رواية الفريسة والصياد – الفصل الأول
الفصل الاول
الحلقة الأولى :
في داخل أحد البيوت التي تمتاز بالبساطة وبأهلها ذوي الطباع الطيبة في محافظة الغردقة كانت يارا تنادي على جدتها لكي يفطرا سوياً قبل أن تذهب لتباشر عملها و..
-يارا بصوت مرتفع : يا نوووجااا ، نوووووجاااا ، نووووووووووووجاااااااا
-نجاة من الداخل : ايه يا بنتي في ايه ؟؟ ايه الزعيق ده كله
-يارا: الله مش بنادي عليكي عشان تلحقي تفطري وتشربي الشاي قبل ما يبرد
-نجاة : أنا مش بحب الشاي أبو بتاعة مدلدلة دي ، أنا بحب أعمله ع السبرتاية
-يارا: سبرتاية !! لأ انا كده هتأخر ع الشغل
-نجاة: يا بنتي فضك من الشغلانة اللي مش جايبة همها دي
-يارا: ليه بس يا نووووجا ، ده انا مصدقت ألاقي حاجة بحبها
-نجاة: انتي مش محتاجة لده كله
-يارا: هنرجع تاني للكلام اللي لا يودي ولا يجيب
-نجاة: ما أنا كل ما أفتح معاكي السيرة دي تقفلي معايا
-يارا : عشان مافيش داعي منها ، أنا همشي بقى
-نجاة: ده انتي ملحقتيش تفطري
-يارا: يدوب ألحق أروح السنتر
-نجاة: طيب طمنيني أما توصلي
-يارا: حاضر ، هرن عليكي ، بس اوعي تفتحي عليا
-نجاة: هههههههههه متخافيش هشحنلك
-يارا وهي تقبل جدتها : حبيبتي يا أحلى نوووجااا
يارا رفعت الصياد فتاة ذات بشرة بيضاء ووجه طفولي في العشرين من عمرها ، وتتميز عيونها بأنها عسلية ومشبعة بخيوط زيتية ، بينما يمتاز شعرها باللون الكستنائي المائل للبني ، وهي فتاة يتيمة الأبوين تخرجت حديثاً من المعهد العالي للسياحة والفنادق بالغردقة ، تُوفي والديها في حادث سيارة آليم قبل بضعة سنوات وكان عمرها آنذاك عشرة أعوام ، فانتقلت عقب هذا الحادث للعيش مع جدتها نجاة ( والدة أمها ) في الغردقة والتي أولتها كل الاهتمام والرعاية التي تحتاجها تلك الفتاة الصغيرة ، فأصبحت كلتهما مرتبطين ببعضهما البعض ارتباطاً وثيقاً ، كان لدى يارا عماً واحداً يزورها كل بضعة أشهر هي و جدتها ويُدعى رأفت لكي يعطيها بعض الأموال لتعينهم على الحياة ، كانت يارا ترفض أن تأخذ من تلك الأموال أي شيء ، فهي تشعر في قرارة نفسها أن تلك الأموال ماهي إلا أموال صدقة أو احسان يدفعها عمها رأفت كتعويض عن غيابه ، ورغم اصرار نجاة على أن تأخذ يارا تلك الأموال لأنها حقها الشرعي ، إلا أن يارا دائماً ما ترفض مساعدته
يارا تعمل حالياً في أحد المراكز الرياضية لتعليم الأطفال الآيروبيك ، فعلى الرغم من أن وظيفتها لا تمت بصلة لدراستها إلا أن عشقها للأطفال جعلها تقبل بتلك الوظيفة المتواضعة وتثبت جدارتها فيها رغم حداثة سنها ، فهذا المركز ماهو إلى صالة تدريب رياضية للأطفال لتقوية عضلاتهم وزيادة لياقتهم البدينة ، وخلال تلك الفترة القصيرة التي تولت فيها ذلك المنصب استطاعت يارا أن تثبت نفسها وتصبح محبوبة بين جميع من في المركز …
