رواية احفاد عمران – الفصل السابع
#أتت احفاد عمران
طرف ثالَث يَغيرَك هَيچ ترضِاهَا ،
و آني بكل ظـروفَك باقَي ويـاك ،
تالَي تبيعني و تكسـرنَي فوگاهَـا .
………………………………..
“”
ريم
“”
التفتنه ثنينه على الصوت إلي چان جاي
من الباب وجان اسمر واكف ويباوع لليان
ويتاني منها
جواب على سؤاله وليان إلي
جانت صافنه بي وتبلع بريكه متعرف شنو
تحجي أو شنو تجاوب حجيت واني
احاول اسد الموضوع
ريم:: هههه شنو هذا السؤال
تقرب على ليان وهو ياشر إلي بمعنى اسكتي
اسمر:: سئلتج منو حب حياتج
ليان بخوف:: شن…و حب حياتي
اسمر:: تعرفين كلش زين وهسه جاوبي
على كد سؤالي لا اطلع بروحج هسه
ليان::شجاوب اسمر شبي…ك
تقدم عليها بسرعه ولزمه طبكه على الكنتور
بقوه رحت عليه حاولت افلها منه بس ماكو
ولا تحركت ايده
ريم:: اسمر تخبلتتت عوفهاااا
اسمر بصياح::: اشششش ماسمع حسج
ريم:: بس هدها وجعتها للبنيه
باوعت على ليان إلي جانت مغمضه عيونها وعاكده حواجبها مبين قبضه ايده موجعتها
فتحت عيونها حمر وبيهن دموع
باوعت عليه واردفت
ليان:: عوفني
اسمر:: اعوفج يي بس يمتى لما تحجين
وتجاوبين على سؤالي
باوعت بعيونه وصاحت بي
ليان:: إلياسسسس ييي سممععتتتت
احبببههههه انيييي أحب إلياسسسس
نصدمت ماتخيلت تجي وتحجيها كدام
اسمر وبكل برود وحتى ماخايفه منه
رخت أيد اسمر إلي چان لازمها بيها
بس سرعان رفع ايده اسمر وضرب ليان
غمضت عيوني من صوت الضربه وصاح
اسمر بصوت فتحت عيوني واني أشوفه
لازم ليان من اكتافها ويهز بيها ويصير
اسمر:: لججج حيوانهههه تحبييييي وانتي
على ذمتييييي اليوم اطلع بروحجج
لزمه من شعرها وعته حيل لزمت ايده
ووهي تبجي وتحجي
ليان:: اسمر شعريي
مارد عليها ولا كأنو يسمعها جرها حيل
لدرجه اني توجعت من يمي لأن يجر
بشعرها تقربت عليه ولزمت ايده واني
احجي
ريم:: اسمر الله يخليك عوف شعرها
كااافيييي _بصياح
هدها واجه عليه لزمني من ايدي وشحطني
طلعني برأ الغرفه ودخل رجعت تقربت وردت ادخل بس رجع دفعني وطبك الباب بوجهي حسيت هاي هيه نهايه ليان راح ينهي عليها
بس صار العكس لأن ماسمعت بعد صوت
دكيت الباب واني خايفه على ليان
ريم:: اسمر الله يخليك افتح الباب
ماكو مافتح ولا رد عليه ضليت
واكفه بالباب وهمه ماكو ايي
صوت الهم…………
////////////////////
“”
ليان
“”
سحب ريم وطلعها برأ الغرفه مشيت
بسرعه وكعدت بزاويه الغرفه خفت
ونرعبت منه ماتوقعته يمد ايده عليه
ولا تخيلت هذا الشي بيوم
رجع تقرب عليه من الخوف إلي حسيته
كبل خليت أيدي على وجهي وحجيت
ليان ببجي:: الله يخليك لتضربني
اسمر:: وخري ايدج من وجهججج
وخرت ايدي وباوعت عليه كعد على
الجربايه فرك راسه وصار يستغفر باوع
عليه واردف وهو صاك على اسنانه
ومبين من صوته على اعصابه كاعد
اسمر:: من شوكت هاا
ليان بخوف:: ش.. نو
اسمر:: من شوكت تحبي
حجيت كوه واني ابجي واشهك
وخايفه ومرعوبه
ليان:: م..ن احنه وصغار
اسمر ببرود:: وهسه
ليان::ششننوو
اسمر:: بعدج تحبي
باوعت عليه واردفت
ليان:: هسه هوه خطيب بنت عمي…….
