رواية الموروث نصل حاد – الفصل الثالث والعشرون
♛ 23 ♛
تجهولت أفتر بالشارع ما اندل منين ادخل
مر رجال چبير بالعمر من شافني ابچي منهارة ناداني
_ ياهو وياچ جدو .
خفت منه اول ثواني بعد ما گال جدو انفجرت ابچي
_ اريد تكسي اختي هناك اختي يمكن ماتت .
دخل الرجال للبيت مالتهم وطلع بيده مفاتيح
صعد بسيارة قديمة وشغلها ونبهني
ارجع على بيت اصيح اهلي حتى ياخذنا .
رجعت ونشف الدم بكل جسمي من طلعت
امي من البيت شايله ننوس على گلبها
تبوس بوجهه ويدها وننوس رايحة منتهية
غـاليـة : لا يمه ننوس لا افتحي عيونچ
يمه اضحكي بوجهي خلي ترد روحي
ولچ يمهههههه مو تردين تاكلين مو جوعانة
كملت والله سويت اكل عليچ الله گعددددي
اكلي اگعدچ بحضني اوگلچ وانومچ
لا تعوووفيني بس لا تعوووفيني يماااااااا .
من شافت السيارة رحت يمها سندتها
خفت توگع وصعدتها ، شفنت نقش
تقفل بالبوب وركضت صعدت بالمقدمة
واني بصف امي رجل ننوس بحضني انصبغ
كل جسمها ازرگ حتى شفتها وجسمها يجري دم
غـاليـة : ننوس يمه إنّا احبچ اگعدي گولي
ماما احبچ لا توگفين گلبي ، تسمعيني يماااااا .
الرجال باع بالمرايا صاح
_ تتنفس .
خلت امي راسها وملخت روحها
_ لاااااا لاااااااا .
رجع سألها : اسمعي دگات گلبها .
نزلت راسها على مكانه وفقدت
حتى شالها راد يطيح من راسها
_ ما يدگ مااااا يدگ ما اسمع گلبهاااا .
نقش بيدها التلفون صوتها من البچي انتهى
_ عمو يا مستشفى رايحين .
نطاها اسم المستشفى ورجعت تبلغهم بالتلفون
اول ما وگفت السيارة شالت امي ننوس
ونزلت تركض بيها وتصرخ بالممر
_ بنتي يااا عالم بنتي يااا ناس راح تروح مني بنتي .
ممرضين أثنين ركضو شالوها من ايدها
ودكاترة ركضوا على طوارئ والصراخ
والهوسة الصارت رجعتني لنفس ذاك اليوم
” صوت شهاب ، توسلاتي ، والسچاچين ”
وگعت بالگاع ألم برجلي على صدري كورتها
وايدي اضغط بيها على راسي حتى ما اشوف
صراخ بأذني صررراخ ردني ردود .
بعد شلون أواجه الدنيا وانا منتهية
الأرضية متصلبة والممر بارد وغرف هواي
والمرضى اعدادهم تفوق الخيال.
الدكتور جر جهاز الصعقات زحفت
زحوف احضن بأمي مرعوبة عليها
جسمها صار قالب ثلچ تريد تركض عليهم
وگف شعرنا والله شعرناا وگف من طلعوا
شايلين ننوس مندفعين بخطواتهم السريعة
دخلوها غرفة عناية وصاروا ينادون بأسماء الدكاترة .
نقش مابيها نقطة دم بملامحها وما اعرف
هي ومنو تحچي وتبچي رحت اشوفها
عصرت ايدي وسندت حيلها على حيلي
نقش : عمو ضـلـيل عرف لچ مُـرجانـة عرف
واجه على بغداد ، خايفة راح يدمرنا شلون نبرر .
دخل خال امي وبيبي وخليل يركضون
لمتني جدتي يحضنها اول ما شافتني
تبوس بوجهي ، وانا بحضنها شفت خال امي
حضنها يمسح على ظهرها يريدها تحچي
لو تشكي ماكو ولا نفس تنفست بس تشهگ وتبچي
راحت عليها بيبي تصبّرها ، گعدت على كرسي الدوخة
وفقر الدم سيطر على حركتي ، فزيت من ثنه
خليل مقابيلي وفتح بطل ماي
_ اشربي بابا وجهچ انخطف لونه .
شربني بيده وراح على نقش اخذ ايدها وجابها
بصفي گعدها وشربها ماي ، وراح على جدتي
خليل : غسلي وجه غـاليـة .
امي ما قبلت ونهضت روحها تفرفح تروح
وتجي تنوح وتضرب على راسها مبين الخوف عليها
شگد انتظرنا الدكاترة كلها أطب وتطلع جوابهم
_ رجاءً خلونا نشوف شغلنا حالتها خطرة .
مُـرجانـة : بيبي وابو خليل شلون عرفوا ؟
نقش : شعرفني ، اني هم مستغربة .
_ يعني مو انتِ بلغتيهم ؟
_ لا مو اني .
طلع واحد من الدكاترة ينزع بالكفوف ويبلغنا
وكلنا ننصت بخوف مرعوبين من الجواب
_ بصراحة الطفلة إجتنا بحالة طارئة
بعد ما تعرضت لصعقة كهرباء قوية .
غـاليـة : بـ .. بس هيَّ جانت مضروبة
بالشباك بعيدة عن الكهرباء ؟
جاوبها بكل هدوء
_ صارت وياها الحادثة وهي قريبة من شباك
فالكهرباء دفعتها بقوة ومضروبة وصار عدها
ارتطام مباشر بالراس حسب ما تبين عدنا وفقدت الوعي .
التزم الصمت من وگعت امي على كرسي
خلت ايدها على راسها وتهز بجسمها منهارة
اضطر يكمل حتى يعرفنا بحالتها
_ ما اخفي عنكم التنفس مو مستقر
والقلب ضرباته مو مستقرة ، بس إحنا مخلينها
تحت المراقبة المركّزة الضربة قوية بالأخص على الراس
ولازم ننتبه اكثر من أعراض يمكن تظهر بمرور الوكت
سويلها أشعة مقطعية على الدماغ وطلع عدها
ارتجاج خفيف، بس الحمدلله ماكو نزيف داخلي
بعدنا ننتظر ترجع تگعد بشكل طبيعي
حتى نقيم حالتها العصبية .
حضنت امي وهيَّ حضنتني وسمعت الدكتور يگول
_ اطلب من امها تصير قوية لأن اول ما تستفيق ادخلها
عليها لازم امها قريبة منها بس اهم شي ما تخوفها
وان شاء الله تگوم بالسلامة ادعولها .
بعد ما راح ومر وقت وساعات
نظرتي صدت على ساعة اول ماصار صوت خبصة
البوب تتراگع وضجيج اقدامهم وهي ادگ بالگاع
والله كأنما يدگوها بگلوبنا مو بالگاع
تمسكت بيد امي بدخول تمار عيونه
حمره دم وايده متشنجه
ومقتدر يمشي بكوثر بكامل قوتها اطگ بالعكازة
ادگها بالگاع وعيونها تبث الشر والحقد
من شافتنا حسيتها تريد تشرب من دمنا تروي غلها
بشموخ ضربت العكازة من صارت وجه لوجه هي وامي .
شردت منهم وطلعت ويه جدتي برا من شافتني
اريد اوگع من طولي شگد ما مرعوبة منهم
وزادت الرهبة فجأة من الصوت
الرج الشارع رج وشخطت تايرات
سيارته ولدت صوت زمجرة يرهب
طفاها وجر المفتاح ونزل ضـلـيل وترك
باب السيارة مفتوح على حيله ولا همه
ركض على باب الدخول ، لأول مرة
بحياتي اشوف هل جبل العالي منهدم
وجهه محروگ حرگ مطعون صاير اسود
دخل بطرگ الدشداشة وشعره مهوس
وحالته تبچي العدو يخطي
خطواته بصعوبة ، دخلنا وراه
اول ما وصل يمهم صاح من كل گلبه مفرفح
_ وين نورااااااااا بنتي وين ؟
نفس الدكتور هرول من شافهم عرفهم مو قليلين
وگف شرح وضع ننوس بالكامل ، تعجبت
من اخذ الدكتور وطلعوا ضـلـيل والدكتور برا
وتمار ومقتدر راحوا وراهم ، دقايق ورجع دخلوا
وياهم اربع دكاترة من برا وقعوا على ورقة ودخلوهم
الغرفة ننوس وقفلوا الباب وراهم بسرعة .
گعد عمي ضـلـيل بكرسي بعيد عن الكل
أيّده متشابكة يمرد بيهن ، بمجرد ما اشوفه
گلبي دگاته تتسارع حتى سكوته مخيف
يهز برجله وعيونه على باب العناية
اهتز غضب من سمع كلمات امه اللي مثل السم
ام ضـلـيل : سويتيها وحده بوحده بنت ذياب
شرحتي بنتو مثل ما بنتچ شرحوها حتى
تحرگين گلبو ، كسرتي مثل ما نكسرت
بنتچ وكسرتچ ، هدمتي يول هيَّ هل
بنت الوحيدة بسمو تردين تخلصين
منها تموتيها وهذا اللي ببطنچ
تموتي حتى ترتاحين تصفين انتِ وبناتچ بس .
صفنت بملامح امي ناشفه تذكرت هيَّ ما تبچي
مقابيلهم ، مشت تجبر بروحها لزمتها نقش تمشيها
صدت نظرتي على جدتي خزرتني وتمار اجه
قاصدني ، ركضت على امي لزمت بيها دخلتها
على حمام لازمة صدرها تسحب النفس بصعوبة .
مُـرجانـة : يمه خايفة .
نقش : حتى اني گلبي راح يوگف .
