رواية بنات المنشاوي الجزء الثالث – الفصل الرابع عشر
بارت ١٤
بقلم خلود وائل 🌻
يونس : انا لازم افهم في ايه ؟!
فيروز وقد تملك منها التوتر : انت بتزعقلي ليه يااستاذ انت الوقتي
يونس بتعجب : علي فكرة انا مزعقتش خالص انا بتكلم عادي جدا
فيروز وهي ترتدي حقيبتها بعنف : لو سمحت انا عاوزة امشي من هنا
يونس وهو يعقد حاجبيه: يابنتي كلميني ذي مابكلمك هو حصل ايه الوقتي بس خلاكي تزعلي وتتحولي كدة
فيروز بدموع تلمع بمقلتيها: انا..انننا اتحولت… شكرا لززوقك يامحترم
يونس : طب انتي زعلانه ليه بس انا قلت ايه غلط والله ماقصدي اي اهانه خالص انا بس مستغربك جدا كل مرة بتشوفيني بتبقي كويسه ومرة واحدة بتقلبي لشخص تاني فعاوز افهم بس انا مزعلك في ايه علشان مبحبش حد يزعل مني مش اكتر
فيروز : بعد اذنك
هتف بداخله : دي مروشه رسمي ….ثم اكمل بنبرة مرتفعه وهو يتبعها : استني ياآنسه انتي … استني الله يهديكي اوصلك
فيروز وهي تقف امام الباب بتوتر : ششكررا
يونس بأصرار : متحاوليش هوصلك يعني هوصلك وامسحي دموعك دي لو سمحتي انا مش حمل اي نظرة اتهام من اي حد
ناولها منديل من جيب حلته ومسحت دموعها بتوتر بالغ وجسدها يرتجف لاإراديا وسارت بجوارة لخارج المكتب
يونس : مروان أي حد يسأل عليا نص ساعه وهرجع تاني ان شاء الله
مروان : في حاجه يافندم
يونس : لا هوصل الأنسه بس وراجع علي طول
مروان : تمام يافندم
بعد دقائق كان كلاهما يجلسان بالسيارة وهي شاردة الذهن ولم تفق من شرودها إلي علي صوت يونس : هاااي فيروز انتي روحتي فين
فيروز : هاه … انا اهوة أحنا وصلنا ؟ .. ثم نظرت حولها فوجدت السيارة مصفوفه علي أحدي جوانب كورنيش النيل الهادئه فشعرت بالفزع مردفه : أيه دة انت. انت. وقفت هنا ليه .. أنا … انت خاطفني ليه .. حرام عليك .. انا عملتلك ايه
يونس : باااس بااس يادراما كوين مالك يابنتي كدة اهدي
فيروز : روحناااي انا ايه بس ال خلاني اسمع كلامك بالله عليك روحني
رمقها يونس بدهشه بالغه علي احوالها التي تتبدل بين الثانيه والأخري ثم اردف بهدوء : بصي يافيروز انا عمري في حياتي مكنت فضولي تجاه اي حد او اي شئ وكل واحد حر في طريقه تعامله مع الناس بس انتي حقيقي حيرتيني بتصرفاتك واحوالك خاصه لما بتشوفيني فلو سمحتي بكل زوق واحترام وبسألك للمرة الأخيرة تقوليلي في ايه بالظبط
رمشت بأهدابها عدة مرات محاوله استجماع شتاتها وهتفت بتروي : مفيش حاجه هي بس صدفه
يونس بعدم فهم : صدفه !
ابتلعت لعابها بغصه ثم اردفت : بص يااستاذ يونس انا مش قصدي حاجه والله بس هو حظك جه معايا كدة كل مرة بشوفك بيكون قبلها حاجه حصلت وزعلتني فدة توتر مش اكتر
يونس وهو يضغط بقبضته علي مقود السيارة مما أثار توترها : مابتبقي حلوة في اول الكلام وفجأه بتقلبي!
