رواية أسرار أمي – الفصل الثاني
صالح قال لي بوه علاش يابويا اتقول هكي شن في حياتي سمحه راهو بديت نتضايق وني حاس روحي زي الاطرش بالزفه يحيى قال صبرك ياولدي حايدوب الثلج ويبان المرج
صالح طلع وفي سره ايقول لعند اهني خلاص اني ضروري نعرف شن الشي لي مخبى عليا وعلاش هوا منبود ومافيش حد يدور فيه صالح قعد يراقب في كل شي ويحاول يوصل لي ابسط ثغره
واهني جا راجل لي صالح كان يسكن في حي قريب عليهم قال مش انت صالح ولد يحيى الفلاني قال ايه قاله شخبارك وكيف صحتك وكان راجل كبير شويه ومتزوج وعنده اصغار في عمر صالح
اهني الراجل قعد ايحاول يقرب من صالح ويعامل فيه كيف اصغاره وصالح فرح ان واخيرا في شخص تقبل حالته وطبيعه وقال لي مندر وعادل وفرحو قال عادل راهو انت ايحبوك غير امك…. وسكت
غمز مندر لي عادل بي معنى ان اسكت وبرم عليهم صالح قال لي مندر علاش تغمزله خليه يكمل خيرها امي ياعادل راهو بنهبل اني شن القصه قولولي كمل
مندر حاول يغطي الموضوع لكن سكتت على صوت صالح وهوا يقول اسكت يامندر اني نبي عادل يشرحلي وعادل قال انت امك قويه ياصالح واحتمال اي حد يزعلك حاتزعله
قاله صالح اني بندير روحي صدقتكم بس بالله عليكم ماتخبوش عليا شي حطو نفسكم مكاني راهوو موضوع صعب اني ماليا فالدينا غيركم انتم
طلعو مندر وعادل ومندر قال لي عادل تي شن درت انت قريب فضحت بينا شن دخلك انت فيه وفي عيلته احني مادخلناش احني معندناش علاقه احني موضوعنا صالح صاحبنا وانحبوه وعيلته مش دخلنا فيهم
عادل قال فعلا بس والله زرقت من فمي مانعرف كيف قلتها زعما يزعل مننا صالح قاله مندر بكره انحاولو انراضوه منبوش انزيدوه هم فوق هما هالمسكين واثناء ماهم قعدين يهدرزو
اخت مندر كانت ع الباب وسمعت الكلام ومشت لي امها وقالتلها راهو مندر وصاحبه عادل كانو في حوش زينب وصار وصار مش انتي منعتيه مايمشيش انصدمت سناء ام مندر وقالت توا انشوف
خش مندر وحصل امه ع الباب قاتله وين كنت قاللها فالكافي مع اصحابي قاتله قول وين كنت قاللها فالكافي قاتله يامندر مش قتلك بيت زينب ماتعتبش فيه رجلك
قاللها وانتي من قالك اني كنت في حوشها وبعدين اسمه بيت حاج يحيى وبيت صالح اني مامشيتش لي زينب مشيت لي صالح صاحبي وياريت اتخلوني في حالي
قاتله اختك سمعاتك وانت تهدرز مع عادل قاللها اها هكي صار بديتي ترفعي فالدوه تمام توا انوريك عليها قالت سناء لي مندر اخر مره تمشي لي حوشها
قال مندر لا بنمشي وماتمنعونيش اهني سناء انصدمت من اصرار ولدها وان رد عليها وكانت خايفه يكون لي بالها صار!…….
الفصل التالي اضغط هنا
يتبع.. (رواية أسرار أمي) اضغط على اسم الرواية لتجد الفهرس كاملاً بجميع الفصول.