رواية أصل ولا صورة – الفصل الأول
_أخوكي فين ي فجر؟
_ي ماما أنا لسه داخله معرفش..
زعقت_طبعاً وأنتي دريانه بحاجه خليكي نايمه في العسل كدا وسايبه أخوكي بيضيع..
_يوووه ي ماما ماليش دعوة هو حر بقي
يوسف اخويا الصغير بينا ٣ سنين هو كان كويس وعلي خلق بس معرفش جراله أيه؟!
وبصراحه أنا مهتمتش ! كل واحد أدري بنفسه وحياته بقي
هو شايف أن حياته كدا صح خلاص براحته..
مش هفضل طول عمري رقيبة عليه وعلي تصرفاته المتهورة !
…
_فجر هاتيلي ملف الصفقه الجديدة وتعالي..
فوقت من سرحاني علي صوت جاسر خطيبي ومديري في الشركة ومكتوب كتابنا من شهرين..
_إتفضل ي جاسر
بصلي بتركيز وساب الملف_مالك ي فجري ؟
إبتسمت! دايماً بيعرف يخرجني من حزني..
_لا أبداً مفيش
_زعلانه مع ماما؟
_للأسف
بصلي بمكر_والي يصالحك عليها!
ضحكت_هات من الأخر ي عنيا
_تخرجي معايا النهاردة!
إتوترت_ها! لا مينفعش النهاردة؟
_ليه؟
_اه..اه أصلي راحه مع ماما نجيب حاجات وكدا
قال بتريقه_بجد! هو مش أنتوا زعلانين برضو؟
_لا لا أصلك متعرفش أمي بتيجي بالحنيه
_بجد!!
_اه والله إسئلني أنا
بصلي بحزن وعارف أني بكدب علشان عاوزة أتهرب منه !
_خدي الباب في أيدك وانتي خارجه
رزع جملته في وشه وقام قعد علي مكتبه وكأني مجرد هوا!!
وقفت قدام المكتب وعيوني دمعت
_جاسر !
من غير ما يرفع وشه قال بهدوء_عاوزة أيه؟
_أنا..أنا أسفه
رفع وشه وقام وقف قصادي_طب ليه الدموع!!
عيطت أكتر_مش عارفه أراضيك وربنا كدا هيزعل مني
إبتسم_ي ستي أنا راضي عنك والله
_أنت بتبتسم !!
_اه
_يعني بتحبني؟
_لا
_لا قفشتك خلاص حبك بان
ضحك وسكت_ قلبك الغلس دا مش ناوي يحبني؟!
سكت شويه ..قلوبنا مش بأيدينا أنا بحترمه وبعزه وخلاص بقي جوزي بس مش قادرة أشوفه كحبيب!!
_أنتي بتحبني صح؟
_أكيد
_خليه يحبك ي جاسر أنا واثقه أنك تقدر
_واثقه فيا!!
إبتسمت_واثقه فيك
….
_أيه بتعمل أيه في القسم؟!! طيب طيب جايه..
جريت علي القسم وكلمت جاسر ييجي ورايا وانا مش مستوعبه..أخويا أنا ممسوك في قسم؟!!
ليه ي يوسف ليه كدا !! ي رب أقف معانا ..
_أحم..أيوا حضرتك أنا أخته ودي بطاقتي
واقف في طابور ،شكله تعبان ومرهق جدا و..وحزين!
_أتفضلي أقعدي
حاولت أتكلم بهدوء_خير ي فندم أيه المشكله؟!
_اخوكي ي أنسه ممسوك في كباريه مع شويه الصيع دول
وبيحششوا مع الرقاصات
لحظه!! سكت لساني إتعقد حركتي إتجمدت
أخويا أنا؟!! رقاصات! حشيش!.يوسف!!
جاسر فضل يهز فيا ويضغط علي أيدي علشان أفوق من التوهان دا
_فجر أنتي كويسه ؟
يوسف جيه وركع جنب الكرسي بتاعي ومسك وشي وبيعيط
_فجررر أنتي ساكته كدا ليه؟!!
