رواية امرأة لا تقهر – الفصل الثاني
خالي حسن قطع كلامي وشخط فيا وقالي: اما الكبار يتكلموا انتي تسكتي خالص ما اسمعش صوتك
أنتي هتردي عليا وعيب اما تقولي على حد اكبر منك كدابه احترمي نفسك ؟!
ما كانش بايدي حاجه وما كنتش عارفه ارد جريت على الاوضه بتاعتي اللي بحجم المطبخ ويا دوبك واخده السرير والدولاب بالعافية قعدت قدام المرايه وانا بكلم نفسي زي المجانين هعمل إيه ما انا مش لاقيه حد اكلمه هو انا لقيت حد اكلمه قلت لا
انا مش عارفه انا لسه عايشه ليه لحد دلوقتي والله ما بعترض على حكمه ربنا وعارفه أنه هيعوضني بس انا موجوعه قوي.
فجاة وأنا قاعدة لقيت الباب اتفتح وخالي حسن دخل عليا وكان متضايق وهو بيقول لي: بكره تروحي من المدرسه للبيت ومن البيت للمدرسه!
وكمان الامتحانات على الابواب اهي ركزي علشان تذاكري مش عايز لفه ودوران في الشوارع بدل ما الناس تيجي تاكل وشي وتقول علي ما عرفتش اعلمك وجيت على السنه اللي فاضله لك وما خليتكيش خدتيها؟!
رديت عليه وقلتله: حاضر يا خالي هو ده اللي بيحصل والله!
خالي كمل كلامه وكان باين أنه بيخطط لحاجه وهو بيقولي: البيت بكره عايز تنظيف والشغل هيكون فيه كتير جداً لاننا عاملين عزومه كبيرة ولازما تساعدي مروة في كل حاجه انا ما معيش اجيب خدم !
وانا بصرف على عيلين وجيتيلي انتي شيلتيني مصاريف الثانوي ومصاريف الثانوي بتقطم الوسط ؟!
مروة كانت واقفه وراها وبتضحك وعاجبها كلامه جداً وانا كنت قاعدة بعيط ومقهورة ومروة مبسوطه واكنها كسبت الحرب وانا خسرت.
عدى الأيام وامتحنت والحمد لله امتحاناتي خلصت بس كنت حاطه ايدي على قلبي ومستنيه نتيجه الثانوية في يوم وانا قايمه من النوم زي العادة سمعت خالي ومراته وهم قاعدين في الصاله وبيخططوا الحاجه يعملوها ما كنتش متخيلاها نهائي والحوار كان كالتالي.
خاله حسن بيكلم مروة مراته بيقولها: هي البنت مريم لسه نايمه ولا ايه يا مروة؟!
مروة ردت عليه وقالتله: ايوه يا اخويا ما هي اخذت الإجازة بقيت على طول متنيله قاعدة في اوضتها ؟!
خالي اتكلم بطريقه بارده وقال :
هو انتي لحد دلوقتي ما عرفتيش البنت على موضوع العريس ولا إيه يا مروة؟!
انا سمعت الكلمه واكن اتدلق عليا جردل ميه ساقعه ما كنتش مصدقه عريس وانا في السن ده هم اكيد بيهزروا بس سكت وكنت عايزة اشوف إيه آخر الحوار ده لقيت مروة بترد عليه وبتقول له : لا يا اخويا روح انت قولها انا بتضايق من بنت اختك البومه ما بحبش اتكلم معاها في حاجه ولو ضايقتني همسكها هضربها!
خلي رد عليها وقالها: وعلى إيه يا اختي انا هدخل اقولها خليكي عندك؟!
دخل خالي حسن عليا الاوضه هو فاكرني نايمه وبتصحيني وبيقول : قومي يا مريم إيه النوم ده كله؟!
خلصي كده وقومي جهزي نفسك وخدي دش علشان في عريس جاي النهاردة يشوفك؟
وقفت وانا رجلي مش شايلاني وقلبي بيدق جامد كنت عايزه اهرب وكنت خايفه من خالي ومراته بس ما كنتش عارفه أعمل إيه ولا اقولهم إيه هم كانوا اقوى مني.
رديت على خالي وقلتله :يا خالي انا مش عايزة اتجوز انا لسه صغيرة وكمان انت قلتلي لو جبت مجموع كويس هدخل الجامعه ليه عايز تجوزني دلوقتي؟!
