رواية الموروث نصل حاد – الفصل الثالث والخمسون
♛ 53 ♛
دگيت على راسي گطعت روحي تگطع
ام وارث : ولچ ميمونة راح يوگف گلبچ .
_ من وراي وارث انضرب من ورايه يمه لحگيلي .
بيرغ ملابسه وايده كلها دم صعد يركض
وعيونه على بندر وهمام ، والسيد يفك بيهم
بندر كسر همام تكسر ، فات سَــهم راجع من الأراضي
يركض فاتح ايده وعيونه مصدوم ويدگ على راسه
عين على دم وعين على همام وهوَ ينضرب وما فاهم
منو ضرب منو ومنو كاتل منو ، بس ركض على همام
يحمي ويدفع بندر بحرگت گلب يصرخ
_ عوف اخوووي لا تضرب اخووووي .
طلعت ام وارث تركض تريد تلحگ بيهم وتروح
ويه ابنها وبندر دار وجهه عليَّ صاح
_ قفلي الباااااااااب قفلي .
دفر همام بندر وجر المسدس وجهه عليَّ ضرب طلقة
لزم سَــهم ايد همام اللي بيها المسدس وسحبه منه
سَــهم : ولك تكتل ميمونة تريد .
همام : جانك زلمة اذبحهاا سَــهم.
دفره سَــهم برجله وصاح بي مبهوت
_ اذبح اختي انا اذبح اختي عمت عيني وعمت عينك .
فاتت ملِكه على غرفة مالتي قفلتها علينا ادگ على وجهه
ميمونة : وارث ملِكه اخوي تصاوب من ورايه .
اجت يمي حضنتني تمسح الدم من خشمي بملابسها
ملِكه : هذا همام تسودن سواها دم ول مصيبة على راسه .
وجع الضرب والدوخة فرت راسي وگعت بحضنها
فاقدة حيلي وأملي وخوفي اكل كل قوتي استنزفني .
ملِكه ..
نومت البنية بالگاع وطلعت عليهم اصيح
_ سهمم لك سَــهم ميمونة طاحت .
دفع الباب وفات عليها يصيح على عبايه
وبندر من برا الغرفة يبلغه
_ رايح اشغل السيارة سَــهم اركض .
لفيتها بالعباية وجريت عباية منها لبستها
شالها سَــهم يركض بيها ، وامها لازمه همام
حتى لا يركض ورانا وتبجي تتوسل بي يعوف اخته .
اباع على بنية تحطمت تحطم صارت شگدوتها
بيد سَــهم صعدها يركض ليوره بسيارة بندر
صعدت يمها وسهم بالصدر ومشه بسرعة
لزمت بيها الكرسي مال سَــهم فر وجهه يباع
همست خايفة : خلي يخفف سرعة فدوة راح ننگلب .
طلع التلفون بندر دگ بالأرقام وصاح
_ مسلم سووي نداء للسيطرة الـ****
يفتحون طريق ما اريد اتفتش لأن ويايَّ حالة تعنيف .
طبگ الخط وكمل الطريق ، طبطبت على خد ميمونة
ملِكه : ميمونة فدوة افتحي عيونچ .
وصلنا للسيطرة وعيون الضباط على رقم السيارة
توا ما قروها فتح الحاجز ورفع ايده الضابط
يسوي تحية بقيت دايره وجهي اباع على ضابط
اخاف اتخيل شنو ديصير هنا .
نزلنا گدام المستشفى اجه سَــهم شالها وفات
بيها يركض التفتت بندر عليَّ يأشر بيده يستعجلني
_ بساعچ خوية ركضي وياها .
دخلها على غرفة واجت الدكتورة تشوف بيها
اول ما فحصتها خزرتنا وصرخت بينا
_ هاي مو نفسها البنية اللي اجت متعنفه
الفترة الفاتت والدكتور كفلهااا وطلعها على مسؤوليته؟
سَــهم : هي نفسها نريد نرفع بلاغ بأخوي .
اخذت الدكتورة سَــهم وبندر منتظر برا ما فات ويانا
من راح سَــهم بندر راح وياه ميمونة بدت تستفيق
بس تون من وجع الضرب وجهه خرايط البنية
وجسمها مزورگ من كل جهه وصوب اثار ضرب
اقل خمس دقايق ورجع بس بندر يحوم بالباب
دگه وصاح : خوية تسمعيني ؟
رحت للباب وجاوبته : اي .
_ شلونها .
_ تعبانة والله .
_ گعدت ؟
_ اي گاعدة .
انفتح الباب بهل لحظة ودخلت ام وارث وجهه
اصفر وشيلتها متخربطة من التعب وجهه احمر
ميمونة : ها يمه وارث شلونه .
ام وارث : بالعمليات ادعيله ولچ يمه گلبي راح يوگف .
لطمت ميمونة على وجهه تصرخ وتبجي منهارة
_ اسفة والله العظيم بعد ما اعيدها توبة
يمه بس لا يصير بعد شي بأخواني ويتضاربون .
فات سَــهم مكسور الخاطر يباع على ميمونة بعتب
ام وارث : شسويت .
_ اشتكيت هلى همام وطلعوا مفرزه عليَّ .
_ بس لا گلت ضرب وارث ؟
سَــهم : ليش همام ضررب وارررث ؟
ملِكه : اي يريد ياخذ منه المسدس وضغط
على مسدس وضربه ما متعمد بس سواها .
خلص حيل سَــهم گعد على كرسي يبجي ويصيح
_ ليش تتذابحون ليشش ولكم ليش .
راحت عليَّ ام وارث حضنته تمسح بدموعه
ام وارث : تصير يمه ميخالف هسة روح
لبيرغ هذاك هم متخبل على وارث ضغطه صعد
وخشمه يجري دم گاعد بالباب مال عمليات ما يتحرك .
مال راسه وعيونه تصب دموع لزم ايدها وبقهر گال
سَــهم : وارث راح يعوفنه بس يگعد يمه
هوَ متحملنا گوه مل من عدنا مل والله راح
يعوفنا ما اريد يعوفني ماعندي غيره وين
اروح اذا عافني بعد ماعندي اهل خوالي
ما يريدوني وما اندلهم يمه شسوي بروحي .
بقت ام وارث تون تعرف بكلام سَــهم صح بس تصبره
ام وارث : مايعوفك حتى اذا عافهم انتَ تظل ويايه.
ملِكه : يعني صدك راح يسويها وارث .
ام وارث : اي هوَ قبل لا تصير هاي المشكلة
راح يسويها واتفق ويه المحامي ومجهز كلشي .
ملِكه : بيرغ يموت وروح ابوية هوَ متحمل
مصايبه وساند حيله على وارث اذا يعوفه
ياهو يبقاله امه راحت واخو محكوم سجن .
لطمت على رجلها تبجي وتنشغ
ام وارث : ولكم ما ادري شبيدي عليكم شبيدي .
جرت سَــهم وگفته تمسح وجهه بعبايتها
ام وارث : روح شوفه طلع من العمليات
واگعد ويه بيرغ ما اتحمل اشوف بيرغ بعد .
راد يروح مشيت وياه طلعت على بيرغ لگيته
گاعد بالگاع بصف صالة العمليات منزل راسه
ولازمه بيده وينود من التفكير ، رحت بصفه
كعدت ومسحت على ظهره وهمست
ملِكه : الله يقوي گلبك شد حيلك فدوة .
رفع راسه على صوتي عيونه حمره مدمره من البجي
بيرغ : شعندچ هنا ؟!
_ ميمونة بالمستشفى هنا .
بيرغ : اخ منهااا اخ حسابها بعدين
اخاف ذيچ المرة سكتت منها بس خلي
يطلع وارث بسلامة اعرف شغلي وياها .
_ لا تگول هم راح تضرب البنية ؟
سكت ماجاوب ورجع نزل راسه وسيد مصطفى
موجود بعيد على صالة هوَ واخو يخابر بالتلفون
اجت ممرضه بيدها ورقتين وحده علاج بعد العملية
والثاني بيها حجز الغرفة لازم يسوها راحوا مستعجلين
بيرغ قريب مني يشوفني عينه عليَّ
اجه بندر عليهم يحجي وياها ويتجادل وياهم
ومبين احتد بينهم الكلام وصار بي صياح
سحب ابو وگعده حتى مايروح ويكمل
ومن گد ما اعصاب صاح بصوت مسموع
_ اهلها ما يريدوك يا غبي وين رجولتك سحلت روحك .
ماسمعت رد بندر بس ابو يگله
_ عليمن متمسك يا كلب شنو شفته زين منهم
ماكو مصيبة ما فوتوك بيهاا من عهد ساجر
وبيوم ما انطاك بنته طلع طمعان بفلوس ورث امك
الباطلة ، وشوهتك ولك شوهتك وغدرتك ما بررت
وراحت ويا اخوتها اول ما اجتها فرصة عليمن
ترد للعذاب نهايتك على ايدهمم ولك بوية اصحى .
