رواية مغامرات عائلية الجزء الثاني – الفصل الخامس
5
5
فارس : تميم الحق …جدتك غضبانة عندكم
زياد : انت اهبل يالا ؟!
فارس : ما اهي جايبة معاها شنطة الست الغضبانة الي بتروح بيها لبيت ابوها مش كدة يا حلا ؟
تميم و هو لا يزال متجمد : دي لو فضلت هنا هنشوف ايام سودةةةةة
زمردة : مالكم متنحين كدة ليه ؟!
فارس بمرح : مصدومين من كتلة الجمال الي احتلت بيتنا من ساعة ما دخلتي يا تيتة
زمردة بحدة : اسمي زيزي .. اوعك تقولي تيتة دي تاني يواد
فارس بتمثيل : اه يا قلبيييي .. لا زيزي دي بتحرك مشاعري .. مش كفاية الشعر الاصفر ده الي هيعمي عنيا من جماله
وكزته حلا في بطنه بقوة بينما ابتسمت زمردة بغرور
سحر : ماما .. ايه الي جابك ؟!
زمردة : ده بدل ما تأهلي و تسهلي بيا يا بت ؟!
اوس : اهلا و سهلا بيكي يا زيزي .. انتي رجعتي من فرنسا امته ؟
امسكت اوس من خدوده و قالت بمداعبة : حبيب قلب زيزي يا ناس … يخلاثي القمر كل يوم بشوف الاعلانات بتاعتك
اوس : مش كدة يا زيزي ابوس ايدك
دينا بضحك : شكلك مسخرة ياض
زيزي : انتو هتفضلو متنحين كدة ؟! فين مراتك يا اوس ؟
اوس و هو يقدم حبيبة : اهي حبيبة مراتي
نظرت زمردة لها من الاعلى للاسفل بتدقيق
زمردة باعجاب : واو .. هو ده الذوق مش زي اخوك الخايب .. تعالي بحضني يا حبيبتي
ابتسمت حبيبة و حضنتها
تميم : كدة برضو يا زيزي ما تحضريش فرحي ؟ ده انا حفيدك الكبير
زمردة : اممم و احضره ليه يولا ؟ عشان اشوف البلونة بتاعتك دي ؟
فريدة بشهقة : انا بلونة ؟! تميم جدتك بتشتمني
تميم بغيظ : ابوس ايدك كبري دماغك .. الست دي تشل بلد بحالها
سحر : ماما انتي جيتي هنا ليه ؟
زمردة : استني اخد نفسي الاول يا بت
اتجهت للارا و قالت بشهقة : بسم الله ما شاء الله .. مين القمراية دي ؟ اوعي تكوني بت ناجي
لارا بسعادة : لا انا لارا بنت ايهاب
زمردة : حلوة .. شقرا و جمالك فرنساوي زيي … خلاص هاخدك معايا و اجوزك جاد ابن ابني
خديجة بضحكة : ما تفتحيش عنين البت دي لسا صغيرة … اتفضلي يا طنط نورتينا و الله
زمردة و هي تشد كارما من يدها : و دي كمان حلوة .. بنت مين ؟
سحر : دي اخت فريدة
زمردة : بس مش جاية شبه زمزم المصدية زي اختها
دينا بمشاكسة : طب ما قولتيش رأيك بينا احنا التلاتة طالما نازلة تقييم بالبنات
اقتربت منها زمردة بتفحص و امسكت يدها و ادارتها
زمردة : حلوة .. بس عايزة زبط الاعدادات
و ضربتها بكفها على مؤخرتها امام الجميع
دينا بفزع : ايه ده يا لو سمحتي
حلا بضحك : محدش قالك ارغي
زمردة : مين المعصعصة الي بتتضحك دي ؟
حلا : الله يكرم اصلك انا حلا
زمردة : و مين دي
غادة باحترام : انا غادة
زمردة : اممم حلوة بس لو تقعلي الخيمة دي
غادة : ده حجاب يا تي.. يا زيزي
فارس : زيزي ما تطبيش بالحوارات دي عشان مش هتسلكي معاهم
تنهد عبد الله بضيق شديد و قال : اهلا و سهلا يا زمردة هانم .. ضايفوها يا ستات
فارس بضحك : زمردة ؟! ايه الاسم العرة ده ؟؟
حلا : مش ده كوكب ؟!
