رواية الموروث نصل حاد – الفصل الرابع والخمسون
♛ 54 ♛
هزيت راسي وجمعت قوتي حتى افهمهم
مُـرجانـة : أول سبب اني ما أريد واحد مثل شهاب
يكون إله فضل علي ، ما أريد يدخل مؤبّد على أساس
أخذ مكاني بتهمة قتل وأنا مالي أي ذنب بيها
سيدي اجيت اعترف أنا اللي ضربت صلوات مو شهاب .
توجهت انظار المحامي على شهاب والقاضي والمساعدين
وياه ، وبيرغ وصدمته بكلامي كلهم يباعون على شهاب
الفاصل عن العالم واگف ما تحرك ولا ينطي رد فعل
القاضي : ليش ضربتيها وشلون ؟
مُـرجانـة : ضربتها دفاعاً عن النفس جانت
تضربني وتريد ابنها وإخوانه يغتصبوني .
_ ليش ؟
_ حتى يحرگون گلب وارث .
_ وارث زوجج ؟
_ اي زوجي .
نزل بيرغ راسه ولزمه قوي
القاضي : شنو الصار احجي ؟
مُـرجانـة : بيومها قنعت ابنها شهاب يتقرب
بس توسلت بي وهددني لو اسافر وياه لو يغتصبني
اضطريت اوافق اسافر وياه ، وطلع قنعها على اساس
اغتصبني وبلغها بقرار السفر ، وهي ما جانت راضيه
بس تمثل خلته يطلع وگالت لأخوانها حتى تلعب
روح شهاب مني يدخلون اخوانها واني ضربتها
اعترف بس لأن جانت تريد تربطني فقدت واذيتها
واخوانها ضربوني رادوا يموتوني شهاب دفعهم
ضربهم راد بس يخلصني منهم ما اتذكر بالضبط
شصار بس سمعت صوت طلق وشفتهم ميتين كتلهم .
القاضي : يعني مو شهاب قتل صلوات ؟
_ لا اني .
_ قتل خواله فقط ؟
_ اي صح .
وقبل لا ينهي الكلام ما اكدر انام ليلي اذا
ما ارجع كل حق لصاحبه حتى محد يمنني
مُـرجانـة : والعمارة سيدي تابعة لوارث اخذوها
بالتهديد اريدها ترجع لوارث هي بأسم شهاب صارت .
سمعت طگه وبيرغ فز من مكانه درت عيوني
واشوفه لازم ايد وارث واصبع وارث معووج
بيرغ : كسرررت اصبعك وارررررث تخبلت .
نشف الدم بعروگي بس شفته شلون خازرني
حسيت بالموت نزلت راسي أمسح بدموعي
والقاضي يحجي ويه بيرغ يطلع وارث بس
ذاك لا يسمع ولا يرد فاصل اعصابه تفور
القاضي : شهاب ساجر اكدر اعرف ليش
لبست لنفسك التهمة كلها ؟
ما سمعت رد شهاب درت وجهي عليه
عيونه تلمع يباع عليه مقهور وما قبل
يرد على قاضي ظل كاتم صوته .
طلع وارث من المكان وبيرغ احتار بين يروح
وبين يظل والقاضي رجع يسأل بشهاب على نيته
شهاب : ما ردتها تتعذب بالمراكز والمحاكم .
قاضي : بس عذبتها من خطفتها وهيَّ حامل .
فك عينه وهز راسه دمعه من عينه طاحت
شهاب : حامل ؟
صوت صياح وعركه برا صدح بكل المحكمة
وارث وعمي ضـلـيل هزوا المحكمة بصوتهم
وصريخ الحرس عليهم يريدون يوگفوهم
المحامي : سيدي اقدم طلب رسمي لإعادة النظر
بحكم القتل، مستندًا إلى الشهادة الجديدة لو سمحت .
القاضي : الطلب مقبول .
والتفت على بنية طلب تكتب وهوَ يحجي
_ وفق الشهادة الحديثة وبناءً عليها يتم تعليق
حكم المؤبد للمتهم شهاب ساجر لحين اكمال
التحقيقات بملف القتل من جديد .
اجه المحامي يمي حتى نطلع وقبل لا اوصل الباب
شهاب صاح بأسمي فتحت الباب وهوَ يسمعني
_ سامحيني.
_ ما مبري الذمة شهاب خربت حياتي .
اول ما وصلت الباب سحبني شيخ فؤاد من
عباتي ويمشي بيه سريع ، التفتت على وارث
لازم عمي ضـلـيل من ملابسه وعمي ضـلـيل
قابض على رگبته قوي وارث يصيح
_ انتَ متعمد وتفرح وتصفك الهااا حتى تكسروني .
شافني من بعيد دفع عمي ضـلـيل واجه باتجاهي
يمشي سريع وگف بوجهه بيرغ وتراث لازمي
يدفعون بي بس طلعنا المحكمة عافوا صعدني
شيخ فؤاد بسيارتهم ويمشي سريع
مُـرجانـة : وين رايحين عمي ضـلـيل ما يقبل .
فؤاد : وارث اذا اطيحين بيده هسة يشرب
من دمچ ابني واعرفه خليني اوصلچ على بيتكم
عمچ راح يظل يتعارك وياه الحد ما تكبر ما اريد ابني يتورط .
رن تلفونه جاوبه يحچي هو وعمي
ضـلـيل بلغه ، نزلت ادك بالباب ورجلي ترعش
بردت ثلج جسمي بس وصل وارث وشخط
السيارة عافها مفتوح ونزل ، وعمي وراه سيارته
وكف شيخ فؤاد گدامه فتت للبيت اريد اتخربط
الدنيا كلها تفتر بيه وهوَ صوته يملي كل مسامعنا
وارث : ولك بوووووية أدافع على شهاب تخفف بحكمه .
_ ولك ما تريد يمننها .
_ جذابة بووووية جذابة ترريده يطلعععع .
لزمتني امي ، وشاهين طلع من بيت عمي مقتدر
على اصوات يركض وگف بالباب لازم وارث
شاهين : شبلاك وارث عيب صوتك منا العالم .
ضـلـيل : عوفه بالله شيسوي .
وارث : كلشي اگدر اسوي حتى اكتلك واموت بنت اخوك .
ضـلـيل : امشي من بيتي احسن لا اخليهم يملخوك .
فؤاد : ضـلـيل احترم نفسك ولا تحجي هيچ
ويه ابني وانتَ وبتكم حارگين گلبه لا وعلي
هسة اسوي الدم للركب .
ضـلـيل : عجل اخذ ابنك وروح منااااا .
وارث : جيبها اريدهااااا طلعهااا احاجيها طلعها
اخذها اليوم ويااايَّ اربيهااا ، جيب حرمتي بساع
لا وبدر الهواشم اخليك تهجون من بيوتكم .
نزل بيرغ واولاد فؤاد اربعة من السيارة
وتراث تقدم من عمي يتعارك وياه
_ تفوتها بنص المحكمة ادافع على واحد خطفها
مخابيل غيررررة ماكو كبور لتلفكممم كون .
دفعه شاهين وشيخ فؤاد يصيح من صوب
وارث يريد يطفر يفوت للبيت وامي لازمتني
مقتدر : منا العالم ضـلـيل خليهم يفوتوني للديوان .
ختلت بالمطبخ اريد اصعد اول ما دخلوا كلهم
وارث صوته خشن يعيط بيهم يريدني
اجه شاهين لزمني من عباتي خفيف وداني
على ديوان اني دخلت وگع گلبي من هجم
وارث عليه ، دفعني شاهين وراه على باب
وبيرغ وتراث لازمين وارث ما يگدرون عليه
وارث : ولچ تخبلتي لو نخطفتي ؟ انتِ عقلچ
شبي مضررروب خررب بيرغ بس عووفوني
خلوني الززززمهااا لچ بعمري ما مديت ايدي
عليچ بس كون اطيحين هسة بيدي وحگ العباس
من دمچ اشرررب وما تبررد نااار گلبي بيچ .
شيخ فؤاد صار بوجهه يلزم بوجهه ويرجعه ليوره
يريدونه يگعد واسمر اجه وياهم يلزم بيده وهو متخبل
فؤاد : لك بس اسمعني وارث بوووية .
وارث : اريد اطلگهاااا بوية اكتل روحي اذا هاي
بنت الچلاب تظل على ذمتي اليوم ليلي ما
يمررر احرگهمم حرك اذا تخلووها على ذمتي .
غطيت وجهي اختنگت من البجي وشاهين
مصدوم وحتى عمي ضـلـيل بهت من عاط
بگلب محروك وصوت مقهور
فؤاد : حامل ولك بوية مايصيررر .
وارث : خليهااا تموته ما اريد طفل منهاا بوية
دخيل العباس شوفلي حل طلگهاا ما اريدهاا .
ردت اوگع اول ما گعد وارث على تخم لازم گلبه
وبيرغ رجع راسه يفتح بقميصه ويصيح
_ وارث تنفس عليك الله كافي والله نشوف حل والله .
عدل وارث گعدته وشيخ فؤاد يغسل بوجهه
فؤاد : اليوم نطلگها بس اگعد ارتاح .
وارث : كسرتني بوية كسرتني
جنت مخلي روحي فداء لروحها دمرتني .
وگف يلوب يباع عليه يريد يلزمني وكلهم
يصدون بي واكفين بالنص يلزمونه يقنعون بي
عمي ضـلـيل راح عليه لزمه من ايده وغصبه يگعد
وشيخ فؤاد والولد وياه
ضـلـيل : اذا تبقه تصيح ماتنحل .
وارث : الله يكسر گلبك مثل ما كسرت گلبي .
ضـلـيل : عمي اذا غلطان الله يكسر گلبي .
وارث : كون يتلوع وتحترك مثل ما خليتها تهدم حيلي .
_ كون الله يسمع منك اذا جانت نيتي باطل لو
فكرت اخليك تنقهر ، وراس فارس سوينا الصح .