كون يسكتون قبل لا يرد بيرغ والله يملخهم
ومنا هوَ دمه فاير عليهم ، درت وجهي منهم
بقيت بس اسمع اصواتهم بندر صاح بيهم
بندر : رد لبيتك لا توگفون ويايَّ انا ما اعوفها
اظل احاول وهيَّ وين ما تصفه خليها تصفه .
سيد رضا : راح يموتوها من وراك .
_ اموتهم ياهو يموتهااا .
سيد مصطفى: لك بوية انا خايف عليك .
بندر : چا اسندني لحد ما اخذها وارد وياك
للبيت ما اريد اعوفها بوية لو على موتي .
ابو محتار بي عافه بندر ورد الممر غرفة ميمونة
وابو ظل يخابر واسمعه يگول الأخو
_ ما اخلي وحده ويروح يرد على مخدرات
ويترك دينه ، دام رايدها اسوي المستحيل
وارجعها على ذمته راح ادخل چبير عشيرتنا يحلها .
رجع سَــهم بيده علاگة مليانة علاج
وبيرغ كمل اجرائات الغرفة واجه
بيرغ : اخذ ملِكه لميمونة وخلي ام وارث تجي
بلغها اخوتها وصلوا يريدونها .
شفت اخوانها همه ولدهم يتراكضون خايفين
على وارث ولا عبالك ابن اختهم چن ابنهم
يسألون بالدكاترة خبصوه المستشفى
معگلين وألهم هيبة انفرضت بالمكان كله .
وقبل لا اروح طلعوا وارث من العمليات
يحرك براسه توه يستفيق من التخدير
بيرغ : وارث خوية تسمعني .
يون وارث من الوجع بس يون وبيرغ
يمسح بعيونه ولازم ايده ويمشون بي
بيرغ : عيوني يا خوية كون الصار بيك صار بيه .
فات من شيخ فؤاد مسح على راسه ويصيح وراه
فؤاد : يوگفلك علي بوية وارث .
سَــهم يمشي ويمسح بعيونه مايشوف بعيونه من البجي
رجعني للغرفة وبلغ ام وارث راحت وياه
ملِكه : طلع وارث من العمليات .
رفعت جسمها مخنوگه تبجي وتهمس
_ اتمنى اموت واخلص اتمنى امووت اموت ملِكه .
گعدت بصفها امسح على راسها خايفة من همام
ومن امها تعرفهم يبقون متحلفين الها ، وما تدري
حتى بيرغ وباقي اخوانها متحملين عليها
اللي لازمهم هسة وضع وارث وتدهوره
رجعت ام وارث علينه بعد اربع ساعات هي والدكتورة
ملِكه : بشريني فدوة على وارث .
ام وارث : صوابه بچتفه قريب صدره يگول
الدكتور الحمدلله بينه وبين العصب مسافة صغيرة
الله سبحانه كتبله عمر جديد الف الحمدلله .
گدرت اتنفس براحه والله اذا يصير بي شي
وارث يضيعون هوَ عامود بيتهم ، فحصت
الدكتورة ميمونة وبلغتنا عادي تطلع
لبسناها وماقبلت تطلع تريد تشوف وارث
اخذتها ام وارث من شافونا اخوانها من
بعيد همه والسادة راحوا يمشون بعيد
وكل اللي بالغرفة طلعوا منها بقينا
بس احنه بالغرفة وارث مغمض عينه
مغطي الحد بطنه واكتافه وصدره
مكشوفات حتى ما ينلچم من بچي ميمونة
فتح عيونه يباع عليها زعلان منها
ميمونة : اني اسفة والله اذا تريد تموتني حقك .
قبل لا يجاوبها اندگ الباب بصوت عالي صدى
صوته عبه الغرفة ، وانفتح على بطيء دخل
شيخ ضـلـيل بشكل ثابت وخطوات رزنه
عيونه ترصدت دخلته والأمل ترس وارث
گعد وارث بثگل يسحب بجسمه وعيونه تعلگت
بالباب ما التفتت ولا رمش بعد نظراته تلمع
منتظرها چان منتظرها ، تنهد الشيخ وتقدم
كم خطوة وصل عنده وحط ايده على أكتاف وارث
شيخ ضـلـيل : ما اجت مُـرجانـة .
نزل وارث راسه مستسلم گلبه متهشم ما گدر
بعد حتى يرد على سلام الشيخ غص بعبرته .
ضـلـيل : الحمدلله على سلامتك وارثهم ماتشوف شر .
دخل بيرغ والشيخ ضـلـيل يسلم على ام وارث
والتفت على بيرغ من شاف وارث ما يگدر يحچي
ضـلـيل : شلون تصاوب ؟
بيرغ : كاعدين انظف بالأسلحة وطفرت طلقة عليه بالغلط .
هز راسه ونزله وعلى طرف شفته ابتسامة شك
ورد رفع راسه وگف يباع على وارث ويگله
_ سمعت وعرفت بالصار وياكم الله يهدي النفوس
ويحل مشاكلكم ، اذا تحتاج شي انا موجود ما يردك
غير لسانك ، اعوفك ترتاح مبين تعبان .
كلامه وكأنه يگله صدك انتوا كلكم مشاكل ومرجانة حقها .
تسالم هوَ وبيرغ وطلعوا سلم على زلم برا
وراح يمشي هوَ وشيخ فؤاد يسولفون
رد بيرغ فات على غرفة يأشر بيده
بيرغ : يلة امشن رجعن للبيت يمه انتِ رجعي وياهن .
ام وارث : واعوفن وارث ؟
_ كلنا عنده وراح يبات هل كم يوم هين
تبقين هناك وسهم وجبر وياكم اخاف يصير شي .
ام وارث : وين يگدرون سَــهم وجبر على همام ؟
بيرغ : همام اخذوا يمه انسجن .
وارث لزم صدره وصاح ببيرغ .
_ انتوا بكيفكم تتصرفون ؟
بيرغ : انا مالي شغل هذا سَــهم اشتكه عليه .
وارث : امشي روح انتَ وياهن لا يصير خلف
زلمة ويدفع ولده على ميمونة ويكتلونها .
هز راسه واخذنا وطلع ميمونة منزله راسه
تمشي گوه ، رجعنا للبيت ومثل ما توقع وارث
خلف واولاده مستحلين الفرصة وارث ماكو
وفايتين للبيت يصولون ويجولون بي بكيفهم
وبس ام همام موجودة ما تگدر عليهم
وهذا اول ما شاف ميمونة تخبل عليها
هوَ وابنه ضياء يريدون بس يلزموها يصيح
نزلت راسكم كتلت اخوانهااا ذبحوها .
ركضت بميمونة فوك لغرفتي وقفلت بابها علينا
وظل بيرغ وام وارث يتعاركون وياهم وذاك ضياء يصيح
_ انتوا مو زلم دامكم تعرفون اختكم لاعبه بالحرام
وما تكتلوها واطمون عارها عاريه .
فتحت الباب من سمعت ام وارث وام همام
يفكن بيرغ من ضياء وخلف يدفع بولده
يكتلون بيرغ يضربون بي ، فات سَــهم وجبر
يحامون البيرغ ويدفعون وبيرغ وگع عليهم
بوكسات ياهو يصير مقابيله يضربه
بيرغ : تاج على روسكم نعال اختي يا چلاب
اشرف منكم ومن اكبر شارب بيكم .
كمز على ضياء يضرب بي وذاك يصيح ويسب
خلف : ما اتحرك ولا اطلع من هل بيت
اذا ما اخذ بنت اخوي واطم عارهااا .
بيرغ : تخسي اطم روحي وما اخليك تحصل
طرف من شعرها ول هاي اختي اختي انا مسؤول عليها .
جـبر وگف بوجهه ابو وعاط فاير منه
_ شني تذبحوها لگيتوها وياه ؟
بيكم خير روحوا على طليقهاا وعاركوا
لو ما تگدرون تلعبون عليه تخافون منه تتراجفون
من طاري اسمه اجيتوا تبيعون بطولات على حريم .
ضياء : ول سگط وياها على غلط انتَ تصير ؟
جـبر : ماكو غلط عاف تلفونه وردت على تلفون
ما بينها وبينه شي وتراها هيَّ ما تريده .
خلف : عار تتجاوز على ابوك واخوانك لزموا ولكم .
شمروه على تخم وگعوا على ولد دگ بوكسات
يفك بيهم بيرغ وسهم وام وارث تفزع وهمه تخبلوا .
فاتوا بندر واولاد عمه اربعة وولد فؤاد خمسة
لزموا ولد خلف وقفلوا باب الأستقبال من الجهتين
وطردوا النسوان وقبل لا يقفل الباب شفت بندرر
لزم خلف وخنگه يصيح بي
_ تذبح منو لك چلب ابن الچلب ؟
يا عار اطمك اليوم اطمك انتَ وخلفتك السگط .
وما نسمع غير التكسير والصياح والنجدة
وگفت بالباب وفتح بندر الباب وطلع يعدل
بملابسة ويأشر الهم يفوتون ويصيح
بندر : كلهمممم تاخذوهم كلهممم ما اريد تعوفون واحد .
