوعلي لكل ملامحي وطولي شعري ركز بشفايفي بقيت اكل واباوعله وهوه مركز بشفايفي حجه الرجال
– تفضل اغاتي
– اخذ حسره باوع بعيوني واخذ العلاليك دفع الفلوس لزم ايدي ومشينه
راعوث :- عُقاب اريد من هذا العصير
– اخذني وكف يما يباوع على الولد و على العصير
– تفضل عيني
عُقاب :- نضيف
– اي جا شبي
عُقاب :- انطيني رمان
راعوث :- انطاني العصير مشينه اشرب بي ضلمت الدنيا واحنه بعدنه بالسوك شفت مره لابسه بوشيه وعبايه كاعده بالكاع وبحضنها بنيه صغيره نايمه على رجليها تجدي احس كلبي انكسر اتذكرت ابوي وحالنه
راعوث :- عُقاب عادي انطي لهاي المره من هذني الحلويات بس ماعون واحد وفلوس
عُقاب :- نصهن جذابات بويه
راعوث :- عادي خطيه اني اريد انطيها
عُقاب :- انطيها يابعد عيون عُقاب
راعوث :- طلعت ماعون حلاوه انطاني خمسه وعشرين اخذتهن انطيتها البنيه الصغيره كعدت بسرعه باوعتلي مسحت على شعرها وكرصت خدها
راعوث :- الله يرزقج خاله
– مشكوره والله مشكوره الله يحفظج ويخليج ويريح بالج وينطيج الصحه والعافيه الله يحقق البالج اشكرج اليوم راح نتعشه بسببج الله يسعدج ويوفقج
راعوث :- حسيتها راح تبجي واني ردت ابجي وياها رحت لزمت ايد عُقاب ودنكت راسي اخذت حسره احس كلبي نمرد مرد اتذكر اهلي خطيه اخواتي اريد يطلعن مثل هاي الطلعه ويلبسن هيج وياكلن من هذني الحلويات ويتونسن
عُقاب :- شفتي شلون فرحتيها
راعوث :- اي خطيه
عُقاب :- الله يرزقها هسه شكلتيلي بعد شتريدين
راعوث :- كرزات
عُقاب :- لسهرتنه اليوم
راعوث :- يا سهره
عُقاب :- اليوم افترسك
راعوث :- ها
عُقاب :- مو يمج السالفه
راعوث :- اشترالي كرزات وفتح موبايله كتب ودار وجها لمكان هز راسه بـ اي ودار وجها باوعت لنفس المكان ماشفت شي
الفصل التالي اضغط هنا
يتبع.. (رواية راعوث) اضغط على اسم الرواية لتجد الفهرس كاملاً بجميع الفصول.