رواية الموروث نصل حاد – الفصل الرابع والعشرون
♛ 24 ♛
ابتسمت ميته بدمي من نظراته وابتسامته
تسحل المطي وحتى اني سحلني بيها سحل
_ صعب تحبني .
_ ليش ؟
_ عمامي واولادهم كلّهم ضدنا وراح تصير مشاكل .
_ نحلة انتِ ابقي طني على وردات ، ارتاحي
اكلي اشربي اضحكي تونسي عيشي
بهذا الدلع احبه كثري منه كثري دلع
كثري جنتل مان بصوتچ ، كثري تؤبش
ئلبي شو رجال ، عاشگ الدلع اناااا
دايخ بي داااااايخ ، والباقي يمي انا استلمهم .
رفعت اكتافي وايدي اشرت بيهم وهمست
_ بكيفك انتَ افهم .
_ لوتيه .
_ اني ؟
_ طيحتيني وتگولين بكيفك هو
وينه كيفي راح فداء لهل عيون .
رجعت خصلات شعري نزلت وگفت
صار مقابيلي صرت بينه وبين الحايط محصورة
وارث : بيچ شي احچيلي ؟
_ لا ما بيه .
_ ضـلـيل ضربچ ؟ امچ شلونها وياچ ؟
مُـرجانـة: اكره ضـلـيل وطلع ما مطلگ امي
وماما حامل ومقهورة منها جذبت عليه وگالت عافني
طلعت متقبلته وعادي من عرفت لليوم ماحجيت وياها
گلبي يوجعني منهم همّه الأثنين .
تكتف وابتعد شغل جگارة والدخان صاير يتصاعد
اول ما سحب نفس منها سألني
_ وامچ حاولت تصالحچ ؟
_ اي وحتى عمي ضـلـيل حاول يفهمني
واجه هنا للبيت بس اني اكرهه من كل گلبي
اتمنى يموت حتى يعوف امي ويخلونه بحالنا
من اجيت جانت امي مريضة هسة زاد مرضها
بگد ما تنقهر لأن اني ما اريدها .
بلشت احجي كلشي بس
مختصر من كمل الجگارة جاوبني
وارث : نحلة مو كل قبول معناها رضى
مرات ننجبر نرضى بس ما مقتنعين ولا راغبين
هل موافقة الدنيا صعبة تجبر اكبر واحد يرضخ مرات .
نظرت بعيونه بحيرة كمل يفهمني بكل احتواء
_ غلطانة اذا تفكرين امچ باعت ذكريات ابوچ بالعكس
حبها ودفاعها عنچ وعنّ اختچ هذا اكبر دليل
يثبت هي شگد وفيه ومحافظة على امانة زوجها
لو ماتحبه ما تخاطر الخاطرچ والخاطر اختچ والله .
سكتت ودموعي ردت بدال عني حسيت كلامة
كفخه وضربتني بقيت استمع لكل حرف منه
بكل اهتمام رفع راسي بطرف اصبعه وعينه بعيني صارت
وارث : انتِ جربتي مجتمعنا شگد صعب مايرحم
مارحم امچ ، تعرفين شنو حرمة صغيرة بيوم وليلة
تفقد زوجها وبرگبتها بنات اثنين صغار
وفوك كل هذا ياخذون اطفالها اخر ذكريات زوجها ؟
مُـرجانـة : مشكلتي شلون تقبلته ؟
وارث : تعودت مو تقبلت حياتها هي فرض
مجبورة تكمله الخاطرچ والخاطر اختچ
وبنفس الوگت بمنظوري الشخصي
تصرفها صح ، شگد قوية گدرت
تكسب ثقة چبير ال ضـلـيل
ومن ينذكر طاريها يگولون شيخة ال ضـلـيل .
ضحك وگرص خدي غمزلي بتلاعب
وارث : يعني هسة انتِ بنت شيخة محسوبة
على شيخ ال ضـلـيل معناها ابوچ شيخ وامچ شيخة .
_ ابوية ؟
_ اي ضـلـيل بمقام ابوچ هذا واقع اخذيها من جانب
ايجابي لا تجمدين بالماضي فكي عيونچ
على حاضر دام تنازل وحاول يبرر معناها متندم .
نرج التلفون مالته بدون صوت جاوب بسرعة بهمس
_ ها تراث .. ليش بيش الساعة هسة ؟
حيل صار ثلث ساعة ولا حسيت ..
وين نمت الثور اجيت اطيح حظك .
سد الخط مد ايده اخذ ايدي لازمها قوي
مسح دموعي بالكلينكس مالته وابتسم
وارث : نغنوشة دمعتچ بطرف عينچ دوختيني .
ضحكت وكملت مسح وجهي بيدي
مُـرجانـة : أشرب علاج واكل ونام تعبتك اسفة .
_ ماعندي علاج .
_ يا .
_ اخذوا مني .
_ اشتري .
_ اشتري وارجعه تدللين .
لمني بحضنه رجف كل جسمي بين ايده
وهو جسمه صاير عبالك صاير جمرة نار مشتعله
وايده تحتضني بلهفة، رفع خصلات شعري
وطبع بوسة تحت إذني ثبت هناك لثواني
ما تحرك ابد ما تحرك جر نفس يستنشق عطري
تهت والله تهت وجسمي كله بعد ما احس بي
گلبه بگد ما يدگ سريع حسيت بنبضاته
يشهگ خفيف ويرجع يجر نفس طويل
_ ما اريد اروح اريدچ انا والحسين .
تشتت وصوتي راح بعد اختفى من الوجود
جسمي يرتجف بطريقة مخيفة بعدني عنه
من شاف حالتي وضياعي ، باس خدي وهمس بأسمي
_ صحصحي لا والعباس اخذچ واشرد بيچ .
فتحت عيوني بصعوبة ودفعته بخفه من صدره
وارث : راح اروح .
_ روح .
_ تقبلين تتزوجيني ؟
_ اتزوج على حب اريد .
_ چا هذا شني نعلان .
مُـرجانـة : وارررررث .
_ اي عمي امري لله ميخالف اخذچ على حب .
_ شلون .
_ ما احب احچي راح انفذ بالأفعال اخذچ
غصب عنهم وعلي ، اذا ما اسوي عرس اخلي
الغربية كلها تشهد على عرسچ وتحچي بي
ما انعد على زلم اذا ما اقفل الشوارع اخلي
شيوخ الغربية والبصرة وبغداد كلها تشهد على
زواجنا وكلها تحضر كلهم يتعنون الخاطر دلوعتي .
فزيت على ضربة الباب تذكرت نقش عزا نسيتها
باس راسي وغصب شلع روحه وطلع اريد اوگع
اودعه بالباب لزمني من ايدي وفوتني
وارث : لااا ممنوع توصلين عتبة الباب
وعليچ الحسين اي غريب يفوت على بيتكم
حتى لو عمام تلبسين شال والملابس اريدها
عريضة ومحتشمة، وشنو يصير وياچ بروح
ابوچ لا تگطعين بس خابريني بلغيني
واريد اشوف يا سبع هذا يندگ بالنحلة
اخليهم حالهم حال تمتم وهشهش مكرزين
كرزتهم تكرز شبعت بيهم تكريز .
_ منو تمتم وهشهش ؟
_ اب وابنه بالفلم ما تعرفيهم فوتي
تعبت عيونچ فوتي نامي ارتاحي دلوعتي .
باس راسي وبهل دقيقة طبگت الباب اريد اقفله
طلعت نقش بدقيقة سحبت ايدي وفرت
وجهي كله براشدي طفت عيوني .
