رواية خلف قضبان القلوب الفصل الواحد والعشرون 21 – بقلم ميمي عوالي

اللَّهُمَّ عَالِمَ الْغَيْبِ وَالشَّهَادَةِ ، فَاطِرَ السَّمَوَاتِ وَالْأَرْضِ ، رَبَّ كُلِّ شَيْءٍ وَمَلِيكَهُ ، أَشْهَدُ أَنْ لَا إِلَهَ إِلَّا أَنْتَ ، أَعُوذُ بِكَ مِنْ شَرِّ نَفْسِي وَشَرِّ الشَّيْطَانِ وَشِرْكِهِ .

21

#خلف_قضبان_القلوب

الفصل الحادى و العشرون

كانت السيارات الثلاثة قد اصطفت الى جوار بعضها البعض فى مدخل مقابر العائلة ، ليهبط الجميع مابين مترقب و متوجس و هم يراقبون رد فعل يونس و هو يهبط من السيارة بصمت مطبق و عينيه لا تحيد عن بوابة المقبرة و كأنها جمرة من اللهب

لتقترب سوزان من زكريا و زهرة و على وجهها ملامح قد تقترب من الهلع لتهمس لهم قائلة : يونس مانطقش ولا كلمة من وقت ما اتحركنا من القاهرة .. انا قلقانة عليه اوى ، و ابتديت اندم على الخطوة دى ، حاسة اننا ضغطنا عليه بزيادة

زكريا : اهدى يا سوزى .. احنا عارفين من البداية انها مش خطوة سهلة ، بس كان لازم تحصل من زمان

زهرة : اعتقد انك لازم تبقى جانبه يا زكريا ، حتى لو ما اتكلمتش معاه ، بس خليه يحس انك جنبه

زكريا و هو يتركهم و يتجه ناحية يونس : اكيد .. ماتقلقوش ، بس خلوا دادة زينب تفضل مع الولاد فى عربيتى على ما نخرج و اكدوا عليهم مايتحركوش

زهرة : حاضر

لتتجه عينا زهرة تجاه امها لتجدها هى الأخرى بملامح حزينة وعيون باكية فقالت هامسة : ربنا يستر و يعدى اليوم ده على خير

كان زكريا قد وقف الى جانب يونس و ضمه تحت جناحه رابتا على كتفه و قال : شد حيلك يا حبيبى ، دى اول مرة نور تشوفك من وقتها ، و اكيد انت كمان واحشها زى ماهى وحشاك بالظبط ، ندخل نقرا الفاتحة و ندعيلها ، و لو حسيت انك محتاج تقعد معاها لوحدكم قوللى و انا هتصرف

ليتقدمهم زكريا و يفتح الباب و هو يذكر اسم الله و يلقى تحية السلام ليتبعه الجميع مابين خاشع و راهب ليتمتم الجميع بقراءة الفاتحة و الدعاء و كل منهم له حوار خاص مع فقيدته

اما سوزان فلم تنفك تراقب يونس و امها و هى تكاد تسمع صوت دقات قلبها المتسارعة قلقا عليهما ، و لكنها اطمأنت بعض الشئ على امها عندما وجدت زهرة قد اقتربت منها و دعمتها بوقفتها الى جوارها

ليظل الحال على ما هو عليه ، حتى ربتت فاطمة على كتف بدر قائلة : بكفاياكى عياط يا بدر ، انا عارفة انها كبيرة عليكى ، بس ادعيلها بالرحمة

بدر و هى تكفكف دموعها : الله يرحمها و يعوضها خير فى جناته ، ثم اشارت الى شاهد اخر بالمقبرة و قالت : ابراهيم الله يرحمه هنا

فاطمة : ايوة .. الله يرحمه ، و منير كمان

لتتجه بدر الى شاهد الرجال و تقول : السلام عليكم يا عمى محمود ، و عليك يا ابراهيم و رحمة الله و بركاته ، الله يرحمكم و يغفرلكم و يسكنكم فسيح جناته ، عمرى ما هنسالك وقفتك معايا يا عمى محمود ، و يشهد ربنا انى عمرى ما بطلت ادعيلك بكل الخير على اد حبى و احترامى ليك

و يجازيك فى اخرتك كل الخير يا ابراهيم على تربيتك لبناتى ، و يعزك فى اخرتك زى ما عزتهم فى دنيتهم