في داخل المركز الرياضي ،،،
-يارا وهي تصفق : يالا يا حبايبي هنبدأ التدريب
-أحد الأطفال: مس يارا ، مش هنستنى يوسف
-يارا: ماهو كل يوم يتأخر
-طفل أخر : مس يارا I love you
-يارا: وانا كمان يا حبيبي
-سمر من بعيد: لولوو حبيبتي ، منورة السنتر
-يارا: ازيك يا سمورة ، ايه الأخبار ؟؟
-سمر: تمام الحمدلله ، ها بدأتي ولا لسه؟؟؟
-يارا: مستنية يوسف وأبدأ ع طول
-سمر: أها.. طيب أما تخلصي عدي عليا عشان نخرج شوية ، أنا زهقانة ع الأخر
-يارا: من ايه ياختي ، ده انتي ع طول مقضياها يا خروجات يا فسح يا سفريات
-سمر: الله !! مش أعيش حياتي قبل ما يجي اللي يكبس ع نفسي ولا أعرف أخرج حتى ولا أهش ولا أنش
-يارا: ده أنا واثقة انك هتطلعي عينه وعين اللي خلفوه
-سمر: طبعاً ، ده يحمد ربنا أصلاً إني قبلت بيه
-يارا: ماشي ماشي
-أحد الأطفال: مس يارا ، يوسف جه
-يارا: أوك ، ماشي يا سموورة ، هخلص شغل ونتكلم بعيد
-سمر: اوووكيش ، سلامووز يا يويوو
-يارا: باي
وبدأت يارا في تدريب الأطفال ، ثم سرعان ما اندمجت معهم في أفعالهم الطفولية البريئة ، فهي وإن كانت كبيرة في السن إلا أنها تتصرف مثلهم تماماً ….
…………………
في إحدى الشركات العملاقة الخاصة بالاستثمار والتطوير العقاري ، كان المهندس رأفت الصياد يعقد اجتماعه الهام مع بعض المستثمرين و…
-رأفت: وزي ما حضرتكم شايفين في الـ presentation المعروضة قدامكم ازاي شركتنا قدرت تنتهي من تنفيذ المشروع في أقل من المدة المحددة
-عميل ما: ده المتوقع من شركتك يا بشمهندس
-رأفت: ولسه في حاجات تانية
-عميل أخر: سيادتك مش محتاج تورينا ، اسمك واسم شركاتك لوحدهم كافيين كضمان لأي مشروع
-رأفت : شكراً ع الثقة دي
-عميل ثالث: احنا مجهزين العقود ، فياريت تتطلع عليها ونتفق ع البنود المطلوب تنفيذها
-رأفت : تمام .. يبقى المحاميين هيقعدوا معانا وان شاء الله نوصل لاتفاق مرضي لجميع الأطراف
-أحد العملاء : ان شاء الله
وما إن انتهى رأفت الصياد من اجتماعه حتى حضر إليه خالد ابنه الأكبر و…
-خالد: بابا بقولك احنا هنلغي عقدنا مع شركة المنتصر
-رأفت: ليه ؟
-خالد: مخالفين للشروط، ومعطلين الدنيا ، وعاملين مشاكل كتير
-رأفت: مممم.. طيب عملتلي تقارير بالكلام ده ؟؟
-خالد : كله جاهز وعلى مكتبك
-رأفت وهو يفحص الملف: عظيم أوي .. أنا مش عارف أخوك أدهم لسه مش زيك كده
-خالد : هو أدهم فاضي غير للنوادي والبنات
-رأفت: ربنا يهديه ويعقل كده وينزل معاك الشغل ويشيل عنك شوية بدل ما أنت شايله كله لوحدك
-خالد: يا رب ، ولو إني معتقدتش
-رأفت: طول ما الست والدتك وراه مش هنشوف منه غير الجنان
-خالد: ع رأيك يا بابا
-رأفت: طب يالا جهز نفسك عشان نلحق ننزل و نوصل الفيلا بدل ما يتعمل معانا تحقيق كرومبو اليومي
-خالد: ايوه ، أنا عارف فريدة هانم ما بتصدق
-رأفت: بالظبط
…………..
