رواية الموروث نصل حاد – الفصل العشرون
♛ 20 ♛
وآنا الغبيه من الخوف فتحت الشباك اريد اسلم
السلاح البيرغ هجم واحد على شباك ضربة
بيرغ بوكس ودفره بكل قوتو والثاني يمد بيدو
على يده ركضت على مجرات افتح بيهن بعدني
ما حفظت اغراضهم لمحت چاكوك بالخانه مال سنگ
شلتو وبكل قوتي ضربت ايده واصابعه
سمعت صوت كسر العظم .
عطت عياط ملخت روحي وهذولي
يترادمون همَّ وبيرغ يريدون يعرفون
منو ومنو بالبيت كل تفكيرهم مُـرجانـة
بالبيت وبيرغ يضرب بيهم ويردون
يضربون بي الجوارين كلها صعدت
بالسطح النسوان والزلم دخلوا
عليهم يدفعون بيهم من عرفوا
محد بالبيت غير رجال واحد
وصاروا يحامون البيرغ ، فكيت الباب
من وگع بيرغ بالگاع سابح بدمو ينزف
نزيف موت من راسو وجسمو وقبل لا يفقد گال
_ رمز تلفوني 565656 خابري اخوتي .
وگع بالگاع راسو انطب طبه عصرت گلبي
ملخت روحي اصيح بالجوارين وبعدهم
يدفعون بهذولي السفله اريدهم يساعدون
بيرررغ بيرغ ماااات مااااات بيرررغ
دخلت اصرخ وجع بگلبي وبجسمي
امشي واتمنى هذا كلو حلم ياريت
اصحى منو اخذت التلفون الشاشة
مكسورة ويطلع خطوط اخضر واحمر
وازرگ لطمت على وجهي واحاول
اشوف وعلى ذاكرتي هذا التلفون منا افوت
على جهات الأتصال الاسماء مو واضحة بس
البحث واضح ونص الاحرف تبين ضغطت
على حرف الهاء وطلع اسم همام خابرتو
ونزلت اركض على درج اعدل بشالي أتستر بخجل
قبل لا انطق بحرف وصلني صوت همام يصرخ
همام : ملِكه احنا قريبين ملِكه لا تخافين وصلنا وصلنا .
_ موتوا مات بيرغ مات بيررررررغ همام تعال .
_ لاااااا لااااا ما بي شي اسعاف بالطريق
مايموووت سبع هذا سبع ما يموت .
اول ما طلعت المنطقة انهزت بأصوات النجدة والإسعاف
لزمت ايد بيرغ وهمست وانا اناشغ
_ ابريني الذمة حاولت احميك بكل قوتي
والله مثل ما حميت ابوية منك حميتك .
تهسترت من منظر الدم وعيونو انتفخت كلها
ملابسو سبحت بالدم رفعوا آهل الإسعاف واخذوا
لازمين براسو ويصيحون نبضو ضعيف
دگات گلبو مو منتظمة حالتو حرجة ، بعدهم بالباب
ولمحت سيارة همام شمر سَــهم روحوا يدگ على راسوا
من شاف بيدغ وبعالي صوتو يصيح
_ ذبحوا اخوووووووي بيرررررغ
خووووية لا تعوفني لاااا تعوفني مثل ابوي وامي
اريدكم اناااا لاااا تمووووتون لا تعوفووووني .
همام ايدو على راسوا واگف رجلو بعد ما تعينو وگع
على ركباتو يهز بجسمو زدت بالبچي على منظرهم
الجوارين يصبرون بيهم ويبچون واسمع واحد من
الزلم برا همس الواحد ثاني يبلغه
_ من صعدوا بالسيارة سمعت الممرض گال مات خطية .
صعد همام وياهم بالأسعاف وسهم دخل للبيت
حتى ما اظل وحدي سد الباب وگعد مستند عليه
يبچي بگل حيلو مصدوم بدم اخو ، رن تلفونو رد يصيح
سَــهم : رجعهاااااا وارث رجعهااااا اهلها يريدوها رجعهاااا .
سكت يمسح بعيونو ويستمع ويهز راسو لثواني وسد الخط
ملِكه : هذولي اهل مُـرجانـة لو انا غلطانة.
_ اي هذا عمها شيخ ال ضـلـيل اكبرهم هو دافعهم .
_ يريدها ، يموتها ؟
_ اي ، من البارحة دز زلم وبلغ خلال اربعة وعشرين ساعة
اذا وارث ما رد مُـرجانـة يموتون احبابه ، وارث اطمئن
لان عنوانه ما معروف طلع هذا ضـلـيل مو هين شلون
كشف العنوان ودخلهمممم بهل سرعة شنو من بشر هذا .
مُـرجانـة..
ثار گلبي عقلي فحم وانا انزل على درج اسمعهم
يتصايحون وتراث لازم الباب مايقبل وارث يطلع
وشيخ فؤاد يدفع بوارث وينتر بعالي صوته
شيخ فؤاد: لا تتهور ولك بوية وين رايح للموت برجلك .
وارث : أواجه شيخهم اشگ حلگه اجلطه بمكانه .
_ يهدر دمك ولك بوية يموتك .
_ يهدر دمي ولا يهدر دمها ما اسلمها
واخووو زينب فلا اسلمها ، متعمد يضغط عليه بأخواني .
اجت ايليا حضنتني بقوة تمسح على ظهري
من شافتي گعدت على درج رجلي بعد ما تعيني
وارث غافلهم وطلع وصل للباب صاح بي الشيخ
_ اذا تروح يا وارث دخيلتك ما اخليها عندي وارجعها .
وارث : هي مو دخيلتي هاي حرمتي .
_ ما علنت زواجك روحتك غلط بغلط
ضـلـيل قافل على بنية يريدها .
وارث : انطي نعال هل نعال لو
يمووووت وبدر الهواشهم لو
يموتنا بوووية لو يموت ماترجع .
سحبه من ايده ودفعه بنص الگراج يفهم بي
شيخ فؤاد : اسمع مني رجعها و.
وارث : عاقد عليهااااااا انا عقدت .
شيخ فؤاد : راح اضربك والله اسمعني ، يگول يردها
لان ما معترف بهذا عقدك ومن تردها نروح جاهات زلام
نتقدم ونخطب البنية وتطلع من بيتهم عروس بيده يزفها
اذا تريدها ومشتريها تتنازل لخاطرها اخذ موكب
زلم وتقدم رسمي حتى ينطيها الك ويردون اعتبارهم .
وارث : شنو هل لعبة شنووو معناها ؟
شيخ فؤاد : مايريد تطمغ بيها كلمة دخيلة يگول البنية
بنتي وانا ابوها زفتها تطلع من بيتي يريد كون
الغربية بكبرها تسولف بعرسها .
وارث : هذا جذاب اكو شي براسه يريد يموتها
اغتاظ لان ما احترمته مُـرجانـة ولا انا احترمته من اجه .
شيخ فؤاد : صح كلامك انا وياك وبعد
حسب كلامه اكو سبب اكبرر مبين من اصراره .
وارث : وانا اشمر البنية للموت وسفه على شاربي .
رجع دخل للبيت عدلت إيليا شالها ونزلت دشداشتها
سحب ايدي صعدني فوك صاح على امه تلم كل ملابسنا
دخلت اهتز اخاف اتنفس ويضربني بگد ما عصبي
جر عبايتي شمرها بصفي وعاط بصوت مشتط غضب
_ لبسي يلة بسررررررعة يلة استعجلي .
