((((چويرية حقي انا))))

((((الخاااااااااااتمة ))))الجزء الاول

🌹بقلم ريحانة الجنه🌹

چويرية زيها زي اي رواية ليا كتبتها قبل كدة…. بدأت وخلصت…فيها حكاية وفكرة واحساس…والاكيد كنت عايزة اقول من وراها حاجة…او بمعني اصح حاجات كتيير. بس قبل اي شئ انا مش هدافع عن نفسي قصاد اي حد…لان الرواية موجودة اللي حابب يقرأها ويحكم..وفي النهاية كل واحد.حر في رأيه بس رأيه يكون في الرواية مش يسب في شخصي انا…لاني ممكن اسامح في كلام سئ عن الرواية ده لو كان حقيقي اصلا ومن فانز مش مجرد رأي كاتبة انا ما اعرفهاش ولا عايزة اعرفها …لان اصلا ماحدش طلب منها رأيها ورأيها يكون بسماح مني انا غير كدة تخليها في روايتها وتشوف حالها بعيد عني…واي حد من طرفها هيتكلم بنفس كلامها هيكون ردي واحد.وبجد صدقوني هيكون عنيف اوي لان انا طبعي ايوة هادية وبعيد عن الزحمة بس لما يتمس اسمي بسؤء قسما بالله ما هسكت لحد….ياريت بقي كل واحد يشغل نفسه بنفسه ..زي ما انا ماليش علاقة بأي حد ولا بسئ لحد يبقي ياريت انا كمان ماحدش يتكلم عني…وللأسف الكلام في السر بعرفه وبيوصلني…وفي العلن جبناء ومش قادرين يقولوا اسمي….بس ده لوحده يكفي ليا انكم لو متأكدين انكم تقدروا تواجهوني كنتم عملتم كدة….وزي ما انتم موجودين للأسف ..فيه كاتبات محترمة وناجحة ومش بتشغل نفسها بغيرها وبتذكر الناس بالحسني…بس حقيقي انتم نهايتكم قريبة …وخصوصا اللي كانوا مبتدئين وربنا يعلم اني ساعتهم لما طلبوا مني حاليا هما بيطعنوا فيا وينقدوني…

😅😅😅😅😅.تمام خاليكم علي وضعكم ويارب تفلحوا..😊😊😊😊😊😊😊.

الرواية وحكاية الرواية 🤔🤔🤔🤔🤔🤫🤫🤫🤫🤫

*اولها الظلم والغدر اوقات كتيير بيكون من اقرب الناس ….وان الحلم والرحمة والامانة مالهمش قاعدة…لا بالقرب ولا بالدم…اوقات كتييير بيأذينا اللي من دمنا ويخاف علينا ويحمينا اللي المفروض انه غريب …بس الحقيقة هو اقرب لينا منهم…..

كمان ان ربنا مهما امهل الظالم ايام وشهور وسنين..ده مش رحمة بيه ابداااا لانه مصمم ومكابر علي ظلمه وطغيانه.. لكن ربنا بيمهله وعيد ليه…حتي اذا اخذه …اخذه…اخذ عزيز مقدر…ويمكن اللي حصل لفاروق عم چوري وتعبه ده تكفير من ربنا لذنوبه ومعاصيه….اوقات مرضنا ومشاكلنا بتكون ابتلاء مش دايما بلاء…اوقات بتكون تكفير من ربنا لذنوبنا مش عقاب لينا….

كمان العفو والتوبة …فاروق ظلم وطغي وتكبر…بس تاب وندم…وربنا ان شاء الله يتوب عليه…..مهما بلغت ذنوبنا ومعاصينا ربنا هو الغفور الرحيم….وحشاه يغلق باب رحمته وتوبته…والدليل ان فاروق لما ندم وفاق ….ربنا جعله سبب في انقاذ چوري ..زي ما كان سبب في موت ابوها وامها…..انقذها من أمجد وغدره كمان كان سبب في جوازها من حذيفة…… ..يعني باب التوبة دايما مفتوح ومهما ظلمنا واذنبنا ..بلااااش نيأس من رحمة ربنا….ربنا دايما بيسامح ما دامت التوبة صادقة ومن القلب..ما نقولش مستحيل ربنا يغفرلي..لا ربنا بيغفر كل ذنب مهما كان ..بس نرجع ونتوب…..المهم نخلي عندنا حسن ظن في الله سبحانه وتعالي…مع اليقين بعقابه ووعيده …لا ننسي رحمته ولا ننسي عقابه.  عيده…