خالي رد عليا بكل جبروت وقال:
هو انا هفضل يا اختي شايل همك طول عمري كفايه السنه اللي شلتك فيها لحد ما خدت الثانويه
خلينا نخلص بقى من قرفك ونجوزك على الاقل نستفاد من وراكي بقرشين ونحسن عيشتنا؟!
كلام ما كنتش عارفه اعاقله ما كنتش عارفه اقوله إيه هو في خال ممكن يعمل كده في بنت اخته اليتيمه ما كنتش قادرة اقتنع بس هو بص لي ببرود وكبر دماغه وطلع بره وانا فضلت قافله على نفس الباب لحد ما العريس جاء بصيت عليه من جنب الباب وشفته باين عليه غني من العربيه اللي مركونه تحت البيت وغير البدله الشيك اللي لابسها كنت بدعي ربنا ما يكونش اللي في بالي وان خالي ناوي يبيعني لراجل غني علشان يقبض شويه فلوس.
خالي دخل خدني من الاوضه وقعدني قدام العريس وكان اكنه بيعرض عليه بضاعه وبيقوله:
دي مريم يا بيه… بنت اختي… طيبة… ما لهاش حد وانا الواصي عليها بعد موت ابوها وامها؟!
ما لهاش حد … كلمتين وجعوني أكتر من أي ضربة أو صراخ.
العريس اللي كان قاعد قدامي ويبص لي بنظرات مختلفه غيري اللي انا كنت متخيلاها خالص .
فجاة لقيت مروة بتقول لخالي: يلا يا حسن ندخل في التفاصيل خير البر عاجله؟!
خالي حسن اتكلم وقال: بصي يا بيه انت هتاخد بنت اختي هي ما لهاش حد زي ما قلتلك؟! عيله وحيدة
مش هتلاقي زيها… بس فيه شرط صغير… لازم تدفعلي مبلغ كويس، عشان تعوضني عن الفلوس اللي صرفتها عليها في الثانويه ده انا كعيت عليها دم قلبي
بعد ما ابوها وامها ماتوا عايز تتجوزها يا بيه ادفع !
العريس اتفاجئ وعنيه اتسعت وهو مش قادر يصدق قال: فلوس؟!
إنتو عايزين مني فلوس علشان اتجوز بنتكم بس ده مش مقبول هو انت بتبيعها ولا إيه يا حسن انا لو هدفع حاجه هدفع بمزاجي بس مش علشان انت طلبت عيب اللي انت بتقوله ده !
خالي ضحك ضحكة فيها سخرية: حضرتك هتاخد بت وهتتجوزها ولا حد هيجي يسالك عملت فيها إيه ولا سويت إيه ما انا زي ما قلتلك ملهاش حد وانا اصلا مش عايزها؟! لو مش عاجبك خلاص بلاش منها وشوفلك واحده غيرها !
مروة ردت عليه وقالت: ايوه فعلا لو مش عاجبك شوفلك واحدة ثانيه !
أنا… قلبي كان بيتقطع…و دموعي حابسة… بس جوه قلبي كان فيه نار…حسيت إني قليله وصغيرة وما ليش أي لازمه مين سمحلهم انهم يبيعوني مين سمحلهم انهم يعملوا فيا كده هو انا قليله للدرجه دي ولا علشان خاطر انا يتيمه.
العريس اللي لسه ما اعرفش اسمه كان بيحاول يهدي الجو وبيكتم غضبه وهو بيقول: انا مش جايه اشتريها انا جايه اتجوزها وعيب قوي اللي انت بتعمله ده لو على الفلوس انت كده كده كنت هتتنيل وتاخد المقدم والمؤخر والمهر وده كله انا كنت هدفعه وما عنديش مشكله بس الطريقه بتاعتك دي مش عجباني ؟!
خالي رد عليه باستهزاء وقال : أول حاجه موضوع المؤخر والمقدم والحاجات دي كلها انا لازما اعملها قايمه علشان الناس ما تاكلش وشي؟!
وبالنسبه للفلوس انا بطلبها منك بيني وبينك وكمان يا بيه انت عارف ان الفلوس بقت جزء من حياتنا كل حاجه بتمشي بالفلوس؟! معاك فلوس هتتجوزها ما معكش خلاص بلاش منها؟!
انا كنت هتكلم ومروة راحت جايه عليا وانا بعيط وقالتلي: بت يا مريم أي حاجه يقولها خالك قولي عليها موافقه ماشي يا اختي !