اما انت يا منير .. فبشهد ربنا انى مش مسامحاك على اللى عملته فيا و فى بناتى كلهم

ثم تلتفت الى زهرة و تقول : ابوكى مدفون هنا لو تحبى تدعيله و تترحمى عليه

زهرة : انا ما اعرفليش اب غير بابا حامد الله يرحمه ، بس هقرا الفاتحة لجدى ولعمى و ادعيلهم

و ياريت انتى و مراة عمى تخرجوا تقعدوا فى العربية ، كفاية عليكم كده

فاطمة : ايوة يا بدر .. ياللا يا حبيبتى احسن تعبت من الوقفة ، و كمان عاوزة يونس يقوم من فعدته دى احسن قلقانة عليه اوى

زهرة : ماتقلقيش .. احنا هنحاول نجيبه و نحصلكم

بدر : طب انا هروح اقرا الفاتحة لابويا و امى و سيادة الله يرحمهم و بعدين ابقى اقعد فى العربية

فاطمة : طب ياللا و انا هاجى معاكى

اما يونس .. فكان قد افترش الارض أمام شاهد زوجته و عيناه مصوبة الى الارض و كأنه يبحث عنها بعينيه و وجهه تغسله الدموع ، بينما سوزان تجلس الى جواره و هى تتمتم بدعاء خفى و عينيها لا تحيد عن يونس

لينظر زكريا الى زهرة و كأنه يسألها عن الخطوة التالية ، ليجدها اقتربت من مجلس يونس و سوزان و قالت بصوت مسموع و لكنها هادئ : انا ابقى زهرة يا نور .. اختك اللى كان نفسى اتعرف عليكى زى ما اتعرفت على سوزان ، و احب اقول لك انى اتعرفت على همس بنتك ، و حبيتها اوى ، و اللى عرفت انها نسخة منك ، همس ماشاء الله زكية و ناجحة و متفوقة فى مدرستها ، و بتحب باباها جدا ، و كانت السبب انى عرفت ان ليا اخوات و عيلة

متهيالى يونس هيعرف يحكيلك هو اكتر منى ، و اللا ايه يا يونس ، اكيد نور مستنياك تحكيلها و تتكلم معاها

ليرفع يونس عينيه الى زهرة لتقول بابتسامة هادئة : لو اتكلمت معاها هتستريح .. صدقنى ، و لو تحب نخرج نستناك برة شوية مش مشكلة

ليقول زكريا بتأكيد : لو عاوزنا نخرج يا يونس عادى

و عندما لم يسمعوا منه ردا ، قالت زهرة مرة اخرى : خلاص .. تعالو نخرج نقعد فى العربية شوية على ما يتكلم مع مراته شوية براحته و يحكيلها على اللى حصل من وقت فراقها

و تمد يدها لتساعد سوزان على النهوض ، لتنظر لها سوزان بتردد و كانها تخشى المغادرة و ترك يونس ، و لكن زهرة اصرت على سحبها ، لتنهض معها سوزان بعد ان همست ليونس قائلة : لو حسيت انك محتاجنى فى اى لحظة انده عليا و انا هسمعك

ليتجهوا جميعهم الى الخارج تاركين يونس على جلسته امام شاهد زوجته و ما ان شعر بابتعادهم الا و سمح لصوت نشيجه بان يخرج من بين جنبات صدره و هو يقول : سامحينى يا حبيبتى .. سامحينى .. انا السبب

ثم رويدا رويدا بدأ فى حديث طويل يقص عليها فيه مدى اشتياقه و لوعته من فراقها ، و ما حدث منذ وقوع الحادثة

اما بالخارج فكانت زهرة تعاتب سوزان قائلة : ما ينفعش ابدا يحس اننا خايفين عليه بالشكل ده ، كده احنا بننقل له احساس انه مش تمام ، و انه لسه تعبان

سوزان : مش قادرة يا زهرة ، انا فعلا قلقانة عليه لدرجة عمر خيالك ما يوصل لها

زكريا : حبيبتى انتى طبعا عارفة انى اكتر واحد فاهمك و حاسس بيكى ، بس انا ابتديت اقلق عليكى اكتر من قلقى على يونس ، بلاش تضغطى على اعصابك بالشكل ده ، و ياريت تفتكرى اتفاقى معاكى قبل مل ترجعى مصر كان ايه

لتنظر له سوزان بخيبة و تقول : حاضر يا زكريا .. هحاول

و بعد مرور ساعة قالت فاطمة : ما تندهوله بقى يا اولاد ، ده داخل على ساعة كده ، لا يكون تعب و اللا حاجة و احنا قاعدين كده و مش دريانين