تمسكت بالگلادة والورد سحلتني سحل
من ملابسي جريت روحي منها اريد احچي
خلت اصبعها على شفايفها تحذرني
نقش : صوتچ ما اسمعه بس تتنفسين اگعد امي.
اشرت على اغراض بالگاع تركناهم
صعدتني الدرج ماتقبل تسمع مني
شمرتني بالغرفة جسمها من العصبية ينفض
قفلت الباب وجرت الورد من ايدي تضرب
بي بالحايط تلف شلعته كل ورقة وحدها وگعت
تضرب بگلبي ما تضرب بالورد والله خليت العلبة
على صدري حضنتها بكل حيلي خفت هم تگطعها
خلت الورد يتناثر ورجعت جرت شعري وضربتني
راشدي ثاني احس وجهي خدر واشتعل نار .
وگعت بالگاع بين الچرباية والميز خليت ايدي
على راسي احمي روحي منها لزمت شعري حيل
وتحچي وهي خايفة صوتها كله يرجف
نقش : ما اصدگ انتِ بنت غـاليـة لاااا لاااااا
شنو هل خفيه ، شنو هل مياعة مصدومة مصدوومة .
مُـرجانـة : شسويت والله ما سويت شي
نقش حبابة شبيچ نقش ؟
_ شنووو ما سويتي عزززا لچ عزززا
هاي وين واصلين والقران عبالي محترم طلع
صدك زير مساء متمرس يعرف شلون يتلاعب
بالكلام والأفعال ويقشمر على عقلچ يا غبية .
والله مافهمت شبيها تخبلت ضربت على راسها
واجت قريب مني سحلتني على چرباية گعدتني
نقش : ليكون متقرب منچ ويعني ؟
_ شبيچ نقش شبيچ حبابة عوفيني
اني والله تعبانة والقران لا تضربيني فهميني .
_ جاوبيني لا اموتچ مقترب منچ ؟
_ مو شفتي كلشي بعيونچ
والله مرة باسني من خدي ها
قبل لا ارجع بليل وهاي ثاني مرة .
هزت رأسها بأسف عبالك سويت جريمة
وتباع بقرف كرهتني بروحي
_ يعني ما مقترب منچ ؟
_يعني شلون شنو قصدچ نقش شبيچ شسويت .
نقش : غلط أحاسبچ لأن الغلط مني
انا قبلت هل مهزلة تصير ، بس والقران
جنت عبالي بعدچ صغيرة عبالي بعدچ
مُـرجانـة البريئة الخجولة تستحين من خيالچ
جنتي لچ خبلتيني ليش هيچ ليش .
تلوب وتنود بالغرفة مقهورة والله العظيم
ما احس بروحي غلطت ابد بس هي نطقت
كلماتها مثل السجين الحادة وذلحتني بيهن
نقش : وانا اگول ليش استقتل حتى يشوفهاااا
ومن الظهر لليل رجال شكبره تارك شغله ومخاطر
بحياته ومسحول يم الباب ينتظر شنو ميت عليچ
طلع ينتظر لأن يعرف اختي رخيصة يجي يبوس
ويتلمس ويتفنن بكيفه وتروحين تضيعين بين ايده
مثل الثووووولة زعطوووطة والله زعطوطة .
هجمت عليَّ كفختني تكفخ مو حاولت ابرر
مُـرجانـة: والله هوَّ حباب نقش والله حتى گال احبچ .
نقش : طبعاً يگول احبچ واموت عليچ واحارب علمودچ
ووو لعد شلون يضحك على عقلچ ويوصل لگلبچ
فتحي عقلچ هذا اذا تمكن واخذ الي يريده
تندفنين وانتِ حية ، يطفي نورچ بيده
والله يمل ويسوي گلبچ رماد لان رخيصة
ما عزيزتي روحچ ما عزززيتيهاا .
جرت ايدي خلعتها خلع واكدت على كل كلمة نطقتها
نقش : تلفون ممنوع بعد ، اذا يوصل الباب البيت
ما اسكت عنه ولا عنچ تحترمين نفسچ وهوَ يحترم
روحه اذا يريدچ يروح يقاتل زلم وياخذچ ولو يموت
عمي ضـلـيل ما ينطي لوووو يموووووت .
عافتني وطلعت قفلت الباب وراها
الغرفة صارت هوسة الورد بكل مكان
واوراق وعقلي فوضى اكثر من الغرفة
فتحت علبة الگلادة تلمستها وانهاريت
بچيت بدون فهم مافهمتها من كل عقلي
ما فهمتها وبراسي الصار كله مو خطأ
بس بعيونها وبعقلها اكبر خطأ الصار
ياريتها احتوتني بهل ليلة ياريتها
اخذت التلفون والورد انتهى بالگاع
وحتى ما لحگت افرح بي ، والأغراض جوا
ما شفتهم حتى ابد ابد ما صعدتهم يمكن شمرتهم .
ساعتين ورجعت عيونها صايرة دم
ادري بيها يمكن متندمة على معاملتها
نهضت على سرير اجر بروحي
ضميت الگلادة بكنتوري قفلته ونزلت ضايعة .
غـاليـة ..
وعيت على حس الباب ينفتح بتردد صوت
رفعت نفسي قليل شفت مُـرجانـة تريد تطلع
غـاليـة : يمه مُـرجانـة .
التفتت عيونها تلمع وجهه غرگان بدموعها
فتحت الها ايدي خفت واول شي اجه ببالي
تذكرت حادثها من ضربها شهاب الحيوان
غـاليـة : تجين عندي ؟
_ تاخذيني بحضنچ يمه انا ضايعة .
حجتها وتقدمت ضمت روحها بحضني راسها
على صدري حضنتها بكل قوتي ، تعجبت
من انفجرت تبچي وتختنگ بدموعها
جريت نفس شميت بيها عطر رجالي قوي
شكيت عدها عطر وارث ضمته عدها معقولة !
غـاليـة : شبيچ مُـرجانـة حاچيني .
مُـرجانـة : يمه هو وارث تزوجني ؟
_ اي بس ما يعترفون بي ؟
_ اذا يمه اذا وا.
غصت بالكلمات ماگدرت ولا عرفت تعبر وخافت
ضمت راسها بحضني اكثر جسمها يهتز من القهر
خفت تعلقت بوارث واني اعرف واثقة بعد رجعتها هنا
رجوعها لو قربها من وارث حتى بالحلم ما يتم .
غـاليـة : افتحي گلبچ لا تعتبريني بس امچ
اعتبريني صديقتچ افديچ بحياتي بالصح
والخطأ وياچ انصحچ ويمكن افيدچ بشي
شنو براسچ شنو شايل گلبچ يا عيون امچ .
مُـرجانـة: يمـه اذا ، يمه بس اريد انام حبابة .
غـاليـة : عوفي النوم، جاوبيني إذا شنو ؟ تحبي ؟
مُـرجانـة : الا ما احبه ما احب احد .
من شفت خوفها ورجفتها وخجلها مني اضطريت
اسكت عنها وجريتها بين ايدي غفت ونامت .
خليتها بفراشي اول ما طلع النهار غسلت وجهي
ورجعت امشي بهدوء للغرفة نايمة مكوره جسمها
مثل الأطفال بعدها مُـرجانـة لليوم طفلة بعيوني
وشنو تسوي ابد ما اگدر ازعل لو اشيل بگلبي عليها .
جريت التلفون غطيتها عدل وطلعت امشي واخابر
بي الى ان وصلت للگراج شفت المطبخ كله مجلوف
والگراج مغسول كله ، عدلت وگفتي من سمعت صوته
ضـلـيل : هلا .