دگ وارث على رجله وصاح
_ تفوتها محكمة ادافع على شهاب خطفهاا ونزل راسي
وذلوني صح هذا الفعل صح وين الصح وزوجها
ما يدري حتى ما تنطيني علم طرطور گدامك !
ردت اطلع خفت عليه ومنه ، ضايعة ما ادري
شصار بس ردت اخلص من هم شهاب
وابري ذمتي من خطيته ، ما اريد ينحكم
باطل بقضية امه وبراسه يفكر على اساس
تستر عليه وهوَ بالاساس مورطني ، نرگعت
النفاضه مال جگاير بالباب وعاط
وارث : وين وين ماكو روحه هسة نولي نطلك .
بيرغ : ول حامل ميصيرررر وارث كافي دخيل الله .
فؤاد : تريد تموت ابنك ولك اصحه لا تخلي عصبيتك
تعمي على گلبك وعيونك اذكر الله بوية هنا باوع عليه
عوفهاا لا تباع عليها خليهاا تروح تفووت .
وارث : ما تفوت هسة تخلصوني منها .
اجه عمي ضـلـيل لزمني وطلعني وصياحهم
وخوفهم عليه وعلى حالته وتراث يلزم بيد
وارث مكسور اصبعه ورم ونعوج شكله يقبض
الگلب وجهه لونه مخطوف وتنفسه سريع
يشكي لشيخ فؤاد اول ما دخلت شفت امي
بالمطبخ طالعة روحها من عدنا
غـاليـة : ارتاحيت انتَ وبنت اخوك سويتوها
خليتوه مايريدها ولا يريد الطفل گلبك برد ضـلـيل ؟
رفع اصبعه يحذرها وصاح بيها
_ نفس ألج ما اسمع هذا الصح .
غـاليـة : لوعة گلبه ما تتعداكم وتشوفون .
_ غـاليـة حجي زايد ما اريد مـا عاجبج توكلي.
نقش : عمو كافي فدوة لا تزيدون المشاكل علينا .
گعدت بالمطبخ كل شهگه تطلع من صدري تذبحني
صوته مرد روحي وكلامه ويه خالة حطمني
ما اريده ينقهر والقران ماردت توصل لهنا
بس شلون اخلي واحد ينحكم مؤبد واعرفه
انظلم من ابو مثل ما ظلمهم هذاك هم مظلوم
يستاهل كلشي يصير بي صح ، بس صعب
اكمل حياتي واني اعرف حقيقة خافيتها .
فزيت على ضرب وعركة بنص الديوان ورد شاهين
صاحني رحت حتى ما اگدر افوت صاحني عمي
ضـلـيل رحت قريب منه مخليني وره ظهره لان وارث
يشرب بالجگارة ومقابيله نفاضه يحومي عليها
شيخ فؤاد : رايحين نستفسر على سالفة الطلاك
وهي حامل والله لو تسمع مني بوية وارث
وتعوفها بعد الولادة طلگها و.
وارث : گلت هاي اليوم ما تظل على ذمتي وانتهى .
شيخ فؤاد عافه وكعد يحجي هوَ وعمي ضـلـيل
على حادث شلون صار اني حرف ما امدر انطق
بقيت كاعدة افرك اصابعي وبيرغ يستمع خجلت
منه بس امه تستاهل ، وتراث يسب بشهاب واخوانه
يحجون وياه ووارث على اعصابه يسحب نفس
من الجگارة ومنزل راسه صافن على گاع ريتني
اعرف بشنو يفكر وشنو براسه ، ما شاركهم ابد
بأي موضوع وبيرغ بلغهم بقرار القاضي
وهمه يحچون ما منتبهين كلهم منفعلين
رفع وارث عيونه يباوعلي بقهر عيونه
كلها عتاب خازرني بس مقهور مني
لدرجة كاعد وصدره يصعد وينزل من
العصبية وايده ترعش رعشتها مخيفه .
غمض من وگعت دموعي مسحتهم وهوَ نهض
عافهم وطلع وبيرغ وتراث راحوا يمشون وراه مستعجلين
فؤاد : لا تعوفون اخوكممم تراث بيرغ بوية ركضوا .
وگف شيخ فؤاد ورفع ايده يحذر بعمي
_ راح احاول اهدي اعصابه ، بس صدك يا ضـلـيل
بعد اي غلط منك لو من بتكم يصير ويأذي ابني
راح تخسر صداقتي وتعرفني اذا صدت عدو
بعد صداقتنا اتعبك انتَ وشكو واحد يساندك .
عافنا وطلع هوَ وولده وياه ، مشيت فتت للبيت
لگيت بس نقش بالمطبخ دموعي تجري وسألتها
_ وين امي .
_ بغرفتها عوفيها هسة مُـرجانـة عصبية .
ما اهتميت ورحت دكيت الباب وفتت لگيتها
كاعدة بالكاع فارشة بطانيه وتكوي بملابس
عمي ، من شافتني تخبلت اجت تريد اطلعني
لزمت ايدها بستها منهاره
مُـرجانـة : لا تعوفيني فدوة يمه تعبانة .
غـاليـة : وياج بالحق على باطل انا ضدچ .
تمسكت بملابسها وگعدت بالگاع املخ بشالي
وشعري ووجهي وعطت اتوسلها
_ ماغلطت هذا حق والساكت عنه شيطان يمه .
غـاليـة : يا حق ولچ وهوَ هجم بيتچ خطفچ من غرفتچ
بملابس نومچ ويصورچ لزوجج نايمه بملابس
النوووم يااا حق ولچ هذا يا عذر تحجين بي
دمرتي الزلمة دمرتي رجال بيوم ما باعوچ اهلچ
هوَ اشتراچ برروحهه ، رحتي دافعتي على عدوه
الله يصخم وجهج كون الله يصخم وجوهكم .
سحبتني قوي من ايدي وصار بالنص عمي ضـلـيل
اخذني من ايدها وهي فقدت تصيح
غـاليـة : ناكرة للمعروف وغبية خفتي على مجرم
ما خفتي على زوجج ، رجعتي معاديته ما تريدي
ورحتي دافعتي على خطفچ ، بيا عقل تفكرين
قندره براسچ هجمتي بيتج ولچ خليتي
حتى ابنه ما يرررريده مااايررريد الطفل ما يريده .
ضـلـيل : البنية مريضة .
غـاليـة : وانتَ هم گلبك مريض انسان حقود
باقية بكلبك شلون صار احسن منك وحماهااا
بوكت ما انتَ واهلك بعتووووهاااا .
ضـلـيل : راح ارفع ايدي واكسر سنونچ .
غـاليـة : كسرررهن اجيتوا تريدون اوكف وياكم
على باطل اسمعوا لو تطلعون بررررا ..
فاتت نقش لزمت امي تريدها تسكت
وشاهين يطلع بعمي ضـلـيل وهيَّ تصرخ
غـاليـة : امشي اطلعي برا انتِ دمچ خبيث مثّل اهلچ
حذرتچ وما اخذتي بنصيحتي عيشي ثمن خباثتچ
وتهور عمچ امشي وره الدمرچ .
ضـلـيل : غـاليـة كتمي اثمچ لا اجي اكتمچ
ما سوت الغلط الباطل من تسكت .
غـاليـة : وانتَ شنو حبيت الموروثين ورحت ادافع
على واحد بيهم وطلع حتى مو اخووهم ، لعد انتَ
مو حرگت بيوتهم ، لو شفتها بيها كسرة للزلمة
الحافظ على عرضكم وگلت اجتني للحلگ اروح
انعل خيره ارگعه على وجهه وسويتهااا وخليته
يتخبل تخبل الزلمة .
مُـرجانـة : راح تعرفين بعدين احنا ما غلطنا
والصار هوَ الصح وانتوا الغلطانين .
غاليه : ههههههههه نسخة من عمچ نسخه .
ضـلـيل : وهذا الموجود عاجبج اهلا وسهلاً
ما عاجبچ عوفيهم ولمي ملابسچ وروحي لبيت امچ .
تقدمت صارت مقابيله وضحكت وهي تأشر
بيده وره ظهره وتحاجي بدم يغلي غضب
غـاليـة : هاي جانت قبل ضـلـيل مال لمي غراضچ
وعوفيهم وروحي ، هذا البيت صار بيتي لو نسيت
اخاف صابك زهايمر ونسيت انتَ سجلت هذا البيت
بأسمي بولادة ابنك ، هسة اذا كلامي ما يعجبكم
انتوا جمعوا ملابسكم وروحوا البيت اهلكم .
ضـلـيل : ماكو غيري فرعنچ يا عرمة يا بنت ذياب سهلة .
غـاليـة : ماكو بعد سهل وين سهلة .
شاهين : عمي دخيل ربكم كافي فارس يبجي كااافي .
اخذه وطلع هوَ وياه ، طلعت وعيني عليها لزمت بطني
من المغص والتقلصات الصارت وصعدت فوك ، اجت
نقش فتحت الباب من بين دموعي حاجيتها
_ لا تصيرين مثلهم وتعوفيني عليج بداعت امي فهميني .
فوتتني على غرفة ذبت عباتي وعدلت شعري
لزمت ايدي تمسح عليها وتبجي
نقش : حرامات خسرتي ابو ابنچ
چان عندي امل ترجعون وراح من شفته
بعد لو يموت ما يلتفت ويريدچ كرهچ وارث خسرتي .
مُـرجانـة : وروح ابوية ما ردت اقهر وارث وروح ابوية ما اكرهه
وما ردت يشوفني جنت ابري ذمتي عليج الله فهميني ليلي
ما انامه شهاب چلب اي بس همه وصلوا لهل مرحلة ابو ضحك
عليه وخسر تعبه بالأراضي وتخبل وطلع مو ابنهم وزاد بصدمته
وصلوات براسه شهاب ما عنده ام وارث وتلين بگلبه على اخوت
صلوات شيطان سرطان وسرت بدمه ، اكرهه وما اطيقه بس
ما ينظلم بموت امه لان المؤبد اهذه على قضية امه ، راح يظل
مسجون اني ما طلعته هوَ خاطف قاتل انتهى بس مو مؤبد
حرام اسكت حتى لو عدو ، وعمي ضـلـيل معلي اني توسلت
بي وكتله اثبت انتَ تغيرت واوكف ويايه خلي ضميري يرتاح
وساعدني هوَ مايريد ينتقم من وارث ولا خاقد عليه بالعكس انقهر
عليه هوواي انقهرررر بس ما يكدر يسوي شي بعد هذا الصح .