الخلاصة ..عمر الدنيا والحياة مابتتقاس بالقرب .اوقات الاقارب بيكونوا شوكة بتتغرز في ظهرنا ….بتجرحنا وتوجعنا….اوقات بتصبر عليها وعلي وجعها …بس للأسف اوقات النغز بيزيد والجرح بيكبر ويكبر ويألمنا بزيادة واوقات بيقتلنا ……قلوب ممكن تبقي بعيدة عننا ولما تقرب بتكون دفا وحضن وآمان وحماية وخوف وقلق علينا….وقلوب كانت قريبة كلها غدر وجرح وظلم وطمع …

*الحكاية حكاية قلوب وكل قلب واللي محمله ايه👌👌.

*الحياة فيها حاجات كتيير بتبقي غايبة عننا في حياتنا…لما بنبتلي ونمتحن من ربنا بننسي ان كل شئ بقدر ايوة…بس كمان اوقات بيكون بجانب القدر .بما كسبت ايدينا …

*اسامة ودنيا كانوا مجرد زوجين في منتهي البساطة…دنيا انظلمت من اهلها كتيير في صغرها وشبابها….فجأة لقت اسامة حبها وحبته وعوضها عن ظلم شافته…وقسوة وجفاء عاشته…..اتجوزوا بكل طلقائية وبراءة…وحكايتهم فيها عوض من ربنا كبيير لكل  واحد منهم…وكمان الظلم اللي شافوه والغدر اللي حصلهم…وكرم ربنا عليهم..وعلي بنتهم علشان ربنا يبعتلها حذيفة واهله… ومن هنا  حكاية حذيفة وچوري…

*حذيفة……حذيفة شاب متلزم اتربي علي الاخلاق مع اب وام منتهي البساطة والفترة…بس هو كمان لما بدأ يكبر ويعرف يفرق بين الصح والغلط والحلال والحرام…ما اكتفاش بتربيته واخلاقه…لا كمان دينه وعبادته….اختار يطيع ربه ويعيش دونيته….كتير منا متخيل انه علشان يلتزم او يكون متدين …ده معناه انه ينعزل عن الدنيا ومتعها وحيويتها….لا مش صحيح والدليل حذيفة….هو انا ليه اختارته ملتزم ومتدين…علشان اقول ان الحب في الاصل مش حرام…المشاعر والاحساس مش عيب ولا غلط ولا حرام…ده شعور انساني فطري ربنا خلقنا بيه….بس المهم يكون في شكل وايطار صحيح مش غلط ولا يغضب ربنا…..انك تحب تكون مستقيم ومتدين…بس من جواك بتحب شخص وتتمناه يكون شريك حياتك …ده في حد ذاته شئ جميل ….عمره ما كان غلط ولا حرام….حذيفة كان بيتمني انه يحب ويتجوز واحدة يختارها قلبه وعقله…ايوة مش احسن واحدة…وايوة غيرها كتيير زيها ويمكن افضل منها ….بس هو اتمني من ربنا شئ ومعجزة…اصلح ما بينه وبين ربه وربه لم يخب ظنه….عف نفسه من كل معصية وذنب….ابتغاء رضي ربه….فكافأه ورزقه بچوري…..ايوة لما چوري اتولدت كانت رزقه هو قبل امها وابوها…..حذيفة في البداية رباها  بحنان وعطف علي طفلة يتيمة فجأة بقت وحيدة في دنيا غريبة لسة كل علاقتها بيها شهور قليلة …وفجأة  لقي نفسه مسؤل عنها …..حذيفة شاب مختلف نوع من الرجالة دايما عنده احساس بالمسؤلية دايما رجولته هي اللي بتحركه….لو شاب تاني مكانه ماكنش اهتم ولا سأل …كان بقي شاب مستهتر وحيد ومتدلع وشايف نفسه وحياته وبس…بس حذيفة لا …حذيفة كان في سن صغير١٩ سنة بس كان برجولة رجل في الاربعين …شايل مسؤلية نفسه واهله وشغل والده ودراسته وكمان حمل وهم طفلة زي چوري…