_ هلا بيك شيخهم بشرني شلونها ننوس .
_ اليوم العصر نطلع جهزي مكانها .
_ اريد اجي للمستشفى .
_ شعندچ كلها زلم تردين استعرض بحرمتي ؟
_ لا عيني لا تستعررررض بحرمتك
بس احب اذكرك اذا نسيت انا امهااا .
حسيته ابتعد يمشي وصوته يوصل كالرعد
ضـلـيل : تعالي طگيني بعد حتى يفوخ گلبچ .
_ استغر الله ، دزلي احد ياخذني .
ضـلـيل : الساني اذا يغرد هساع حتى المستشفى تعزل
ادز منو يالعررررررمة ادز منوووو هو بس شاهين
يندل بيتچ والولد مختفي من البارررحة هو وابوو
والباقين هين شيوخ ادزلچ واحد منّهم بكيفچ ؟
هزيت ايدي بالله هذا شحچي وياه
ومنا صوته منتهي من التعب وقلة النوم
هم ننوس وهذولي الشيوخ مدري منين
يجونه بس شيوخ بغداد ملوا المستشفى
سد الخط شمرت التلفون وفتت سبحت
عسى ولعل نفك التكسير من عظامي
وبدون ما اگعد البنات رتبت كل البيت
وطبخت للظهر نزلت نقش تلم بشعرها
نقش : صباح الخير يمه .
غـاليـة : صح النوم امي حبيبتي جوعانة تاكلين ؟
على صوت نقش طلعت مُـرجانـة من غرفتها
مديت ايدي اجت بحضني وتباع على نقش
وهاي الثانية دارت نظراتها منها .
غـاليـة : شصاير ؟
نقش : كلشي ماكو .
_ شلون كلشي ماكو وتخزرين بأختچ ؟
نقش : لسانها طولان تغلط عليَّ .
حجتها وراحت صبت ماعون تمن وخلت مرگة
فوگاه واجت على ميز خلتهن وراحت على ثلاجة
طلعت عصير اثنين وبلا ما تباع على اختها صاحت بيها
نقش : تعالي اكلي لا تتخربطين يلة .
مُـرجانـة : ما اريد اروح فوك ابدل .
نقش : اكلي وصعدي ايدچ ترجف من فقر الدم .
غـاليـة : بس لا اعصابها تلفانه اريد اخذها دكتور .
خلت ايدها على خشمها لعبانه روحها
مُـرجانـة: ريحة زفر قوية يمه رشي عطر .
حجتها وصعدت بسرعة تركض فوك فاتت للغرفة
وسدت الباب ، اكلت نقش قليل وصعدت وراها
بدلت دشداشتي نزلت مُـرجانـة طلعت جبن
عرب مالح وسوت زلاطة وجاي وگعدت تاكل
رحت يمها اشرت على ساعة
غـاليـة : الساعة ب4 يا عيوني غير تتغدين .
مُـرجانـة: مو تعرفيني ما أرغب لحم اول ما اگعد .
غـاليـة : براحتچ اهم شي لا تبقين جوعانة .
سمعت صوت قفل الباب الخارجي ينفتح
فز گلبي ومرجانة ونقش طلعن ركض من
دخل ضـلـيل شايل ننوس على گلبه
يمسح بضهرها نزلت دموعي اول ما لمحت
بشرتها شلون لونها شاحب اخذتها من ايده
ابوس بيها وهيَّ تحضن بيه قوي وتخلي راسها
برگبتي ، اجتها نقش ومرجانة وحدة تبوس
بيدها والثانية برجلها بس هي متألمة
ضـلـيل يغسل بيده هي بقتت تتلفت
ننوس : وين راح هبيبي ؟
ضـلـيل : هين انا نظر عيني .
ننوس : تعال .
ضـلـيل : خادم تأمرين .
ركضت نقش للبيت ثواني وطلعت بيدها منشفة
وگفت قريب منه فرحانة بي اخذه منها
ضـلـيل : شلونچ بنيتي ؟
نقش : الحمدلله هسة صرت زينة تاج راسي .
ابتسم وباس راسها وننوس عيونها عليه
تغلي فورت تخزر بنقش ، اجه يريد ياخذها
زعلت رغم وجعها وجروحها شلون يبوس نقش ماتقبل .
فوتتها للاستقبال بقت تباع لا تلفزيون
لا غراض باقي بس تخم كله فارغ
هوَ هم من شاف البيت استوعب عصبيته
وتهديمه هذا بلا وعي ، حتى الثلاجة مخسوفة
رجع طلع من رن تلفونه نقش تعدل هي ومرجانة
بالمخدة والفراش لننوس اسمعه يصيح
ضـلـيل : ادري صغار يضيعون اكلك مختفين
بغداد نفضناها نفض وماكو ، اخر مرة شفتهم
شاهين تجادل وتعارك هو وابو وطردتهم برا
المستشفى من ساعتها لا رجعوا للبيت ولا يجاوبون
على تلفوناتهم اخر شي تقريباً ب2 بليل نغلق
تلفون شاهين وراها انغلق تلفون تمار .
صرت بصف الشباك والجام مضلل مايشوفني
ركزت على كلامه هو يمشي ويسولف
وصل للباب مال استقبال شاف مُـرجانـة
خلت راس ننوس على رجلها تضحك وياها
على ضحكهن صفن بدون ما ينطي رد فعل
ضـلـيل : عجل شلون اكيد خليت
ناس ادور بالغربية ، اعتمد عليك اريد خبر بسرعة .
ظل برا شغل جگارة ، استداريت شفت مُـرجانـة
مركزة بنظراتي وتحركاتي ، گعدت بصف ننوس
هو فات بدون مايباع صاح على نقش
تجهز ملابسة جنطة ملابسة بالگراج
من دخل فوتتهن نقش على غرفتنا واجت
نقش : يمه انتِ جهزيهن ما اعرف واستحي .
هزيت راسي طلعت ملابسة مرتبات بطريقة
مبالغ بيها عبالك جديدات هاي سوالف دلال
وكلهن معطرات يلمعن لمع وبجنطة صغيرة
مخليات عطره وعلى المشط وفرشة اسنان ومعجون
ومسك خليجي فخم عطره بگد ما قوي يسطرني .
اخذت الداخليات جرهن من ايدي وسد الباب
بعدني اعدل بالملابس الباقية ودخل
وجهه ما يگصه السيف عبالك ذابحة امه .
اخذ الدشداشة يلبس بيها يبيع ثگل
الحد ما تعب وفحط تحول رسميات
ضـلـيل : عندي شغله اخلصها وارجع
كتبي بورقة شنو محتاجين من مسواك
حاجات الچ للبنات اذا تريدون ؟
غـاليـة : المسواك اكتبهم، بس على فراغك اخذني
اشتري نواقص البنات اذا تگدر .
ضـلـيل : احم تعرفت على دكتور بالمستشفى
واخذت عنوانو حجزت على باجر اخذ مُـرجانـة .
غـاليـة : ليش اسم الله شبيها ؟
ضـلـيل : أعالج اثار رگبتها وايدها
وبعد اذا موجود بجسمها اذا يبقن
وحق الله أتعبهم اهلك الموروثين كلهم وانعل خيرهم .
كمل كلامة وقبل الجواب طلع شاف
البنات كملوا صب الأكل وننوس غافيه
على تخم گعد بالگاع كف دشداشته وتربع يم راسها
باس خدها فتحت عينها ومدت ايدها احتضنت وجهه
دمعت ورفعت ايدها الثانية ملفوفة محروگة تشكي
ننوس : توجعني .
