رواية احفاد عمران – الفصل السادس والثلاثون
أحفاد عمران
بارت _36_
غيرتي عليك؟
مستحيل تشوفها ب گلمة اغار؟
بس تشوفها بنبرة صوتي لمن.؟
تتغيرر او برودي المفاجئ
~•~•~•~•~•~•~•~•~
ليان….
أخذت جود من فرح وبدلت اله
جمانه تروح وترجع عليه تنك فوك
راسي تريد اشيلها وإني أريد بس
اخلص لجود راحت من يمي وبالي
كله راحت على ريم لو فرح لحد
ماخلصت الجود
باوعت عليهن ماكو يمهن جمانه
حاجيتهن ماكو جمانه اختفت ضليت
ادور براسي أريد المحها ماكو عفت
جود يمه كلهن وكمت مشيت وإني
ادور بين الجهاز إلي يمشون
ضليت ادور وادور لحد ماستقرت
عيني على عمه فاطمه أم فرح جايه
بتجاهي وبيدها جمانه لزمت كلبي
من الخوف الحسيته
جمانه انتبهت عليه وكبل شمرت
روحه بالكاع وجتني ركض وإني هم
دنكت عليها وحضنتها بقوه ورفعتها
ليان:: اخخخ يمهه وين رحتي وكفتي كلبي
ماحجت بس ضمت راسها على كتفي
باوعت العمه فاطمه وهيه حجت
عمه فاطمه:: يمعودات صدك تحجن
جان راحت البنيه
ليان:: عمه وين لكيتيها
عمه فاطمه:: غير لكيتها مجلبه بعبايه
مره وتمشي وراها
عماتي والبنات جني كبل يمنه وريم
شايله جود
عمه زهور:: وين لكيتيها
ريم:: عبالي ضاعت
عمه رنا:: مو زين لكيتنها لو ضايعه
بهل ازدحامات وين نلكاها
ريم:: وهمزين أمي ماموجوده جان
سوتها مصيبه شكبرها
باوعت الريم والحجيها وهمست بكلبي
ليان:: هيه بل أول خلي شويه تهتم
بيها وبعدين عود تسويها مصيبه
•~•~•~•~•~•~•~•~•
فرح…
اباوع لليان حاضنه جمانه على صدرها
وتبوس بيها وريم شايله جود رجعت
ليان غسلت الجمانه وخلتها كبال
عينها حتى ماخلت أحد يلزمها إلا
كبالها لحد اليوم ماشفت ليان مهتمه
بجود اكثر مامهتمه بجمانه
خلصنه وطلعنه من الحمامات وعمه
زهور تمشي وتوصي بينا مانجيب
طاري لأحد واحنه التزمنه بهل شي
وماجبنه طاري لأحد
نمشي ونمشي لحد ماوصلنا الها همه
كاعدين على الفراش المفروش ووياهم
عمه سناء وخالات ليان ووياهن ميس
اسمر بس شاف ليان كام بسرعه وراح
لعدها اخذ منها جمانه وخلاها تكعد
بالكاع واحنه هم كعدنه إني وريم يم ليان
ريم:: صدك مو وحده منجن تجفص
وتكول لاحد على جمانه
فرح:: أي أي هيه إذا وحده جفصت فهيه انتِ
ليان:: إني بس نرجع احجي لاسمر
ريم:: لا ليان على شنو كايلتله
ليان:: ماريد اضم عليه شي وخاصه
بجمانه وماريده فديوم يسمعها من غيري
فرح:: أي ليان تفكيرج صح يجوز يجي
يوم وحتى انتِ تكوليها بالغلط فايعرف
اولها احسن من تاليها وهم هيه ماكو
شي الحمدلله ولكيناها
صفنت ليان على جمانه ورجعت باوعت علينه
ليان:: لو ضايعه ومالاكينه شنو جان كلت
ريم:: ليان شبيج أصلاً مو ذنبج والغلط
غلطنه احنه جان المفروض نلزمها
ومانعوفها بس ترا الغلط من عدنه هم
رجعت تبوس بجمانه وهي بحضنها
جود صار يبجي وهو يم ريم اخذته
ليان من عدها وصارت تسكت بي
وجمانه وخرت من يمها بالرغم هيه
ليان جانت متربعه وعلى جهه جود
وعلى رجله جمانه بس جمانه چن
ماعجبها الوضع وبس ليان خلت
جود بحضنها هيه وخرت بسرعه
كعدت بالكاع مبرطمه
ليان:: تعالي جمانه
ماراحت الها وأصلاً دارت وجهه من ليان
فرح:: هاي شبيها
ليان:: تغار
ريم:: بس لتكليلي من جود
