رواية خاطف مجهول – الفصل الثالث
_طب يلا روحي استخبي بسرعة.
طلعت اجري في الضلمة وانا مش شايفة حاجه ومش عارفة انا رايحة فين.
فجأة سمعت صوتها قريب مني وصوتها كان عالي جدا
_انا قربت منك، انصحك تغيري مكانك لو عايزة تحافظي على حياتك.
قومت اجري تاني لحد ما تعبت وقعدت في ركن بعيد
بعد شوية وقت مش عارفه قد ايه حسيت بإيد بتتحط على شعري مع صوت عالي ومخيف
_لقيتك اخيرا!!!
لفيت راسي بخوف لقيتها وشها مش باين من الضلمه بس كنت قادرة المح ابتسامتها المخيفة وهي بتبصلي زي الشيطان اللي لقى الضحية بتاعته.
كملت هي وانا مرعوبة وقلبي بيخبط في جدرانه و
انفاسي اتكتمت وحسيت ان الدنيا بتلف بيا خلاص
_برافو عليكي قدرتي تستخبي مني كويس،الوقت خلص.
دي كانت آخر حاجة سمعتها قبل ما افقد الوعي.
_______________♡♡___________
_ها طب وبعدين.
قالها يونس وهو بيبصلي باهتمام وحماس عشان اكمل.
شربت بق من القهوة وانا برد عيله
_معرفش بعدها فوقت من النوم.
_يلهوي على فصلانك يا يمنى انتي كل مرة تقومي على اهم حته!
_اعمل ايه طيب يا يونس هو بمزاجي،حاضر المرة اللي جاية هقول لجسمي لأ متقومش ارجوك لحد ما نشوف اللي جاي.
نهيت كلامي بسخرية كبيرة فا بصلي بغيظ.
_انا رايح مكتبي انا غلطان اني جيت اسمعك اصلا.
_استنى بس في حاجه مهمة.
لف وقعد تاني قدامي بعد ما كان وقف.
_عدى يومين على فكرة.
قولتله كدة وانا بحرك صوابعي الوسطى و السبابة بتوعي قدام عينه.
قعد ساكت ومستغرب وبعدين نطق اخيرا قبل ما أقوله انا
_اه قصدك الخاطف المتخلف اللي احنا ماشيين ندور وراه على اي دليل؟!
مقدرتش امسك ضحكتي من اللقب اللي طلعه عليه يونس الصراحه.
تصدقو اسم مش بطال”الخاطف المتخلف”.
رديت عليه وانا بحاول اهدى من ضحكي
_ايوة هو المتخلف اللي انت قولت عليه ده هنعمل معاه ايه بقا؟
_مش عارف بس احنا المرة اللي فاتت محطيناش ابن اللواء أدهم فممكن يجي تاني عشان ياخده وممكن يعمله skip ويدخل على اللي بعده.
بصتله بسخرية كدة ورفعة حاجب وقولت بنرفزة بسيطة
_انت عبيط يا يونس يعمله skip ازاي يعني هو ليفل في لعبة الازازة المتخلفة اللي بتلعبها دي!؟
راح بصلي و برق كدة
_لأ مسمحلكيش اسمها bottle flip .
غمضت عيني بغضب شديد بحاول اتحكم فيه بس صوتي خرج عالي شوية
_اطلع برة يا يونس عشان بالله ما انا ناقصاك انا فيا اللي مكفيني.
_طيب طالع متزوقيش بس.
بعد شوية لقيت اللواء داخل المكتب بتاعي وجايب بوز الأخص معاه اللي هو طبعا”يونس”
بعد شويه صمت قطعه اللواء
_ها يا حضرات هنعمل ايه بقى؟
هزيت كتفي انا ويونس بمعنى “معرفش”
لقينا اللواء اتعصب مرة واحدة وراح قال بصوت عالي
_امال مين اللي يعرف يعني، مش انتو اللي شغالين على القضية؟!
رديت عليه بثبات نوعا ما
_حصل يا سيادة اللواء بس احنا برضو مش لاقيين اي دليل و اليومين عدو يعني المفروض ان الخاطف انهاردة هياخد طفل جديد واحنا مش عارفين هنعمل ايه.
بصلي باقتناع نوعا ما برضو
_مش آخر طفل كان من يومين اللي هو ابني واحنا حطينا الكلب بداله؟
_ايوة بس احنا منعرفش هل هيرجع ياخد ابن حضرتك تاني ولا هيروح على البيت اللي بعده.
_يعني مفيش دليل،اوكي خلاص مش هنعمل حاجه لحد ما نلاقي دليل بقا صح؟
نهى كلامه بسخرية وهو بيبص لنا احنا الاتنين من فوق لتحت.