لزمها خفيف باسها بدون ما يضغط على لفاف
ضـلـيل : كون بيه اخذ الوجع منچ اخلي بگلبي .
رفعها نومها بحضنه من نزلت نقش
السفرة فرشتها ساعدتها ماقبلت رحت
اريد اخذ ننوس من عنده رفع ايده يأشر
بمعنى ” روحي اخليها عندي ”
گعدنا كلنا بس مُـرجانـة عبرت وصعدت صاح
_ مُـرجانـة وين ؟
وكفت بمكانها تحير شلون ترد ولسانها ثگل
ونظرات الكره والحقد ترست عيونها مو گادره تخفيهن
مُـرجانـة : اني ؟
ضـلـيل : اي .
مُـرجانـة : قبلته قبلكم .
_ شنو ؟
غـاليـة : اكلت قبلنا قصدها خلوها على راحتها .
صعدت سريع تريد اطير وبنفس الوقت تتهرب منه
بقت ننوس بحضن ضـلـيل بس كملت وشافها
شبعت رجعها بفراشها اكل قليل ورجع شالها
من الاستقبال اخذها للغرفة وصاح
_ نقش بوية علاج اختچ .
اخذته نقش وراحت صبيت چاي وخليته بالصينية
دخلت نزلته على ميّز وآخذتها من حضنه
عدلتها على مخاديد استندت شربتها علاجها
وطلعت ملابس نظيفة بدلتها ورتبتها شعرها
صاير هوسة بوستها من وجهه ونقش
گاعدة على تخم تسولف هي وياه على
مستشفى شكد يتردد يجاوبها ومرات يظل ساكت
بس نقش عكس مُـرجانـة تحاول تكسر الحواجز
حتى يتعود يحچي وياها وهذا الصار
بعد دقايق من كلامهم انطلق يسولف ويضحك
وياها ويحاولون اثنينهم يضيعون ننوس وجعها
ويتفقون عليها بلغة الإشارة يفهمها وتفهمه .
ابتسمت من شفّت الفرحة بعيون نقش
استأذنت وطلعت گعدت اعدل بالملابس
ناموا اثنينهم هو ساعة وفز اخذ الورقة
بيها حاجات وطلع طول بالساعتين
وننوس جفلت من الوجع تبچي شلتها
افتر بيها بالبيت اني ونقش ونزلت مُـرجانـة
ولا ثانية سكتت وجهه انصبغ احمر وعيونها
صاروا دم ومن صدرها تطلع شهگاتها بوجع
خليتها على كاونتر وفتحت البوري اغسل
وجهه ونقش تصفگ وتضحك بيها ومرجانة
تشيل بالأغراض تريد تلعبها ولا تقتنع .
شالت نقش ننوس تفتر بيها بالمطبخ
ومرجانة گعدت على كرسي دايخة
ساعة ثالثة ورجع محمل مسواك نزلهم بالگاع وشال
اثنين علاليگ صغار اقترب من نقش وننوس مبتسم
اخذت ننوس مالتها ونقش اخذتها والضحكة
انرسمت على ملامحها الحلوة
فتحت العلاگة بيها حلويات
وننوس مداليا شكل دبدوب وحلويات .
ركزت وايدي على گلبي يا خوفي
ما مشتري لمرجانة عيونها
تعلگت بيد خواتها تراقب بيهن
وعيونها غورگت بدموعها بس
ماتحب تبين بقت مقاومة وعيونها
تروي انواع العذاب الداخلي .
تحطمت مشاعري كلها التفتت على ضـلـيل
هو الثاني صافن عليها يدرس ردت فعلها
بدون ما يحسسها ، هي رجعت عينها على
ايده فارغة عرفته ما ذكرها مثل ما ذكر اخواتها .
نزلت نظراتها أيدها ترجف من القهر ، ارتبكت
من راح تقدم عليها طلع وحدة من جيب الدشداشة
خلاها گدامها ، رفعت عيونها وعدلت گعدتها
ونظراتها مندهشة، عافها وراح للحمام يغسل
ايدها رجفت عين عليَّ وعين على علاگة
فتحتها شافت بسكت وحلقوم هواي مشتري
وسّعت عينها وبهمس سألتني
مُـرجانـة: شلون عرف احب بسكت شمائل والحلقوم ؟
رفعت اكتافي وتقدمت عليها اجاوبها
غـاليـة: ما اعرف والله .
مُـرجانـة: انتوا اكيد .
غـاليـة : يمكن يتذكر من جنتي هناك دائماً تطلبيهن .
ماجنت اگدر افسر حركاتها فرحة لو غضب
تصفن عليهن بس ايدها ضاغطة عليهن
الى ان طلع بعده بالباب مال حمام
علت صوتها حتى يسمعها
مُـرجانـة: اني ما احبهن ابوية الله يرحمة يحبهن
اقترح عليكم تشترون كراتين وتوزعوهن انتِ وزوجج
ثواب على روح ابوية لو دفنتوا وعشتوا حياتكم ونسيتوا ؟
وگفت سريع تريد تروح لزمت ايدها
رفعلي ايده بمعنى عوفيها ، اول ما صعدت
نشف بالمنشفه ودخل على غرفة سد بابها
بقيت اني ونقش وحدة تصفن بوجه الثانية
ايدنا مربوطات نحتار شنسوي .
بين ما رتبنا المطبخ صاير هوسة
دخلت للغرفة مآخذ ننوس على صدره ونايم
بسابع نومة رايح ، خليتهم ورحت على استقبال
نمت هناك ونقش يمي الثاني يوم فزيت على صوت
قفل الباب گعدت افتريت بكل البيت ماكو
صعدت على مُـرجانـة نايمة ، نزلت طبخت
وللظهر رجع تعبان ودايخ من الباب راد ماي
_ بيك شي ؟
ضـلـيل : لا تمار ولا شاهين مبينين هذا اليوم الثالث .
غـاليـة : اسم الله خاف صاير وياهم شي .
_ المشكلة دورناهم بالمستشفيات مراكز كلها ماكو
وشاهين سيارته بگراج المستشفى ما متحرك
واخر مرة تواجد يفتر بالحديقة بالمستشفى
راح اتخبل عقلي وگف وين راحوا .
غـاليـة: تعال فوت ارتاح هلكان حتى ما تگدر توگف .
ضـلـيل : ما اگدر اوگف من ضيمچ .
عافني وفات للبيت شاف ننوس گعده اخذها
بحضنه تدلع عليه شبع بيها بوس ورجعها عند نقش
وراح للغرفة بصوت مسموع صاح بأسمي
طلعت للگراج اخذت المنشفة مالته ورجعت على غرفة
اول مادخلت طبگ الباب وتقرب يسألني
_ آبني شلونه ؟
رجعت اكثر من خطوة نطبگت بالحايط
تلمس بطني كبرانه شوية بلع ريگة
وغصب عنه صوته راح من قربه
ضـلـيل : تحسين ؟
_ بشنو ؟
_ ابني .
_ ليش مو بنتك ؟
_گلبي يگلي ولد .
_ گلبك يگول .
_ اممممم .
بگد ما صار قريب للحظات لاحظته غمض
عيونه وجر نفس طويل يحارب بي روحه
لايقترب ولا يضعف ويظل مكابر مثل كل مرة
بس اشتياقه اكبر شگد واضح ضعفه بس
يذبح نفسه ومابين يمي حارب حتى ما يخلي
روحه تنهار ويخسر تغليف القوة مالته .