زهرة : ماتقلقيش يا مراة عمى ، زكريا كل شوية بيبص عليه ، بس صدقينى كده احسن ، هو محتاج انه يتكلم و يطلع كل اللى جواه ، و مهما اتكلم معانا عمره ما هيقول كل اللى جواه

و عموما .. هخلى زكريا يدخل يندهله و يجيبه

و بالفعل اتجه زكريا الى الداخل و قال بصوت مسموع : مش كفاية كده يا يونس ، ماتعبتش من الكلام

يونس و هو يضع كفه على الشاهد : لو بايدى افضل معاها هنا على طول و ما امشيش ابدا

زكريا : طب كقاية كده النهاردة ، ماما و خالتى تعبوا من كتر القعدة فى العربية

يونس : طب ماتروحوا انتو على البيت و سيبونى هنا شوية كمان

زكريا و هو يمد يده ليساعده على النهوض : انت عارف برضة ان ماما هتتحرك من هنا من غيرك ، ياللا يا حبيبى ، و نبقى نيجى تانى بكرة ان شاء الله قبل مانرجع على مصر

و بالفعل استطاع زكريا ان يعود بيونس الى السيارة و قال : ياللا بينا

و بعد ان جلس يونس الى جوار سوزان بسيارتها قالت له باهتمام و هى تقدم له زجاجة من المياة : انت كويس .. خد اشرب شوية ماية

ليتناول منها يونس الماء و بعد ان شرب بعضا منه قال : الحمدلله .. انا بخير ، ماتقلقيش ، ياللا بينا

اما بسيارة زكريا فبعد ان بدأ بالتحرك قال لزهرة ببعض المرح : طب ده انتى طلعتى جامدة اهو ، اومال بقى لما تاخدى الدكتوراة كمان هتعملى ايه

زهرة : دى شهادة اعتز بيها

زكريا : لا بجد .. برافو عليكى ، بس تعرفى ، احلى حاجة عاجبانى فيكى بجد .. انك بتاخدى الامور بهدوء ، من غير شعننة و لا غرور

زهرة : ربنا يكفينا شر الغرور و عمايله

زكريا : اللهم امين

تولين : هو احنا يا بابى لسه قدامنا كتير على ما نوصل

زكريا : لا يا حبيبتى .. خلاص ، هم خمس دقايق

همس : هو احنا هنرجع البيت امتى

زكريا : طب مش لما نوصل الاول يا ميسو نبقى نرجع ، بس عموما يا ستى ، يمكن بكرة ان شاء الله

زهرة للصغار: انتو جيتو هنا قبل كده و اللا لأ

تولين : مش فاكرة

اياد : و لا انا

زكريا : الحقيقة انا نفسى مش فاكر ان كنت جيبتهم معايا هنا قبل كده و اللا لأ

زهرة : طب و انتى يا هموس

همس : كنت باجى مع بابا و ماما و تيتا

زهرة : طب يا ترى بقى البيت حلو

همس: كبير اوى ، و كان فيه شجر كبير كمان كان بابا عامللى فيه مرجيحة بالحبال و الخشب

زكريا لزهرة : المفروض ان انتى كمان يبقى عندك فضول لبيت جدك اللى اول مرة هتشوفيه

زهرة و كأنها لم يخطر ببالها من قبل : بيت جدى

زكريا بتاكيد : ايوة طبعا بيت جدك الخياط الكبير

زهرة : تصدق ان كل تركيزى كان فى يونس و ماما ، و ما فكرتش ابدا فى الحكاية دى

زكريا : طب ادينى نبهتك اهو ، ياللا استعدى بقى .. ادينا وصلنا

لتجد زهرة امامها منزلا عتيقا ، و برغم مساحته الكبيرة ، الا ان مظهره الذى مزج ما بين الفخامة و البساطة فى آن واحد جعله يضقى ارتياحا و وميضا ساحرا من العراقة على النفس ، لتقف مشدوهة امام الابواب و النوافذ العملاقة التى تطل على باحة من الاشجار الوارفة المتشابكة الاغصان و عدد من الطيور الصغيرة تتنقل بين فروعها بأريحية و كأنها تملك المكان بما فيه

