رواية مغامرات عائلية الجزء الثاني – الفصل التاسع
9
9
عبدالله : على فين يا زمردة هانم ؟ ده انتي اول وحدة هتتعاقبي
زمردة بصدمة : نعم ؟!
عبد الله : فريدة عملتي الي قولتلك عليه ؟
فريدة بخبث : طبعا يا جدو اخدت كل حاجتها و خبيتها .. و مش هتعرف تاخد حاجة منها
زمردة : كوا ؟! انتي ازاي تمدي ايدك على حاجتي يا بلونة انتي
فريدة : و الله جدو الي طلب مني انا مليش دعوة
عبد الله : سحر .. طلعي الجلابيات القديمة و ادي امك واحدة منهم .. تصدقو يا عيال انا نفسي بايه دلوقتي ؟
دينا بتوتر : بايه ؟
عبد الله : عيش بلدي من تحت ايد زيزي هانم
دينا بحماس : انا هعمله
عبد الله : اسكتي انتي يا دينا .. زيزي هانم هي الي هتعمله دلوقتي … و انتو عقوبتكم هتبدي من بكرا
حلا : هيا ايه عقوبتنا يجدو ؟!
فارس : هنرجع نلعب بالغيط تاني ؟؟
عبد الله : لا يا ظريف .. قبل ما تقطفو بامية للغريب غيط جدكم اولى .. هتنزلو تقطفوها كلكم مع بعض كدة
زياد : كلهم الي هما مين يعني ؟!
عبد الله : كلكم .. بنات و اولاد .. ما عدا فريدة و حبيبة و غادة
لارا : و الله اشمعنا حبيبة دايما مستبعدة ؟؟ كل مرة هي الي بتورطنا و ما بتتعاقبش معانا .. ده ظلم
سعاد : انتي مش شايفة بطنها ؟! هتنزل تشتغل معاكم ازاي و هيا على وش ولادة ؟
حبيبة : و بعدين انا روحت غصب عني و انتي شاهدة لما دينا و حلا خدوني بالعافية
لارا بغيظ : بس كل الي حصل كان بسببك
زمردة : استني يختي منك ليها … انا مش هشتغل حاجة في البيت ده .. ايه الكلام الاهبل الي سمعته ده ؟ انتي يا بلونة وديتي حاجتي فين ؟
عبد الله : الي قولته هيتنفذ .. انتي هنا في بيتي و الي يقعد في مكان لازم يحترم قوانينه .. و لو مش عاجبك اتفضلي الباب يفوت جمل
زمردة بغضب : اكيد همشي من البيت العجيب ده بس هاتولي حاجتي الاول
عبد الله : دلوقتي حاجتك عند فريدة .. خوديها منها لو قدرتي عليها
زمردة بغضب : هاتي حاجتي يا بت انتي
فريدة : اسفة يا تيتة ما اقدرش .. خصوصا انك من ساعة ما وصلتي عمالة تشتمي بيا .. اعتبريها رد اعتبار او رهينة عندي لغاية ما العقوبة تخلص
زمردة : اه يا حرامية و الله لابلغ البوليس .. حضرة الضابط احبسها دي حرامية
يزن لدينا : هي بتكلمني انا ؟
دينا : ايوة
يزن : و الله يا مدام زيزي انا اتعلم عليا مرتين قبل كدة من الراجل ده .. و دي التالتة مش عايزهم يبقو اربعة الهي تحجي يا شيخة
زمردة : همشي ازاااااي من غير حاجتي يا متخلفين ؟ .. بطاقتي و جواز السفر و فلوسي كلهم بالشنطة
سحر : و ما تتخيليش ان بابا هيبعتلك فلوس او اخواتي ممكن يساعدوكي … عشان بابا زعل منك جامد و ما بقاش عايزك
زمردة بذهول : يعني ايه ؟!
سحر : يعني المحامي كلمه و قاله انك عايزة ترفعي قضية خلع .. عايزة تخلعي جوزك بعد العمر ده يماما ؟! عييييب و الله عيب
زمردة : مستحيل .. توفي ما يقدش يعيش من غيري ابدا
تميم بضحك : توفي ؟ لسا بتقوليه توفي يا تيتة ؟!
