رواية نرجسي الفصل الحادي عشر 11 – بقلم روزان مصطفى

{11}

” هل يُمكن للإنسان أن يَعيش عشر سنين في سنة واحدة! ”

والد راميس بتأكيد : مظبوط يا فندم أنا بنتي تعرضت للإختطاف من قِبل الشخص دا والله أعلم هددها بإيه عشان تسافر معاه بالباسبور بتاعها ، أرجو من حضرتك تساعدني

الظابط بحقد قديم : دا واضح إن مفيش حد من عيلة الصفتي دول إتربى ! * قالها بصوت واضح *

ليدخل شخص طويل بشرته سمراء يرتدي الزي الرسمي للشرطة ويقول بدفاع : بلا يا ماهر خلافات قديمة أيام الجامعة تخليك تغلط كدة ، إحنا لسه مش معانا دليل إنها إتخطفت بالفعل

ماهر بسخرية : خلافات قديمة أيام الجامعة ؟؟ إقفل الحوار على كدا يا سامح أنا مش عاوز أتكلم

خرج سيجارة من علبته وهو بيقول لوالد راميس : حضرتك تقدر تتفضل وإطمن بنتك هترجعلك هنتواصل مع أهل الشاب دا ونرجعهالك

والد راميس : وأنا واثق في عدالتكم ، شكراً يافندم

خرج والد راميس ، بص سامح لماهر وقال : مش هتبطل بقى يا أخي تمسك لعيلة الصفتي على غلطة و ..

قاطعة ماهر بعصبية وهو بينفخ دخان سيجارته : لا مش هبطل !!  دي إختارته هو قدام الكل ورفضتني !

كور إيده بغضب وهو بيكمل وبيقول : لا واللي يحرق دمك إنه رفضها

سامح بدفاع عن ليث : طيب يبقى العيب منها هي مش منه ما هو لو عاوزها كان إرتبط بيها ، ف مش فاهم سبب كرهك ليه آيه

ماهر بحقد : عنده كل حاجة ، يقدر ياخد كل حاجة من غير أي تعب أو مجهود منه ، الفرص بتجيله على طبق من ذهب

سامح بيرجع ظهره لورا وبيقول : طب دي أرزاق يا ماهر ، إستهدى بالله كدا وسيبلي أنا القضيتين بتوع الصفتي

خبط ماهر على المكتب بإبتسامة خبيثة وهو بيقول : وحياة أمي يا سامح ما حد ماسك القضيتين دول غيري ، هلبس ولاد الصفتي الكلبش بإيدي

أخد سامح كام ورقة وقام من على مكتبه وهو بيقول : على الله ميطلعوش أنصح منك وحقدك دا يلبسك إنت في حيط

خرج سامح وقفل الباب وراه ف بص ماهر للفراغ وهو بيقول : هنشوف .

* في الشاليه

نرجس كانت جايبه قماشة قديمه لقيتها في الشالية ومياة من الحنفية كانت ساقعة عشان كانوا في الشتا

ليث بتعب : طالما بتكرهيني .. بتساعديني أخف ليه ؟

نرجس بقرف : عشان الموتة دي هتكون سهلة ، مات من البرد ؟ إنت لازم نصل سكين حامي يعدي على رقبتك من اليمين للشمال

ليث : كح كح .. لو هموت الموتة دي على إيدك ، أنا موافق

نرجس بدموع نزلت على وشه : إنت معندكش دم ؟ في واحدة ماتت بسببك ! واحدة كانت مراتك وعايشة معاك في نفس البيت

إتعدل ليث بتعب وإرهاق وهو بيزيح القماشة عن راسه وبيقول : لمياء .. لمياء أنا زعلت أكتر من أي حد على موتها ، لو الوقت كان رجع وكانت بتنادي عليا عشان أوقف العربية كنت ..

نرجس بصتله ببرود وقاطعته وهي بتقول : كنت هتمشي برضو بعربيتك ..

ليث بتعب وحب : كان كل همي أكون معاكي وتكوني ليا .. مفكرتش في أي عواقب ، حتى شغلي خسرته للأبد بسببك ، حتى لو رجعتك لأهلك إنتي هتكوني كويسة وهما كويسين ، لكن أنا خسرت مراتي وشغلي وكل شيء

قامت نرجس وقفت وقالت : ماهو بسببك ! بسببك إنت مش مستوعب لييه !

