رواية تراث النهروان – الفصل الأول
– نـــهرروااان ولججج نـــهروووان .
رفعت راسي وجريت نفس
– هاااااااااا هااااااااا .
– وين اخووج .
– بالمدررسة .
– الساااعة بـ١٢ ونص ولسسة مااارجعع وانتِ مسنحه هناا ولا عبااالك .
شمرت الكتب وصحن
– ترررا ماااكااعدة اركصص تريدني ادور اخوي وانتَ مكابل البيت وكاعد .
كلتها وغمضت عيوني من صفن بوجهي عضيت شفتي بندم وباوعتله
– اسفه مو قصدي بس …
رفع ايدة وابتسم
– لا تكملين ، صح حقج عليّ بس لو ما وضعي صدكي ما اكلج ولا اخليج تطلعين .
– هاي شبيك بارون ترى والله بالغلط اشااااقة والله .
– مو أول مره نـــهروان !
تأفتأفت وكمت لبست نعالي ولميت شعري وطلعت مشيت لمدرسة سيف
وكفت بعيد اشوف الطلاب طلعوا وهو اخر واحد شايل جيس جبس يكمز وياكل وشعره يمكمز ويا
وجهه صاير احمر من الحر ضحكت وتلكيته
لطمته على راسة
– امشي عدل ولك .
سيف – هههههههههههههه لعد شداسوي؟
– راح ادفرك امشي يله .
جريت الجنطه منه وامشي ويا وهو ياكل ويمشي
نـــهروان – امتحانك شلونه ؟
– يا أمتحان ؟
– الاثول امتحان الأسلامية .
هز ايدة ودك على صدرة
– حليته كله حتى اكو سؤال كاتبة بي ( مع تنياتي لكم بالنجاح ) كتبتلها رحمالله والديج ست .
هزيت ايدي وبستها
– الف الحمد والشكر الك ربي العقل من الله ، وبعد شجاوبت ؟؟
– اجاني سؤال مكتوب بي ماذا حدث في معركت بدر .
– اي وشجاوبت ؟
– كتبت هي عركه شصار يعني .
غميته وانطيته دفعه طبينه للبيت وهو استلم بارون دك جذب
بــارون – شتكول شراح تجيب ؟
هز ايدة ورفعها يأشر
– اذاا مو اعفاااء اتفلوا عليّ.
– اي من (مع تمنياتي لكم بالنجاح) كتبلها رحمالله والديج تطلع اعفاط مو اعفاء .
.
ضحك بارون
– ليش هو اكو اعفاء بالخامس ابتدائي ؟
هزيت راسي
– اي بس لـ سيف لان رد على المعلمه هو عاجبته الرحله مبين .
ضحك واني رجعت اقره وسيف وبارون كعدوا يتغدون
عفت الكتب وكمت كعدت يمهم
سيف – شو اجيتي ؟
– جعت غير .
اريد اكل جر الماعون مني
– لا يا جلب يا ابن الجلبة .
خزرني بارون وسيف يضحك
بــارون – ميصيررر تغلطين عليهاااا .
شمرت الخاشوكة وتخوصرت
– ليش باله ؟؟ هاي حتى الجنه تبرت منهاا ولا تفتح موضوع خل اتسمم واولي .
بــارون – نـــهروان اولاً هاي تضل امج .
– ولك باارون مو اميي مو اميي لا تخليني اسبها واسب الجابها .
– كافي نـــهروان .
– لا اداافعلهاا وانتَ اكثرر واحد يدري شسووت بينة .
– تضل امج نـــهروان .