ارتخت ايدي بعد ما اسيطر الزم بيها منا يطلع
ذيالها افر بيها تصير ايدها ماكو راسها
نشغت بعلو صوتي من يخابر وماكو جواب
بعدها رد سَــهم طلع برا يهدد بيهم ورجع فات
_ بعدچ ما تلبسيهااااااا خلصيني .
خليت ايدي على رگبتي اختنگت حتى بعد
ما اگدر احچي لساني ثگل وعيوني عميتها بالدموع
ضربت على رگبتي من انتظر الجواب وگفت خايفة
تقرب لزم ايدي مرعوب فاتح عيونه
وارث : مُـرجانـة احچي شبيچ .
_ خـ .. خا.. خايفة هسة البس لا تضـ.. تضربني .
رفع ايده اثنينهم وملامحه رخت يحاول يفهمني
_ لالا مـا اضربچ ليش اضربچ اگلچ بدلي .
_ مو مـ.. مو هاي ماتلبس العباية تنعوج .
_ لو تذبحيني ما ارفع ايدي عليچ مُـرجانـة .
_ لا تعصب .
_ راحت كل العصبية راحت لا تخافين تفقدين النطق .
مُـرجانـة: والله اذا ترجعني عمي تمار اولهم يذبحني
مرة خنگني من رگبتي ويضرب بطني بوكسات
لان عاندت وو.. وخفت اروح من صاحني
صعد راد يموتني استغلها امي راحت تولد ننوس
ماكو وضليل وياها والبيت فارغ ردت اموت بيده .
انا احجي اخذها من ايدي عدلها اخذتها لبستها
طلع للحمام يغسل بوجهه ورجع اخذ ايدي
ونزل مستعجل يعدل بالسلاح خلاني
وراح برا امه تتوسل بتراث يأثر عليه
حتى مايروح ، صاح بصوت علينا
سلمنا على كل وطلعت ايدي بيد امه
صعدتني وراحت گعدت بصفه طلعنا
المحافظة وظهروا روحهم اولاد الشيخ فؤاد بالسيارات
يمشون ورا سيارته وشيخ فؤاد متشخص بسيارة تراث
رفع وارث ايده اشر بمعنى شكو وخابرهم منفعل
_ وين وين اوجعوا تراث رجع ابوك واخوتك .
تراث : خاب هش هش اذا ما اخليهم يصيحون
الغوث غلطانين من علنا بالموروث ما انحسب على
زلم روح انطلق وارث روح انا واخوتي بظهرك .
سد الخط التفت وارث على امه وصاح بقهر
_ شبيهم مخابيل راح يطلعوني من طوري
يزيدون المسؤولية والخوف عليَّ ، بالله اذا صار بواحد
شي شلون شسوووي بروحي مو كافي بيرغ راح بيها .
ام وارث : عوفهم يچفتون جدامك يمه طولك بطولهم
تنومس بيهم حتى تنهي وتأمر وتعرف بظهرك زلم تاكل
عدوك لو صحت اخ خوية يخدموك .
وصلنا للغربية رجعت نفس الخنگة والقلق خليت
راسي على ظهر الكرسي مال وارث اريد احس بقربه
اخاف يبتعد يملني لو يرجعني ، نزلنا البيتهم من الباب
عبالك تنتظرنا ام بيرغ هي شافتني لو عبالك شافت جني
سَــهم لازمها وجبر موجود يدفعون بيها وهي تصيح
_ بعدهاااا عندوو يا بعدها يولووووو موتوا ابني
وين عمك خلف تعال شيّخ ادحگ بعينك ابن اخوك
مسترخص دم اخوانو ولازم ايد بت الذبح اخو .
طلع خلف واخوان خلف بعد اثنين كلهم كبار
واولادم كلها هنا رفع خلف ايده يشوفها الوارث
_ انتَ بعقلك دم اخوك تارس ملابسنا والبيت
هاي فوتتنا من المستشفى اخوك موات
لو يصبح عدل لو يندفن بالترابة والحبل على جرار
شيخ ال ضـلـيل ما ناوي على خير وهساع دز مهلة
للصبح اذا ماترد البت يگضي ولدنا كلها .
تجاهلهم ولا كأنما سمع منهم عبرهم وانا بيده
دخلنا وهاي ام بيرغ افتري من الاستقبال ركض
وشمري روحچ على درج تصيح
_ بنت المجرمين ماتدخل ولا تصعد برررا تطلع برا .
خلف : رجعها اشمرها منين ما اجتي لو تردها بيد
عمها حتى تخلص من هل فتنة والمشاكل الصارت
لا تكبر وبعد مانگدر نلمها اسمع مني لا تندم .
هاي اعترضت طريق وهذولي منا يخوفون
انعصر عصر من القهر حسيت بالرخص
متواجدة بنص بيت محد حاب وجودي
بجيت واسحب بيدي منه صحت بي
_ عوفني رجعني ما اريدهم اريد اطلع .
املخ ببدي منه هو متمسك بيها وصافن
بوجهي غصب عنها جرني وعلى نص الدرج
كلها عينها علينا بصوت مسموع بلغهم
وارث : هذا البيت بيتي بأسمي ملكي
ومُـرجانـة بنت عابد ملكي حرمتي
على سنة الله من ورسوله بأسمي
كل ما املك هو ملكها هذآ المتعارف معناها
اذا هيَّ تقرر تطردكم هسة تطلعون برا
بيتها بلا صوووت ولا نفس واحد تطلعووون
ما اريد اسمع صووووتكم كتم اريدكم كتم .
عمامة صوفرت وجوههم كمل طريقة يصعدني
درت راسي اشوفها تباع بالوجوه وعاطت بحيل صدر
ام بيرغ : بيمن اشد ظهري واصيح بعد خلص ولدي
وارث خلص على ولدي ، چبيري بالسجون ، والثاني مات .
دخلني للغرفة مالته قفلها وطلع مستعجل يخابر
وسمعت صوت سيارته وعمامه كلهم يتفاهمون همه
والشيخ فؤاد يتعاتبون وياه ، لزمت راسي وسندت
طولي بحافة السرير ضربتني دوخة فرت راسي
ومن خوفي اريد استفرغ معدتي تگلب ، جريت
الشال من راسي ونمت على مخده اعصر ببطني
تمغصني غفيت عيوني ثگيلة اسمع اصواتهم ماعندي
طاقة اسمع بس اريد كل هل مشاكل تخلص ويجي يوم
وارتاح بس ماجنت اعرف اكو اسوء من هل ايام بأضعاف .
غـاليـة ..
نظري غوش بس سمعت الإخبار من عفاف والصاير
عفاف: شلون ضـلـيل غير رأيي وتخبل عليهم
كلنا متعجبين لان الفترة الماضية غلس حتى
من شبابنا يفكرون يثورون يهديهم .
رجعت اغسل بوجهي وطلعت من الحمام
غـاليـة : وهسة ضليل وين ؟
_ بالديوان توا رجع من الديوان الرئيسي .
_ مافات للبيت اريد احچي وياه ؟
_ من يفوت عود اصعد ابلغچ .
