رواية الموروث نصل حاد – الفصل التاسع عشر
حضنها ومن الباب اخوانه يستمعون للكلام وبچيها
منفعلين ولا حسيت زوجة اخوهم عبالك اختهم واجتي
زعلانة من زوجها كلهم غادين اعصاب بركان مجمر
اسمر : ولچ لا تبچين باجر اخذچ اشتري مكياج .
تاج : بوية خلي نتگابل عليه واگطعه تگطع .
شيخ فؤاد : وارث وين وارث يطلع وراه .
تاج : طلعوا اثنينهم .
عافها وراح يمشي وطلع يخابر
_ ها بوية وارث وياه انتَ ؟ خوش احچي وياه خلي يعقل
شمسويه البت يروحلها فدوة شايلتنا على راسها تكرب
من الصبح لليل ما گالت اوف واشتكت منهم يحرك
بگلبها عليها ليش ما راضي عليه لا والله فلا ارضى .
سد الخط واجت عمتهم فاطمة
حضنتها خلتها على صدرها
_ شبي وياچ مو قبل لا يصعد يضحك .
ايليا : جذاب بس يمكم يضحك عمه تعبني جوا شكل
وفوك شخصية ثانية ، عليچ الله هو مو رگص ويانا
يگلي اشمرچ بملهى هذا مقامچ ما توالميني .
حجتها وشهگت اثر كلامه ، ضربت روحها حيل
على وجهه بقت تشهگ مقهورة قهر
ماصاير على بچيها بچيت .
ضربتني دوخة براسي فرت الدنيا بيه نمت
على مخده وغطيت وجهي طلعت بس قليل
من عيوني اشوفهم واسمعهم ، رجع يرعد
يريدون يسيطرون عليَّ مو گادرين يريد
يصعد ابو ما يخلي يريده يتواجه وياها
وتراث يگول ماعندي نسوان تتواجهه
وتترادد ويايَّ مقابل اهلي وتقلل مني
ولا تدخلون واتخذت قراري ما اريدها
وايليا من مكانها ردت انا هم ما اريده بعد لو يصبوك ذهب .
استدرجه ابو دخله على غرفة وسد الباب
ظل بس هو وابو وايليا عاط بي
_ شبيك لك مو نسيت واكلنا وشربنا وضحكت
تلملم عليها وتنفجر فوك بكيفك انتَ .
تراث : مصار يومين هم صوتي تجرح من الصراخ
لا يفيد وياها عيني وأغاني ولا الصوت العالي
يا بوية ما نرهم ما تفيدني .
ايليا : ولا إنت تفيدني .
تراث : حمرتچ الحمرة تفيدچ .
_ احسن منك على اقل بيها فائدة تفرحني من اخليها .
_ لچ تسكتين لا تفووين دمي واصل حدّها وياچ
حتى جريمة مستعد هسة ارتكب بيچ .
_ تحسست ، رجفتني .
صاح بيهم ابو مايرضى بالجدال هذا
شيخ فؤاد : تفهموني لو أطردك انتَ وياها ؟
طلع تراث جگارة ابو نترها من ايده بصوت متهالك گال
تراث : بوية خايف عليه من نار جگارة وضررها
و ماتخاف تضربني جلطة من راس هاي
انا تعبان وحق علي خليني اشرب اصبر بروحي .
رجعها شغلها تراث وابو منتظر جوابهم
شيخ فؤاد : شنو مشكلتكم گابلوني خلوني احلها .
تراث : مشكلتي بيها كلها ما عاجبتني .
ايليا : تررررراث لا تقهرني بكلامك احترم نفسك .
شيخ فؤاد : والحل .
تراث : الحل لا هي تريدني ولا انا تجبرونا ؟
شيخ فؤاد : بالله شنو الأسباب ؟
تراث : طلعتها بدون علمي مسويتني رجل كرسي .
ايليا : انتَ ماعندك وقت اطلعني ، واذا اجيت ابلغك
على طلعة تصير عصبي وتعاركني ، واذا طلعت اني
واهلك هم تعاركني ادور حجة حتى اداهرني .
تراث : ما ادور حجج لو ردّت اتعارك لو عندي شي
ما اخاف منچ اجي راسچ اكسره مثل ما صار فوك .
شيخ فؤاد : عفية بأبني السبع .
تراث : راضي على خفيتها تقبلها ؟
ايليا : انتَ مو رگصت ويانا ؟
تراث : تعمدت اسايركم وارگص لسببين
اولهم عمتي وتراث عدنا وخطارنا توهم
داخلين بيتنا عيب منهم .
ذب دخان الجگارة ورفع اصبعين يأشر بيهم
_ والثاني أوصل رسالة حتى
ابوي يعرف انا جزت روحي منچ .
ايليا : جزت روحك اي زين احسن .
شيخ فؤاد : احطك على قبلة
من لوزتك اذبحك ولك شبيك .
تراث : بيه هواي بوية بيه هواي .
شيخ فؤاد : احچيلي منهن بالله .
تراث : طلعاتها .
ايليا : چا ادفن نفسي بعد ما اطلع حتى ترتاح حضرتك .
راح يمها صار قريب منها رفعت
حاجبها وظلوا يتجادلون :
تراث : طلعاتچ ايلياااااااا .
ايليا : كرهت الطلعه .
_ وهذا مكياجچ .
_ كسرته بعد انتَ ارتاح .
لزمها من زندها وسحبها عليه عكفت جسمي من عصبيته
وارث : ومهزلة الميانة الزايدة ؟
ايليا : وحركاتك كل ما نجتمع بوية زوجني ؟
_ شعليچ اريد اتزوج .
_ وانا اريد اعيش فك مني تراث .
_ ايليااااااااااااا .
جرت ايدها منه وابتعدت خايفة
من عنده ترجف البنية وردت تبرر الصار :
ايليا : انتَ مو تعرف فرحانين بخطوبة اخوك يحيى .
شيخ فؤاد : صار سنة كلنا ننتظر يوم خطوبة اخوك
وكلها فرحانة انا الشيخ فرحان واريد اهوس .
تراث : هذا مو سبب .
شيخ فؤاد : يحسبوها اختهم وعدنا مناسبة
وكلنا نجهز لها ، كلنا فرحانين بس هيَّ تريدها تلطم ؟
صارت بظهر الشيخ فؤاد وكملت كلامها مفرفح گلبها
ايليا : انا ماعندي اهل تعرفني حاسبتهم اهلي
واعز من اهلي والله ، يحيى واسمر وتاج كلهم يگولون
انتِ اختنا الوحيدة من فرحتي اغني
وارگص واتجهز شكو بيها ؟
تراث : فرحانة تطلعين وانا ماقبلت؟ فرحانة الحجاب
يطير من راسچ وتنزعي عادي ؟ فرحانة تتحمرين
وتتزروقين ليلچ ونهارچ هل حمرة ما تطيح
من حلگج بوية شني انا مفعل الدياثة على عرررررضي .
ايليا : بس اني مو محجبة الخاطرك تحجبت .
من صاحت كلمة ” الخاطرك ” اخذ تراث لحظات
صمت وتردد بالرد عليها ، رغم عصبيته حتى
ابو يحير شلون يسيطر عليه
ايليا : عموو انتوا شاهدين إلتزمت والله العظيم
من اطلع حتى عباية مال راس لبست وما اضحك
بوجهه احد وامشي بهدوء وصوت ضحكتي
بطلت يصير عالي .
جاوبها برزانة عكس عصبيته يبعد بروحه منها
حتى ما يمد ايده عليها ويتجنبها
بس ثبت نظراته عليها
تراث : والصار برا .
ايليا : ما اتحجب بالبيت لو تموتني
واني هاي تصرفاتي اتصرف على طبيعتي ما اتقيد .
تراث : لچ غصباً ما عليچ تتقيدين وتبطلعين حيوانه لا .
ايليا : لا شنو اطلگني روح طلگني .
رفع ايده يهزّها بأستنكار رافض الكلام وقبل لا يطلع صاح
_ هل قنادر المهزلة باجر تنتهي لهنا حدي ما اريدها
تجبرني عليها ما اطيقها ، من الصبح طالع انهيها هذا حدي .
عافهم وطلع گعدت ودموعها
تقطر على ملابسها بلا صوت
تهتز ، حضنها ابو يمسح على
ظهرها وهيَّ بأهتمام تحچي
_ اصبر بروحي الخاطرة وبعمره ما قدر خاطري .
وگف ابو بنص الصالة تراث يطلع بسيارته يصيح
شيخ فؤاد : يروحلچ فدوة الچلب ابن الچلب
يحرگ گلبي على بنيتي فرفحني صعد
ضغطي يمنن بالبنية الله لا يوفقك امشي
اطلع بررررررا ابن القندرة اطلعععع لا ترجع بعد .
صعدت ايليا على غرفتها اسمع بيهم يمنعوها
ويريدون تظل عدهم ماقبلت وصوت شهگتها مسموع
وقبل لا تصعد بصوت مخنوگ حچت
_ فلا اسامحه بعد ، ولا اصالحه ذلني هواي
ولو هو زلمة گد كلمته خلي يطلگني
ويرجعني منين ما جابني .