ليان:: أي فدمره صايره
ريم:: ليش تغار هيه مو جانت مالها شغله بي
ليان بهمس:: بسبب عمتي
ريم:: شبيها أمي
ليان:: تفرق بينهم وتريد جود اكثر من
جمانه وحتى صايره العاب تجيبله
وماتجيب لجمانه والبنيه من هاذا
الشي صايره حتى تضرب جود
فرح:: ليان ديري بالج بلاخص انتِ
دتكولين تضربه لجود
ليان:: ابد مافرقتها على جود وحتى
من عمتي دتجيب لالعاب إني أخلي
اسمر ايجيب الها بس بعد هيه طفله
ماتفتهم شسوي إني
ريم:: هاي عقليتها لامي عود الولد
احسن من البنيه
فرح:: ترا ماكو فرق شنو إلي يفرق بينهم
ريم:: ماكو شي يفرق ولا راح يفرق بس
همه وعقليتهم
سكتنا شويه وعمو جاسم وعمو يوسف
جابو ريوك إني ماحبيت اكل حتى
معدتي ممتخربط عليه بالسياره وثاري
مو بس إني حتى البنات شربنه بس
جاي أما ليان انطت جود لريم
وبسرعه سحبت جمانه توكلها
لحد ماشبعتها
خلصو وكالو تروحن تزورن وتجن
اهنا النفس المكان كمنه احنه النسوان
كلنا دنروح نريد بس ستوقفنه صوت اسمر
اسمر:: أم جمانه
التفتنه كل احنه نباوع عليه بستغراب
بس هو يعني عادي تقرب على ليان
يريد ياخذ جمانه
اسمر:: انطيني ياها
ليان:: عوفها إني ازورها
اسمر:: لا جود يمج كافي روحي زوري
وزوري وأنا ازور جمانه
هزت راسها وانطتها الأسمر راحو الزلم
وحنه هم ليان اخذت جود من ريم
وودخلنه جانت اكو ازدحامات فدمره
وعمه زهور صارت تحجي على ليان
عمه زهور:: جيبي الولد وروحي زوري
ليان:: لا عمه أريد ازوره هو هم وهاي أول مره
عمه زهور:: تردين تموتي لطفل بهاي
الازدحامات جيبي جيبي
وفعلاً اخذته عمه زهور وكلنا دخلنه
وعمه زهور كوه كوه مشت وبيدها
جود بهل ازدحامات وراحت الخادمه
ماعرف شنو حجت وياها بس البنيه
ذبت الريشه من ايدها واخذت جود
زورته تمسح بايدها على الشباج وترجع
تمسح على وجه جود واحنه هم كوه
دخلنه وزرنه…
كاعدين جوه بالصحن وناس تصلي
وناس تقرأ قرآن وليان كضتها وي
جود وهو بس يبجي
عمه إقبال:: شجاه عمه
ليان:: والله ماعرف حتى صلاه
مامصليه من ورا
أمي:: يمه فريحه كومي اخذي خلي أمه تصلي
هزيت راسي بأي وكمت اخذته منها
بس يبجي ماسكت أبدا نوب حتى
النسوان الموجوده كامن يسون خاف
ممتون خلي نفرك ظهره واحنه نكول
لا مابي شي بس يريد امه وخطيه
ليان على السريع صلت واخذته
تسكت بي وهوه من كد ماضل
يصرخ أصلا نام بحضنها
عمه سناء:: ماتكليلي شسويتيله
ليان بقت ساكته وتباوع لجود إلي نايم بس شهكاتها تطلع بس عماتي ماعافنها وردن
عمه رنا:: ماتكليلي شنو تسويله قابل
هوه غير ابنها
عمه زهور:: شبيج أم أمجد قابل
شمسويتله هو طفل وبجه ياما بجو
وبجو جهالنه كلنه حجينه
سكتت عمه سناء وبعد ماردت وليان
مخليه اديها على راس جود وتمسح
على شعره عمه صابرين مادخلت
بشيء أبدا وطول كعدتها تقرأ ادعيه
خلصنا وكل احنه كمنه طلعنه ورحنه
على المكان الي كالو عليه بس همه
بعدهم ماموجودين فاضلينا كاعدين
شويه لما جوي ومشينه السياره
طول الطريق اسمر مافارق ليان ويمشي
بصفها وحتى وكفو على العاب اخذو
لجمانه لعابه جبيره وهيه طارت بيها
من الفرحه وريم هم اخذت سياره لزيد
إلي مبقيته يم عمته ورحنه السياره
صعدنه ورجعنه………
•~•~•~•~•~•~•~•
ليان….