عافتني ونزلت ماتحملت جريت شالي
ونزلت وياها بعدني على درج وتمار ضحك
تمار : بنت ذياب ماعرفتي تلعبيها صح هل مرة
خسرتي وراح يحقق مبتغاي راح نغسل عار بنتچ .
امه صافنه منتظرين مني رد فعل عبرتهم
ورحت على باب الاستقبال حتى اشوف الديوان
بوضوح لمحته من بعيد يشرب استكان چاي
بس كمل رجع راسه على ديوان وايده خلاها
على عيونه مبين متأذي من راسه
نقش : يمه شلون شنسوي ؟
غـاليـة : صيحي شاهين اريده اذا تگدرين .
عافتني وراحت دقايق ورجعت هي وشاهين
من التفتت شفته متحزم حزام والسلاح ترس
كف ايده من نزلت عيوني على ايده تحمحم
_ جنت وياهم ؟
_ لا شيخة جنت بالديوان الرئيسي .
_ شصار اخر شي .
_ ضغطنا عليهم من كل المحاور حتى يرجعوها
بس هذا الموروث بعده مقاوم حتى ما ظهر روحه .
سكت بعدها كمل مرتبك
شاهين : اخو حالتو خطرة بالمستشفى، والبارحة
بليل رجعنا عليهم نضغط ، ورجع تصاوب واحد
ثاني ناس تگول من اولاد الشيخ فؤاد وناس
تگول من اولاد عمهم وعرفنا الموروث رجع
مُـرجانـة من البصرة على بيته وحاوطنا
المنطقة حتى مايگدر يطلعها وشبابنا
يريدون يدخلون عليهم بس مترددين من دوست
بساط وغلط ندخل بيت كلو حريم وارث أتعمد
يخلي البيت بس حريم حتى محد يتجرأ يدخل
عليهم ويحميهم من بعيد وبس نفوت
الله واعلم شنو مخطط حتى يغدرنا .
عفته بعده ما مكمل ورجعت صعدت ماعندي
كلام وصدري اختنگ حتى نفس ما گدرت اتنفس
ويوم يجر يوم ومر اربع ايام بين صد ورد
وانتهى أنتظاري بموقف بعمري ما توقعت يصير
تدهورت حالتي لا بقت صحة ولا نفسية ولا مقاومة
اشرب بعلاجي واسمع أشكال الأصوات بالبيت
عدلت نومتي من دخل ضـلـيل الغرفة من بعد هل
ايام شامخ رافع راسه بكل ثقة ولا ابالي ولا مهتم
تقدم گعد على طرف السرير من جهتي ما اشوف
وجهه بس ظهره، شغل جگارة وبقمة البرود گال
ضـلـيل : شلونچ بنت ذياب ؟
مارديت اكتفيت اسكت انتظر يكمل
وگلبي دمام يدگ ، هز راسه من ما سمع
الجواب جر نفس الجگارة وكمل بدون
ما يشوف وجهي يباع على كلشي وما يباع بوجهي
ضـلـيل : صار ايام افكر بحل يرضي كل الأطراف .
غـاليـة : هههههه بعدك تفكر وگلبت
الدنيا والغربية من تقرر شلون ؟
ضـلـيل : مالچ شغل لا تدخلين .
عصرت راسي ونزلته رجعنا للبداية يا قهري
ضـلـيل : مو تكرهين هل بيت وناسه؟
من باجر تعوفين هل بيت وترجعين البغداد
جهزت بيتچ هناك وصار كامل .
غـاليـة : على شنو ناوي ضـلـيل ؟
_ بناتچ تاخذيهن وياچ اريد انتَ تربيهن
واستقروا هناك ، مُـرجانـة كلها ايام وتجي وياچ تعيش
كل هل مشاكل والضغط حتى ارد بنتچ عندچ
معززه مكرمه شأنها عالم شيخة بنت شيخة .
غـاليـة : بس مُـرجانـة ما ..
_ راح تجي لان ناوي اوصل الها خبر انا طلگتچ
_ انا حامل ميصير اطلگني واذا اطلگني يموتو..
وگف متعصب من مقاطعتي وبصوت الغضب صاح
ضـلـيل : دست على عاداتنا وانتِ اول شيخة
تطلع من بيت الشيخ وموقع ديوانه،راح اسلمچ
مفتاح بيت مؤثث كامل بمحافظتچ وبناتچ وياچ
يعيشون والچ مني كل الحماية والأمان والاحترام
وكل طلباتكم ينگال الها حاضر ولبيك .
غـاليـة : المقابل ؟
_ ما طمعان الله كافيني انا ابن خير
ولا طلبت منچ معجزة حتى تستصعبيها
اريد تحبين نسلي وتحافظين عليهم .
غـاليـة : ننوس متعلقة بيك شلون تعوفها ؟
ضـلـيل : كل فترة اخذها عندي هاي معلگه بروحي .
قبل لا يطلع اشر بيده بكل ثقة قويان يگلي
_ لمي كل أغراضكم ما اريد شي منكم هنا .
_ ليش ناوي تتزوج بهل غرفة ؟
– مالچ شغل ، باجر من الصبح يوصلكم شاهين .
راح ونقش فاتت حجيت الصار وخليتها تلم كلشي
يخصنا بهل غرفة ، ننوس ما تفتهم بس تباع
بالوجوه للساعة ب12 بليل دز عليها لبستها تراك
واخذت دبدوبها هو وبطانيتها ونزلتها نقش
يريدها تنام عنده حتى يودعها ، من التعب
ماعندي حيل افتح عيوني بصعوبة اشوف
اسمع صوت عزيزة ونقش بحضنها تبجي
نقش : ما اريد اروح واعوف عمي ضـلـيل اخاف
وحدنا هناك بس نسوان شلون گلبه يطاوعه
امي شلون تقبل عمه اريد عمي اشوف بي ابوية .
عزيزة : ولچ مو مرة گلتي تكرهي .
_ جنت اجهل طبعه عبالي يكرهنا بس طلع
يخجل يعبر لو يبوسنا هذا طبعه بس
اذا صار ويانا شي يتخبل مو شفتي شلون اخذ حقي .
عزيزة : هو وامچ ما يتفاهمون اثنينهم اعصاب
مخابيل نار بنار ماترهم عمه ما يتراهم وياها .
وضح ضوء النهار والكل صبحوا شفت الجنط
عبرتهن ورحت سبحت واستفرغت الحد ما طگ
دمار براسي طلعت منتهية نقش وعزيزة قلقانات
وشاهين على درج صاح بصوت
_ ها شيخة بيچ شي اخذچ للمستشفى ؟
ام ضـلـيل : يمه ارجع اكعد مابيها شي
هي غير حبله وهاي اول شهر لازم تستفرغ .
عرفتها تحجي هي وضليل جريت نفس وفتت
بدلت ننوس وسويت ضفيرة ناعمة عطرتها ونزلت
وانا بعدني على درج شفته گاعد بمكانه
متشخص ملابسه تلمع والسبحة بيده يفر بيها
ما مهتز ولا مهتم وامه من شافتني استغربت
_ ها وين تولين، امشي ردي ما عايزين مشاكل .
ضـلـيل : شاهين برا ينتظركم استودعتكم الله .
ام ضـلـيل : يا يمه وين تروح هي وبناتها ؟
ضـلـيل : مالكم شغل .