هي صعدت وجفلت نخلست خلص من صاح ابوهم
_ وين وووووارث خلي يشوف هل ساقط وين ؟
تاج : وهو واسمر طلعوا وياه .
شيخ فؤاد : وحگ علي اذا ما يرد يصالحها انعل خيرة .
ام تراث : يا رجال چا هي هم غلطانة
مو صار شهرين زعلان منها من هل
لبس والمكياج ، وانوب ادوس بمصارينه
من يگلها لا تعاند هسة انا ماقبلت
عليها اليوم شلون ترگص .
تاج : يمه البنية اختنا ويحيى گال الها دامچ اختي
الوحيدة نفرح ونحرگ العرس حرگ وصار سنة
تخطط ويانا وتجهز مكسور ظهرها عمي شسالفة
واذا فرحت واذا ضحكت غير اخوتها .
بين رافض ودفاع اسمعه دخت
لزمت راسي ضغطت عليه بالربع
ساعة مرت وانفتح الباب شميت
عطره يقترب فتحت عيوني بخفه
من رفع وإرث خصله شعري نازلة على خدي
_ نحلة گاعدة ؟
فتحت بصعوبة رمشت بهدوء
وثبتت نظراتي بعيونه تلمع ذبلانة
مُـرجانـة :اممممم .
وارث : گلبي عندچ خفتي من صوتهم ؟
_ انتَ وين جنت والله خفت ؟
_ تعالي ويايَّ .
_ وين ؟
_ اريدچ تعالي امشي .
رفع الغطوة مني وجمدت من حضن خصري
ورفعني حاني جسمه حتى يسيطر على جسمي
ابتعدت من حسيت حرارة خجل صعدت براسي
وجسمي ينفض بين ايده بجنون صار وخدودي
احس بيهن صارن نار من جر الشال يلبسني
ويضم بشعري يرجعه ورا اذني ويتمعن بعيوني
اخذ ايدي بين ايده وطلعني من الغرفة
كلهم بالاستقبال اسمع اصواتهم وهوَ
ولا مهتم صعدتي فوك بغرفة اول
ما فتح بابها كفخني عطره ، وملابسه على سريره
وباب الكنتور مفتوح ملابسه مرتبات بعناية
وعلى جهه الثاني مقابيل السرير تخم
وطبلة عريضة مطشراوراقه وفاتح لابتوب
واقلام بكل مكان ، لگيت روحي بوسط
الغرفـة خجلانة مترددة عين على باب وعين عليه .
بلعت ريگي يبس من طوله وتركيزه بيه
مُـرجانـة: هاي غرفتك .
_ اي ، تعالي هنا بالله .
_ انام هنا ؟
_ أريح ألچ وهم اريحلي .
_ لا مو شسمه .
_ امي ؟
_ اي كلهم لا مو امك كلهم استحي منهم .
_ زوجتي انتِ .
تعجبت هوَ قبل رافض ادخل غرفته
ومايحب احد ينام بيها ويلعب بأغراضه
لو ينام بفراشه ، ليش هنا قبل وعادي ؟
الخجل ترس وجهي بطني تمغصني
مدري شبيه خرب حظي انخبصت خبص
رحت على باب اريد افتحه وگف على باب ساند
كل جسمه حتى ما ينفتح ونزل نفسه المستوى
طولي ايده على ركباته عبالك
راكع ومايل راسه ويهمس يحاجيني
وارث : نحلة هم تعاندين ؟
عدلت شالي وابتعدت شوية اقترب هوَ
مُـرجانـة : اريد انزل .
وارث : نعسان اريد انام مو مرتاح ابد ما مرتاح .
_ ليش خلي راسك على مخده .
_ اي .
_ وردد سورة الأخلاص والمعوذتين .
_ اي .
_ وتنام مرتاح .
_ دايخ .
_ ميصير هواي تجيك دوخة لازم تروح دكتور .
_ مايحتاج العلاج موجود .
_ لعد اخذه حتى تروّح الدوخة .
_ اخاف على علاج .
_ ها .
_ يخلص بيدي .
_ شنو ؟
_ العلاج .
_ اشتري غيره شكو بيها مو عندك فلوس هواي .
_ تعالي نامي مُـرجانـة .
_ جوا انام حباب .
_ مُـرجانـة كاميرات ماكو ابو ابوية شفته بعيني
لا اعرف بيچ نمتي گاعدة اكلتي شربتي
نامي هنا دخيل علي .
اخذ ايدي رفع اللحاف وسحبني بهدوء تمددت
وهو راح نزع الساعة من ايده ، ورجع على
اوراق لزم وحدة وشغل جگارة صفن بيه
حاولت ما ابين ارتباكِ من نظراته
وتركيزه بكُل حركة مني من
سمعت صوت حسرته غمضت
ودرت وجهي على صفحة الثانية .
بقيت نص ساعة ورجعت التفتت اشوف شنو يسوي
بكل اهتمام وتركيز صفنت بي وبكل تحركاته
يكتب ويحسب مدري شنو بالحاسبة يدگ بيهن
ويكتب الرقم وينزل ويجرد واول مايكمل ورقة
يطگطگ بجسمه يميل منا ومنا ويرجع يبلش
بالثانية ، ويشرب جگاير ، شال تلفونه وطلع يخابر
بعدين رجع كمل ورن تلفونه من جديد
سمعت اسم همام وطلب منه جرد
حسابات الايام الفاتت ورجع سد الخط
واشتغل بالباقي ، غمضت عيوني قوي من همس
وارث : نامي نحلة شليتي حالي .
بقيت ساكته انبلع لساني لميت رجلي
على صدري وغطيت راسي كله ماصرت اشوفه ابد
بس اسمع طگطگه وطلع برا الغرفة ومن رجع
حسيت حركة على سرير قريب مني
سحب اللحاف من راسي وحرك
اصبعه على خدي حسيت
بقشعريرة سرت بكامل جسمي
_ بالله افتحي عيونچ .
_ راح انام والله اسفة .
مر وقت مو قليل انتظر بس يتحرك مني يروح بعده
بنفس مكانه صامد ، اضطريت اشوفه
شنو ديسوي معقولة نام ؟
صارت نظراتي تلتقي بعيونه غمضها
ورفع حاجبة ورجع يباع بعيوني
فد عيونه هيچ تلمع ويرمش بصعوبة مدري شبي
خفت عليه حتى تنفسه خو طبيعي صدره يتحرك سريع
طلعت اصبعي من تحت اللحاف ورفعته احلف
مُـرجانـة : والله راح انام لا تعصب .
ابتسم وعيونه ابتسمت ومال راسه مقلص عيونه
بلل شفايفه وقلدني ورفع اصبعه
وارث : لا والله ما تنامين .
_ زعلت ؟
_ انعل اهل اهلي اذا ازعل ما زعلان .
_ مو والله طار النوم من عيوني .
_ ادري مثل ما طار النوم من عيوني .
رفعت شوية جسمي استندت على ظهر السرير
مُـرجانـة: هاي ليش طار النوم جنت نعسانة ؟
شغل جگارة وطبگ المخدة قريب من مخدتي ونام عليها وجاوبني
وارث : بگد ما تحركتي .
_ ها
_ بگد ما تحركتي مو بس انا احترگت
حتى جدي الي ماعرف يربي ابوي احترگ .
درت وجهي اكتشف بالغرفة اتجنب اشوف عيونه
مُـرجانـة: شنو تسوي ؟
وارث : اشتغل اجرد حسابات الأراضي .
مُـرجانـة: تعرف ؟
_ هههههههههه ، لا تعالي علميني .
_ ما اعرف .
_ وين وصلتي بالدراسة ؟
_ كملت الثالث وبعد ماكملت وانتَ ؟
_ طب تخدير .
_ يعني شنو ؟
_ يعني اختصاصي اخدر العالم .
_ شلون ؟
_ تحبين تجربين ؟
_ شنو ؟
_ التخدير .
صفنت بوجهه بثول استوعب هو شنو يشتغل
_ يعني انتَ من هذولي يخدرون المريض بالعمليات ؟
_ اي عفية شطورة .
_ لعد ما أشوفك تروح تشتغل ؟
_ تركتها مؤقتاً .
_ يا ليش ؟
_ الأراضي اهم وبيها فلوس اضعاف .
فرك وجهه وطفت الجگارة بالطفاية ونهض مني
جاب علاگة بيها حلويات شمرهم على سرير
وجر تلفونه من الميز فتح الرمز وتقدم اتجاهي
وارث : شوفي أفلام كارتون لو فلم محشوم تفرجي
واكلي بين ماترجع النومة وترحميني من تنامين .
اخذته من ايده شغلت يوتيوب ورجع هوَ
يشتغل باللابتوببقيت ابحث وامسح
حرت شنو اشوف ، فززني من نط
من مكانه فتح جيس الچبس وطگ قوطية ببسي
وارث : اكلي وباعي حتى تنامين شبعانة .