في أحد النوادي الشهيرة بالقاهرة ، كان أدهم رأفت الصياد يمارس هوايته المعتادة وهي الرماية ، فقد حقق فيها بطولات كثيرة مما جعله معجب الفتيات الأول ، فكان له من المعجبات ما يتخطى المئات من كل الأعمار ، ورغم كثرتهن إلا أنه دائماً وأبداً يحب أن يتقرب منهن ويتودد إليهن ، فصار الحلم المستحيل لجميع الفتيات والسيدات …
أدهم رأفت الصياد هو الابن الأوسط لرجل الأعمال الشهير رأفت الصياد في أواخر العشرينات من عمره تخرج من كلية تجارة انجليزي بعد عناء طويل فيها ، ورغم اصرار والده على أن يعمل أدهم معه بعد تخرجه إلا انه رفض العمل لاجباره على الالتحاق بتلك الكلية من البداية ، فقد كان يطمح أدهم في أن يلتحق بكلية التربية الرياضية ، ودائماً ما يقضي معظم وقته بصحبة أصدقائه أو في الرحلات أو في ممارسة الرماية ، وأخوه الأكبر هو خالد ويكبره بأربعة أعوام خريج كلية الهندسة ويعمل مع والده كمدير تنفيذي لشركاته ، بينما أخوه الأصغر هو عمر طالب بالصف الأول الثانوي في أحد المدارس الدولية الخاصة …
كان أدهم يتميز ببشرته البيضاء والعيون العسلية والشعر المائل للون البني ، بالاضافة إلى لياقته البدنية العالية والجسد القوي والعضلات البارزة ، فهو من محبي ممارسة الرياضة ، ولكن أقرب الهوايات إلى قلبه هي الرماية
-أدهم من بعيد ملوحاً بيده : شباب !! منورين
-هيثم: أدهم باشا ، ازيك يا معلم
-باسل: يااااه كل ده تأخير
-أدهم : معلش بقى ، راحت عليا نومة
-هيثم: راحت عليك نومة برضوه ولا كنت بتظبط
-أدهم: احم… لأ مش أوي يعني ، دي طلعت بت فكسانة
-باسل: ارحم نفسك شوية ، انت ايه مش بتتعب ؟؟؟
-أدهم بابتسامة و ثقة : وهو في احلى من كده تعب !!
-هيثم وهو يشير إلى فتاة ما : بص هناك ، رزان جت أهي
-أدهم بصوت عالي : مززززتي
رزان عماد الدين هي فتاة جميلة تهتم بالمظاهر كثيراً ، وهي الصديقة المقربة لأدهم ، يربطهما سوياً علاقة أقوى من الصداقة ، يتشاركان في الكثير من الأشياء رغم أنها تصغر أدهم بعدة سنوات إلا أنهما يشكلان ثنائياً متوافقاً مع بعضهما ، تقدم أدهم لخطبة رزان بعد إلحاح منها ولكن والدها رفضه لأنه في نظره ( عاطل ) ، ولم يشكل هذا الرفض أي فارق معه ، فهو مازال مستمراً في علاقته معها
-رزان وهي تلوح بيدها: أدهومة ، miss you ، ايه اخبارك
-أدهم وهو يقترب منها ويحتضنها : تمام ، وانتي ؟
-رزان: كويسة
-أدهم : لأ من نبرة صوتك دي باين عليكي مش في المود
-رزان: مخنوقة يا أدهومة ، عاوزة أغير جو
-أدهم : كده انتي جيتي في ملعبي ، تحب مزتي تروح فين ؟؟
-رزان: ممممم.. مش عارفة
-أدهم: سيبلي نفسك وأنا همخمخلك كده في حاجة ترجعك المود تاني
-رزان: أوك
-ندى من بعيد : هاي يا جماعة
-باسل: هاي ندى
-أدهم: نودة ، ازيك
-رزان: مممم.. ايه يا نودة كنتي فين ؟؟؟
-ندى: كنت بتمشى
-رزان: بتتمشي برضوه ولا بتظبطي مع علاء
-ندى: اووف منك روزا
-باسل: أنا مش عارف عاجبك ايه في البتاع ده
-ندى: عادي يعني احنا مجرد أصحاب
-أدهم: أصحاب ولا مصلحة ؟؟
-ندى: من ده على ده
-رزان: طول عمرك يا نودة معروف عنك انك بتاعة مصلحتك وبس ، والمرة دي ايه بقى ؟؟؟
-ندى: هيظبطني في حفلة ملكة جمال النادي
-رزان بثقة : شوور هتخسري
-ندى : ليه يعني ؟؟
-رزان :عشان أنـ…
-أدهم مقاطعاً : عشان روزا شور هتنزل المسابقة دي
-رزان: طبعاااا
-ندى: يوووه ، ده انا مصدقت ، كده هتضطر أفرقع علاء
-باسل: فرقعيه زي العشرين اللي قبله
-الجميع: ههههههههههههههههههههه
-ندى: بس بقى مش تبقوا بايخين
-أدهم: خلاص خلاص ، مش يالا بقى نروح نتغدى
-رزان: اوك
-هيثم: والحساب عندك طبعااااا
-أدهم: ومن امتى في حد بيحاسب وأدهم الصياد موجود ؟؟؟؟؟
-باسل: صح ، انت الكبير يا كبير
-أدهم بثقة: طبعاااااااا
…………………..