بعدنا بالگراج ودخل شاهين هو واولاد عمهم
صاح بصوت هز البيت بكبره ودخلهم انذار
شاهين : وصل موكب هيبة وارث ابن ساجر الموروث .
رجعت البيت وكفت مقابيله وطلبت
_ كافي مو تريده يجي هاي اجه .
_ لا تدخلين .
_ لا تأذيهم راح يأذون مُـرجانـة .
رفع استكان الجاي مترهم مرجع ظهره
ويشرب بكل هدوء مرتاح على اخر عرف
بدخلتهم تمكن منهم وخلاهم يستسلمون مثل ما يريد .
ضـلـيل : شاهين مُـرجانـة وياه ؟
_ ما اعرف عمي تسع سيارات كلها مليانه
يمكن بوحدة منهن مُـرجانـة .
ضـلـيل : حلو يلة نتوكل شتلتهم هواي .
هو طلع وانا ركضت على باب الاستقبال
كلهم بوضوح صاروا مقابيلي رافض يستقبلهم
بديوانه ، دخّل زلمة ترس ملابسه ضخم بطول وعرض
اكتافه يشبه هيبة سـاجر وكأنه مستنسخ عرفته وارث
اخوانه اثنينهم بظهره واولاد عمه واولاد فؤاد
وشيوخ سد الشارع واكفين ساندين هل موروث
تواجهه هو وضليل ، ابتسم ضـلـيل
ابتسامة استفزازية وبصوت عالي يسأل
ضـلـيل : وين بنتي ؟
وارث : بنتك عندك ، دخيلتي بنت عابد
شافتكم ما صرتوا زلم تحموها بعد ابوها
فاتت عندي دخيلة والبت بحمايتي .
شاهين : احترم نفسك ابن ساجر انتَ دايس بساطنا .
رفع ضـلـيل ايده يستوقف شاهين
وارث : بتكم بالحفظ والصون بحمايتي ما تطلع
ودمها ما ينهدر لو تسقطون العشيرة بكبرها
مو بس اخوتي ، وعندك عقد يثبت زواجي منها و.
ضـلـيل : ما معترف بي البت صغيرة
لازم ولي امرها وياها .
وارث : ما نختلف داخل بيتك مو مضيفك
طالب نسبكم رايد بت عابد على سنة الله ورسولة
وبظهري هيبة موكب كامل شيوخ من الغربية
ومن الجنوب وبكل احترام منتظر جوابك
البنية انا احبها ومشتريها بدمي وبروحي
غالية على گلبي وما اسلمها تنطيها ؟
صفنهم بطريقة الهدوء عكسهم نار وتنبث من عيونهم
هذا صدمهم وصدمني بطريقة كلامة ولباقته بالحديث
انسان متحدث وقور ورزن صوت وهيئته وشكله
ضـلـيل : رجعها بالبداية وبعدها تسمع جوابنا .
وارث : ماترجع لا تگلي رجعها ما ترد
انسى ادخلها بيتك وهي تكرهك .
ضـلـيل : تكرهني ؟
وارث : اي تكرهك وتكرهكم ورافضه قربكم
وانتَ بالأخص تعرف البنية ما تريد تلمح شكلك
خلينا نگطع نهر الدم لا توازينا على دم وموت
ترانا مو قليلين شر وحق ربك واگف هنا غصب .
شاهين : تهدد كل عقلك تهدد ؟
وارث : لا تهوبز عزيزي انطم خلي شيخكم يحجي .
ضـلـيل متمسك بكلمة وحده يريد مُـرجانـة
وارث رافض رفض قطعي ، طلع تمار بيده سلاح
وعبرهم تركز السلاح براس وارث ، رفعوا ربع وارث
الاسلحة وتقدم تراث بصوت التهديد صاح
تراث : بيدنا غدارات مو أسلحة عادية
يوگع وارثنا اخرط چبيركم وصغيركم
ترانا سيوف حاده لا تعيش لحظات عود سبع
اسحب ارمي حتى نگضيكم .
دخل بوسطهم شيخ فؤاد ورفع ايده
_ شيخ ضـلـيل هو هذا استقبالك واحترامك لضيوفك ؟
ضـلـيل : انتَ على عيني وراسي ابن ساجر كل
احترام ماله عندي هو والقندرة واحد .
رفع تراث السلاح ظل يرمي بالهوا هو وهمام
اثنينهم خليت ايدي على راسي والصريخ
صار بفلس ، دفع علاء الباب وصاح بيهن يسكتن
نشف الدم بجسمي من عوج وارث ايد تمار
وگع عليه كلات براسه يضرب بي حتى يدوخه
وطگ ايده بلحظة يريدون يسيطرون ما يگدرون
وارث : ايدك من ترفع بيها السلاح تأكد تتحملها ؟
قبض على رگبته يمرد بيها عصره عصر بالحايط
يخنگ بي ويرجع يضرب بطنه بوكس يطلع بي روحه
ويرجع يخنگ بي ما مهتم الضربات شاهين ودفعاته
بكل ماعنده من قوة يقبض بيده ويضرب بطنه
وفلش راسه بالحايط من شافه انتهى بيده شمره .
واثق وابد ما خايف لان اولاد الشيخ فؤاد
واخوانه اثنينهم صايرين مثل الحايط مأمنين
خطواته وافعاله على صح والغلط وياه
رجع بكل تشدد يشدد وبحده يأكد على كلامه
_ احترمتك واجيت طلبتها منك ابري موقفي
باعتبارك حسبتها بنتك ، تنطيها خير على خير
ما تنطيها انا معترف بالعقد ومتزوج البنية
وداخل بيها على سنة الله ورسولة وما ارجعها
يعني ما ارجعها كلمتي ما اثنيها تاخذ بيها
اهلاً وسهلاً ما تاخذ بيها طبكم مرض .
ضـلـيل : ما اخذ بيها وكلمتك ما تمشي عليَّ
ولا على اصغر واحد بعشيرتي ، البنية
ترد برضاتك غصب عنك ترد يعني ترد
وإذا بيوم قبلت تتزوج تطلع عروس من بيتي
ما أخلي بصمة الدخيلة ترافگها وواحد
كلب ابن كلب بيوم يعايرها هي دخيلة
وتزوجت حتى يحموها ، تردها وطلعها
من بيت ابوها عروس ، واذا تعاند ولي منا وبعيونك
اخليك تشوف افعال الزلم تردعك وتردع عشيرتك بكبرها .
وارث : مستعد اجهز عرس اخلي الغربية
بكبرها تحجي بفخامته وبتكم تصير عروس .
شيخ فؤاد : وبيدك تزفهم عرسان .
وارث : هم ما اعترض اقنعها وانتَ تسلمها
عروس مو دخيلة وهيبتكم ترد وانا احافظ عليها
بعيوني اخليها وبگلبي مقامها عالي وهي من يوم
ما دخلت ارضي الموروث صارت قدسية خاصة بوارث
بس ما ترد عندك ولا ساعة اخليها عدكم اخاف عليها
منكم ما ضامنكم تموتوها وتلوعون گلبي ما اگدر .
ضـلـيل : انتَ غبي لو غبي لو شنو وضعك
البنية ترد يعني ترد وبعدها نتفاهم تتزوجها
لو ما تتزوجها احنا نقرر كلمتك ما تمشيها عدنا .