دفر بيرغ خلف بيد واحد من الشرطة
وطلعه حتى دشداشته مشگگيها عليه
طلع بطرگ الداخليات واولاده يخرون دم
وسهم يلزم بجبر يصيح على بندر
_ جـبر ويانا لا ياخذونا بندر .
وهوَ ما يسمع من احد گب نااار صاير
يخوف يررجف رجف من العصبية
يأشر الهم ياخذونا سكت سَــهم من صاح بي
بندر : اسكت لا اخليهم يشيلوك انتَ وياهم .
بيرغ سحب سَــهم وفوته گعده على كرسي
وفتح الباب الثاني صاح
_ ماي جيبوا ماي .
ركضت ام وارث بيها ما بيها اخذت كلاص ماي
اخذه بيرغ ويغسل بوجهه سَــهم ويفحص بيده
بيرغ : ضربوك العاريه شنو يوجعك حاجيني ؟
رجع سَــهم راسه على تخم يتنفس سريع ويشكيله
سَــهم : ضربني ضياء على گلبي تعبت .
حضن بيرغ راس سَــهم وگعد بصفه
بيرغ : اكسر ايده ومحمد انا اعلمه تعال نام
ارتاح انا اعلمه الچلب نام گلبي .
فات اسمر على استقبال
_ اكلك بيرغ رد للمستشفى لوارث انتَ احسن منه
واحنا راح نظل هنا بالشارع انا واخوتي
وسهم لا تخلي يروح خلي يرتاح بالبيت .
ما رفض وطلع وظل سَــهم ويانا واولاد فؤاد كلهم
برا وخالتهم تهدمهم لو معتازين شي الثاني
يوم وهمه باقين ، من تعبوا اجه ابوهم فوتهم
للأستقبال ناموا وظل فؤاد وسيد مصطفى
گاعدين بالگراج برا هل يوم كله يحرسون
البيت بين ما يرجع وارث بسلامة ويحلها .
ويومين ثانيات خلصناهن على اعصابنا
ام همام تريد تصعد لميمونة وام وارث ما تخليها
وتبجي بجي على ابنها تگطع الگلب والله
خامس يوم وبس صار الظهر جهزنا الأستقبال
بس عرفنا وارث بالطريق ورجع وچن رجع ابونا
والله ردت روحنا بس شفنا فات بطوله يمشي
صح تعبان بس البيت وكل الحياة تظلم وتوگف بلا .
لازم مكان الضربة وفات گعد وخالة والسادة كلهم
حاوطوا گاعدين يبلغوا بالصار ويه خلف واولاده
وعمامه الباقين سمعوا وحادين سنونهم عليهم
ومسوين عطوه للساده شنو ابنكم يسجن ولدنا واخونا
فؤاد : بقت انتَ يمك بوية وارث شني رايك ؟
وارث : خلوني هل يومين بوية افتهم راسي
من رجليه وانا احلها حلهم كلهم عندي اعرف دواهم.
فؤاد : والسادة ؟
وارث : خلي بندر يطلعهم .
بندر : بعد لا تعيدها .
وارث : واهلك عادي عندك مخليهم بمصيبة ؟
بندر : حلها چا تعرف حلها اذا صار اطلعهم .
وارث : مع احتراماتي للسادة اي حرمة الكم ماعدنا .
بندر يريد يحجي وابو على اثر كلام وارث
تخبل على ابنه واخوانه وياه يضربون ويدفعون
بندر يطلعون بي ويصيحون
_ كافي ولك ما محترميك ولا توگف بعينهم زيناتك
ولا وگفاتك ولا محترمينه لا تهين روحك واهلك
اطلعععع منهمم كافي ماكو الك نصيب يمهم .
وشيخ فؤاد طلع يلزم بسيد مصطفى وبندر
فات على وارث وگف گدامه
بندر : ليش تحرك بگلبي وارث ليش ؟
وارث : همام غلطان بس هوَ اخوها وولي امرها
نطلع من أمره تريد ونزوجك البنية واخوها مايريدك ؟
بيرغ : وبعد الصار البنية ما تريدك ولا احنا
ومحد يطلع من شورنا، وگفتكم على عين والراس
بس بعيده عليك تاخذ اختنا .
بندر : والعباس وابو الحسنين اخذها
وغصباً على اكبررررر راس بيكم
وارث ترا انااا مسودن وعلي مو بعقلي
تعرفني لا تتعاند ويايه ما اريد اسوي
تعرفه يهل عليه بس راح يصير صعب
عليكم ، وابو عبدالله اخذهااا اشرد بيهااا .
راد بيرغ يتضارب وياه بس وگف بوجهه
فؤاد يلزم بي وسيد مصطفى رجع يطلع بندر
بندر : حذرتكم وانتوا بكيفكم واررررث وعلي اسويها .
فؤاد : هاي وانتَ صاحبة وتخاف عليه ولك بوية
روح هسة الزلمة توه طالع من المستشفى راح تموتونه .
طلع بندر ويه اهله يتصايح ويتعارك وياهم بالشارع
ركب سيارته وعافهم وراح ، وشيخ فؤاد دخل على وارث
لازم راسه ويصيح
_ بوية عمي الله يساعدك على هل ضيم من
كل صوب تغرف مشاكل من يمي تعبت .
وارث : يوية انتَ رد للبصرة ارتاح تعبتوا انتَ والولد ؟
فؤاد : لا شمالني اعوفك باقين عندك بس
راح ارجع تاج وكريم يظلون هناك هذول عمامك ما يگعدون .
عافهم وارث واستند على بيرغ وصعد فوك
على غرفته ما قبل يظل جوه صعدت جهزت
الحمام من صاحني بيرغ وفات وياه يغسله
وطلعه يبدله وخايف وگعد بيده يوكله وشربه
علاجه وطفه كل انارة الغرفة وطلع ، بقيت بمكاني
اول ما طلع شافني اجه عليَّ وحضني تعبان
حضنته متمسكه بي امسح على ظهره وهمست
_ سوده عليه تعبت ، محترك گلبي عليك .
ما يحچي ظل بس حاضني مايتحرك ابد .
بعدت نفسي شوية وحضنت وجهه
_ ترتاح ساعة حباب لا تگول لا .
_ اروح اشوف همام صار كم يوم مشمور محد بحاله .
_ انتَ مريض بيرغ ميصير هيچ تهمل روحك لا نوم ولا اكل .
_ شسوي عجل اعوف اخوتي ، منتظر وارث يصير
زين ويرجع يساعدني ويخلصني من هل حمل .
_ اوف وارث شيتحمل بعد الله يساعد گلبه .
جر نفس وملامحة غضبت ومن كل گلبه نطقها
بيرغ : هاي الحقير دمرررته خلته تايهه يريدها
بس تجي يفز بكل فتحت باب يتخيلها تجي
ما تحس ما غززر بيهاا ما غزر وسفه كسرته ..
عافني ونزل مستعجل وايده على جيوبه يتأكد
من محفظته والمفاتيح والباج ، وطلع وظل سَــهم
برا ويه الولد وشيخ فؤاد راح وياه ، اخذت اكل
وصعدت على غرفتنا رفعت الغطوه من راسها
حرارتها ما نزلت صار يومين وحلفتني ما احجي
وهوَ محد بحالنا صايرين هوسة
_ اكعدي اكلي فدوة .
ميمونة : بس ماي اريد ابلل ريگي .
شربتها شوية وردت غطت روحها وترجف .
_ ميمونة بالقران لازم تروحين مستشفى مو زين حالج .
هزت راسها لا ورجعت نامت شفايفها بيض
وجسمها ضعف ضعفه مخيفه ، رجعت الصينية
مثل ما هي امها شافتها صعدت الها اول ما شافتها
سحلتها سحل من راسها تضرب بيها وگعتها
من فوك الچرباية تضرب بيها وتبجي
ام همام : واج بهذلتي عايلة كامله شيبتيني
اخوج ضاااع ولچ راح اخوج .
اخذتها من ايدها ما اكدر عليها طلع وارث
من غرفته كلنا سكتنا خايفات وميمونة ختلت
بظهري منه ، دفع الباب وفات صاح بيها
_ صوتچ ما عايزين مشاكل .
راحت عليه لزمت ايدها تبجي
ام همام : راح وليدي يمه وارث داخله على الله
وعليك اطلع همتم من هل مصيبة والله ماعندي غيره .
جر ايده منها ما راضي
_ خلي يخيس بالحبوس يستاهل هل متهور .
_ لا يمه اخيك هذا ابوي ايدك لا تعوفه
ماعندي غيرك وافزعه دخيلك لا تعوفه
راح اموت من القهر ول يمه حن گلبك انتَ الحنين .
سحبت ايده تريد تبوسها باس راسها
گعدت بالگاع لازمه برجله وتصيح
_ بس انتَ تحلها اريد ابني غلط والله غلطان
بس هوَ مايريد هذا بندر ما يريده لان عذب اخته
احسبني امك لا تكسر بخاطري .
لزم مكان صوابه ونزل ثنه رجله
لزم راسها باسه وايدها
وارث : ما احسبچ امي انتِ امي لا تحرگين گلبي
يجرالچ متنازل على حقي الخاطر دموعچ
لا تبچين وانآ ابنچ ولا تتوسلين وانا يمچ يحرالچ .