زياد : بصو المتخلفة دي كمان
اخرجت زمردة علبة من شنتطها
زمردة و هي تجلس : امسكي يا معصعصة انتي .. حطيلي معلقتين من ده مع شوية مية مغلية و هاتيه
حلا بتفحص : هو ايه ده اصلا ؟
زمردة : ده المشروب بتاعي .. وصفة طبيعية لتنضيف الجسم
دينا : ديتوكس ؟
زمردة : امم .. اتحركي يلا انتي هتقعدي تتأمليها
حلا حماس : حاضر .. ممكن اعمل كوباية ليا ؟
زمردة : اوي اوي .. يلا ما تتاخريش
سحر بنفخ : ماما ما قولتليش ايه الي جابك عندنا ؟؟
زمردة ببرود : اتخانقت مع باباكي و سبتله البيت
فارس باندفاع : اهو قولتلكم غضبانة
اوس بذهول : انتي لسا بتتخانقي مع جدي ؟؟؟؟
زمردة : طبعا .. كل المتجوزين بيتخانقو .. و المرادي السبب يستحق اسيبله البيت
سحر بصدمة : ايه السبب ؟! ايه الي يخلي ست عدت ال 70 سنة تطفش من بيت جوزها ؟
فارس بذهول : 70 ؟! الصاروخ ده 70 سنة ؟!
زمردة بغضب : سحر اخرسي و ما تجيبيش سيرة السن .. ده مجرد رقم
فارس : مش مهم السن .. المهم الجمال .. اموت انا و اعيد السنة
تميم بحدة : فارس اخرس و اتأدب .. ايه هتعاكس جدتي كمان ؟!
فارس : مهيا الي حلوة اوي .. الله
اتت حلا و قالت : الدرينك ده طعمه تحفة .. اتفضلي يا زيزي
زمردة و هي تأخذ الكوب : ميرسي شيري … مراتك بالشهر الكام يا اوس ؟
اوس : لسا باول التاسع
سعاد بابتسامة : انا هقوم احضر الاكل
عبدالله بنفخ : سعاد .. افصلي الاكل .. طربيزة للستات و طربيزة للرجالة .. انا هروح اصلي بالجامع
عدنان بتهرب : خودني معاك يابا
ايهاب : و انا كمان
حسين : اه ما فيش احسن من صلاة الجماعة .. هناخد اجر كبير .. يلا بينا
ذهبو مع بعضهم البعض بسرعة هربا من لسانها .. و كذلك النساء و اولهم سحر اتجهن للمطبخ .. بينما الشباب جميعهم جلسو في المجلس الكبير مع زمردة
زمردة : اوس عايزاك تعملي جزمة مخصوص ليا و تكون من جلد التمساح و بكعب عالي
اوس بابتسامة : من عنيا بس خليها للصيف عشان بالوقت الحالي عندي ضغط شغل
حبيبة بخفوت : هو انا لما اعجز هيبقى شكلي كدة ؟!
اوس : يمكن .. عموما احنا التخلف عندنا وراثة من ناحية الام و الاب يعني كدة كدة لابسين
حلا بضحكة : زيزي .. هو انتي ليه مش طايقة فريدة و نسل امها كله
زمردة بحقد : عشان خالتها الزبالة ست مسهوكة و كانت هتضحك على ابني زمان لولا ستر ربنا
فريدة بغضب : تميم انا مش قادرة استحمل الكلام ده .. عن اذنكم
ذهبت و هي تتمتم بغضب شديد و تبعها تميم
دينا : طب و ايه ذنب الغلبانة فريدة .. دي مش شبهم خالص و متخانقة مع خالتها حتى انها محضرتش الفرح
زمردة : مهيا شبها بالشكل مش شايفة .. و اهي اتقمصت عشان خاطرها
حلا : عموما يا زيزي انا عملت معاهم الواجب ما تقلقيش
زمردة : عمتلي ايه ؟؟
لارا : طحنتهم و علمت على اولادها كلهم
زمردة : ده انتي جدعة بقا .. برافو عليكي
اوس : مقولتيش ايه سبب الخناقة بينك و بين جدي ؟
زمردة بلامبالاة : سحب مني الكريدت كارد
اوس : و ده سبب عشان تسيبي بيت جوزك ؟!