انا حاولت أرد صوتي كان ضعيف لكن حازم جدا وانا بقولها :
أنا مش موافقة… مش هسمح لحد يعمل فيا كده مش هتجوز غصب عني انتم عايزين تبيعوني مش عايزين تجوزوني !
خالي حسن رفع إيده عليّا وصوت القلم رن في المكان كله والعريس قام وقف وكان مذهول من المنظر ومروة مسكتني جامد وشدتني لحد ما اللون الأحمر نزل من جيبيني وهي بتقولي :
اتلمي يا بت وقولي موافقه واللي خالك ومرات خالك يقولوه يبقى هو ده الصح انتي لسه صغيرة ما تعرفيش مصلحتك !
العريس كان واقف بعيد وكان باين عليه الغضب الشديد هو شايف قدامه ان خالي معتبرني زي بيع وشروة وعايز يبعني باعلى سعر كان متضايق جداً وهو بيقول :
حسن لمي نفسك انت ومراتك لو مديته ايديكم عليها هقطعها لكم وبالنسبه للبنت دي انا موافق على الجوازة وعلى كل اللي انتم عايزينه وهديك الفلوس بس ما تضغطوش على البنت في اي حاجه انا بكره هاجي اعرف قرارها بنفسي ؟!
خالي ضحك وقال: هو انا قلت حاجه غلط يا بيه علشان تقو لي كده ده حقي ؟!
أنا قعدت على الأرض و انا كنت منهارة و بقول :
يا رب يا رب انا ما عندي غيرك يا رب ؟!
العريس جه اتجاهي وكان بيعرفني على نفسه وقالي:
انا اسمي مصعب البنهاوي رجل اعمال انا مش هسمح لاي حد يهينك او يتكلم معاكي اي كلمه تضايقك وعايزك تصلي صلاة استخارة وتشوفي هتحسي بايه وانا هاجي بكره وهعرف رايك بنفسي ما ليش دعوة بخالك وانت يا حسن لو جبرتها على حاجه هتشوف مني الوش التاني ؟!
خالي ضحك وقال: تمام يا بيه اللي انت عايز هي كده كده موافقه هي هتلاقيها احسن منك.
مصعب رد عليه وقاله بصوت عالي ومليان غضب وكان باين عليه انه تعصب جداً:
ما لكش دعوة زي ما قلتلك ما لكش دعوة بالبنت لحد ما اجي انا بكره وهعرف رايها بنفسي ؟!
خالي حسن ومروة مراته خافوا ومروة رجعت لورا وكانت خايفه جداً منه وبعد كده خالي رد عليه وقاله:
زي ما انت شايف يا بيه انا مش هعملها حاجه ولا يمكن اجبرها على حاجه هي العروسه والراي رايها ؟!
وبعد كده مصعب خرج من باب الشقه وانا دموعي كانت نازله ومنهارة طلعت اجري على اوضتي وقعدت اتكلم مع نفسي:
انا عارفه ان اللي جاي صعب بس لازما استعد هنا اهانه وهنا اهانه ربنا هو العدل وانا واثقه في كرمك يا رب انت اللي هتنجدني من اللي انا فيه ده ومن العيشه الصعبة اللي انا عايشاها !
وبعد كده افتكرت العريس وهو بيتكلم معايا وكنت مبسوطه جداً وهو باين عليه الهيبه وانه حد كويس وعايز يحميني من خالي ومراته واللي زي ده يقدر يقف في وش اي حد علشان خاطري ولو طلبت منه اكمل تعليمي ممكن يوافق عكس خالي اللي عايز يجوزني لاي حد وخلاص علشان ياخد شويه فلوس!
وانا قاعدة بفكر رحت في النوم لحد ثاني يوم الصبح كنت نايمه ورايحه خالص ما كنتش حاسه بالدنيا وبعد كده قمت على الضوء اللي دخل من الشباك أول ما فتحت عيني كنت عارفه إن خالي ومراته مخططين لحاجة أكبر… كانوا عايزين يجبروني أوافق على العريس…هم اصلا ما يعرفوش اني تقريبا خدت قراري اي نعم انا خايفه بس رضيت في الآخر وقلت هقوله النهارده لو رضي يخليني اكمل تعليمي كده خلاص انا ما عنديش مشكله خالص.
شويه ولقيت خالي داخل عليا وهو بيقول:
اسمعي يا بت… النهارده لازم تقولي انك موافقه على مصعب بيه ولا هتشوف انا هعمل فيك إيه ؟!