وهسه اني أريد اروح
كمت عدلت نفسي لأن حتى الفستان
تفركش مشيت وعبرت منه وكفت يم
الباب ومديت ايدي لمفاتيح بس فجأة
حسيته حاوطني وحط ايده على بطني
وراسه بركبتي كزبر جسمي من لمساته
تحركت بس لزمني بقوه
اسمر:: اششش اثبتي
ليان بخجل:: اسمر عوفني شجاي تسوي
اسمر بهمس:: مامسوي
مديت ايدي خليتها على ايده
وحاولت اوخرها بس دارني اله
بسرعه وصارت ايدي على صدره
وهو حاوط خصري باوعت بعيونه
الزرك يلي لونهن مثل البحر وحواجبه
المعكوده
نزل نفسه وقرب وجه بوجهي
اردف وهو يباوع بعيوني
اسمر:: اسف
ليان فهاوه:: هااا….. على شنو
قرب نفسه وباسني بخدي ورجع حجه
اسمر:: اسف مديت ايدي عليج
مديت ايدي ودفعته من صدره
ليان:: خلص ماكو داعي للأسف مالتك
راد يحجي بس اندك الباب ابتعد عني وإني
عبالك شو شسوينه ضليت اعدل بفستاني وباوعت عليه واردفت
ليان:: افتح الباب هسه شنو يفكرون بينه
أسمر:: شيفكرون يفكرون آخر همي
ماحاجيته ودرت ظهري اله اريد افتح الباب
فتحته وطلعت ريم بوجهي
ريم بخوف:: ليان أنتَ زينه
ليان:: أي زينه لعد شبيه ؟
باوعت وراي وضحكت ستغربت شبيها
هاي تضحك نداريت لكيت أسمر هم
يباوع عليها ويضحك
ليان:: شنو يلي يضحك
أسمر:: أنتِ
ليان:: شنووووو
أسمر:: سئلتي وجاوبتج أنا بعد مالي علاقه
رفع ايده وعبر من يمنه وكال
اسمر:: يلا انا بغرفتي ماريد صوت
_ وغمزلي _
نزلت راسي من الخجل استحيت بعد اباوع
بوجه ريم إلي جانت تباوع عليه إني ويا
ومافاهمه شي راح اسمر دخل غرفته
وجتي ريم ضربت كتفها بكتفي ووهي تكول
ريم:: مممم غمزات وكذا
ضحكت وكلت
ليان:: ماكو شي من الي بالج
ريم بضحكه:: وشنو بالي ها ها
_وصارت تغمز _
ماجاوبتها بس ضحكت وردت انزل
جوه بس استوقفني صوتها
ريم:: وينننن
نداريت عليها وطبكت حاجبي بمعنى
شنو هذا السؤال
ريم:: وين رايحه
ليان:: شبيج أريد انزل
ريم:: وتنزلين هيج
باوعت على ملابسي أصلا إني جنت بيهن
جوه رجعت كلت الها
ليان:: شبيج ترا إني جنت بملابسي ذني جوا
غمت كصتها وجتي اتاشر إلي على خدي
لزمت خدي وتذكرت ضربته ركضت لغرفه
وورحت لميز باوعت على وجهي اثار
اصابيعه مبينه
_خرب بيك اسمر
جتي وراي ريم وهي تضحك واني لو
بيدي اروح لاسمر والطشه مثل الراجدي
واصبع اصابيعي بي بس لزمت نفسي
وباوعت على ريم
ليان:: ريم ممكن تنطيني شي اخفي بي الأثر
ريم بضحكه:: يي يي هسه
جتي بصفي وصارت تفتح الجرارات مال
الميز وطلعت إلي خافي الاعيوب ونطته إلي
ريم بضحك:: كثري كثري
خزرتها واخذته منها وخليت شويه على خدي ضليت ادلك بي لحد ماختفه الأثر انتبهت لريم بلمرايه تباوع عليه وتضحك صحت بيها بصوت عالي
ليان:: شبيجججج بس تتمضحكبن
ريم:: وججج هههههه عبالي ههههه راح
هههههه يمه ماكدر اتحمل خرب
كعدت على جربايتها وضلت تضحك ضجت
منها وطلعت من الغرفه وكبل نزلت جوه
لكيتهن منظفات ومكملات البيت باوعت
على امي لكيته تاشرلي اىوح يمها
رحت يمها وكلت
ليان:: ها يمه
امي:: يلا ماما خلي نروح
ليان:: تمام
امي:: يلا لمي ملابسج
أحس صارت عندي لحضه ادراك ملابسي
ويننن بغرفه اسمرر ياربي واني هسه
ماريد التقي بي رحت ركض على امل
وسحبتها من ايدها واخذتها على صفحه
ليان:: أمل امل أريد منج خدمه صغيره
امل بستغراب:: يي احجي
ليان بخجل:: اني غيرت ملابسي بغرفه اسمر وضلن ملابسي اهناك تكدرين ترحين تجيبيهن
امل:: شنهوووووو لا عيني ماروح
ليان:: شبيج هوه بس تصعدين تنزليهن وتجين
أمل:: وليش أنتِ بلا ماتصعدين
ليان:: ها…. موو
أمل:: مو شنو ها
ليان:: مو استحي
أمل:: انتِتِتِتِتِتِتِ تستحين
ليان:: أمل فدوه بدون كلام روحي جيبيهن
أمل:: اووف
ليان بضحكه:: يلا يلا
راحت كوه عليها خطيه ضليت اروح وارجع
لحد مانزلت وجتي عليه انطتني جنطتي
ورحت لامي وكلت الها يلا كمنه وسلمنه
على إلي موجود وطلعنه رجعنه للبيت…….