تنهدت بضيق ثم اردفت: طيب…. انا ياسيدي مريضه وسواس قهري وحالتي صعبه حبتين نظرا لحبه ضغوط بمر بيها و عدم تقبل ناس مهمين في حياتي فكرة مرضي دة فعلشان كدة بنفعل وبتوتر من اي حاجه واي رد فعل غريب مني بيكون وراه سبب مخوفني او مزعلني وانت ملكش ذنب في اي حاجه خالص بس فعلا صدفه كل مرة بشوفك بيكون في حاجه موتراني
يونس : والوقتي ايه ال موترك المكتب مكانش نضيف مثلا
رمقته بحزن ثم اردفت بنبرة حادة : هتتنمر عليا هزعلك مني بجد وايوة انا من الناس الموسوسين ال بيغسلو الصابونه بصابونه تانيه و كل حياتهم متنظمه ومترتبه بس لا مكتبك مشاء الله جميل ومنظم وللمرة التالته بقولك انت ملكش ذنب واتفضل روحني والا والله هروح مشي ويبقي اريحلي
يونس بنبرة أسفه : انا مش بتنمر عليكي ابدا والله انتي ذي الفل انا كان قصدي اهزر بس مش اكتر وعاي فكرة النظافه من الايمان ومش عيب انك تكوني منظمه ومرتبه بزيادة دى حاجه تفرح اصلا ربنا يديكي الصحه
تعجبت من اسلوبه المنمق في الحديث علي عكس ذاك الذي من عادته ان يسخر منها
يونس : وعلي فكرة انتي مش مريضه ولا حاجه الفكرة بس انك محتاجه دعم نفسي قوي من ال حواليكي وثقه عاليه بنفسك وهتقدري تتعايشي مع الموضوع وتبقي طبيعيه جدا بجانب متابعه مع دكتور نفسي شاطر
نظرت له باهتمام ثم هتفت : انت بتتكلم عن الموضوع بالبساطه دى ولا كأنك دكتور من ال قرفوني انتي بتتدلعي دى هرمونات زايدة ومش عارف ايه
يونس: انا فاهم ان الموضوع صعب بس ___
فيروز مقاطعه باختناق : بس ايه انا تعبت واعصابي تعبت من فضلك روحني
يونس : آنسه فيرو___
فيروز : ولا كلمه زيادة روحني
نظر لها بتعاطف ثم ادار محرك سيارته وانطلق نحو مجلسها وكعادتها غادرت السيارة ثم صفعت الباب خلفها بحدة دون ان تتفوة بحرف انا هو فشعر بالغيظ مردفا ” هو باين طبع انك ترزعي ام الباب مهو مال يهود ”
أما علي الجانب الأخر في مكتبه دلفت مليكه بهيئتها المنمقه وهي تحمل باقه من الورود ثم توقفت بمكتب مروان
مليكه : بلغ يونس اني موجودة وعايزة اققابله ناوو
مروان : يونس بيه مش موجود يافندم
مليكه بتعجب : مش موجود اذاي انا مكلماه وهو بلغني ان يومه مزحوم النهاردة ومش هيعرف يخرج
مروان : فعلا .. بس هو خرج يوصل آنسه فيروز وراجع عاي طول
مليكه بغيرة : مين فيروز دي ؟
مروان : معرفش يافندم والله
مليكه بحدة : مروان متلفش وتتدور احسنلك انا زعلي وحش
مروان بأدب :حضرتك انا معرفش مين هيا فعلا وحتي لو اعرف فدي خصوصيات شغل ومش من حقي اني ابلغك انتي او غيرك بيها وعمتا حضرتك تقدري تستني يونس بيه هو زمانه علي وصول
مليكه بحنق : لا مش هستني وهشوف اذاي يطرقعلي ويوصل الهانم ال متنسمي دى
____________________________
في منزل زياد وهناء كانت تجلس فيروز بغرفتها تعبث بهاتفها بفتور وسريعا اعتدلت بجلستها عندما دلف والدها وجلس برفقتها