وگفها بي ما بي واجه على ميمونة سحب ايدها
وطلعها من الغرفة مالتي اخذها على غرفته .
مُـرجانـة ..
متربعة وسط المطبخ مقابيلي صينية، وعيوني على أمي
وهي تفتر حواليه بالمطبخ بس اباع عليها احس اني بأمان
ومحد يگدر يوصلني ويضرني ابد ، ضحكتها تعمر البيت
وتترسه فرح وكل ما اصفن بيها اتذكر كوثر البارحة
من تگول لخواتها بسكوت على سكيتي ما تدري بيه
بالمطبخ عبالها وحدهن تهمس الهن
_ البيت من تطلع منه غـاليـة يخنگ چنه مگبره
ومن هي موجوده تلگين البيت بي روح وكلنا مرتاحين
تعودنا عليها عبالك جهال من تروح لمكان تايهين نصير .
درت وجهي على كوثر گاعدة ويمها وعزيزة
وزوجة عمي مقتدر، وبناتهم وأخوات كوثر
والبيت مليان بيهم عيوننا على باب كلنا
منتظرين ومن بعد اشهر من الصبر فرحة
ترجع ضحكتنا ، لمحت نقش نازلة من الدرج لابسة
دشداشة جديدة لونها ابيض وردات لون وردي
شعرها نازل على جتافها، عينها تروي قصص
من الفرحة همست لها من گعدت بصفي اخذت خياره صغيره
_ اليوم كاشخه منتظره الغالي.
ضربتني على زندي وضحكت ضحكة تحاول تخفيها من الخجل
نفس : راح يرجعلي شاهين مُـرجانـة فرحانة والله فرحانة .
تخربط حالها واني وياها على واهس ارتبكت
ونمغصت أول ما سمعنا صوت الطبل عال يدگ
بالشارع خليت شالي وطلعت اني وكل الموجودين
بالبيت نباع عليهم يهوسون الشارع نترس ترس
عالم وذبحوا جوه رجله ذبيحة لسلامته
الوجوه كلها تضحك فرحانين بردت الغالية شاهين
عمي مقتدر وأولاده وأولاد عمتهم يهوسون
ضحكة عمي ضليل ويا ضحكته طاير من الفرح
حاضن شاهين عبالك الدنيا رجعت ضوت بوجهه.
لزمه عمي ضـلـيل من ظهره ودخل شاهين للبيت
هاي أول مرة أشوفه بهاي الهيبة لحيته كبرانة
ومبين بيها تعب الاشهر الفاتت وهوَ بعيد عن اهله
بعمري ما شايفته بلحيه من أول ما التقينا
ملتزم بالعسكرية وما يصير يطولها ممنوع
دخل بين الناس، يسلم يرفع إيده على روسنا ويتشكر
_ مشكورين مشكورين رحم الله والديكم.
كوثر أول ما شافته راحت تركض تبوس بيه
وهو نزل حضنها وباس راسها استغربت
اتذكر شاهين شايل بخاطره منها ، بس واضح
اشتاق حتى للي مزعلي سلّم على الكل من بعيد
الا أمي بس شافها تقرب يضحك وقبل لا يوصل
يمها التفت على عمي ضليل يسترخص منه بصوته الثابت
_ عمي اسمحلي هاي أمي لازم أحضنها.
شاهين حضن راسها من بعيد وباسها من فوك الشال
_ شلونچ شيخة ؟
بعدت أمي مسحت دموعها وجاوبته بدموع
_ والله بروحتك فگدت ابني مو ابن حماي غالي على گلبي والله .
لزم ايدها باسها خجلان وهي كملت
_ إنتِ بغلات نقش عندي الله شاهد .
بهاي اللحظة خلّت الضحكة تنرسم على وجهه
عبالك گالت اله اخذ نقش مو بمعزة نقش .
اجت ننوس من عز نومها تركض فتح اليده الها
وشالها حضنته وهوَ يضحك يبوس بيها
_ لچ فصعون ام السان كبرانه من
راح فدوة لـهذا الطول فدوة لـ هل خديدات الحلوة .
شاف فارس بيد امه عسة انتبه عليه شاله من حضن
أمي نزل باسه وصافن بوجهه وبهدوء ينطق
_ اللهم صل على محمد وآل محمد ما شاء الله
واخيراً شفتك شيخ ال ضـلـيل .
تگرب عمي من شاهين طبطب على ظهر شاهين
شيخ ضليل : هذا الشيخ ال ضليل من بعدك دام
شاهين موجود ، أنت ابني وأول فرحتي بلاك أنا ضعت
والدنيا كلها تشهد ردت بروحي بيوم رجعتك بوية شاهين .
تقدمت كم خطوة بصف امي برزت شافني حلگي نعوج
واني اجمع الكلام حتى ما اخربط وافشل روحي
_ هلا بابن العم هلا بحزام الظهر.
_ ههههه هلا مرجانة شلونك يا وردة؟
_ والله من شفناك، صرنا زينين.
ضليل : ول بوية نقش وينچ؟ يولووو تبخرتي؟
نقش : جيت عمو جيت .
طلعت نقش بيدها گلاص عصير وبيدها الثانية لازمه
طرف دشداشتها حتى ما تعثر بيها وگفت گدام
شاهين وبعيونها خجل الكون كله بس صوتها ثابت
_ الحمد لله على سلامتك يا بطل.
شاهين تجهول وضعه وعرك وتخربط كا وضعه اخذ العصير
منها وشربه شويه عرفته هذا عصيره المفضل
باوع على عمي ضـلـيل وصاح بي
_ بعد يمك حلها .
ضـلـيل : ههههههه يمي يمي معليك .
صاحوا بالنسوان يفوتن حتى الزلم تدخل
للديوان حطت امي ايدها على نقش وفاتوا
اثنينهن واني وراهن حاولت أساعدهم
بالمطبخ ، بس راسي يفتر دوخه فضيعة صايبتني
طلعت بطل من عصير البرتقال صبيت واحد
وگعدت بس اباع عليهن فرحانه على فرحتهن
بس گلبي مكسور .
امي تفننت بترتيب صواني اكل الزلم
ريحته عبر البيت كله وهاي انا تلعب روحي
واشتهيت اكل من هاي الصواني مو ترتيبهن
ساعدتها نقش وعزيزة وحرمة مقتدر وبناتها
ورتبن السفرة الثانية بس للنسوان ، وبقيت
اني وامي بالمطبخ جهزت الجاي اخذوا الولد
وبس كملوا بلشوا يقلون ويردون لبيوتهم
دخلوا عمي ضليل ومقتدر ويّاهم أولادهم الكل بالاستقبال
أنا وأمي ونقش اخر شي فتنا وياهم گعدنا قريب
مو عمي ضليل مقابلنا طبلة عليها بقلاوة وگهوة وچاي
قدم عمي ضـلـيل نفسه وفر سبحته تحمحم وبنبرة ثقة بلغهم
_ هاي الأيام المرت ما جانت ابد سهلة
بس بحمد الله راحت وما نحجي بيها بعد نعيش يومنا
والحمدلله بينا الطلع من الموت ونكتب عمر جديد
وبينا سجن وخلصنا الله فرجها بس تعبنا
نريد نفرح كافي حزن شيبنا ما اريد اكبر .
مقتدر : بعدك شباب .
كوثر : هسة ازوجك .
غـاليـة : شكوو تزوجي ما يتزوج بعد راحت
عليَّ مكتفي بيه راح يصير جد طلابه ، خلي
يزوج بناته وابنه صح كلامي ضـلـيل .
ضـلـيل : صح غصباً علينا كلنا ، سكتوا لا تجهولنا يلة .
اخذ بقلاوة اكلها وباوع على نقش وشاهين وكمل كلامه
_ بعد ما اخذت موافقة بنيتي نقش وامها
إن شاء الله بعد يومين عقد قران نقش وشاهين
كافي الزلمة صار سنين منتطرها تصيرله وصار الوكت .
كامت نقش خجلانة،لحگتها وصلت لنص الدرج
والدنيا افترت بيه فر گعدت على بايه وصحتها
_ تعاليلي نقش راح اوگع .
ركضت تسند بيه تريد تصيح على امي ما خليها
نفسي ضاق صعب اكدر اجر النفس وعيوني تزغلل
_ صعديني انام فدوة .
حضنتني خايفة وصعدتني مشيت اسحل بروحي
ونمت على جرباية راحت على كنتور طلعت جيس
علاجي وجابته يمي تبجي
_ كملي فرحتي يا روح اختج لا تخليني ادمر عليج
تعبت مرجانة حبابة والله بالي كله يمج
شربي وفرحيني انتِ مريضة والطفل تعبان
شنو ذنبه امه ما تريده خطية والله .
دخلت أمي علينه شافتها تبجي اجت يمي رجعت شعري
_ هم دختي ؟
نقش : اي يمه هم رجعت داخت .
طلعت الحبوب حطتهم بإيدي واكتفت بكم كلمة
_ الخاطري إذا تحبيني تشربين .