ليث وهو بيقوم بدوخة : دلوقتي مينفعش نرجع للشاليه بتاعنا ، ومينفعش نفضل هنا عشان ممكن ف أي وقت حد يدخل علينا ببساطة أو صحاب المكان يقرروا ييجوا ، والأكيد إنهم بيدوروا علينا ف مش هينفع نسافر ..

نرجس ببرود : أنا سيبتلهم إثبات إنك خاطفني

ليث بدأ يحس بخنقة والأدرينالين إندفع في جسمه ف بص لنرجس وقال : مش فاهم ؟

نرجس وهي بتمسك شعرها : قطعت خصلة من شعري وسيبتها في الشاليه هناك عشان يحللوها ويعرفوا إنك الخاطف

مفكرش ، رمش بعينه كذا مرة وهو بيبصلها بجمود

بعدين قربلها وهمس بطريقة خوفتها وخلتها تقشعر : لو حبي ليكي إتقلب لعنة مش هريحك بموتي وموتك ، هنكون عايشين بس إنتي بتتمني الموت

نرجس بعياط : ما أنا بتمناه كل ثانية ! إنت فاكر إني كدة عايشة

ليث بغضب من بين سنانه : بالظبط ، مش هيكون قدامك حل تاني غير إنك تتقبلي العيشة معايا

بيسحبها من ظراعها بعنف ف بتحاول نرجس تتملص منه وهي بتقول : إوعى يا متخلف هتخلع دراعي

تك  تك   تك

صوت خبط على باب الشاليه خلا ليث ملامحه تلين وعينيه توسع وهو بيبص لنرجس اللي بتترعش ، كتم بوقها وسحبها ناحية المطبخ وهو بيقول بهمس : تقريباً حد عرف إن إحنا هنا ، مش عاوز أسمع صوتك ولو فكرتي تسيبي خصل شعرك او ضوافرك حتى ف اي مكان نروحه هسيب أنا بنفسي ملاية زي بتاعت ليلة الدخلة وأكيد لما يحللوها هيعرفوا إنك إنتي اللي كنتي معايا

خبطتن نرجس برجليها في قصبة رجله ف كان هيصرخ من القلم لكنه ضم شفايفه وكشر بضيق

تك تك تك ..

الرجل للحارس : متأكد إن في حد جوا ؟

الحارس : يا بيه والله شوفت خيال ناس من الشمس وكمان سمعت صوت حاجة بتتجر وصوت مياه أنا متأكد إن أصحاب الشاليه جم

الراجل : طب ما تسيبهم يابني يمكن لسه جايين من السفر

الحارس : لازم يا بيه أعرف هما جايين ياخدوا حاجة وماشيين ولا جايين يقعدوا عشان أشغلهم الكهربا تنورلهم بالليل

تك تك تك

الخبط مستمر وليث لسه كاتم بوق

نرجس ، عض شفته وهو بيقول : يخربيت كدا ! دا كأن اللي على الباب مصمم إننا نفتح !

نرجس بتبص بعين مرعوبة ف بصلها ليث وقال : كله يهون ، كله فدا عيونك دي

* خارج الشاليه

الراجل : خلاص سيبهم دلوقتي وهما لو قاعدين أكيد هيحتاجو الكهربا ف هييجوا يكلموك بنفسهم ، عشان بس متزعجش حد

الحارس بإستسلام : تمام يا بيه

مشيوا من قدام الشاليه ولما بطل صوت خبط الباب شال ليث إيده من على بوق نرجس وهو بيقول : هوووف أخيراً ، جهزي نفسك عشان لازم نخرج من هنا ، شغلي ك ظابط يعرفني إنهم هيفتشوا شاليهات هاسييندا كلها .. عشان لو مستخبيين عند حد

نرجس بسخرية : وشغلك معرفكش إنهم أكيد عاملين كماين أد كدة ؟ إنت وقعت خلاص في المصيدة ياريت تسلم نفسك وتسيبني في حالي

ليث بغضب : مش بعد كل دة أستسلم ، أنا هعرف أخرجك وأخرج نفسي من هنا ..

سحب دراعها وزق الترابيزة الكبيرة اللي كان سادد بيها الباب ، بعدين سحب نرجس وطلع يجري وهي وراه

كان ضاغط ع رجله بشكل كبير  .

* في شقة سيادة اللواء

مامة ليث بحزن : يا حبيبتي يا لمياء الله يرحمك يابنتي

سيادة اللواء قاعد وحاطط راسه فوق إيده بحزن وخيبة أمل

ضرب جرس الباب

فتح هو بتعب وملامح حزن لقى قصاده عسكري ، اول ما شاف سيادة اللواء أدى التحية العسكرية وهو بيقول : سيادة الباشا

اللواء بتعب : في إيه يابني ؟

العسكري بخوف : في تحقيق مفتوح لأبن سيادتك

سيادة اللواء بتكشيرة : عارف ، ليث الزفت ..