نقش : افهمچ بس مو هذا الصح .
مُـرجانـة : انتِ تشوفي غلط واني اشوفه صح .
نقش : اتمنى ما تتندمين بعدين فكري زين .
ملِكه …
فاتحة كل شبابيك البيت ، والبوب واعدل بالتخم
وام وارث بيدها مبخرة تبخر بالبيت وصوت القران عالي
ام همام گاعدة على صفحة بالصالة تخيط جراجف
المخاديد ، فزيت على دفرت الباب ودخل وارث
وراه بيرغ ، شنو غير يموتون اذا يعدون يوم
بهدوء مايصير استغفر الله حرام ينتهي اليوم
اذا مو مشكلة تاكل شهر وتنحل لو بيدي اربطهم
بغرفة واكتلهم حتى يتوبون من المشاكل
هسة صلوات وماتت حجتكم بعد شنو .
ام وارث بالغرفة مالتها وعينها على باب المطبخ
فات وارث گبل على غرفتها وقفل الغرفة عليهم
صوت القران عالي بس صوته صار اعلى
وارث : ثگل الهم على گلبي يمه .
نصت ام همام صوت القران واجت على بيرغ
_ شصاير يمه خيركم .
وگفت وراها اسمع بجوابه وبهتت على صار
وميمونة واكفه فوك تسمع عيونه كلنا توجهت
على غرفة ام وارث على صياح وارث
_ اخخخ يا وجع روحي مايطيب غلطة
ولو يرجع امس مـا أعاودها هدّمت گلبي يا يمه .
رد بيرغ دخل شيخ فؤاد واولاده بس تراث ماكو
بينهم ، سويت جاي اجهز بي ومصدومة بمرجانة
هاي معقولة صلوات شربتها مو بعقلها ، اجه بيرغ
شافني احجي ويه روحي
_ ها مخوطره اخذچ هسة المستشفى المخابيل لو لباجر .
خليت الخواشيگ بماعون الاستكانات وجاوبته
_ ما ظل عقل براسي من مشاكلكم مو عائلة كارثة .
_ من عرفتچ وعرفتيني مخبله مو بالجديد .
_ لا والله بالجديد تخبلت وياك .
اخذ الصينية من ايدي وگف بكل ثقة يحاجيني
بيرغ : تعرفين ليش ؟
_ ليش بتليت بيكم ؟
_ اي .
رجعت على كاونتر اخذت شوية خبز اكل بيها
ملِكه : لا والله ما اعرف أتحفني بذكائك سيادة المقدم ؟
بيرغ : مو يگلج الله ما يضرب بحجار ضربچ بينا
عقوبة احنا حتى تبطلين تصيرين بربوئه وتتعاركين بالشوارع .
_ هههههههههه لا يا سويقط .
غمز وعافني وراح يضحك ويحرك راسه اي عود
يأكد كلامه واني عبالي راح يحجي شي مفيد علمي
صدك هل رجال سويقط ،هسة اذا أحد سمعه شيگول
محليه كرسي بالشارع وتتعارك هي اول عركة اليه
وياه بالشارع ، لا والله وقبلها كتلت ام بنية ويانا
بالمدرسة بس جانت بسبب غير اجت تسبني
لأن ما انطي دفتري لبنتها ، ومرة سحلت ابن
عمي من جان صغير لان كتل اختي ومرة فشرت
على ابو المحل لأن ضحك على اختي وانطاها
حلويات خربانات وبعد هواي والله هنه بس
كلهن بسبب قابل مخبله اتعارك وحدي
اقوه عركة عندي سحلت مقدم بالشارع وتزوجني
لو ساحلني اني وعشيرتي وماخذ سيارتنا ولا نازله
كون متخربطة واگعه ولا نازله بذاك اليوم صدك اني بربوئه .
رجع بيده استكان جاي لگاني ادردم
بيرغ : هسة تحملي بس يطلعون الزلم اقرب شماعيه .
ملِكه : اخذك ويايَّ انتَ واهلك .
صب لروحه چاي وباع على غرفة ام وارث
ولزم راسي من گصتي حيل ودفعني على كاونتر
بيرغ : شنو انتن النسوان تهجمن بيوت وگلوب .
ملِكه : دعوف وجهي منا العالم لا اخليك تصرخ.
_ عوفنا بحالنا لا تقهرن بينه حقيرات .
_ انتوا حقراء عوفني ولك روغانه .
_ روغان بحلگج شو ما تخافين مني ؟
ضربته حيل على ايده وهمست حتى ماينسمع صوتي
_ اخاف بس من الله .
_ هسة اصعد روحچ هسة .
_ دعوف راسي راح تندفرر .
_ لا تقهرناااااااا .
_ هههههه عوفني تخبلت .
_ احرگچ اذا تقهريني .
ضربته على ايده اخذ الجاي ورجع يمهم
فات تراث بيده التلفون ودخل على استقبال
متنگ منفوخ وجهه ما يگصه السيف رافع خشمه
صعدت على ميمونة لگيتها راجعه على فراشها
ولازمه ضلعها يوجعها كله رضوض من الضرب .
شربتها علاجها وهيَّ ما بطلت بجي على وارث
عفتها ونزلت شفت وارث طلع برا ، وام وارث
لبست عبايتها وفاتت على استقبال تحاجي اخوها
الولد من شافوا طلعوا ورا ، وامه اسمعها تبلغه
فؤاد : هذا وين رايح ؟
ام وارث : رايحين للعباس نزور .
فؤاد : عمي البت صغيرة وحامل شايله حفيدچ
رايحة تسلموها للعباس انتِ وابنچ شني
هاي بدل ما تبردين گلبه منها لا يروح يأذي
البنية لو يقفل على طلاك شمالچ خوية .
بجت بجي ام وارث حضنها وهي تشكيله
_ ما ادعي عليها ، ولا هوَ يگدر خوية
بس خلت وارث ينكسر تعرف شني معناتها
وارث چبيرهم يگلي گلبي يريد يوگف من القهرر
تبچي ليش شمسوي وياها بشنو اذاها بس
گلي اذيته شني حتى تحرمه من فرحته وادافع لشهاب .
گعدها يفهمها الصار بيوم مقتل خوال شهاب
فهمها على كلشي عافته وطلعت صعدت بس
هي وارث وراحوا ، وشيخ فؤاد رد للبصرة هوَ واولاده .
دخل بيرغ ذب ملابسه وفات سبح ، وميمونة
نزلت بغرفتها هي وامها من بعد ايام خلصتهن
فوك ، جهزت صينية اكل وصعدتها على غرفتنا
لگيته ماكو بالغرفة وباب الحمام مفتوح
رحت على محجر ورفعت راسي شفت غرفة
همام مفتوح بابها والأضاءة كلها ، رجعت على
غرفة عود شنو هاي سوالفه شبي يستنكف
ينام بالغرفة ، حاولت قفلت الباب عليَّ بقيت
افترر افترر اشوف الأكل واتذكر تعبت بترتيبه
وارجع انقهر ، ماتحملت فتحت الباب وصعدت
لگيته متمدد وعايف الباب مفتوح من شافني
عدل گعدته ومسح عيونه وظل منزل راسه
رحت بوضعيه هجوم طارت عصبيتي
ملِكه : بيرغ تبجي ؟
رحت وكفر قريب منه ومديت ايدي رفعت وجهه
مسحت عيونه وتخربط كل وضعي ودگات گلبي
_ شبلاك ليش تبجي .
_ شفت شهاب .
_ شبي .
_ مريض يكح دم .
_ شنو سل .
_ لا التهاب حاد وكسر خاطري ملِكه
مايخلي عينه بعيني تعبان مو مثل
قبل شهاب اللي چان حيله بعدال عشر
زلام شفته مهدود الحيل ما يگدر حتى يحجي .
اكره شهاب حاقدة عليه وبگلبي اعرف هاي حوبتي
وحوبة اهلي بس بيرغ شلون اگدر اتشمت بي
گعدت بصفه كلش وحضنته لمنّي بيده يبچي
على جتفي وجسمه كله يهتز
بيرغ : صرت بين اخوتي الأثنين حايرر
لا اگدر اخلي شهاب يصارع الموت وحده
وخايف لا اخسر وارث اذا عرفني متعاطف ويه
اخوي شهاب الدمر حياته .
ابتعدت مسحت دموعة بطرف رداني
_ وارث اعقل واكبر من يزعل لأن خفت على اخوك
مو خبيث بالعكس هسة شهاب اذا طلب منه
علاج حتى لو حاقد عليه يوديله شسالفه
ترا هاي رحمه قابل يگطعها ، اذا يموت شهاب
وانتِ ما تساعده ما تسامح روحك فـ ساعده
احسن واذا على وارث لا تخلي يعرف .
بيرغ : هيج رأيچ ؟
_ اي والله هذا رأيي وبعد بكيفك .
قرب وجهه باس خدي غمضت عيني من طول
وانفاسه الدافيه احس بيها ، اخذني بين ايده
حضني ولزم ايدي يشاورني
_ راجعه تربربين لو يتهيألي؟
_ مو توك تنوح وتولول لو يتهيألي !
_ هسة عوفچ من البجي هذا شني لحم وشحم .
_ اصلخك بوكس بالعظم ؟
عفته وگفت يضحك مدري يمسح بدموعه
ردت اطلع وگفت بالباب ما كدرت اضمها
لان غبيه وفد وحده خفيفه صايره
ملِكه : شو نايم هنا ؟
_ عجل وين انام ؟
_ ليش مو بغرفتك .
_ عود من ترجعين مربربره ارد للغرفة .