سحبت نفس عميق وزفرته بصعوبة تحاول تتماسك
غسلت وجهه ايدها حتى ما تشيل الماي
وعبالك ما تسمعنا وفصلت من عدنا
لزمت بطنها قوي وغمضت عيونها حيل
تمسكت بالمغاسل ، سندتها نقش وحضنت وجهه
_ يمه شبيچ .
غـاليـة : شقيقة وجع الشقيقة .
مردت عيونها وطلعت من الحمامات تقرب
منها خالها يمسح على ظهرها وحضنها
_ خالو غـاليـة اريدچ قوية لا تهتمين للعجوز
اذا تردين اطلعچ لو اخذ البنات عدنا گولي
احچي شنو براسچ اساعدچ انا ابوچ .
غـاليـة : خالي بس عيني على بنات .
_ بعيوني ، تعالي هنا اگعدي بوية تعالي .
اخذها گعدها وباس راسها وصاح بصوت مسموع
_ خليل عصير الغالية خلي تشرب تسند روحها
خالو غـاليـة الدكتور شگال مو قوي روحچ نبهچ
حتى من تفوتين للبنية حيل عندچ ؟
تنفست بصعوبة وضغطت على ظلوع صدرها
علت نظراتنا بدخول شاهين لابس بدلته العسكرية
رفع البيريه من راسه حطها تحت ذراعه وخطوات
حذائه برزت حضوره وسكوت الكل
شاهين : بشروني وينها ننوس ؟
تمار : بعدها بالعناية عمك خابر على اربع دكاترة .
شاهين : اختصاص شنو ؟
تمار : قلبية گلبها مو زين ، وعدها حروق جلدية تحتاج
واعصاب ارتجاج براسها ، ودكتور كسور ظلوعها
ما تتنفس زين من ظلوعها ، راح يسون رنين واشعه .
نظر شاهين نظره طويلة حادة على
ضـلـيل وبدون خوف ولا ذرة تردد نطق بثقة :
_ حوبة اليتيمة .
كلمته رجتنا كلنا ، حمرة عيون تمار بي
ويقترب منه رفع ايده يريد يضربة وصاح
تمار : لا يا دوني يووولوووو شاهين
يا چلب تتشمت بعمك وبمصيبتوو .
اعترض عمو ضـلـيل حركة تمار من رفع ايده
واشر بمعنى ” لا ” ورجع نزل راسه يهز برجله
تنفس شاهين بثقل عبالك جبال على صدرة
وتقدم باتجاه امي گعد يمها دموعة تلمع
شاهين : انا اعتذر ، مو قصدي
اتشمت بس محروگ گلبي منهم .
طلع واحد من الممرضين هجم عليه ضليل حسيت
يريد يملخ الرجال ضغط على ايده وصرخ
منهار فاقد كل قوته عيونه تخوف
_ شلونهااا ؟ بنيتي شلونها ؟
_ دقايق ويطلع الدكتور اخي العزيز ويفهمك .
قبض شاهين ايده وبصوت ضايع نطق
_ راح يطيح دمر روحو .
حجاها وراح عند عمي ضـلـيل صار مقابيله
تمسك بيده اثنينهن يسنده يحاجي
شاهين : ارجع اگعد عمي راح توگع .
اجه من بعيد دكتور بصوت خشن گال
_ شيخ ضـلـيل اتفضل ادخل شوف بنتك .
فزت امي من مكانها وراحت تمشي سريع
غـاليـة : واني أريد اشوفها .
الدكتور: مايصـيـ••• .
ضـلـيل : امها ميصير شنو افتح درب دكتور .
فك الباب بيده دخلت امي وراها عمي ضـلـيل
وسدوا الباب ، شاهين صاح اقتربنا من الباب
من وگف ايده بجيب البنطلون سألته نقش
_ خابرتك مرتين من وصلنا للمستشفى ما جاوبت.
شاهين : شعندي مجاوب ؟
_ هاي شبيك شاهين ؟
_ شبيه ؟
_ احسك تصرفاتك غريبة .
شاهين : متوهمة .
حجاها وكلنا دخلنا بحالة رعب على صوت
ضـلـيل هز گلوبنا قبل المستشفى طلعوا
دكاترة اثنين وگع بالباب رجله ما تعينه بعد
ويوگف عليها ومن كل گلبه دگ على راسه
تمار ومقتدر يثبتون بيده والدكتور
يخبط ابره رفع عيونه على دكتور يتوسل بي
ضـلـيل : دكتور انا خادم وحق الله شنو تتمنى
شنو بنفسك بيت سيارة كل املاكي تحت
رجلكم اشتري بنيتي انااا اشتريهاااا منكمممم
لا تموووت بنتي لا تمووووووت احلفك بعزاز
گلبك لا تموت روحي معلگه بروحهاااااا .
ضرب على راسه مصدوم حسيته ابد مو بعقله
كلشي ديصير خارج نطاق تحمله
وبصوت جلجل بكل مكان صاح
_ بووووية نوررررررررا كون انا بمكانچ بووووية .
شمرت نقش روحها بالگاع قريب من عنده لزمت ايده
تبوس بيها وتبچي بشهگة
نقش : ابوس ايدك راح تعيش والله تعيش .
لمها بحضنه حضنها والله حضنها جحظت عيوني
متعجبة مو مستوعبة ابد ما دخلت بعقلي حضنهاااا
رجف كل جسمي من صاح
ضـلـيل : بوية نقش گلبي ننوس گلبي هاي منتهية
بنتي تريدددد تعووووفني .
رفعت نفسها من بين ايده تمسح بعيونه
وايدها بيده رجعت تحضنه تبچي على بچيته
حسدتها والله حسدتها حتى لو اختي احسدها
عمري كله تمنيت يحبني هل جبل بهيبته وشموخه
يلمني حتى احس بقوته ، دوم احلم يحبني
هو حتى نقش حبها انا الوحيدة يكرهني ليش ؟
دموعي تصب وانا اشوفها تحضن بي وهو يلمها
بيده ساند راسه على أكتافها ويردد
” بوية نقش ، يا بوية يا ننوس يا بوية ”
واني ؟ ليش ما ينطقها ويگول ” بوية مُـرجانـة ”
شفت امي طلعت منتهية جسد يمشي بلايه روح
ذبيت روحي بحضنها ومستصعبتها ابچي
على واحد مثل ضـلـيل لا يحبني ما اريده يلمني
ولا يحبني ولا يگول بوية مُـرجانـة ، ماكو بشر
ياخذ مكان ابوية هو واحد ومات بسببهم
باست امي راسي وكمشت بيدي ، امها تحجي
وياها تستفسر منها ما تگدر تنطق بحرف واحد .
غـاليـة ..
نهد حيلي بشوفتها ، بقت عيوني واسعات
من هول المنظر ننوس الأجهزة محاوطتها تخوف
اريد اگعد واخذ بطل الماي من
ايد خالي فز ضليل عليَّ وهو معصب
لزم ايدي بكل وحشية ما يشوف بعيونه بعد
ولا نطق بحرف ولا كلمة يجرّني وياه خفت
حتى اسحب روحي منه مقابيل عيون الكل
اهله اهلي ما يهمه لا نظراتهم ولا حچي احد بيهم
عيونه بيها غضب الكون كله ، سحبني للسيارة
فتح الباب ويغلي جسمه صاير شرار من الحرارة
شمرني بيها وسد الباب حتى ما لحگت أتنفّس
فلا اگدر اخفي خوفي باوعت بعيونه
نظراته تحچي تروي حرگة دمها بهاي اللحظة.
على طول الطريق ساكت بس يتنفس بصوت عالي
اول ما وصلنا مال بكل جسمه على جهتي فتح
صندوگ وجر المفاتيح ونزل ، فتح بوب البيت
واجه جرني جر من إيدي ودخلني وحتى الباب
طبگه برجله شاف الدم بالگاع الكزاز متناثر
العاب ننوس برا والماي يجري خفيف من الصوندة
فر ملابسي بيده وايده الثانية يأشر بيها
ضـلـيل : شلون ماتت بنيتي ؟
غـاليـة : ما ماتت عايشة ننوس عايشة .
ضـلـيل : القبل دقايق الطفلة شفناها عايشة ؟
الأجهزة ترس جسمها عايشة ؟
مگلوبة عيونها بياض عايشة ؟
راسها وجسمها ملفلف وتنزف عايشة ؟
ايدها محروگة من الكهرررررررباء عايشة ؟
جاوبي جاااااااوبيني لا احطچ واذبحچ هين .
حسيت ركبي بعد ما تحملني ابد
كلماته طبر تطبر بروحي وگلبي
خفت حتى اتنفس صعب ابرر حتى ما اعرف شلون
ابرر ضاعت الكلمات عقلي من الرهبة ما يجمع
يصيح ذبح روحه حتى ارد ينفخ نار بوجهي
ذبني داخل البيت عباله عناد بي ما اجاوب .
شد اصابعه شد على معصم ايده يسحل بيه
سحل تمسكت بيده وتوسلته يهدي هو صفن بعيوني
غـاليـة : أبوس آيدك بس هدي راح تموت
والقران گلبك راح يوگف ، ننوس راح تعيش
والقران گلبي يگول راح تعيش .
لا يسمع ولا يفتهم مثل البركان انفجر گلبه
حسيت بگلبه مولع بنار الگاع ما تحمله من القهر
لزم الطبلات الگزاز بكل حياه يشيل بيهن
يوجههن عليَّ بس من يشمرهن ما يگدر ويفشل
يذبهن قريب مني بحيث يتناثرن عليَّ وصوتهن
يهز بگلبي هز ، التلفزيون رفعه كسر بي التخم
وشمرهن راح على مطبخ ما ظل بي شي سليم يصيح
_ مواته بنيتي موووواته موووو زينة ننوس مو زينة .