مرت الايام وصار سبوع على خطوبه
ريم واليأس واني خلص اقتنعت أنو
الياس بعد مو إلي وانما أني بعد لاسمر
ومايصير افكر بغير شخص ثاني غير اسمر
حمزه رجع الانبار وصار البيت ضوجه صح
حياتنه عباره عن ضحك وشقه اربعه وعشرين هسه بس بكانه خالي كلش اشتاقيناله
إني واسمر أحس بلشت علاقتنه
تقوه صار هوه إلي ياخذني ويرجعني
لمدرسه إني وريم
وطول الطريق
نضحك ونسولف حسيت اسمر تغير
تعامله وياي ومو مثل قبل وحتى إذا
غلطت بكلمه ويا ميصيح عليه ويفهمني
بهدوء أنو ميصير اغلط ويا بكلام
إني وريم وامل بلشت علاقتنه ترجع مثل قبل بلرغم إني السبب بتخريبها بس الحمدلله فكرت وتأكدت مني السبب صح حب الطفوله مينسي بسرعه بس اني جاي احاول انسه وابلش حياتي وي أسمر
جنت كاعده بطرمه وجاهزه على آخر حبابه وانتضر اسمر وريم يجون عليه شويه وندك
الباب كمت بسرعه فتحت الباب صار اسمر
كبالي وخرت كذلتي ورا اذني واردفت
ليان:: صباح الخير
اسمر+ريم:: صباح النور
اسمر:: يلا امشن
هزيت راسي ودخلت بسرعه وصحت على
أمي راح اروح وطلعت الهم سديت الباب
ومشينه جميع ونسولف إني وريم
ريم:: ولج ليان
ليان:: ها شكو
ريم:: تروحين لبيت عمو امجد
ليان:: ليش شكو اهناك
ريم:: ماعرف بس سمعت جدو يريد يروح للعمره
ليان:: الله أحلى شي
ريم:: يي وعلساس راح يسوي جمعه يمهم قبل مايروح
ليان:: ماعرف إني
اسمر:: شكد تحجن
ضحكنه ثنينه عليه لأن ميحب الهواي يحجي وأحنه ماشاءالله من الصبح نحجي كومه
وصلنه المدرسه وراح واحنه دخلنا أمل جانت مامداومه أصلا هيه بسبوع مرتين غايبه
راحت كلووحده بصفها ودروس وهيج مشينه اليوم خلصنه وطلعنه باوعت اسمر واكفه
ووكتف ايده ويباوع بوجه كل بنيه تطلع
تقربت عليها وهزيت أيدي كبال وجه
عبالك جان صافن كبل فز وبقه صافن
بوجهي
اسمر:: شبيج
ليان:: شبيه
أسمر:: مابيج تحجين تطلعين صوت
ليان:: عفواااا زعجنانك يلا ارجع باوع
واني رايحه للبيت
ضحك خزرته وكتفت ايدي لصدري وصرت
أمشي وبس اسمعه يصيح
اسمر:: ولجج مخبلههه
ليان بهمس:: وأنتَ عاقل والله يالله
اسمر:: سمعتجج
ماحاجيته وضليت امشي لحد ماحسيت
شخص سحبني بقوه ثبت عيونه بعيوني
واردف
اسمر:: انتي مخبله شنو هاي السوالف
واني اوخر ايده من ايدي واحجي
ليان:: وخر اسمر وخر يعني عاجبك اجي
اني اشوفك صافن بوجوه البنات
اسمر بضحكه:: يابويههه شوف هاي وين تفكر
ليان:: شوف اني وين أفكر… وخر اسمر عوف
ايدي
اسمر:: لج بابا غير ادور عليجن وعلمود
اعرفجن لازم اباوع على البنات
ليان بضوجه:: يي عود صدكت…… وخر
ريم:: صدك تحجون أنتم
التفتنه ثنينه على صوتها وهيه مببن عليها
عصبيه وماتتحاجه
اسمر بهمس:: انوب جتي الثانيه بويه
ريم:: يعني شنو عود من صالي ساعه