_ عود انتَ هم محسوب على حماة الوطن .
_ هوَ لو ما محسوب عليهم هم اگلبچ .
عفته وصلت لنص الدرج والكرامة چنها اخذت اجازة
لان ما شفتها اليوم ، رجعت عليه ماسحه بكرامتي الگاع
وگفت بالباب وحاول بالله اشفي فضولي
ملِكه : ما جوعان ؟
هز راسه لا وردني بهدوء عبالك متعمد يقهرني
_ اكلت مغثات مايحتاج شبعان .
_ جهزت صينية اكل عبالي ناكل سوية .
_ اكلي انتِ عيني راح انام .
انوب يجاوبني ببرررود اكتل روحي هسة .
نزلت اعض بيدي وگفت بنص الدرج عبرت رجلي
المحجر مال اذب روحي وانتحر على هاي الفشله
الخايسة فتت للغرفة مردغت وجهي وملابسي
ول هسة ما يريد ينام بالغرفة لزگتي جلبتي
گابلت الصينية وتربعت وگعدت ما أليه نفس
اكل شي الف فكرة براسي تحوم ليش احسه
يخوني ومتعرف على وحده يختلف فوك
ويراسلها ، لان بيرغ كرامته بغيبوبة من زمان
شنو صحت واني ما ادري اعرفه مايعوفني
ابد ما يعوفني حتى من اگله روح يلزگ لزگه .
اندفع الباب بوسط حسباتي ودخل ابو الكرامات
بيده بطل ببسي بارد ولازم جگاير مبين طالع مشتري
گعد مقابيلي وحط البطل وگلاصات اثنين جايب
بيرغ : صبي خلي اكل والله كريم .
ملِكه : ما تصب خدامتك .
_ جارية ههههههههههه .
_ انوم المواعين براسك ؟
_ حتى اخلي المستشفيات ما تلحگ عليچ .
كفخني على راسي ضربته على ايده حيل
_ خاب والله دفرة ما بيك .
_ شلون يعني شفتيني دفره ما بيه
شنو ضعيف ؟ لو مسلول ، لو مريض
ول شعرضني اغطيچ والله شلون دفره مابيه ؟
_ راشدي ما بيك مكبره عقلي وياك .
_ واني راح اصغره .
حجاها وگف اجه عليَّ وگف ورايَّ ومد ايده
شالني من خصري ورفعني بيد وحده وشمرني
على حايط ثبت ايدي ودفعني قوي
بيرغ : راشدي ما بيه موو .
_ اضحك وياك .
شالني وشمرني على اجتافه عبالك خاطفني
ويفتر بيه دخت بقيت اضرب بي على ضهره
ونزلني يلزم بوجهي ويعض بخدي
بيرغ : تدفريني تريدين بربوئه .
_ ادفرني يمههههه ول بيرغ دخت دخت حباب .
وگعني بالگاع حاولت افلت روحي منه
وهوَ يراوغ ويلزمني يمنعني وسحب
المخده يضربني بيها ، جريتها من ايده
اضربه بيها وهوَ جاب الثانية يخنگ بيه
بيها ، شردت من بين ايده وطلعت اركض نزلت
جوه فحطانه طلعت ماي اشرب والأبتسامة ما فارگت ملامحي .
استغربت ما نزل بس اسمع حركة فوك ، البيت كله
فارغ رديت مثل الشاطرة صعدت وبقيت واگفه بعيد
على غرفة مالتي بابها مفتوح نصه ومبين فارغة
كلها ، باوعت على فوك مطفي الاضائة ومسدود
الباب مبين رجع صعد وطفاهم لان من نزلت مشتغلات
رجعت اريد افوت طبگت الباب واشوفه واگف
وره منتظرني صرخت فازه من وجوده ضحك وجرني
من ايدي ودفعني خفيف على حايط وطبگ الباب
جرني من خصري سحبني عليه اكثر ورفع اصبعه
يمشي بكل هدوء من بداية اذني الى نهاية فكي
نزل راسه وشعره طخ بعيوني غمضت من حسيت
شفايفة تبوس بطرف شفتي ، وايده يمشيها على ايدي
وضغط بخفه على اصابعي يخفف من رعشة جسمي
على اثر لمساته وقربه مني .
صرت هلگدني بين ايده ضعت ناسيه نفسي
قرب شفايفة من اذني يحاجيني بقهر
بيرغ : عليمن هل بعاد شلنه بي .
طوق خصري اكثر ومن طريقة كلامة دخت
_ زلمة يحبچ ورايدچ ميت عليچ ليش تعوفي ؟
احتضن وجهي بي ايده ونظراته التقت بنظراتي
بيرغ : والله ما تلگين احد يحبچ مثلي .
رجع خصلات شعري وره اذني ولمني اكثر
بيرغ : لان حبيت صدك تردين تعوفيني ؟
لو باقي حاقد عليچ چان حبيتيني .
نزلت راسي وخليت ايدي على صدره
اريده يبتعد ما يقبل لزم اديناتي بيد
وحده وبالثانية رفع وجهي من فكي
عيونه تلمع لمع من يباوعلي
بيرغ : شرايده بعد حتى تبقين ؟
حتى اهل ماعندي ظليتي بس انتِ
وهم تردين تروحين .
شالني من خصري يمشي بيه گعدني على
چرباية وراح جاب كرسي من گدام المرايا
واجه حطه مقابيله وگعد مقرب روحه كلش
انفاسنا وحده ودفو عطره دخل ريتي
بيرغ : من نروح نطلك شنو حجتنا زلمتچ
خانچ ؟ ما يحبچ ؟ يمد ايده عليچ ؟ ما يهتم بيچ ؟
مقصر وياچ ؟ يجبرچ على شي ما تريدي ؟
شنو بدر مني حتى ما تريديني انطيني
حجه حتى القاضي يقبل يطلگنا .
جريت نفس طويل وجاوبته
_ خلي الغلط بيه گول اني مو زينة .
_ لا زينة وبنت اصل ومترباية وتاج راسي انتِ
شلون انطي بعرضي واگول مو زينة ، ذابح
روحي عليچ وين احصل مثلچ بعد وين .
_ زين گول ما متفاهمين .
_ لا متفاهمين وكت شداتنا جنتي سند وصرتلچ سند
وبمرضنا واحد اهتم بالثاني ، انـا اريدچ ميت حتى
احصلچ وانتِ تريديني بس گولي اريدك.
غطيت وجهي بيدي وهمست اتهرب
_ كافي حباب .
_ نايم فوك حتى ما اعاتبچ ملِكه
ماعندي غلط وياچ وبايعتني دومچ
ابقي هيچ ابقي باجر امچ جايه تاخذچ
وابقي هناك فكري بسبب قنعي بي القاضي .
كمل كلامه وعافني وطلع من الغرفة ورگع بابها ..
نزلت الصينية وعقلي متخربط امشي اغسل
بالمواعين وتفكيري مشوش كملت وصعدت
اخذت حمام بسرعة وقفلت غرفتي وللصبح
اتگلب بفراشي بس اريد انام ما گدرت
گعدت من الصبح نظفت البيت كله وصلت للكراج
غسلته ولفيت الصونده على ايدي علگتها بالبوري
واندفع الباب وفاتت ام وارث وراها وارث يمشي
ملِكه : زيارة مقبولة .
مسحت ام وارث على ظهري وفاتت تعبانة
ومكسور خاطرها على حالة وارث اللي تكسر باب الگلب ..
للعصر رجع همام كلهم فوك وارث وبيرغ وهذا
دخل على غرفة ميمونة وقفل الباب صعدت اركض
على بيرغ هزيته گعد عبالك توه نايم
_ همام رجع وفات على ميمونة وقفل الباب .
سحب التشيرت ونزل يركض يدبچ الدرج قوي
رگع الباب قوي عليه وصاح
_ همااااام ارجعك للسجن بس تضربها والله .
طلعت ام وارث من الغرفة ورفعت اصبعها على شفتها
_ اششش توه نام لا ينجلط من المشاكل عوفوا يرتاح .
راحت دگت الباب على همام وبصوت ناصي تحاجي
_ افتح الغضب لا يگعد ويهجم البيت على روسنا
عوف البنية لا تخلينا بحلگ بندر هذا ما ينگدر افتح .
سمعنا صوت رگعه وهمام يهدد بيها
همام : حجي يفيدهم هذا الزواج ما راضي بي
واذا جنتي صدك اختي وما تكسرين بكلمة
اخوچ تعترضين على هل زواج واني اطير بندر .
ام وارث : غضب الله على راسك افتح الباب
يطيره هوَ الخايس صاير سبع افتحه اگلك .
فتح الباب وبيرغ خنگه يضرب بي وهوَ ولا تحرك
ولا نطق بحرف وايده ما شالها شمره على تخم ودفر
رجله قوي ورفع ايده بكل حياه ضربه على راسه
بيرغ : ماتعبت من الضرب يولو الخايس
ايدك اكسرها واحملها الك بس ترفعها
عليها بعد الله لا يوفقك شلون بيك .
همام : ما راضي بيرغ ما مقتنع ترد تتزوج بندر .
_ ليش شبي بندر شنو تعرف عليه ومتحمه ما نعرف
ول مو فزعاته ويانا تشهدله ولد عمك محزمين
مسووين وليه مال مخانيث يضربوو بينا وهوَ
فات ما عاف واحد ما كسره الخاطرنا معرض
روحه وشغله للخطرر ما يعززر بعينك .
همام : مستعد احلف يريدها حتى ينتقم منها.
بيرغ : عمي هي هيته وين عايشين بغابه
قبلك انا وكلها صاحت ينتقم ووو ووو اشكال
صدك وامن بالله او ما رايدها صدك ما يقاتل عليها .
ما مقتنع ابد ما داخله براسه همام بحيث
رد طلع وهوَ يصيح ما راضي ، وبس راح
فات بيرغ على وارث ايده ملفوفه كلها
طلع وطبگ الباب مقهور
_ بشري يمه شلون صار .