زمردة : و الله هو الي سمعني كلام زي الزفت .. قال ايه وصلتي للسن ده و بتصرفي بغباء .. انا بصرف بغباء يا اوس ؟! كل الي بعمله اني بهتم بنفسي عشان يفضل يتفشخر بيا قدام الناس و املي عنيه بس هو ايه عايزني البس عباية سمرا و اقعدله بالمطبخ اخدم و انضف عشان كدة قررت خلاص هرفع قضية طلاق
تبادلو جميعهم النظرات المصدومة
اوس بذهول : انتي عايزة تطلقي بعد العمر ده ؟!!!!!
زمردة : قولت مليون مرة محدش يجيب سيرة السن ده مجرد رقم .. انا قدامك اهو الف مين يتمناني و عندك ابن عمك اغرم بيا من ساعة ما دخلت البيت يعني لو اتطلقت ممكن اخطفه من المعصعصة دي … او اتجوز انهي عيل بسن احفادي كمان
بدأ فارس يكح و يضحك مرة واحدة
حبيبة بذهول : مش معقووول
زمردة : انتي دخلتي الشهر التاسع يا بت و لسا ما ولدتيش ؟!
حبيبة : ما دا الطبيعي !
زمردة : اه يا خايبة .. عايزة سلفتك تشمت بيكي ؟! الست الشاطرة الي تولد بسرعة .. اوعي تصبري اكتر يا بت .. انا هعملك وصفة تولدك وقتي
حبيبة بخوف : لا لا انا متابعة مع دكتورة
زمردة حركت شفتيها بسخرية و قالت : الدكاترة ما بيفهموش حاجة .. اسمعي مني و اعملي حسابك تولدي من هنا تحملي من هنا على طول .. ما تخليش حد يعلي عليكي
زياد بضحك : دخلنا بحرب الستات
زمردة : اخرس انت
زياد : حاضر
زمردة : اوس ابقى خود مراتك مشيها شوية .. المشي كويس اوي للولادة .. كل يوم تروحي تمشي ساعتين
اوس بخبث : حاضر من عنيا
اتت سعاد و قالت : الاكل جاهز .. اتفضلي يا زمر.. يا زيزي هانم
**********************
في المساء
ذهب الكبار للنوم بوقت باكر و لأول مرة يتجاهل عبد الله جلسة المساء مع ابناءه و احفاده
في الحديقة الامامية
كان الشباب جميعهم يجلسون حول زمردة حتى فريدة كانت معهم بعد اصرار تميم
زمردة : و البلونة دي قاعدة معانا ليه ؟ على حد علمي عندها بيبي ما تروح تتلهي بيه
تميم : زيزي ارجوكي ما تتكلميش كدة .. دي مراتي يعني لازم تحبيها زي ما بتحبني
زمردة : و مين قالك اني طايقاك اصلا ؟ ده انت الحفيد الوحيد الي ما بينزليش من زور
تميم بصدمة : يا انهار اسود .. ده انا اكبر احفادك يا تيتة
زمردة بغضب : كام مرة قولت اسمي زيزي .. و بعدين من ساعة ما عملتها بوشي اول ما اتولدت عرفت انك هتتعبني
تميم باحراج : ايه الكلام ده يا زيزي .. بلاش نتكلم بالحاجات دي
زمردة : ليه اتكسفت ؟! ده انت كنت زنان و مش طايق حد .. من يوما سحر زلطتك و انت مغرور و مش عايز الا حد يشيلك و يمشي بيك
فارس بضحك : اخيرا جيه حد يخلصلي حقي من دكتور الحمير ده
دينا باهتمام : زيزي .. انا اعتقد اني سمعت طنط سحر بتقول ان حضرتك تعرفي كارون و حضرتي جنازته ده صح ؟
زمردة : اممم .. و انتي سمعتي عنه فين ؟
دينا :شوفت مقاطع على التيك توك بيتكلمو عليه و الكل شمتان بيه
فارس : هو مين ده اصلا ؟
زمردة : ده عالم هندي .. معروف عنه انه مخاوي و بيقدر يعمل المستحيل
غادة : استغفر الله العظيم .. الكلام ده حرام .. محدش يقدر ييعمل حاجة الا باذن الله
دينا : ما احنا عارفين .. هو اصلا مات موتة وحشة اوي و اتفحم في بيته .. الناس كلها شمتانة بيه و بقا تريند
حلا : ده اسمه دجال مش عالم .. مش دول بتوع رد المطلقة و جلب الحبيب بخمس دقايق ؟!