اخذتهن شربت وبجيت افهمها اريد
مرجانة : يمه اعرف الطفل ماله ذنب والقران جنت اتمنى
يصير عدنا بس هسة خايفة أخاف أنجبر وأرجع الخاطر
الطفل وأنا ما أريد أرجع .
_ وارث بالمستشفى متصاوب حالته خطرة .
كفختني خفت گلبي تسارعت دگاته هزيت راسي وصحت
_ شلون منو ضربه شصار شهاااب ضرربه الله لا يوفقه .
_ لا على اساس هو وأخوه همام متعاركين
وطلقة طافره من المسدس بالغلط وبعد الله أعلم شنو الصدك .
صعد عمي ضـلـيل گال الها
_ بلغتيها ؟
غـاليـة : اي .
ضـلـيل : بوية القرار بيدي اذا تروحين وياي
يعني تخلين خط رجعه بينكم الخاطر ابنكم
واذا گلتي لا ما اروحن معناتها انتهت حياتج وياه
هذا موقف انساني بوية بس محد يضغط عليج .
متت الف موته واني افكر اروح لو انهيها
عقلي تعبان وهايفة ارجع اتقرب ابد ما اريد ابد
جبرت نفسي وحسيت روحي طلعت مو گلت
_ لا ما اروح .
نزل وره شوية سمعت بي راح بقيت على نار انتظر
رجعته ، كل شوية اطلع اوصل للمحجر وما اسمع
حيه وارد خايبه الحد ما رد العصر نزلت بعدني
على درج بلغني بحالته گعدت على بايات الدرج
ما اكدر انزل اكثر اخاف اوگع على وجهي من الدوخة
ضـلـيل : بعده مو زين حتى ما يكدر يحجي .
مُـرجانـة : منو عنده .
_ اهله كلهم ، وهاي اخته وجهه مضروب مبين مكتوله .
_ عززا .
ربطت كلامه وعرفت سبب خبال همام بندر الله وعلم شصاير .
غـاليـة : وارث شلون خطية ؟
_ بعد كم يوم يطلع من المستشفى.
خليت الحرگه بگلبي وكتمتها حتى ما يگولون تريده
ويرجعوني ، بهاليومين كلها اشتغلت تنظيف تجهيز وترتيبات
وأمي بين يدين شاهين تساعد بالتجهيز مثل ابنها
وبين نقش تساعدها بتحضير نفسها والفستان .
الجو بيومها بارد البوب مال بير كلها مفتوحه والهوا
البارد يعبي البيت كله ، وريحة الخضار طيبة والحياطين
مبلليها من غسلوا الگراج ، كلشي رتبوا مثل ما يريد شاهين
وتتمنى نقش ، دخلوا مجهزين الاستقبال رتبوا الكوشة
بلون وردي فاتح يشبه تدرج لون فستان نقش يلمع ياخذ العقل
واخر شي وصل الأكل بأصناف مرتبة ومواعين كبار مغلفه .
اقاربنا يجون شي وره شي واني افتر بفستاني
النيلي بدون ما البس اي حذاء احوس بالبيت
واسمع همساتهم على ترتيب والضيافة
رفعت شعري، وخليت مكياجي خفيف
وگعدت بصف نقش ما أگدر ابد اتحرك
الهوسة بالبيت زادت الهوسة
الكل يضحك بس اني بعقلي
تجمعت كل الذكريات هدمت حيلي
الدم مايروح منطره من بالي اتخيله
الضرب احس بي بعدني الجوع والخوف
ما اگدر انسى شلون جنت اخاف انام
ويجي يغتصبني لو يضربني أو يكتلني
ما راح أنسى الصار بيه طول حياتي
كالوس لا يفارگني بنومي ولا بحياتي
گلبي مكسور والله گلبي مكسور دمروا حياتي .
طلعت أمي من الغرفة بكامل اناقتها وهيبتها
يا ربي شگد حلوة نظرة منها تحسسني الدنيا
بعدها بخيرضحكتها ادخل الفرح لگلبي ، ويمكن
مو بس أني أحس بهالشعورحتى عمي ضليل
يدور عليها بين لوجوه ومن لمحها بانت اسنانه
وفر سبحته عدل البشت على كتفه ولزم لعگال
من اجت تقربت منه رفع إيده حضنها گدامنا
_ بوية هنا العروس من أروح فدوة لشيخة
گلبي تاج راسي أم فارس.
أمي خجلت واني حسيت بفخر وأخيرًا امي ارتاحت بحياتها
حتى كوثر شو فرحت وضحكت مو مثل قبل جانت تزعل
إذا عمي هيچ يتغزل بأمي شعجب خاف تريدين تموتين
بس خواتها صارن عكسها اخذن دور الحقد منها
بقن يباعن بحقد على امي من فوك ليجوه وامي ولا
عبالك تشوفهن مطنشه الدنيا كلها وتفتر بالبيت براحتها .
غـاليـة : محتاج شي عيوني ؟
ضـلـيل : اي والله جهزوا نفسكم راح يوصل الشيخ .
غـاليـة : جاهزين شيخنا .
فر السبحة وراح للديوان، ومن بعيد واحنا گاعدين
شفنا شاهين داخل من باب البيت الخارجي
لابس رسمي مرتب لحيته مرتبها راجع نفس شاهين
القديم بس بهيبة أكثر وكبران وضخمان جسمه اكثر من قبل
رحت للباب شافني، فتح إيده يأشر على نفسه :
_شنو رايچ ؟
_ 10 على 10 والله كلش حلو نسيبنا.
_ بس أختچ أحلى مني .
_ أكيد نقش أحلى ماكو بجمالها ، بس اثنينكم تخبلون .
خط ايده على راسه وفات .
بعد ساعة وصل الشيخ واخيراً ، رجعت بصف نقش
لزمت إيدها والبنية ترجف رجف همست وصوتها يرعش
_ يا ربي تمر هالمرة بخبر مو مثل ذيج المرة خرب فرحتنا .
_ راح تمر رب العالمين راح يكملها على خير.
اجه عمي ضـلـيل استرخصها وصار وكيلها گدام الشيخ
وبدا عقدهم وشاهين متوتر يميح بگصته عرگان
وكلها اقل النص ساعة وعمي مقتدر وگف بالباب وصاح
_ هلاهل هلاهل وصفگات نقش صارت بأسم ولدنا شاهين .
دموعي نزلت حضنتها واجت امي تمسح
بدموع نقش وتحضن بيها وهي ترجف من الفرح
فاا عمي ضليل ويا شاهين يباركون أله النسوان
وهو كل عيونه على نقش عروسته ما يشوف غيرها
عبرهم كلهم وحضنها گدامهم كلهم حضن حلال
متمسك بيها يبوس براسها وبخدها وبحنيه يحاجيها
_ مبروك عروستي مبروك يا حلم السنين
وحب الطفولة والمراهقة والشباب أخيراً صرتي إلي .
ايليا …
تراث : لا مو هذا السبب اللي براسچ انتِ منتظرة أخوچ
يرجع وتسافرين وياه هناك وتشمرين الحجاب اللي انفرض
عليچ والعباية وتروحين تلعبين على حل شعرچ .
ايليا : بذاك الوكت انتَ مالك شغل بيه .
هجم عليه فر ايدي وره ظهري حسيتها راح اطگ بيده
گعدت بالگاع وايدي بعدها بيده اسمع صوت طگتها
عافني وصحه على روحه من سمع صوتها
نشغت وبجيت من كل گلبي وصرخت
_ الله لا يوفقك .
شالني وگعدني على چرباية ويشمر بيده وكلامه
تراث : تجاوز لا تتجاوزين لا اهفچ براشدي .
ايليا : رجعني يلة هسه ترجعني .
شال بيده التلفون يريد يضربني رجعت على
مخده لازمه ايدي وما اگدر اسكت منه حتى
لو يملخني يضربني يكسررني ما اعبررها
_ اكرهك دخيل الله شگد همجي وما متربي
والحسين اي تربية ما عندك لو زلمة
ما تمد ايدك وتضرربني بس انتَ مو .
سد حلگي وذبني على مخده لازم ايدي منا
وايدي الثانيه ومرد راسي بيدي حيل ويصرخ
_ لا تكملين لا تكملين لا ادمرچ والله ادمرچ .
خجلت من اصواتنا شلون طلعت جريت الغطوه
لفيت روحي وادعي عليه بصوت علي يسمعه
جر غراضه وطلع من الغرفة الى جهنم .
بقيت احوس لا عندي تلفون واخابر ابو
واخلي يحي يخلصني من ابنه ، ولا عندي
حل غير اصبر الحد ما نرجع ، بجيت ونشفت
دموعي ونمت حسيت بي يفوت للغرفة بعد
اذان الفجر حط اغراضه وجر مخده ونام بالگاع
رجعت غفيت الثاني يوم وعيت على صوت الأذان
رحت سبحت وصليت وهوَ متغطي ونايم
لمحت تلفونه رحت على اطراف اصابيعي
اخذته والتفتت ومشيت بلا اي صوت اول ما
وصلت الباب الحمام صاح
_ رجعي التلفون لمكانه لا اگوم اشمرچ من فوك .