_ دخلت عليه دخيل بس حتى يسوي
ايده اصبعه مكسور ويمشي والوجع
ياكل بگلبه والطريق كله يطحل كل شوية
وصايح يمه ليش هيج صار بيه
وليش غدرتني وما اريدها بعد .
بيرغ : والطفل ؟
_ مگطوع گلبه عليه يريده .
_ مو انا خفت لان گال الها موتي ما اريده .
_ لا شلون غير ميت عليه وهوَ مصبره عليها .
عافها ترتاح ورد صعد ، واني كملت شغلي
ودخلت على ميمونة لگيتها ماخذه مسكنات
ونايمة وامها گاعدة حتى ويايه ما تحجي
خلص اليوم وثاني يوم وارث نايم بغرفة
امه ومن قرر يطلع صعدت ام وارث نزلت
هدومه من فوك سبح جوه وطلع .
وبيرغ راح استلم واجب اربع ايام وظل وارث
بس هو وسهم يرجعون للبيت ، خامس يوم
صعدت ام وارث فوك وطولت ، رحت وراها
واشوفها لمت ملابس مُـرجانـة كلها بخمس
جنط ما بقت شي لمرجانة بالغرفة صفتها
ملِكه : هاي ليش خالة عوفيهن ؟
ام وارث : وارث يريد هيچ يمه .
اجه سَــهم وياه عمال اثنين برا ينزل
الهم الجنط وهمه ياخدوهن بالجنط
ملِكه : وين تاخذوهن بس فهموني .
ام وارث : ما يريد اثرها بعد بالغرفة والحمدلله
من خطه هل خطوة من عنده انوب لا يسكن الغرفة
ويصير بي شي لا سامح الله .
_ يعني شنو ما يريد اثرها خالة لا تخبليني
يريد يطلگها ، ترا البنبة حامل وتعبانة فدوة
احجي وياه ميصير هيج قابل الواحد بينا ما يغلط .
مسحت عيونها بشالها ما بيدها شي على وارث
نزلت كل ملابسها جوه بغرفتها وبيرغ فات
صاح بينا نفوت بالغرفة وصعدوا اربع عمال
فكوا غرفة وارث ونزلوا الأخشاب كلها من كملوا
طلعوا رحنا صعدنا فارغة الغرفة ولا غرض بيها
ام وارث : وين وداهن الأخشاب حرامات جديدات بعدهن .
سَــهم : انطاهن لعامل ويانا خطية يريد يتزوج
بالعافية عليه انطاهن من گلب راضي .
انهضمت والله احس بگلبي تفلش شلون
حال مُـرجانـة ليش وصلوا لهاي المرحلة
من كملوا كل الهوسة شفت ام وارث تغسل
بالغرفة اخذتها منها نظفتها وعطرتها
ورحت اغسل بالوصلة وذبيت الماي واجه وارث
فات يفتر بالغرفة فاررغة يباع على حياطينها
ويصفن كل صفنه تهد اكبر حيل ، وطلع منها
قفلها وهجر الغرفة من يومها ما دخل ولا وصلها بعد .
هج بالأراضي مايرجع للبيت كل يومين والثالث
بليل يگعد ويه امه ساعة ويرجع يطلع ما طايق
حتى البيت ومن يتعب من قلة النوم وضغط
الشغل يرد ينام بغرفة امه على رجلها بحضنها .
وبيوم الجمعة بعد الأذان مخبوصين نجهز
بالغده ومنتظريهم سَــهم گال كلهم يرجعون
ام وارث تشوي السمچ بالتنور البرا ، واني
اصب بالتمن الأحمر وفاتوا كلهم غسلوا
واجتمعوا بالصالة گاعدين بالگاع بس همام
بعده وارث ما يحچي وياه ومتجاهله ولا عبالك
موجود ، فرشنا السفرة وسهم يفتر علينا ياخذ
المواعين من ايدي ومن ميمونة اخذت اخر شي
لبن ورحت گعدت بصف ام وارث اصب بالگلاصات
رفعت راسي شفت وارث نهض راح للمطبخ جاب
ميمونة واجه حاضنها وگعدها بصفه
وارث : تعالي يمي واريد زلمة يتنفس وياچ .
همام تنرفز ونهض يريد يطلع عاط بي
_ تعال لك اگعد هنا تزوهرر يلة .
_ ما اريد اكلوا انتوا .
_ ارجع لا اگوم هسة اگعدت اوكلك اعظام السمج كلهن .
رد گعد بمكانه ينافخ بس مجبور ، وبيرغ يقرب
بالخبز والتمن على وارث وعيونه عليه يشوفه ياكل
وارث ملتهي بميمونة ويرد يسوي لفات لسهم
ينطي وسهم ضحكته عبالك مو لفه مالك الدنيا بيها
فد يفرح من اخوانه يهتمون بي وضحكته حلوة
تصير عيونه تبرق فرح على لمتهم .
كفيت البيت كله وصبينا جاي واسمع بيرغ بگول لوارث
_ ما اكلت زين .
وارث : الحمدلله اهم شي اكلتوا انتم وشبعتوا .
بيرغ : والله عاشت ايدچ يمه على سمچ طيب .
ام وارث : الف عافية على گلوبكم يمه هني ومري .
سَــهم : هجبني التمن ممرود ودهين هيج احبه
ما احبه يابس لو نثري بس الأحمر .
ميمونة : هوَ سويته مثل ما تحبه .
سَــهم : فدوه اروحن ألچ .
ذب وارث مخده قريب من التخم وغطه عيونه ونام
اجت امه بصفه وبيرغ هو وسهم على صفحة
گاعدين يباعون على تلفزيون وهمام صعد فوك
ميمونة اجت تساعدني واسمع ام وارث تگله
_ يمه وارث الخاطر الطفل مصرف دز الها
لا تخلي احد يصرف عليها وعلى طفل وهي
على دمتك لا تنسى ادري ضوجتك وكل ساعة
اعيد الموضوع عليك بس اريد اذكرك حرام عليك .
رفع ايده من عينه وجاوبها
_ وديت يمه قبل يومين .
_ لا تجذب عليه ولك يمه سَــهم يگلي ما وديت .
_ خابرت شاهين والتقيت بي ودزيت بيده مصاريفهم .
سألته بلهفه تحاول تخفيها لان تخاف منه
_ ما عرفت من شاهين راحت للدكتور لا الطفل
بي نبض بيا شهر هسة هي بالضبط .
_ لا ما سألته .
_ عليك العباس مرة ثانية اسأل .
_ الله كريم .
_ كون باجر ودز مصرف وفواكه .
_ هي كل يوميه ؟
_ چا عايز فلوس اصرف يمه شمالك .
_ يمه دزيت دخيل الكعبة والله دزيت الهاااا كافي .
عافها وطلع من البيت طلعت وراه تصيح
_ ما ينحچي وياك بعد گبل تتعارك وتشرد شمالك .
شغل سيارته ورد للأراضي، وبيرغ والولد راحوا للغرف
كملت شغلي وصعدت جريتها نومه الثاني يوم گعدت
الظهر على احلى خبر سمعته من وكت طويل
نغزات على جتفي وصوت ميمونة يمي
_ ملِكه امچ اجت اكعدي.
فزيت اركض من الفراش لا شاده شعري لا شالي
بيدي اركض اركض بس اريد اوصل واحضنها
دخلت عليها لگيتها كاعدة وبصفها جنى اختي
ركضت جنى قبل امي شبگتني وشبگتها حيل
ام وارث ، بوستها ورحت على امي وگعت على
ايدها ابوس بيها وشفت امي المرض ماكلها
اكثر من قبل بأضعاف ، وكبرانه مجلده تجلد
ولازمه عكازه ظهرها محني لزمت العكازه وهمست
_ يمه شصاير بيچ يمه .
ام ملِكه : ثگل المسؤولية بعد موت ابوچ
حنت ظهري وكسرته ماعندي سند يحمينا
شسوي يا يمه هاي حظي وقسمتي الحمدلله .
حضنتها قووووي اشم عطرها اوف يا عطر امي
يرد يحيي الگلب ويا ملامحها تنعش روحي بعد موتها
بوست ايدها وبدموع أجاوبهم
_ الفرحه يمه الفرحة بشوفتچ ما تنوصف
_ اخ يا نظر عين امچ سوده بوجهي .
_ سامحتيني يمه حبابة گولي سامحتيني .
_ مبريه الذمة ومسامحتچ بعمرچ ما اذيتي احد بينا .
گعدت بحضنها وهي تحجي وياهم ايدها لازمتها
خايفة لا تروح مني ، دخل بيرغ بملابسه العسكريه
شافها وطلع برا يخابر ما اعرف منو بس انخبص
وفات يلم عليها وعينه عليه گعد مقابيلها واني
رحت صبيت چاي ورجعت سمعته يسأل على خوالي
_ والله يمه اخواني زينين بس بهذا الوكت واحدنا
يصيح يا روحي ويا عايلتي ، بس المهم گاعدة بنصهم
ولو نخيتهم كلهم يمي ، وخلصت من ذولاك واستقرينا
بالبيت اني وبنياتي الف الحمدلله .
شغل بيرغ جگارة يحاول يخفي نبرة التوتر
ويباع على باب منتظر احد وبضياع ردها
بيرغ : احمم تستاهلين والله خالتي اعتبريني
ابنچ اي شي تحتاجين بالخدمة تلگيني .
ام ملِكه : ما تقصر يمه الله يفرح گلبك
والله ما شفت منك انتَ بالذات سوء
صاحب واجب وزلمة معدل الله يحفظك لشبابك .
عدلت امي عبايتها جرتها على ايدها
وجنى لزمت ايدي قوي ياربي شكد اشتاقيتلهم
ام ملِكه : يمه بيرغ على اتفاقنا اجيت اخذ ملِكه منك
فدوة اروحلك ما اريد تكبر وتصير مشاكل تعبانين .
