رواية دكتورة في أرض الصعيد الفصل الحادي عشر 11 – بقلم نجمة الشمال
دكتوره في أرض الصعيد.
البارت الحادي عشر.
بقلمي نجمه الشمال.
ياسر كان ساند على العربية وبيصفر ببرود، بعد دقائق نزلت دهب وقالت بغضب مصطنع: بتعمل ايه هنا؟ وعايز مني ايه؟
ياسر بص بنظرات متفحصة: فعلاً المظاهر خدّاعة.
دهب بضيق: قصدك ايه؟
ابتسم ياسر بسخرية وقال: مش أنا عرفت إنك كنتِ عايزة تنصبي عليا بعد ما عملتي رهان مع أصحابك عشان أقع في غرامك وبعدها تاخدي فلوسي وتهربي.
دهب بتحاول تبقى هادئة: ايه الكلام الغريب اللي انت بتقوله ده؟ شكلك سكران.
ياسر قرب منها بخطوات بسيطة وقال ببرود مرعب: الكلام اللي بقوله ده الحقيقة اللي بتحاولي تهربي منها، وأنا مش بشرب.
دهب: لو مش مشيت هطلب لك البوليس وهقول إنك بتحاول تتعرض ليّا.
ضحك ياسر بسخرية وقال: اطلبِ البوليس، بس ايه رأيك نخلي لكِ ملف في الداخلية وبالمرة نعرف الناس اللي نصبتي عليهم؟
دهب الخوف ظهر عليها، قالت: طيب انت عايز ايه دلوقتي؟
ياسر: عايزك تكملي في لعبتك، وبعدها هقولك عايز ايه. ركب عربيته وقال: بكرة يكون عندي ردك يا دودو، وانطلق بسرعة.
دهب كانت بتبص عليه بتفكير وقالت: طلعت ذكي يا ياسر، بس لازم أوافق أنا مش عايزة أتسجن.
في بيت روبرت، الدكتور اطمن على عاصف وخرج وملامح الحزن ظاهرة عليه وقال: عاصف حالته النفسية وحشة وشخصية صخر تقريبًا بتحكم فيه بالكامل.
روبرت بحزن مخفي: طب ايه الحل؟
الدكتور: الحل الوحيد إنه يتعالج من حالة الانفصام.
روبرت هز راسه بهدوء: شكرًا يا دكتور، اتفضل أوصلك.
رجع بعد شوية صغيرين، قعد على الكرسي وفضل يبص على عاصف وهو بيفكر في حاجة عايز يعملها.
بدأت الشمس تعلن خيوطها الذهبية المشعة.
فتحت سحاب عيونها، ظهر شبه ابتسامة على وجهها، قامت اتوضت وصلت.
دخلت المطبخ وعملت سندوتشات، وعملت كوب نسكافيه، وقعدت في البلكونة، سحبت فونها وضغطت على اسم في قائمة الاتصالات وفتحت الاسبيكر، وسابت الفون على الطاولة وقالت: بابي واحشني جدًا، معلش مش بكلمك اليومين دول، مضغوطة جامد.
نور بحنان: وإنتِ واحشاني أكتر يا قلب بابي، أنا مديكي العذر بس مامتك مضايقة منك جدًا.
سحاب بهدوء: أخلص معاك وهتكلم معاها، المهم يا نور كنت عايزة منك خدمة.
نور: قولي يا قلب بابي وإن شاء الله هقدر أعملها.
سحاب أخدت نفس واتكلمت: عايزة أتأكد من موت بسمة والسبب اللي خلى عمار يدخل غيبوبة.
نور بفرحة: بجد؟
سحاب: أيوه بجد، بس فرحت أوي كده ليه؟
نور بتهرب: بس اشمعنا دلوقتي؟
سحاب حكت له كل حاجة باختصار.
نور: طيب تمام، الموضوع هياخد وقت عشان بقاله كتير.
سحاب: ماشي، أنا متفهمة الوضع، هياخد وقت بس أكيد تقدر تسرع شوية.
نور: هحاول، يلا في حفظ الله، أسيبك عشان تنزلي شغلك.
سحاب اتصلت على مامتها وفضلت تكلم معاها شوية.
خلصت ونزلت في اتجاه المستشفى.
بعد شوية وصلت ودخلت المكتب ولبست البلطو وبدأت تمارس عملها وتمر على الحالات وتقرا التقارير.
صحى عاصف من النوم وكان حاسس بصداع، قام وقف وراح ناحية روبرت اللي نايم على الكرسي وبدأ يصحيه بهدوء.
فتح روبرت عيونه وقال: انت كويس؟ أطلب الدكتور؟
عاصف: أنا كويس الحمدلله بس مصدع شوية.
روبرت: طيب استنى، هخلي الخدم يجهزوا لك فطار خفيف ومعاه برشامة صداع.
عاصف: لا مش قادر آكل، عايز بس البرشامة وهبقى كويس.
روبرت هز راسه بقلة حيلة، وأخرج فونه واتصل على حد من الخدم وطلب منه يجيب Paracetamol.
نزل عاصف وقابل الخادمة وأخد منها الدواء ومشي.
بعد مرور وقت وصل عاصف محل العطارة وبدأ يمارس شغله ويشوف النواقص ويكتب في الدفاتر ويراجع الحسابات ويتأكد إن كل حاجة تمام.
بعد ما خلص قعد على المكتب بتعب،
وعيونه وقعت على درج معين،
قرب منه وأخرج مفتاح شكله غريب وفتح الدرج، ومسك ملف من اللون الرمادي وفتحه وبدأ يقرا كل كلمة بتركيز شديد، وظهر شبح ابتسامة وقال: مكنتش عايز أعمل كده.
وخرج، ركب عربيته وانطلق بسرعة متوسطة.
دخلت سحاب الغرفة بتاعته وقعدت على الكرسي بتعب، وحطت إيدها على رأسها وكانت بتفكر وسرحانة.
بعد شوية الباب خبط، لكن مفيش رد.
دخل بخطوات ثابتة وقعد على الكرسي وقال: مالك يا دكتورة؟
سحاب رفعت عيونها وقالت: تايهة، وبصت على ملامحه بتركيز وقالت في نفسها: دي شخصية صخر، رسمت البرود وقالت بحدة خفيفة: ممكن أعرف عاصف ابن الشناوي بيعمل ايه في مكتبي؟
ابتسم عاصف ببرود وقال: لقيت نفسي فاضي قولت أجي أوريكي الملف ده. وحط الملف قدامها.
سحاب مسكت الملف وفتحت أول صفحة، مكتوب اسم بسمة بخط مميز.
عاصف: لما جيتي عند روبرت وسألتي عن بسمة كدبت وقلت إنها كيوت وبس، بس الملف ده هيعرفك حقيقة صاحبتك.
قام اتحرك ناحية الباب.
سحاب بصت على أثره وقالت بهمس: كل حاجة هتظهر قريب.
عاصف لف ليها وألقى نظرة سريعة وخرج.
الفصل التالي اضغط هنا
يتبع.. (رواية دكتورة في أرض الصعيد) اضغط على اسم الرواية لتجد الفهرس كاملاً بجميع الفصول.