رواية راعوث – الفصل السادس عشر
part 16 ”
ناصر :- يعني عادي اذا متت
راعوث :- من العصبيه والقهر والخوف كمت احجي ايشي بس اريد مايزوجني ، بابا عفيه افهمني ماريده ما والله اموت والله لا تعوفني حباب
ناصر :- 190 مليون تدرين شيسون هذني يعدلن بيتنه واسوي عمليتي واتشافه واعيش احسن عيشه واشتغل خوش شغل والله ما اعوفج اجيج يوميه والله العظيم ريحي كلبي وكولي موافقه
راعوث :- حرت راسي يريد ينفجر وابجي عفته ورحت للغرفه طبكت الباب حيل وطلع بملابسي شمرتهن كلهن بالكاع وابجي بصوت عالي واصرخ اريد اطلع فد شي بداخلي جاي يأذيني اصرخ وشمر بالملابس دفرت باب الكنتور برجليه ورحت شمرت الغراض كلبت الغرفه كلاب وكعدت بالزاويه وابجي اناشغ
افراح :- سمعت راعوث تخبلت وكسرت الغراض بالغرفه ، بابا
ناصر :- عوفيها عوفيها
افراح :- ياربي بابا شلون خاف تأذي نفسها
ناصر :- لا خليها هسه وحدها تهدى عوفيها
افراح :- ليش مايخطب غيرها والله خطيه راعوث وربي صغيره بعدها شافت من حياتها
ناصر :- اسكتي لا تحجين يمها هيج لا تخبليها اجتنه فرصه ماتتعوض جا اني ما خايف عليها ما فكر بيها بس نهايتها تزوج تزوج شغله بالملاين كلمته مسموعه وشاريها خطبها اكثر من مره وشاب حلو مثقف ليش اضيعه من بين ايدي
افراح :- تنهدت وسكتت ، سمعت صارت صنطة ماتحملت رحتلها لكيتها تبجي تقربت يمها كامت تصيح ماتريدني كعدت يمها ولزمت اكتافها
– اشش اش اش راعوث كافي خلي احجي وياج سمعيني
راعوث :- عوفينييييي اي اي بابا مريض وخطيه واذا تحبي اتزوجي ادررري كككافي عوفيني
افراح :- حبابه بس اسمعيني احسن ما بابا يزوجج لواحد فقير وهم تعيشين عيشه انكس من هاي عيشتنه اتزوجي عُقاب وعيشي ويا مدلله باحسن بيت واحسن اكل والله بابا بينه وبين الموت شبر تدرين بس الاشعه والفحوصات يكلفن ابوي 700 الف مين نجيب وعُقاب اجه بوقته وطلب ايدج وياخذج عروسه من بيتنه ومكياج وبدله ويشتريلج ملابس وكلشي تريدي وغرفه وحدج وبالشته البيت دافي وبالصيف سبلت بارد
راعوث :- والله اخاف منه حبابه
افراح :- كوه حابسه دموعي احس بس احجي اطك بالبجي ، والله ما يأذيج هوه صوته وحركاته هيج لان متعود على شغله باعيلي حتى لو بعد فتره وطلبي طلاك بس خلي يتشافه بابا بس خلي يسوي عمليته فدوه راعوث ابوس ايدج والله اذا اني بمكانج اقبل علمود بابا
راعوث :- شفت رقيه طبت ابوس ايدج رقيه حبااابه مو عجبج مو تردي اتزوجي ابوس رجليج تباوعلي وساكته حاضنه رجليه وحطيت راسي بين رجليه وابجي
افراح :- كافي يروحي كافي ييمه الله كريم هسه بعدنه يمكن ما ياخذج
راعوث :- بقيت ابجي كامت افراح يم ابوي اجت ابرار يمي حضنتني وتبوس بيه
ابرار :- كافي راعوث لا تبجين والله اكوم ابجي انشاء الله ماياخذج منه لا تخافين
راعوث :- لا تعوفيني
ابرار :- ماعوفج والله يمج بس لا تبجين حبابه
راعوث :- احاول امنع دموعي تنزل بس ماكدر بس اتخيل اني مرته ووحدنه بغرفه كلبي ينقبض ماريد اتزوج هسه خلي اكبر ماريد هاذا يخوف صوته عالي وخزرته تخوف اريد اموت ولا اتزوج
– صار الغده صاحتني افراح ما كمت كلشي ما اشتهي اريد بس انعزل وحدي اريد اخلص من هاذا الزواج عافتني افراح وكعدو يتغدون هدوء بس صوت طكطكه الماعين