ثارت الناار بداخلي كمت ورفعت وركضت طبيت للغرفه وهو ضل يصيح بالهول
طبيت للحمام اغسل وجهي واجر نفس
كلما اتذكر شلون باعتنه علمود رجال ههه رجال ؟ علمود فلوسة
امي باعتنه اني وسيف علمود الرجال من مات ابوية ماكدرت تضل بدون رجال
وما كدرت تتحمل مسؤوليتنه تركتنه بيت جدي اهلها ومن تزوجت طردونه اني وسيف وشمرنه عد بــارون عمي الصغير
اكبر مني بس بكم سنه سيف بحضني وهو صغير
ربيته وكبرته وانه وبارون صرنه اب وام اله وكبرنا وهي ولا كلفت روحها تسأل علينه
صار عدها جهال من هذاك رجلها وتعاملهم معامله مقدسته
ونستنه نست جهالهااا !!
وخلت خوالي يعادونه ونسونه وصرنه منبوذين من الجهتين
اهل ابوي متوفين وبس ابوية وبــارون وعمه وحدة متزوجة بكركوك وما نشوفها غير بالسنه حسنه
طبيت غسلت وجهي وطلعت
لكيت بــارون يدرون بعيونه بالهول
– شتدور ؟
– العكازات توهن جانن هنا .
حكيت راسي متفشله
– شسمه جنت العب بيهن وكسرت وحدة .
باوعلي وغمني ضحكت وجبتله وحدة وساعدته يكوم
اخذته للمغسله غسل ورجعته
نــــهروان – ليش متسوي اطراف ؟
– اسكتي نـــهروان اسكتي .
اباوع على رجله المكطومة بسبب حادث تسبب بكطم جف رجلة
تنهدت ومسحت وجهي مددت على القنفة
نـــهروان – وين راح سيف ؟
– بالاستقبال نايم .
– خل يكوم يقره باجر عنده علوم .
– بعدين كعدي حتى اقري خطية مانايم .
سكتت وحطيت ادية على عيوني اريد انام
توني غفيت واريد اكلب جسمي و وكعت على وجهي من القنفه
شهكت ولزمت خشمي
بــارون زحف ليمي وجرني عليّ
– نــهروان نــهروان تأذيتييي ؟؟؟؟ شوو اشوف خشمج .
– اخخ خشميي يماما خشمييي راححح .
– شجاااج دفرشي بالكاع ونامي .
بجيت ولزمت خشمي
– بــارون خشمي انكسر .
حطني على رجلة ويفرك بخشمي
– سودة علية شجاج يابوية شجاج .
– حموت باع يمكن انكسر .
– شوو اشوف .
لزم وجهي يدور بي ويفرك بخشمي
– لا مابي شي بس عورة صغيرونه مابيج شي .
– والله ؟ يعني ما نكسر ؟
– لا مانكسر .
ضليت نايمة على رجلة وهو يفرك بخشمي ويمسح على راسي واني منا نعسانه
غفيت بمكاني ، ماكعدت اله ورا فتره طويلة فتحت عيوني جنت بعدني بنفس مكاني كمت بسرعة
باوعت على بــارون جان مرجع ظهرة على القنفه وغافي وهو كاعد
فركت خشمي على كيف وتقربت بسته بخدة فز يباوعلي ابتسم وكعد عدل يمسح بوجهة
نـــهروان – ابو الروون سودة علية ليش ماكعدتني ؟
– ماهان عليّ اكعدج شفتج ذبيتي روحج وغفيتي .
مغطت جسمي وهزيت راسي
– اووف اي والله هذا جواد سلك ابوي .
فتح عيونة خازرني وانطاني لطمه على راسي
– شو عينك عينك تسلكين بأبوج وهو بالكبرة يرادلج ضبة .
– شايفني باب وتضبني ؟ بعدين محجيت شي غلط .
– ابددد انتِ تغلطين ؟؟ حشاااااج حشااااج .
ضحكت وتقرب حضنته
– بارونتي تدرين بية احبج وما اتقيد بوجودج ولساني فالت يمج .
دفعني ورفع تك حاجب
– بارونتي ؟؟ نـــهروان اقسم بالله اذا ترجعين تحاجيني بصيغة بنات حلكج ارعطة .
كرصت خدوده
– باروونتيي العصبيةةة فداااوي .
بــارون – ولجج نـــهروان .