أبتعد بسرعة ورفع حاجبة يرجع نفسه هو المتحكم
من نطق نبرة صوته خانته تهتز بضعف واضح
غـاليـة : الله يساعدك على نفسك .
اشر على باب يريدني اطلع
غـاليـة : حبيت الكبرياء ههههههه .
ضـلـيل : استري على روحچ واطلعي
لا يطلع صوتي ويعزف عليچ هسة .
غـاليـة : هاي قوتك ترا اني بإرادتي مخليتها .
ضـلـيل : بعد لو امووووت تعرفين شنو لو اموت
غير هل بنات وهذا اللي ببطنچ ما يجمعني بيچ
شي ولو ادحگ عليچ ميتة جدامي ما يرف جفن
عيني وفلا تهميني شني قابل قحط نسوان .
ابتسمت وطلعت كرهت أتصادم وياه جهزت كلشي
خليت صينية اكل من طلع وتركتهم واخذت
صينية ثانية وصعدت الغرفة مُـرجانـة
من شافتني ارتبكت وضعها تخربط
صارت تعدل بالمخدة وهي گاعدة
خليت الصينية مقابيلها وتربعت
على چربايتها مقابيلها مبتسمة
_ صح النوم يحلوة .
_ نقش نامت يمچ البارحة ؟
_ اي ، يلة تاكلين ؟
_ اي جوعانة .
اكلنا واني وياها نزلنا هي تغسل بالمواعين
واني أرتب المطبخ، نقش غاسلة مواعينهم
وصبت چاي كمله واخذ ننوس بين ايده
اخذت استكان چاي ورحت گعدت ننوس اقتربت
من عنده وهمست وهي ترفع راسها تلعب بحضنه
_ اريد قصة هبيبي .
_ وروح امچ ما اعرف .
_ يروح الوجع بابا بيك .
اعرفه شاطر بالقصص وعنده اشكال انواع
القصص بحكم هو شيخ وبداية گعداتهم
لازم يسردون قصة بيها عبرة تفتح الهم
باب نقاش صفن جمعها جابها
منا خلاها مناك تحمحم وخلاها
على ايده نومها وبنبرة هادية سولف
ضـلـيل : مثل ما يگولون اهلنا قبل كان يا مكان
في قديم الزمان اكو زلمة چبير بالعمر عنده
حلال والله رازقه وأنعم عليه بالمال والبنون
ورزقه ثلاث جواهر مو من الماس ولا من ذهب
رزقه بثلاث بنات غاليات على گلبو وروحو .
نقش مقابيله صافنه بوجهه بكل حواسها
وننوس تلعب بلحيته وتستمع لكلماته
ومن بعيب شفت مُـرجانـة اخذت كرسي
قدمته قريب من باب الاستقبال تستمع لصوته
شگد تكرهه بس تهتم لكل كلمة وحركة منه
ضـلـيل : هل جواهر الثلاثة النادرات
كل وحدة تلمع بصفات تميزها على ثانية
الأولى اللؤلؤة الحكيمة عنده حاسبها هي
العمود من الحنان تلم الكل بين ايدها
وتخاف عليهم حتى لو جانت تعبانة
بس بعيونه جانت جوهرة بيضه تلمع نادرة
قوتها مو بصوتها العالي قوتها
تحتوي وتفهم ، وتحب بس من بعيد .
ننوس : ثنين
ضـلـيل : الثانية جوهرة الياقوتة
بعدها ضايعة بيـن ماضي طفولتها والكبر
بعينها دوم يدحگ الف سؤال وتنتظر جواب
بس ابوها يبعد عنها يراقبها من بعيد
لأنه يشوفها تشبهو ودوم يخاف
يتگرب منها لو تبدر منو كلمة تكسرها
صعب يتعامل وياها ودوم يحسب قربو منها
يفضح غلطاتو بحقها ومرات يخاف
يحضنها ويكشف روحو تأخر .
نقش : والثالثة ؟
ضـلـيل : الثالثة جانت جوهرة زمردة غـاليـة
ويعتبرها اغلى ما يملك ، دوم يدللها ومخليها
بگلبو لمعتها تخلي يرضخ الأكبر شي تطلبو
ويتنازل عن كل هيبتو خاطر ترضى عليه .
رفعت ننوس ايدها تقاطعه وتفر بيدها السليمة
ننوس : كمل شيخهم كمل .
ضـلـيل : شيخكم كلكم انه يول .
ننوس : كمل ترا ابجي .
ضـلـيل : هههههههه كملت يول دقيقة
بيوم من الأيام كبر هل زلمة وتمرض كل القرية
والناس گالوا وگع وماعندو ولد يرعى حلالو
وماعندو من يداري ، وهنا الجواهر الثلاثة
ثبتن نفسهن جواهر غـاليـة الچبيرة عالجت جروحو
واحتوتو بأصعب ايامو ، والثانية صااانت بيتو
والثالثة امان أسمو بين الناس .
قاطعهم رن تلفونه عدل ننوس بحضنه
وهو يبوسها من خدها رد بثگل
ضـلـيل : هلا يمه ، بخير ننوس نايمة بحضني
شوكت ارد ان شاء الله من تصير ننوس زينة
اخوي وابنو ماكو بعدهم شبيدي انا ؟ بكل مكان
وزعت عالم يدوروهم، ارد شلون ما ارد بس
من ادحگ ننوس مشت على رجلها ارد
اممممم اسمع اي استغفر الله تعالي غـاليـة
اخذي ننوس من ايدي تعالي .
اخذتها منو وطلع برا يتصايح وياهم
ضـلـيل : عجل شني كل ماتصير طرگاعة تشمريها
برررراس غـاليـة ، إذا ارجع عود احچوهااااا هل
كلمة جدامي وداعت بنيتي اتخبل عليكم مجربيني
تعرفوني ماااااا يحتاج اغرررد .
سد الخط من رن بأتصال ثاني رد وبسرعة صاح
_ اي اي اسمه تمار ، صح ابنو شاهين
وينهمممممم اي يااا عملياااااات لاااا لااا گول غيرها .
ميمونة ..
طلع باقر ابره من جيبه واشر
ما اتحرك وهوَ يقترب من بندر فتحها
وخلاها بين رقبته وظهره
باقر : نام ارتاح بندر كافي عصبية وهلوسة .
تصلب بندر بمكانه على نفس حركته
بمجرد ما سحب باقر الإبرة گعد دايخ
دقيقة بس دقيقة مرت والتفت بندر
على باقر هجم عليه سحب الإبرة رفعها
ونبتها وهي فارغة بنفس المكان اللي ضربة بيها ..
سحب باقر الأبرة ودفع بندر وهذا مثل الحايط
ما تحرك ولا خطوة خليت ايدي على راسي وزحفت
من الچرباية صرت بضهر سيد مصطفى احتمي بي
باقر : لك كل عقلك تضربني آبرة فارغة تخبلت بندر ؟
بندر : باقر انتَ وضعيتك تعبانة .
باقر : مو عالجتك يا غبي ليش رجعت
روحك مدمن اكثر من قبل جسمك متشبع
حتى هاااااي الأبرة ماتمضي وياك .
كمز عليه لزمة من ياخت القميص ويهز
بي يسحبه ويرجعه على حايط يضربه
بندر : هاي المرة اعديها ماعندي مزاج اتعارك
وياك اذا عدتها يا باقر يا ابن رضا اطشر دمك
على حياطين وحق علي وهاي گدام ابوك .