كبرت قدامه يوم بيوم وشهر بشهر وسنة بسنة….كل يوم بيعلمها شئ جديد ….عاش معاها زي ما قولت في الاحداث…كل شعور…شعور اخ …واب ..دايما عنده عزوف ونفور من اي موضوع يتفتح لجوازه…دايما مش متحمس ولا مبسوط….هو نفسه مش عارف السبب ولا قادر يحدده…مش عارف ليه دايما كل ما حتي يتحامل علي نفسه ويقدم علي الجواز…لازم تحصل حاجة تخلي الموضوع ينتهي …ايه السب!!! وليه مش لاقي زوجة مناسبة!!!! ولا بيرتاح لاي واحدة!!!!! اسئلة كتيير عاش سنين بيسألها لنفسه ومش لاقي اجابة ….وفجأة كبرت قصاده …فجأة بدأ قلبه يدق لاول مرة ….اول انثي تشغل قلبه وعقله….كانت صدمة ليه ان يوم مايحب يحب بنت في السن ده والاكثر صدمة بالنسبة ليه ….هي ….هي بالذات چويرية …البنت اللي رباها ….اللي عايشة في بيته وفي حماه……

الف سؤال والف عتاب كان بيقتل فيه وينغز في قلبه….الناس!!! والاهل!! هي نفسها!!! كل دول هيشوفوه ازاي!!! هيقولوا ايه !! هي هتفكر فيه ايه….

طب ليه انا اختارت الفرق بينهم كدة!!! وليه هو اللي يربيها!!! وليه فكرة الرواية  كدة؟…علشان ااگد تاني وثالث ورابع…وعاشر..ان الحب مالوش  مقياس..مالوش قواعد….مالوش وقت….مالوش سن….مالوش اي احكام غير انه يكون طاهر ونقي ويكمل بالحلال…يعني حذيفة مش معني انه اكبر منها انه مش مناسب ولا هيقدر يفهمها ويحبها….يا جمااااعة الحب والتفاهم والالفة مش بالسن ولا العمر لا لا. ..كل حاجة اصلها وسببها قلوبنا وعقولنا…يعني القلب مادام بيحب ويعشق…هيفهم …ويعذر ويساعد… ويحن ….ويدلع…. ويسند…. ويحمي …..القلوب هي اللي بتحركنا قبل العقول…الرسول صلي الله عليه وسلم قال عن القلب*ان في الچسد مضغة ان صلحت صلح الجسد كله وان فسدت فسد الجسد كله*…

اصلحوا قلوبكم ….بلاش نكون قاسين علي بعض وخصوصا علي اللي المفروض اننا بنحبهم وبنحتويهم…

.السن كان مقصود وليه غاية عندي يارب نفهم وما نحكمش علي حد ما نأذيش حد بكلام جارح ويوجع واحنا مش عارفين هو متحمل ايه وجواه ايه….حننوا قلوبكم شوية وبلاش غلظة …ماحدش ينكر علي حد شئ او احساس مادام حلال وجميل ومابيأذيش حد…

*چويرية*. حكاية بنت يتيمة ..الدنيا يمكن الدنيا ظلمتها في البداية …يمكن اتحرمت من حنان ام وحماية وسند اب..يمكن عاشت طفلة وحيدة من غير اخوات..يمكن ماكنش ليها عيلة كبيرة …يمكن …ويمكن…ويمكن….

بس ربنا اللي خلقها مش ناسيها…مقدرلها رزقها وكل شئ في حياتها من وهي نطفة في بطن امها….لقت حذيفة…وكفي به اسم..حذيفة يعني لقت اب….اخ…..حنان….آمان….خوف ..وقلق….لهفة واحتواء….لقت حماية …ودفئ …شئ غريب انك تلاقي في شخص واحد كل ده ….تلاقي فيه العيلة كلها….تلاقي فيه الدنيا والحياة والناس….ان حضر ونور عيونها بطلته….يبقي الدنيا كلها ملك ايديها لا حاملة هم ناس ولا وحدة ولا لمة ولا بعد ولا قرب..ولا صاحب ولا جار…ولا اهل ولا اي حد….هو كفااية وبس..

وان غاب وحضر الدنيا كلها حاوليها….ظلمت حياتها واتوحدت وحزنت وخافت وتعبت واتألمت….انجرحت وبكت من اقل واهون سبب…لما يبعد الحبيب والسند يبقي خلاص مافيش حاجة ليها طعم…

الاول كانت طفلة بريئة مش فاهمة احساسها ولا مفسراه…بس كبرت وعرفت وفهمت….چوري بنت شقية بطبعها مجنونة …حنونة…بس في نفس الوقت عمرها ما كانت بنت متهاونة ولا بجحة ولا سيئة .كانت بتنفذ كل اللي اتعلمته وعرفته من حذيفة بالحرف…..خارج بيتها هي مثال للخجل والحياء والستر…بس لما اتجوزت حذيفة…كل الحدود اتزالت …..كل الحواجز اتهدت…..