زمردة : اخرس انت .. انا مستحيل اشتغل حاجة في البيت ده
سحر : مقدامكيش حل تاني يما .. لو خرجتي من هنا هتروحي لفين ؟ معكيش لا فلوس و لا حاجة … و لو عايزة تفضلي هنا لازم تنفذي اوامر عمي
زمردة بانفعال : مش هشتغل ..ده عايزني اعمل عيش بلدي .. انا اقعد انخل و اعجن زي الخدامة ؟!
عبد الله : و هتلبسي جلابية كمان .. ده احنا لسا بأول الطريق اصبري بس
سحر : يلا يما قدامي عشان اديكي هدوم الشغل
زمردة بغضب : عايزة تشغلي امك يا بت يا عاقة
سحر :معلش يماما دي قوانين البيت .. منا بشتغل من يوما اتجوزت شوفتني قولت حاجة .. مش انتي الي بتقولي السن مجرد رقم يلا عايزين نشوف شطارتك بقا
عدنان : مسكترة علينا ناكل عيش من تحت ايديكي يا حماتي ؟! ده عيد بالنسبالنا
زمردة بقهر : ماشي انا هوريكم .. و الله ما هعديها كدة .. هتشوفو
سحر : طيب يلا يا حبيبتي قدامي عشان تورينا هتعملي ايه
امسكتها سحر من يدها بهدوء و اخذتها للطابق العلوي
تميم : انا لغاية دلوقتي ما عرفتش ايه الي عملته عشان اتعاقب
عبد الله : منا لو قولت هنا ممكن يروح فيها قتيل فخليها سر احسن
زياد : طب انا اقسم بالله ما عملت حاجة .. ليه الظلم ده يا جدو ؟
عبد الله : ما تحلفش بس
فارس : طب و الله حضرتك بتتلكك عشان تعاقبنا .. ما انت عارف اننا بريئين و اهو يزن اسأله
عبد الله : مهو متهم معاكم و هيتعاقب زيه زيك يا حنين
كارما بتوتر : جدو هو انا هتعاقب ؟
عبد الله : لا يحبيبتي انتي كمان مستبعدة .. بس هتشرفي عليهم معايا
كارما بسعادة : يسسس
دينا : ضروري نلبس الجلابيات يا جدو ؟ ينفع ننزل بلبس عادي ؟
عبد الله : ضروري يا دينا .. المرادي ده شغل بجد مش اي كلام زي المرة الي فاتت .. يلا الحقو ارتاحو عشان بكرا هتتعبو اوي
يزن : طب استأذن انا
عبد الله : رايح فين يالا … مفيش مرواح
يزن : اه انا اسير يعني .. تمام هنام فين ؟ برا زي المرة الي فاتت ؟
عبدالله : لا يحبيبي انت دلوقتي كاتب كتابك يبقى هتنام في البيت
يزن بخفوت : قصده باوضتك يعني
دينا : اتلم .. ده انت هتتبسط اوي مع زياد
يزن : و الله ؟!
عبد الله : يلا كل واحد يروح يشوف وراه ايه .. جايكم ايام سودة ان شاء الله
حلا بخوف : و النبي يا جدو تكلم بابا .. من ساعة ما وصلت و هو بيبرقلي
حسين : اخرسي يا حلا
عبد الله : حسين .. لو سمحت يا ابني قولتلك انا الي هعاقبهم .. ما تكبرش الحكاية بقا
حسين : ما اكبرهاش ؟ بنتي متهمة بقضية ممنو..عات و عايزني ما اكبرهاش ؟
حلا : برييييئة قالولك بريئة
عبد الله : كفاية يا حسين غلطهم و هيتحاسبو عليه مش هنقعد نعيد الكلام كل شوية
حسين بحنق : تمام .. زي ما انت عايز يا عمي
توجه عبد الله لمكتبه بينما ذهب الباقين كل الى اشغاله
اوس : يلا يا حبيبتي لازم ترتاحي
حبيبة : جدو زعل مني .. انا كدبت عليه
اوس : جدي لو زعل من كل الدنيا مش هيزعل منك يا حبيبتي
حبيبة : بس كان بيلومني .. سمعته قال ايه .. انا لازم اروح اكلمه
اوس : اوك ان كان ده هيريحك يلا بينا
توجهت الى مكتب جدها و خبطت الباب و دخلت مع اوس
عبد الله : في ايه تاني ؟!