ام وارث : يا خيه ليش يسوي مشاكل چا غير اهلها
امها وخواتها وصار اشهر محرومه منكم اخذيها
وياچ تشوف بيت اهلها تگعد ويه امها واخواتها
ويمتى ما شبعت منكم تخابر زلمتها يجي ياخذها .
بيرغ : يمه تريد تروح وياها وننفصل .
ام وارث : يعني شلون تنفصلون .
_ طلاك يمه طلاك .
ضربت ام وارث على خدها وصاحت
_ يمهههه صدك يااا ليشش ؟!
دفع وارث الباب الخارجي وهنا عرفت بيرغ
منتظر منو ، ابتسمت عبالك طفل متعارك
بالمدرسة ومنتظر ابو يفزعله ويحل مشكلته
دگ وارث الباب وذب حذائه مدنگ راسه ويسلم
وارث : اسمحيلي يمه اگعد وياكم .
ام ملِكه :البيت بيتك يمه ماكو غريب بينا كلنا اهل اتفضل.
گعد بصف بيرغ رحت صبيتله چاي وانطيته
اخذه من ايدي وامه بعدها بصدمتها تگله
_ يمه وارث ام ملِكه جايه تاخذ بتها والسالفة
بيها طلاك تدري لو ما تدري بيهم يمه .
عدل حاجبة ورجع ظهره على تخم يتفاهم وياها
وارث : ام ملِكه يمه قبل لا تفكرين بالطلاك
گعدتي ويه بنتچ سألتيها زوجج شلونه وياچ ؟
ام ملِكه : اعرفه بيرغ زين و.
قاطعها ورفع ايده
وارث : لا جاوبيني على گد سؤالي امي ؟
_ لا والله يمه بعدني .
_ زين يمه اليوم بهذا وكتنا سهل وحده تتزوج
واحد يحبها ويتحمل حرمته بكل حالاتها ويصبر .
_ لا وين ولد الحرام هواي .
_ اسأليها بيرغ شلونه وياها ؟
باوعت على بيرغ منزل راسه ومقهور
ويباع لوارث منتظره يدافع عليه
غطيت شفايفي لزمتني الضحكه بوقت غلط
والله هسة وارث اذا يشوفني ابتسم يرزلني ، بس هذا
روغانه عنده تصرفات تضحك بالله شنو گاعد
بصف وارث وهذاك يدافع عليه انوب امي نفذت
ام ملِكه : شلونه وياچ بيرغ .
ملِكه : نص ونص .
فات همام وسهم اثنينهم سلموا وگعدوا ويانا
وارث : احجي شلون مو زين مو كم مرة
محلفچ اذا يحچي وياچ لو يزعلچ تجين
تحجيلي وحظ حظه اطيحه الچ حجيتها لو لا .
ملِكه : والقران انتَ ماكو منك ونعم الأخ بس
ماكو شي اجي احجي بي انتَ تعرف كلشي .
وارث : اللي اعرفه من يوم ما تمرضتي لليوم
ما بينكم مشاكل والحمدلله بلشتوا تتفاهمون
واحد يتقبل الثاني ودائماً اشوفچ زينة وياه
وبفاتحة امه جنت متوقع منچ تصرف بس
صدمتينا كلنا بطيب اصلچ وتربيتچ .
ام ملِكه : والله يا وليدي كلامك صح بس
صار اشهر متفقين ، البنية بعدها ماتقبلته
بس مجبوره واخوك هم يدري وملوا من المشاكل
فـ يا وليدي لو اخذها ويايَّ احسن .
على كلمة ” وليدي ” امي طشرتنا
همام كش وجهه ولم شفته ضمّ ضحكته
واني درت وجهي ليغاد على ميمونه تباع
على سَــهم فاتح عيونه ، وام وارث غطت وجهه
وبيرغ يباع بطرف عينه على وارث يشوف رد فعله
واسمع همام يگول السهم
_ رگعته بوكسات اثنين وهيه گاعدة .
وارث ساكن ماتحرك ولا ينطي رد فعل مغلس
يحاجيها وجنى اخذت مكان امي بالكلام
جنى : كلامك منطقي بس لا تنسى كلشي
ينبني على اكراه والاجبار يظل طول العمر
ما مرغوب ، فـ كلنا نشوف انفصالهم احسن
اختي عانت بما فيه الكفاية .
وارث : وياچ عانت محد ينكر ومرت بمصايب
وصلتها تفقد عقلها ، بس يا عزيزتي ماكو
حياة بدون مشاكل وبعد كل المشاكل اكيد
اكو راحه انتِ ما عايشة وياهم اني اشوفهم
راهمين اثنينهم ما ينجرعون بالسان هي
تگدر عليَّ وهوَ يسيطر ويتحمل وهيج مكملين .
جنى : للعلم صار اشهر متفقين على انفصال
وبيرغ يعرف وموافق وماله داعي اتعبون نفسكم .
وارث : شلون ماله داعي هذا طلاك مو لعب
جهال شنو الطلاك صار سهل عدكم ، بوية
مشاكل تصير تشيب الراس وما يطلگون العالم .
ورد على امي
وارث : والله نسوان متحملات الظلم والضرب
والإهمال والخيانة في سبيل ما ينهجم بيتهن
شو نسواننا العكس بنيتكم تريد تعوفه لأن يريدها !
ام ملِكه : كلنا اشكال تحملنا وحتى من مات
ابوها تبهذلنا وبقيت محافظه على بنياتي ومتحمله
بس جيل هل وكت مو مثل جيل قبل وليدي .
بيرغ اشر بعيونه حتى اسكت امي وارث
شغل جگاره عطب تعطب بس مكافح
تقربت من امي وشاورتها
_ يمه لا تگولين لوارث وليدي يضوج .
نغزتني بيدها ما مفتهمه الموضوع عبالها
استعجلها وملتهيه تتحاور وياه والولد
حايرين وين يخلون وجههم .
جر نفس ويستمع لكلام امي والفتت على
بيرغ صاير نااااار يصيح
وارث : صدك متفق وياهممم على طلاك .
عدل بيرغ گعدته ورفع ايده يفهم بي ويهدي
بيرغ : هاي قبل اشهر من صار تواصل بيناتنا و.
وارث : راح يحجيلي قصة حياته .
لم اصابعه بيرغ ويأشر على كيفك
بيرغ : جايك بالكلام .
_ لا تجيني ولا تجيك جاوبني .
_ جانت مريضة ملِكه وگلت الها لذاك الوكت
اذا ملِكه رادتكم اخذوها وعادي اطلگها .
وگف على طوله وارث وبيده اللي بيها جگاره اشر عليَّ
_ تريدينه لو تريدين اهلچ ؟
ملِكه : مو شغل كرهه وما اري..
_ خوية على گد السؤال جاوبي ورانا شغل .
_ اروح ويه امي .
وارث : يعني انتَ منطيهم كلمة ومتفقين صار
اشهر على طلاك وجايني هسة تريد احلها
اكو واحد ينطي كلمه على طلاك حلها يلة .
راد يطلع وامي صاحته
_ لا تزعل من عدنا وليدي وارث مانريد يتكدر خاطرك .
طفروا همام وسهم للبيت وبيرغ دار وجهه عليَّ
شافني وطلع ويه وارث بعد ما سلم على امي برا
صعدت اخذت كم غرض ما اريدهن كلهن ملابسي
وحتى اللي اخذتهن ردت اعوفهن بس اخاف احتاجهن
صعدت ميمونة يمي ساكته حلفتها
ملِكه : امانة الله ملابسي كلهن جديدات
مال عرس ما ملبوسات كلهن لميهن ووزعوهن
على عالم محتاجتهن فالهن مو حلو عليَّ .
طلعت الجنطة الصغيرة صعد سَــهم نزلها
ورديت على ميمونة كاعدة حضنتها وانهارت
تبجي وتشكي مني
_ لا تروحين ملِكه ليش عفتونا انتِ ومرجانة
هيج احنا ما ننحمل عدكم ، صح عدنا مشاكل
بس والله مو بيدنا كلنا تعبانين ندور الراحة .
ملِكه : والله مو هذا السبب بس اني وبيرغ
ما متفاهمين ما گدرت احبه ابد ولا اطيقه
شكد حاولت وفشلت خلي نفسچ بمكاني
تنجبرين تتزوجين شخص ما تحبي
وتعيشين وياه وابوج يموت بسبب اهله
صح زين هوَ بس صعب اتقبل الفكرة
اتمنى يحصل اللي تستاهله وتحبه
وتصير وياه احسن مني لأن بيرغ يستاهل
وانتِ ديري بالچ على نفسچ راح اشتاقلچ .
ميمونة : وعدتيني تجهزين فستان عرسي
ويايَّ وتعرفين ما عندي خوات ليش عفتيني .
حضنتها وبجيت وياها وفزيت على صراخ ام وارث
تصيحني بستها ودعتها ومابيدي شي غيرهن
ونزلت وهيَّ بعد ما اجت ، طلعت لگيت بيرغ ساند
امي ويمشيها يصعدها بسيارة وارث ، وجنى صعدت
ليوره بوست ام وارث وحضنتها قوي
_ ديري بالچ عليهم لا تخلين وارث يعوفهم فدوة .
_ وانتِ صيري قوية واعتمدي على روحچ
وديري بالچ على امچ وخواتچ عينچ عليهن .
بوست ام همام وسهم گاعد يباع عليه
من سلمت عليه گال
_ كلنا راح نتفارك بالأخير وكل واحد يشوف حياته .
_ لا ان شاء الله تبقون گلب على گلب للدوم .
ابتسم بقهر ودنك راسه .
ام وارث : عافنهم لأن يحبوهن .
ملِكه : كلشي قسمه ونصيب يمه ومحد
ياخذ غير نصيبه واني مو نصيب بيرغ .
التفتت لگيته ورايَّ مد ايده باوعت عليها بيها
مستمسكاتي كلهن اخذتهن منه وبكل هدوء
يحاجيني بثبات وعيونه ودمارات رگبته وراسه
كاشفات خنگته وهوَ يحاجيني خنگتني العبرة
عبالك واحد خنگني من رگبتي قوي
بيرغ : ديري بالچ عليهن ، باجر عندي واجب
عگب باجر اباشر امشي باجراءات الطلاك .