ليخرجها زكريا من شرودها عندما قال : ايه .. المكان عجبك للدرجة دى

زهرة بنبرة يكسوها الالم : اول مرة احس بالظلم اللى اتظلمته من ابويا من يوم ما عرفت حكايته مع ماما ، اعتقد ان لو ماكانش عمل اللى عمله و كنت اتولدت بين اب و ام طبيعيين .. انى ماكنش من السهل ابدا اسيب المكان ده و لا ابعد عنه

زكريا ببعض الدهشة : انتى عاوزة تفهمينى ان بيت جدى عاجبك اكتر من بيت بابا فى مصر

زهرة : تزعل منى لو قلت لك ايوة و بمراحل كمان

زكريا بابتسامة : ابدا .. مش هزعل طبعا ، بس تعالى نشوف الجماعة وصلوا اهم

لتلتفت زهرة الى الطريق مرة اخرى لتجد سيارة سوزان قد اصطفت الى جانب سيارة امها ، و ان الجميع يولى اهتمامه باستقبال يونس و امها ، و لكنهم يستمعون الى بعض اصوات الترحيب الاتية من داخل المنزل تلفت انتباههم

فقد تقدم منهم أحد الرجال فى العقد السادس من عمره و قال بترحيب : يا الف حمدالله على السلامه ، نورتوا البلد كلها

زكريا : اهلا يا عم سعداوى .. الله يسلمك

سعداوى : البيت اتنضف وبقى زى الفل زى ما وصيتنى ، و كمان الغدا جاهز من بدرى ، انتو اتأخرتوا اوى

فاطمة : ازيك يا سعداوى

سعداوى : تسلمى يا ست ام يونس ، نورتى البر كله اتفضلوا ، و لو انى مش هعزم عليكوا فى بيتكو .. لك وحشة يا سى يونس الف حمدالله على السلامه يا ابنى

يونس بابتسامة ودودة : الله يسلمك يا عم سعداوى ، انت كمان وحشتنى

سعداوى : لولا انى كنت بعرف اخبارك من سى زكريا كان زمانى عاتب عليك ، بس شوفتى ليك النهاردة اكنى فى عيد

سوزان : جرى ايه يا عم سعداوى .. طب و انا ، مافيش ازيك حتى

سعداوى بدهشة : ايه ده .. هو انتى معاهم يا ست سوزى ، يا ميت مرحب ، سى زكريا ماجابليش سيرة انك رجعتى من بلاد برة

سوزان : ده انا قلت نسيت شكلى

سعداوى بمرح : و هى الحلويات دى كلها تتنسى برضة

زكريا ضاحكا : شكل خالتى حسنية مش هنا و عشان كده واخد راحتك اوى و انت بتتكلم

سعداوى بامتعاض مرح : و ليه العكننة دى بس

فاطمة ضاحكة : طب تعالى سلم بس على الباقى الاول و نشوف هتعرف حد فيهم و اللا لا

ليتطلع سعداوى الى زهرة تارة و الى بدر تارة اخرى ، ليقول بحيرة و هو ينظر لكليهما : الابلة شكلها مش غريب عليا ، و لا الحاجة كمان ، اكنى اعرفها من زمن ، بس مش قادر افتكر ، السن له حكمه بقى

بدر : ازيك يا سعداوى ، انا عارفة انك صعب تفتكرنى ، احنا بقالنا فوق التلاتين سنة ما اتقابلناش

سعداوى بتركيز : تلاتين سنة ، ياولداه يا اولاد ، ده عمر تانى

بدر : انا بدر يا سعداوى ، بدر بنت على سليمان

سعداوى بذهول : بدر اخت سيادة

بدر : ايوة يا سعداوى ، انا بدر اخت سيادة ، و خالة زكريا

سوزان و هى تضم بدر تحت جناحها : و مامتى يا عم سعداوى

سعداوى بحيرة : عاش من شافك يا حاجة ، بس يعنى

زكريا : دى حكاية طويلة يا عم سعداوى هبقى احكيلك عليها .. بس ندخل بقى نستريح و اللا ايه

سعداوى : ااه طبعا لا مؤاخذة ، بس مين الابلة ، تبقى …

سوزان : دى زهرة اختى يا عم سعداوى ، و زى ما زكريا قال لك ، هنحكيلك كل حاجة

تحت ضياء القمر .. كان الجميع يجلس بالشرفة و هم يلتفون حول مائدة عتيقة يعلوها العديد من اكواب الشاى و الفاكهة ، و كانت حسنية زوجة مسعود تجلس بالقرب من بدر و تقول : دى حكاية و لا فى الحواديت يا ولاد ، بس انتى برضة غلطانة يا ام نور ، كان حقك اول ما سابك فى المستشفى و عرفتى بعدها انك حبلة ، كنتى تكلمى سى ابراهيم الله يرحمه طوالى ، او حتى كنتى جيتى على البلد و احنا كنا كلنا وقفنا معاكى