وارث : الواضح انتَ مو كفو واحد ينزل من روحه
ويجي يحترمك ويقدرك ويطلبها منك
سويت اللي عليه وبريت روحي راح اسوي
عرسها واعلن زواجي منها وانتَ تمسك بعنادك .
ضـلـيل : هل عرس ما يتم وحق خالق السموات
والأرض مايتم دام انا ما قابل لا تحلم يتمممممم
من بيتي اي من بيتك لا والف لااااااا .
احتد النقاش ماتحمل واحد ظل يسب بعشيرة
الثاني تلازموا يدافعون وناس تهدد بناس
من وسط الهوسة ماصار حل غير زاد الثار
وامه تصيح
_ كسر ابني مثل ما كسرنا اخووووو
يرد الصاع ابن ساجر الـ**** ، موتوهم هذولي
منين لفتهم علينا بنت ذياب ال***** .
اختفى وارث من بينهم هو واولاد فؤاد واخوانه
وترك الباقين يهدون بضليل والباقي من عشيرته
ملوا وتعبوا وراحوا كلهم راسهم يابس
والضحية هنا بنتي باقية بوسط هل جهتين وكرههم .
دخل شاهين مستعجل يصيح بينا اني ونقش وننوس
طلعت من البيت بدون ما ارد على احد ولا التفت
هلكوني خلصت طاقتي ، صعدنا هو يسوق
وانا بعالم ثاني نزلنا مقابيل البيت دخلت
مكمل اثاثه الباقي والبيت مبين بالجديد منظفي
طلع شاهين ورجع محمل اشكال الوان مسواك
سلمني المفاتيح وبكل هدوء ودعنا وأكد اقفل البوب وراح .
ميمونة ..
بيني وبين هذا الانسان حواجز صعب تتكسر
جنت غلطانه وحقدت عليه لان دخلني بوسط
أهله ويعرفهم يكرهوني ، ملمومين يتناقشون
وياه بنفس الموضوع سحبتني العلوية من ملابسي
تريد تاخذني رجف وگف معترض طريقة
بندر : وين عوفيها علوية خليها قريبة مني .
نسوان عمامه اثنين وبناتهم ولد عدهم
كلهم موجودين نظراتهم ما تتفسر عبالك
مجرمة ويريدون يذبحوها رجعت تسحب
جرني من خصري خلاني وراه تعبان يجر بالكلمة جر
_ لا تخلوني اصيح مالكم شغل بيهااااااااا .
ابو ماقبل يرفع صوته بوجهه العلوية بس هي
احتوته ورفعت ايدها تسكت بيهم ولزم بندر من ايده
_ لا تخاف جده شبيك عشر دقايق واردها بين ايدك .
اخذتني وعيونه ما رفعها من عدنا طول الطريق
مرينا من بينهم شفت زهراء بنت عمهم رضا
نفسها الي يريدها ابو يتزوجها ، نطتني
نظرة عدم رضا عبرتها ودخلت غرفة العلوية
گعدت على كرسي الصلاة مالتها واشرت
اگعد على قريب يمها على چربايتها
_ خليني اساعدچ وگولي الحقيقية ليش حرگتي السيد ؟
غطيت وجهي بيدي ونشغت من كل حيلي بچيت
ميمونة : اني خايفة عليچ الله خلصيني طلعيني منا .
_ ما تريدين نعرف ما تريدين نساعدچ .
ميمونة : اذا احجي الحقيقة ينتحر هو متمسك
بالحياة حتى يعرف الحقيقية وينتحر قبل
كم يوم ما اتذكر شوكت بالضبط من ثگل بالشرب
بلا وعي گال “بس ريحيني گولي السبب حتى
ارتاح وانام بصف امي اروح يمها انام واعرف السبب “.
هزت راسها ورجعت سألتني محروك گلبها
_ السبب يستاهل تشوهين بشر ؟
ميمونة : جنت مو بوعيي والقران
وداعت امي مو بوعيي وغلات اخوتي مو بوعيي .
_ شاربة ؟
_ لالا بس ما اتذكر شلون سويت هيچ بس
اكو سبب مو سبب واحد لا اسباب عرفتهن
بثاني يوم بعرسنا وو ..
سكتت غاصة بحزني اخذت ايدي من اختنگت
من البچي وراحت على كنتور رجعت بيدها بطل
ماي فتحته تغسل بوجهي وايدي
_ اعمالها الشيطانية حتى انتِ ما سلمتي منهن .
_ شنو ؟
_ اسمعيني كل ليلة هل بندر بين عيوني
سبب دماره انتَ يا بنت ساجر وامه اخت ساجر
وهذا روحه صايرة بيچ لا عبالچ ما حاولنا نخلصه
منچ وينسى فشلنا وزادها من صار مدمن كحول
ومبين انتِ تريدين تخلصين منه بعد اجرامچ
على اقل ساعدينه خلي شي زين يشفع الچ .
مسحت دموعي وجسمي يرجف من القهر
_ شنو تريدون مني ؟
_ نريد يتعالج مانگدر ناخذه على مستشفى
احنا هنا متابع حالته حتى يبطل مـن الأدمان
ويخلص من تعلقه بيچ وبالحقيقة المره اللي عرفتها
بلا ما تحجيها ، ومتأكده هو چان حابس امه
لان يعرف السبب ويدري بيها هي وراها لان خبيثة .
قشعر بدني من طريقة كلامها جرت من الجرارة
علاگة وبكل جدية تسألني مهتمة بجوابي
_ تساعدي ؟
_ شلون ؟
_ اذا يترك الإدمان بعد هو يرفض وجودچ بحياته
وتخلصين وترجعين البيت اهلچ وهو يرجع البيت السادة .
فتحت العلاگة وطلعت اوراق ناعمة اوراق اشكال
كلهن ايات قرآنية وادعية خاصة بالادمان
كلهن علاج لحالته وهلوسته وأوهامه وأمراضه
العلوية : دام دخلتي بيتنا صيري محضر خير
ابو راح يموت من قهرته وحزنه على ابنه
ما راح تگدرين تكملين حياتچ والسادة غضبانين عليچ .
ميمونة : هو كارهني ويضربني والله لا عبالچ
يسمع مني كلمة والله بس احچي يكتلني
يملخني تملخ لا تورطيني وياه
ابوس ايدچ علوية ساعديني .
بقت تقنع بيه وتفهمني شوية تغضب وبدها
تذبحني وبعدين تنقهر هلى حالتي وتهديني
وصلت بيها تتوسلني اساعدهم الى ان دخل علينا
مثل الوحش مايشوف مقابيله تشخصت نظراته
عليه يرجف تقدم يتفحصني وسحبني منها
_ شعندچ وياها صار ساعة تتفقون عليَّ ؟
جاوبته ورجعت العلاگة
_ تگول احبه ردت اخليها تروح ماقبلت
متمسكه بيك مو ميمونة .