مش معني انك ملتزمة ومحتشمة ده يبقي جوا بيتك وبراه…لا عذراااا.انتي مطالبة بكل الادوار…وزوجك كمان علي فكرة…

انتي مطالبة برا بيتك تكوني حيية محتشمة  متحفظة …لبقة ومحترمة….وتعاملي الناس كلها بزوق وحياء….بس جوا بيتك زوجك محتاجك حاجات كتيير

.محتاج زوجة وام لاولاده ترعاهم وتربيهم ….محتاج زوجة تحترمه في حضوره وغيابه….محتاجك وقت ضعفه امه يترمي في حضنها يشكي ويفضفض….محتاجك وقت ضحكه ومزاحه صديقة تسمع وتضحك وتجاريه في جنونه….محتاجك وقت حنينه  حبيبة وعشيقة…..محتاج يشوف منك اللي هو حارم نفسه منه لو عفيف وحيي…ولو ضغف وزل وبيطلق لنظره العنان يبص علي ست حلوة ومهمتة بنفسها….هنا دورك بقي ترجعي نظره للحلال تاني…لو شبع من الحلال مش هيبص للحرام…ولو شاف وشبع ورجع لاحرام…ده يبقي طبعه وذنبه وانتي براءة …عذرك لربك ولنفسك خلاص عملتيه …هو هيلاقي نتيجة ذنبه وفعله ..بس انتي جربي ابدأي …ماتقوليش وليه انا مش هو اللي يتودد ويقرب…هقولك انتي السكن…وانتي الحضن وانتي البيت…انتي الست اللي بتجمعي زوجك واولادك…اظن مافيش اهم منهم تضحي وتخافي عليه…

چوري والهدف من چوري ..انك لازم توازني بين كل ادوار حياتك …كل واجباتك..كل احتياجات بيتك ..وزوجك….لو انتي زوجك بعد عندك حاولي ترجعيه…..لا عيب ولا حرام…

************************************************

مصعب ..مصعب شاب زي اي شاب ماليان مميزات وعيوب…لاهو ملتزم للنهاية ولا منحرف بشكل سئ..شاب زي معظم الرجالة…حاول ونجح في دراسته وشغله…فكر يتجوز بس للإستقرار واختار بعقله وبس ..

ايه ده!! هو انتي بتشجعي البنات تحب وتعمل علاقات قبل جوازها .!!! هو لازم الحب يعني!!!؟

انا لا بشجع علي غلط ولا اقصد كدة….الحب مش شرط يحصل بالعلاقات والمعرفة قبل الجواز….حتي لو الجوز حصل زي معظم الجوزات التقليدية شاب بيتقدم لبنت…هنا بقي عقدة الحكاية …ليييه لانك لما تقابل بنت لاول مرة لو اول ما شوفتها ما خطفتش عنيك.ولا قلبك تبقي مش هي دي….لو اول ما شوفتها قلبك دق وابتسمت غصب عنك…يبقي مش هي دي…لو اول ما بعدت عنها ورجعت بيتك فضلت مسهم وبتفكر فيها ووحشتك…يبقي مش هي دي….لازم يا جماعة يكون فيه قبول وعلامة….سمعت مرة كلمة عجبتني اوي..* الحاجة اللي تمر عليك من غير ما تسيب علامة..سيبها وانت الكسبان* ودي حقيقة ..الخسارة هتحصل لما ناخد اللي مش لينا ولا احنا ليه…لكن لو سبناه مش هنكسب بس مش هنخسر …👌👌.

ده كان درس مصعب واي واحد بيفكر بالعقل وبس وبيحكم الظروف والقواعد..بنت حلوة + عيلة كويسة+ تعليم عالي+ ظروف مادية معتدلة =جوازة وبس…

حسبة غلط وفاشلة….هو ليه في رؤية شرعية لاي عريس بيتقدم …لو حكاية حسبة زي دي كانت اي صورة مع باقي الظروف وتتم الجوازة من غير ما يتقابله ..لكن الشرع حلل اللقاء في حضور الاهل علشان الالفة ..القبول…العلامة…خالي ليكم علامة يوم ما تدقوا باب اي عروسة…بلاش تتعجله …هتندموا…

الباقي من حماية مصعب انتم عارفينه وفهمتوه….معنااااه بالحرف…لا بقي قادر يتكيف ولا يتأقلم مع وضعه مع ايمان …

ايمان…وما ادراكم ما ايمان…لا يا ريحانة ..ايمان انتي مبالغة فيها….