ام وارث : ليش ولكم يمه والله حرامات .
رفع ايده وسكتها وهوَ يفهمني
_ حتى بس اكمل اجراء المحكمة امر عليچ
اخذچ انتِ وامچ وشوفي بعد وياكم زلمة كون
واجيب وارث ونروح لشيخ يطلگنا ، تريدين
الحاظر والغايب هسة لو بيوم ما نروح للمحكمة ؟
بلعت الغصه ورديت بصعوبة
_ براحتك مو مهم .
ذب نفس وفتح طريق مبتسم
_ مع السلامة .
_ مودعه في امان الله .
صعدت بصف جنى وشغل السيارة وابتعدت
على هذا البيت وبيرغ ركب سيارته وراح
بوسط الطريق وامي تحجي هي وارث
على تخصص جنى وتريدها ترجع اداوم
وتمارس شغلها بالسونار اللي حرموها
منه عمامي وحتى ما لحگت تفرح بنجاحها
وارث : عندي معارف جهزيلي مستمسكاتها
واني اقدمهن الها أخليها اداوم بنفس المستشفى
اللي اداوم بيها جنت جماعتي هناك .
جنى : شنو تشتغل ؟
_ تخدير .
جنى : الله حلمي بس ما صارت ابوية الله يرحمة
بوقتها ما قبل گال بيها خطوره ومابينا حيل مشاكل .
فر السيارة وجاوبها
وارث : اختصاصچ حلو ومرغوب اكثر .
جنى : اي صحيح ، انتَ بعدك اداوم بالمستشفى ؟
_ لا والله بس ناوي ارجع هل فترة .
_ اها حلو .
ام ملِكه : ياريت والله بنيتي فاهية كون ترجع
واخيتك هيه عينك عليها بوكت فراغك .
وارث : بعيوني حجيه تدللين .
نزلنا مقابيل بيتنا فاتت جنى مستعجله هي
وامي ، وارث نزل ينطيني جنطتي طلعت
جنى بيدها الاوراق مالتها ، عفتهن وسحبت
الجنطة فوتتها للبيت اباع عليه صغير اجت
طيف اختي الدلوعه لميتها بحضني وبجت
اندك الباب وارث صاح
_ شكو سلامات ؟
مدت جنى راسها شافتنا ورجعت طلعت اسمعها تكول
_ طيف تسلم على ملِكه .
وكملوا كلامهم ، اخذت طيف الجنطة فتت وياها
اجت جنى اخذت التلفون من الميز وطلعت مستعجلة
شفت امي بيدها جهاز السكر جكت اصبعها
راحت اخذته منها وهمست بخوف
_ 300 يمه ليش ؟
طيف : ما ينزل ابد لو 400 لو 300 خبلنا .
دخلت جنى اخذت گلاص ماي وطلعت لوارث
ملِكه : نروح لدكتور ونشوف السبب .
عفتها ورحت اني وطيف شفت المطبخ بي
بس ثلاجة وطباخ صغار ، الاستقبال فارغ
والغرف فارغة بس دواشك على عددهم
تعمدت اشوف الثلاجة لگيتها فارغة
صفنت على حال امي وطلعت برا لگيت
جنى توها فاتت تريد تقفل الباب
ملِكه : اريد اروح للسوك هسة حبابة .
_ شعندج ؟
_ هناك تعرفين .
فاتت قنعت امي عدلنا العبي على راسنا وطلعنا
اجرر سيارة ونزلنا مقابيل محل ذهب نزعت التراجي
مالتي واسوارات اثنين وخليتهن على ميز
_ شوف هذني شگد سعرهن كلهن ؟
خلاهم على ميزان حسبهم فحصهم وجاوبني
_ مليون وربع .
_ تشتريهم ؟
_ اي اخذهن .
اخذت الفلوس وخليتهن بالجنطة وحضنتها
على گلبي وطلعت وجنى ترزل بيه انوب ما اكدر
احجي وياها هم مشتاقه للرزايل مالتها وهم
اختي الجبيرة ما اريد ازعلها مني دخلت للسوك
اشتريت أنواع الخضروات ولحوم ودجاج ودخلت
على محل بطريقنا حجزت چرابي اربعة واخذت
بردات وكاونتر ب450 صغير على كدهم بس مرتب
وما كدرت اشتري اكثر خفت يخلصن اجرنا سيارة
صعدنا وابو الچرابي ورانا .
خليتهم يدخلوهن وياهن دواشك طبية حتى
امي ترتاح بنومتها امي نايمة لگيتها على
اصواتهم گعدت متعجبة گعدت يمها تبوس
براسي وجنى وتكفه بالباب وعايفة البوب
مفتوحة من العيب ، اجه ابن خالي وگف على
راسهم سلمت عليَّ ودخلت للمطبخ غسلت
المحضر ورتبتهن بالثلاجة ، غسلت البيت
اني والبنات وعلگت البردات عطرته وگعدنا
بوسط الصالة ناكل اكل طيف مسويه طماطة
وبتيته وجاي وامي تباوع علينا وتضحك على سوالفنا .
يومين مرن على حالهن طلعت ادور شغل
اني وجنى ماكو ، واذا حصلت ما يناسب اهلي
وخوالي من تبلغهم امي يعارضون عليَّ
سادس يوم من العشرة الصبح انزك الباب
عفت الصينية مال الريوك من ايدي وطلعت
لگيت جنى فاتحة الباب ورجال غريب شايل
ورقه يحجي وياها يريدني
ملِكه : اني ملِكه اتفضل .
سلمني ورقة وبلغني
_ هاي ورقة بلاغ طلاك من المحكمة .
ميمونة …
فتت للبيت شايله بيدي اغراضي وام وارث وراي
فحطانه گعدت بالگاع وذبت عبايتها ومددت رجلها
ام وارث : عزلنا السوك على ايدنا .
ميمونة : تعبت وضلوعي يوجعني .
_ شنسوي چا يمه ما ظل وكت تروحين الهم بلا ملابس .
طلع وارث من غرفة امه صاح بينا
_ بعد رجعن بالعشرة .
_ چا يمه شنسوي متوازين
شربت بطل ماي كامل فحطت وجاوبته
_ همزين ملِكه ما عافتني واجتني بالسوك .
ام وارث : الفستان صدك عجبني .
_ ذوقها حلو واختها هم وردة تخبل .
_ جنى دخلت لگلبي شلون سوالفها حلوة
واك يمه تنحط على جرح اخت ملِكه يطيب .
وارث : اي .
فتحت العلاكة وطلعت تشيرتات اربعة وعطت
_ سهمممم وينك ولك تعال .
فات كعد بصفي
_ هذني الك شفتهن وعجبني .
ام وارث : ردت اشتريلك يمه وارث بس گلت خاف ما يرضى .
_ مشتري يمه ، بس اريد جاي .
رحت حميت الجاي وصبيت الهم كلهم
وطلعت جبن من الثلاجة مالح وطگيت بيضة
وگعدت اكل بيها وعذا سَــهم تربع وگعد ياكل
ويايه ، وارث يسولف ويه امه وعينه علينه
دنيت الطاوة يمه مد ايده اكل خلصوها بلگمتين
رخت طلعت اربعة طگيتهن وگعدت ، نزل بيرغ
صب جاي وگعد ويانا ومد حسمه طرشي من
الثلاجة ياكله ويه البيض ، وسهم جر العمبه
يخلي ويه البيض عطت بيهم
_ خو لعبتوا روحي طرشي ما اطيق ريحته
والعمبه ويه الفلافل گوه اجرعها .
مردني بيرغ بيده وبيده طرشيه يريد يوكلني
عذت بي وضربت سَــهم على راسه يثبت
بوجهي الحقير عاط بيهم وارث
_ عوفوها ولكم حيوانات خلوها تاكل .
حريت الطاوة وطلعت بعد بيض طگيته
خلت الهم طلعوا جوعانين خطية من الصبح
ماكلين وبعد محد بحالهم البيت فارغ
اكلوا الجبن كله والبيض وراحوا بالصالة
من اجه يمهم همام تجاهلوا ما يحاجونه ابد .
لميت المطبخ واخذت العلاليك فوتتهن
بالغرفة مال امي تصلي اليوم ساكته مني
ما حجت ويايه ولا ضوجتني بالكلام ابد
مو مثل كل يوم تسب بيه وتهددني
تريد ارفض هل زواجه ، عدلت الأغراض
بالجنطة وعطرتهن ورحت سبحت
وهي ما حجت ابد ، اريد افوت ارد
للغرفة واسمع همام عدها
همام : ما راضي يمه بلغيها وراح اسوي مصيبة
بيهم احول عرسهم فاتحة اذا ما تبطل .
دخلت عليهم وجاوبته
_ اذا ناوي تموتني من هسة سويها .
_ تتأذون والله ابجي العالم عليكم .
_ ليشش زين ليششش اني تعبت همام كاافي .
_ هو سبب تعبج ترجعين ليش ؟
_ بندر هو ا..
_ عيدي كلام وارث عيدي صيري صلفه واحجي
گدامي حب طفولتچ مووو وهوَ يصيح حب طفولتي
وهاي راح تتزوجي تردين للعذاب ، اهله ما طايقيچ
لليوم مجبورين يوافقون عليچ شني من كرامة عندج .
دفعني على ميز طگ بظهري عافني ارافس
من الوجع وطلع اجت امي شالتني تمسح
على ظهري وتفشر عليه ما راضيه
ميمونة : يحجي على بندر وهوَ كتلني اكثر منه يمه
واذا بندر كتلني لان عنده سبب شوهته وما اريده
ابنچ شنو سببه وهيچ يعذب بيه .
عافتني وطلعت تسب بي وهوَ يريد يطلع
وارث : شصاير ؟
_ ضرب اخته .
ركض بيرغ من فوك عليه وارث وراه
هوَ شرد منهم اثنينهم ما ظل بالبيت .