وخيرا يونس فتح بقه من ساعة ما قعدنا
_احنا بنحاول والله يا سيادة اللواء و بنعمل اللي نقدر عليه.
اللواء قام وقف عشان يمشي بس قبل ما يمشي قال آخر جملة
_طيب يا حضرات ياريت اللي يوصل لحاجة يبلغني فوراً.
وسابنا و مشى اتنهدت انا و يونس بملل و سندنا راسنا على الكرسي ورا.
بعد شوية تعبت فا قومت روحت البيت
اخدت شاور و غيرت هدومي و ساعدتهم في الغدا واتغدينا كانت الساعة ١٠ بليل
مقدرتش اقعد اكتر من كده فا نمت.
_________♡♡_____________
فتحت عيني لقيتني نايمة على سرير غريب في أوضة ضلمة مفيش فيها ضوء خالص
هو مفيش فيها حاجة اصلا غير السرير و مراية قدام السرير.
بعد شوية الباب اتفتح دخل حد لابس اسود في اسود مش باين من ملامح وشة حاجة من الضلمة غير عيونه اللي شكلها مرعب بس و بعده دخلت البنت الغريبة اللي هي انا دي.
ما علينا المهم دخلت قعدت جمبي على السرير و قالت بصوت اول مرة اسمعه منها
_نجحتِ انك تحافظي على حياتك و الوقت خلص.
عيوني لمعت ب بصيص من الأمل
_يعني هتسيبيني امشي؟
بصت قدامها تجاه المراية وردت ببرود
_لا دي انسي، مش دلوقتي.
بصتلها باحباط وانا الدموع اتجمعت في عيني
_امال عايزة مني ايه؟؟
بصتلي تاني و قالت بصوت طفولي اكتر من الصوت الأول
_هتلعبي معايا انا زهقانه.
دموعي نزلت وهي كملت ولا كإنها شايفاني
_هتاكلي دلوقتي و بعدين هجيلك تاني عشان اقولك هنلعب ايه سوا.
وسابتني وطلعت هي و البتاع اللي معاها دة.
بصيت على الاكل اللي هي قالت عليه لقيت حاجات انا معرفهاش و جنبهم ازازة مياة اخدت الماية شربتها وقومت استكشف في الأوضة الغريبة دي.
ملقتش فيها حاجة غير السرير و المرايا بس لفت انتباهي الحيطة اللي كان مكتوب عليها حاجة باللون الأحمر بس مكانتش واضحة اوي نتيجة لإن الحيطة برضو باللون الاسود.
قومت من على السرير وقربت من الحيطة لقيت مكتوب رقم من تلات أرقام حطيت إيدي على الأرقام بس دة كان ملمس د.م!!
رجعت على السرير تاني وانا بردد الأرقام دي و بفكر في دماغي
_166 يا ترى ايه معناه وليه مكتوب بالد.م كدة بدل اي قلم عادي؟
سمعت صوت تكسير قوي جاي من برة فا قومت وقفت جنب السرير
_________________♡♡_________
قومت على صوت رن موبايلي القوي اخدته من جنبي ورديت وانا مش في وعيي نوعا ما
_الو مين؟
جالي صوت يونس المتوتر
_يمنى انتي فين بسرعه؟
_فين ايه يا يونس،نايمة عادي.
_طب تعالي بسرعة في لوكيشن*****.
_طب فهمني طيب دة عنوان ايه؟
_تعالي و هتفهمي كل حاجه في وقتها.
قومت لبست اي حاجه جت قدامي و اخدت موبايلي و مفتاح العربية ومشيت.
بعد شويه وقت قليلين وصلت اللوكيشن لقيت
يونس موجود و معاه ضباط تانيين و جيش وحراس
كتير اوي بس البيت كان شكله مهجور ودة اللي
خلاني مستغربة اوي.
بس لما دققت في البيت لقيته البيت اللي ثواني دة البيت بتاع البنت في الحلم بتاعي!!
يونس جه عليا بسرعة لما شافني
_انتي اتأخرتي كدة ليه؟
_متأخرتش هو مسافة السكة.
وبعدين سألته تاني باستغراب
_هو ممكن سؤال.
هزلي راسة بمعنى “ممكن” فكملت
_هو احنا بنعمل ايه في البيت المهجور دة؟
_ما هو ده الغريب ان جالنا اتصال دلوقتي ان في حالة خطف حصلت هنا لما كلمتك والساعة وقتها كانت١٢.
اتصدمت ورديت تحت تأثير الصدمه بصوت عالي
_نعممم!!
يتبع
الفصل التالي اضغط هنا
يتبع.. (رواية خاطف مجهول) اضغط على اسم الرواية لتجد الفهرس كاملاً بجميع الفصول.