هزيت راسي اكلت وشغلت افلام كارتون جذبني غلافة
نمت على جانب من جسمي ولازمة التلفون ، رجع فزعني
وطير النومة من اخذ التلفون وسحب
مخدة يسند التلفون عليه عدله ابتسمت
بوجهه وراح ، خليت ايدي تحت خدي
وبكل تركيزي اطلع بالكارتون واضحك
على مواقفهم واحزن على حزنهم .
عيوني ثگلت طفيت التلفون وبقيت مغمضه
دايخة ، لدقايق اني على هل حال تقرب اخذ التلفون
ويغطيني زين همست بين النايمة وصاحية بأنزعاج
_ زهرة خابرتك مرتين .
ابتعد واسمع رنين التلفون وهو منتظر جوابها
ردت بعد السلام سألها على اطفال واذا محتاجين شي
استمع ونتر بعصبية بس صوته كتمت حتى انفاسي
وارث : ارجع للغربية ما ارحمچ
سدّي حلگچ ولزمي حدچ زهرة .
سكت يستمع وطگ الجداحة يشرب
جگارة ويسحب نفس قوي
_ كافي بابا لا تخربطين شبيچ
تخبلتي ثگل ، امچ وينها ؟
صار يستغفر بصوت عالي ، راح افتر بالغرفة
اسمع خطواته تجرأت افتح عيوني رجع گعد
يسمعها وفتح دگم القميص فرك وجهه ورجع
ظهره على تخم وبعدها على خط مدري
شنو تحچي وهو بس يرد بـ امممم
ويسكت غمضت ورجعت فتحت
وبعده وضعه مخربط معصب
وهي ولا سكتت ولا ثانية مبين
لأن ما شال التلفون من اذنه ابد بعده يسمع .
اول ما تحركت رگع التلفون بالطبلة متعصب
دخلت بصراع بين انام وبين بس اشوفه شبي
بقيت اتزوهر بمكاني الحد ما حسيت اصابعه
تتلمس اصابعي صكيت فرد صگه ارعش
وارث : ريتهم كلهم مثلچ ، هم اكو بعّد بالدنيا مثلچ .
اخذ ايدي بين ايده مبتعد عني بمسافة كلش بعيدة
رافض يقترب ، بس ايده حضنت ايدي وقبل لا انام
على دفو ايده وحنيت كلماته همس
وارث : العالم تضم اسرار بگلبها ، انا ضميتچ انتِ بگلبي .
نمت نومه طويلة بدون تفكير احس كلشي بيه تسكن
الثاني يوم فزيت مرتاحة بس الوقت متأخر واصوات
عالية جوا بالبيت ، طلعت غسلت وجهي بالحمام
ونزلت مترددة وخجلانة منهم ، بس خلصت الدرج
لمحني وارث من بعيد كاعد بالاستقبال، ختلت بالمطبخ
اجتني ام وارث مبتسمة : صح النوم يمه تعالي اكلي .
_ لالا توني گعدت ما اگدر .
_ اخوي فؤاد عنده خبر يخبل
گال اريدها تاكل حتى تعرف .
_ شنو امانة احچي .
رجعت بخطواتي للخلف من طلع وارث مورث وجهه
يريد يطگ من العصبية لزمني من ايدي وصاح
_ يمه روحي شوية .
ام وارث : صار ساعة خالك يحچي شنو هو والحايط .
شيخ فؤاد : وارث تعال انتِ والبنية بساع لا تصير صگط .
اخذتني امه من ايده التفتت انظر بعيونه ضايع مقهور
اول ما دخلت ضحك بوجهي الشيخ فؤاد وطبطب
على مكان قريب منه رحت گعدت وافرك بيدي
وحسيت رجلي ثگلت من الخجل لان كلهم موجودين
فات وارث متكتف منتظر كلام خالهم وجوابي
الفرحة ما وسعتني وحسيت بروحي
فراشة وحلقت من گال
_ تريدين امچ ؟
_ اي اي اكيد اريدها .
_ امچ بالطريق اجت عليچ بوية وهي هم متلهفة عليچ .
ضحكت من كل گلبي ومعرفت شلون اگعد واستمع
اريد اطير اريد واكف بالشارع انتظرها
اشوف امي اشوف غـاليـة تحضني بين ايدهاا حلم
هذا حلمممم ورب العالمين يرحمني من يحقق هل معجزة
مُـرجانـة: شلون عرفت مكاني ؟ شوكت توصل ؟
رد الجواب وتمنيت ما سألت ولا عرفت وبقيت معمية
شيخ فؤاد : عمچ الشيخ ضـلـيل صاحبي وحلفني
براس ولدي اذا بيوم تجين هنا اوصل الخبر حتى
يجيب امچ تشوفچ خطية تمرضت على فراگچ .
بهتت وماتت فرحتي بگاعهم حسيت كلشي
صار اظلم بعيوني تمنيت اصيح واگول
ما اريد اشوف هل ظالم ولا اسمع صوته
ولا ألمح شكله تمنيت اعبر عن كرهي
وابلغه انا كل يوم ادعي هل حقير
يموت ويندفن واوگف على قبره
وادعي من الله يعذبه مثل ما تعذبت
ياريت سهل الكلام واعاتب امي لأنها بعدها وياه
وراح تجي وياه وتريدني اشوفها وهيه بعدها
على ذمته ما نفذت كلامها ما عافته ما لوعت
گلبه مثل ما اوع گلبي وگلبها اريد اصرخ
واملخ روحي وابين الكسرة اللي بيها انا هسة
حيلي راح ، بقت بس دموعي تصب واكتفيت بـ
_ ما اريدهم .
ام وارث : يا خالة مُـرجانـة شلون ما تريديهم امچ تريدچ .
هزيت راسي وامسح بدموعي وترجع تصب
_ ما اريدها ولا اريدهم ابد لا يجوني
حبابين ما اريد اشوفهم .
لمحت وارث قلص عيونه اندهش بردت فعلي سألني
وارث : مُـرجانـة صدك تحچين ؟
_ اي اي ما اريدهمممم حباب
اخذني منا قبل لا يوصلون .
شيخ فؤاد : وصلوا بوية وامچ طگ گلبها عليچ .
رفعت نظراتي بضياع عيوني أنعمت من البچي صحت
مُـرجانـة : تعبت ما اريدها ما اتقبل اشوفها ما اريد امي .
وارث : ولا انا اريدها تلتقي بيهم .
ام وارث : ولك يمه ليشششش حرام عليك .
وارث : ياخذوهاااا مني يماااااااا .
اخذني من بيناتهم صعدني فوك انهاريت
بالبچي والطم ، نزل مستعجل وصعد طاير
يلبسني بالشال والعبايه مستهم يريد بس يخلص
رجع اخذني من ايدي لو بيده يطير ، خالة اعترض
طريقة وامه تعاتب بي وتصيح ولا يستمع ولا عبالك
والشيخ يتوسلني اظل انتظرها واشوفها
گلبي يريدها اريد امي تاخذني بحضنها وتعرف
بحالي وتسمع صوتي واشكي كلشي صار
بيه اشكي يمها بس ضـلـيل صار قاطع
اعترض لقائي بيها لو اموت ما اخلي
يشوفني لو ياخذني واصير تحت
رحمته ، اتحمل هل عذاب ولا ارجع الحكم ال ضـلـيل .
جريت طرف قميص وارث وشهگت من التفت
مُـرجانـة: اخذني منا حباب .
طلعنا وخالهم يصيح ويسب بي وبراسه اليابس
وامه ادگ وتلطم تنادي فشلتنا ولك خطية امها
اجت تعنت الخاطرها ، ركبت السيارة من القهر اريد
استفرغ بجيت الحد گطع النفس ، هو يمشي
واني اشهگ وارجع املخ بروحي الحد ما شخط السيارة .
غـاليـة ..
السيارة تمشي بينا وما مستوعبة وبعدني بين الدقيقه
والثانية استدير على ضـلـيل استفسر اكثر
_ عليك الله صدك راح اشوفها ؟
ضـلـيل : اي وحق خالق السموات والأرض .
_ شعجب تريد تموت ؟
ضـلـيل : تاكل بگلبي مُـرجانـة ماتفارگ راسي ابد
لهذا يومنا اتذكر طلبت احميها وانا كابرت اريد أعوضها .
نقش : ياربي الطريق شگد طويل مليت
وتعبت شوكت نوصل اريد احضنها ميته على شوفتها .
ننوس : منو ؟
نقش : لچ رايحين نشوف مُـرجانـة ونرجعها ويانا .
ننوس : لا مرجان ماكو بعد راح ماحبني .
ضـلـيل : تأخرنا على رجال عيب .
ركز بالطريق والجگارة مانزلت من ايده درسته مايحب
ينزل من نفسه ويلتقي بخصومة، وضغط على روحه حتى
ينفذ هل خطوة وهسة ناره تاكل بگلبه وعقله ومتحمل .
دخل بفرع عريض اتصل مرة والثانية بالثالثة رد
وصار يوصف البيت الى ان شافهم ، نزل ضـلـيل
وحده من شاف رجال كبير ينتظر بالباب وحواليه اولاده
بيهم الكبير وبيهم الشاب ، صار يرحب بضليل
رجع ضـلـيل فتح بابي نزلت منزلة راسي
شيخ فؤاد : هلا خوية توها ما نورت دارنا
اتفضلوا البيت بيتكم والعتبة ألنا ياهلا من جاينا .