ضحكت وكمت
– يلة يلة بطلت ، كايمة اكعد هذا لسة نايم .
دفرت باب الأستقبال وطبيت
– ولك سيييففففف .
فز يفرك عيونه باوعلي وغطه راسة وصاح
– اريددد انااام .
– كوووم ولك خل بــارون يقرريك باجرر امتحاانك .
ماقبل يكوم سحلته من فراشة وشلته وهذا يرافس
– اثبتتت قرردد .
نزلته على القنفه
بــارون – هو هيجج ؟ تعال عمو تعال حبيبي .
راحله سيف كعد بحضنة وبــارون يمسح على راسة
نــــهروان – ديله راح يرجع ينام .
ضحك وباسة
– عوفي معليج بي .
هزيت ايدي وكفت اسويلهم عشة سويته ركض ركض وحطيته يمهم وكعدنه نتعشى
شلتهن غسلتهن وديتله جاي وخليت كتب سيف يمهم وطبيت اقرة
بس كملت كمت شفت بــارون شمحتاج مامحتاج ورجعت طبيت للغرفة
لفيت راسي وغفيت بسرعة
ثاني يوم كعدت من وكت بدلت على السريع ومشطت شعري
نــهروان – سيفففف يله بسررعة حتى اوصلك.
كلتها ودنكت البس حذائي
لبستها وطلعت شايلة الكتب لكيته كاعد يم بــارون يتريك
– ولك سييف كووم مااضل وكتت!
بــارون – بعد وكت تعاي هاج.
سوة لفة ومدها الي
– يلة اكلي.
اخذتها منه وجريت سيف وطلعنه طلعت الجارجر مالتي اقصد باسكلي وطلعت صعد سيف وراي
وصلته للمدرسة ورحت للكلية
اول ماوصلت تلكني البنات سلمن عليّ
– صباح الخير شلونج.
– هلا صباح النور.
– شمشون قارية ؟؟
– غيد انجبي توني جاية عوفي الألقاب على جهة .
– شمشوووون شمشووون .
ضحكت ومشيت للقاعة اني وغيد طبينه وبدت المحاضرة
وبس كملها رحت ركض للكافتريا طكني الجوع
اكلت ورجعت للقاعة وبدت المحاضرات وحده ورا الثانية
من خلصت رجعت للبيت ومريت على سيف لكيتهم توهم طالعين
اخذته ورجعنه
نـــهروان – بشر؟
هز ايدة ونفخ روحه
– امشي عددل ولا تهمبل.
– جاوبت اصلا سهل الامتحان .
– شنو الأسأله ؟
– هو على الورد والبيئة المائية والبرمائيات وها اجاني سؤال على الأكل .
– الأكل ؟ شنو من سؤال هذا ؟
– عرف اليابسة كتبت مركة الفاصولية .
نزل من الباسكل يركض من وكفت اريد اكتلة ضحكت وسقت سريع امشي ورا
وصلنه للبيت وهو طب ختل ورا بــارون و بــارون بدون مايدري شكو صاح
– اذاا تضربينة والله ما احاجيج بعدد .
– بــارون كله كله شجااوبت .
سيف – هسه هي يابسة شبيج انتِ ؟
خزرته وسولفت لـ بــارون
نــهروان – يريد يعيد السنة والله اذا ترسب ياسيف شاايف هاي باب الشاارع ما اخليك تطلعها .
سيف – هسه خل تطلع النتائج وشوفي .
– ايي الفخر للتالي .
شمرت الكتب وكعدت على القنفة
نــهروان – اريد اروح للسوك العصر .
بــارون – شتسوين ؟
– محتاجة ملازم واقلام وملابس .
– ميخالف العصر روحي واخذي سيف وياج .
– لا ماريد اروح وحدي .
كمت صبيتلهم غدة ونمت
للعصر كعدت بدلت واخذت فلوس الحمدلله راتب ابوية
وشغل بــارون الي يسوي ماطورات بالبيت
كدرنه ندبر نفسنه وما نحتاج احد
نــهروان – بــارون اني رايحة عليك الله خلي سيف يقره باجر عنده اجتماعيات .