ما تردد ولا بثانية اروح عنده لزمت ايده يدفع بيه
غـاليـة : اسمعني الله يخليك بغلات ننوس على گلبك
والله تنفست والله وگلبها زين الدكتور گال من طلعت
وهاي الجروح تروح والعباس تروح .
ما سمعني ويمكن سمع بس مايريد يقتنع
ياخذ بكلامي ماعنده ثقة بيه عطت مـن انتهى
غالية : الخاطري كــــافي .
انتهت قوته من فلش ما تبقى بالصالة
وگع بالگاع مهدود حيله على عزيزته
دموعه نزلت بلا تكلفه جان يضم بيهن انهار مقابيلي
ما تحمل جرت دموعة وجهه مصدوم يدگ على راسه
ضـلـيل : اذا تموت وحق من خلق السموات والأرض
ادفن روحي بصفها اموت وياها انا عايش عليها
گلبي يدگ الخاطر گلبهاا روحي وحيلي فداهاااا
ضحكتها عندي بالدنيآ كلهااااااااا .
ملخ راسه بالضرب تأذيت بگد ما ضرباته قويه
على راسه يضرب بروحه بلا رحمة وما بطل
تهديد وسب بيه ويرجع يصيح بأسمها
ذبيت روحي مقابيله فاتح رجله قربت روحي
وحضنته بكل حيلي حضنته ودموعي نزلت
عيوني لأول مرة طفح صبرها وجرت بقهرها
ونيت بعلو صوتي اشهگ بحضنه اختنگت
تعبت اكابر تعبت اريد ابچي بيده تعبت
خفت وخوفي مو منه هل مرة خوفي عليه .
غـاليـة : دخيلك لا تنهدم انهدم وياك
انتَ جبل أحتمي بيك اذا توگع اوگع وياك ضـلـيل
انتَ كل قوتي لا تكسرني بيك مكسورة
لا تكسرني بعد بيك ، ما اتحمل اشوفك بهل حالة
ما استوعب اشوفك بهذا ضعف دخيلك ابوس ايدك
انا والله والله ضـلـيل والله قوية بيك .
رفعت عيوني اله استنجد اريد ينطيني قوة ضايعة
مقابيل بركان ما يهدي ثار وانفجر خلصان صبره
ضـلـيل : ليش تعذبيني وفرت كلشي تحتاجي
انتِ والبنات وگلت حتى ما تگول يضغط عليه
بالبنات خليتهن وياچ عايشات وشنو تتمني
عندچ ، هو هذا المقابل مالتچ تحرگين بگلبي .
غـاليـة : ابد مـا ..
ضـلـيل : هي هل طفلة عندچ ما گدرتي ادبريها
وتحميها ، البنات بالله كبار هيَّ تحتاج مراقبة
راقبيهااااااا لچ راقبيهااا للطفلة .
غـاليـة : جانت هنا گاعدة التلفزيون خليته
بوسط الصالة حتى اگعدها گدام عيني
تباع وتلعب وتاكل لو تجي يمي لو تصعد
للبنات، بس انتَ تعرفها حركه ننوس تتحرك
وعنيدة ما تلزم ولا تسمع الكلام ، گالت جوعانة
رحت اجهز الأكل وراحت تلعب بألعابها
ساحبتهم برا ونقش وياها والله ، بين ما راحت
شوية غفلت عنها شوية والله دقايق سمعت الگزاز يتفلش .
عصر عيونه بيده وشهگ شهگه طلعت من گلبه
_ جوعانة جانت جوعانة ، الله اختبرني بيها
كسر گلبي بننوس حتى اعيش لوعت البزره .
هزني من اجتافي رغم ماعنده حيل بس هزني
ضـلـيل : اريد اموووتچ واخلصصصصص منچ
عذبتيني هديتي حيلي كل ضربة انضرب بيها
منچ تكبررررني دهرررررررر ، لو بس يرد الزمن
ما اقابل بنت ذياب ولا ادخلچ حياتي دمرتيني
لا اريد احبچ ولا اتعلق بيچ ولا اضعف هل ضعف هذا
ريتني اگدر اضربچ وابرد نار گلبي ريتني بس ريتني
يول گلبچ هذا صخرررر كل رحمة ما بي .
سحبت روحي من بين ايده وطلعت بالگراج
اريد ارجع لبنتي ، وهوَ ما يهدي صوت التكسير
وصل الأخر الشارع وما سكت البيت اباع من بعيد
دمره دمار شامل عبالك زلزال وهدم كلشي
يخلي غضبه بالغراض حتى يتعب وما يضربني
طلعت روحه من التعب ضغطت على روحي ورجعت .
دخلت اخذت گلاص ماي ورحت تمسكت بيده
خليت قليل بيدي وغسلت وجهه سحب الگلاص
من ايدي ضربني بي على ايدي ورگعه بالحايط
فتحت اول دگم دشداشته رفع راسه يجر النفس
بصعوبة من گعد بالگاع ، رجعت اخذت ماي
وغسلت وجهه وايده ، خليت الگلاص على صفحة
وركعت مقابيله امسح بيده ، همس وصوته مبحوح
ضـلـيل : تعبان .
حضنته ذب كل ثگل جسمه على صدري
وحضني يسحبني اكثر ويهمس
_ گلبي يوجعني اريد بنيتي .
_ نروح انا وياك عدها حتى من تگعد تشوفنا .
_ شوكت تگعد ؟
_ والله تگعد انتَ اشتريها .
_ كل مآلي وحلالي فداها بس تصحصح
وتگلي بابا وتلعب بين ايدي .
حضنت وجهه بين ايدي عدلت حاجبه وشعره
مخربط غمض هلكان يجر النفس بصعوبة
غـاليـة : جانت مشتاقتلك .
_ وانا والله طگ گلبي عليها گلت يومين واخذها عندي .
_ نروحلها ؟
_ اي بس اريد ماي گلبي مو زين .
بأستعجال نهضت خليت ماي بارد من البراد
بالمطبخ ورجعت گعدت مقابيله ، اخذه مني
يشرب وفحطان ، كمل ونهض يضرب بجيوب الدشداشة
ضـلـيل : الفلوس وين ؟
غـاليـة : بغرفتي .
فتح باب الغرفة رحت طلعت المفاتيح
وفتحت قاصة الفلوس مالته أمنهم عندي
حسب فلوس ترس جيوب ملابسه وطلع قبلي
قفلتها وتذكرت من جابها ثاني يوم وصولنا
لهذا البيت وخلاها عندي امانة لأن محد يگدر
يوصل على هذا البيت والمكان يمي أمين
ويعرف لو اموت ما ارفع ايدي عليهن .
عدلت شالي وبدلت عباتي وطلعت مستعجلة
قفل البوب وشغل السيارة ومن التعب كل شوية
يطبگ السيارة يخلي راسه على ستيرن
_ شبيك ؟
_ ضغطي من وراچ ومن ورا مصايبچ .
ذبيت نفس ودرت وجهي دموعي تصب
ضـلـيل : وحق كل حرف بالقران شهگه بعد
اسمعهااا منچ لو دمعة وحدة توگع افوت
بالسيارات عدل وگبل املخ السيارة اشمرها
من فوووووك الجسررر وانعل خيرها
اموتچ واموت روحي ونخلص لا
تزيدين همي همين اشششششش بنت ذياب اششش .
تمنيت ارجع قوية مقابيله مثل قبل ما تنزل دمعتي
بس خرب هل قانون وصرت اشكي تعبي بدموع
غـاليـة : خايفة هل مرة خايفة لأن حتى انتَ ضدي .
رفع اصبعه على شفايفه يحذرني
_ دموعچ ما تنزل جدام إحد اذبحچ .
غـاليـة : فوك ما تحطمت ومفجوعة ببنتي
يزيدوها بالكلام والضغط و.
ضـلـيل : راح افلششششش السيارة اسكتي .
درت وجهي ضربني بالكلينكس اخذت وحده وشمرته
مسحت وجهي واول ما وصلنا نزلت قبله امشي
صف السيارة ونزل يمشي بتعب
قريب من قسم العناية طفه الجگارة جرني وهمس
_ امشي بسدي وظلچ بمستوى ظلي
خليني سيفچ اگطع لسان كلمن يغثچ
انتِ غـاليـة ودمعتچ غـاليـة ، اخذ القوة منچ واخذيها مني .
مُـرجانـة …
ذياب تحومي علينا اني واختي ، ويصدهم شاهين
بتهديداته عزلنا منهم على صفحة گعدنا
وكوثر واخوانها اثنين واختها وبنت اختها
وعمام ضـلـيل اربعة موجودين الممر انگطع
من عددهم والدكاترة يخافون يطردوهم
جدتي اخذها خليل وابو وطلعوا مدري وين
كوثر جانت تنشغ وبعالي صوتها تدعي
حتى تسمع ضـلـيل ذبح امي وخلص منها
جانت ايدي بين ننوس ما تخاف منهم تخزرهم
ومرات ما تتحمل تظل تترادد وياهم وشاهين
يسكت بيها وهي تتصايح وياه تظل لأن يسكتها .
من بين الهوسة طلع الحقير تمار من بين الزلم
هجم عليه عصر رگبتي بيده يخنگ بيه
رفع ايده يريد يضربني بوكس ، لزم ايده شاهين وصاح
_ اذا تضربها والله اخابر الشيخ ويجي هين
يشوف شغلووووا وياكممممم كاااافي .
تمار : بنت الـ**** امچ الـ**** وين جنتي
من انعل ابوچ لابو العرفنه بيچن انتن وامچن .