اجت نقش بصفي وضليل شال
ننوس على گلبه حضنها دخلونا
ومن الباب استقبلني ثلاث نسوان
وبنية شابة وياهن سلمت على
زوجة الشيخ واخته وصلت للثالثة رحبت بوجه بشوش
_ انا ام وارث ام نسيبكم ام چبير الموروثين .
غـاليـة : سكينة اعرفچ وسامعة عنچ
هواي من ابوية الله يرحمة .
_ وانا سمعت عن جمالچ وقوة
شخصيتچ چثير واليوم تأكدت .
غـاليـة: منين سمعتي ؟
_ من سـاجر چا قبل لا يموت ذبح روحه عليچ
اظن انجلط ومات بعد ماسمع بزواجكم .
_ ساجر صديق المرحوم عابد ، وأخويه اعتبره ما انسى
وگفاته والله ونعم الرجل ونعم المواقف الرجولية الله يرحمة .
الزلم كلها راحت على استقبال واحنا گعدنا بالصالة
اباع بالوجوه واذا باب انفتح اتلفت بلهفة انتظر ترد
روحي وتهدي ألم گلبي بطلتها
غـاليـة : وينها بنتي ؟
درت على باب الاستقبال من تقدم شيخ فؤاد
منزل راسه وترك باب الاستقبال مفتوح حتى ضـلـيل
هم يسمع الكلام اللي بالأصل سمعه بس مـا تجرأ يبلغني
صح ما اشوف ضـلـيل بس متأكدة أدمر اضعاف دماري
صار يروي الصار كله بالتفصيل بدون ما ينتظر
حسيت كلامه سچاچين تنبت بوسط گلبي يرفع بيده
ويضرب گلبي ويطلعها ويرجع يطعني بيها
كمشت عباتي وقبضت عليها بكل
قوتي بعد ما كمل توسلته
غـاليـة : وينها هسة اخذوني بس اني اشوفها
محد يروح ويايَّ بس انا والله بس اني .
شيخ فؤاد : مايجاوب المشكلة اخذها وبعد مايرد علينا كلنا .
غـاليـة : مُـرجانـة ما تريدني شلون ما تريدني ؟
تمنيت الموت فكرت اذبح روحي بهل دقيقة تفشلت
من روحي ومنها ومن الدنيا كرهت نفسي وضليل
واهله واتمنى لو يطيح الموضوع بيدي اموتكم كلهم
وانا وياهم اخلص من هل دنيا .
رجع الرجال يتصل عليهم بعد ما شافني انتهيت
حتى من يحجون ويايَّ زوجته واخواته ما اسمع
يحچي ويايه ما استوعبها من حجم الأفكار بعقلي
شنو ، تحركت نقش اخذت التلفون منها صحت
غـاليـة : مُـرجانـة .
مُـرجانـة: يمه غالية تسمعيني يمه .
هي هل كلمتين وكلشي يتلاشى صار مـن گدامنا
بنتي تصرخ وتبچي وانا اصرخ وابچي صوتها
رجعت أسمع صوتها رجع صوت بنيتي .
غـاليـة : مُـرجانـة تعالي ارجعي يمه ابوس ايدچ
خليني اشوفچ لا تحرميني منچ ، ليش ما تريديني
زعلانه مني ، كرهتيني بس حاجيني ليش ما تريديني .
جوابها وصلني كفخه قوية على وجهي وصحصح عقلي
مُـرجانـة : اني اريدچ يمه ، ابيع عمري واشوفچ وتلميني
بين ايدچ وانام بحضنچ مرتاحة بدون ما اخاف
ياخذون روحي ويخلوني اگعد يمچ ساعة وحدة
اريدچ ومن كل گلبي والله يمه اريدچ
بس ما اريد ضـلـيل الحقير تريديني
تعوفين هل انسان وتجيني وحدچ تاخذيني
انسيني دام بعدچ وياه انسي بنتچ دام بعدچ تحت رحمته .
غـاليـة : عمچ تندم والله وهوَ گال
اريدها ترجع ويانا أعوضها و..
مُـرجانـة: تبررين الضليل !
غـاليـة : لالا والله ما ابرر مُـرجانـة الوووووو يمهههه الوووو
لا ولچ يماااااا لاااا والله ما ابرر والله ما بررت .
نزلت الجهاز بعد ما غلقته بوجهي خاصمتني
ضربتني الشقيقة شلت راسي وعيوني
وجسمي فقد اعصابه ما صرت اشوف
بعيوني ، حتى ماخلتني افهمها ولا اسأل عنها
رجع الشيخ يخابر انغلق التلفون نهائي ، رجفت
ايدي تعبر على فقدان اعصابي ونفسي كرهتني بروحي .
وانجبرت اجدي اخبارها منهم بقيت اسأل ام وارث
وهي تحلف مابيها شي وزينة ومخليها بعيونهم وووو
بس گلبي ما مطمئن ومن تلكأت بالكلام عرفتها تجذب
وتريد اطمئن ، لزمت گلبي عصرني عصر وكلها صاحت
بصوت مسموع شبيچ ونقش تغسل بوجهي
غـاليـة : ام وارث بلا زحمة اريد شي من اثر بنتي على اقل .
الغصه ببلعومي ذبحتني وانا عايشة مقاومة من الفشله
وبعدني گاعدة نقش مقابيلي منهارة تماماً، وشيخ فؤاد
بعده ما يمل واكف بين الصالة وفاتح الاستقبال الضليل
عرفت سمع كلشي وفسر الصار بعد من ما سمعت صوته اختفى .
نقش ..
جنت اني عكس اتجاه امي وعمي ضـلـيل اشوفه
من سمع امي تبچي وتبرر عرف مُـرجانـة
رافضته مو رافضتها الجگاير
ما طفت لحظة ، وحرف واحد ما طلع من عنده
لزم راسه وگعد بس يسمع وضايع ضياع ماكو منه ابد .
اجتني ننوس الخايسة بنص البجي
ايدها مصخمه من الككو مدري منين
هل ككو انوب وفستانها ملعوب بحاله ورافعه ايدها
ننوس : دومي غسلي ايدي دومي .
اجت بنية اسمها ايليا رادت تاخذها
ماقبلت وعتت ايدها منها رحت
وياهن شلتها اكفكف ردنها
وگعدتها على كاونتر اغسلها
ودخل ابنهم صدت عيوني
عليه لابس دشداشة لون نيلي
وسبحته بيده وبيده الثانية صينية استكاين الچاي
مر من يمي خلاهم قريب مني وافتر على ننوس
_ شنو هل لعابة اويلي يابه ، شسمچ ؟
_ ننوس اسمي وانتَ .
_ اسمي تريدين تعرفين اسمي
انصهرنا يالبصرة اسمي تراث .
ضحكت على ضحكت ننوس تقرب منها يبوس بخدها
وهي مستمتعة تتلمس برموشة لان طويلة الخايسة
متت بدمي من الخجل وهي ولا عبالك لو بيدها تگله
استمر بالبوس ، طلع محفظته طلع خمسة وعشرين الف
نقش : لا امانة لا تنطيها ليش تكلف على نفسك .
ألتفت يشوفني وصدت عيونه ورايَّ درت اني هم اشوف
جانت ايليا وأكفه بين المطبخ والصالة كاعدة وياهم
بس صوتنا مسموع ، ضحك ورجع يبوسها گال
تراث : اخت مُـرجانـة انتِ ؟
نقش : اي .
تراث : اختها الچبيرة ؟
_ اي صح .
_ شنو اسمچ ؟
_ ها .
_ اسمچ ؟
ننوس : اسمها نقش عابد ، اني ننوس ضـلـيل .
طلع خمسة وعشرين ثانية ورفع ايده مستسلم
تراث : معلومة زيادة اكتب ألبيت بأسمچ .
أبتسمت على تصرفاته وطريقته بالكلام رغم حزني
نزلتها وگعدت بمستواها أمسح بيدها وجهه
بالكلينكس ترخص وانا ترخصت ورحت .
رحت على امي شفتها بيدها شال مُـرجانـة
حاضنته حضن بين ايدها ، والشيخ يتوسل
بعمي ضـلـيل مايطلع وعلى اقل بس نتغدا
قفل فرد مرة وطلع سلمت امي واخر شي
حضنت ام وارث تأمنها وتحلفها بغلات
ابنها عيونها على مُـرجانـة وتحافظ عليها
الى ان ترجع تاخذها .
طلعنا بخيبة وحزن منزلين راسنا
سلمت امي على ابوهم واجه تراث
شال ننوس يودع بيها ويبوسها
تركتها عمو ضليل يحچي وياهم بعده
ورحت صعدت السيارة امي جلطتني بكلمتها
غـاليـة : لازم نشرد من ضـلـيل حتى ارجع مُـرجانـة.