حبيبة ببكاء : جدووو و الله ما كان قصدي اكدب بس انا كنت خايفة
عبد الله : طب ليه بتعيطي ؟
اوس : هرمونات
قام عبد الله و توجه لها و حضنها
عبد الله : بس يا حبيبتي العياط مش كويس عشانك … انا مش زعلان منك
اوس و هو يسحب حبيبة : كلمها من غير احضان دي مراتي انا و انا بس الي احضنها
عبد الله : اسكت انت .. حبيبتي انا مش زعلان منك بس مش عايزها تتكرر عشان انا ادرى بمصلحتهم و لو قولتيلي من الاول كنت هحلها من غير ما يتبهدلو كدة
حبيبة : و الله كنت مخضوضة عليهم و زيزي سابتني و اختفت ساعتها
عبد الله : زيزي دي سبب كل المصايب الي بتحصل ع الارض
حبيبة : اه و الله هي الي قالت للبنات ياخدوني غصب عني
عبد الله : بس اهي هتدفع تمن كل حاجة عملتها من يوما اتولدت لغاية النهاردة .. دي هتشوف ايام منيلة بس استنو و شوفو هعمل بيها ايه
اوس : من دلوقتي هقولك يا حبيبة اوعي تاكلي حاجة من الي هتعمله .. ممكن تسمنا كلنا دي و لا يفرق معاها
حبيبة بخوف : يا انهار اسود .. لا لا مش هاكل
عبد الله : و لا حد هياكل .. دي بس بداية للعقوبة .. روحي ارتاحي يا حبيبتي انتي تعبتي اوي النهاردة
حبيبة : يعيني مش زعلان مني خالص ؟
عبد الله بابتسامة : لا يحبيبتي .. خود مراتك ترتاح يا اوس يلا
اوس : حاضر .. امشي يا حبيبتي
*******************
نزلت زمردة للمطبخ .. كانت ترتدي جلابية واسعة باللون البني الغامق و تلف رأسها بوشاح اسود
زمردة بقرف : دي اخرتي البس كيس زبالة ؟!
سحر : ماما امسكي الدقيق اهو و عندك كل حاجة في المطبخ جاهزة .. يلا اقعدي و اعملينا العيش بقا
جلست زمردة على قطعة خشبية و وضعت سحر وعاء كبير جدا امامها
زمردة بضجر : ايه كل ده يا بنتي هاتي حاجة صغيرة .. ده انا هعمل حتتين بس
سحر : لا يماما عمي طلب كمية كويسة .. و ما تفكريش انك تحطي بيها حاجة كدة و لا كدة عشان هيجبرك تاكلي اول وحدة
زمردة بغضب : اخرسي يا بت بتستقوي على مامتك يا بنت الكلب ؟!
سحر : و الله ده قانون البيت .. انتي عايزاني اتطلق بعد العمر ده و اقعد جنبك يما ؟!