اول مارجعنه من النجف حجيت
لاسمر علينه وشلون إلا شويه
جان ضاعت جمانه بس هو
كال
_العتب مو عليج العتب على
الوياج
مرت ثلاث أشهر على اربعين عزيز
روحي وصرت كالما أريد اروح وازوره
بس اكول لاسمر وصار ياخذني كل
جمعه نروح إني ويا وناخذ ويانا
بس جمانه لأن اعرف بعمه سناء راح
تهتم لجود اكثر من جمانه لهذا صرت
اخذها وياي
كاعده بالصاله وي عمتي وجود بحضنها
وجمانه بحضني عمي اجه خلال الشهرين
بس رجع راح جمانه بيدها لعابتها وتلعب
بيها وهم دايرته الها على التلفزيون باوعت
لساعه ب9 ونص اسمر حيل تاخر وهو
مايضل لهل وقت باوعت لعمتي حايره
بجود
ليان:: اكلج عمه
باوعت عليه من وره خشمها وكالت
عمه سناء:: كوليي
ليان:: اشو اسمر لحد لان ماجاي
عمه سناء:: وانا شعرفني
ضليت اتاني واتاني ماكو وصلت
الساعه ل11 عمتي راحت الغرفتها
ونطتني جود واني اخذته واخذت
جمانه وصعدت فوك سويت لجمانه
ممه وخليتها يمي على الجربايه ترضع
ورضعت جود وبدلتله ونومته وجمانه
نامت هم
ضليت بس اني كاعده اتاني باسمر
ونوب ماعندي موبايل ادك عليه ضليت
متمدده على الجربايه الجهال نايمين
وهدوء المكان وماعرف بنفسي شون نمت
حسيت أكو اصوات داخل الغرفه فتحت
عيوني لكيت أسمر دينزع بقميصه
ومنطيني ظهره كعدت كعود على
الجربايه وحاجيته
ليان:: وينك لهل وقت
اندار عليه وباوعلي مستغرب ضل
يباوع إلي وإني منتضره جوابه بس
هو ماهتم إلي راح طلع ملابس
ويريد يسبح
ليان:: سئلتك جاوبني
ماباوع بوجهي أصلاً ودخل الحمام
كمت إني من الجربايه واروح وارد
اتاني يطلع اعصابي تلفانه وچن بس
أريد اتعارك وي شخص واطلع
حرگتي بي
بالنص ساعه أروح وارجع اتاني أخير
شي طلع مخلي المنشفه على ركبته
وينشف بشعره وكفت كباله بس
اتجاهلني وإني كالما يتجاهلني
ازيد اكثر رحت يمه يم الميز
ليان بصياح:: مووو جاييي احجييي وياككك
أسمر بهدوء:: صوتجج
ليان:: ماتحجي ماتجاوب عد ياهي
هاي ال*** جنت
فتح عيونه على وسعهن من حجايتي
شمر منشفته بالكاع وتقرب عليه ومن
نضراته حسيت جسمي مشت بي
رجفه قويه
أسمر:: من الصبححح اليلللل اشتغللل
اخير شي تتلكيني بهيج حجي
ليان:: ماتكول لعد وين جنتتت
فرك راسه وضحك وضليت إني
متصنمه بمكاني
أسمر:: روحي نامي أحسن بس تبقين
كبالي ماتعرفين شسوي
ليان:: شسوي مثلاً هااا هاي فوكاها
جاي البيت بنصاص اليالي ونوب
أنتَ الماراضي
ماجاوبني اخذ موبايله من الميز فتحه
ماعرف شسوه بي غير خلاه بينا واتصل
على وحده مسميها “” ام رغد سكرتيره””
ضل يردن شويه يله جاوبت
ام رغد:: السلام عليكم دكتور اسمر
محتاج شي!!