غادة : دول كلهم هيروحو النار .. و حرام نصدقهم
كارما بخوف : طب خلاص اقفلو السيرة دي
دلف يزن و قال : مساء الخير
دينا بسعادة : مساء النور .. تعالا اعرفك على زيزي
زمردة باعجاب : مين السبع ؟
زياد بضحكة : ده يزن خطيب دينا و يعتبر واحد من العيلة
زمردة : اممم يزِن .. حلو
يزن بخفوت : اسمي يزَن .. بلاش عوجة البوق دي
دينا : ارجوك ما تشدش معاها بالكلام دي ست غريبة جدا
يزن بغمزة : اوس .. تمام
اوس : امم اتفضل يا يزن
حبيبة بفضول : في ايه ؟ انتو متفقين على حاجة ؟
اوس : لا يحبيبتي .. بس يزن بيستظرف
زمردة : تميم قول للبلونة مراتك تقوم تجيبلي ماسك الوش بتاعي
فريدة بحنق : انا مش فاهمة انتي في حد مسلطك عليا ؟ عملتلك ايه عشان تفضلي تدايقيني كدة ؟
زمردة : شبه خالتك و ده شيء كافي بالنسبالي .. قومي يلا يا بت هاتي الي قولتلك عليه
فريدة بنفخ : حاضر
قامت فريدة و ذهبت
حبيبة : و الله يا زيزي فريدة طيبة و غلبانة .. حرام تقسي عليها كدة
دينا : و بعدين دي طردت خالتها من البيت و هزقتهم يعني بصفنا
حلا : و المتل بيقول ايه ؟ بيقول عدو عدوي صاحبي .. يبقى اكسبيها لصفك احسن
تميم : دي فريدة طيبة طيبة ما تتوصفش يا زيزي .. المسكينة كانت هتكلمك تعمليلها وصفة عشان تخس
زمردة : كفاية زن .. خلاص هطيب خاطرها اما ترجع
اتت فريدة و قالت : العلبة فاضية !
زمردة باستغراب : ازاااي ؟! ده انا حطيتها مليانة و مقفولة بالتلاجة .. مين استعملها ؟
حلا بصدمة : ده كان ماسك ؟!
زمردة : ايوة !
حلا بذهول : ده انا افتكرته زبادي بالفراولة و نزلت سف بيه مع فارس
زمردة بفزع : يخربيتك .. اكلتي الماسك ؟!
حلا : معقولة اتسممت ؟! اه اه .. انا رجليا بتترعش .. كلمو الاسعاااف
زمردة : ما بلاش كدب دي مكونات طبيعية مش بتأذي المعدة .. قومي اعملي كوبايتين من الديتوكس بتاعي و اشربيها انتي و المدهول ده
حلا و هي تمسك العلبة : من عنيا .. ده انا اصلا كنت هطلبها منك
**************************
في اليوم التالي
تميم : انا كلمت جدو و قولتله انها عندنا و طبعا هو اتجنن و اتعصب عليا
اوس : طب و هيعمل ايه ؟
تميم : قالي انه هيجي اليومين دول يصالحها و ياخدها من هنا
عبد الله : كويس .. نستحمل يومين
حسين : للدرجادي محدش طايقها ؟!