حجاها ورفسني على رجلي على عظم متعمد يكسره
جحظت عيوني متألمة وصرخت بعلى صوتي
صوت رج المستشفى وصار يدوي ، نشغت
من وجع الجروح برگبتي بعده ما ملتأم وطيبان
لزمت ايده اريد يهدني يضغط عليها اكثر
حسيت راح اموت ، العالم تباع صرنا فلم
ونقش تضرب بظهره تسب بي وعباتها وگعت
من راسها ومقتدر اجه يسحل بيها حتى ما تضربه .
شاهين بين لازم ايد ابو من شاف عيوني طلعت
راح اموووت بگد ما ضغط ، وبين نقش
وگعت عليها كوثر تضرب بيها بالعكاز
ومقتدر مثبتها ، طلع شاهين السلاح من جيب
بنطلونه وبعالي صوتو صاح بعجز
_ وحق الله اذا ما تهدون البنات ادگ
روحي طلقة وخطيتي برگبتكم يا مجررررمين .
وهذولي فاقدين بس تمار دفرني وشمرني
ورفع ايدو صاح : شمرتها بوية نزل السلاح .
طلع شاهين التلفون وصرخ
_ شيخ ضـلـيل امك واخوانك موتوا بنات عابد .
شال شاهين عباية نقش لبسها بيده
وجرها من ايدها خلاها قريبة منه
لبين ما رجعت وشفت امي من بعيد ردت روحي
خطت خطواتها بثقة تمشيها ضـلـيل يمشي
قبلها بكم خطوة رافع الراس ما مهتزّ عكس قبل شوية .
انتهت دعاوي كوثر من شافتهم بهتت وانتقمت
من عيونها ، عضت نقش شفتها وباوعت على كوثر
وبصوت مسموع حجت تسمعها
_ غـاليـة تكسر ما تنكسر ، نصيحة إلتزمي السكوت
اخذي فروخچ وشردي منا راح يسحل بيكم المستشفى .
وصل ضليل قريب منهم وبكل ثبات يخفي عصبيته گال :
ضـلـيل : سيارة برا تنتظرچ يمه انتِ وتمار ومقتدر .
كوثر : لا انا اظل هين .
ضـلـيل : تريدين الزمهم بنص المستشفى اذبحهم
دمي فاير اريد اصب قهري وضيم گلبي بيهم طلعيهم ؟
تمار ومقتدر عرفوا اذا يطلعون راح يوگون بيد
ضـلـيل والصار بينا يرجع بيهم اضعاف
وجههم صار يذب ألوان محتارين بين
يطلعون وبين يقنعون هل غضب الثابت
مقابيلهم وجهه محتقن صاير دم احمر
ودمرات ايده وراسه نطت صاك على اسنانه .
عبرتهم امي كلهم والواضح ماتعرف
بينا مسحولات وصلت عدنا ، واني صفنت على ضـلـيل
اباع بنظرات القرف شگد اكرهه ياريت هو بمكان ننوس
شكد جنت مقهورة على امي دفعت ايدها
من شفتها دخلت هيَّ وياه ، وكفت بعيد عنها
مكتفه ايدي الصدري وشاهين من بعيد اشر ” شكو “.
درت عيوني منه ، ونقش اجت عتت ايدي
نقش : مُـرجانـة بطلي تصرفات الزعاطيط .
مُـرجانـة: دامها تقبلته ما اتقبلها بعد للموت .
نقش : بدون عمي ضـلـيل يموتونه كلنا والقران
وروح ابوية يذبحونه ويدفنونه بليلة ظلمه .
دفعت ايد نقش ونترت بيها
مُـرجانـة : هو زرع هل كلام براسكم .
نقش : ما شفتي كوثر والعارية شنو
من كلام سم صاروا يحچون من شافوا عصبي
على امي يريد يذبحها ؟ من راحوا مو راد يموتچ
لو غلطانه هسة مووو ردنا نموووت بيدهم زعطوطة .
نزلت دموعي من صارت امي قريبة مني
مُـرجانـة : اريد ارجع للبيت هسة ترجعوني .
غـاليـة : لا تبچين والله تحرگين گلبي ولچ يمه
ارجعي انتِ ونقش للبيت روحي .
التفتت على شاهين وبصوت مسموع عند الكل طلبت
غـاليـة : شاهين بلا امر عليك رجع البنات للبيت .
شاهين : تم شيخة .
مريت من ضـلـيل گاعد على كرسي وايده على راسه
ورجله تهتز بشكل مو طبيعي ، منتظر اخوانه يطلعون
ما ادري شنو براسه وبنفس الوقت كلهم ينتظرون
خبر من اي دكتور يطلع يبشرهم .
ملِكة …
ثگل كاتم على على صدري مصعب انفاسي
فزيت مخروعة صوت صريخ بأذني
وبلاعيمي احس بيها متجرحه
ابلع ريگي بصعوبة عصرت
عيوني وكفت مرة وحدة
على حيلي اجر بملابسي
اشوف بيهن مو هذني جنت لابستهن
شوكت بدلت ملابسي وشعري ليش مبلل ؟
لزمت بطني من المغص صار اسفل بطني
ردت اطيح لو ما تلاحگت على نفسي وگعدت
بصعوبة على چربايتي .. لحظة هاي مو چربايتي
ولا غرفتي والملابس مو ملابسي وراسي يفتر شصاير ؟
تركت الغرفة بعد ما عرفتها غرفة ام بيرغ
وطلعت البيت ساكن مابي صوت وقليل
اضاءة موجودة من برا الگراج وتدخل
على بيت السكون مغطي على كامل
البيت فتحت باب الاستقبال دحگت
على بيرغ من بعيد نايم وايدو على
راسو ، بمجرد ما دخلت رفع ايدو
يدحگ منو دخل من عرفني عدل
جسمو ورفعو وگعد عبالك صاير
شي ، ابتسمت وجلست قريب من
رجله صفنت بملامحو أتفحصو
ملِكة : طمني شلون صرت شگال الدكتور ؟
رفع ايده يريد يحضن وجهي تردد ونزلها
بيرغ : انتِ طمنيني عنچ ملِكه.
_ اني شبيه ؟
نزل راسه وزفر أنفاسه مهضوم مهموم ورد
بيرغ : لهل درجة تكرهيني ملِكة وتنتحرين بسببي ؟
فكيت حلگي وعيوني اندهشت
خنگتني الصدمة وضربت على صدري بلا وعي
ملِكه : مستحيل انتحر انتِ غلطان أسوء ايامي
مافكرت انتحر اني اصلي واصوم ماعندي هيچ تفكير .
زم شفايفو وعيونو نزلت من وجهي حسيت
بداخلو كلام مستصعب ينطق بي بس جـبر روحو
بيرغ : بعيوني شفت ملِكه بعيوني هاي .
ملِكه : تريد تخبلني شنو هوو شنووو ؟
_ استغفر الله .
_ بيرغ اخر شي اتذكرو من نزلت من عندي
وبعدين اني نزلت ولگيت حالتك مو زينة
واخذوك للمستشفى وامك تعاركت ويايَّ
وضربتني بالعودة والسجين والله العظيم
هذا اخر شي اتذكرو ، بعد شوكت انتحرت ؟
بيرغ : من رجعت صرختي على همام وسهم راحوا
يردون يعرفون شنو تردين ، وانتِ فريتي
من الباب الثاني ودخلتي بيدچ سجين .
ملِكه : اني ؟
_ اي ملِكه انتِ ردتي تضربيني بيها
من سيطرت على حركتچ تحركتي سريع
وضربتي روحچ بيها ونشگت ايدچ شوفيها .
هزيت راسي رفضت أصدك كلامو مو معقوله مستحيل
بس ايدي صدك مربوطة بشاش وبيها دم
بيرغ : تمام تمام اهدي ماكو شي تعالي .
اقتربت بكامل ارادتي صرت قريبة منو
حضن وجهي بين ايدو وبطرف اصبعو تلمس رموشي
بيرغ : الفترة الفاتت كلنا تعبانين بيها
هاي كلها حالة نفسية وصغوطات وتراكمات تصير .
ملِكه : يعني انتَ ما زعلان مني ؟
بيرغ : لا ما زعلان ، وباجر تروحي عند اهلچ ترتاحين .
_ لا ما اريدهم اريدك خليني عندك .
بيرغ : الوقت متأخر روحي نامي .
_ اخاف اصعد .
زاح قليل يسوي مكان ومد ايدو بمكان المخدة
_ تعالي نامي بحضني .
_ ماتخاف اموتك ؟
_ لا قابل مخبلة بين ايدي وتموتيني .
اكو احساس يجذبني اروح عندو انام بحمايتو
خليت راسي على ايدو شي بيه رافضو وشي يريدو
غمضت عيوني تعبانة، اريد افكر بس عقلي ما يفكر
جامد ، استداريت بكل جسمي عليَّ صدرو ورفعت
راسي ادحگ على وجهو ، نزل نظراتو على شفايفي
باسهم بدون مقاومة وابتعد سحبني اكثر على جسمو
بيرغ : نامي ملِكه نامي وللصبح هل مصيبة احلها .
كلامو بمثابة امر لعقلي نمت بمجرد
ما گال نامي بكل راحة بدون زايد سلمتها
الثاني يوم صحيت على صوت ام بيرغ
تفتح بالبردات والشبابيك وتحچي وياه
ام بيرغ : لا يفوتون عليك اخوانك ويشوفوها بحضنك .
عصرت عيوني بيدي هو حاضني مثبتني
بين ايدو ، ابتسم بوجهي وبلطف همس
_ روحي كملي نومتچ بغرفتنا .