اسمر:: وعليكم السلام أم رغد
خيتي….. بس داريد اسئلج سؤال
أم رغد:: أي اتفضل اسئل
باوع بعيوني بنظره خبيثه وباوع
لموبايل وحجه
اسمر:: إذا متصير زحمه عليج بس تكليلي
بيش الساعه أنا طلعت من العياده
أم رغد:: بالوحده ونص
اسمر:: ليش أنا ضليت لهذاك الوقت
أم رغد:: دكتور غير مراجعين
هواي…….بس ليش تسئل
اسمر:: ماكو شي أم رغد وأنا اعتذر
على اتصالي بهاذا الوقت اخذي راحتج
سده منها وراح تمدد على الجربايه
دنكت إني اخذت المنشفه مسويها
كلها مي من شعره شريتها على
باب الحمام ورحت وكفت فوك راسه
ليان:: تريد عشه
اسمر:: لا
ليان:: شنو متعشي برأ
اسمر:: لا
ليان:: لعد اسويلك
اسمر:: لا
ليان:: كلاص جاي
اسمر:: لا
ليان:: والله مو صوجك
اسمر:: أي يله امشي نامي
عفته ومشيت تمددت على الجربايه
وغطيت نفسي داريد انام وهو حجه
اسمر:: هاج الغي تكويته ولا تكعديني الصبح
شمر عليه الموبايل ونطاني ظهره
اخذت الموبايل فتحه ورحت على
المنبه لغيته صار عندي فضول
اشوف كل البرامج العنده
دخلت الانستكرام اكلب بالي متابعهم
لكيته متابع بنات ثنين دخلت الحساباتهن
البنات حتى صورهن ناشرات أيدي راحت
الخاص كبل اكلب بي ماعنده مراسله
وياهن خليت وحضرتهن على شنو متابعهن
رجعت على منشوراته هم ناشر هواي
صور اله صرت اكلب صوره صوره
وأدخل التعليقات كلها بنات ومعلقات
حياتي حبيبي منور فدوه شكد حلو
ليان بهمس:: ذني صدك مايستحن
عفتهن ذني وسديت الموبايل وخليته
جوه راس اسمر ونمت…………
الصبح كعدت بس إني اسمر والجهال
نايمين وإني هم ماكعدت اسمر كمت
بدلت ملابسي ونزلت جوه خليت الجاي
على الطباخ وبديت اسوي ريوك لحد
ماعمتي طلعت من الغرفه تباوع المطبخ
بستغراب وإني كبل كتلها
ليان:: صباح الخير عمه
عمه سناء:: انتِ شعجب كاعده من الصبح
ليان:: شنو شعجب ليش مو يوميه إني
اكعد بهيج وقت
عمه سناء:: شوكت كاعده بهيج اوقات انتِ
عفتها ماحاجيته لأن بس احجي نتعارك
من الصبح غسلت وكعدت بالمطبخ
تحجي عليه بس إني مامهتمه وضليت
احضر الريوك واحط كدامها على الطبله
بهل اثناء نزل اسمر وبوجه المغسله
غسل وجهه واجه المطبخ يعدل بشعره
اسمر:: صباح الخير
عمه سناء:: أي وأنا اكولن ليان اليوم
كاعده من الصبح
باوع اسمر عليه مستغرب عكد حواجبه
ورجع باوع لعمه سناء
اسمر:: وليش كاعده
عمه سناء:: مبينه السالفه اليوم أنتَ بالبيت
اسمر:: شلج بهل سالفه….ليان بسرعه
ستعجلي عندي طلعه
هزيت راسي بمعنى أي وكملت على
السريع وكعدنه ناكل وعمتي كالشويه
وذابه حجايه وإني اسمع مارد عليها
أبدا كملنا وعمتي كامت راحت بالصاله
كعدت وبقينا بس إني واسمر كاعدين
اسمر:: صبيلي كلاص جاي