– ميخالف ، ديري بالج على نفسج ولا تتأخرين .
– تمام ، باي .
– الله وياج .
لبست حذائي وطلعت صعدت على الباسكل ورحت للسوك افتريت على المكتبات واشتريت الملازم
ورحت اشتريت تراك الي وتشيرتات لـ بارون ولسيف اخذت حلويات
واشترت بعد كم شغله علكتهن بالباسكل ورجعت للبيت
اسوق والناس تباوعلي شلون بنية تسوق باسكل راح يطكون
طبيت للبيت وقفلت الباب وراي تلكاني سيف
– هاا اجيتي ؟
– لا بعدني .
طبيت وهو طبب العلاليك وياي
نــهروان – هلاوو .
بــارون – هلا الله يساعدج تأخرتي .
– ويساعدك ، ايي اشتريت شغلات الكم غير .
طلعت الملابس وانطيتهميا ضحك واخذهن
– عاشت ايدج .
– الف عافية .
لميت الغراض ضميتهن بالغرفه وصفيتهن وكمت اسوي عشة
كملته وحطيته وكعدنه نتعشة
بــارون – سيف باجر شعدك امتحان ؟
– اجتماعيات وراها بس فنية ورياضة هنه هذني اخر شي خلصنه .
– خوش جا نام ماطول ماعندك شي .
هز راسة وكمل اكل وراح ينام
غسلت الماعين وكعدت يمه بالهول وهو يكلب بالتلفون ضليت كاعده يمه اكلب بالتلفون وغفيت بمكاني
ماكعدت اله ثاني يوم
بدلنه بسرعة ورحنه اني عندي اخر امتحان اليوم ونكعد
وصلت سيف ورحت
وبس خلصت مريت على سيف اخذته ورجعنه للبيت
طبيت شمرت الكتب وسيف شمر الجنطه فارغه لان سلم الكتب
بــارون – هاا هااا شبيكم ؟
وكفت اركص بالنص اني وسيف واغني
– اريدد ارباااي منك يبني ربيتتت كل النااس اجتني وانتَ ماجيتتت
مثل جنااز رد بطرك تاابوت هيج انا بعشرتك اني رديت .
شال بــارون الكتاب وشمره عليّ
– ولج خبلة هاي على الشهداااء .
– يعني بربك اكو وحده عدها شهيد وتسمع هاي .
هزيت جتف كداني وغنيت واني اركص بحواجبي
– ارجع خل اشوفك حالي تعبان صفت بعدك حياتي احزاان بحزاان .
ضحك وغمني
– متصيرلج جارة مسودنه .
ضحكت وكعدت بصفة
– خلصتتت خلصتتت راح اتلفت لحيااتي شووية .
– لا وفرحانه تلتفت ليش هو شكو غير الكلية بحياتج ؟
– هوواي مثلا انتَ وسيوف واني التفت النه شوية همزين اجت العطله اخذكم نزور ونونس شوية شتكولون ؟
– ميخالف بس مو هسة خليها كم يوم ترتاحون ونصفي امورنه ونروح .
كمت الم الكتب واغني
– لو كلبي عنده جناح يشوفك ويرتاح ويرد الية
موتني صار سنين يسأل حبيبي وين شمسوي بية
ليل ونهار يمر عليّ واسهر ليالي وانوب كلبي ماسكت
عذبلي حالي .
بــارون – هسه غير يستقر قائد حلمي .
شهكت وشمرت الكتب من ايدي
– لوو ادرري حبنه يصير ذلة ومهااانة شلت الكلب حطيت صخره بمكانه .
ضحك وصاح
– ولجج تأدبييي وبطليي دك وركص سودنتيني !!
ضحكت وكتله
– ابطل اغني كلشي بس اغنية قائد ما اعوفها رجاء لا تمنعني من هبيبي .
– تعاي يمي انعلج انتِ وهبيبج .