شمرت تلفون على جرباية بكل قوتي انضرب
بالدوشك وارتفع وطاك بالگاع بالغلط وتفلش تفلش .
گعد راح على تلفونه يگلب بي بس
رفع عيونه وشفته فتت للحمام وقفلتها
دفر الباب وصاح
_ اطلعي ايليا.
_ ما ادري والقران بالغلط .
_ افتحي الباااااب .
_ تكتلني علمود تلفون .
_ راح افلشه افتحي .
والله غبية اذا اخلي يعرف خايفة منه هي موته
لو موتتين يريد يكتلني خلي يكتلني ما اسكت
اذا مد ايده بس ارجع غصب عنه يطلگني .
فتحت الباب دفعه عليه انضربت بيدي
جرني من معصم ايدي وطلعني شمرني
على حايط فكيت عيني وصحت
_ اي وشنو تضربني ترريد اضرب تراث
هي بقت بس ضرب كلشي سويت بيه
جرب تضرب بلكي گلبك يبرد مني وحقدك يخلص.
بطرف اصبعه ضربني على شفايفي
الخوف راد يوگف گلبي بداخلي دا امووت
من الخوف بس اثبت بروحي حتى لا يتمادى
رحت گعدت على كرسي وهوَ بقمة غضبه
رگع باب الحمام ورجع يفتر بالغرفة
تراث : شسووي بيچ لچ شنو من بشر انتِ .
ايليا : انتَ شنو من بشر شهل قابلية
كل الدنيا تخبهم انتَ وتخاف عليهم وتعاملهم
حلو اله اني كاررهني وحاقد عليَّ وكل ما تجبرر
روحك تصير زين ويايَّ تظل يومين وترجع
نفس قبل وازبل .
حط عينه بعيني فاتحها وتخبل شلون
اتجاوز عليه حطيت ايدي على شفايفي وصحت
_ قصدي اسوأ من قبل مو ازبل.
لزمني من ايدي هزني هز قوي وصاح
تراث : والعباس تختبرين صبري انتِ
والله ايليا اجرم بيچ وما احس على روحي
انا اذا عصبت عقل ما يظل براسي يطير اتسودن
اجرم بيچ وبعدين اصحصح وانتِ ميته بيدي .
اريد اجر ايدي منه ما اگدر بجيت مقهورة
احس بغربة ما اگدر عليه وحدي عافني راد يطلع صحت
_ لا تررروح اخاف وحدي هنا خلي نرجع .
تراث : ما نرجع لا عبالچ تسوين مشاكل حتى
ترجعين وتعرفين هناك شلون تضمين نفسچ .
بقيت ساكته رجع گعد يگلب بتلفونه
مكسر فحطت ورحت غسلت وجهي
ورجعت على چرباية عاط بيه
_ امشي بدلي حتى نطلع .
_ ما اريد راح اظل گاعدة هنا .
_ لشوكت .
_ منا لمن تمل وترجعني اني غلطانة
وغبية لأن سافرت وياك يعني كل عقلي
هوَ انتِ بالبيت مو زين ويايَّ انوب بالسفر .
لزم راسه يهزه ويجاوب بيه محمل بگلبه
_ ليش انا شنو لسويته وياچ بالكم يوم الفاتت
انتِ گلبتي الدنيا انتِ خايتينا نتعارك
وهاي دائماً تخليني افوور من العصبية
وتالي اطلع انا الغلطان .
_ لأن انتَ الغلطان .
_ راح اگوم اكسر راسچ وراس لخلفوچ .
_ وراها واخلص تعال سويها وخلصني .
_ ايليااااااااااا خرب اسكتي مني .
ضربت على شفتي واشرت على باب
_ منا العالم والله عيب عيب .
_ تعبتي گلبي انتِ شنو لچ خبلتيني .
_ خلي نرجع بس رجعني واخلصك مني .
_ تشردبن مو ، تسويهااا حتى ادورچ واكتلچ .
رجعت راسي على چرباية وسكتت فترة طويلة
وهوَ ولا نطق بحرف حتى ما تحرك لمدة ساعة
ايليا : نزلت روحي بيوم واعترفت بحبي الك
ودام انتَ صديتني لو تنصب ذهب يا تراث
ما اريدك بعد ما الي رغبة بيك تصير زوجي .
شغل جگارة وتحرك رفع شعره وجاوبني بهدوء
_ جنتي صغيرة وما ردت تتعلقين بيه انا اكبر منچ .
ايليا : عذرك قبيح مثل افعالك بيه .
جر النفس من الجكارة متعصب وردني
_ ابقي تراددي وياي ابقي الحد ما اموتچ استمري .
ايليا : هي كلها يندقون من الحقيقة .
_ يا حقيقة بنت الچلاب انا افعالي بيج قبيحة
انتِ ليش نكاره ، ما احب اذكر ولا اعدد بس انا
زين وياچ لا تصيرين حيوانه كااافي وصلت حدها .
عدلت گعدتي وگتله
_ صح ما أنكر خلصتني من زوج خالتي
ومن عذاب عمامي، وخليتني اكمل دراستي
وأحقق حلمي وگفت وياي بكل مصيبة
صرفت عليَّ كل هاي السنين واذا تمرّضت تسهر عليّ
وهذا سبب اللي خلاني اتعلق واشوفك
وارسمك بعقلي انتَ احسن بشر بالدنيا
بس طلعت غلطانه وانتِ بيدك هدمت كل هذا .
عافني وطلع يعرف بكلامي صح والله
ظل طول اليوم برا رجع للغرفة بليل صاح
_ جمعي اغراضنا باجر راجعين .
سويت مثل ما طلب بلا مشاكل والثاني يوم
بقينا ساكتين ، نزل الجنط امشي وراه ما يلتفت
بمعنى انتِ بعد ما تهميني ولا اغار رجع يعاملني
مثل قبل ههههه حتى يزيد كرهي ، وصلنا للمطار
افتر وراه اخاف اضيعه وهوَ شگد يحاول ما يبين
بس ما يگدر ما يلتفت ويأشر اليه منين امشي
صعدنا الطيارة دار وجهه مني ما يريط الحزام
عبالك طفله ما اعرف سويته بيدي ودرت وجهي
مثله الحد ما وصلنا لگينا كريم منتظرنا بالمطار
صعدنا وياه لا اني احچي ولا تراث يحجي .
كريم : متعاركين مو ؟
تراث : معليك كمل طريقك وانتَ ساكت .
درت وجهي على شارع ودموعي نزلت مو باوع
كريم عليه شخط السيارة وگف نزل كريم وفتح
الباب مالتي ونزل راسه يسأل بيه بخوف
كريم : ضربچ شسوه وياچ ليش تبجي گولي .
تراث : اي كسرتها تكسر ما تشوفها ميته رجعتها .
ضرب كريم على جامه مال تراث حيل وعاط بي
_ عود شنو تضحك حضرتك
شبيها البنية دايخة وتبجي ابوية مو عافها
امانة عندك انتَ ما توب من هذا طبعك
الخايس ما تستحي ؟
ايليا : مابيه شي بس دايخة من الطيارة .
كريم : جذابة ماادري شمسوي ضااربج احجي
هسة اخابر ابوية والعباس واخلي يجي هنا .
تراث : اصعد كمل الطريق لا اسوق انا هسة
وختى السيارة اگلبهااا بينااااا اصعد .
رگع كريم الباب وصعد يحلف بس يوصل
يخابر عمي ، على اعصابي كملت الطريق وياهم
وهمه يتجادلون اول ما وصلنا لگيت عمي
هاي دخلته من الغربية يريد يرتاح ويرجع
عفتهم برا يتصايحون وفتت فتح عمي ايده
واستغرب من رجعتنن رحت حضنته ابجي
بحضنه ، فات تراث شافني دخل الجنط وراح
يسلم على امه بقيت بحضن عمي
فؤاد : شكو شو رديت ؟
تراث : زرنا كملت ورجعنا شني نعيش هناك ؟
فؤاد : والبنية ليش تبجي ؟
تراث : اسألها .
ايليا : ما اريده عمو خلي يطلگني .
ما نسمع غير طگه ما ضربة قوية وتراث صاح
_ اخخخخ خرب .
باوعت طلعت فاطمة من وره تراث قزمة مدحدحه
جنها قنينه غمته واجت يمي تصيح
_ الشايب الخايس عرفته والله راح يلعب
على بت بااع ولك خوية ياااا واك شووف
عيونهااا شلون دم صايرات امداك وامده طولك .
تراث : سكتها هاي لا ادخلها بخطيتي .
فؤاد : ادخل منو لك احترم اختي لا اكتلك .
فاطمة : خايبه مو گتلچ تعالي ويايَّ
ما نزلتي انتِ هم تستاهلين ضربة
رفعت ايدها وضربتني على ضهري حيل
لزمت مكان الضربة امسح بي وباع عليها ابجي
فاطمة : احسن الج هسة هوَ هذا مال سفرر .