و ما سيبناكيش ابدا

سعداوى : و بعدهالك يا حسنية .. احنا هنقعد نقلب فى القديم ليه ، ده حتى العايط ع الفايت نقصان من العقل

حسنية بامتعاض : هو انا دايما كده لازما كلامى يطلع مامنوش لازمة

فاطمة : هو سعداوى بس يقصد اننا مانقعدش بقى نقلب فى المواجع

بدر : انما .. هو بيت امى لسه موجود يا حسنية

حسنية : لاااا .. موجود ايه بقى ، سى ابراهيم الله يرحمه جدده و اداه لامام الجامع عمله كتاب بيحفظوا فيه قرآن للعيال الصغيرين

بدر بفرحة : و الله صحيح .. فرحتينى

فاطمة : طبعا ابراهيم لما عمل كده يا بدر ما كانش يعرف انك موجودة ، فاتصرف يعنى ….

بدر : زكريا ابنه كان له نص البيت يا فاطمة ، و كويس انه عمله كده .. كتر خيره ، الله يرحمه

زهرة : هو انا ممكن اروح اشوف البيت ده

زكريا : الصبح ان شاء الله اخدك اوديكى

زهرة : تيجى معانا يا ماما

بدر : ان شاء الله يا حبيبتى ، انا نفسى اشوف البلد كلها .. واحشانى اوى

كان يونس يلتزم الصمت و هو يستمع الى الاحاديث الدائرة بين الجميع و هو ينظر بعيدا الى ركنا بعينه بين الاشجار الوارفة المحيطة بالمنزل ، و الذى تجمع فيه الصغار و هم يتبادلون الجلوس بمرح على ارجوحة معلقة بين شجرتين ، لتقول له سوزان التى كانت لا تنفك عن مراقبة نظراته : ايه يا يونس ، ليه ساكت كده و ما بتتكلمش معانا

يونس : ابدا .. بسمعكم

سوزان : طب كنا بنقول ايه

لينظر لها يونس ببعض الضيق قائلا : عاوزة ايه يا سوزان

سوزان : عاوزاك تتكلم و تنبسط معانا ، ماتبقاش على طول ساكت كده

ليشيح يونس وجهه بعيدا عنها دون تعليق ، فتقول له سوزان باصرار : لو فاكر انى كده هزهق و هسيبك تبقى فقدت الذاكرة و التركيز كمان ، لانك عارف كويس اوى انى ما بيأسش

يونس : شوفى حاجة تانية تشغلك بعيد عنى لانى ابتديت أزهق

سوزان : بذمتك حد يبقى حواليه الجو التحفة و ريحة الجو اللى تجنن دى و يزهق

يونس بحدة بسيطة : انا ابتديت ازهق من الحصار اللى انتى عاملاه حواليا ، ما ينفعش كده ، انا عارف انك بتحاولى تهتمى بيا و تعوضينى و انا بجد شاكر ليكى كل مجهودك ده ، بس كل شئ و له حدود يا سوزى مش كده ابدا

كانت سوزان تنظر ليونس بصدمة و قد احتقنت عيناها بالدموع ، ليشعر يونس بالندم على ما قد تفوه به ، فزفر تحت انفاسه و قال : انا اسف .. ما كانش قصدى اتنرفز عليكى

سوزان و هى تحاول تمالك نفسها : ماتتأسفش .. لان عندك حق ، انا اللى اسفة لانى فعلا زودتها ، حقك عليا

و قبل ان يستطيع يونس الرد عليها مرة اخرى كانت قد نهضت من جلستها و قالت و هى تحاول السيطرة على نبرات صوتها : انا هدخل اقوللهم يعملولنا شاى ، حد عاوز حاجة معينة

زكريا : انا عاوز قهوة يا سوزى

لتختفى من امام عينا يونس ، ليظل يتلفت باحثا عنها بعينيه بعدما احضرت الخادمة الشاى و القهوة دون ان تعود سوزان مرة اخرى