تحرك وصل للباب والتفت يدورني كن شافني صاح
_ تعالي يلة .
جاوب ابو بنفس الدقيقة : اذا تموت بيدك اخوتها
يموتونا ويموتوك امشي ولي نام خلي البنية
تصير زينة توها رجعت من المستشفى .
بندر : اريد انام .
باقر : ما تررروح تنام .
بندر : اجي اطشر دمك ؟
باقر : بندر البنية منتهية اقسم بالله تموت بيدك .
عافهم وصعد فوك ، رجعتني ام باقر على فراش
وزهراء غطتني گعدت بصفي صافنه بوجهي
حتى ما رمشت بعد ، كلهم طلعوا وبقت يمي
مجرد ما غفيت سمعت همساتها ترجف الگلب
زهراء: اول مارجع دور عليچ عمي جذب عليه
على اساس اهلچ اخذوچ وراد ينتحر .
ميمونة : منو ينتحر ؟
_ بندر يريد ينتحر لأن رحتي .
هزيت راسي ورفعت اللحاف على جسمي
من شفت نظراتها تجمد الدم بگد ما تركز
ميمونة: اريد انام ؟
_ شلون تگدرين تغمض عيونچ وانتِ مدمره
شخص يحبچ يمووت على اسمچ مايشوف غيرچ
حتى ماتحبي ولا تحتوي وهسة تريدين تنامين
وهو فوك يتعذب وحده بدل ما تروحين تصححين غلطچ .
ميمونة : انتِ شكووو شعليچ امشي طلعي برا .
زهراء : والقران ما تستاهلي تروحيله فدوة
الكافررررررة منو عمتچ ، فاتت عمتچ على بيتنا
دمرته دمار وطلعت ولت خلصنا منها ، تالي انتِ
دخلتي حياة سيد بندر وصرتي بصمة عار على سادة
طلعتي من الأسلام والله طلعتي شتحسين .
ميمونة : اطلعي برررررا .
زهراء: كافي خراب ما مليتي كافي دمرتي دمار
ياريت ما حبچ هيچ حب عميان ، خليتي يدور
صوتچ يحسب رمشات عيونچ ويهتز من فكرة
تلعب روحچ من تشوووه انتِ سووويتي يا مجرمة .
نطت من مكانها وحصرت روحها بين الحايط
والبردة اول ما سمعت صوته يتعارك هو وباقر
وسيد مصطفى يمنعون بي يدخل على هل غرفة
لزمت صفحتي كلياتي توجعني وجع ماينوصف .
بقيت اشهگ خايفة يفوت ويضربني والله
وزهراء بعدها مركزة، اول ما دخل ابو دفعه على
حايط انضرب بحافة الميز بظهرة شاغت روحه
بس ولا يهتم يلزم المكان وعيونه ما رفعها مني .
سيد مصطفى: ولك تموووت بيدك استر علينا
عوووفها هل يووووم بعد عوفها ولي نامممممم .
بندر : راسي چا خليني اطلعععععع .
_ تشرررب موووو ؟
_ راح ارتكب جريمة راسي ليش ما تفتهم .
طلع بخطوات ثگيلة كل خطوة يخطيها ادگ بگلبي
لفلفت روحي ما اريده والله ما اريده خايفة منه
مؤذي لدرجة ما تطاق ، بقيت اهتز بفراشي
من الوجع وكلها راحت برا بقيت وحدي
ساعتين وحسيت وخزت ابرة صارت بيدي
فكيت عيوني شفت باقر جريت ايدي منه
ورفعت جسمي ، نقط الدم على الچرباية
رفع ايده يطمن بيه بنبرة صوت مليانة سلام
باقر : لا تخافين هاي انا ، موعد علاج هذا
مغذي ضروري وراها اكل وجبة من الصبح
بلا اكل انتِ مو ؟
هزيت راسي رجع اخذ ايدي وهوَ قلد هزت راسي
ميمونة: بندر نام ؟
_ لا وين بالديوان برا يفتر علينا .
_ شنو يوجعچ .
_ راسي وكلياتي هم يوجعني .
_ هسة على هل علاج تصيرين عال العال .
خبط ابره على صفحة من شفته طيب
وكلامة غير عنهم وحسيته واعي ترجيته
ميمونة: عادي تخابر اهلي .
ظل ساكت لثواني يفكر بعدها جاوبني
_ والله ماعندي أرقامهم .
_ حافظة رقم اخوية وارث .
نظر بعيوني لثواني بعدها ضرب الأبرة بالمغذي
لم كل أغراضه يريد يطلع دخلت العلوية
نزلت دموعي محروگ گلبي ياريتهم يحسون
بخوفي انا اعرف بروحي غلطت بحق بندر
وبحق نفسي بس تصرفهم غلط المفروض
يساعدوني مخليني عنده مثل الفاررررر
ينتقم مني لا هو موتني وخلصني ولا عايفني
لا راضي يتعالج ولا راضي يرمم تشوهاته
والله لو يريدون روحي كلها انطي ويتعالج
بس خلي يرجع زين يرجع يعيش .
غفيت ونمت الثاني يوم على هل علاج
گعدت ثاني يوم على نغزة ابرة ثانية
ومغذيات ثانيات بيدي الثانية
اول وحدة تحول لونها زراق بعد
باقر : علوية وصيهم على گلاص عصير برتقال .
اول ما طلعت طلع تلفونه وبدون تردد گال
باقر : ردي رقم اخوچ .
ميمونة : ***07780008 .
سد التلفون وهز راسه وصار يحركه بمعنى
“ارتاحي بعد ” غمضت عيني موجوعه
كلشي بجسمي يوجعني ، وبس طر المغرب
فقد كل اعصابه بندر الصياح صار يهز البيت
يوصل السابع جار فتح ابو القصيدة اعلى شي
حتى صوته ما ينسمع هلكوا منه تعبوا.
دخل باقر شال المغذي من ايدي وطلع
والعلوية بالگاع تصلي ، نزلت رجلي بصعوبة
اريد اروح للحمام اول ما وصلت للباب
لمحته گاعد بصف الديجي ومايل راسه
على صوت وشفايفه تتحرك يردد الكلمات بتعب
” يهل عـايش على رموشي ، حـلم كل لحظة يتجسم
جسد واتمثلك كوكـــــــب ، أصد لجروحك اتوهــــم
أشوفن كل جرح منــــــك ، ثغر للدنيـــــــــــا يتبسم
عجـيبة تنذبح ظـــــــامي ، يلن كل عين إلــك زمزم
والأعجب تنزف جروحـــــك ، اوإنت الكل جرح بلســم ”
خوفي منه شل حركتي ، ما گدرت اخطي
خطوة زيادة رجعت بفراشي اهتز مرعوبة
بس كملت العلوية صلاتها سألتني
_ اخذچ للحمام ؟
_ اي ، بس بندر برا .
_ كلهم برا لا تخافين .
مشيت وياها البيت عبارة عن ريحة اكل
النسوان كلهن بالمطبخ يجهزن عشاهم
لمحني من بعيد هو نهض طفر باقر اعترض طريقة
لزمه بلا وعي ضرب راسه براسه وباقر تخبل
يضرب بي وبندر بعد مايشوف بعيونه
ضربة بوكسات متواصلة ابو يسحب بي ما يتفاهم
رجعت بفراشي حتى ما رحت للحمام جسمي
تحول سعفة اكل بأظافري من الخوف .
عبرهم وفات بگد ما خفت انقبض گلبي وضربني
دمار حسيت روحي راح انجلط ، انهاريت ودموعي
صبت على خدي من طردهم كلهم بس ابو ماقبل يطلع
ما تحرك عيونه بگد ما عصبي تريد تنط لونها احمررر
بندر : سيد انا تعبان .