ليان:: أي
اخذت كلاصه وصبيتله جاي انطيته اله
وبقيت واكفه يمه متردده احجي
بس تشجعت
ليان:: وين راح تروح
اسمر:: شنو
ليان:: مو قبل شويه كلت عندك طلعه
اسمر:: أي
ليان:: أي وين راح تروح
راد يحجي بس بعدين صفن بوجهي
اسمر:: انتِ شبيج
ليان:: شبيه
اسمر:: ملاحظه نفسج صايره تسئلين هواي
ليان:: ليش هسه إني شسويت هوه بس سئلت
اسمر:: خوش رايح ل……… ارتاحيتي
ليان:: شسمه اريد شغله
اسمر بستغراب:: شنهيه
ليان:: اريد موبايل
اسمر:: شسوين بي مو ماتردين موبايل
ليان:: محتاجته
هز راسه ب لا وكمل شرب الجاي
ليان:: ها راح تجيبلي
اسمر:: لا
ليان:: ليشش!
اسمر:: المن تردين تنطينه الجبته قبل
انطيتي لامي إلي اجيبه المن تردين تنطينه
ليان:: هاي هيه ماريد انسه
اسمر:: وعلساس أنا جايبلج وماتردين
ضجت ونقهرت من كلامه بس كالعاده
كتمت بداخلي ومابينت اله ضل هو
كاعد وإني غسلت المواعين وخلصت
ردت اطلع بس هو حاول يحجي ويستفزني
اسمر:: فد كلاص جاي ثاني
ليان:: كوم وصب النفسك
عفته ماهتميت وكبل صعدت الغرفه
لكيت جود كاعده ويباوع ماباجي
اخذته من كركوته وخليته على
الجربايه حللته وخليته يلعب براحته
لحد ماعزلت الغرفه وطلعت جنطه
خليت ملابس لاحتياط الهم وطلعت
إلي نفنوف اسود حضرته بدلت لجود
وخليته يلعب
رحت الجمانه كوه يله كدرت اكعدها
هم غسلت الها وطلعت كيكه وعصير
وكلتها وطلعت ملابس الها وسبحتها
كاعده اشد بشعرها وجود بصفي
انفتح الباب ودخل اسمر ماباوع
علينه راح اخذ ملابس ودخل الحمام
كملت الجمانه كل شي وخليتها تلعب
طلع واول ماطلع جتي عينه علينه
اسمر:: خير من الصباحيات
مارديت عليه اخذت نفنوفي ودخلت
الحمام……… طلعت الخاولي على
شعري وكفت كدام المرايه ووخرته
للخاولي ومشطت شعري وهو واكف
يباوع عليه
أسمر:: شكو من الصبح
ليان:: لهلي
أسمر:: وشو أنا ماعرف
ليان:: هسه عرفت…… ماما جمانه
لتوصخين ملابسج
اسمر:: ليانن
ليان:: نعم
اسمر:: راح ترحين بس لأن ماجيب
الج موبايل…. احجي
التفتت اله وعكدت حواجبي تقربت
كم خطوه صرت مقابيله
حطيت عيني بعينه وإني اكله
ليان:: الشغله الاطلبها وماتنجاب إلي
بعد ماتهمني وهسه ارضي فضولك
واكلك رايحه بس لأن مشتاقه لامي
وحمزه وابوي رايحه اشوفهم
عندك اعتراض
أسمر:: كملو داوصلكم بطريقي
ليان:: ميحتاج
اسمر:: لمره وحده بطلي عنادج
شديت شعري كعكه ليفوك حتى
ميضوجني وي الجهال ورحت الجمانه
ليان:: كومي ماما البسج حذائج _تكرمون_
هيه كيفت وصارت تصفك كومتها
ولبستها وجود شويه لفلفته زين لأن
الجو بي بروده وخاف عليه واسمر هم
كمل وضل واكف يتانينه وبالك احنه
كايليله تانينه