ضحكت وكمت لميت الكتب كلهن وعزلت البيت واني مشغله اغنية لو كلبي عنده جناح
اعشق هاي الاغنية عشق عشق وبــارون يتعارك وياي ميقبل اغنيها
كملت تعزيل البيت وكمت اسوي العشة وكعدنه نتعشى
نــهروان – بارونتي باجر الصبح اروح للسوك .
– شتسوين ؟
– ماعدنه مسواك اريد اسوك وهل مرة اخذ سيف وياي .
– ميخالف .
كملت اكل وكمت سويت الجاي وحطيته يمه
سيف – عمو .
بــارون – ها حبيبي ؟
– اريد اشتري مُبايل .
نـــهروان – مُبااايل شنو وشتسوي بي ؟؟؟
بــارون – على كيفج نــهروان شبيج ، شتسوي بي عمو ؟
باوعلي بخوف ودار وجهة
– عمو اصدقائي عدهم مُبايلات ويكولون بالعطلة يكعدون بهاي القطعه البصفنه ويلعبون بيهن وكالوا جيب مُبايل وتعال العب ويانه .
خزرته وكمت
– مااكو تلفوون .
بــارون – نـــهروان !!
– بــارون مستحيل ممنوع ممنوع تلفون .
– شجاااج نــهروان لا تخليني اسويها عناد واجيبلة احترمي نفسج واسكتي .
باوعتله وكمت طبيت للغرفه
ضليت كاعده بيها وجسمي يرجف من العصيبة استاذ سيف يريد تلفون وهو بهذا العمر من سابع المستحيلات اخلي يشيل التلفون
طلعت برة لكيت بس بــأرون كاعد وحاط ماطور كدامه يشتغل بي
نــهروان – اريد احاجيك .
باوعلي ورجع دنك
– احجي احجي .
كعدت كدامة باوعلي وكال
– شبيج انفعلتي من سيف كال اريد تلفون ؟
– بــأرون سمعت شكال ؟ تلفون ويكعدون بالقطعه
مستحيل اجيبلة
بااارون سيف جاي يكبر تعرف شنو يعني ؟ واذا اجيبلة التلفون راح يتعلم شغلات منه
وهذولة ربعه كلهم طايحظهم وبس اني وانتَ يمه اذا كبر مانكدرنه
اذا ما اسيطر عليّ من هسة مستحيل اكدرله اذا كبر صدكني انتَ شتكدر تسويله؟ واني بنية باجر عكبة اذا كبر وسوالة مصيبة منو يطلع ورا اني لو انتَ ؟
باوعلي وهز راسة كملت كلامي
– وبعدين سيف اليشوفة ميكول هذا ولد على جمالة ابيض ومعانية طفولية وعيونة التجيب التايهة وهو ناعم
بربك اذا لزمة ولد شيسوي بي ؟ ماسمعت بـ علاء الاغتصبوا وشمروا باب بيت اهلة
وانوب يريد يكعد بالقطعه مال المشبوهين بــارون سيف ماكدر افرط بي
وجاي احاول بأدية ورجلية اسيطر عليّ واخلي يلتهي بس بدراستة والتلفون راح يلهي ويفتح عيونه على شغلات ثانية احنه بغنى عنها .
رفع راسة باوع بعيوني ابتسم وسحب راسي باسة ومسح على خدي
– عاشت ايدج هذا الكلام الصح ما غلطت من انطيتج كل الثقه
اعرف انتٍ خايفة عليّ وكلامج مابي غلط و الله يلوم اليلومج
بس نــهروان كثرت الدك على الحديد يطك خليج ويا لينة لا تقسين وتخلينه ينفر منج .
– ان شا الله .
ابتسم وكام
– يلة كومي شوفي وين راح .
هزيت راسي وكمت رحت للاستقبال ماهو هناك دورت عليّ جوة ماهو
نـــهروان – بــارون ماهو سيف جوة .
– شوفي خاف برة .