قسما بربي مابلغت ..وحقيقة وموجودة….وحياتها انتهت وفشلت….الزوجة الباردة اللي ماعندهاش اي مبالاااه لبيتها ولا مهتمة بزوجها …قمة الاهمال والجحود….

انتي مطالبة تكوني نظيفة… وجميلة ….وشيك…لنفسك قبل ما يكون علشان زوجك…الموضوع مش بالعافية ولا تأدية واجب…ولما بيحصل اي حاجة من دون رغبة ولا حماس بتكون فاترة …وماسخة ..ومالهاش طعم….

ماتقوليش هو انا لازم افضل البس واتجمل واتزين علشانه ليه يعني يتفلق وانا اتعب نفسي ليه…هو هيفضل عنيه زايغة…

طب معلش لو الموضوع بقي رجالة وزواج وبس والتزين والنظافة اقتصر علي الزوج وبس..يبقي كل مطلقة او ارملة او حتي بكر ما اتجوزتش..تبقي في قمة الاهمال والبشاعة….

لا والله حضرتك فاهمة غلط…انك تكوني ست فا ده في الاول والاخر لنفسك قبل اي حد…انتي لما تبقي دايما مهتمة بنفسك…بنظافتك…بجمالك…..

بلبسك…ببيتك….وشكلك عموما….هتبصي في مرايتك تشوفي نفسك تبتسمي بثقة…هتكوني واثقة من نفسك ودم هينعكس علي زوجك…وهيثق فيكي هو كمان…وهيكون دايما ملهوف عليكي….حابب يبصلك ..يشوفك….كمان يسمعك…ليه دايما يسمعك بس بتتكلمي في الفون وضحكك مع اصحابك وبس…ولو مع اولادك زعيق وجنون…طب هو فين…فين الحنية فين الكلمة الحلوة..

ايوة انتي بقي مش داريانة يا ريحانة باللي احنا فيه….انتي مش عايشة في الدنيا!!!

لا يا قلبي والله عايشة وشايفة ويمكن ظروفي وحملي اكتر منك…وولادي مطلعين عيني…ومسؤليتهم كبييرة…وبكلم صحابي وبنضحك ونهزر…ونرررررىغي…بس فيه زوج…يدق الباب ويدخل انتهي…اي حد واي حاجة تتأجل معلش…

شبعتي انتي وهو يوم بحاله دوشة وازعاج…ده بقي وقتكم الصوت الهادي الحنين اللي هو مفتقده طول يومه….الضحكة الحلوة ….الجمال والاثارة والسحر الحلال..لازم كل ده يلاقيه فيكي…وفيكي انتي وبس …

ايمان واللي حصل ليها قلم لكل واحدة فيها ولو حتي واحد /١٠٠ من ايمان…فوقي وراجعي نفسك…

عطر *** وااااه من عطر…عطر اللي فيه منها كتيير وكتيير اوي…كمان….كام عطر عايشة مع رجالة فاشلة ….عذراااا علي الخطأ مش رجالة…ذكور..وانتم خلاص حفظتم رأي ..كل  الرجاال ذكور….لكن ليس كل الذكور رجااال…😊😊.

الرجل مش بنوعه وبس لا …ده مواقف رجولة احتواء رحمة ..امان …زوج زي رامز ده اقل شئ يقال في حقه..انه ادني انواع البشر…يستحل حرام …يحرم حلال…يهمل زوجته حلاله ومش عارف قيمتها وبيجري للحرام بجنون ..وناسي ان ربه شايفه ومطلع علي كل اللي بيعمله…واحد زي رامز مش لازم يكون في بيته واحدة زي عطر ابداااا…ربنا نجاها منه وبعدها عنه لحكمة … رحمة منه بيها وبإبنهم…

عطر زيها زي اي ست بتحاول تتحمل وتسكت وترضي بنصيبها .والحجة الاولاد…

لا معلش هنا بقي الرأي والنصيحة تختلف…لما تعيشي مع راجل يستحل حلال ربه بفجور ووقاحة…وبيضربك ويهينك …ويدمر نفسيتك ونفسية اولادك…انتي كدة بتهديهم وتضيعيهم مش بتحافظي عليهم….انتي بتربي ولادك يخرجوا اشخاص اسوياء للمجتمع…ابنك هيكون انسان وزوج…وبنتك هتكون انسانة وزوجة …كدة انتي هتخرجي للمجتمع راجل وست معقدين متدمرين …انتي ومشاكلك مع ابوهم هتفضل مسيطرة عليهم وعلي عقلهم وتصرفاتهم…وهيطلعوا عقدهم علي شركاء حياتهم…هو يقرفها زي ما ابوه قرفك والحجة…هي مش احسن من امي …وهي هتطلع عين زوجها وتشك فيه وتبقي طول الوقت الحياة خناق وهم…والحجة ماهو راجل وطبعه القسوة والخيانة..هو يعني هيطلع احسن من ابويا…كلهم واحد…