مروة مراته ضحكت ببرود وقالت: لو مش عايزة تتجوزي وعايزة تقعدي معايا هنا ما عنديش مشكله اقعدي يا اختي بس والله ومليكي عليا حلفان لاسقيكي المرار الطافح ومرمطك مرمطه أكثر ما انتي متمرمطه وهوريك النجوم في عز الظهر وهتدعي وهتقولي ربنا خذني علشان استريح من الهم اللي انا فيه ده يعني بدل ما تبقى جوازة هتبقى جنازة ؟!
قلبي تقطع ودموعي كانت بتنزل وقلبي كان واجعني وبقول: يا رب صبرني وارحمني وعوضني عن المرمطه دي يا رب عيني على اللي انا فيه انا ما ليش غيرك وده آخر آمل قدامي!
خالي خد مراته وطلع بره وكانوا هم الاثنين بيرتبوا لكل حاجه وكانت مروة عامله لخالي غسيل مخ
وهميته ان الفلوس اللي هياخدها من الجوازة بتاعتي هيشتروا بيها شقه جديدة وهتكون في منطقه راقيه وهيقبوا على وش الدنيا وهيدخلوا ولادهم مدارس خاصه وخالي طبعا سمع كلامها وكان بينفذ كل اوامرها.
بس بعد شويه مصعب جاء وطلب من خالي انه يقعد معايا علشان يعرف قراري ؟!
بس خالي حسن رد عليه بجاحه ووقاحه وقال : انت هتديني الفلوس اللي اتفقنا عليها؟… ومفيش أي تأجيل…لو اتاخرت اكتر من كده هعلي الفلوس انا عايز 2 مليون؟!
كنت واقفة على رجلي… قلبي بينفطر… دموعي بتنزل… لكن جوه قلبي، شعور غريب بدأ يظهر ان ربنا عمره ما هيسيبني وكل ما انسى الموضوع ده افتكرة واقول إيه الهبل اللي انا بفكر فيه ده انا معايا ربنا معايا اللي احسن من الكل معايا ملك الملوك هخاف من بشر لا لا لا انا مؤمنه جداً وكنت عارفه ان ربنا مش هيسيبني؟!
واكتر حاجه فرحتني اما لقيت مصعب بيبص لخالي بقرف من فوق لتحت بمنتهى الاستحقار وبيقوله : هديك الزفت اللي انت عايزة يلا غور من وشي وكلمه مع مريم زيادة انت عارف انا ممكن اعمل إيه ؟!
أول مره احس ان في حد بيحاول يحميني ما كنتش قادرة اصدق كل اللي بيحصل قدامي بس كان في سؤال كل شويه بيخطر على بالي ليه شاب حلو ووسيم زي ده يتجوز بنت من الطبقه الفقيرة اللي زيي
السؤال ده ما كنتش لاقيه له اجابه وكنت مصممه اعرف اجابته قبل ما اقول اني موافقه ؟!
مصعب حس أني عايزة اتكلم معاه وجه الكلام لخالي حسن و قايله: حسن خد مراتك وامشي من وشي دلوقتي لو على الفلوس هديك كل حاجه على الجزمه سيبني انا ومريم لوحدنا يلا انجز؟!
خالي حسن كان فرحان جداً ان هو وافق على كل حاجه وفعلا سمع كلامه واخذ مراته وطلع بره وفضلت انا ومصعب لوحدينا في اوضه الضيوف.
مصعب بص لي وقالي: قولي انتي كنت عايزة تساليني في إيه او كنت عايزة تقوليلي إيه؟!
رديت عليه باستغراب وقلتله: وانت عرفت منين اني كنت عايزة اتكلم معاك في حاجه؟!
ابتسم ابتسامه ظهرت وسامته وهو بيقول: حسيت؟!
ضحكت وانا مكسوفه وببص في الارض وقلتله :
هو في سؤال انا مش عارفه اجابته هو انت ليه تسيب كل البنات اللي في المجتمع الراقي اللي انت منه وتتجوز بنت فقيرة ما عندهاش حاجه وكمان خالها بيطلب منك فلوس وانت مش مجبور توافق على الجوازه دي اصلا
الفصل التالي اضغط هنا
يتبع.. (رواية امرأة لا تقهر) اضغط على اسم الرواية لتجد الفهرس كاملاً بجميع الفصول.