ناصر :- يعني ماتريد راعوث
افراح :- اي بابا ، ذب خاشوكته ودنك على الاكل ماهيس اله دموع ابوي تنزل ويبجي بصوت عالي حط كف ايده على عيونه ويبجي وصدره يوجعه يكح
– كمت اله ، ها بابا شربته ماي غسلتله كام للمغسله يكح صار وجها احمر تخبلت بمنضر الدم من حلكه كمت ادك على وجهي وحايره شسوي ماعرف اتصرف بعد
راعوث :- صوت ابوي يكح بصوت عالي وافراح تبجي وتصيح بابا كمت ركض وكفت يما واباوع على ابوي ومنضره جان منضر خلانه نبجي كلنه وهوه رجال جبير ويبجي من الوجع يريد يجر النفس مايكدر حيل تخربط واني بس اباوعله ماتقربت منه و لا حاجيته طبيت للغرفه وابجي لان حسيت حياة ابوي بيدي طبت افراح تتوسل بيه
افراح :- ابوس ايدج وافقي ابوس رجليج علمود ابوي شفتي حاله ابوس راسج والقران اذا راح ابوي من ايدنه تاكلنه الناس نموت والقران مالنه سند غيره هوه زلمة بيتنه ابوس اديج اذا تحبيني وتحبين ابوي اذا تحبين امي وافقي راعوث تقبلين ابوي يموت بس حاجيني تقبلين يروح مثل امي
راعوث :- ابجي بغزاره شحجي وياها شكول كمت املخ بشعري وادفر برجليه وصيح وهيه تلزم بيه موقف صعب حيلل اسمع ابوي يصيح بصوته التعبان
– ولج بويه افراح عوفيها
راعوث :- ملخت روحي ونمت بالكاع صافنه على السكف ودموعي تنزل عافتني افراح وطلعت حرت شسوي تعبت اريد اموت ليش رجعت لاهلي لو باقيه عند الغجر اريد نسرين اريد اموت اريد اعيش طفولتي ماريد مسؤولية ماريد جهال ماريد انام واكعد واكل ويا ماريد ماريد كمت اضرب الكاع بيدي وصرخ مااااريد بس اتذكر منضر ابوي اسكت غمضت عيوني وهدأت روحي بقيت مغمضه
ابرار :- كافي حبابه راعوث لا تبجين يمكن ماينطيج لرجال شنو القصه والله يمكن بعد مايرجع لا تخافين
راعوث :- باوعتلها وأردفت بصوت يرجف وغصه ، هنيالج
ابرار :- مسحت دموعي ، حبابه والله اعرفه ابوي ماينطيج
راعوث :- اخذت ملابس وطبيت للحمام بدون ما احجي ايشي قفلت الباب فتحت الدوش حطيت ملابسي بالكاع وكعدت جواه وفرك بوجهي حيل وابجيي دموعي ماتتوقف واتخيلت هواي امور راح تصيرلي حياتي ويا قربه مني كلامه صوته طوله ضخامته اهله غرفته شغله هذني كلهن اخاف منهن
– بقيت نص ساعه بالحمام اناشغ وافراح تجي دك الباب تحجي وياي ما جاوبها تجي ابرار رقيه شمس ما جاوب احد اتمنى اختنك وموت جوه المي بعد بجي وقهر وصريخ وتفكير اخذت قراري سديت الدوش وكمت على حيلي باوعت على المرايه مسحت دموعي بدلت رجعت باوعت على المرايه احاول اخفي ملامح الحزن ابتسمت وماهيس اله طاكتها بجيه امسح بدموعي واجمع قوتي وابتسم بس ماكدر عيوني متروسه دموع امسح بيهن ويرجعن ينزلن ابتعدت عن التفكير اني مرته وفكرت بابوي من يطيب ويعدل بيتنه ويشتري اليريده وكانو اني وياهم مسحت دموعي وطلعت ردت اكول اني موافقه بس ماكدرت طبيت للغرفه نشفت شعري ومشطته سحبت بطانيه وحطيت مخده واتجهت للنوم اريد اخلص من الواقع بلكت يطلع حلم وافز منه بس فزيت على صوت افراح
افراح :- راعوث كعدي نسوان بره يردن يشوفنج كومي بدلي يروحي كومي يحبيبتي
الفصل التالي اضغط هنا
يتبع.. (رواية راعوث) اضغط على اسم الرواية لتجد الفهرس كاملاً بجميع الفصول.