هزيت راسي بدون اعتراض وطلعت
وانا على درج سمعتو يصرخ ويهدد
بيرغ : ليش ضارررربتهااااااا ؟
_ تعاركت انا وياها يول هاك ادحگ
بعيونك شلون ملختني تملخ ايدي ليلي
كلو ما گدرت انام من وجعها والضرب مالتها .
بيرغ : يمه وضعها ما عاجبني اذا طلعتي
ادگين حبوب هلوسة لو حبوب هاي نعايل
منشطات وهل سوالف وحق الله لا انتِ
امي ولا انا ابنچ ، وهذاك الثاني راح
يخيس بالحبوس ارجعچ عند اخوتچ
خدامة تصيرين لنسوانهم خليني
مخليچ عندي عايشة عيشة ملوك
معززة مكرمة ألبيت بيتچ لا تهجمين حياتي .
دخلت غرفتي مو نعسانة بس كلمة بيرغ
بأذني تتردد “روحي كملي نومتچ بغرفتچ”
خليت راسي على مخدة احوس الحد ما غفيت
گعدت الظهر على لمساته ابتسم ولا أرادياً ابتسمت
بيرغ : ليش بعدچ نايمة مريضة بيچ شي ؟
ملِكه : بيش الساعة .
_ عبر المغرب خلص اليوم .
مردت راسي بيدي وبيه ما بيه رحت على كنتور
اخذت ملابس ومنشفة ودخلت للحمام سبحت
وطلعت دحگت سَــهم بيدو صينية اكل
سلمها بيد بيرغ من الدرج ونزل مستعجل
اول ما دخلت للغرفة بعدني اعدل بشعري
وارش عطري گعد على تخم وينبرة حيرة طلب
_ تعالي يولو اكلي شي محاربة الأكل من البارحة .
_ اكل بالعافية ماعندي نفس .
_ ملِكه لا تعذبيني تعالي اكلي بسرعة .
ذبيت كلشي من ايدي ورجلي اخذتني عندو
گعدت مقابيلو تربعت وصفنت بملامحو
اخذ قطعة لحم خبط مرگة وتمن ورفعها قدمها
عليَّ وايدو خلاها تحت شفايفي
_ اكلي من ايدي من اروح فدوة لرسم الشفايف .
_ استحي خلي يصير عندك بريك .
_ عجل ياهو البارحة يتگلب بيدي
ويرفع بروحو حتى احن عليه وابوسو يولو .
فزيت من مكاني متعصبة من كلامو
سحب ايدي دفع الصينية وسحبني
على رجلو گعدني محاوط خصري بكل تملك
_ شبلاچ بس تتزعلين .
_ اكل وانزل حباب .
_ مو بكيفچ ملِكه انتِ مو تريدين تعيشين
مرتاحة بلا مشاكل جاهز انا جاهز
بس صيري زينة ويايَّ .
نزلني من رجلو غصب گعدني ياكل واكلت قليل وياه
بس كملنا شالها على صفحة وسحبني بين ايدو
نفرت منو وابتعدت معصبة من حركاتو
ملِكه : كافي تقترب بيرغ بزعتني .
تأفف بغضب مبالغ بي وجر ايدي وسحبني
بيرغ : تعالي نلعب لعبة حلوة .
_ انا وياك ؟
_ اي حتى اعرفچ وتعرفيني ونكسر كم حاجز بيناتنا .
_ ما يعني ما .
_ دحگي بعينچ انا احاول وانتِ بهذا نفورچ
مني تخليني اعاند وياچ واصير حقير والله .
دفعني منو يريد يطلع ، ركضت اعترضت طريقو
_ لا تطلع زعلان راسي من التفكير يصير يوجعني .
_ متنازل على كرامتي وتعبان ومتحمل هذا نفورچ
اگول خليها تتعود عليَّ حتى ما اجبرها على شي
وانتِ يوم بعد يوم تكرهيني اكثررررر واكثرررر .
بقيت ساكته شنو اگدر احچي بس انظر بعيونو
ضايعة ومرتبكة ، بين اخلي يروح ويطبو مرض
وبين صوت براسي يمنعني اخلي يطلع زعلان
لا يرجع ينتكس ويتمرض ، استسلم وهوَ بادر
رجعتي تمدد على سرير گعدت قريب منو
ملِكه : هم تندمت على سويتو بيه ؟
_ لا ابد ولا لحظة ندمت .
_ ليش ؟
_ لأن كل الصار حتى احصل عليچ وحصلت .
صفن بعيوني لحظات وسألني
_ هم حبيتي بحياتچ .
_ معليك .
_ حظ حظچ اطيحو هساع .
_ انتَ حبيت ؟
_ اعجاب اي بس ما حبيت بس مرة
بحياتي حبيت واحتفظت بيها .
_ تقصدني مووو ؟
_ لا بربوئه اعرفچ راح تسوين زعله
وينچ وين الحب انتِ وهذا اسلوووبچ .
وكفت تخوصرت وخزرتو اريد اضربو
براسدي لو ما الخوف لا يمطلني ويذبحني
مثل ما ذبح الطلي برا واكلو ياكلني
ملِكه : وشبي اسلووووبي هااا شبي ؟
بيرغ : اسلوبچ أسلوب ضابط بمكافحة اجرام
حلگه مشگوگ وگلهن مطگطگات جوا .
هزيت ايدي جرني رجعني بمكاني
ملِكه : شدعوة عليك كلامي شوكة ما تتحمل .
بيرغ : دصمي حلگچ خلي نتعرف .
ملِكه : شلون يعني مطگطگات جوا ؟
_ يعني لا يفيد وياه غزل لا عيني واغاتي
لا سحل لا كتل كلهن عبالك مطگطگات عندچ
ما تتأثرررين من مصيبة على صماغچ هذا المكفوش .
لزمت كفشتي عدلتها والله بي راشدي دخيلك ربي
ملِكه : يحچي بالصماغ ابو صماغ المفتوح .
بيرغ : صمي حلگچ خلي نلعب .
_ صغار ونلعب هذا شبي الضربة أثرت بيك .
_ ما باقي شي اضربچ بوكس ارجعچ
بحضن امچ يعيدون تربيتچ .
ملِكه : ردت اگول اني هم اضربك حتى امك
تعيد تربيتك بس تذكرت شغله .
_ شغله؟
_ شنووو هل شغله ؟
_ لا ماكو شي يلة نلعب .
لزمني من بداية ملابسي وسحبني عليه
_ تحچين لو اردمچ ردم اخليچ تعزفين سمفونية ؟
رفعت حاجبي وجريت مخده على رجلي
اسند وجهي على ايدي واتمعن بالسوالف
ملِكه : سيفونيه من يا نوع ؟
_ بعد حسب كلمات السمفونية مالتچ وعزفها .
_ آحس قصدك سخيف .
_ لا ابد .
_امك ماعدها تربية حتى تنطيك تربية وترجع تربيك .
بيرغ : ملِكهههههههههه .
ضربت على رجلي وجريت الشال شديت راسي
ملِكه : هم صيح عليَّ ، هممم رفععع صوووتو .
_ ادوووسين بمصاريني .
_ ادوس بأمك .
_ ملِكههههههههههههه .
_ هم صيح هم عيط نعال على هيچ تعارف .
جر الشال من راسي وسحلني قريب منه
باسني بخدي حيل ولازم راسي قوي حتى
ما اتحرك وحلگي نعوچ عوچ بگد ما صغط
وعيوني نعقچت شمرني وضربني بطرف ايدو
بيرغ : امداچ على هيچ بچم معوچ .
ملِكه : مثل بچم سيارتك من ابوية فلشها تفليش
هههههههههه ، بعدين هذا البچم ترجف عليه
ابو راس المفتوح المتصاوب ابووو الرتب الراگوص .
عض اصبعوا وراح يفتر بالغرفة ايدو على راسو
بيرغ : لسانها بطول القارات عبر العررراق رباااااااي .
واني بمكاني بأنتصار رفعت اديناتي ورفعت
اصبع منا ومنا ونزلت راسي افر بكتافي ارگص
واتمايل بخصري يمين يسار ، فرحت مو گادر عليَّ .
رفعت نظراتي شو هذا تقرب مني ولزم خصري
من ملابسي وسحلني وگفني خلاني بيده
يفر بجسمي غصب واخذ ايدي فرني فرتين
دفعتو مني ورجعت بمكاني طبطبت على تخم
_ سيادة المقدم اتفضل نلعب لعبة تعارف .
_ وين اكو مقدم يلعب لعبة تعارف .
_ يااااا يااااا مو گلت نلعب ونتعرف .
_ ماعدنا وكت العاب التافهه ندخل بالغميچ .
اشرت على طوله وصرت اشعر وألقي التحية
ملِكه : سيادة المقدم عوف الغميچ
سيادة المقدم يل كلكم تعرفوا
هيبة وسيادة بيرغ وقانون ودولة ومدري شنووو .
بيرغ : بقيتي هيبة ؟ بقيتي قانون ؟
ملِكه : ضخامة وطول منو يگدر عليك .
بيرغ : وحگ ربچ من وراچ كل ما اشوف
واحد طويل وضخم والعالم تخافو وتهاب كلامو
اگول اكو فد هامسترر بگد القندرة لاعبة عليه .
ملِكه : تذكرت اولهم وارث .
استوعبت درت وجهي منو زعلانة ما تحملت كلمتو
نهضت اريد اطلع سبقني وسحب ايدي صاح
_ شبلاچ موووو احچي وياچ .
_ بگد القندرة ؟
_ يا قندرة همام هذا همام قندرة .
_ جذاب انتَ قصدتني .
_ سَــهم قندرة مو انتِ .
