رواية مغامرات عائلية الجزء الثاني – الفصل الثامن عشر
18
فريدة : كارما ليه نايمة هنا ؟
غادة : معرفش لقيتها نايمة مكاني روحت نمت باوضة دينا و حلا
فريدة : كرملة .. قومي يلا
كارما بنعاس : سيبني انام شوية
فريدة : لا قومي … انتي نمتي هنا ليه ؟!
فتحت عيناها و قالت : امبارح اتاخرنا و احنا بنتكلم و نمت من غير ما اخد بالي
فريدة : طب قومي خودي اسر شوية انا هنزل اساعدهم بالفطار
كارما : ما تديه لغادة انا عايزة انام
غادة : كرملة .. هيا لارا قالتك حاجة ؟
كارما و هي تنظر للارا : اه فضلنا نتكلم طول الليل و بصراحة انتو مزودينها اوي عليها
فريدة : هشش لتسمعك دلوقتي .. روحي يا غادة خودي اسر و تكملو كلام بعدين
غادة : هو فين ؟!
فريدة : مع فارس
كارما : من يوما جم العيال دول و ابنك من ده لده ما تلميه شوية
فريدة : انا ما صدقت لقيت حد يشيله عني شوية عايزة اخد نفسي .. ما تقريش عليا انتي بس
تركتهم و خرجت
غادة : كرملة تعالي نتكلم شوية برا
كارما : اوك امشي
خرجت معها و توقفن في البلكونة
غادة : احكيلي قالتلك ايه ؟
كارما : ايه ده مش انتي بتقولي ان النميمة حرام ؟
غادة : مش كل حاجة اسمها نميمة .. انا بسألك عشان خايفة على اختي و عايزة اساعدها
كارما : بصراحة يا غادة انتو اوفر جدا بتعاملكم معاها .. يعني ليه محدش بيقدر انها كبرت ؟ ليه مصممين تقولولها ده صح و ده غلط و لو ما سمعتش منكم تمسحو بكرامتها الارض ؟
غادة : ايه الكلام الكبير ده ؟! احنا عايزين مصلحتها
كارما : بصي يا غادة مشكلة لارا ابتدت من البيت عندكم .. مامتك بتميزك عنها كتير و لو لارا عملت اي تصرف بتتهزق و دايما عليها اللوم .. و ده مش عدل بصراحة
غادة : منا ياما كلمت ماما بالموضوع ده و مفيش فايدة
كارما : طب هقولك حاجة انا لما لارا ضربتني اخواتي اتعصبو عليها و نزلنا كلنا عند جدو و اتعاقبنا الاتنين بس لما حلا ضربتها مامتك معملتش حاجة بالعكس حطت اللوم على لارا و بكل مرة بيحصل كدة
غادة : ما ده عشان غلطت
كارما : حتى لو غلطت المفروض تحسسوها انكم بضهرها دايما .. مش من فراغ راحت تدور ع الحب و الحنية عند حد تاني و مش فارق معاها الطريقة ابدا .. حتى ناصر المعفن عجبها يا غادة و دي حاجة مش طبيعية
غادة : عندك حق .. اول حاجة بابا و ماما دلعوها زيادة عن اللزوم و لما كبرت اتغيرو عليها فجأة .. طبيعي تتجنن
كارما : تخيلي لارا بتحسدني على زياد … بتغير من حنية اخويا عليا يا غادة .. كانت بتغير من حبيبة و دلوقتي بقت تغير من ليلة .. حتى انها بتغير من حلا … الغلط كان من عند مامتك و باباكي من الاول
غادة : ربنا يصلح حالهم .. انا هتكلم مع ماما و بابا بالموضوع ده
كارما : و انا هكلم جدو …ممكن لو هو كلمهم يقتنعو منه
*********************
بعد وقت
في المستشفى كانت دينا تساعد حبيبة لارتداء ملابسها
حلا : حبيبة اجيبلك اكل ؟
حبيبة بتعب : لا .. ماما غيري للبيبي هدومه
سعاد : حاضر يحبيبتي
اوس بقلق : حبيبتي مالك ؟ حاسة بتعب ؟
حبيبة ببكاء : ضهري بيوجعني اوي
حلا بسرعة : خليك جنبها هروح انده للممرضة تديها حاجة تخفف الالم
اوس : طب روحي بسرعة
سعاد : ريحي ضهرك يا بنتي و هيخف الوجع بسرعة
دينا : يلا خلصنا اهو … افردي ضهرك و حاولي تنامي
حبيبة : هففف انا تعبت من النوم اصلا
دينا : طب تحبي اقولك حصل ايه امبارح ؟
حبيبة : اه قولي
دينا : حازم راح مصر لوحده و ساب ليلة
اوس باستغراب : و هيا راحت فين ؟!