اضطراب صار عنده بأنفاسه صافن بيه
منتظر اجاوب بلع ريگه من طلت النظر بشكله
دار مني ونتر ايدي متعصب لان ما جاوبته
طلعني من الغرفة غصب صعدني فوك
فتح باب غرفة وشمرني بيها بيها غرفة اخشاب
ومرايا على طول الحايط اول ما صدت عيونه
عليها راح شالها ونزلها ورجع صعد مخبوص
جر الميز فتح الجامة من البسامير مال ميز
وهم نزلها شفت ابو من جوا ساكت ياخذهن
من ايده وينطيها الأخو بندر بس من غير ام
رجع للغرفة قفل الباب فحطان تقرب مني
جرني من زندي قوي عطت من الخوف والوجع
سحبني اكثر يخلي ايده على يعوني ويثبتني
بيده الثانية محاوطني بكل قوته
بندر : العلوية تجذب مو ؟
_ بطني بندر مردت كلياتي .
_ انا اعرفها ماتحب تجذب صح كلامها ؟
_ يا كلام شبيك ؟
دفعني منه وراح بعيد يكرر الكلام عباله متوهم
_ ماكو شي توهمت انسي اسكتي .
انقهرت حتى ما گدرت اظل ساكته
ميمونة : صح كلامها ما اريد اعوفك بعد ابد .
ألتفتت حتى ما يرمش اخذ ايدي يمردها
تمسكت بيده وتوسلته
_ حباب لا تضرب والله ايدي تكسرت .
بندر : توهمت ؟ انتِ حجيتي هسة گلتي ما اعوفك .
_ لا ما توهمت اني حجيت بندر .
بندر : شنو حجيتي ؟
_ ما اعوفك بعد ما اشرد منك ما اريد .
غمض عيونه حيل تمسكت بيده الي ضبت
على ايدي گعد على چرباية يهز برجله
يباع بطرف عيونه عليه ماعنده ثقة بكلامي
بندر : عدكم خطة وحق القران تريدون ما ادري شنو
تريدون على شنو خططتي وياهممم شنو الخطة
الجديدة بنت ساجرررر حاجيني عندچ خطة ؟
هجم عليه اريد استوعب دربي ما تحكمت بحركتي
رجعت بكل سرعتي ما احس غير عثرت وگعت
بكل حيلي على عكس ايدي شاغت روحي
رفعت ايدي الثانية احتمي بيها من عنده
من شفت قابض ايده يريد يضربني
بعدني اريد اصرخ شالني بيد وحده وشمرني
على چرباية وصاح بتهديد
_ اذا تبچين وتمثلين دور الضحية اموتچ
واموتهم واخلص منكم .
بقيت بلا صوت ابجي من الوجع وبين دقيقة
والثاني اناشغ غصب عني ، وهو مقابيلي
يمرد براسه اعرفه يريد يشرب مهستر على شرب
هز رجله بدون توقف من يمي قلقني وتعبني
عافني ونزل وربع ساعة وصعد ورجع نزل يتصايح
هو وابو يريد يطلع وابو يمنع بي ، غافلته بنية
منهم وصعدت دخلت تتلفت قبل لا يرجع همست
_ اني رقية اخت بندر من ابونا مصطفى
هذا البطل العلوية دزتها تگول خلي يشرب
منه واذا ما گدرتي شمري بوجهه خلي يفز .
_ انتوا تريدون بندر يذبحني كل عقلكم ؟
خلته وركضت نزلت بس سمعت خطواته
شمرته تحت المخدة وصرت حالي حال السعفة ارعش
طبگ الباب يسب بيهم انواع السب ، طلعت بطل
بدون ما يشوفني وكفت على حيلي رحت عنده
مديت ايدي متردده وهمست والرهبة بگلبي
_ تشرب ماي تعبت ارتاح بس شوية ارتاح .
صعد راسه على ايدي شافها شلون تهتز
رفع عيونه يدرّس نظراتي بقيت ما ارمش
بندر : شربي من البطل .
_ ما اريد اشرب ، انتَ اشربه لان اني شربت .
ماحبيت اشربه لان ما اعرف شنو بي بالضبط
جر البطل مني فتحه يشم بي وعت ايدي
بندر : اشربي ميمونة اذا ما تشربين ما ارحمچ .
اخذته شربت منه قليل اريد انزله لزم مقدمة وجهي
ورفع راسي والبطل بيده نزلني عصرني
بين ايده حتى ما اتحرك وضغط على
حلگي من فتحته صب الماي بحلگي
بقيت ارافس من دخل بخشمي دفرته
وابتعدت منه اشهگ واكح بكل قوتي شرگت
وغصيت الهوا وگف بعد ما گدرت اجر النفس .
طلع بنفس اللحظة دخلت العلوية شافت حالتي
حجيت الصار بالضبط وبچيت بخوف
مسحت على راسي واخذتني نزلتني جوا
تغسل بوجهي وصاحت بيهن يجهزون ملابس
فوتتني غرفتها زهراء تنتظرنا وبيدها دشداشة
اخذتها منها العلوية وتحچي بهدوء تفهمني
العلوية : تعرفين بروحچ غلطانة وراح تتعايشين
وتساعدين انسان منتهي من غلط منچ
تتحملين وحشيته وعصبيته الى ان يستقر ويرجع
عقله براسه هسة هو مدمن كل عقل ماكو براسه .
لزمت بدشداشتها من سمعت يصيح بأسمي
جاوبته رقية وهي هم خايفة من عصبيته
_ هناك ميـ••• بغرفة جدتي .
دخل يريد ياخذني دفعته مني وعاطت بي
_ شبيك ولك اذكر الله روح نام تاكل وتصعد .
بندر : لا تدخلون وين سيد مصطفى مو گال
ما اخلي احد يتدخل بيكم من اول يوم خلف بكلامه .
زهراء : بندر العصبية مو بصالحك اخذ نفس
وتعال صبيت اكلك اكل ونام .
كملت العلوية على كلامها
_ اي روحي اخذي ابن عمچ زهراء جهزي
ملابسه انتِ ورقية حتى يسبح وياكل وينام .
خجل منها ودار وجهه ما يريدها تشوف شكله
وتخاف من عنده .
طلع مستهم وسمعت ابو هم يتفاهم وياه ، غيرت
ملابسي من عرفت دخل للحمام يسبح
وطلع برا يريدون ياكل ما قبل ، دخلن البنات
كلهن ونسوان عمامة وزوجة ابو بغرفة العلوية
بيدهن صينية اكل ، ما يحتكن بيه ابد
وبندر صعد على اساس ينام رجع نزل فحطان
وكف بالباب مال العلوية يغمض جفونه هلكان
بندر : اريدها .
جاوبته العلوية ولفت لفه صغيرة بيدها
وابتسمت بحنية تطلب منه
_ اكل هاي وارجعها خليها تصعد وياك .
اخذتها رقية من ايدها وصلتها عنده
طلع يمشي ويجبر بروحه ياكلها قبل لا يخلص گالت
_ امشي اصعدي لا تستفزي ويضربچ صيري خرسة .
صعدت لمحني من بعيد بس ما صعد
طفيت كل انارة المكان وتمددت على فراشي
بعد فترة حسيت بالباب ينفك بخفه
وخطواته تقترب مني رفع اللحاف اول ما رفعت
جسمي مرعوبة من رد فعله تمسك بيدي ونزل
راسه بحضني بين بطني وصدري حاضن جسمي
بكل لهفة يشمني ذب حسرة ادري بي منتظر ابادر
رفعت ايدي حضنت راسه واصابعي تغلغلت داخل
خصلات شعره، قوة مسكته وذب حيله مرتاح
اطمئن انا ما ورافضه قربه مني .