عدنان بضحك : ده انا دبحت عجل لما سابتنا و سافرت فرنسا .. دي كانت كاتمة على نفسي و كل يوم كانت بتجيلنا من النجمة تفضل قاعدة عند سحر لنص الليل
حسين : ايوة فاكر الايام دي .. بس برضو ده بيت بنتها يعني
ايهاب : مهيا كانت عاملة فيها ست البيت و الكبيرة و كانت بتكيد امي الله يرحمها و كل يوم خناقة شكل
عبد الله : الله يرحمك يا فاطمة .. سيبونا من سيرة الستات دي
اوس : طب استأذنكم انا هاخد حبيبة نتمشى شوية
حسين : خود بالك منها يا اوس و لو تعبت كلمنا على طول
اوس : و لا يهمك يعمي .. عن اذنكم
صعد اوس للطابق العلوي و دلف اوضته
اوس : حبيبتي عاملة ايه ؟
حبيبة بتعب : كنت لسا هنام .. حاسة نفسي تقيلة اوي .. شكلي قربت
اوس : طب تعالي نمشي شوية .. بيقولو كويس اوي للولادة
حبيبة : طيب يلا بينا
في طريقهم التقو بدينا و غادة
دينا بغمزة : رايحين فين ؟
حبيبة : عايزة امشي شوية عشان الولادة
دينا : اشطا جاية معاكم .. غادة قولي لماما اني مع حبيبة و اوس
غادة : حاضر .. في امان الله
ذهبو سويا باتجاه الخارج و بدأو بالمشي
حبيبة : الدنيا هتضلم .. لازم خرحنا بدري عن كدة
دينا بخبث : لا مفيش احلى من الليل .. الجو رومانسي اوي
حبيبة بضحكة : الله عليكي .. بقيتي مرهفة اوي
وصلو البوابة التي تؤدي لارض والد يزن
حبيبة باستغراب : مش دي ارض العزايزة الي روحنلها من ناحية الغيط ؟!
اوس : ايوة هيا
دينا بخبث : الارض هنا حلوة اوي للمشي يا حبيبة .. اهو تمشي بمكان رايق من غيرا ما حد يشوفكم من الشارع
حبيبة بادراك : ايوااااا .. انتي جبتينا لهنا عشان تقابلي يزن مش كدة ؟!
دينا : هو ده
يزن من وراهم : اتأخرتو اوي .. ده انا وصلت من ساعة و قاعد مستنيكم
اوس : اممم .. طب يلا استلم و سلم
يزن : خود المفتاح اهو .. الارض فاضية و مفيش غفر جوا
حبيبة : ليه يعني ؟! هو في حاجة ؟
يزن : اوس قالي انكو حابين تتمشو شوية فقولت تمشو براحتكم من غير ازعاج
دينا : خلاص ما تضيعوش وقت بقا .. احنا هنروح نتفسح شوية .. خود بالك منها يا اوس و لو حصل اي حاجة كلمونا
دخل اوس مع حبيبة و بدأو بالمشي تجاه البيت القديم بينما دينا ذهبت مع يزن بسيارته
حبيبة : اوس انت بتخطط لايه ؟ دلوقتي لو تأخرنا جدو هيدايق .. و لو عرف ان دينا خرجت مع يزن من غير علمه هيعاقبنا كلنا
اوس : ما تقلقيش .. ادخلي انتي بس و ما تشيليش هم
دلفت حبيبة البيت و نظرت للمكان بانبهار شديد … كان البيت مزين بطريقة رومانسية و مجهز كأنه جناح في فندق فاخر
اوس و هو يحضنها من الخلف : كل سنة و انتي حبيبة قلبي و حبي الابدي
حبيبة بابتسامة : بس النهاردة مش عيد ميلادي !