في فيلا رأفت الصياد ،،،
كانت هناك سيدة راقية تمتاز بالتسلط والتكبر ويبدو عليها أنها سيدة هذه الفيلا الواسعة ، كانت فريدة هانم تصرخ في احدى الخادمات و…
-فريدة بصوت مرتفع : ازاي يعني يتكسر ، هي تعرف تمنه كاااااااام ؟؟؟
-صباح: سوري يا هانم ، البنت مكنتش مركزة
-فريدة: تترفد فوراً ، انا معنديش حد يسرح في شغله ، ويتخصم اللي اتكسر ده من مرتبها قبل ما تاخده
-صباح: حاضر يا فريدة هانم
-فريدة: اومال البيه عمر رجع من السكول بتاعته ؟؟
-صباح: لسه الباص مجاش يا هانم
-فريدة: ازاي يعني ؟؟؟ ده معاده المفروض كان من نص ساعة !!!
ثم سُمع صوت كلاكس اتوبيس ما في الخارج ، فأسرعت صباح لترى من النافذة أن مراهقاً شاباً قد نزل لتوه من أتوبيس المدرسة ودلف لداخل الفيلا …
-صباح: عمر بيه جه يا هانم
-فريدة: يومه مش هيعدي
-عمر : هاي عليكو ، ناني صباح ازيك
-فريدة: ايه التأخير ده كله ؟؟؟؟
-عمر: تأخير ايه بس ، ما انا جاي في المعاد أهوو
-فريدة: جاي في المعاد ولا بتتسرمح مع أصحابك
-عمر: بتسرمح !! طب الباص اللي انا جاي فيه ده نظامه ايه ؟؟ فوتوشوب مثلاً
-فريدة: يوووه ، أنا زهقت من عمايلك دي ، امتى تكبر وأرتاح من مسؤليتك
-عمر في نفسه: ياااااا ريت يا حاجة ، ده أنا أول واحد هرتاح ، وربنا يتوب علينا من تحقيق كل يوم ده
-صباح: يالا يا عمر بيه عشان تلحق تغير وتتغدى قبل ما المدرسين بتوعك يجوا
-عمر: اوك
-فريدة: صباح جهزي الغدا عقبال ما اكلم البهوات اشوفهم جايين أمتى !! أه وماتنيش تكلمي المخدم يجبلنا شغالة جديدة بدل الغبية اللي جابها
-صباح : حاضر
هاتفت فريدة هانم زوجها وولديها لتعرف منهم متى سيعودون للمنزل و..
-فريدة هاتفياً : أيوه يا رأفت ، انت فين دلوقتي ؟؟
-رأفت: في الطريق ، شوية وهاكون عندك
-فريدة: عظيم ، وخالد ؟؟؟
-رأفت: جاي ورايا بعربيته
-فريدة: تمام أوي ، منتظراكم متتأخروش
-رأفت : بأمر الله مسافة السكة
ثم اتصلت على رقم أدهم و…
-فريدة هاتفياً : مش بيرد ليه ده ؟؟؟
-أدهم وهو يرى رقم المتصل : يوووه ، دي فريدة هانم اللي بتتصل
-هيثم: مش هترد عليها ؟؟؟؟
-أدهم : كبر منها ، هتقولي مش ناوي تيجي تاكل ، لأ معرفش وشوية حاجات هبلة كده
-هيثم: دي أمك يا جدع
-أدهم: يعني هي عشانها أمي يبقى أرد عليها
-هيثم: طبعاً ، وبعدين دي ست ، يعني الصنف بتاعك اللي لا يمكن حد ينافسك فيه أبدااااا
-أدهم : عشان خاطر البؤين دول هكلمها
-أدهم بصوت مرتفع للجميع : يا شباااااب اسبقوني ع المطعم وأنا هحصلكم
-باسل : اوك
-رزان: تمام ، متتأخرش
-ندى: اووك
طلب أدهم رقم والدته ليحدثها و….