دينا بخبث : فضلت عندنا .. اصله راح يشوف يمنى
حبيبة بذهول : ما تقوليش انك صالحتيهم على بعض بالسرعة دي
دينا : كتر خيره زياد الي لين دماغه .. بجد بني ادم مغرور جدا
حبيبة : بالعكس باين عليه طيب و كان بيعامل بنته حلو اوي .. بس يمكن عشان انتي اتكلمتي بموضوع حساس بالنسباله
اوس : و هو و يمنى رجعو لبعض يعني ؟
دينا : راح يكلمها و ان شاء الله هيرجعو لبعض بقا و نخلص من ام الحكاية الي قرفتني دي
حبيبة : منتي الي جايباه لنفسك .. حد قالك تدبسي نفسك ؟!
دينا : انتي مش بتزهقي من الجملة دي ؟!
حبيبة : لا .. تلاقي مصطفى مبسوط اوي دلوقتي
دينا : اه ده يعتبر دين برقبته و هخليه يردهولي
حبيبة : انتي هتذليه عشان وجبتي معاه ؟!
دينا : مهو عمره ما عملي حاجة كويسة من غير مقابل
اوس : حبيبتي انتي لسا تعبانة ؟
حبيبة : لا الوجع خف شوية
اوس : طب انا هنزل اعمل اجراءات الخروج .. لو احتجتي اي حاجة كلميني
حبيبة : اوك يا حبيبي
طبع قبلة على رأسها و خرج
سعاد : خودي يا حبيبتي اهو لبسته
حبيبة بابتسامة : الهدوم كبيرة عليه شوية
سعاد: معلش عادي .. خليه بحضنك يبنتي و كل شوية خوديه على صدرك .. هو لسا صغير و عايز دفا و امان
حبيبة بسعادة : بيبصلي
دينا : انا سمعت انك لازم تتكلمي معاه كتير عشان هو بيميز صوتك من و هو ببطنك و اتعلق بيكي من ساعتها
حبيبة بحب : هقوله على كل حاجة بتحصل معايا بالتفصيل .. بس عارفين خايفة اني مفهمش عليه .. افرضي يماما كان تعبان و انا ما عرفتش او كان عايز لبن او اغيرله البامبرز .. هعمل ايه ساعتها ؟
سعاد : ما تقلقيش يحبيبتي .. مع الوقت هتتعلمي و تعرفي على طول هو عايز ايه
دينا : بيقولو ان صوت عياطه بيفرق .. يعني كل حاجة و ليها صوتها
سعاد : بصي يا حبيبة لما يعيط معاكي اول حاجة تشوفيه لو عايز ياكل و لو كنتي لسا مرضعاه لازم تكرعيه كويس و تشيكي ع البامبرز و لو فضل يعيط تاخديه بحضنك .. ساعات بيكون عنده غازات و ممكن يكون عايز حضنك و بس
حبيبة : طب و لو عايز ينام ؟
سعاد بضحكة : هينام يا حبيبة ما تقلقيش .. بالراحة على نفسك بكرا هتبقى خبرة بالامومة
حبيبة : خايفة يحصلي زي فريدة
دينا بضحك : الواد اسر عملها عبرة لينا كلنا
سعاد : انتي بس ما تعوديش البيبي على عادات غلط و ان شاء الله هتبقى الدنيا حلوة .. هما اول ست شهور بالعادة بيكونو صعبين
دينا : و بعدها تتعودي بقا .. ما تفكريش انك هترتاحي يعني
حبيبة : سمعتي عن جبر الخواطر يا دينا ؟!