شلت جود واسمر شال جمانه ومشينه
طلعنه من الغرفة وهاي كل ساعه دايره
وجها تباوع عليه وتبرطم نزلنا جوا
وعمتي كبل حجت
عمه سناء:: ها شنهي وين اليوم
اسمر:: رايحين لبيت جدهم
عمه سناء:: خلي تروح لاهلها بس تبقي
جود يمي
ليان:: ليش عمه وبعدين الطفل يرضع صدري
عمه سناء:: أي هسه لما تروحين
وتمرضينه النا
اسمر:: شلج بهل سؤالف يمه الطفل
ويم امه شسوين بي أنتِ….. يله كدامي
طلعي
وخرلي صفحه واني طلعت بالطارمه
وشويه يله طلعه وطلعنه نتمشى البيت
اهلي بس لحضه ادركت وكفت بنص
الطريق باوع عليه اسمر وكبل صاح بيه
اسمر:: شبيج تخبلتي واكفه بنص الشارع
ليان:: يااا اسمررر نسيت جنطتهم
اسمر:: جنطتمن
ليان:: جنطه جهالك
اسمر:: ليان أمشي لخاطر من عده خاطر
ليان:: والجنطه
اسمر:: أنا اجيبها بس امشي
هزيت راسي ومشيت ويا لحد ماوصلنا
دك الباب اسمر وطلع النا حمزه بهاي
الحضه اذكرت عمر من اجي وهو إلي
يفتح الباب
صارت الدمعه بطرف عيني بس كابلت
ومانزلتها حمزه اخذ جمانه من اسمر
وباسه وتقرب عليه باسني من راسي
حمزه:: شلونج
ليان:: بخير
اسمر:: ليان أنا رايح اجيب الجنطه
تانيني لتدخلين
هزيت راسي بأي وهو راح البيت
ودخلنا جوه وحمزه كال
حمزه:: جيبي جود لتبقي بهل بروده
انطيته يا شال جود ولزم جمانه من
ايدها ودخلو جوه ضليت انتضر اسمر
شويه وندك الباب بخفه فتحته ودخل
الجنطه خلاها بالطاع وطلع محفظته
من جيبه ونطاني خمسين ثنين
خمسه وعشرين
ليان:: شنو هاي
اسمر:: دخذيهن
ليان:: ماريدهن ماحتاج فلوس
اسمر:: مو الج الجهال
ليان:: ماحتاجهن اسمر رجعهن
اسمر:: ترجعين أيدي!
ليان:: دجيبهن أصلا مو صوجك صوجي
إني إلي مااخذ أبدا
اسمر:: أي عفيه يله اخذيهن
اخذتهن من عده وهو راح وإني
سديت الباب وخليت الفلوس بالجيب
مال جنطه وشلتها دخلت جوه لكيت
أمي مخليه جمانه بحضنها كبل رحت
عليها بوستها
ليان:: شلونج يمه
أمي:: على الله يمه الحمدلله
ضلينا كاعدين وشويه جمانه إلي غيرت
عليهم جو اخذها حمزه المحل وترس
الها علاكه مال جباسه وكعد عساس
يتعارك وياها ويريد يأخذ من عدها
اني وامي بالمطبخ هيه صوت دجاج
وإني سويت برياني اليوم خميس وامي
صارت من بعد سبعه عمر كل خميس
تسوي ثواب
امي:: يمه خابري على اسمر يجي يتعشه اهنا
ليان:: يمه إني ماعندي موبايل ويجوز
اسمر راح ورا الضهر العياده
أمي:: يمه ليش ماعندج هوه منو باقي
بدون موبايل
ليان:: مو هو جابلي بس إني انطيته العمتي
أمي:: ليش يمه رجلج يجيبه الج تنطينه العمتج
ليان:: جنه متعاركين وماردته وجمانه
كسرت موبايل عمه سناء ولو تدري بيها
عمتي تكتلها وإني انطيته الها
أمي بستغراب:: وليش تكتلها!