-أدهم هاتفياً : ست الكل فيرووو هانم
-فريدة: أخيراً رديت عليا
-أدهم: معلش يا حبيبة قلبي ، التليفون كان صامت وماكونتش سامعه
-فريدة: لأ ، مش مصدقاك
-أدهم: ليه بس ؟؟ ده انتي حبيبة قلبي وعقلي وحياتي كلها يا فيروو
-فريدة: ايوه ايوه اضحك عليا بكلامك ده
-أدهم : يا ماما وهو أنا أقدر برضوه أضحك عليكي
-فريدة: طب هاتيجي امتى عشان تتغدى ؟؟؟
-أدهم : لأ أنا فاكس النهاردة
-فريدة: ايه الكلام الغريب ده ، نفسي أعرف بتجيبه منين ؟؟
-أدهم : عادي يا ماما
-فريدة: برضوه مقولتليش هاتيجي امتى ؟؟؟
-أدهم : أنا هتغدى مع أصحابي بره
-فريدة: كل يوم غدا بره يا أدهم ، نفسي مرة تتغدى معانا
-أدهم: معلش بقى يا فيروو ، وبعدين عاوزاني أجي عشان أسمع كلمتين بايخين من بابا ويقعد يأطم فيا عشان مردتش أنزل الشغل معاه
-فريدة: محدش يقدر يا حبيبي يكلمك ولا يجبرك ع حاجة انت مش عاوزها ، وبعدين طول ما أنا واقفة معاك ميهمكش من حد
-أدهم: قلبي يا فيروو
-فريدة: بس امل حسابك ترجع بدري النهاردة
-أدهم : ليه ؟؟
-فريدة: خالتك ناهد جاية
-أدهم: اها .. كويس عشان أشوف جاسر بالمرة
-فريدة بلؤم: جاسر برضوه ولا شاهي
-أدهم: عيبك انك فهماني يا فيروووو
-فريدة: اه وأوعى تناديني قصادهم بفيروو ، فاهم !!!
-أدهم: أوامرك يا فيروو
-فريدة: برضوه
-أدهم: خلاص يا ماما ، هأقفل أنا عشان ألحق العيال المفاجيع لأحسن زمانتهم شطبوا ع الأكل كله
أنهى أدهم المكالة دون أن ينتظر أي رد ليلحق باصدقائه
-فريدة: ولد !!! مش هيعقل أبداً
………..
عودة مرة أخرى للغردقة ،،
في منزل الجدة نجاة ،،
كانت السيدة نجاة تشعر بأنها ليست على ما يرام ، صحتها دائماً في تدهور مستمر ، تحاول أن تبدو أمام يارا بخير ، ولكنها تعلم في قرارة نفسها أنها ليست كما تدعي …
-نجاة متآلمة : آآآه ، تعبانة يا نااااس، مش قادرة من جسمي خالص .. أنا حاسة بنفسي ، ربنا يستر ويارا متحسش بيا ، أنا خايفة عليها أوي لو حصلي حاجة مين هياخد باله منها بعدي ويراعيها ، أنا لازم أكلم رأفت مش هينفع أفضل ساكتة ومتكلمش ، سامحيني يا يارا ، أنا عارفة اني وعدتك اني مكلموش أبداً بس مش هاقدر أوفي بالوعد ده سامحيني …..!!!
◘◘◘ Flash Back لما حدث قبل سنوات ،،،
-نجاة : يا بنتي استهدي بالله
-يارا: احنا مش بنشحت منه يا تيتة عشان يجي يرملنا قرشين ويمشي
-نجاة: ده عمك برضوه
-يارا: عمي اللي مقاطعنا ولولا اتصالك بيه وزنك ع دماغه كل شوية كان زمانه نسينا خالص
-نجاة: اعذريه يا بنتي هو عنده شغل وبعدين ماهو برضوه بياخد باله من فلوسك
-يارا باستهزاء : أها فلوسي !!!