زمردة : طب حطي الدقيق خلصيني
بدأت زمردة تعجن و في كل ثانية ترفع يديها لتتنفس … مسحت جبينها بيدها فاتصق العجين برأسها و مقدمة شعرها
زمردة بصراخ : اعااااااا انا تبهدلت اويييي .. تعالي يا بت الحقيني
دلفت خديجة و خولة بسرعة
خديجة بفزع : ايه الي حصل ؟ انتي كويسة يا طنط ؟
سحر : مفيش حاجة بس جيه شوية عجين على شعرها
خولة : طيب و ايه المشكلة ؟ ده عجين عادي يا طنط
زمردة لسحر : هاتي حاجة امسح بيها وشي يا بنت الكلب
سحر و هي تمسح وجه والدتها : ما انتي الصبح كنتي عيلة بضفاير و بتتنطيي على الي خلفونا .. ايه الي حصلك دلوقتي ؟ لحقتي تعجزي يما
زمردة بغضب : اخرسي انتي العجوزة .. انا بس مليش بشغل الفلاحين ده
خديجة : الا قوليلي يا طنط هو بجد سعدية قالتلك ان حبيبة معمولها عمل ؟
زمردة : ايوة .. و قالت انه حد قريب منها الي عمله
خولة بشهقة : يا انهار اسود .. مين يا زيزي ابوس ايدك تقوليلينا .. البت على وش ولادة و ممكن تتأذي
زمردة بخفوت : سلفتها .. دي الي بتغير منها و مش عايزاها ترتاح بحياتها
سحر : ايه الكلام ده يما ؟! فريدة و حبيبة زي الاخوات و اعز .. و بعدين فريدة لا بتخرج و لا بشوف حد دي طالع عينها مع اسر
خديجة : بس برضو الغيرة ممكن تعمي البصر يا سحر .. يا انهار اسود دي هتعمل حماية على بنتي انا خايفة تأذيها
خولة : لا لا فريدة ابسط من كدة بكتير مستحيل
سحر : و الله ماما بس الي ما بتطيقهاش عشان كدة عايزة توقع بينها و بين حبيبة .. حرام عليكي يما
زمردة : اسكتي انتي ايش فهمك .. مرات ابنك لغاية النهاردة ما ولدتش و شكلها كدة هتتعب لقدام
سحر : ما الطبيعي يما البكرية تخلص شهرها كله ايه الكلام ده بس
زمردة : هه طالعة عبيطة لعماتك .. ده بدل ما تقومي تعمليلها كوباية قرفة تجيبلها الطلق وقتي
سحر بنفاذ صبر : انتي ما بتعجنيش ليه ؟! اشتغلي يلا .. انا هروح اعمل العشا .. يلا يا خديجة انتي و خولة قومو ساعدوني
************************
في اوضة البنات
غادة : انا مش فاهمة انتو ايه الي حصلكم ؟! ازاي وافقتو تروحو للمكان ده ؟
حلا : ابوس ايدك ارحمينا .. احنا ما صدقنا خلصنا من الحوار ده كله
غادة : مش هسكت يا حلا .. انتي ليه محسساني انك عملتي حاجة عادي ؟ انتو ارتكبتو اثم كبير .. روحتو لدجالة و سألتوها و ده حرام
دينا : ما كناش نعرف انها دجالة .. كنا فاكرينها شيخة
حبيبة : كدابة انتي اتبسطي اوي انها دجالة .. و انا يا غادة حذرتهم بس هما ما سمعوش كلامي
دينا : البت دي هتفقعلي مرارتي حد ياخدها من وشي
غادة : ليه ؟ عشان قالت الحق ؟ انتي عارفة يا دينا ان دلوقتي مش هتتقبل صلاتك اربعين يوم ؟ كل ده عشان طيشك الي خلاكي تروحي لست دجالة
دينا : و الله انا ما كنتش مصدقاها .. انا بس كنت عايزة اعرف لو الحاجات الي بالروايات صح و لا خيال و هبل
غادة : مش لازم تسألي على حاجات زي كدة
دينا : ليه ما السحر و الج..ن و الشيا..طين كله ورد بالقرآن فيها ايه لو وسعنا دائرة العلم شوية
غادة : في حاجات لو عرفتيها ممكن تتأذي يا دينا .. الي عملتوه حرام و لازم تستغفري ربنا
دينا : استغفر الله العظيم ربنا يسامحني .. و الله ما كانش في نيتي اعمل ذنب
دلفت فريدة و قالت بغضب : الساحرة الشريرة الي تحت لازم تتأدب
حلا : قصدك زيزي ؟
فريدة : ايوة .. قال ايه انا عملت لحبيبة عمل تخيلو ؟!!!!
حبيبة بضحك : سيبك منها دي ست مش طبيعية
فريدة : مستفزة .. و الله لاوريها و هفضل ورا جدو عشان يزود العقوبة اكتر و اكتر
دينا : بجد طلعت واطية اوي .. ازاي دي جدة ؟! ده انا عجزت من دلوقتي و هي لسا شباب
حلا : لا و بتقول على جوزها توفي تخيلي .. فظيعة
فريدة : طب انتو عارفين انا لقيت ايه بشنطة هدومها ؟
حبيبة : ايه ؟
فريدة بضحك : مايوه .. تخيلي
دينا بذهول : بجد ؟!! و جايباه ليه ان شاء الله ؟ عايزة تغري جدو جنب الترعة ؟!!