وقفت ورميت أيده..قرفانه منه!
_جاسر خلص الموضوع وانا مستنياك في البيت..وهاته ومعاك
…
صرخت_كباريه !! بتسهر في كباريه وتحشش مع الرقاصات!
رد ببرود _اه أنا حر
محستش بنفسي غير وأنا بضربه بالقلم بكل قسوة !!
بصلي بذهول_بتضربيني ؟
مسكته من هدومه _وأقتلك أقسم بالله أقتلك ولا أنك توسخ أسم أبوك وتجبله العار ي زبالة..
جاسر صرخ _فجر كفاية كدا بقي
حاول يمسكني _ أبعد عني أنت كمان أوعي لما أربيه
_تربي مين ؟ روحي ربي نفسك الأول
زقيت جاسر_أربي نفسي! وكمان بتقلل مني دا انت يومك أسود بتشرب حشيش ي بيه دا أبوك الله يحرمه مكنش بيطيق ريحه السجاير..لا ماشاء الله متربي فعلا
صرخ_ملكيش دعوة بيا وأنتي يهمك في أيه أصلاً ؟
بقيتي أنانيه ومش شايفه غير نفسك وبس!!
فين فجر الي كانت أمي التانيه ها راحت فين ردي عليا؟
ولا متروديش مش فارقه أصلاً
_أخرس وليك عين تبجح كمان!
قرب مني وشاور علي عيوني_مش عيونك دول الي كانوا بيكشفوني قبل لما أفكر أكدب ي فجر؟
مش دول الي كانوا بيدمعوا لو جالي شويه برد!!
شاور علي إيدي_طب مش أيديك دي الي كانت بتلعب في شعري وتجليني أقر واتعرف بكل أسراري!
ومش كانت برضو بتاخدني في حضنها لما أغلط وتطبطب ردي عليا بقي
_أنا..
_أنتي إتغيرتي..إهتميتي بنفسك ونسيتي يوسف!
إبنك والأيد الي كانت بتطبطب عليا هي الي معلمه علي وشي دلوقتي!
أنا خارج ومش هتشوفي وشي تاني..
_في أيه ي ولاد صوتكم جايب أخر الشارع ليه ؟!
وانت خارج رايح علي فين ي يوسف؟
_رايح في داهيه ي ماما
بصيت عليه..يوسف هيمشي ومش هشوفه تاني؟!
الأرض بتلف بيا جامد وقعت علي الأرض..أصوات كتير حواليا مش عارفه أفتح عيني ومحستش بحاجه بعد كدا!
….
فتحت عيوني لقيت دكتور وجاسر بيتكلم معاه
عيوني عماله تدور..يوسف فين؟
_حمدلله علي سلامتك كدا تخوفينا عليكي ي فجري
سكت ولسه بدور عليه
جاسر إبتسم_واقف برا علفكرة؟
_ بجد ..ها!..هو..مين؟
_الي بتدوري عليه
_أنا مبدورش علي حد
_طيب أحب أقولك أنه واقف برا وخايف يدخل لتتعبي
إترددت_هو..هو ممشيش؟!
أبتسم_واحد شاف أمه واقعه علي الأرض مش بتتحرك
تفتكري هيمشي ويسبها ولا يزقني قبل أما أفكر أشيلك
ويشيلك هو ويجري يجيب دكتور
إبتسمت_شالني!