اوس : عيد جوازنا
حبيبة بذهول : صحيح .. انا ازاي نسيت ؟ ده انا كنت مخططة هعمل حاجات كتير اوي باليوم ده
اوس بحب : انتي مش مطلوب منك تعملي حاجة غير انك تفضلي بحضني .. الحاجات دي عليا انا
حبيبة : اوس لو تأخرنا هيفهمونا غلط
اوس بخبث : ما تقلقيش انا كلمت جدي و قولتله هنتأخر
حبيبة بخجل : انت كدة فضحتنا
اوس : ليه هو انا جايبك لشقة مفروشة ؟! انتي مراتي يا بت
حبيبة بدلع : ده كان احلى يوم بعمري يوما بقيت مراتك
اوس بهيام : بحبك يا حبي الابدي
حبيبة بتوهان : و انا بعشقك
بدأ بتوزيع قبلاته على وجهها و رقبتها .. احاطت يداها رقبته بتوهان لتستقر قبلته على شفتيها و يغرقان سويا في عالهم الخاص
******************
في صباح اليوم التالي
استيقظت حبيبة من النوم و نظرت حولها لتدرك انهم لم يعودو للبيت ليلة امس
حبيبة : اوس … اوس .. حبيبي اتأخرنا
اوس : صباح الخير .. ايه ده هو النهار طلع ؟
حبيبة : ايوة .. قوم نروح قبل ما حد يلاحظ غيابنا
بعد وقت قصير عادو للبيت و كان الجميع نائمين عدا سحر و سعاد في المطبخ و لم يشعرن بهم
اوس : ما حدش شافنا اهو ما تتكسفيش بقا
حبيبة بابتسامة و دلع : ليلة امبارح كانت تحفة .. فكرتني بشهر العسل
اوس : انا حياتي كلها عسل من ساعة ما اتولدتي
حبيبة : انت هتنام و لا خلاص ننزل ؟
اوس : و الله مش هقول لا لساعتين نوم زيادة .. خصوصا ان النهاردة عندي شغل كتير
حبيبة : اوك .. انا جعانة اوي هاخد شاور و انزل افطر
بعد وقت
نزلت حبيبة وجدت زمردة و دينا و حلا و لارا يجلسن سويا … كانت زمردة تروي لهن حكاياتها و مغامراتها و هي شابة
حبيبة : صباح الخير
دينا بخبث : صباحية مباركة يا عروسة
حبيبة بحدة : دينا اتلمي
زمردة : عاملة ايه ؟ لسا مش عايزة تولدي ؟
حبيبة : ما البيبي محجر اعمل ايه .. و بعدين ماما بتقول ان الطبيعي اكمل الشهر التاسع كله
حلا : ايوة انا اسمع كدة برضو ان الحمل الاول بيطول و ممكن تدخل العاشر برضو زي البقر
حبيبة : حلا اخرسي انتي البقرة
حلا : و الله ما بشتمك .. بقول زي زي افهمي ده تشبيه عادي
حبيبة : مش ناقصة محضراتك انا دماغي مصدعة و ما سلمتش من الكوابيس
زمردة : كوابيس ؟!
حبيبة : من ساعة ما جيت البيت ده و انا بحلم بالطفل بطيخة و كل مرة بحس اني هتخنق
حلا بضحكة : الواد ده من ساعة ما شوفتيه و اسمه لازق على لسانك .. مش كنتي تجيبيه و تحتويه و ما تقرفيناش بقا
زمردة : بتقولك كوابيس .. و اهي الولادة مش متسهلة معاها .. يبقى اكيد ده عمل
حبيبة : هو كل ما حد يقول انا مصدع يبقى عمل ؟!
زمردة : اكيد حد بيكرهك عملك عمل اسود عشان ما ترتاحيش بحياتك .. قومي معايا يا بت
حبيبة باستغراب : على فين ؟!
زمردة : عند الحجة سعدية .. هي الي هتفكلك العمل المهبب ده ….. يتبع
مغامرات عائلية
همس كاتبة
الفصل التالي: اضغط هنا
يتبع.. (رواية مغامرات عائلية الجزء الثاني) اضغط على اسم الرواية لتجد الفهرس كاملاً بجميع الفصول.