_ ولك يا حيوان مريضة مو زينة .
بندر : بعد ما اضربها والله ما اضرب .
_ شترررريد ولي نام باع عيونك تخووووف .
بندر : أريدها والله من تفوت بالغرفة اقفلها
حتى عيوني تأمن وانام ، حتى بعد ما افكر
اخاف تروووح ياخذوها لو تنطوهااااااااا .
سيد مصطفى: والحسين ما ننطيها ولا تروح
بي ررررروح نام يا استغفر الله شلون أخلي وأموته.
بندر : ميمونة .
حجاها ونظراته عليَّ نزلت عيوني
ورفعت اللحاف اغطي بروحي وارجف منه
_ وروح امي فلا اضربچ بس اريد انطمرررر .
ابو التفت عليَّ بلعت ريگي وبنوح حجيت
ميمونة : والله تعبانة والله بضربة بعد انتهي تعبتني .
بندر : مااااااااااااا اضربچ .
هزيت راسي بـ ” لا ” جن رسمي تخبل
افتر على حايط يضرب بي بوكسات بكل حيله
شمرت روحي من الچرباية وطلعت من الغرفة
اركض بنصّ الأستقبال جرني باقر من طرف
ردن الدشداشة صرت خلف ظهره من اجه بندر .
قلص بندر عيونه ما راضي على حركت باقر
وايده اصابعه تكسرت تجري دم ولا عبالك
متألم ثابت هيچ ثابت ما يشوف بعد بعيونه
بندر : ميمووووونة عوفي هذا تعالي يمي .
رفع ايده يأشر لباقر يحذر بي بنبرة تهديد
بندر : عوفها انتِ وصلت حدها وياااااك .
باقر : روح صحصح وتعال .
بندر : بااااااقررررر .
_ هذا صوتك اهلك يخافون منه وهيَّ تخاف
انا مايهزززني ما اسلمهاا اذا ما تصير زينة
هي مو چلبة بيدك تكتل بيها وين عايشين غابة ؟
زهراء : چا من حرگته ما گالت غابة شلون احرگ زوجي ؟
باقر : زهرررررراء !
دار بندر نظراته عليها لثواني نزلت راسها
خجلانة مسحت عيوني والدموع ترجع تنزل
ميمونة: اريد اهلي ، خابروا اخواني وينهممم اخواني .
نظرت بعيونه والله عبر بهل لحظة مرحلة عصبية
بركان مايشوف بعيونه بعد بگد ما يرجف كلها خافت
صعد مبين يريد يجيب شي
العلوية : اصعدي بنتي هذا متخبل .
باقر : علوية انتِ گلتي متخبل شلون تصعد
خلي يهدي وينام يستعيد وعيه عود تروووح .
ماشفت بعيونهم كلهم الأمان، رجعت بغرفة
العلوية زهراء لو بيدها تحرگني بگد ما مقهورة
على بندر بس ما حچت بعد ، تمددت احاول
اهدي بروحي ما تهدي جسمي ينتفض .
ساعة مرت والثانية داس على كل وبلا انتباه
منهم دخل ويمكن متعمدين يدخل لان
وضعه صار هلاك مو تمام ابد شعره مبعثر
وجهه شاحب مابي حيل حتى يمشي بعد
قفل الباب وجر المفتاح بجيبه يخلي
وكفت على حيلي رفعت اصبعي
_ لاااا تضرب بندر لاااا تضرب .
شگ التشيرت شمره من جسمه وتقدم
عقلي صار يخبط اشكال ألوان من افكار
هزيت راسي لا وهوَ ما يشوف بعد بعيونه
ميمونة : حرام عليك والقران حرام اكتلني
موتني مو والله استنزفتي تعبت بندر تعبت .
انعصرت الحايط رفعت ايدي احمي روحي بيها
رفع راسي غصب عني طلع وصله صغيرة
لف بيها عيوني وبكل احكام عگدها
بندر : شدي عينچ حتى ما تشوفيني
وتلعب روحچ مني وانا اعصب بلا عقل اصيرر
من اشوفچ تلعب روحچ مني لا تشوفيني بعد .
خليت ايدي على شفايفي شهگت بكل حيلي
بجيت على حالنا ياريت هذا كله كابووس
بندر : لا تخافين بوعيي انا ما شارب
ما اضربچ بس صار يومين ما نايم .
نزلت راسي كلشي ما اشوف ظلام بظلام
رفع ايده تلمس وجهي وحسيت كهرباء
سرت بكل جسمي من شفايفه صارت على
راسي ويتنفس قوي جسمه ينفض
عصبية ، غضب ، ضعف ، قهر انهيار .
جر ايدي بعنف شمرني على چرباية
دنيت روحي اريد اشيل هاي من عيوني
حذرني وطوق ايدي بين ايده عدّل المخده
وحسيت بي نام وجرني على صدره
فتح شعري يلعب بي وغصب عني
خلاني بحضنه ، نزل اصابعه تلمس خدي
وهوَ يصعقني بكلمات نزلهن نار تحرگ روحي
بندر : تشوفيني غبي ؟ عبالچ غافل ما ادري
باقر الـ*** خابر على اخوانچ ؟
ردت ارفعها حتى اشوف ملامحة على اقل
اطفر من بين ايده ، بس قوته تفوق قوتي
طوق حركتي من ضغط على خصري
وبيد الثانية لزم ايدي حتى ما اشيلها
بندر : اقل حركة منچ اذبحچ واذبح روحي وانهيها .
فلت ايدي من شاف خوفي بعيونه
حضن وجهي بين ايده يمشي اصابعه
على شفايفي وبمكر ينطق
بندر : جنت اريدچ حتى ابشرچ وصل باقر
وصلهم لعنواني وطلعوا من الغربية
اخوانچ بالطريق مراقبهم انا مراقبهم
عيوني عليهم انتِ بيدچ جنيتي عليهم .
راسه صار برگبتي تنفس قوي وبكل توعد وغضب كمل
بندر : انام ساعتين بين ما يوصلون
جهزي نفسچ تودّعين اخوتچ .
ميمونة: اذا تأذي واحد بيهم والقران اذبح روحي .
بندر : اخررررررررر همي .
هزيت راسي اريد اصرخ سد حلگي يضغط
عليه ومستمر بنبرة التهديد
بندر : واصل مرحلة اجرام لا تخليني
ابديهااااا بيچ صوتچ ميمي صوتچ .
رجعت راسي على مخدات جسمي صار يهتز
ودموعي تجري على خدي اول ما هدأت أنفاسه توسلته
ميمونة : بندر .
_ صوتچ .
_ لا تسوي شي والله ما اروح وياهم .
_ مو بكيفچ ما تروحين .
_ بكيفي اني قابل يجبروني .
_ اول ما يوصلون بيرغ ياخذچ
_ لااا اني اگول ما اريد اروح .
_ بيرغ عايف امه بالمستشفى واجه ناوي على شر .
سكتت اصواتنا وحتى اصواتهم برا
ما مسموعة ، ساعتين ضبط عبالك حاسبهن
وصوت ابو رج البيت بكبره صاح
_ وارث واخوانه گطعوا شارعنا .