لزمتني من ايدي سحلتني تفوتني للبيت وتصيح
_ راح احبسها عندي بالغرفة خلي اشوفك
تعتب باب غرفتي اكضك واكتلك والعباس.
واخوته گاعدين بالاستقبال يباعون
اخذتني وصلنا النص المطبخ وصاح عمي
فؤاد : انتظري ايليا بوية تعالي .
رجعت وگفت بالباب أفرك بعيوني
فؤاد : اخوج البارحة رد من السفر واجه هنا
سأل عليچ راح اخابره يجي حتى تشوفي .
فز گلبي وسرعت دگاته ما مصدگه والفرحة
ما وسعتني بعد ابد ، فات عمي دخلت وياه
وتراث ما ادرب وين راح شو ما فات ويانا
ولا علق لا رفض ولا قبل شسالفه ، اتصل
عمي وگلبي راد يطلع من مكانه من سمعته
يسلم عليه وبلغه يجي وسد الخط
رحت سبحت تعبانة وفاطمة هم غطت مثل
تراث ، بدلت بالحمام وصعدت فوك نشفت
شعري ورشيت عطر واسمع ام تراث تصيح
_ ايليا اخوج وصل تعالي ركض .
ما جنت انزل الدرج طفرته من الفرحة
فتحت الباب وگف گدامي شاب بنهاية
الـ 20 شعره محفور بطريقة غريبة
وعلى كامل الحفر وشوم غريبة
نازله على وجهه ورگبته وملابسه
فضفاض عبالك هذولي الاجانب
اشوفهم بالتلفزيون وگلاده لابس
بهتت هذا مو اثير اخوي نفسة
اللي جان وجهه بريء وملامحة
عفوية شاب سافر يكمل دراسته شصاير بي ؟
درت عيوني على تراث بقمة صدمتي
احجي وياه بعيوني اريد اعرف شنو هذا
تراث گاعد على اعصابه الجگارة ما وگعت
من ايده ويهز برجله صاير مثل البركان
على ساعة ينفجر ، تقرب اثير جمدت بمكاني
فتح ايده مبتسم
اثير : ايليا الطفلة المدلل كبرت واوو صايرة
شكد حلوة شنو هل جمال تعالي حبيبتي
لزم ايدي عبالي يحضني فرني يباع على جسمي
ويحبني بأخر لحطة حضني قوي يعصر بجسمي.
شميت بي ريحة اهلي فرحت لا مو بس فرحت
طرت فرح ما اگدر اوصف فرحتي ، تراث ما تحمل وعاط بي
_ عوفهاااااا اگعد نفتهمم منك وين جنت غاط .
اثير : حياتي ما تخصك والكل يعرف جنت
مسافر ادري واشتغلت وتزوجت هناك
وهسة رحعت اخذ خواتي وارجع اسافر .
تراث : اي روح اخذ خواتك وسافر .
اثير : يلة ايليا حتى تروح .
تراث : على جثتي تطلع وياك ايليا .
ايليا : موو بكيفك شنو على جثتك اريد اخوية .
تراث : عميه ما تشوووفين غبية انتِ ثوله .
ايليا : اشوف شنو غير عايش بالخارج وهذا
نمطه بالبس قابل تريدها كلهم نفسك متشددين .
تراث : ايليا لسانچ ضبي راح افقد السيطرة .
فؤاد : تراث اطلع انتطر برا .
تراث : ايليا ما تروح بوية ما تررروح .
بجيت وتعاركت وياه وخبصت روحي
بس اريد اشوف خواتي بعد بنفسي اشوفهن
طلع تراث برا يصيح ويهدد اذا اطلع يرميني
راح عليه ابو يحجي وياه قافل ما يقبل
توسلت بيهم محد يطلع ورحت اني وحدي
طلعت احاول اتفاهم وياه وگفت بصفه
هوَ مستند على سيرة ويشرب جگارة صاير نااار
ايليا : انتَ تدري بيه صار كم سنة اتمنى
اشوف خواتي وألتقي بيهن واجتني الفرصة .
جرني من ايدي قربني منه واشر على استقبال
تراث : بس مو ويه هذا السگط ايليا مو وياه
اني للسوك گلبي ما ينطيني تروحين ، شلون
اخليچ وين هذا موو راحة اني عندي نظره
على الشباب اعرفه زين لو سگط هذا مو بس
سگط عابره مرحلة السقوط ايليا فهمي .
بجيت وتوسلت لازمه ايده احارب حتى اروحلهن
_ ما راح نسافر بساع التقي بيهن
واشوفهن واذا شفت الوضع مو تمام
اخابرك تجب تاخذني حباب الله يخليك .
تراث : واذا صار بيچ شي خرب اهلج
شلون اذا صار شي ولچ لا تسودنيني .
_ اريد اروح لا تخليني اطلع بدون علمك .
شمر جكارته وداسها سحب ايدي مردها وهددني
_ اسمعيني زين اذا هسة طلعتي وياه
بعد ما ارجعچ لهذا البيت مرتي ننتهي ايليا
راح تطلعين منا نظيفة طاهرة وتروحين
البيئة سگط والدليل حالة اخوچ تريدين
تروحين روحي بس بعد لا تخابريني .
هزيت راسي وابتسمت واني اضيف
_ وطلگني
_ باجر من الصبح اطلگج .
عفته ورحت صعدت لميت جنطتي وصعد
اسمر نزلها ما يباع بوجهي ، رحت على فاطمة
بابها مقفول دگيته وهمست خايفة عليها
_ فاطمة ما تودعيني واح اروح .
فاطمة : فؤاد تعال اخذهاا ما اريد اسمع صوتها.
شفت عمتي واكفه بالمطبخ تبجي دموعها
مبللات كل وجهه رحت عليها حضنتني
وبجت بصوت عالي تعاتبني
_ لا تروحين ولج والله ما نكدر نعيش الفراك
مرة ثانية القي وروح بنتي بعد ما اتعارك
وياج وحتى اخواتي ما اخليهن يجن هنا
انا اروح الهن هناك لبيت اهلي .
بجيت وياها وبست راسها
ايليا : والله العظيم كل ما اجي للعراق اجيكم وعد .
ام تراث : بس تراث يحبج لا تكسري يمه
انتِ بعد مريته من سنين ورباج وانتِ صغيرة
تعود عليج هذا صعب وتعودتي عليه فدوة
لا تروحين والله صرتي بنيتنا مو جنه بالبيت.
ضحكت احاول اضيع هل بجي وجاوبتها
_ غير صياحنا وصل للضريح هناك الفندق
كله شاهد يت تفاهم هذا ويا حب ما متوالمين
والله هسة يدور ويحصل بنية تستاهله ويستاهلها
تراث زلمة والنعم منه .
بست ايدها ورحت حضنت عمي وسلمت على
ولد واحد واحد اسمر وتاج شردوا بالشارع
وجوههم احتقنت ، من طلعت لگيت تراث گاعد
بالسيارة برا ما يباع علينا ، وتاج واسمر بالركن
يمسحون بعيونهم بالكلينكس ، تعبت من البجي
واثير فتح الباب مال سيارة وصعدني وراح
شغلها بسرعة وطار بينا .
ميمونة ..
تمسك بيدي وگعدني على چرباية مسح
على راسي وجر الكرسي گعد گدامي بغرفته
وارث : تعرفين بروحچ غلط ؟
ميمونة : اي والله العظيم بعد ما اعيدها وارث .
وارث : همام اذا نأكد على القضايا مالته يروح
بالرجلين يضيع بعد ياكل كم سنة سجن ويطلع
مو هوَ نفسه همام يتخبل هناك .
غطيت وجهي اشهك وخايفة يضربني
لزم مكان الضربة ورجع ظهره على كرسي
وارث : هوَ سؤال وكّل حياتچ تعتمد على جوابچ
وهذا الجواب ما بي تهور لان وراها انتِ حددتي
مستقبلچ وماكو بعد رجعه ابد .
ميمونة : بس حباب لا تضرب .
وارث : شوكت انا ضاربچ ميمونة .
_ مو هسة غلطي جبير .
_ ميخالف كلنا نغلط ياهو بينا معصوم من الغلط ؟
لزمت ايده ردت ابوسها سحبها وون متألم
سحب راسي باسه وكمل
وارث : تريدين بندر ؟ لا تستعجلين فكري
وبنفس الوقت لا تخافين وياچ انا اذا رفضتي
اخذيها من هل شارب والله ما اخليچ تشوفي
بعد عمرج كله اخاف خايفة منه يتعرض الج
محد يوصل الچ والله بس اريد تفكرين وتجاوبين ؟
ميحت عيوني وعصرت اصابعي خجلانه
وخيرانه بنفس الوقت خايفة من جوابي
مد ايده على فكي رفع راسي وحط عيني بعينه
وارث : اذا تريدي لا تخجلين ابوچ انا
ولا تخافين من احد غصب على كل اكمل زواجكم
واطلعچ معززه مرفوعة الراس وحگ العباس .
طگيت اصبعي من الخجل وگتله
_ وهمام ؟
_ لا تفكرين بأحد هذا مستقبلچ .