عديتها مثل القبلها بس قهرها ثابت بگلبي
مهضومه منه ومقهورة بعمره ما مد ايده
عليَّ وهل فترة تفنن بتعذيبي ، لو خايف
عليَّ من عذاب بندر المفروض يحتويني
مو يعذبني بالضرب والأهانة خليتها بگلبي
ومجبوره اكمل ايامي يوم يجر يوم يعدي
“وعبرنا الشهرين ”
طولنا وأجلنا حتى تمر فترة على وفاة صلوات
وارث بين فترة والثانية بيد سَــهم يدز مصروف
مُـرجانـة وما يقترب حتى من شارع بيتهم
وبيرغ يلهي بروحه بالشغل اخذ كل وقته
حتى محد يسأله على ملِكه ، وقبل يوم زواجي
نهضت على بيت تنظيف وترتيبات وسهم
ما عافني وحدي ابد من اعدي من غرفة
بيرغ وهوَ بيها اسمعه يشكي لان راح
اعوفهم واروح والبيت يظل فارغ بس
همه الاربعة وام وارث وامي بي .
رحت على مركز اهتميت بنفسي ومناك
اجتني ملِكه ساعدتني ما خلتني وحدي
سويت تنظيف للجسم وللبشرة وحمام
عميق ، وقبل لا اكمل عافتني وراحت
لان تأخرت ، رديت للبيت سَــهم رجعتي
سمعت وارث متمدد بالصالة بحضن
امه وتسأل بي على شغله جاوبها
_ اسبوع الجاي اباشر دوام بالمستشفى .
ذبيت ملابسي وطلعت سألته
_ خطية وهاي اخت ملِكه .
صفگ بيده متذكر وطلع تلفونه يخابر
_ شوف شلون نسيتهاااا ما بشرتها .
جاوبته سلم وبلغها
_ حصّلت ألچ الشغل بنفس المكان اللي ردتي
اسبوع الحاي باشري على احد ..
سكت ثواني وجاوب
_ اي انا هم موجود ، تمام لا تدللين ما سويت شي هلا بيج .
سد الخط وبلغنا حصل الها شغل بقسم السونار
ام وارث : خطية يتيمة يمه عينك عليها تكسب اجر
فقيرات والله ، واعيات متربيات احسن تربية
هي واختها ، عاد الخاطر ملِكه وگفاتها تخبل .
وارث : سهلة يمه .
لليل گبت العيطه بين امي وهمام ختلت بالحمام
اجه وارث ضرب الباب وطلعني ما راضي وراحله
وارث : شبيك راح اذبحك .
همام : يريد ينتقممم منها وارث والله .
_ لا تحلف الله لا تحلفه .
_ واذا اذاهاا شلون .
_ انتَ بس عوفهم يا اخي فكهممم .
ظل يسب ويهدد ومن وارث يتگرب منه يسكت .
الثاني يوم طلعت للمركز اني وامي ، لبست فستان
وشفته بالمرايا چان طويل مرسوم على جسمي
لونه ابيض ناصع يلمع من كل مكان ضيق
من خصري ومن على جتفي نازل تول على طولي
مرصع بنجمات ناعمة ، وعلى راسي تاج ناعم
وسعري تركته مفتوح على طوله لونه اسود
ومكياجي خفيف برزته بحمره حمره وكحل اسود
يكبر عيني اكثر ، مشيت على حذائي الكعب
وكملت اطلالة عرسي الثانية وهل مرة احلى
بهواي من اول مرة ، ما مستوعبة رجعت عروسته من جديد .
وگف سَــهم وارث بالباب صعدوني اثنينهم
مكتوم صوتهم ولا يحجون كلمة خفت وتوترت
ميمونة : صاير شي ؟
ما جاوبوني بس وصلنا شارعنا عبارة عن عمامي
واولادهم واقاربنا معقولة عزمهم وارث لو صاير شي ؟!
لفني وارث لف من عيونهم ودخلني مغطيني
هو وسهم بعباية ، تلگتني ام وارث ترش
علي الچكليت واختها وام تراث وياها ما يگدرن
يهلهلن فاطمة من بوستها هلهلت بصوت ناصي
ميمونة : شبيهم اخواني ما يحاجوني ؟
فاطمة : هذا سَــهم گوه سكته وارث يبجي عليج .
ام وارث : يستحون لا يحجون ويبجون وتزعلين .
گعدت بالصالة واشوف ملِكه واختها دخلوا
حضنتها وهي تتغزل بيه
_اليوم حتى لو السيد يريد ينتقم يأجلها .
_ هههههه حقيرة اسكتي استحي .
_ الله يساعد كلبك اليوم سيد .
تعالت الأصوات والسيارات وگفت دخلن النسوان
مانعيهن يهلهلن بس العلوية تموت من صلوات
ما گدرت ما ترفع صوت هلهولتها وهمزين بيرغ
ما موجود بالبيت ، من بين النسوان شفت زهراء
ذبت عبايتها وگعدت گدامي خزرتها وملِكه لو بيدها
تملخهاا بس تستحي من العالم .
الزلم صوتهم عالي وجدهم يحجي هوَ وعمامي
يتفقون على عقد وشنو يگولون عمامي يوافقون
وگف سَــهم بالصالة وصاح
_ طريق راح يفوتون الزلم لبسن الشالات عدل .
اهتز گلبي من دخل سيد مصطفى وجدهم
وبيرغ وبعده بندر للغرفة منزلين راسهم واخيرهم
وارث لزمني من ايدي غطتني امه بالبياض ودخلت
گعدت على چربايتها بغرفة ام وارث نعقد وحط
بندر بيدي باقة ورد بلون ابيض واحمر هوواي .
بعد كلام السيد عرفته جده راح يعقد النا
وهوَ بصفي يهز برجله وجده مستمر يحجي قاطعه
بندر : سيد رحمة الجدك اختصر خلص صبري
لا تصير مشكله بس اعقد واختم القران بالبيت براحتك .
سيد مصطفى: ههههه لك عوف جدك يكمل .
بندر : هسة مالها الزوم يطولها هوَ انا قبلت
النكاح وهي قبلت وجدكم الله يرحمة .
الجد : لا تخليني ابطل ولك خليني اكمل .
بندر : اختم القران يلة .
يحجي بدم محروك واعصاب
رجع جده يقرا الأيات وينطي احاديث على
الزواج ونصائح عن الزواج والتفاهم
بندر : الحسين عليك كمل العقد وانصح
لا تصيرر مشكلة دخيل الله فورت دمي .
وارث : لا سيد معليك بي كمل كمل كلامك حلو .
بيرغ : اي والله لا تهتم كمل النصايح .
بندر : وابو الحسنين راح اخذها واطلع .
سيد مصطفى: اعقد بوية هذا مسودن يسويها .
_ سيد بندر زوجتك ميمونة ساجر على سنة
الله ورسولة هل قبلت هذا الزواج والنكاح ؟
_ افاااااا اني ما اقبل قبلت وروح جدي .
_ احجيها عدل ولك .
_ نعم قبلت .
_ بنتي ميمونة زوجتك بندر مصطفى
على سنة الله ورسوله فهل قبلتي بهذا الزواج ؟
مسحت دموعي وجاوبته وغصه ببلعومي
_ نعم قبلت .
العلوية جدتهم واگفه بالباب اول ما نطقت
هلهلت والنسوان من بعدها هلاهلهن ارتفعت
حضن بندر وارث وتسالم هو وبيرغ والسادة
واحد يبارك للثاني وصارت خبصه وطلعوا
هذا بندر حتى ما باركلي سالمين نعمم ؟
رجعت گعدت بمكاني بوستني ملِكه
وامي وام وارث تفتر بين النسوان
ميمونة : متوتره ملِكه خايفة گلبي ولچ گلبي .
_ الصراحة حقچ بندر مبين متحمس زياده .
قدمنا الضيافة للزلم وللنسوان وطلعوا
عمامي والسادة برا والهوسة راحت من الأستقبال
وبندر وكف بالباب يگول الوارث وصوته عالي عااالي
_ يلة وارث جيبلي اختك .
بيرغ : احترم روحك لا اقفل عليك .
بندر : عمي روحوا جيبوا مرتي .
وارث : مو اندمك .
تراث : چا شيگول غير اختكم مرته روحوا جيبوها
حتى نزف الزلمة العالم تعبت يلة بساع .
لزم وارث تراث من قميصه وصاح
_ تراث متحملك انطممم .
بندر : چا شنگول ؟
وارث : دروح هناك حتى انسى وحدي اجيبها .
بندر : روح جيب اختك لك امشي .
وارث : وبدر الهواشم ما اجيبها معاقب ساعة كاملة .
وراح وارث گعد وكلهم يتوسلون بي
وارث : بندر بس تتنفس ازيدها بعد ساعة
انطم انسى كلامك واروح وحدي اجيبها يلة .
تراث : هوَ هذا اللي يتزوج اخت صاحبة يتبهذل .
بندر : الگلب وما يهوى شنسوي .
وارث : بندرررررررر .
_ سكتنااااا .
بين الضيافة والهوسة عدت الساعة بسرعة
وگلبي تسارعت ضرباته والمغص غر بطني فر
وراسي احس بي يفتررر يفترر وصدري متضايق
النفس كوه اجرره ، اجه وارث لزم ايدي باس راسي
وخضني قوي ، ويهم وراه لمني بيده وباس ايدي
بيرغ ما تحمل حتى يفوت ، طلعني والغصه زادت
ميمونة : همام ما راح يجي .
وارث : خيولي تعاركنا وطردته .
وصلت لبندر نزل البياض على وجهي وحضن
ايدي بيده بكل تملك ورفع ايده يسلم عليهم
فتح باب السيارة كلها ورد سوده عالية
وقبل لا اصعد انكتمت انفسي بصرخة
وهوسة وصياح ورايَّ والرهبة تملكتني
درت وجسمي كله تشنّج وحيلي انتهى
همام : ميمووووونة .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.