زياد : حبيبه بابا بتعمل ايه
فيروز : ولا حاجه انت مش هتتغدي ولا ايه
زياد : هتغدي لوحدي يعني ولا ايه ؟
فيروز : معلش يابابا مليش نفس اتغدي انت وماما وانا لما اجوع هاكول
زياد بحنو : طب هتروحي لدكتورة ميرڤت امتي
فيروز : بابا انا والله تعبانه جدا ومش عاوزة اشوف حد
زياد : بصي يافوفو ياحبيبه قلبي انتي بنتي الوحيدة ال ربنا رزقني بيها بعد سنين طويله من الحرمان وتعب وبهدله وراحتك هي اهم حاجه عندي في الحياه كلها ومن حقي عليكي لما اشوفك مش مرتاحه انك تخليني اققف جمبك وافهم في ايه بالظبط
فيروز بتوتر : مفيش حاجه يابابا انا كويسه صدقني
زياد : طب ليه مش عاوزة تتجوزي
فيروز : لأسباب كتيرة جدا
زياد بأهتمام : منها ؟
فيروز : اما اخد الدكتوراة اول وافتتح المعمل مثلا و
زياد مكملا : وتحبي يوف الاول
احمرت وجنتيها قليلا وشعرت بالخجل من والدها ثم اردفت : بابا انا ___
زياد : انا عارف انك مبتحبيهوش يافيروز بس انتي عمرك مااشتكيتي فقلت يمكن بتدي لنفسها فرصه تحبه وكان ممكن افض الخطوبه دة دي من زمان بس لقيت يوسف بيحبك وبيخاف عليكي وانا متأكد ان دة الراجل ال هبقي متطمن وانتي معاه بس مش علي حساب راحتك
فيروز : اهم حاجه اشوفك انت وماما مبسوطين
زياد : غلط يافيروز انتي دايما كتومه وصبورة وحموله واهم حاجه عندك تفرحينا ولو حتي علي حساب نفسك وبتتوجعي كتير وضحكتك البهتانه ماليه وشك ضحكه مطفيه بتخبي وراها وجعك والغريب بقي انك سند وضهر لكل ال حواليكي بتعرفي تتطبطبي وتراضي وتجبري الخواطر وبتستجدعي مع كل الناس الا نفسك ليه يابنتي
فيروز بمداعبه: ايه العمق دة يازيزو
زياد : يافيروز انا دايما حاسس ان دموعك محبوسه بتلمع جوه عينك حتي وانتي بتضحكي علشان خاطري اتكلمي وطلعي ال جواكي بلاش تشيلي نفسك فوق طاقتها
فيروز بمشاكسه : لا دة انا ألغي جلسات دكتورة ميرڤت وأوفر ال ٣٠٠ بتوع الجلسه واققعد معاك امدد علي الشيزلونج واحكيلك بقي
زياد : لا مش هتسيبي جلساتك غير لما تخفي وترجعي احسن من الأول ترجعي ذي ماكنتي قبل سنتين لما خفيتي وبقيتي كويسه
ابتسمت بألم داخلي برعت في اخفائه ثم هتفت:حاضر ياحب بس كدة من عنيا قوم انت اسبقني يلا علي السفرة وانا طيارة وراك
زياد : متتأخريش
فيروز : عيب عليك احچ كامل
دلف للخارج واغلق الباب خلفه بينما تنهدت هي بتعب محدثه نفسها بأبتسامه مريرة : عاوزني اققولك ايه يابابا بس اققولك ان ال عاوزين تجوزهولي هو السبب في انتكاستي من كتر مابيعايرني بمرض انا ملييش ذنب فيه ودايماشايفني قليله قدامه وبيتريق عليا لما بتأتأ في الكلام او اعيط بدون سبب طب دة اتجوزة اذاي وهو مش متحمل تعبي وانا خطيبته وقال ايه بنت خاله هههه غريبه الدنيا ! وقال ايه بيحبني