_ اخاف من قراري اخاف ارفض واتندم لأن
ما اگدر اتزوج غيره ابد واخاف افكر بغيره
واخاف اذا وافقت بعده عصبي ويمد ايده
اذا صار عصبي وما رجع نفس ما جان قبل .
دگ صدره ورد على خوفي وسؤالي
وارث : انا اضمنه رجع أحسن من قبل
صح لسانه طويل بس ماكو مثل گلبه
صوت عالي وگلبه طيب والله صاحبي
من الطفولة ودارسه وحافظة .
_ يعني راح يرجع كلش زين وياي مثل قبل .
_ ميمونة شنو قرارچ تريدي لو لا ؟
_ اي .
_ اي تريدي ؟
_ اي .
راح على جراره طلع منها علبة
فتحها وطلع علاج وياهن ابره
خبطها واجه يمي گال
_ اضربج ابره مال التهاب وحراره .
التفتت ومن وره الملابس ضربني الأبره وصاح
_ ملِكه تعالي .
اجت ملِكه اخذتني وعلمها على كبسول
وعافنا وطلع من البيت كله واخذ تلفونه .
رديت بغرفة ملِكه ما قبلت انزل
وهل يوم كله خلصه برا البيت ولا واحد بيهم
رجع بقت امه بقلق ، نمت على ابره من بعد
خوف ايام وجع ما خف بس على ابره
سكنت وغفيت ، الثاني يوم فزيت على
صوت بيرغ وگف گدامي خازرني
عدلت كعدتي خايفة وگفت ودمعتي بطرف عيني
بيرغ : شسوي بيج مكسره تكسر
وصايرة هلگدچ تروحين تموتين بيدي .
ميمونة : الله يخليك لا تكرهني انا غلطانه والله .
لزمني من ايدي نزلني حط اوراق گدامي
وارث گاعد وقعت عليهن واخذهن وطلع هوَ
وارث بنفس الدقيقة وما رجعوا غير بعد ساعتين
اخذ وارث فلوس ورد راح ، وامي دمعتها ما نشفت
رحت عليها تصلي گعدت گدامها دفعتني
ام همام : بحضچ وبختچ يا ميمونة يا بنت بطني
خليتي اخوج ينام بلعبوس ول ليش يا حقيرة .
مريت ايدي وطلعت الها جيمي اصرخ
_ لان ضربني يمه راد يموووتني .
_ من ايدچ يولو من ايدچ بيا عين
تحجين وهوَ لازمچ تحجين وياه
بيا عين منو يقبلها على اخته الله لا ينطيچ .
فات عليها وارث وهي تبجي اجه وكفني بصفه
وارث : روحي شوفي ابنج بالاستقبال .
ركضت تشوفه وهوَ اخذني وصعدني فوك بغرفته
_ تبقين هنا ميمونة لا تنزلين ابد .
فزيت على صوت همام يصرخ
_ خلاني اوقععع على موافقتي بزواجها يمههه
ما يقبل يطلعني اذا ما اوقع وابصمممم
ما راح انسى شسوه بيه واررث ما انسى .
نزل عليَّ وارث تعبان دفر باب الاستقبال
وفات عليه يريد بضربة
_ لك انتَ ما تنسى لو انااا ، صوبتني
وتنازلت ودفعت فلوس وطلعتك وانتَ ابو الراهي .
همام : ما قابل على زواجها منه .
وارث : احنا اخوانها قابلين ، انتَ مسويها شغل
عناد ما نمشي برايك لان مخبل ولو مو مخبل
جان ما طگيت اخوك طلقة .
همام : هية همه اليوم جايين يطلبوها
خليهم سهلة حسابهم عندي ما اعديهاا وارث .
طلع وارث لزمته امه بالصالة الجوه
هوَ وبيرغ تتهامس وياهم
ام وارث : اخاف يغدرهم يمه ويموتها لو يموت بندر .
وارث : ما اضمنه بس ماعندي خل ثاني .
بيرغ : خليها على الله .
ختلت بغرفة وارث الثاني يوم العصر فاتت ملِكه
سحبت إيدي مستعجلة وطلّعتني على شباك البالكون
الشمس بدت تميل على الغروب نزلت نطراتي
على شارع وحبست انفاسي متعجبة على منظر
المنطقة كلّها ازدحمت سيارات واگفه سره واحد
وزلم واگفيت سادين الطريق مثل السد
لابسين عسكري وشيوخ وسادة معمّمين
وجوههم كلها وقار أهل بندر كلهم بلبسهم
رافعين الراس ميزت سيد مصطفى دخل
بينهم لابس عمامته وجهه نوراني .
دخل بندر لابس قميص أبيض وبنطرون قماش
أسود خَطوته ثگيلهفرحان بس بي شي غريب
طردت الخوف من گلبي ورفعت عيوني ادعي
اصوات الزلم تتعالى والشوخ ملت البيت
وشفت شيخ فؤاد ومل اولاده حاضرين
وبلش جد بندر يحچي وبصوت وقور طلب
_ بسم الله والصلاة والسلام على سيدنا
محمد وآل بيت محمد ، احنا يا وجوه الخير
جايين السادة بكل احترام مطلب منكم ايد بتكم
المصون على سنة الله ورسوله وبالحلال لأبنا
بندر ، اذا قبلتوا نفرح بيهم ، واذا تريدون
تفكرون اخذوا وكتكم ابنا منتظرها طول عمره .
سمعنا صوت سيد مصطفى وكلام شيخ فؤاد
وختمها وارث بجوابه وهوَ يرد عليهم .
وارث : بعد ما اخذنا رأي اختنا واتفقنا كلنا
يا سيد احنا النا الشرف أناسبكم ونرد
جيتكم هاي بالطيب على بركة الله اختنا
امانة عدنا وننطيها لسيد بندر وبندر
صاحبي ونعم منه ومن تربيته .
سيد مصطفى : نقرا الفاتحة بنية الخير والتوفيق .
الكل صار يقراها واسمع صوته كمل وگال
_ يمتى يناسبكم نحدد موعد عقدهم ؟
بندر : وكون بيوم العقد هوَ عرس وهوَ عقد .
بيرغ : المهم عندي اختي تطلع منا معززه
مكرمه واريدها عروس .
بندر : تم يجرالكم بس اريد موعد .
بيرغ : فد عشر ايام بين ما يصير وارثنا زين .
وارث …
فضت والزلم كلها راحت واستلمت ثاني قضية
شهاب ، بعد ما صدر حكم السجن المؤبد
وصلنا بلاغ طعن بالقرار وشهود مدخلين بالموضوع
والتكتم على اسماء غريب افتر بالمحكمة اريد
اعرف شنو صاير يا طعن هذا ويا شهود .
توجهنا على محكمة انا وبيرغ وتراث
وبندر منتظرنا هناك وفات شيخ فؤاد
دخلنا بس انا والمحامي وبيرغ على
قاضي ودخلوا شهاب مكسوره عينه
ما يرفع وجهه ويشوفنه لابس ملابس
السجن وايده مربوطه وباقي واگف
بيرغ : شنو استفاديت من هجمت حياتك
وخربت مستقبلك ودخلت مؤبد ، كلبك شلون
طاوعك تكتل امنا ايدك شلون رفعتها عليها يا ظالم .
اذا الحايط نطق شهاب ينطق مكتوم كتم
ادخل القاضي بالكلام سكتنا ونطق
_ بعد النطق بالحكم على المتهم شهاب ساجر
تم الطعن بالحكم من قبل محامي الدفاع عنه
وتم تبليغنا بوجود شهود طالبين منا المواجهة
مع القاتل شهاب ، على اثرها تم استدعائكم
اليوم للنظر بهذا الموضوع الحساس
لكونكم انتم اطراف مهمه بالقضية .
دخل المحامي مال شهاب وگف بصفه
_ سيدي الشهود صاروا موجودين
تگدر باي وقت تنادي بأسمهم .
بقت عيوني على باب اريد اشوف هذا
ياهو شاهد على مقتل والجريمة وشلون
گدر يدافع لشهاب بيرغ تقرب يهمس باذني
_ هذا يمكن صاحبة اللي اجر البيت اله .
_ اي يمكن بس القاضي ما ياخذ بكلامه
بالعكس اذا دافع لشهاب يسجنه لان ساعده .
رفع القاضي اسماء وگف واحد بالباب صاح
بصوت مسموع وريته ما ناده رجع وجع صوابي
تجدد واذني توش ما اصدك ما استوعب ما اگدر
_ مُـرجانـة عابد .
انفتح الباب وادعي من الله الأسم مشابه
دخلت هاي نفسهاا معقولة نفسها حبيتها
نفسها لحاربت الدنيا علمودها
وقاتلتحتى اخذها معقولة هاي نفسها
اللي جنت ادلعها نحلتي ، ما اصدگ
هيچ تغدر بيه ليش ادافع على واحد
مجرم خطفها وهجم بيتهاا شلوون ؟!
وگفت على حيلي اريد اشرب من دمها
كفختني من الصدمة على وجهي وگفت
الدنيا بكبرها مستحيل لااا والله مستحيل
لا شفت قاضي ولا ميزة محكمة اريد اموتها هنا …
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.