لا رجااااء انقذي نفسك وولادك لو متجوزة راجل بالمواصفات دي راجل غير مؤتمن…راجل بيستبيح الحرام….راجل بيهينك ..ويقلل منك…راجل بيضربك بدون مقدمات..وكأنه شئ عادي ….راجل بيضيع ولادك ويمحي شخصيتهم..بمعني اصح ذكر بيفسد حياتك وحياة ولادك…

ربي ولادك في هدوء وسكينة..احترميهم…وعلميهم يحترموا غيرهم..ويرحموه…

عطر لما شافت مصعب قلبها دق وكل يوم يزيد دقة….فهمت قلبها وحاست بحبها ليه….بس خافت وخبت ودارت…اوقات ايوة زلت…اوقات ايوة ضعفت…والسبب كان الاحتياج والزل اللي عاشت فيه….بس زلتها وضعفها كانت في الاحساس…مش خيانة زي ما رامز بيعمل…وعمرها لا هي ولا مصعب كان ممكن يزلوا الزلة دي…ايوة هما مش ملايكة…بس بشر بقلوب نقية…قلبها يدق ..تحس…تحب…مشاعر جوتهم…مش شهوة ولا رغبة…لو الحكاية  .حكاية شهوة ورغبة…كان مصعب خااان من زماااااان…وعطر خانت من زماااان….لكن ماكنش هو ده الهدف…

الاتنين حبوا وكتموا حبهم….وربنا كان مطلع عليهم…سخرلهم الامور..واتحلت عقدتهم…وبقوا لبعض…ويوم ما عطر هتتحط في موضع شك قصاد مصعب…هيختارها هي …هيصدقها هي….علشان هي واضحة ونقية…حبته وعمره ما اخد منها حاجة مش من حقه ولا حقها…

ماحدش يظلم عطر.

.كل اللي عابت فيها وقالت عنها خاينة….جربي حطي نفسك مكانها وورينا التماسك والعفة..بلاااش نكون جلادين وقضاه…ماحدش عارف اللي بيتكوي بالنار حاسس بإيه…نقطة المياه بالنسبة ليكي مالهاش ثمن…لكن ليه هو حياة…بتبرد عليه لهيب النار والحرقة….ماحدش يقول لو انا وقعت في الفتنة دي هعمل ..وهعمل….لا ماحدش بيأمن علي نفسه الفتنة….كلنا ربنا بيعصمنا وينجينا كرم منه…ولطف بينا ورحمة من رب رحيم…

************************************************

اخيرااااا خلصت الرواية وكلامي ما خلصش ونصحي ليكم ولنفسي ما خلصش ومش هيخلص….كل واحدة تشوف هي محتاجة ايه في حياتها وتكمله….بيوتكم وازواجكم هما اغلي ماليكم…ايوة فيه رجالة ما تصتحقش تتعاشر ..بس نحاول ونجرب وفي النهاية  التوفيق والنجاح من ربنا…ماحدش مننا بيضمن اي حاجة…

ثقوا في ربكم وحكمه…وعدله…ورحمته…انتبهوا لوعيده وامهاله….ولازم ثم لازم…تحسنوا ظنكم بربكم…وادعوا وانتم عندكم يقين بالاجابة والاستجابة..

هتوحششششششوني ..والجزء الخاص بالمشاهد هينزل حااالا بعد ده…اشوفكم علي خير في الجزء الثاني من

#چويرية حقي انا..

#الجزء الثالث من رحم للإيجار(حب الفرسان)

#كيرڤينيا

#حبيبة قرة عين.

ايهم اقرب وايهم هتنزل….استنوني في بروموا للرواية اللي هتنزل بعد چويرية..بس الاكيد اي جديد مش هينزل غير في الاجازة بأمر الله…

الا بس حلقة احتفال عيد الام في معادها هتنزل…

اشوفكم علي خير#ريحانة الجنه 🌹