_________________________________
مرت الايام واصبحت أشهر واقبل العام الدراسي الجديد وهاهي نغم تضب اغراضها بفرحه عارمه وتحمل معها زيارة مليئه بخيرات الريف متجهه للقاهرة والسعادة لاتسع قلبها وتغمرها بقوة لم تألفها منذ فترة طويله حتي تسارعت دقات قلبها حين توقف السيارة بداخل ڤيلا الحديدي
نغم لنفسها : عقبال ماادخلها وانا عروسه يااارب
قابلها الجميع بحفاوة ولكن كان هو الغائب من بينهم فسألت عنه بهمس
نغم : بت هو اخوكي الرخم فين
هايا : راح النادي من بدري
نغم بغيظ : بدري عن كدة ايه دى الساعه تسعه الا ربع حرام عليكي والنهاردة الجمعه ولا هو قاصد بقي انه ميقابلنيش
هايا : فكك بقي منه واعقلي كدة انتي خلاص بقيتي طالبه جامعيه وكمان دكتورة ياحلاوتك ياننوس انت
نغم : ماشي ياحمزة
هايا : انا عارفه والله ان الليله دى هتيجي علي دماغي انا في الاخر ياريتني ماسمعت كلامك وكنت روحت قولت لأبوكي انك مش بتاعه تعليم لا انتي بتاعه حمزة
نغم : امشي انجري قدامي وريني هحط حاجتي فين
هايا : يعني هيكون فين يختي اطلعي اطلعي منتي عارفه طريق اوضتي
نغم بتنهيدة : كفايه انها جنب اوضه حموزتي
هايا : نغم انتي كويسه
نغم : لاسعه حبتين انا عارفه بس بصراحه مجاليش نوم طول الليل من الفرحه
هايا : فرحه البدايات دى انا حفظاهه صم
نغم : امممممم
هايا : هو ايه ال اممممم
نغم : بت انت شكلك كدة بتحبي ومخبيه طب عيني في عينك كدة
هايا بتوتر : انا !!! بحب ايه يامجنونه وبعدين انا حاطه في عيني قطرة يلا انا طالعه وخليكي هنا براحتك
صعدت نغم خلفها وهي ترمقها بشك وبعد فترة انتهت من تفريغ مقتنياتها وهاتفت والدتها لتطمئنها عليها ثم هبطت للأسفل متجهه نحو المطبخ لتجد خالتها تعد طعام الغداء
نغم وهي تطلق صافرة : ياايوش ياجامد
آية بأبتسامه : تعالي ياحبيبتي
دلفت نغم وخلفها هايا وجلسو سويا علي طاوله المطبخ الرخاميه
نغم : بتعملي ايه ياخالتو
آيه : حمزة طالب مكرونه بالبشاميل هعملهاله جمب الغدا وبعدين هعمل فنجان قهوة لعمك سيف
نغم وهي تهبط من مجلسها وتطرق اناملها بحماس : استعنا علي الشقا بالله
هايا : هتعملي ايه يامجنونه ابوس ايدك عاوزين نتغدي
نغم : عيب عليكي اختك تقعد بوراك في بيتهم يحمر لسان عصفور
هايا : لا ياشيخه
نغم : استني انتي بس عليا ..خالتو ياجميله
آيه : ايوة يانغوم
نغم : متطلعي انتي كدة تستعيدي زكريات الماضي الجميل ال فات مع عمو سيف وانا هنا هتولي المهام الصعبه ومعايا الخدم هيساعدوني واوعدك اني هعمل لعمو سيف فنجان قهوة يحلف بيه ها قولتي ايه
آيه وهي تربت علي كتفها : قولت اي اي كابتن
هايا : مامي انتي بجد هتسبيها تطبخ ؟؟
آيه بثقه : دي تعليم صفيه يابنتي دة انا هاخد استراحه طول الدراسه انچوي ياجميلاتي سلام
نغم : سلاموز ياخالتو