دينا : ابدا و لا اعرفه
دلفت حلا و هي تمسك بيد الممرضة و تسحبها نحو حبيبة
دينا بضحك : انتي بتعملي ايه يا حلا ؟!
الممرضة : ابوس ايدك تقوليلها تسيبني
سعاد : في ايه يا بت ؟! ما تتلمي و ما تفضحيناش
حلا : ما هي الي لطعتني ساعة و انا مستنياها
الممرضة و هي تعدل حجابها : و الله يا فندم كان عندي شغل
دينا بضحك : عادي .. المهم ما تزعليش حلا عشان دي قوية و كانت هتجيبك من شعرك وسط المستشفى عادي جدا
الممرضة بابتسامة : معلش شكلها خايفة على المدام حبيبة .. هي تقربلك ايه ؟
حلا : اختي الصغيرة
الممرضة : ربنا يخليكم لبعض .. مالك يا مدام حبيبة ؟ حاسة بايه ؟
حبيبة : كان ضهري بيوجعني اوي و دلوقتي خف شوية
الممرضة : ده طبيعي ما تقلقيش
حلا : يعني سيبتها تتوجع طول المدة دي و بعدها جاية تقولي الكلمتين دول ؟! كان هيجرالك ايه لو جيتي من الاول و اديتها حاجة تخفف الالم ؟
الممرضة : ما انا لسا مدياها مسكن من ساعة ما ينفعش نزودلها اكتر من كدة
حلا : حبيبة حاسة بحاجة تانية ؟
حبيبة : لا خلاص .. احنا اصلا شوية و هنمشي
الممرضة : طب عن اذنكم هرجع اشوف شغلي
حلا : اتفضلي
*****************
بعد عدة ساعات
عادت حبيبة للبيت و استقبلتهم العائلة بأكملها
عبدالله : الف سلامة عليكي يا حبيبتي ربنا يباركلكم بيه
حبيبة بتعب : ربنا يسلمك يجدو و يخليك لينا
سحر : تعالي اوديكي لاوضتك يا حبيبتي انتي لازم ترتاحي
حبيبة : معلش يا طنط هقعد تحت شوية و بعدين هطلع اوضتي
سحر : طيب براحتك بس ما تضغطيش على نفسك
اجتمعو في الملجلس الكبير
عبدالله و هو يحمل الطفل : ربنا يحميه ما شاء الله
فريدة بابتسامة : كدة هو و اسر هيبقو اخوة و صحاب
دينا : لو حبيبة شدت حيلها شوية كانو هيبقو توأم
سحر : خولة حضري الشوربة لحبيبة .. و انتي يا حبيبتي تعالي نوديكي اوضتك
كارما : هو احنا لحقنا نشوفها يا طنط ؟!
سحر : معلش اطلعولها فوق .. دي لسا والدة و هتتعب اكتر لو فضلت كدة
سعاد : حماتك عندها حق يا حبيبتي لازم ترتاحي و تتغطي كويس .. امشي معايا
اوس : معلش يا طنط انا هوديها
فارس بغمزة : هيشيلها
حلا : اتلم و سيبهم براحتهم
فارس بخفوت : تصدق يا تميم اوس صعبان عليا
تميم : ليه يعني ؟
فارس بخبث : هيرجع عازب شهر و نص
وكزه تميم في بطنه بقوة و قال : انت بني ادم سافل و ما اتربتش
مجرد ان وصلو السلم سحبها اوس نحوه برفق و حملها ثم اتجه الى الطابق العلوي
حبيبة : انت بتعمل ايييه ؟!
اوس : السلم هيتعبك
حبيبة بضحكة : طب امشي بالراحة .. فين كنان ؟!