بندر : لا تروحين .
_ ابد ما اروح يمك .
_ اعرفچ جذابه .
_ نام حباب .
_ بعد مـا اضربچ بس ابقي عندي .
سحبت اللحاف وبقيت على كعدتي رجعت ظهري
غطيته من ثگلت انفاسه ونام بدون مقاومة .
مُـرجانـة ..
رد اعتبار ، رد اعتبار هل جملة تكررت بأصوات الكل
سمعتها عرفت من خلال كلامهم وارث متنازل بعد
الصار ورايح طالبني من ال ضـلـيل ورافضين
هل رفض نقمة صار وارث هاجت وثارت اعصابه عليهم
وبعد ما شافهم متمسكين بكلامهم قرر يرد اعتبار اخو
طلعتني امه بعد مابقيت يوم كامل بالغرفة
نزلت يمها صبت اكل اكلت من جوعي
وهاي هجمت على ام وارث لان توكلني جاوبتها
_ خافي الله البنية صغيرة ماتعرف بمشاكلكم .
شفت البرا صاير عبارة عن ميز كبير وصواني
اكل مليانات ملي والشباب كلها تاكل
وارث برا يفتر بيده السلاح ويسولف هو وتراث
بس كملوا قبل لا يطلعون صاح بيهم خلف
_ ما انصحكم تاخذ رد اعتبار ضـلـيل مو قليل
شر وهسة الطرفين صايرين بركان ومفجور
خليها تهود ونرد اعتباركم .
ما اهتم وراحوا مغتاظين فاير دمهم
وبين فترة وفترة نسمع الاخبار
ساعة وارث خلص عليهم وساعة يصيحون
ال ضـلـيل ذبحوا ولدنا وبين هذا وهذا
انهاريت من تأنيب الضمير والخوف
ركضت على درج وبكل قوتي وگعت على وجهي
حتى من الخوف ما اگدر ابجي كملت طريقي ورجعت
على غرفته من دخلوا اهل ملِكه وصعدوا على غرفتها فوك .
من راحوا وجه الفجر رجعت اصوتهم كلهم رجعوا
وكفت اشوفهم شمروا روحهم بالصالة كلهم
ريحة كبريت ووارث هو واعمامه صياحهم
يوصل السابع جار عرفته مشغل النار بكل اراضي
ال ضـلـيل وضارب اربعة من ولدهم طالب رد اعتبار .
هو يصرخ ويصعد ركضت للغرفة لو بيدي
اختل ما اصير مقابيله فات شافني افرك بيدي
بلعت ريگي ومشيت هيج على هامس
وارث : ووووووين ؟
فزيت خليت ايدي على گلبي وجاوبته بلسان ثگيل
_ انـ… انزل حتى تمـ… تموت تنام تنام .
وصلت للباب شفطت عقلي وودعت العافية من عاط
_ انتظرررري غيرررر تنتظر تررركض .
_ ها ها بقيت .
_ منو فتح الباب .
_ اميمتك امك فتحته مو نزلت شربت اكل .
_ دخيل علي شگد طنيتي تعالي هناا .
فاتت على صوته ملِكه ما شايفتها بس عيونها
منفوخه وصايرة بيها دمارات لون احمر
_ الله يساعدك وارث .
_ هلا خوية .
_ بيرغ شلونه ؟
_ والله بعده نفس وضعه حالته حرجة .
بكل هدوء عافته مكسور خاطرها ورجعت غرفتها .
جرّ منشفه وجرني قفل الباب يريد يسبح
_ ممنوع تنزلين هذولي السفله يرجعوچ .
قفل الباب وراح للحمام دقايق ورجع مبدل
متحفظ ما يبدل مقابيلي ما اعرف ليش
سمعته مرة يگول ما اريد افتح عينها على
اشياء ما تعرفها بعدها صغيرة ، رش عطره
وشمر روحه على السرير هلكان
بقيت بمكاني ثواني ورفع ايده من راسه
_ تعالي نحلة تعالي يمي .
_ تضربني ؟
_تعالي مُـرجانـة .
_ احلف ما تضرب .
_ ليش اضربچ .
_ مو مشاكلك من ..
_ لا تحملين نفسچ ذنب تعالي .
تقربت اخذ ايدي صرت قريبة منه
مسح على اصابيعي بحنية ورفع جسمه قليل
وارث : انتِ بريئة من افعلهم انتِ كلچ على بعضچ براءة .
رجع خصلات شعري خلف اذني وكمل
_ تقبلين تتزوجيني ؟
_ مو متزوجين ؟
_ نسوي عرس احنا بس عاقدين ؟
_ ها .
_ اي والله نحلة ، هسة شنو قررتي لا .
_ ها .
_ ورمتي گلبي بهل ها الفاهية .
_ لا تعصب .
_ والعباس ما معصب والحسين مو عصبي .
_ انتَ شنو تريد ؟
_ تتزوجيني تقبلين تصيرين عروس .
_ لا .
فك عيونه وحلگه فرد فكه عدل گعدته يسألني بصدمة
وارث : لا ليش لا .
_ مو من درسنا الشيخ وعقدنا حجيت ما اريد اتزوج .
_ الشيخ درسنا لا فالحين ناجحين الشكر لك الحمد لك ربي .
جر باكيت الجگاير شغل وحده ويسألني
_ بالله ليش ما تريدين .
_ اريد اتزوج واحد يحبني .
_ منو يحبچ ؟
_ لا يعني واحد يحبني اتزوجه مثل امي وابوية
اتزوج عن حب ما احب اتزوج تقليدي الحب حلو .
هز راسه يريد يحچي ويتراجع بعدين ما تحمل
وارث : زواجنا مو تقليدي زواجنا بي حروب
زواجنا كوارث ابد مو تقليدي انتِ بنية دخيلتي
وانا احترمچ وكلشي تريدي استغفر الله
مُـرجانـة زواجنا مو تقليدي وافقي يلة .
مُـرجانـة: وارث .
_ دلوعته والله دلوعته جعل محد غيرچ يگول وارث .
بهتت افرك بيدي تخربط وضعي من اقترب جر خصلة
من شعري متمسك بيها يشمها من كل گلبه هيمان .
وارث : افديچ بروحي .
ابتسمت ورديت بخجل
_ اوي جنتل مان .
_ يريدون ياخذوچ مني بأحلامهم وعلي اموت .
_ وارث .
_ دلوعته .
_ انتَ نسنسم كيوت والله .
_ عيب مُـرجانـة شنو نسنسم وكيوت تخزينا .
_ مو حباب والله .
_ لا تحجين هيچ مقابيل احد عيب جني حولي
بعرض الحايط افادي يعادل اربع زلم عيب نسنسم .
هزيت راسي وابتسمت وانا اميل رگبتي
_ اي انتَ نسنسم والله .
_ وانتِ سمسم قابل يلة ، بس تقبلين تتزوجيني ؟ .
_ لا اسفة .
_ چا بعد شتريدين حتى صرت نسنسم .
طلع ورقتين مدري شنو كتب بيهم وگال
_ نلعب لعبة اسحبي ورقة واقري المكتوب .