ما لحگت اجاوبها وصعد عمي ضـلـيل
لونه مخطوف يخطف نظرات خاطفة
على امي واخذه الخوف خلت امي
راسها على جامة هادية هدوء زاد عمي
ضـلـيل خوف نزل بنص الطريق
دخل أسواق ورجع بيده تكه كاملة جگاير
والطريق كله يسوي اباده من الدخان
ما طفت الجگارة ثانية ابد رجع طبگ
السيارة على فندق دخل بالربع ساعة رحع طلع
ينزل بالجنط ينطيها للعامل يفوتهم ، وفتح الباب سحب
المفاتيح وباقي اغراضه وبصوت واضح گال
_ يلة بوية انزلوا .
غـاليـة : رجعنا للبيت .
ضـلـيل : ارتاح كم ساعة ونكمل عيوني غوشت .
غـاليـة : رجعني للبيت .
ضـلـيل : اه مو گلت ارتاح كم ساعة ما اگدر
اسوق روحه ورجعه من الغربية للبصرة بيوم واحد .
غـاليـة : رجعني للبيت .
ضـلـيل : انزلي لا اطلعيني من الإسلام انزززززلي .
نقش : عوفها عمو روح كمل نزلوا اغراضنا اني اقنعها .
طبگ الباب بكل قوته يسب بروحه
وامي سدت اذنها من صوته
غـاليـة : شلون هسة اخلص منهم
خربت كل أفكاري اختچ .
نقش : يمه متنا والله من الطريق وراح
اتخربط من الجوع حبابة بس نرتاح
كم ساعة ونرجع فدوة خلي نرتاح .
غـاليـة : اذا اظل وياه اخسره مُـرجانـة
واذا اعوفه واشرد راح يدمرني ويدمركم ويايَّ
وانا صار فترة تنازلت على روحي والله الخاطركم
حتى اوصل هل مرحلة ويعوف قرارات عشيرته واهله
ويسعى حتى يلم شملي بيها ويبعدنا عنهم ويحافظ
علينا شلوووون نطلع من حمايته والقران ياكلونا كلهم اكل .
درت نظراتي تشخصت على عمي ضليل
وأكف بشموخ رافع راسه يورق للعمال
من كملوا ، ويخابر يحچي منتظر ننزل
رجع فتح الباب من جهة امي وهي
صايرة نار بس تنتر بوجهه وما تباع
بعيونه لو بيدها هسة تعوفه وهوَ حس
ضـلـيل : ها نبسط بالشارع ما تنزلين
وتخلين البنات ينزلن .
غـاليـة : ما انزل رجعني .
ضـلـيل : شلون تخلّيني هسة
اسويها مسرحية بالشارع انا ماعندي لحيه
مسرحه بايعها كلشششش انزلي .
غـاليـة : والله فلا انزل لو اموت ما انزل اريد البيت
واذا تگدر تاخذني على بيت امي احسن .
ضـلـيل : انا مو سايق الخلفوچ أطرها
من الغربية للبصرة ومن البصرة البغداد تردين تموتينا
امشي انزلي الخاطر خالق الكائنات لا اطلع من
ثوبي وانعل هل عناد بالقندرة أدوسه .
غـاليـة : ضـلـيل وروح ذياب ما انزل .
ضـلـيل : خرّب اهلچ اريد ارتاح ول تعبت .
غـاليـة : اتعب احسن انا اريدك تتعب مثل ما تعبتنا اتعب .
طبگ الباب صرخت خايفة عبالي انضربت امي
ولا عبالك ولا تأثرت بقت ثابتة ، وعمي ضـلـيل رجع دخل
والعمال رجعوا يصعدون بالجنط رد صعد يشمر بأغراضه
ضـلـيل : والله من انعل والدي والديچ على هل عناد مال
انزلچ هساع هين اگضي بيچ التوبة وحق الله اتوبچ
جاهل انااااا عندچ جاهل تردين نمشي بكيفچ .
وامي بتجاهلها تخلي يزيد ما ينقص بالعصبية
انواع السب والصياح ما سكت يسوق بالسيارة
بسرعة رهيبة انقبض گلبي مرتين توسلته يخفف
وهوَ عبالك فاصل بغير عالم راح من العصبية
ما يشوف ولا يسمع بعد انجن جنونه
غـاليـة : خفف السرعة راح استفرغ من الوجع خفهاااااااا .
ضـلـيل : صوووووتچ بنت ذياب صوتچ
لا يعلى على صوووتي .
وياريت يهدي بالسياقة يزيد بسرعته الحد نص الطريق
وگلبي طاح بيدي من شخطها ونزل ركن على صفحة
اخذ بطل ماي ويغسل بوجهه وذب على راسه
حتى يصحصح رجع يسوق يحاول يركز وكل
ساعة وشوية يكررها وينزل يغسل بوجهه
عيونه صارت تخوف بگد ما تعب من التركيز
بعدنا بنص الطريق واتصل على شاهين
_ انتَ وين ، انتظرني بمدخل الغربية انتَ وسيارتك بساع .
مافهمت شنو يقصد الى ان وصلنا ودخلنا
لمحت شاهين من بعيد منتظرنا صف عمي سيارته
ونزل يأشر ويعلم بي شيسوي وعافنا وراح
صعد بسيارة شاهين حركها وراح طلع قبلنا ما ادري
وين اجه شاهين يتصفن بالوجوه
_ شصاير شبيكم ليش وجوهكم ما تتفسر ؟
نقش : طلعت روحنا من الطريق وصلنا لا تكثر اسئلة .
شاهين : اي بأمرچ عيني ست خدامچ اناا تأمررري .
شغلها وطلع يسوق بطيء مو مثل عمي ضـلـيل طاير
حتى واصل قبلنا لأن سيارة شاهين بالباب ما ادري
شلون واكف بيها لا هي بالطول ولا هي بالعرض
وصلنا بعد ما ردت ابچي من التعب تكسرت إعظامي
نزلت امي فوتتنا قبلها حتى تأمن صرنا بالبيت
اعترضت طريقها بجبروتها صاحت
_ وين جنتي بنت ذياب على شني ترسمين ؟
غـاليـة : نصيحة لله عوفوني اليوم
انا اليوم مخبلة عوفيني .
ام ضـلـيل : اكلي قنادر طبچ مرض مخبلة على روحچ .
تجاهلتها امي تريد تعبرها ترجف من وجع راسها وقهرها
طبگت باب المطبخ بعكازتها تمنعها تصعد
غـاليـة : كووووووثررررررررر فكيني من شرچ
لا هسة اخلي النار تاكل الحطب كلهههههه .
فزيت وركضت عفاف فتحت الباب
كوثر ابتعدت من الطريق من رج البيت
رج بصوته العالي من الديوان وهو يصيح
ضـلـيل : عوووووووووفوهاااااا لا تهجم بيوووووتناااااااا .
خلت وصعدت وننوس تبچي على اكل صبيت وكلتها
وكل شوية تجي يمي العجوز تسألني شكو وشصاير
من اتجاهلها تضربني بالعصا على راسي
طلع شاهين من الديوان يركض مخبوص
كملت ننوس صعدتها سبحتها ورحت على غرفة
جبت ملابسها بدلتها ورجعنا على غرفة امي
كاعدة ايدها على راسها طلبت بتعب
_ راسي يريد ينفجر يمه نقش اخذي اختچ
وروحوا بغرفة عزيزة ناموا وارتاحن اريد اطفي
كل انارة الغرفة الشقيقة راح تموتني .
غـاليـة ..
قفلت الغرفة عليَّ وملخت الشال من راسي جسمي
سعفة تنتفض ، ملخت شعري گطعته تگطع
رحت اشوفها رجعتني فشلتنا، جريت شالها
عطرها بي بجيت ماتحملت بعد بجيت بعالي صوتي
بلا ما افكر الغصه بعد موتتني اريد اطلعها بودي
بهل لحظة اموت من كمية الضعف شنو اسوي
امنيتي اعرف شلون اتصرف .
ضرب الباب وبكل وضوح طلب بدون رجعه
ضـلـيل : بنت ذياب فكي المهجوم .
اخذت بطل الماي غسلت وجهي ومسحته حيل بالمنشفه
ورحت فتحت الباب اذا ارفض يسويها شهيرة يخلينا
رجعت اطلع ملابس اخذتهن وطلعت من كل الغرفة
مو متحمله وجودة ، سبحت وطولت بالساعة من ردت
اوگع انتهيت من البچي وجهي تملخ تملخ رجعت للغرفة
اشرب بالأدوية عسى يخف الوجع .
وهو گاعد يلوب لا اكل لا شرب لا نوم گاعد استعداد .
فاتت علينا عفاف بيدها صينية عبارة عن أكلات
شفتها واني آرفع باللحاف ما اهتميت راحت خلتها
مقابيله نمت على چرباية وغطيت روحي هي تراقب
تشكر منها بخفوت وطلعت سدت الباب وراها
ضـلـيل : غالية .
_ ضـلـيل عوفني وروح منا دخيلك ودخيل الله روح مني .
_ وعزة جلالته إجي هساع ازوعچ العافية .
_ مودعتها ماعندي عافية ارتاح .
دفر الطبلة واجه اتجاهي عت ايدي ورفعني من زندي
عطت متوجعه من حركته وراسي يصل على عيوني
ضـلـيل : تريدين تخبليني ول شتردين مني هلكت منچ .