غادة : اخرسي يا دينا .. الا صحيح زياد هيتعاقب ليه يا فريدة
فريدة : معرفش يمكن عشان كدب على جدو
غادة : طب تميم عمل ايه ؟
فريدة : معرفش و الله .. كل حاجة بسبب زمردة الساحرة الشريرة
حلا : اقسم بالله لو الست دي مش كبيرة بالسن كنت جبتها من شعرها .. مستفزة و من ساعة ما جات مبطلتش مشاكل
فريدة : طب تعالو نبص عليها و هي بتشتغل و الله شكلها ينعنش القلب كدة
حبيبة : ده انتي قلبك مات يا فريدة
فريدة : و الله هي الي مش سايباني بحالي
حلا بجوع : امشو امشو عايزة اعمل كوباية شاي و اغط العيش بيها كدة مممم .. يلا ننزل
*********************
سحر : و الله و بقيتي شاطرة يماما .. كفاية كدة الكمية كويسة .. انزلي للفرن يلا
زمردة : انزل فين ؟ ما الفرن اهو
سحر : لا .. عمي ما بيحبش الا العيش المعمول على فرن الطين
زمردة بصدمة : نعم يختي ؟؟ طين ؟! لا امبوسيبل … ما اقدرش
خديجة : لو ما نفذتيش ممكن عمي يزود العقوبة اكتر يا زيزي
زمردة : طب هو فين الطين الي بتقولي عليه ده ؟
سحر : الفرن تحت قبل الزريبة على طول .. استني هنده الشباب يروحو معاكي و اهو ينقلو دول معاكي
نزلت الفتيات وراء بعض
سحر : حلا روحي اندهي للاولاد .. قوليلهم ييجو يساعدو زيزي تنقل العيش للفرن الي بالارض
حلا بحماس : حاضر .. بس انا هاخد اول رغيف
سحر : ماشي بس خلصيني
حبيبة بخفوت : طنط .. هو مش حرام نتعبها كدة ؟ دي ست كبيرة يعني
فريدة : اخرسي يا حبيبة خليها تتعلم شوية
سحر : حبيبتي ماما الحمدلله بصحتها و الشغل ده بسيط و مش متعب دي بتعمله و هيا قاعدة .. على الاقل ما طلعناهاش فوق شجرة برتقان زي الصبح
حبيبة : اممم و الله عندك حق
فريدة : ما ينفعش كدة .. احنا لارم نغيظها يا بنات
دينا : نعمل ايه يعني ؟
فريدة : لازم نهتم بنفسنا .. و نحط كريماتنا و ماسكاتنا قدامها عشان تتقهر
غادة : حرام عليكي يا فريدة دي بمقام جدتك
فريدة : اتكتمي
تجمع الشباب بالمطبخ
زياد : هنشيل ايه يا طنط ؟
فارس باندفاع : انا هشيل زيزي
سحر : اتلم يلا .. هتشيلو دول و تودوهم للفرن .. بس ماما الي تخبز مش انتو ماشي ؟
تميم : اكيد يعني ما حدش فينا يعرف يخبز اصلا
سحر : طيب شيلو يلا .. ماما معاكي نص ساعة و العيش يكون جاهز
فريدة : هيا العجينة مالها ملزقة كدة ؟ انتي مش مزودالها دقيق ؟
زمردة بتحذير : بت انتي .. ان ما اتخرستيش هجيبك من شعرك و اعملك ممسحة للمطبخ ده
فريدة : هتشتمي هروح لجدو و هو يجيبلي حقي
زمردة بصراخ : انا ليه اتعاقب لوحدي ؟!! ليه العيال دول ما يتعاقبو معايا ؟
حلا بفحيح : ورديتنا هتبتدي بكرا الصبح من بدري .. بس انتي الراس الكبيرة و لازم تدوقي الاكتر يا زمردة
فارس : لا زمردة ايه ؟ ده احنا دخلنا كوكب اكشن
تميم : ما بلاش غتاتة يالا .. اكبر منك ليها ده انتو شوية و هتتجوزو
خديجة : يلا يا عيال انزلو العبو حوالين طنط زيزي
اكملت بخفوت : عينكو عليها بقا لاحسن تزوغ منكو
تميم : اعيش و انتقم و الله ما هرحمك يا تيتة يا مفترية .. استعنا ع الشقا بالله