-نجاة: أيوه ميراثك من أبوكي الله يرحمه ، مش كانوا شركا ولا نسيتي
-يارا: لأ مش فاكرة غير انه المفروض يبقى عمي ، وأنا مش عاوزة حاجة منه ، أنا كل اللي كنت عاوزاه منه انه يبقى عمي بجد ويحبني من قلبه
-نجاة : يعني أنا مش بحبك ؟؟ اخص عليكي
-يارا: لا والله أنا مقصدش يا تيتة ، بس أنا عمري ما حسيت بأنه عمي ، وحتى فلوسي اللي عنده مش عاوزاها
-نجاة: يا بنتي أما هتكبري ان شاء الله هتلاقي ميراثك كله موجود وزيادة ، وساعتها هتشكريه ع اللي عمله وانه حافظلك عليها وكبرها
-يارا: أشكره لما يكون واخد باله مني زي الفلوس بالظبط
-نجاة: اصبري يا حبيبتي ، وان شاء الله هتعرفي انه بيحبك ، هو هيجي كمان يومين وهثبتلك كلامي
-يارا: أهــا .. في المشمش
…..
◘◘◘ في فيلا رأفت الصياد ،،،،
-فريدة بضيق : انت كل شوية هتفضل تروح لبنت أخوك
-رأفت بنرفزة : يعني عاوزاني أسيب البت ومسألش عنها
-فريدة: ده بدل ما تاخد بالك من عيلتك
-رأفت: الله مش ليها حق عليا
-فريدة: وحقنا احنا فين ؟؟
-رأفت: ده انا بروحلها مرة كل شهر يا فريدة ، أومال لو كنت جبتها تعيش معانا هنا كنتي عملتي ايه ؟؟؟
-فريدة: أهو ده اللي ناقص ، عاوز البت دي تربية نجاة تيجي تعيش معانا
-رأفت: لاحظي ان اللي بتكلمي عنها تبقى بنت أخويا ، مش واحدة من الشارع
-فريدة: أيوه وأمها مين ؟؟؟ مش هالة بنت نجاة !!! فاكر ولا نسيت
-رأفت: يوووه ، رجعنا تاني لكلامك الفاضي ده
-فريدة: ده مش كلام فاضي ، دي حقيقة ، ولا خلاص نسيت نجاة كانت شغالة ايييه ؟؟؟
-رأفت: لأ مش ناسي ، بس متنسيش انتي برضوه ان يارا بنت أخويا ليها ميراث أبوها الله يرحمه عندي وأنا ملزم بيه
-فريدة: ميراث ايه وزفت ايه ؟؟؟ ابوها مات وماكنش حيلته اي حاجة ، ده لولا تعبك انت وسهرك لليالي مكوناش وصلنا للمستوى ده
-رأفت محذراً : لأ عندك يا فريدة ، أخويا الله يرحمه كان شريكي ومش معنى انه مات يبقى هاكل حق بنته ، كله إلا الميراث ، ده حق ربنا !!!!!
-فريدة: خلاص ارميلها فلوسها وخلصنا
-رأفت: لأ مش هيحصل، أخويا قبل ما يموت وصاني أديها حقها لما تكبر وهي تتصرف فيه وأنا وعدته اني هعمل ده ، ومش هرجع في كلامي أبدااااااا
-فريدة: يبقى لما تتنيل تكبر يحلها ألف حلال ، لكن اياك تروح تاني عند نجاة ، أظن ده حقي ، وبعدين أنا مش عاوزة ولادي يعرفوا ان ليهم بنت عم عيلتها كانوا شغالين عند جدهم !!
-رأفت: بلاش أفكارك الرجعية دي يا فريدة ، الكلام ده مالوش داعي
-فريدة: كله إلا ولادي ومصلحتهم ، أظن ان ده حقي !!
-رأفت: طيب
-فريدة: انت حر تروحلها بس كل مدة ، مش عمال على بطال
-رأفت : ربنا يسهل
-فريدة: أنا بقولك أهوو ، عاوز تديها حاجة يبقى تبعتهالها مع حد ، لكن مرواح عند نجاة لأ
-رأفت: يووه ، قولتلك ربنا يسهل
-فريدة: أوووف
-فريدة في نفسها: مصدقت ان هالة ماتت وارتحت عشان تطلعلي بنتها ، حاجة تقرف ………………………………… !!!!!
الفصل التالي: اضغط هنا
يتبع.. (رواية الفريسة والصياد) اضغط على اسم الرواية لتجد الفهرس كاملاً بجميع الفصول.