_ طلگني .
حجيتها لو ابتليت الكلام صار مايعبر والضرب ماينفع
وانا على طولي لزم دشداشتي سواها وصلتين
ورفعني من خصري يهدد ويتقرب مني مانعني اتحرك
ضـلـيل : كثفت الحراسة برا والسياج كله بلشت
اضربهن سور ثاني وعتبت باب المطبخ بعد منعت
تعتبيها وتطلعيها بنت ذياب انتِ گدها سويها واطلعي .
تقرب اخذ الي يحتاجه ، شمرني وابتعد يبدل وطلع بركان
انتفضت وكفت اريد اتعارك وياه
لو اغسل اريد اروح للحمام والدنيا
كلها افترت بيه سمعت صوت الطبه من وگعت
اندفر الباب ودخل يرفعني بحضنها احس
بي بس مابيه احچي من وجع الشقيقة
وقهرته شلون عاملني بهل وقت المر
حضني على صدره يغطي بجسمي ويصيح
بأسم عزيزة اجت تركض تساعده يلبسني
عافني بيدها ونقش اجت لزمت ايدها وهمست
_ لا تخافين مابيه شي والله مابيه شي .
انقبض گلبي من صاح على شاهين يشغل سيارة
اجه يصيح يريد ياخذني ضربته بلا وعي ادفع بي
مايهمه ، صار يتفاهم بالإجبار عجبه الوضع ورجع
غصب عني اخذني حتى ماشفت احد منهم
دخلني طوارئ اجت الدكتورة اخذت تحاليل
وسألتني كم سؤال وطلعت مستعجلة
مغص ضربني ببطني وظهري اريد اروح
للحمامات عزيزة لازمتني بكل قوتها
اول ما دخلت شفت روحي انزف دم
طلعت مخروعة اريد الدكتورة وادعي
تفكيري وشكوكي غاط ووهم .
اول ما دخلت الغرفة ابتسمت الدكتورة بوجهي
ضـلـيل مطلع المحفظه يكيت فلوس من الفرحة
الدكتورة : مبروك طلع ويانا حمل .
لزمت بطني قوي من الوجع اريد اوگع صحت بيها
غـاليـة : نزفت عندي نزيف دكتورة .
تبدلت ملامح ضـلـيل من الفرح للرعب تخبل
اخاف باقي شوية عقل براسه ، اخذني على سرير
يصيح على دكتوره وبدون خجل يبلغها
_ مرينا بطريق طويل ، ويمكن لان تقربت منهاا وأذيتها .
بس الدكتورة عادي عدها بالعكس استفادت مو
كلامة واخذت ابرة ضربتني : مثل ما بلغتك بعدها بداية
احتاج فد اسبوع او عشر ايام حتى نرجع نعيد التحليل
ونتأكد اكثر من الحمل ، وماكو خطر ان شاء الله .
خلت مغذي غفيت من غطتني عزيزة
ومن اجت الممرضة شالت الكانولا من ايدي فزيت
ساعدتني انهض اخدني من بين ايدها يبوس براسي
ويسحب بيدي يبوسها ، من دفعتي عرفني ما فرحانة
ولا ناوية على خير حفظني ويعرف تخطيطاتي
صعدني بالسيارة يمشي بيها بهدوء بي وصلنا
اشوف اربع طليان تمددت بالشارع قريب من رجلنا
تتذبح على خبر الحمل وامه بالباب تهوس عود فرحانة
ومقتدر وشاهين على راس الگصاب .
وهو ايده على راسه يتشكر منهم ويضحك
من گلبه ، هزيت ايدي وعبرتهم كلهم وفتت
على بيت انا بيا حال وهذولي وين عايشين
مريت من ام ضـلـيل بدون خجل تسمعني
_ والله وسويتيها غـاليـة وراح تسيطرين
بعد على بيت والعايشين بالبيت الله يسترنا منچ
راح تاخذي وتلعبين براحتچ .
اريد اصعد سمعته يجاوبها
ضـلـيل : على اساس ذابحه روحها على المهجوم
هي لا تريده ولا تريدكم ولا تريدني .
جرني من ايدي قبل لا اصعد فوتني على غرفته
شاغت روحي من ضبت ايده على ايدي
غـاليـة : افتح الباب اريد اروح فوك .
_ رجعنا النقطة الصفر رجعنا مثل قبل .
_ افتح الباب لاااا تخليني اصيح اريد اصعد .
_ ول غـاليـة راح تعيدين عذابي قبل ، راح تشردين مو ؟
غـاليـة : صرت بين اختارك وبين اختار بنتي و .
_ اششش لا تحجين .
_ انا دخلت هل بيت وتزوجت اخو زوجي ولدت بنية
بأسمك وحاولت اتقبلك وتقربت منك الخاطر بناتي
وأنهي كل هذا الخاطر بناتي .
ضـلـيل : وانا خيروني بينچ وبين اخوي
بعت اخوي الخاطرچ گلت اطلگها اخوي
ما يتعوض الحرمة تتعوض تجي غيرها
من ادحگ بوجهچ غيرت كل كلامي وگلت
غـاليـة مو اي حرمة غـاليـة ما تتعوض
واختارها اختاريت غـاليـة وعفت اخوي
طلعتو حتى من العشيرة طلعتو هو وابنة
الخاطر عيونچ ، ونزلت من كرامتي وقدري ورحت
للبصرة اتذلل للموروث وهوَ حتى ما احترمنا وقدرنا
اخذها وطلع قبل لا نوووصل يتعمد يهين بيه
وبلعتها الخاطرچ هاي جزاتي تبيعيني .
غـاليـة : ما اگدر احنا ما نتراهم ابد .
ضليل : غالية ليش ابد ما حبيتيني ليش ؟
امتنعت عن الرد وأكتفيت أستدير على باب اريد اطلع
ضرب الباب فلشه بيده وكسر ايده وياه بقيت
مركزة بوجهه تعبان من التعب وجهه صار اسود
حضني بكل قوته على صدره وابتعد من
شاف ماكو مني استجابة حضن وجهي يتوسلني
ضـلـيل : تريدين تعوفيني مو ناوية تشردين وتعوفيني
احجي ريحي گلبي غـاليـة گولي لاا ما اعوفك .
غـاليـة : ما اجذب عليك اريد بنتي اريدها .
ضـلـيل : اجيبها وحق الله اجيبها بس صبريلي
راح ادورها وأجمعكم واذا تريدين هنا غصباً
عليهم أرضيچ وخليني اخسرهم كلهم
حتى لو اخسر هيبتي بين الناس قابل بس لا تعوفيني .
اخذ ايدي يخليها على گلبه يدك بصورة جنونية
ضـلـيل : وحق الله وغلاتچ ومعزتچ راح اموتن
احس روحي راح تطلع من رجعنا مناك لهل ساعة
مكفوخ على وجهي من عرفت سببها دريت ما تبقين عندي بعد .
لزمت بطني متأذيه وملت راسي على حايد متمسكه بي
غـاليـة : وانا راح اتخربط ضـلـيل كافي .
ضـلـيل : يولو اتوسل بيچ انا اتوسل بس لا تعوفيني
هذا الطفل شلون فهميني ورطتيني حاجيني راح انجلط .
شكد مقهورة منه ومنهم كلهم بس مصدومة بروحي
گلبي يوجعني على حالته اول مرة نتعارك ومن يوصل
هل حالة انقهر وينمرد گلبي وأتأثر واحاول اخلي يهدي
غـاليـة : ما رايحه بعدني هنا بعدني .
ضليل : الطفل شلون بي هم راح تحرميني
منه عوفي محلفچ بمحمد احلفچ بالله
بداعت بناتچ عوفي خلي هم يتسجل بأسمي
حتى يصيرون اثنين بأسمي مكتوبة بس منچ نسلي
بس منچ لا تحرميني منه حلفتچ انا
حلفتچ ذليتيني حاجيني .
حضنته بخوف حضني ونزل راسه يشم برگبتي مكسور
ضـلـيل : بروح ابوچ لا تروحين حلفتچ بأبوچ
اريد اربي هذا الطفل ولد بنية راضي انا شيخ أحتاجهم
اريد بزره تشيل اسمي قبل لا يطمني الگبر
مليت وانا اجبر روحي اتگرب من نسوان ما ارغب بيهن
وانتظر وحده تفرحني ، انتِ اجيتي معجزة حبيتچ
ونسلي مكتوب منچ بس انتِ شلتي طفل مني
خليني افرح بي القران عليچ تخليني افرح بالطفل .
غـاليـة: عندي شرط .
ضـلـيل : قابل من هسة قبلت .
غـاليـة : لا تسمعني للأخير لان ما راح توافق بسهولة .
ضـلـيل : راح تلچمين گلبي ومحمد .
غـاليـة : انعيش طبيعي مثل اي اثنين متزوجين
واخليك تعيشها فرحة حملي وولادتي كلها شاهد عليها
والتجهيزات واسلمك الطفل سجله بأسمك
وافرح بي بس عندي شرط بعدها انتَ تنفذه .