ضحك_وبرقلي جامد كدا ولا كأني جوزك
ضحكت_تعرف لما كان صغ…
سكت بسرعه وكشرت تاني
_كملي
_لا خلاص
قام وقف وقال بمكر_طب أروح أقوله يمشي بقي
إتنفضت_يمشي ! يمشي فين ؟!لا لا ميمشيش
_ليه خايفه عليه؟
_اه..لا أقصد يعني علشان ماما متعرفش حاجه ومش عاوزاها تتعب
_ماما تاني ها
صحيح ماما قولتلها أنك كنتي بقالك فترة مكلتيش علشان كدا أغمي عليكي
_تمام
_فجر أنا عاوز أقولك حاجه قبل ماامشي
يوسف بيحبك بجد أنا شفت دا النهاردة أنتي مش أخته أنتي أمه بالنسباله.. غلط تمام عارف بس السبب كان أنتي..
_أنا؟
_اه لما بعدتي عنه حس أنه ملوش حد وخصوصاً إن مامتك كبيرة ،أنتي بالنسباله أخته وأمه وصاحبته وحياته كلها
مش كنتي دايما تحكيلي عنه؟ لسانك علطول جايب بسيرته صح! سامحيه ي فجر وأنتي كمان راجعي نفسك
علشان في الاخر هتخسروا بعض وأنتي الي هتندمي
الاخر أحنا عايشين علشان نغلط ونتعلم من الغلط ي فجري
رجعي أخوكي ليكي ..رجعي إبنك لحضنك تاني
…
بقالي يومين قاعدة في أوضتي..خايفه أخرج!
خايفه اواجهه جاسر كان عنده حق لو هو غلط فغلطي أكبر منه بكتير..أنا الي سبته أنا الي رميته ومهتمتش بيه
طب ماهو طول عمره بيقولي هتفضلي كدا عامله فيها أمي
ومبسمعش كلامه إشمعني دلوقتي إتخليت عنه!!
قلبي واجعني أوي عليه!
هو طول عمره سند ليا
حتي في عز زعله مني شالني وجري بيا!
سرحت وإفتكرت موقف بينا..
_مسا مسا علي الي منفضلي
بصلي بفرحه_فجر
اخدني في حضنه_كل دا ي فجر كل دا سفر؟!
ضحكت_أنت هتستهبل يالا دا ؟ دا هما ٣ ليالي!
_أاااخ وبتقوليها في وشي كدا لا لا إتغيرتي
قولت بدلع_طلقني لو مش عاجبك طلقني
_إلعب أيوا ي أبيض ي عرسي أنت
_عرسي!! صدق بالله
_لا إله إلا الله
_أنت ما هتتجوز البت سلمي طول ما انت حالك كدا!
إتحول في ثانيه _أيه؟ أنتي كلمتيها؟
_أينعم
شدني بسرعه وقعت علي السرير_طب ها قالت أيه؟
_ ي ولا إحترمني شويه أنا أختك طيب
_ي فجر إخلصي
بصتله بمكر_هتعلمني بلايستيشن؟
_هعلمك
_أحلف
_والله ها إنجزي
_أحم..أحم البت سلمي
_ايوا
_صاحبتي
_وبعدين
_جارتنا
_هضربك
قولت ببساطه_موافقه
بصلي ثانيه ووقع علي الأرض
إتنفضت وجريت عليه_يوسف يوسف ي حبيبي فوق
فتح عيونه_وافقت بجد ؟
_طب غور في نصيبه بقي عيل سئيل وقعت قلبي
_متأكدة ي فجر
_الله يرحمهم الرجاله متتقل ي ولاا إتقل شويه عرتني والله
…
فوقت من سرحاني وضحكت طول عمره طيب وحنين وبيفرح بسهوله..أنا هرجعه هرجعه لحضني تاني..
وقفت قدام أوضته ي رب قويني
_كانت غاليه عليا أنا كمان ي أخويا والله أهئ أهئ أهئ
قام إتنفضت مكانه_فجر
_لا روحها
وقف قدامي_أنتي كويسه صح
إبتسمت _هتفضل متردد كدا كتير ؟!
شدني لحضنه جامد وعيطت وأنا كمان عيطت
_أنا أسف أنا السبب في الي حصلك
قعدنا قصاد بعض..