كان الشباب يمشون نحو الفرن و كل منهم يحمل صنية على رأسه تحتوي على اقراص العجين
زمردة و هي ترفع طرف جلابيتها : انتو بتعملو من العيش ده كل يوم ؟
حبيبة : لا احيانا طنط سحر بتعمله و احيانا بيجيبو عيش عادي
زمردة : يعني جدك عايز يمرمطني بس
حبيبة : انا لغاية دلوقتي مش قادرة افهمك .. ازاي عايزة تطلقي بعد العمر ده ؟
زمردة : العمر مجرد رقم و الطلاق ملهوش علاقة بالسن يا ساذجة
حبيبة : بس حسب كلام اوس ان انتي كنتي بتحبي جدو توفيق اوي .. ايه الي اتغير دلوقتي ؟ ازاي هتستحملي تعيشي من غيره ؟
زمردة : ايوة بنحب بعض بس برضو مش لازم يغلط بيا
فريدة : و الله كتر خيره الي استحملك عمر بحاله .. ده انتي قعدتي عندنا يومين بس و كرهتينا الدنيا
زمردة : اخرسي انتي يا بلونة .. انا مش فاهمة تميم ايه الي عاجبه بيكي
فريدة بغرور : كل حاجة .. الشغل الي انتي مش بتعرفي تعمليه ده انا اعمله بخمس دقايق
زمردة بغيظ : بلونة .. غوري من وشي اتلهي بالبيبي بتاعك
حبيبة : زيزي .. هتعملي ايه لو جدو توفيق حصله حاجة و انتي بعيدة عنه ؟ هتسامحي نفسك ؟
زمردة بفزع : تفي من بوقك يا ولية .. بعد الشر عن قلبه … ان شاء الله البلونة دي تفرقع قدامي يا رب
فريدة : حسبي الله و نعم الوكيل .. انتي مالك يا ست انتي ؟ انا لغاية دلوقتي ما اتجنتتش لو عايزة تشوفي جناني قوليلي بس و انا اسلط عليكي جدو
زمردة : انتي قاعدة عندي ليه ؟ ما تروحي تشوفي جوزك لاحسن يخونك و انتي شكلك كدة
فريدة : فشر .. تميم مستحيل يبص لغيري .. يا بنات خودو بالكم منها انا هروح اشوف اسر
زمردة بنرفزة : غوري يا بت قبل ما اولع بيكي .. البتاع ده بتولعوه ازاااي ؟!!!
اقتربت منهم دينا و قالت : هاتي انا هولعه و انتي جهزي العيش .. البت حلا ريلت على نفسها من الجوع
نظرت فريدة للشباب … كان جميعهم يلعبون بكرة القدم في الارض بحماس شديد
فريدة : بصو للعيال دول كمان .. و الله لو جدو يشوفهم بس
حبيبة : ارجوكي يا فريدة كفاية .. ما تسيبيهم يلعبو براحتهم هما جم ناحيتك ؟!
فريدة : على قولك .. انا هروح .. باااي زيزي
زمردة بغضب : الهي تروحي ما ترجعي يا بعيدة
بعد وقت .. اجتمع افراد العائلة في حديقة البيت و اعدت سعاد الشاي
زمردة بتعب : اهو خلصت شغلي كله .. ادوني حاجتي بقا
عبد الله : العيش متحروق كدة ليه ؟
زمردة : اعمل ايه ده الي قدرت اعمله
سحر : و الله يعمي ده شغل كويس لوحدة اول مرة بحياتها تخش مطبخ
عبد الله : تمام .. اتفضلي يا زمردة هانم مدي ايدك
زمردة بقرف : مستحيل مش هاكل من الاكل ده
عبد الله : هتاكلي .. يلا يا سحر ادي امك لقمة
سحر : خودي يماما دوقي على الاقل
زمردة : ما حطيتش بيه حاجة مفيش داعي للكلام ده
اخذت حلا رغيف و قطعت منه جزء ثم غطته بكوب الشاي .. رفعت القطعة عاليا و فتحت فمها لتأكلها بشراهة
سعاد بحدة : ما تاكلي زي الناس يا بت
كارما بقرف : بيئة هقول ايه
حلا : ما دي طريقة اكله .. الله !