هزيت راسي والخوف ترس كلبي طلعت برة جريت نفس وحطيت ايدي على كلبي
جان كاعد بالحديقة ومرتاج على الحايط وصافن
رحت كعدت كدامة وباوعتله
باوعلي ورجع دار وجهه لزمت وجهه ودرته ناحيتي
– عادي نسولف اني وياك ؟
هز راسة وباوعلي
نـــهروان – سيف اني شنو اعنيلك ؟
جر ايدي باسها وهمس
– انتِ أمـــي .
برطمت بوجهة وجريته عليّ بسته وحضنته ولزمت وجهه بثنين ادية
– سيف اعرف اني قسيت عليك بس صدكني من خوفي عليك
سيف اني لو اعرف المبايل بي فايدة الك لو واحد بالمية ما اتردد اجيبة
بس اعرف التلفون راح يضرك اكثر من ما ينفعك واذا صدك
تكول انتٍ امــي وتعرفين مصلحتي ماريدك تزعل مني .
سـيف – اني ما ازعل منج بس ضايج من نفسي لان زعلتج .
ابتسمت وحضنته حيل
– فدوة لوجهك يروحي ، صدكني بس تكبر شوية اجيبلك احدث نوعية وتدلل
وبالعطله ما اخليك تطلع ويا اصدقائك بالقطعه نخلي بارون يطلعنه ونخلص فلوسة كلهن اني وياك .
ضحك وهز راسة
اخذته وطبينه جوة اني ويا تلكانه بارون ابتسم وصاحله
راح نام يمه
واني طبيت للغرفه توضيت وكفت اصلي الصلاة الي ماصليتها بالأمتحانات واقضيها بس كملت نمت فورا
مرن كم يوم وبارون كال خل نروح نزور
سيف – كوول والله ؟
– اي والله يله بدلوا .
ركضت على السريع لبست ثوب نيلي طويل ولبست ويا حجاب ولفيته شلون مجان ماعرف البسه
بس من نروح زيارات ولبست عبا
طلعت برة لكيت بارون لابس البنطرون وسيف يساعده يلبس التشيرت
اخذته منه وكتله
– انطيتي روح البس بسرعة يله .
جره بارون وصاح
– ترى اديه مابيهن شي!!
ضحكت ولبسته اله
– عادي بارونتي .
ابتسم وكام وكف حطيت العكازات يمه بعد ما سوة المكسورة وكدر يوكف عليها
طلعنه كلنه من البيت وكفنه على الشارع العالم اخذنه تكسي وذبتنه بكراج الأمام الكاظم
نزلنه ومشينه لحد ما وصلنه التفتيش
بــارون – نــهروان انتبهي ومثل كل مره تمام ؟
هزيت راسي بأي وهو راح دخل للتفتيش ويا سيف
دخلنه كم تفتيش والتقينه بمكان طبينه زرنه وصلينة صلاة الزيارة وكعدنه هناك
باوعت على سيف وبارون كاعدين ويسولفون سوة ابتسمت وكمت
بــارون – وين نــهروان ؟
– اروح اجيبلكم لفات واكل واجي .
– نــهروان .
باوعتله نظراته كلهن قلق وخوف
– ديري بالج على نفسج بنيتي .
ابتسمت وهاي كلما اطلع وحدي او اريد اروح لمكان لازم يكولها
نــهروان – تدللين بارونتي .
ضحك ودار وجهه على سيف
رحت للسوك افتر اشتريت لفات وببسي لان جعنه واشتريت جبس وحبشكلات
حاسبت ورجعت اريد اكعد يمهم
بعدني ما طالعه السوك وانلطمت بشخص على اثرة رجعت ليورة وكع مني جيس الجبس وصار لان ما مشدود
شهكت وباوعتله رفعت راسي فاتحتهن بصدمه جان رجال جبير بالعمر
بس جان طويل وبنية جسمه مو مال رجال جبير والشيب تارس راسة ولابس نظارات
نزعهن وباوعلي من فوك لجوة وابتسم تك
يتبع …
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.