و لكنه يسمع زهرة و هى تقول بصوت عالى : ايه يا سوزى انتى روحتى فين

ليسمع صوتها آتيا من اسفل الشرفة بالخارج و هى تقول : لقيت عندهم جوة درة ، فقلتلهم يشووا لنا

بدر : طب و انتى يا بنتى هتفضلى واقفة عندك كده

سوزان : اصلى بحب اشم ريحته اوى ، و كمان عشان الولاد ما يقربوش اوى من الحطب و هو وا.لع

زهرة : طب انا جاية لك

سوزان : تعالى ياللا

لتنقضى الامسية دون اى حوار اخر بين يونس و سوزان التى تعمدت ان تقضى الباقى منها بالباحة الخارجية بصحبة زهرة و الصغار ، و حتى عندما انضم اليهم زكريا و يونس .. حرصت على عدم توجيه اى حديث له ، حتى عندما شعرت بانه يحاول تجاذب الحديث لمشاركتها اياه .. جمعت الصغار للذهاب الى النوم و اختفت من امام ناظريه ، ليلوم على نفسه مقابلة صنيعها معه بتلك الفظاظة التى لم يستطع محوها

اما بالصباح التالى .. فقد التف الجميع حول مائدة الإفطار التى امتلأت بخيرات الريف و التى علقت عليها زهرة بمرح قائلة : على فكرة انا ممكن ابيعكم كلكم و افضل هنا لوحدى عادى بس يفطرونى كل يوم الفطار ده

سوزان و هى تجاريها المرح : و انا ممكن اسيبك بس على شرط تبعتيلى منابى كل يوم

فاطمة ضاحكة : طب مانخليهم يعملولكم هناك اللى انتم عاوزينه اسهل

زهرة ضاحكة : طب لو عملولنا الفطير .. هتجيبولنا القشطة الطازة دى منين كل يوم

زكريا ضاحكا : سهلة .. نخلى عم سعداوى يبعتلنا جاموستين تلاتة نربيهم فى الجراج جنب العربيات

زهرة و هى تقف متحفزة : انا خلاص شبعت الحمدلله .. ياللا يا زكريا انت و ماما لو هتودينا زى ما قلت بالليل

سوزان : انا جاية معاكم

فاطمة : انتو هتروحوا كلكم و تسيبونى لوحدى

سوزان : مش هنتاخر يا ماما ، لولا ان ماما قالت انها هتروح مشى على رجليها كنت قلتلك تعالى معانا ، بس عارفة انك هتتعبى

همس : انا عاوزة اجى معاكم

تولين : و انا كمان

بدر : تعالوا معانا ياللا .. و نتفرج على البلد مع بعض كلنا

زكريا : ادونى بس عشر دقايق اشرب القهوة .. تحب تيجى معانا يا يونس

يونس : لا يا حبيبى .. روحوا انتو ، انا هفضل مع ماما

فاطمة : لو حابب تروح معاهم يا ابنى ماتشغلش بالك بيا ، زينب معايا اهى هى و حسنية و انتو يعنى اكيد مش هتتاخروا

يونس برفض : خليها مرة تانية

سوزان و هى تتجه الى الخارج : انا هستناكم برة ماتتاخروش ، خلص قهوتك بسرعة يا زيكو

اما بالقاهرة .. كانت مريم بصحبة حاتم و هما يتابعان وصول اخر شحنة باحدث المبردات التى قد اشتراها حاتم و قام بتجهيزها ، و كانت مريم تضع يدها فوق وجهها و هى تقول ببعض الاشمئزاز : ايه يا حاتم ده .. الريحة مش لطيفة خالص

حاتم : شششش .. ايه يامريم ، مانتى عارفة اللى فيها

مريم : ايوة طبعا عارفة ، بس ما تخيلتش ابدا انها تبقى واصلة لكده

حاتم : ان شاء الله نخلص منها بسرعة زى المرة اللى فاتت

مريم بقلق : انت متاكد ان ماحدش ممكن يحصل له حاجة بسببها

حاتم بسخرية : و هو كان حد حصل له حاجة الكام نوبة اللى فاتوا

مريم : و هى المرات اللى قبل دى كانت ريحتهم كده برضة

حاتم بعدم اهتمام : يعنى مش اوى ، بس مش الشهر ده اللى هيفرق يعنى ، و بعدين زى ما قلتلك قبل كده .. اول ما بتتحط على النار خلاص ، كل حاجة بتبقى تمام 😏