لارا : بس مش قدامنا جاتك القرف .. شبه عبد العال في ريا و سكينة
حلا بتمثيل : و كتاب الله المجيد ؟
لارا : طفسة
فارس : جرا ايه يا بت ما تسيبوها تاكل براحتها .. و الي مش عاجبه يقوم بقا
ايهاب بتحذير : فارس اخرس انا مش طايق اسمع صوتك .. نرجع احنا لمصر و شوف هعمل بيك ايه يا كلب
فارس باستخفاف : من هنا لشهرين هتكون ناسي الحكاية كلها
ايهاب بحدة : اتلم ما تخلينيش اقوم اضربك من دلوقتي
فارس : خلاص خلاص اتلميت اهو
****************************
في صباح اليوم التالي
نزل جميع الشباب للطابق الارضي و هم يرتدون الجلابيات و كانت دينا ترتدي ذهب والدتها كله كعادتها
عبد الله : فريدة .. جمعتي الغسيل زي ما قولتلك ؟
فريدة : ايوة يا جدو و اهو في وسط البيت زي ما طلبت مني بالزبط
عبد الله : طيب اندهي لزمردة هانم يلا
خرجت زمردة من المطبخ و هي تضع على وجهها مادة بيضاء
حلا : ايه الي حاطاه على وشك ده يا زيزي ؟!
زمردة : ده ماسك النشا و ماء الورد … مضطرة اتصرف طالما حاجتي محجوزة
دينا بابتسامة : ده شكلي لما اعجز يا يزن
يزن : يبقى مبروك اتطلقتي يا هانم .. انا اصلا نفسي اضربها بالنار ما بالك انتي تبقي شبهها
عبد الله : زمردة هانم قدامك طشت الغسيل اتفضلي اغسلي على ايدك يلا
زمردة : و الله ؟! .. في غسالات كتير هنا استعملوها و اغسلو هدومكم
فريدة : و الله احنا هدومنا و غسلناها .. دول هدوم بنتك و احفادك اتفضلي يلا
كارما : ما بلاش لؤم يا فريدة حرام عليكي
فريدة : هي الي بدأت الحرب معايا يبقى تستحملني
رن هاتف عبد الله
عبد الله : انزلو انتو للغيط و انا هحصلكم .. فريدة عينك عليها و اندهي لسحر و سعاد كمان
فريدة بخبث : من عنيا يا جدو
زمردة بهمس : يجد جدري في جلدك يا جربوعة
تميم : يلا يا عيال اتفضلو
فارس : باي زيزي .. سي يو
زمردة بغضب : غور من وشي يالا
توجه الشباب للغيط
فارس بشك : على فكرة جدو كل شوية موبايله بيرن
زياد : و ايه الغريب بده ؟
فارس : يعني جدو مش بيحب الموبايلات كتير .. و انا سمعته امبارح بالليل بيتكلم بيه بصوت واطي كدة و كان واخد باله كويس
تميم : المعنى ؟
فارس : شكله جدو هيعملها يا عيال
حلا : يعمل ايه يا اهبل ؟ انت اتجننت ؟
فارس : طيب ما تيجو نراقبه .. يمكن يكون بيلعب بديله
زياد : اتلم يالا عايزنا نتعاقب تاني ؟!
كارما : على فكرة انا عارفة جدو بيكلم مين
زياد : بيكلم مين يا حبيبة جدك ؟ ……..يتبع
مغامرات عائلية
همس كاتبة
الفصل التالي: اضغط هنا
يتبع.. (رواية مغامرات عائلية الجزء الثاني) اضغط على اسم الرواية لتجد الفهرس كاملاً بجميع الفصول.