طلعت من الغرفة ما قبلت اسمعو بعد
وهوَ باع كبرياء ونزل جوا ، سمعت صوت وارث
بكل هدوء يسأل بي
_ وصلت مرتك على بيت اهلها .
_ لا فوك .
_ انا شنو حچيت ؟
_ خليها يمي .
همام : عوفك من بيرغ مشاكل هو وحرمتو يحلها
خل مشاكلنا يلة بسرعة اگعد وحلها .
وارث : شعندك قنادر براسك مشاكل
اربعة وعشرين ساعة راكب السيارة وتفتر
مثل الزمايل من شارع الشارع وفلوس ترس جيوبك .
همام : اريد مستندات مبيعات الأراضي كلهن
ورواتبنا يلة محتاجين فلوس كلنا ، مو مخلي
الوارد كلو بجيبك تصرف براحتك تلعب بالفلوس لعب .
بيرغ : همــام .
وارث : خلي يبث الحقد خلي .
همام : هذا مو حقد ، حق وينك انتَ كل ما ادورك
ماكوووو مختفي رايح بعالم ثاني مو حالةً
حتى الأراضي كلنا هاملين شغلها مخليها بيد سَــهم
ومشدد حراسة ومكثر ذيابة وچلاب بيها عود تحميها .
وارث : اخليك بدل الچلاب ؟
همام : احترم نفسك والله طفح صبري نريد
حل هذا الوضع كلو ما عاجبني ، انتَ بعالم
وكلنا مخلينا بعالم بعيد حتى امك هملتها
ارجع رتب شغل الأراضي واح نضيعها .
وظل همام يحچي ويصيح يشيل روحو ويرگعها
وهذا وارث گاعد يخوط بالچاي والتلفون على رجلو
كل شوي يفتح الشاشة ويرجع يطفيها ويستمع
وبس يدحگ بعيونو ما ينطق بحرف ، خلص
استكان الچاي وتركو وصعد بكل برود .
همام : شنو معناتها تتجاهلناااااااا .
بيرغ : كافي همام تخبلت لا ينزل يخبزك .
_ خلي يحترم نفسو وينزل بأحترامو يحچي .
وارث : يدور احترام القندرة اكل قندرة وانجب لك .
ام وارث طلعت تهدي بهمام وهذا متخبل
وارث من شافني نزل راسو وبكل احترام يحاچيني
_ شلون صرتي خوية .
_ الحمدلله .
_ تريدين تروحين البيت اهلچ ؟
صعد بيرغ قبل لا اجاوب سحب ايدي وصاح بي
_ هذا اخذو حرمتو منو وهسة يريد ياخذ حرمتي .
دخل للغرفة بدون ما يزيد كلام وبيرغ نزل
ام وارث صعدت بغرفة ابنها وسدت الباب وراها
قفلت غرفتي وبقيت بيهـا مر يومين بالثالث
صحصحت وبديت استرد عافيتي والدوخة تفارقني
مزلت بوقت متأخر اغير بطل الماي خلص مالتي
وهم أشوف الثلاجة شنو بيها ، وهذا برغي وينو
بعدني اريد انزل الدرج لمحت السوسة ام روغان
فاتت للحمام تتوضأ حتى تصلي المؤمنة
دخلت للمطبخ دحگت على عباية ام وارث على باب
المطبخ وعلگ لون اخضر طويل هم وابتسمت ههههه .
طگطگت رگبتي بعدني ما مسيت ضرباتها هنااا
بهذا المطبخ ، طلعت نفس السچين من الجرارة
وخليت الأخضر على راسي وفوك العلم
العباية ودخلت اديناتي بس السجين طالعة
مشيت على اطراف اصابعي ورحت تربعت
جوا الدرج انتظرها وهي عدها عاشت
بالحمام لأن الصراحة هو هذا مكانها الحقيقي
بالنص ساعة بالحمام ما تغسل جسمها تغسل
ذنوبها ، هي ام روغان ذنوبها تعبر ذنوب الزلم .
اول ما نفك الباب وگفت بكل حيلي وطلعت
السجين وهجمت عليها من الخوف والرهبة
ماعدها بعد صوت راح بس تريد تركض
نمت عليها اچكچك بيها بالسجين مثل ما
چكچكت جسمي وهي تركض تضرب
على راسها تخبلت الحرمة خطية
بطنشت بمكانها اربع بطنوشات ورفست
كم رفسه وسكتت يمكن عبالها زلمة گالت
بالكي زلمة يحبني، عبنها تموت على زلم .
من عفتها وقدمت السجين وارجع بيها
اهدد بيها ما اگدر احجي اخاف تعرفني
ركضت وانا ركضت وراها هنا صرخت
وقبل لا تنتبه دخلت المطبخ وللمخزن
عدل وگبل انوب انا هم صرت ابطنش وارافس
وگعت فوك الطحين من ضميت العباية والسجين
بيناتهن وختلت عقچت روحي عقچ بين الطحينات
من سمعت صوت همام وبيرغ وارث وسهم برا
ام بيرغ : جن يماااااا جن بيتنا عايش
يريد يموتني ضربني بالسجين ول شفتو بعيوني .
لطمت على وجهي اسمع الباوب تنفتح
والبيت كلو صار انارتو اشتغلت حتى ما تخاف
ويثبتون ماكو جن ، وكلها تبحث على جني
دخل وإرث للمخزن واسمع واحد محصور ضحكه
رفعت راسي دحگت بطرف عيني كشفني يماااااا
مخلي ايد على خاصرتو والثاني على راسو
ويرجع يخليها على شفايفو يكتم صوت ضحكتو
ملِكه : بستر خواتك تستر عليَّ .
وارث : هههههههههه خرب عقلچ .
ملِكه : بغلات النحلة الطنانة .
مر بيرغ من عندو سحبو وارث من ايدو ودخلو
للمخزن ضميت روحي وعصرت روحي عصر بالطحين
بعد ما ادحگ على شي ، ثواني ونسحبت من ملابسي
وطلعني روغان يدحگ عليَّ بصدمة وملابسي وجهي
كلو طحين ، عضيت شفتي وباوعت بطرف شفايفي
بيرغ : تخوفين امي ؟ تريدين تجلطيها ؟
ملِكه : ارگصلك وما تضربني ؟
كضم شفايفو يحاول يخفي ابتسامتو
دفعني على حايط مستغل الفرصة
_ راح ابوسچ براحتي اذا ادفعيني دفعه
هيچ بسيطة ابسط منها ماكو اصيح
امي اخليها تلزمچ هين تگضي بيچ التوبة .
ملِكه : اذا تبوسني اخليك اطلگني .
بيرغ : يمااااااااااا .
سديت شفايفو قبل لا تسمعو
ونزلت راسي اعصر بيدي
ملِكه : بوس براحتك بعد انا ملكك .
طلع كلينكس من جيب التراك يمسح بوجهي
من الطحين شمرها بالگاع وبعد ما اتذكر شي
مدري البوسات منين تچي وحتى ما اگدر اتنفس
واستاذ وارث يحمي ظهرو حتى اخو ياخذ راحتو
وارث : كــافي دوختونااااااا كل واحد يفوت
على غرفته وبخلصناااا اريد انام ساعة
واطلععع للشغل نفسسس ما اسمع .
بس هدأت اصواتهم شالني المكسر المضروب
ابو راس المفتوح روغان البرررغي بين ايدو
عبالك زعطوطة بيدو وفتح الباب صعدني
ومستغل الفرصة الدرج كلو يبوس
اول ما وصلنا للغرفة كمل تهديداتو
بيرغ : يلة مثل الشاطرة لبس مشلح للرگص .
_ لا خلصنا بعد مو بستني .
_ ترگصين اسكت ما ترگصين وروح ابوي اصيح امي .
_ صيحها عبالك اخاف منهااا .
_ تمام اروح ابلغها منو ضربها بالسجين
ومنووووو خوفها بهل ليل يريد يموتها .
ملِكه : ما اريد اموتهاا بس خوفتها
لأن هيَّ والله ذاك اليوم ملختني تملخ .
بيرغ : اخذتي حقچ ؟
_ اي ارتاح گلبي .
_ عجل ريحي گلبي رگصي يلة .
جريت دشداشة عبالك جلد بارد لون اسود
بس تصير حصر على جسمي
وردنها يضب على ايدي ، جر شال من شالاتي
لف خصري شاطر بهل سوالف متمكن متمرس
وراح گعد على تخم فاتح ايدو اثنينهم عود
هوَ ملك زمانو الروغان الخايس ابن الخايسة .
شغل بتلفونو ” هزي هزي” هاي الأغنية
الخايسة الجايفة مثلو واشر بيدو ارگص
ملِكه : عادي نطفي انارة الغرفة استحي .
بيرغ : ترگصين عمياوي .
_ شكو بيها .
_ لا ارگصي هيچ .
_ بيررررغ .
_ اهوووو يلة عمي طفي بالله نشوف الحجة .
طفيتو وصار الأضاءة خافتة وبس صوت انفاسو
والأغنية وخجلي مسموعات، بقيت مقابيلو مثل
الصنم ما اگدر استصعبها اول ما تمايلت
نزلت دموعي وشهگت شهگة من كل گلبي
فز يمشي سريع شغل انارة المكان ضميت
وجهي بيدي من اجه اتجاهي يرفع براسي
بيرغ : شبلاچ يول ؟
_ اني مو رقاصة والله ما اگدر .
شال التلفون شمرو من التخم وسحبني
من ايدي گعدني وباس راسي مو راضي على نفسو
بيرغ : انا زلمتچ مو عيب ؟ وهم ما اريد بعد اسف .
ملِكه : تقلل من كرامتي .
بيرغ : لااااا يمعودة والله لا مو رگصت انااا
شنو قللت من كرامتي ؟
ملِكه : اي .