راح جر بطل ماي شربه كله جره وحده واشر بيده اكمل
غـاليـة : تجمع اخوانك ، وكبارية عشيرتك
وعشيرتي هم شاهدة وموجودين
وعشيرة ثالثة تتواجد ، اريدك تكتب بشهود الكل
تعهد انتَ واخوانك وتضمن وتتعهد الباقي
من اولاد عشيرتكم من اخذ بناتي واطلع
منا ما تتعرضون النا ابد ولا تأذوني
بيهن ولا تهدرون دم بنتي وتنساني
واهلك يمحون بناتي من راسهم .
طگها بضحكة عالية اعرفها هل ضحكة
بس من ينقهر وتوصل حدها وياه يريد ينفجر يضحكها
ضـلـيل : وحق ربچ وربي من يوم دخلتي
عليَّ سلمتيني روحچ بذاك اليوم حسبتها
سكرات موت وعشت بيها الفترة الفاتت كلها
صوت براسي يگلي هذا ملعوب من غـاليـة لا تأمن بيها
وجنت اشوف الحقد بعيونچ ينط كل ما اتگرب منچ
عرفت تريدين تلزززززميني من ايدي الي توجعني
تضربيني بأكثر شي أتمناه ومحروم منه الأطفال
حتى تسيطرين وتتمكنين وتحققين غايتچ بطلة
بنت ذياب وربچ بطلة سويتيها ربحتي وخسرتيني
وعد زلمة مني راح اخسررررررچ گلشي .
ملِكه ..
دفعت باب الغرفة برجلي ودخلت البيت فارغ يصوصي
وهذا مفتوح راسو ومخيط مدري جسمو متكسر
وايدو اثنينهم ملفوفات ويون من الوجع لازم راسو
ويتبعثر هين وهين من الوجع وصاعدة نازلة يرزلني
ورم گلبي منو بس صبرت وتحملتو استخطي بشدة .
بكامل قواتو العقلية متمدد ويتأمر ، خليت الأكل لو
بيدي ادحسه بحلگه بس خليتو وحدو ونزلت الملم المطبخ
اجت امو تهفي بعبايتها عبالك انا ضربت ابنها الخايس
دفعتني استفتاحية وصعدت اسمعها تصرخ
_ راح شمرت اخوك بالحبوس وتركض على همام
واختو الفوصه ام الزلم تريدوها وفتحوا راسك
شنو يريدون مني اولاد ساجر خلصوا ولدي .
بيرغ : اخوتي تريدين اعوفهم وترتاحين ؟
ام بيرغ : عوفهن انعل خيرهم وطلع اخوك واخذ ورثك
غصباً عنو ونروح منهم هذولي يريدون يستغلونك
شافوك احسن منهم شهادة ورتبة تسواهم وشخصية
يطمعون بيك لا انوب يموتوك بيمن ربحي .
ماسمعت جوابو بس بقت تترادد وياه ونزلت
اول ما وصلت يمي خلت شعري بين ايدها
وفرتو فر ورجعتو هو وظهري حسيت
راح يطگ ظهري من حلات روحي
بعدت ايدي وضربتها بعكس ايدي حيل
على صدرها بصف گلبها من عافتني
درت عليها دفعتها كربحتها
لطمت وعاطت عياط فززت گلبي وباد حيلي
وكفت تفتح بالماي انا عبالي مدري شبيها
تريد تغسل يمكن داخت ، الماي صار حار البخار يطش
منا ومنا اخذت گلاص ملتو ورفعت يدها تريد تشمره عليَّ .
لزمت ايدها بكل قوتي اغتاظت روحي
منها بعد ما اتحملها رفعت الگلاص
كله هو والماي فلشته براسي حيلها يعادل
حيلي بمرتين ، خلتني كتكوت يمها بس
ما سكتت عليها دفعتها على كاونتر
بالحافة انضربت بقت تزاگط وجريتها
اريد احرگها مثل ما حرگتني عاطت عياط
من سمعت صوت خطواته يركض على درج
عفتها ولا خافت جرتني من راسي تريد تفور راسي
على ماي الحار ادفع بروحي وهي تدفعني
ما حسيت غير انسحبت من
بين ايدها ختلت بظهره اسب بيها
ملِكه : الله لا يوفقچ كسرت الگلاص براسي
حرگتني بالماي الحار والله ما اعديها وهسة اروح
على اهلي يشوفون حالتي هاي اخاف منچ انتِ تموتيني .
ام بيرغ : امشي ام الشوارع امهات الزلم .
ملِكه : تاج على راسچ انا تروحيلي فدوة
انتِ المجرمة تربيتچ الخايسة واضحة من ابنچ المغتصب
يتيمة وانتِ احلف عليچ انتِ قابلة ودخلتي على بيت.
ام بيرغ : وبس يطلع اخلي يغتصبچ ويلعب بيچ .
شهگت على كلامها واندهشت بخوف من رد فعل بيرغ
كسر ميز الطعام گزاز بيدو مزقها تمزق ويضرب على صدرو
بيرغ : يغتصب منوووووو يغتصب مرررررتي ؟
_ لا يمه والله مو قصدي خلتني افقد .
بيرغ : دخيلك يا سيد الكوووون اگلبهاااا
بينا اطلعي يمه اطلعي منين ما اجيتي
ارجعي على اخوتچ العارية لا اسويها
موووو زينة والله اسويهااا موووو خووووش .
عفتهم وصعدت واسي يفتر فلشت الگلاص براسي
الله لا ينطيها ولا يوفقهاااا الحقيرة ، دخيلك ربي
اني شسويت وتمتحني بهل عائلة القذرة منين ما اميل
قذارتهم معبيه الدنيا ، رجع صعد لازم راسو يصرخ
من الوجع ويسب بأعله وبواحد اسمع بندر زوج اختهم
ورجع عليَّ يسب ويلعن عفتو وحدو ونزلت البيت فارغ
اسب بيهم بعلو صوتي عاط بيه حتى اسكت منه ما سكتت
ورجعت اسبهم وادعي عليهم لوعوني الله يلوعهم لوعوني .
فات همام يركض وسهم وراه يصعدون اربع بايات
اربعه ودخلوا على غرفتنا ركضت وراهم ضربت على
وجهي من شفت بيرغ بالگاع واگع الدم يصب من راسه
وايدو تنزف فاقد الوعي ويون بس يون .
رفعوا من الأرضية الباردة وصعدوا فوك السرير
همام يفتح براسه وينشف بالدم ويعقم بالخياط
وسهم يشتغل على ايده من ميز الطعام متمزقة تمزق
رن تلفون همام شمره عليََ وصاح
_ جاوبي اطلعي برا جاوبي على وارث ولا تبلغي بشي
خلي يرتاح كم يوم من مصايبنا راح يعوفنا من المشاكل تعب .
اخذتو وطلعت رديت امشي بالممر فوك بين الغرف
واقرض اظافري مرتبكة منه مدري ليش
ملِكه : احم هلو وارث .
_ شبيهم همام وسهم يتراكضون صاير شي
بيرغ ليش راسه ملفوف شصاير منووو وياهممم .
ملِكه : ها شلون عرفت وين شفتهم اسم الله .
التزم الصمت ثواني ورد معصب
_ وصلتني اخباركم شصاير ملِكه ؟
ملِكه : بندر ملخ روغان تملخ وروغان عصبي
وامه اجت كتلتني وهو فلش ميز الطعام بيده
ايده تعورت بالگزاز انوب ظل يغلط عفتو ونزلت
طلع متخربط همام وسهم مدري شلون عرفوا .
طبگ الخط بوجهي حتى ما سمع الباقي بقيت اباع على
تلفون عبالك كفخني هذولي ولا بيهم واحد صاحي ثول .
طلع همام اخذ التلفون مني ونزل مستعجل وسهم
بعده يلف بيد بيرغ ، وهذا فاتح عيونو صاح بيه
بيرغ : تعالي شربيني حبوب مسكن راح اموت .
اخذت من العلاگة حبوب اثنين جرهم من ايدي شربهن
وضربني بالبطل عود عصبي السافل
رجع همام طلب اجيب ماي نزلت وسهم طلع يغسل
بيده من رجعت اشوف همام بيده نفس الأدوية
وشربهن بيرغ اخذ اربع حبايات مسكن
ومدري شخبط بالماي شربه كله عود تسكين
وعافوا وطلعوا يرجعون للاراضي يريدون .
نزلت قفلت البوب كلهم من طلعوا وصبيت اكل
اريد أكل قبل لا انام ، باوعت قليل على تلفزيون
وصعدت بدلت دشداشتي بدشداشة اخف مال نوم
ورحت على طرف الثاني اريد انام وكف روغانه على حيله
اجه يمعي عيونو حمر صايرات اخذ المسدس
من الكنتور رفعه بوجهي عطت وكفت على چرباية
اكمز من الخوف مبين مو بوعيه
_ نزل السلاح هذا لا تطلع وحده بالغلط واموت .
بيرغ : ولچ تهينين بيه بالشارع
تضربيني خليتيني مضحكة .
_ يبووووو علينا يبووووو راحت بعد راحت خلصت .