_بتحشش ي يوسف؟
_بطلتي تاخديني في حضنك ي فجر
_بتعرف رقاصات؟
_بطلتي تروحي معايا صلاة الفجر زي زمان
عيطت_أنا السبب؟
عيط وباس إيدي_ وحشتيني ي أمي
_أنا أسفه والله أسفه
مسك وشي ومسح دموعي وشدني
_يلا عشر دقايق والاقيكي جاهزة
ضحكت_علي فين؟
_هنصلي الفجر يلا يلا
_حاضر
لبست العبايه ونزلنا مع بعض ماسك أيدي وعمال يبصلي كل شويه ..للدرجادي بعدت عنه!!
صلينا ونزلنا في الشارع..مسك أيدي
_سمو الأميرة تسمحيلي؟
_لا لا متستعبطش أحنا في الش….يخربيتك!
مرة واحدة بقيت علي دراعاته وجري بيا وأنا بضحك
_الناس بتبص ي يوسف
قال بصوت عالي_أختي ي جدعان أختي ي منطقه
_ي مجنون طب فطرني بقي
نزلني_لا ي باشا روحي أفطري مع جوزك يلا
_ليه؟
_ي ربي مش عارف هو بصلك علي أيه؟
_أتلم ي حيوان
ضحك_ي بنتي روحي بس
_فهماك ي لئيم بس ماشي يلا وصلني
…..
وصلت عند البيت وانا فرحانه حياتي رجعت حلوة زي ماكانت..انا مكنتش واخدة بالي إنه منور حياتي كدا
بجد مكنتش عارفه ازاي هعيش لو كان فعلاً مشي وسابني لوحدي! التخيل نفسه وجع كبير كأن حد بيسحب روحي مني! الحمدلله إننا فوقنا ورجعنا لبعض..الاخ دا نعمه كبيرة
وأحنا بغبائنا بنضيع كل حاجه من أيدينا بالكبر والعند..
أما أشوف الي تاعبه قلبه معايا دا كمان،إكتشفت أنه ونعمه السند كنت ممكن أضيع من إيدي زوج صالح زي دا بغبائي برضو!
_فجري!
_أنت لسه هتندهش وسع من قدامي ،
ماما..ي ماااااما
_ماما مش هنا ي فجري
إتفاجئت طب أروح ولا أمشي ؟! بصلي ومستني أخذله زي كل مرة..
_جاسر
رد بحزن_نعم ي فجر متقوليش حاجه هغير واوصلك
_تحب البيض أومليت ولا عيون؟
_نعم؟!
إبتسمت_يبقي عيون أنا بحبها
_هي مين؟
_عيونه ..قصدي البيض..يوووه قصدي عيون البيض
إبتسم_يعني مش هتهربي ولا خايفه مني؟
_عندك لبن؟
_فجرررر
ضحكت_هو فيه حد يهرب من قدره برضه؟
_يعني هنعمل الفرح!
_وهنجيب الفستان والبدلة
_بتحبيني؟
_إدهولت علي عيني والله
……
يوم الفرح يوسف جيه ومسكني من دراعي ونزلنا مع بعض
حسيت بالفخر أنه راجلي وسندي وحياتي كلها
إتبسطنا وضحكنا وقعد يغني ويهيص معايا وخلاص
خلص الفرح وبدأت معاه حياه جديدة..
بصلي بدموع_خلاص ي فجر هتسبيني
_هو فيه أم بتسيب إبنها برضو ؟ هجيلك كل يوم ي حبيبي،
أعمل حسابك أول لما أرجع من السفر هتعمل خطوبتك أنت وسلمي
ضحك_ ماشي ي ستي
إتردد _مش هتتشغلي بحياتك ولا تبعدي عني تاني؟
_عمري..
_وعد؟
_وعد
الفصل التالي اضغط هنا
يتبع.. (رواية أصل ولا صورة) اضغط على اسم الرواية لتجد الفهرس كاملاً بجميع الفصول.