_ شنو اي ؟
_ من رگصت انتَ .
_ اي ؟؟
_ قللت من كرامتك ورجولتك .
فرك وجهه حيل تراجعت للخلف اكثر خايفة
سحلني من ايدي وگفني على حيلي وصاح
بيرغ : انا گ***** اذا ما ارگصچ اليوووووم .
ملِكه : حشاك حشاك مو قصدي .
بيرغ : ارگصي لا اصيحهااا وانا وياهااا
نمردع راسچ تمررردععععععع نبطنش بيچ .
ملِكه : الله لاااااا يوووووفقك .
بيرغ : منوووووووو ؟
_ لساني .
استسلمت وهزيت خصري درت وجهي حتى
ما ادحگ بوجهو واخجل حاولت اتمايل واهز
واتذكر نفسي قبل لا اتزوج جنت ارگص هواي
ورگصي حلو .
تمايلت بدلع مو متعمد ، هزيت بخصري بخفه
فتحت شعري انفتح على طولو سمعت شهگته
انسدل شعري على اكتافي يحضني بخصري
من اتمايل ، سرقت بنظراتي اتجاهه عيونو
نطت برغبة وجسمو ينتفض برجفتو
وكفت لثواني رفض ومن عقلو تعصب صاح
بيرغ : كملي ، كملي وعذبيني كملي .
حسيت عيونو تبث حرارة ورغبة
كملت على نمط النغمات بس متت بدمي
نظراتو تمشي على جسمي وميلاتو
خطيت بثقة ، وأنوثة وبكل حرية ملت
نص جسمي وهزيت شعري بدلع
حرك ايده بالهوا ينطي أمر
_ لا توگفين ابد ملِكه دوخيني اريد اظل دايخ .
جمد كل جسمي من اقترب ونزل راسو برگبتي
يشم عطر شعري هيمان ، حاضن خصري بيدو
مو بعنف لا بهدوء مبالغ بي حنونه لمساتو
تنهد بضياع خايف يخطي خطوة بعد وانفر منو
صار يمشي اصبعو على كامل منحنى ظهري
قرب شفايفو من اذني همس بصوت يرجف
بيرغ : ضيعتيني بس بأرادتي ما جبرتيني .
بــس فجأة انگلب كلشي بصرخة ام وارث
” يبووووووووو يبوووووووووو ”
نفض روحو وفك الباب وعيونو توسعت بخوف
وكأنو يحس راح تصير مصيبة ركض من سمعها تگول
_ يبووووووو ولك يمه وارررررث بيررررغ
همام سهممممممم اركضووووا وينكممممم .
بيرغ : شصايرررررر ؟
البيت كلو دخل انذار رعب وخبصه ما بعدها
خبصه بعد ما كملت وگالت بعالي صوتها
ام وارث : امك بيرغ امك لا صوت ولا نفس من الهبطة .
مُـرجانـة …
شمرت روحي على تخم وبعيوني الدمعة
بعد ما خلصنا انا ونقش من خراب
الأخشاب والكزاز والمصايب
الصايرة بالبيت بعد عاصفة الشيخ ضـلـيل .
نقش : هاي اول مرة انظف خراب عصبيته
كل مرة اطيح براس عفاف ودلال يمه
بس تجي امي اگول الها ممنوع تخلي
يتخبل هنا ببيتناا خلي يتخبل هناك بنص بيتهم .
مُـرجانـة: هو مخبل مو بعقله .
نقش : انجبي لچ .
_ والله اضربچ لا ادافعين عليه مقابيلي زماله .
_ لااا تغلطين اختچ الجبيرة انااااا .
_ اختي النعاله الخايسة مال عمها .
عفتها وصعدت دخلت سبحت وطلعت قفلت الباب
من دخلت الغرفة صكيت بمكاني من شفت التلفون
بيد نقش انبلع لساني انوب التلفون يرن بيدها
نقش : وارث وقلب احمر مُـرجانـة عفية عليچ .
مُـرجانـة: هذا هوووو كاتب والله .
نقش : تلفون سري .
_ هو هذا هو و… وارث گال بقي عندچ .
شمرت التلفون عليَّ واشرت بيدها تستعجلني
_ جاوبي حتى تغلقي واخذه التلفون عندي .
تحمحمت وگعدت على سرير ورديت بخجل
_ روح وارث بعدين نحجي لا تخابر بعد .
وارث : لحظة لحظة بس لحظة وين .
حكيت راسي خفت لا يگول نحلة ودلوعتي
والله نقش تگص راسي هاي من تعصب ما تتفاهم
مُـرجانـة : شبيك عمو ما تفتهم بعد لا تخابر .
وارث : اه عموو ؟ ياهو عموو ؟
كفختني على راسي وگعدت بصفي همست بأذني
_ استعجلي ام الموبايلات السرية .
مُـرجانـة : اني مو ام الموبايلات السرية هذا هوووَ .
حجيتها بصوت مسموع لقطها وارث گال
_ منو يمچ ؟
_ شسمها اختي نفسيه .
_ منو ؟
_ نقش .
تحمحم وسكت دقايق وطلب مني بأحترام طاغي
وارث : انطيني نقش مُـرجانـة .
قدمت التلفون دفعته خجلانة
_ ما تقبل تخاف منك .
عضت شفتها وفتحت عينها جرت التلفون وهمست
نقش : السلام عليكم .
وارث : وعليكم السلام خوية شلونك
الحمدلله على سلامتچ اختكم نورا
ربنا ما يشوفكم بيها مكروه .
نقش : تسلم ولا يشوفك بأحبابك ، بس شلون عرفت .
وارث : جنت بالمستشفى ودخلت الغرفة العناية شفتها .
نقش : نعم !! .
وارث : مثل ما سمعتي اختي ، الحمدلله تعدت مرحلة
الخطر وان شاء الله كم يوم وترجع تنور بيتكم .
بقت تباع بعيوني وانا صفنت بعيونها بثول
نقش : اشكرك .
وارث : خوية بالبداية اعتذر خليتها ادخل
التلفون لبيتكم بدون ما تبلغكم بس ردت اطمئن
عليها بين فترة والثانية ، بس الشاهد الله هي
ما غلطانة ولا تعرف بهل اشياء بعد هي اختچ
وتعرفيها مُـرجانـة بريئة وماعدها زايدة ناقصة .
نقش : بس امي اذا تعرف ما تقبل .
وارث : ما تعرف وهل موضوع سر بينچ
وبين اختچ وانتِ من واجبچ تحمين سر اختچ
انا الله يشهد عليَّ رايدها بالحلال نيتي مو لعب .
نقش : بس .
وارث : راح يقبلون لو تمر سنين انتظر حتى يقبلون .
ظل يحجي وياها يحاول يقنعها بنيته والتلفون
الى ان رجعت التلفون وسدت الباب علينا وطلعت
وارث : مُـرجانـة .
_ ها .
_ انا بوسط بغداد .
_ قريب .
_ اشم عطرچ بيها .
_ ها .
_ احاااااا مُـرجانـة احاا .
تلمست خاصرتي متألمة من ضربات تمار
وفتحت گلبي بدون حواجز شكيت وجعي
مُـرجانـة : انا تعبانة تدري .
_ احس بيچ .
مُـرجانـة : تمار ضربني ورجع يخنگني وضربني حيل
ردت اموت بيده وامه موتت نقش من الضرب
شاهين خلصني من ايده خطية لو ما شاهين اموت .
وارث : من انعل شاهين لابو ابوووو شاهين
من احترك ضـلـيل واهل ضـلـيل وعشيرتهم كلهم
هل سفله المنحطين القنادر بقندرتي ادوس عليهم
واولهمممم ضليل الكلب ابن الكلب .
خليت ايدي على شفايفي مصدومة من رد فعله
وعصبيته ما مستوعبه كلامه هاي اول
مرة اسمعه يتلفظ هل الفاظ مقابيلي
وارث : لا تقفلين الخط ابقي راح اسوي كتم ثواني .
مُـرجانـة : تمام .
خليت التلفون ورحت بدلت ورشيت
عطر عدلت شعري وفزيت على صوته
وارث : نحلة .
_ وين رحت .
_ خابرت خلصت مكالمة مهمة .
وارث : اتمنى بس اشوفچ .
مُـرجانـة : واني هم .
_ شنو ولچ .
_ اريد اشوفك .
وارث : اجي اشوفچ هسة .
_ نقش تموتني .
_ حلفتچ بالله عليچ الحسين .
_ والله ما تقبل والله .
_ انتِ تقبلين .
_ اي .
_ قنعيها حلفتچ بالعباس .
طلعت من الغرفة بيدي التلفون ورحت على نقش
شفتها تجهز اكل يمكن جوعانة وكفت وگلبي
يدگ سريع خليت اصبعي بين شفايفي وهمست
_ عادي يجي وارث يشوفني .
نقش : انچبي واكلي خـ*** انتِ ويااااه .
حجتها والتفتت شافتني فاتحة حلگي وعيوني
وتلفون بيدي ، وجهه انعقچ بخجل
وهوَ حتى بعد ما يتنفس .
لطمت على وجهه وبدون وعي صاحت
نقش : كل الهلا بي خلي يجي .
لطمت اني هم وياها والحرارة صعدت براس
مُـرجانـة : وارث .
_ ها .
_ وين رحت .
_ خليها سكته .
_ تعال .
سديت الخط لزمتني نقش ملختني وانا
فطست من الضحك وبنفس الوقت خجلانة
من خلصت وتعبت همست وتلمست وجهي
مُـرجانـة : اني حلوة .
_ تخبلين .
_ راح يجي الخاطري .