اخذت ورقة من الورقات وفتحتها قريب المكتوب
_ “وارث لا تنتظرهم وتندم اخذها تزوجها ”
رفعت عيوني بعيونه مركز بشفايفي
مُـرجانـة: يعني شنو معنى الكلام وضحلي
اخذت الورقة الثانية قريتها مكتوب
” انتظر واعترف بيوم عرسك ”
غمض بقوة شفايفه يبست جسمه ينفض
سحبني من اكتافي دخل ايده برگبتي تلمسها
وقرب وجهه من اذني يهمس بصوت منتهي ذبلان
_ برأيچ امشي على اول ورقة لو على ثاني .
_ مو اني فتحت اول وحدة لازم تمشي عليها
بس شنو معناها وضحلي هاي اكثر من مرة
اشوفك تخير العالم سويتها ببيرغ وهمام وحتى امك
وهسة اني هم سويتها ويايَّ عود ليش ؟
وارث : وكلهم مشيت قوانين العبة عليهم بس
انتِ فشلت يمچ كل القوانين گلبي وعقلي
مختارين اول ورقة بس صوت بداخلي يخاف عليچ .
ابتعدت منه صار قريب بس ما مكترب مثل قبل شوية
مُـرجانـة : ثبت نظراتك بعيوني .
ثبتهم وتجرأ سحبني اكثر من رجلي تلمس بشرتي
وارث : ترفة ترفة المقاومة وياها جهاد .
مُـرجانـة : اذا تضحك لو ترمش لو تحچي
معناها انتَ تريد تتزوجني عنـ..
قاطع كلام من باس لحمة اذني وفتح شعري
كله بين ايده يلمه يشم بي من كل گلبه
جسمي ساح اريد اتحرك احس ما ظل بيه
حيل وهيچ تعبانه وعيوني صارت ثگيلة
وبس ابلع بريگي عبالك اخذت جرعة تخدير .
نتر روحه بتوتر مني ما راضي متخربط وضعي
وكفت أتلطخ بهاي وانضرب هناك ، وهو مثل المنوم وفز
وارث : مُـرجانـة اطلعي روحي مامي بغرفة ملِكه .
_ ها .
_ مُـرجانـة روحي بسرعة لا ابتلي بروحي هسة .
_ راح تحميني ؟
_ بوية بس روحي هسة دخيل الكاظم .
_ مو ترجعني حباب الله يخليلك .
_ تعالي مُـرجانـة .
_ اجيت .
_ لچ روووووووحي العباس عليچ
حتى بالتهديد ما تفتهم دخيلك يا علي .
فتت على ملِكه الدوخة بعدها بيه وجسمي يرجف
لزمتني تشوف بشكلي خايفة
_ عزا ليش هيچ وجهچ احمر .
بلا وعي جاوبتها بكل فهاوه
مُـرجانـة: باسني من أذني .
_ عز منو ؟
_ وارث بوسته دافية .
ضربتني براشدي وجرتني من ايدي واخذتني على
حمام تغسل بوجهي وادردم مدري شبيها
_ عبالك هذا ثگيل طلع اضرب مدوخها ومطلعها
اصحي لچ وثول حتى ثول شلون تخلي يتقرب منچ .
رجعتني على غرفه ولزمت ايدي كعدت بالگاع تفهمني
_ لا تروحين عنده ، واذا تواجد بمكان لا تتواجدين بي
بعدج صغيرة وبس عاقدين ، غلي نفسچ
خلي يسوي عرس اذا تسلمي نفسچ بعد
ما يسوي عرس لا ترخصين روحچ يا غبية ، لا والله
مو انتِ غبية ذاك الجبير مفلفل كون اروح اتعارك وياه .
نومتني يمها الثاني يوم ما خلتني اطلع ابد
حتى من اروح للحمام تروح ويايَّ تمشي ويايَّ
مثل ضلي ، الثاني يوم فزيت اجت تركض حضنتني
من شافت خوفي اسمع اصوت الصياح
عبالك واحد مات ام بيرغ البيت حرگته عليهم
وكلها تسكت بيها ، راحت ملِكه تهمس
_ يارب ما مات ياربي دخيلك .
من صعدت ام بيرغ اجت ملِكه تركض وهاي تصرخ
_ بنت المجرمين هاي نحميها واهلها يذبحون
بولدي طلعووووهاااا بررررا لا امووووتهااا .
سبقها وارث ودخل لزمت بظهره
دفعها عني يهدد بيها بكل أنفعال
_ وحق بدر الهواشم اذا تگربتي منها
اقدم اخر مستمسك على ابنچ العار ايهاب
واخلي بعد يوصل حبل اعدام وانسى هو اخووي
وبيرغ تعرفين اذا ارفع ايدي منه يمووووتونه
احترمي نفسچ ومرجانة ما تتگربين منها
اي ملك من املاكي ما توصلين عنده انززززلي .
قاطعهم خلف من صعد هو وام وارث
خلف : خالك يريد البنية نزلها يول نزلها
خلي تجاوب على هل اتصال وتقرر
بلكي نخلص وتفض صارت بيها دم .
جر الشال يعدله على راسي
وسحب عباية ملِكه لبسني ونزلني
قبل لا يفوتني بالاستقبال رفع صوته
وارث : شبابنا انتظروا برا خلي بس الشيوخ .
بس طلعوا عاط بي خالة متنرفز على اخر
_ خليها تفوت حتى نحچي وياها راح
انهض من مكاني احس رجلك حشششش .
وارث : عوفها بظهري احسن بوية تسمعكم .
اجه الشيخ فؤاد اخذني من ايده يريد يدخلني
وارث : لا تگعدها بنصهم والله اتعذب والحسين
خليها هنا توگف بسدي قريبة مني بوية .
رجع لمكانه بس تركلي مكان اشوفهم ويشوفوني
بس رفض اگعد بنصهم ، واحد من عمامه صاح بي
_ استغفر الله وارث انتَ عقلك ناضج البنية
بعدها مراهقة ما تدحك بعيووووونك
ما تتراهمون ما راح تفتهمها عقليتك غير عقليتها
هي ما راح تگدر توصّل لنضج تفكيرك وتتفاهم وياك .
وارث : لا توصل انا اصغر عقلي لعمرها
حتى افهمها وانا الممنون لا تدخل دام اريدها
كلشي اسوي واول شي سويته واجهت ال ضليل
وتعرفني ما احب اقابل غربة بس الخاطرهاااا
وبعد وبعد مستعد كلشي اسوي .
شيخ فؤاد ملتهي بالتلفون شوية وگال
_ هاي البت وياكم احجوا وياها .
سلمتي وارث التلفون مجبور واكثر من مرة
يريد يسد الخط ويتراجع ، اول ما خليت التلفون
على اذني سمعت صوت امي بچيت بكل حيلي
غـاليـة : مُـرجانـة يمه انا وعدت ونفذت
ضـلـيل طلگني وانا وأخواتچ عايشين بيت
بوسط بغداد بعيد عنهم كلهم ارجعي يمه
تعالي يمي حتى تنتهي هل حرب اللي صارت
ارجعي يمي بين ايدي حلفتچ بروح ابوچ
خليني اشوفچ لا تحرميني منچ راح اموت
على فراكچ والله ما اخلي احد بعد يمس
شعرايه من راسچ بس ارجعيلي .
باوعت بضياع بملامح وارث ودموعي
تصب على خدي ما وكفت دقيقة
وارث يتوسلني بنظراته ما اوافق جاوبتها بنحيب
_ يمه ….
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.