فزيت بلا احساس ابتسمت من سمّعت آخواتي
وصلوا اخوتي بيني وبينهم مسافات صغيرة
نهض بندر بكل هدوء ، جر ايدي وصار خلف
ضهري ، مات حياي وخلص صبري وزاد خوفي
من فتح الباب وجر الوصلة من عيوني
شافتنا زهراء من بعيد وعرفته يسد عيوني
حتى ما تلعب روحي منه ويظل عندي
فركت عيوني حيل بكل قوتي وردت
استدير من گال : تريديهم ؟
_ اي .
_ روحي يلة .
اريد ادير وجهي منعني بقيت على وگفتي
ميمونة : لا تأذيني بيهم ابوس ايدك .
_ روحي انتوا تريدوهاااا رووووحي مناااا .
شفت وارث اولهم دخل تعجبت شلون
اجه هذا مو طبعه المتعارف شنو يريد
يخلي اخواني بدل عنه ، طار عقلي
ركضت صار عندي حيل وركضت
صرخت بعتلي صوتي وانت انهار
_ واااااارث .
فتح ايده على وسعها اخذني لمني بحضنه
_انتظرتك هووواي انتظرتك گلت تحميني وينك .
وارث : اجيت خوية .
وسع همام عيونه بس شافني جرني
من ايد وارث يتفحص بشكلي انفجر
بيهم يسب ويغلط ما ترك واحد سالم
وارث واگف مقابيله مثل الحايط
اول ما دخل بيرغ شگد ما هو تعبان
وايده ملفوفه فكها اول ما شافني وصاح
بيرغ : بندر يا قندرة يا ***** جانك زلمة واجهني .
سيد مصطفى: تضرب واحد مدمن مو بوعيه .
بيرغ : وانعل خيره ، وراح اقدم بي تقرير طبي
اشمره سجن ومستشفى مال مخابيل ابنك مخبل
وحگ الله ما اعديهااااااا اذا ما اسحله انا مو زلمة
اذا ما ادمي ازين شاربي ، اذا ما اخلي يخيس
بالحبووووووس اناااا ما انعد على زلام .
همام : سيد وجدك رسول الله اخابررررك
اگلك اختي بس دليني بأختي تگلي مو عندي
ما اندلهم ، اخذهاااا وسافر تالي مخلي اختنا
كبش فداء فااار تجارب ابنك يفرغ غضبه بيهااااا .
فاتت العلوية صاحت بصوت مسموع
_ چا عملت اختكم شوية شووهته بيا حق تشوهه زلمتها .
بصوت وقور وبكل هدوء نطق وارث سمع كلامة الكل
وارث : علوية انتِ والسادة كلكم تعرفون
وحتى هذا المخبل بندر يدري واكثر من مرة
فهمته البنية بوقتها مو بوعيها ، وابنكم مو بوعيه
ماكو دليل اختي شوهته وحسب التقارير
تعرفون ابنكم بوقتها شارب كرستال
يعني مطفي على اخيرررررر ، واختي شاربة
كرستال منو مشربهم ؟
الكل سكت الكل ما تنفس كمل بنفس الثبات
وارث : لليوم ما نعرف ، زين احنا
جاهزين نفتح سجلات تحقيق وخلي
يحققون وياها حتى تخلص من هل تهمة
بندر مايقبل ، وانتوا ساكتين والله ها اذا نقدم بلاغ
بندر يكتل روحه ، زين هي تگول اي انا حرگته
بس مو بوعيي ليش حرگته وهي وياه تزوجوا على حب ؟
رفع حاجبة منتظر جواب منهم من شاف الكل ساكت كمل
وارث : سيد عزيزي كلامي اريد جواب عليه
انتِ بنفسك مو گلت لگيت أعمال مدفونة
وصارت عندك رؤية على مكانهن ومدفونات
وبنص غرفتهم وبوسط بيتهم وگلت هذا العمل
من اخبث انواع السحر سحر اسود ويستخدمونه بس
من يريدون شخص يتخبل رسمي ويتأذى ؟
ليش ما بطلت العمل عاجبكممم ؟ زين وينه
اريده انا ابطل هل عمل عندي ايمان بيهن .
سيد مصطفى: بطلتهن ابني ، بس بعد اكو
اعمال بأسمهم مدفونات وين اگدر احصلهن
اذا امه ماتت وما عرفنا الحقيقة ماتت وياها .
وارث : ابنك يعرف الحقيقة والدليل اخر ايام امه
اخذها بيت وحدهم وحبسها بغرفة بگد ما خبلته
ورادها تتواجه هي وميمونة .
بيرغ : ميمونة ضحية صارت بيدهم
وهذا الغبي مو راضي يفهممممم
هم مخدرات وياهن اعمال شيطانية
وبنفس الوقت ماكو دليل يثبت منووو
حرگ ابنك اثنينهم مووو بوعيهم
بيوم الحادث من اجتي ميمونة علينا
ما جانت بوعيهااااا وتريد الصدك
لليوم هي مووو بعقلهاااا وكلنا
خايفين عليها لليوم عايشة بوسط هل اعمال .
عيوني بطلت ترمش من دخل بندر بيده سلاح
گعد مقابيلهم سحب اقسام بيرغ ضحك
بيرغ : اي مو تايهين شايل سلاحك
تهددنا بي يول افعصك فعص وحق الله .
رفع السلاح براس بيرغ وتقدم وارث دفعني
للخلف والصريخ هز البيت لزم ايد بندر صاح بي
وارث : تخبلت تكتل اخووووي ولك .
بندر : اخذهم وروحوا .
بيرغ : تريد تصدگ ما تصدگ امك سبب دمار
حياتك مو معناها عمتي اجمل صورتها
فك من اختنااااا بعددد فككككك ما تررريدك تكرهك كرهتك .
ادخل جدهم وسيد مصطفى حط ايده على راس
بندر من شاف عيونه نطت ودمار طگ بيها احمر
مدري شنو يحجي اول ما كمل نفخ بوجهه
بس بندر ما تحرك لزمه بيرغ من ملابسه غدر
ضربه بوكس والثاني ، رفعه وارث منه كمز
بندر رجع نفس الضربات وضاعفهن
كمز همام على ظهر بندر وطوق رقبته
بين ايده عوجها يعصر بيها نطت عيون بندرر
من وگع بيرغ رفسات يرفس بندر على بطنه
وسهم وارث يمنعون بيهم من شافوا
سيد مصطفى تخربط من خوفه على ابنه طاح .
شمروا وما سكت منهم ما عافهم ضربهم
ويهددهم بتهديدات يخليهم يزيدون
وتفور اعصابهم ، نزع بيرغ سترته
حتى ما انتظر احد يجيب عباتي
لفني بيها لف وطلعني يركض بيه
رجلي خانتني قريب الباب من سمعت صوته
يحذرني ما اروح وياهم اول ما طحت
شالني بيرغ بين ايده يصيح
بيرغ : لا تخافين ول خوية ميمونة روحي ترخص لروحچ .
اول ما گعدني بالسيارة دموعي جرت
مسح وجهي باس راسي حضن ايدي يبوسها
جرني حيل على صدره يمسح بظهري
بيرغ : سودة بوجهي والله سودة بوجهي
شصاير بيچ يا بعد عيون اخوچ .
ميمونة : بندر بيرغ .
_ شبي نعال .
_ اخاف ينتحر .
حجيتها وعبالك گلبي علمني ، فجأة صوت
طلقة هزت سكون المنطقة كلها وجلجل
صوتها بكل مكان عبالك صرخة مو طلقة تشبه الموت
وسع بيرغ عيونه وتجمد بمكانه مثل ما تجمدت
والدم يبس بكل جسمي صك
ميمونة: يمه بندر .
بيرغ : لا يا الله دخيلك اخووووتي .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.