ليان:: يمه عمه سناء ماعرف شبيها
بلاخص من جبت جود تاخذ جود
وضل تهتم بي وجمانه مالها شغله
بيها وحتى من تروح لسوك تجيب
الجود سيارات وهو بعده مايفتهم
وتخلي جمانه تباوع عليها
امي:: هاي شبيها سناء ليش تفرق بين
لاطفال مو هالبنيه يتيمه شلون تسوي
بيها هيج
ليان:: يمه والله حيل داانقهر عليها
وبلاخص هذاك اليوم من جتي من
السوك اتخيلي جتي ركض على عمتي
وعمتي اخذت جود مني ودخلت جوه
امي:: الله يهديها على هاي البنيه
ضلينه بالمطبخ أبوي بعده ماجاي
ومايدري بيها إني يمهم جود منومته
بغرفه اهلي وجمانه يم حمزه وكفت
يم امي ورتاجيت على الكاونتر وهيه
فتحت قبق الكدر مال الدجاج
بس هيه فتحته حسيت روحي طلعت
كبل ركضت المغسله اتقيئ
حسيت روحي راحت اجتي وراي
امي بسرعه
امي:: يمه شجاج شبيج بس لا مريضه
غسلت وجهي ونشفته باوعت عليها وكبل كلت
ليان:: مابيه شي بس لعبت نفسي
امي:: بس لا حبله
ليان:: يمه شبيج لا يسمع حمزه.. لا لا
ماعندي شي
امي:: ولج يمه شلون ماعندج شي
غير هاي من اعراض الحمل
ليان:: يايمه غير اعرف بنفسي
امي:: شنهي تاخذين حب مانع
ليان:: لا بس..
امي:: شنو
ضليت حايره شنو احجي وشنو
اكول اخير شي كلتلها
ليان:: مو شسمه مسويه مانع بيني
وبينه مابينه علاقه لأن مانريد اطفال حالياً
امي:: وهاذا قرارمن
ليان:: أني ويا متفقين
امي:: يمه أنا هم ماريدج هسه تحبلين
ونوب فوك جود وانتِ عمليه…
ليان:: لا يمه لا تخافين عود اكبر إلي
عندي وبعدين افكر ازيدهن
امي:: الله الرازق يمه
ليان:: الله كريم
راحت هيه المطبخ وإني رحت كعدت
يم حمزه جانت جمانه بحضنه وتلعب
بوجه وكلساعه مرات تعضه وإني بس
صافنه عليهم بس فاجئتني جمانه من
مدت ايدها من ياخه التشيرت وطلعت
زنجيل بس إلي فاجئني جانت معلكه
بالزنجيل حلقه
ليان:: شنو هاي الحلقه
بس إني حجيت هو بسرعه نزل جمانه
وضم الزنجيل بالتشيرت
ليان:: ماتجاوب
حمزه:: على شنو
ليان:: شنو الحلقه هاي
حمزه:: حلقتي
باوعت على أيده موجوده حلقته وثاني
شي حلقته فضيه هاي ذهب رحت كعدت
يمه
ليان:: احجي شنو هاي الحلقه ترا والله
اروح احجي لأمي وبعد شيخلصك منها
حمزه:: حلقه فرح
ليان بستغراب:: شسوي يمك
شو كاعده كبل غير السالفه وهو يكول
حمزه:: أنا راح ازوجها لفرح ماريدها
تضيع من بين اديا….
يتبععع..
يتبع.. (رواية احفاد عمران) اضغط على اسم الرواية لتجد الفهرس كاملاً بجميع الفصول.
جميلة جدا