العسكري بتردد : لا يا باشا ، أنا سامح بيه بلغني أجي اقول لحضرتك قبل ما ماهر بيه يحقق  ، التحقيق بخصوص شرف الصفتي إبن معاليك

فتح سيادة اللواء بوقه وقال : مش فاهم ! أنا شرف إبني برا مصر هيكون مفتوحله تحقيق هنا ليه !

العسكري : متهم بخطف بنت …

قاطع كلام العسكري وقوع سيادة اللواء من طوله ، مسكه العسكري قبل ما يوقع على الارض وجريت عليه مراته وهي بتعيط ..

* بعد خمس ساعات

ليث كان بيمشي بتعب مع نرجس اللي كانت بتكح من كتر المشي ، أه كانوا بيرتاحوا كام دقيقة بس بيرجعوا يمشوا تاني

ليث بسعادة : لسه معملوش كماين هنا ، تقريباً مستنيين إذن عشان يعملوا الكماين دي ، ودا المريح

وقفوا قدام كافيتيريا كبيرة وكانت حلقة لعمرو أديب ، اللي لفت نظر ليث كلمة ( سيادة اللواء كمال الصفتي هاتفياً )

عمرو أديب بتساؤل : كنت حابب تقول إيه يا سيادة اللواء

سيادة اللواء بصوت غليظ : بسم الله الرحمن الرحيم ، أقر أنا اللواء السابق كمال الصفتي ، وبعلن رسمياً إني متبرأ من كلاً من ليث الصفتي وشرف الصفتي ، ولا علاقة لي بهم بعد الأن ..

ليث قعد على ركبه بصدمة في الرمل ونرجس بتبص للتليفزيون بذهول !

* في أميريكا

السوشيال ميديا مقلوب بسبب تبرأ اللواء كمال الصفتي من أولاده الإتنين ..

كان قاعد شرف قدام راميس على ترابيزة عشاء في الفندق ، قال بصدمة وهو بيسيب تليفونه على الترابيزة : أنا عارف إني كنت أناني لما مشيت وسيبتهم في الظروف دي ! بس هو أناني إنه يعاقبني بالطريقة دي

راكيس بتقول بهمس وهي بتبص لفونها : يا نهار إسود ! يا نهار إسود !

شرف رفع راسه وبصلها بصدمة مش قادر ينطق

راميس بنظرة أسف ورعب : إتبرأ منك بسبب إن أبويا متهمك بخطفي !!

رفعت في وشه الفون وورته البوست بتاع أبوها إنه تقدم ببلاغ للنائب العام بخطف إبنته وطلب تدخل الإنتربول لإسترجاعها

شرف بصدمة : نعم ياختييي !!

* عن ليث ونرجس

ليث لسه قاعد على ركبه في الرمل ونرجس حاطة إيديها على بوقها بصدمة وهي بتبصله مش عارفة تقول إيه ، كشرت وقالت : كل دا من أعمالك ، الغريب إن رغم كل خسايرك دي لسه متمسك إنك تكمل مشوارك المزيف معايا

ليث وهو بياخد نفسه بالعافية  :  هتكوني المكسب الوحيد المُرضي ليا لو وافقتي تكملي معايا المشوار ..

نرجس بقرف : أكيد مش موافقة ، ياخي روح إتعالج وإرحمنا بقى !!

قام ليث وقف على رجليه وبصلها بنص عين ، وبدون أي مقدمات رفع إيده ورزعها بالقلم على وشها

نرجس بصتله بصدمة ولسانها عاجز عن النطق ..

ليث من بين سنانه بعنف : يا تكوني معايا ، يا نموت أحسن انا مبقاش عندي حاجة أخسرها ..

* في قسم الشرطة

دخل العسكري وهو بيحط ملف قدام ماهر ، فتح ماهر الملف وقرأه بأعصاب مشدودة ، ملامحه بدأت تلين وهو بيبص لسامح اللي بيشرب القهوة في مكتبة وقال : مش قولتلك هودي عيلة الصفتي ورا الشمس ، تحليل المعمل الجنائي أثبت إن خصلات الشعر دي ل نرجس شهاب

كدا نقدر نودع ليث بقى

حط سامح الفنجان وبص لماهر بصدمة ..

يتبع ..

#نرجسي

#روزان_مصطفى

#بقلميييي