قفزت هايا من مجلسها ووقفت بقرب نغم التي شمرت عن ساعديها وبدات بتجهيز مكونات المكرونه بينما الخدم يعدون باقي الطعام بجوارها
هايا : علي فكرة المكرونه دي انا هاكول منها ها
نغم : والله مهحط فيها حاجه ارحميني بقا انا واحدة جايه من السفر ودماغي وجعاني
هايا : ماشي سكت اهوة
بعد قليل
هايا: غيمو غيمو
نغم : ايوة يارخمه
هايا : رخمه ماشي ياستي المهم عرفيني بتعملي ايه علشان لما يودوني علي بيت حبيبي ابهرة
ابتسمت نغم ثم هتفت : بصي يابنتي ونحتسب الأجر عند الله دة الباشميل ال هو اصلا دقيق متحمر في ذبدة تمام
هايا : تمام .. بس مشاء الله مش كتير
نغم : لا خالص دة علشان تبقي چوسي ذي ماحمزة بيحبها
هايا : اهاا
نغم : اول حاجه بنفرد طبقه بشاميل في ارضيه الصينيه طبقه خفيفه ذي ماانتي شايفه كدة وبعدين بنرص اول دور من المكرونه المسلوقه المتقلبه في البشاميل وبعديه دور لحمه متعصجه والتركايه بقي اننا هنجيب ازازة الكاتشب القمر دى ونعمل بيها خطوط رايح جاي رايح جاي كدهوة
هايا : بس يامجنونه كاتشب ايه شيلي بسرعه
نغم : بقولك ايه يامبتدئه انتي تقفي تتعلمي من سكات
هايا بقلق : هتبوظ يابنتي
نغم بثقه : هاكلها لوحدي
هايا بقله حيله : وبعدين ياشيف شربيني
نغم : بعدين بقي نرص الطبقه التانيه من المكرونه المسلوقه ال متقلبه في البشاميل وبعدين نحط باقي البشاميل عليها
هايا : كل دة ؟!
نغم : في حاجه اسمها الله اكبر عرفاها
هايا : امممم وبعدين
نغم : ولا قبلين هنجيب وش اللبن ونحط عليه معلقتين سمنه بلدي ومعلقه كاتشب ونقلب قلب قلب قلب وهوب نفردهم علي وشها ونسويها براحتها في الفرن وبالهنا والشفتشي
هايا : انا بجد مستنيه نتيجه الخلطبيطه دى هتكون عامله اذاي
نغم : اوعي كدة اما اللحق اعمل كيكه شيكولاته جمب قهوة ابوكي
هايا : ابوكي !!
نغم : لا متقفيش علي الواحدة كدة عدي بس الله يهديكي
هايا : تعالي يا غادة ياتلي هتعمل كيك شيكولاه في المقلايه ياقادرة
نغم بنفاذ صبر : الصبر يارب من عندك يابنت الناس الطيبين اققفي اتعلمي من سكااات
هايا : طب قوليلي هتعمليها اذاي
نغم : ذي السكر في الشاي
هايا: هييي رخمه جدا علي فكرة
نغم بأبتسامه سمجه : منا عارفه علي فكرة
هايا : اوف … اسكتي انا صدعت منك اخلصي وريني هتعمليها اذاي كيكه المقلايه دى
نغم : اتعلمي ياشطورة هنجيب ….
_________________
ال عايز وصفه كيكه شيكولاته نغم يستني البارت الجاي 🙏🏻😂 وأسفه جداااا علي التأخير وان البارتات بقت قصيرة بس حقيقي مش فاضيه خالص اليومين دول وباجي علي الساعتين ال بنامهم علشان اكتبلكم البارت ومتزعلوش 💘🔥⭐⭐⭐ڤوت ورأيكم يهمني ياقمرراتي 😍😍😍🙈
الفصل التالي: اضغط هنا
يتبع.. (رواية بنات المنشاوي الجزء الثالث) اضغط على اسم الرواية لتجد الفهرس كاملاً بجميع الفصول.