سحبتني من ايدي صعدتني وطلعت علبة
وگعدتني على چرباية رطبت ايدي ونظفت رجلي
خلتهم يلمعون تگول تبين نظافة البنية من اقدامها
سوتهم ورديات وحتى ايدي صاروا كلش ناعمات ورديات .
سمعنا اني وياها صوت جوا ، شمرت التلفون
ونزلنا على صوت امي تحچي بالتلفون
من شافتنا گعدت تعبانة ، ركضت نقش جابت ماي
شربتها وگعدت بصفها حضنت ايدها
نقش : ليش رجعتي ننوس بيها شي ؟
غـاليـة : بالعناية ما يقبلون ندخل منا لباجر يگول
الدكتور ، والمستشفى صارت ديوان كل ربعهم ملتمين .
شربت ماي خلصت كل الگلاص وكملت
غـاليـة : شاهين هو وابو اختفوا وضليل
منا صاير نار على ننوس هسة تخبل رسمي
هجموا بغداد هجم عليهم فص ملح وذاب الرجال وابنه .
بهتت وانا انظر بعيونها احتاريت شلون اتصرف
عفتها وصعدت شفت التلفون يرن
مُـرجانـة: وارث امي رجعت للبيت .
وارث : اي شفتها من فاتت .
مُـرجانـة: روح بعدين تعال .
وارث : لا انتظر .
سديت الخط بوجهه من نقش صاحتني
شمرته تحت السرير ورجعت نزلت
شفتها تصب اكل جرتني مو ايدي
_ تعالي نخليها تاكل من تشوفچ تفرح .
هزيت راسي شگد مقهورة وزعلانة منها
بس انقهر من كل گلبي على امي ، رحت وياهن
گعدت ماقبلت امي تاكل غير القليل وبطنها حيل
اذتها خلصتها تذب من راسها ، شلت الصينية
ونقش شربتها علاج ، بقيت يمها زعلانة مقهورة
من كل گلبي بس رحت بست ايدها وطلعت
غسلت المواعين ورتبت البيت كله .
صار اليل شعري رطب صار ثگيل على راسي
تعدت الساعة 10 بليل طلعت مقش وهمست
_ لا تطلعين صوت امي نامت لا تفز .
عفتها وصعدت فوك شسورت شعري
صعدت نقش ايدها على شفايفها
نقش : اگلج صعدت اشر الملابس بالسطح
وشفت سيارة عالية بالركن ويمكن لمحت وارث .
مُـرجانـة: عزززا نسيته من الطهر گال انتظر .
نقش : شگد عيب وجال شكبره تنسي
شاتلته بالشارع من الظهر لحد هسة تخزينه امداچ .
طلعت التلفون اضرب على خدي احتار شلون
اطمطم الموضوع ، اول ما خابرت رد صوته تعبان
مُـرجانـة : وارث هلو .
وارث : نسيتيني مو ؟
_ ها ، اي .
_ اويلي على گلبي شلون ورط روحه .
_ اسفة .
_ لا عادي شغل عمل ورانا .
_ روح روح ارتاح نام .
_ وبدر الهواشم ما اتحرك من مكاني اذا ما اشوفچ .
بعدت التلفون من اذني وهمست لنقش
_ يگول وبدر الهواشم ما اتحرك اذا ما اشوفچ .
نقش : گولي اذا يشوفوكم يذبحوچ ويذبحوا .
هزيت راسي ونقلت كلامها :
_ وارث نقش تگول يذبحوني ويذبحوك .
وارث : امان أمنت كلشي بس اريد اشوفچ .
_ نقش يگول أمنت كلشي شبيچ .
وارث : خليها بس تأمن البيت وطلعي اشوفچ .
نقش : بس خمس دقايق .
وارث : دقيقة بس دقيقة .
نقش : تمام دقايق وترجع تخابرك .
جرتني طلعت دشداشة لون وردي فاتح
لبستها خصرت جسمي وطلعتني لوني ابيض
وردي بلونها عبالك صرت
گعدتني على كرسي مقابيل المرايا
جرت عيوني بكحل ابيض ورسمت شفايفي
بحمرة خفيفة وخلت وردي على خدودي
وطولت رموشي خلتهم يطخون بحاجبي
حتى حاجبي رفعته سوته عبالك سجّين حادة
طلعت عطر مبين غالي من شكله رشت هواي منه
وجرت الكاوية مال شعر سرحت شعري صار
عبالك ماي هيچ صار شكد حلو يلعب على اكتافي .
نزلت واني وراها شافت باب غرفة امي مسدود
سحبت ايدي انزل وعظامي اطگطگ اطلع صوت
دارت وجهه كفختني على راسي
نقش : شبيچ اطگطگين .
مُـرجانـة: گبر غير عظامي اني شكو ؟
كملت الدرج باوعت على ساعة ب11:47 دقيقة
البيت كله هدوء بس هوسة بگلبي وبعقلي
مشيت على كاشي على حضي يطلع صوت
بقيت اخطي على اصابيعي ونقش شبعتني كفخات
طلعتني للگراج ومن كل عقلها قفلت الباب
حتى اذا تگعد امي تگول محد برا قفلت البوب .
صرت ورا الباب گلبي يدگ دگات ما تنوصف
خوف على اشتياق ولهفة اقابل الجنتل مان
خابرته وفتحت الباب قليل شفت سيارته
_ تعال وارث فتحت الباب .
اول ما نزل بدون شعور من كمية الفرحة
صرت مثل الفراشة اكمز بمكاني واصفگ
نسيت الدنيا كلها حتى گلبي وقهري اختفى
صرت اسمع صوت خطواته تقترب وشكله
بلش يتوضح ما اعرف ابجي لو اضحك لو اركض
لابس اسود بأسود اسنانه لونهم ابيض بارزات
وعيونه تجدح بالظلام بس حنونات نظرتهم بيها امان
ايده ماسكه بوكي ورد وردي ، وايده الثانية مليانة
اكياس كارتونية كبيرة بيها اشياء ماعرفت شنو .
فتحت الباب اكثر نزل الأغراض اول
ما اخذت البوكي رفعني من خصري
حضني بكل قوته يشتم برگبتي بكل حيله
عبالك مخنوگ ورجع گدر يتنفس
حضنه دافي دافي ما ينوصف بكلمة
مرينا قريب من التبريد طالع القفص
مالته خليت الورد عليه حررت ايدي وطوقت
رگبته حضنته بكل قوتي وبلا وعي جنت
اريد اشم عطره واشبع منه احس
اشتاقيت لعطر هل شخص .
وهو على نفس حضنه نزلني بكل تملك
على ميز صغير بالگراج رفع اديناته اثنينهم
من جسمي حضن وجهي يبوس بخدي ويهمس
وارث : بعد ماكو اصبر لازم استغل الفرص
ما اضيعها مثل الفرص الضاعت قبل مو ؟
بدون فهم رديت بخجل وانا بين ايده
احس من فرط رجولته اصير طفلة صغيرة
مُـرجانـة : صح .
_ استغل الفرص ؟
_ امممم .
_ انصهرنا يا بغداد نداء للبصرة .
باس خدي وصعد على راسي يبوس بكل حيله
ويرجع يحس على نفسه من يشوفني تأذيت
من قوة لمساته يسحب ايده وما يقاوم يرجع
رفع راسي من فكي صفن بوجهي
وارث : شصايرة ؟
_ حلوة .
_ سحلتي زلمة مشورب الناس تطلبه بالاسم
وما يريدهم ، خليتي يطر طريق الغربية
لبغداد وينتظرچ برا ينتظر كلمة منچ وتگليلي حلوة ؟
ملت راسي وبدلع مو متعمد همست
مُـرجانـة : ولي تؤبش ئلبي شو رجال .
ضحك بعدم تصديق فاتح عيونه وجهه كله يضحك
رجع سحبني بحضنه يحضن بيه مو مصدگ
مُـرجانـة : نقش تراقبنا من الشباك .
ابتعد شوية عبالك حتى ما سمعني
طلع علبة صايرة لونها زيتوني فخمة
قفلها ذهبي بيها مفتاح صغير قدمها بيدي
اخذتها منه بكل حماس وفتحتها ايدي ترجف
اني محتارة بيها اريد اشوفها وهوَ يبوس بخدي
طلعت قلادة ذهب حجمها وسط بس ثگيلة
مرسوم بيها تخطيط مال قلبين مو قلب واحد
سند ايده وحدة منا والثانية مناك طوقني
وبصوت حنون بقمة ذوبان وارث گال
_ هذا رسم تخطيط گلبچ وهذا الثاني تخطيط گلبي .
رفعت عيوني اريد اطير بس هو مثبتني بيده
باس انفي وضاع بوجهي بگد ما يركز
فر القلادة وهمس قريب من شفتي : اقريها .
ركزت بالقلادة محفور بظهرها عبارة مكتوب
” تذكري لو سكتت كل گلوب الدنيا
عن حبچ ، گلبي يظل يدگ بحبچ ”
خليت اصبعي على صدري أشرت على نفسي
مُـرجانـة : تحبني ؟
وارث : لا العب عليچ .
برطمت شفايفي بزعل وخليت العلبة على صفحة
كتفت ايدي على صدري بزعل ودرت وجهي منه
عض شفايفه وجرهم يبوس بيهم وثبت وجهي
بين ايده حتى ما يرمش بعد رفع اصبعه وگال
وارث : وحق العباس احبچ اي والله احبچ
واريدچ واحارب لأجل عينچ والحسين دايخ بيچ
والحسن امشي بس جسد روحي عندچ
وعلي اول مرة بحياتي احب گلبي يحبچ
بوية وعلي اريدچ هي گوه ارررريدچ اذبحهم واخذچ .
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.