اوس : انتي مستعجلة ليه ؟ هيجيبوه حالا ما تخافيش
وصل اوضتهم و وضعها على السرير بهدوء و غطاها ثم جلس بجانبها
حبيبة بوجع : اااه ضهري بقا يوجعني تاني
اوس : طب اسنديه يمكن ترتاحي
حبيبة : فين كنان ؟ ليه ما يجيبوه
اوس : ما تقلقيش يا روحي هيجي دلوقتي بس انتي ارتاحي
حبيبة : اوس ما تسمحش لحد يديه حاجة من غير ما يقولي .. و اوعى تديه لفارس ابدا
اوس : اطمني يحبيبتي محدش هيعمل حاجة
وضعت رأسها على كتفه و اغمضت عيناها بتعب
دلفت سعاد تحمل الطفل بيديها
سعاد :خودي رضعيه يا حبيبتي .. و اوعي تنامي الاكل شوية و هيجهز
حبيبة : منا اكلت من شوية قبل ما اجي مش عايزة اكل
سعاد : لازم تاكلي كويس عشان تقدري ترضعي البيبي يا حبيبتي .. و بعدين انتي يا دوبك اكلتي شوية في المستشفى و ده غلط
******************
فارس : ممكن افهم انتي متغيرة معايا ليه ؟
حلا : غور من وشي يا فارس
فارس : ليه يا مزتي ؟ كل ده عشان ما جبتلكيش ورد زيهم ؟!
حلا : ما انت لو بتفهم بالرومانسية كان زمانك جبتلي جنينة ورد مش بوكيه بس
فارس بضحك : ده اسمه تقليد اعمى .. انتي مش بتحبي الورد اصلا يا مزتي
حلا : حتى ولو .. الورد رمز للرومانسية من القرون الوسطى
فارس : بس الدنيا اتطورت دلوقتي .. يعني لو جبتلك فرخة مشوية بدل الورد مش احسن ؟!
حلا : منا لا شوفت فرخة و لا شوفت ورد حتى
فارس : طب بما انك اتطمني على اختك تعالي نخرج و ناكل برا
حلا : لا .. ممكن حبيبة تحتاجني بحاجة
فارس : طب خلاص اجيبلك الاكل لغاية عندك بقا
حلا : و الله لو عايز تجيب كنت جبت من زمان
فارس : اهو جيه مصطفى .. فين الاكل ياض ؟
مصطفى : اهو .. هات تمن الديلفري
فارس : ديلفري ايه ؟! منا اديتهولك من شوية
مصطفى : لا عايز اجرتي انا و الا مش هديك حاجة
حلا بحدة : هات من ايدك قبل ما اطلع جناني عليك
مصطفى : طيب طيب في ايه .. خودي يا طفسة
فارس : طب يلا غور من هنا
مصطفى : ليه ؟ هتستفردو بالفرخة ؟!
فارس : ما تروح تشوف ليلة بتاعتك يالا
مصطفى : لازقة بدينا من ساعة ما وصلت
حلا : روح من هنا ياض انت هتحكيلنا قصة حياتك ؟!
مصطفى : ما انتي لو بتفهمي بالذوق كنتي عزمتيني اكل معاكي
فارس : انت مش وش عزومة اصلا … لو ما مشيتش هقوملك
مصطفى : رايح اهو .. جاتكم القرف
*********************
فريدة : تميم .. انا لقيت الشريط ده ممكن تعرفلي ايه هو ؟
تميم باستغراب : و لقيتيه فين ؟
فريدة : باوضة كارما .. النهاردة الصبح كنت هناك و شوفته جنب سريرها .. و ناقص منه اربع حبات
تميم بصدمة : كارما بتاخد منه ؟!!
فريدة بقلق : ليه ؟ ده شريط ايه بالزبط ؟!
تميم : ده منوم قوي جدا ……….. يتبع
مغامرات عائلية 2
همس كاتبة
يتبع.. (رواية مغامرات عائلية الجزء الثاني) اضغط على اسم الرواية لتجد الفهرس كاملاً بجميع الفصول.