ضرب بالمسدس على گلبه وصرخ بأعلى صوتو
_ بعدها تاكل بگلبي ول تمرررد بگلبي والله
شلون تضربيني وتگولين لو انتِ زلمة تعال للبيت
اخ اخ بس لو بذاك الوكت طايحة بيدي امزقچ تمزق .
شلت المخدة ونزلت احتمي بيها من كل عقلي
ملِكه : شنو هذا شبي ول يعيني بس هدي گول يا الله
_ ما اگول .
_ شيطانك قووووي .
_ شيطاني يگول اذا ما تردحين ردح صباحي هسة
ادگچ بطلقة اعدم بيها ملامح وجهچ .
من گال هيچ عگطت المخدة ودفرت الميز والچرباية
_ همك هذا كل همك لوو تموت ما ارگص لو تموووت .
_ استري على روحچ حتى ما ادخل سجن ردحي .
_ انتَ بيا حال بدل ما تفتح سجادة وتصلي
لو ما لطف الله ميت هسة مفتوح راسك طيح الله حظ الرتب .
بيرغ : ميت راح اموت بس حتى ترگصين
لا بقيت شهيرة ما سويتها عود اشهرچ شهرت روحي
هههههههه ، التوقيف صار ألچ والأهلچ ما خليت
وولد عمچ لا ابوچ لا عمامچ كلها شمرتها حتى
بس احصلچ وترگصين .
ملِكه : عندي شخصية زلمة حوك معدل بداخلي
لا توازيني اهده عليك هساع يردعك .
فتح الكنتور ركضت على باب اريد اطلع صاح
_ وروح ابوية بس ينفتح الباب اضربچ طلقة .
_ بأحلامك والله فلا ارگص لو تمووت .
_ راح البس عسكري اشد الرتب ولو بعد سحلتيهن
انتِ جدام العالم بس ألبسها وتهزين هل شحم ولحم
جدامهن جدام الرتب هزي هزي رجفي خصرج
اركصيلي وبعد هزي حتى اسلمها تررررراب هههههه .
فكيت حلگي من الصدمة اندهشت بهتت هذا
كلش سويقط الزلمة صخام بوجهك كون اذا صدك
هو مفتوح راسه ويلبس بالبدلة العسكرية لبسها
على حسب الأصول كاملة وتقدم قفل الباب .
ظل يشمر بملابسي طلع ملابس نوم لون عسلي
وبي اسود مدري منو مشتري هاي بس لا امي
اخاف هذا ذوقه هو مشتري شو مشگگ من كل مكان
تقرب عيوني على مسدس اخاف اتنفس ويطگني
بطلقة هو مو بوعيه ابد ابد مو بوعيه ، حصرتني
الدمعة وزادها هو هم حصرني حضن خصري
يبوس بوجهي ادفع بي وهو يدفع بالمسدس
بخصري همس بأذني ويجر بالكلمة
_ صار وقت الحساب اريد ثاري .
_ يول يا ثار هو غير رايح صاير دليمية انتَ سويقط .
_ ول بربوئه راح اموت .
ابتعد يطوطح الله لا يوفقك شنو هذا
شوكت شرب بس لا كبسل ردت اموت
من شمر الملابس يا ملابس شمر مدري
شنو مشگگ منا ومنا يگلي لبسي
عاندت وهو يهدد وكف حط المسدس
براسي حيل يدفع بي
_ ول لبسي لا اطگه براسچ اگول انتحرت .
_ البس غيره شو هذا كلش املخ تملخ .
_ مثل گلبي هم تملخ اريدو حبيتوو عجبني لبسي يلة .
اخذتو وطفرت بالباب مال الكنتور دموعي بلشت تكت
انحصرت بعد مامنها مهروب الوضع خطر
ذبيت ملابسي ولبستو حتى ما اعرف منين يدخل يطلع
منا راسي افتر من عندو بالويل دخل بجسمي
الظهر كلو مفتوح والصدر خزي زين البطن شبيها يااا
ولكم عيني ما اتحمل اموت من الفشله بحظ وبخت المخترعو .
مديت راسي لمحته مرجع راسو على تخم وغافي
نايم مدري شنو بس رجله تهتز موجوع
رجعت بخفه اريد اذب هل ضيم عاط
_ تعالي ما كملتي البدلة تعالي .
_ برأيي تروح على مكان بي بنات تسهر وياهن مو احسن .
_ لا مليت اريد حلالي يتهزهز ويفر
جدامي اخذي عقلي تعالي .
_ اني بيه گمل خايسة انا خايسة ما افيدك .
_ امطگ عليچ .
ضرب الميز وعاط بنفاذ صبر
_ اطلعي اشووووووووووف بنت الحيووووانات .
_ يا ابن الحيوانات .
وكف دايخ يريد يوصلني جرني ويفر بيَّ
يتصفن عيونه ذبلانة وجسمو يرتخي بكل فره مني
حضني يبوس رگبتي ضربتو على راسو بلا وعي
حتى يبتعد وركضت بزاوية الغرفة ، عضّ اصبعو
وتقدم اخذ ايدي ودفعتي على ديجي مدري منين طلعو
من جنت ابدل انوب مجهز كلشي حاسب حسابو
_ شغلي هزي هزي وهزززيلي يلة .
رحت ودمعتي نزلت شغلتها جرني باسني وايدو
على خصري يفر بيه ، ما اشوف غير شمر المسدس
دخل مود الأغنية وعلى دگها فتح ايده ويهز اكتافو
ركضت على تلفون خربانه ضحك شغلت الكاميرا
اصور بي اختنگت من الضحك صحت بي
_ اي يلة ارگصلي يلة هز سيادة المقدم هزها هزهااا .
_ انتي بس خصرج قضية وشعرج الاسود عذاب .
جريت شال لفيت جسمي هو رايح مسلمها بغير عالم
خليت المبايل بعيد يصورنا ورحت گعدت على تخم
طبگت رجل على رجل اصفگ واضحك ردت اموت
من الضحك وهو رافع ايده يرگص بس بثگل
انوب الحقير رگصه حلو عجبني عجبني
شلون يهز ويرفع ايده يتخيل روحو يكيت فلوس
ما خليتها بنفسو طلعت اوراق من السجل
مخليهم على ميز وصرت اشمرهم عليه
وفطسني فطسني من اخذ ورقه خلاها
بجيب البدلة ، واني نزعت دگم البدلة العسكرية
خليته ينزعها لبست قميصها وتشخصت
وگعدت استمتع الحد ما لزم راسه متأذي .
رجعت على تلفون وجهي دم صار تعبت بس من الضحك
قبل لا اطفي الكاميرا ضحكت وضربت الرتبة على كتفي
ملِكه : نزعتك انا نزعتك الرتب ولبستهن ورگصتك
وارگص اهلك والعشيرة ول حي الله الرتب واهلهاااا روووح .
فتحت الفديو حتى اول ما يفتح الجهاز الصبح
يشوف انجازاتو فديت انجازاتوووو سيادة المقدم
تقربت منه اخذني بحضنه يبوس بيه وصلتو
للسرير وشمرت جسمو كلو تألم وحضن ايدي سحبني
بيرغ : عامليني عدل انا تعبان .
_ نام خلصني .
_ انتِ مو حنينه على ابوچ اريد تصيرين حنينه ويايَّ .
_ روح امك تصير حنينة وياك .
_ لا ابوي مو حنين امي ماتهتم أنتِ حبابة
حبيني حتى تخافين عليَّ مثل ما تخافين على ابوچ .
رفع ايدو وعيونو تغفي ما تنفتح ثگيلة
_ ايدي توجعني راسي هم بوسيني يروح الوجع .
_ مو تكرهني اذا ابوسك يزيد الوجع .
_ جذاب انا ما اكرهچ بربوئه .
دار وجهه على جهة الثاني ونام متألم
ومايقبل يعوف ايدي غفيت من التعب
ودفو المكان بدون ما ابدل ، فزيت بعد أذان الظهر
اسمع صوت الأغنية نفسها وضحكتي
الخايسة ترن ترن بالغرفة وبيرغ گاعد على تخم
نشف الدم بجسمي من فلش التلفون تفلش وتقدم
اتجاهيرفعني من ملابسي بكل حيلو وصاح
بعدم تصديق عيونو تريد تطلع من
مكانها وشراينو راح تنفجر
بيرغ : ترگصيني ول مرگصتني اناااا المقدم بيرغ ارگص
الوحدة مثلچ اناااااا تضحكين عليَّ .
نزلت عيونو على صدر فتحت الفستان وبعدني لابسه
قميص البدلة بس مفتوح ، رفع أيدو قابضها
ناوي يضربني، حميت روحي بيدي
شمرني من سمع صوت باب الشارع تفلش
سحب تشيرت ركضت على دشداشتي البس بيها وانزل
وما اشوف غير فوج من الزلم دخلوا على گراج البيت
وخمسة زلام ناموا نيوم على بيرغ يضربون بي
وهوَ ما استسلم يضرب بهذا ويدفع بذاك صاح
_ منوووو انتوووووا ؟
_ ربع ال ضـلـيل احنه وصلنا لبيوتكم نرد الصاع صاعين .
_ شقصدك .
_ هساع اشوفك قصدي هههههههه .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.