اتاني بيكم وفرغت المدرسه واني ادور
عليكم اخير شي الكاكم بنص الفرع
اسمر:: بله بدون حجي انتن الاثنين ويله
كدامي امشن…. يلهه
صاح بينه واحنه هم خنسنه ومشينه كدامه
وصلنا وكلمن راح البيته دخلت تلكتني امي
امي:: الله يساعدج يمه
ليان:: ويساعدج كلبي بستها وكبل صعدت
سبحت وبدلت ونزلت جوا يم امي
ليان:: يمه
امي:: ها يمه
ليان:: شسوين منزله هذا الكدر الجبير
امي:: يمه هاي البيت عمج ماجد باجر عدهم
عزيمه
ليان بضحكه:: كثرانه عزايمهم
ضحكت امي وكملت الغدا كعدت على
التلفزيون شويه واجو عمر وبابا
وكمنه تغدينا…….
/////////////////////////
“” امل””
هلسبوع ونص كلشي تغير بيهن بس
ستغربت اسمر من عرف بحب ليان رده
فعله عاديه ودقايق شلون ماعرف بس
أحس اكو شي راح يصير وهذا هدوء
ماقبل العاصفه
رجعت علاقتنه بليان مثل قبل وعلاقه
اسمر وليان كلش حلوه طلعات وطبات
كله وي اسمر جنت احس اسمر من يعرف
باليان تحب إلياس راح يفصخ الخطوبه
ومايكمل بس فاجئنه اني وريم باسلوبه
لهل فتره وتعامله وي ليان واني فرحت
الها هواي لأن ممكن يكون هو حبها هو
عوضها هو سندها من بعد اهلها والحب
الحب يجي أن كان قبل الخطوبه بعد
الخطوبه اوو ممكن بعد للزواج….
جدو عمران ناوي يروح للعمره بس راح يسوي عزيمه وكل عاده بناته وولده والاحفاد كلها
كعدت من الصبح كبل سبحت ولبست
تراك طويل وعريض وخليت شال على
راسي ونزلت
لكيت امي كاعده بلمطبخ
تحضر الريوك صبحت عليها
امل:: صباح الخير زهورههه
امي:: ماتكليلي شوكت تعقلين
امل:: هههههه من ازوج
امي بتسائل:: وشوكت تزوجين
امل:: من اعقل ههههههه
هزت ايدها امي ورجعت تكمل طلعت اجبان
وكيمر من الثلاجه ولكيتهم جايبين كاهي
وهذا أكثر شي احبه اني ورحت فرشت
السفره لأن جدو ميكعد على الميز
ودائما يكول
_الاكل على الميز مابي طعم
واحنه ماشين ورا ههههه كعدنه تريكنه
وسوالف وضحك شويه وكام جدو وبابا
غسلو واحنه هم خلصنه وشلنه المواعين
جتي ميامين وراي
ميامين:: وخري امل حبيبتي اني اغسلهن
امل:: ميامين روحي يم يزن اني هسه اخلصهن
ميامين:: ولج امل هذا ابن اخوج راح الزمه
واكتله
امل:: ايبااا تكتله حتى أحمد أخلي يكتلج
ميامين بضحكه:: هوه اكتله وي ابنه
امل:: هههههههه
طبعا ميامين بنيه كلش هادئه وماعدها
سوالف محلوه تحب الكل بحيث امي
معتبرتها امها مو عمتها وقايمه بواجبات
الكل وماتحجي شي أبدا عدها يزن شالع
كلبها وليل كله يسهر مرات اني اخذه منها
واخليها تنام ومن هاي الناحيه همه بعد
مايردون اطفال إلا يكبر يزن ويفتهم
امي دائما تكللهم خلفو بعد وأن كان
بنيه أو ولد ميفرق بس لا تخلون بينهم
هواي سنين بس همه ميردون ابدا هسه
جاي نحجي ونضحك وطب من برا ملابسه مليوصات طين شعره مترب ومهلس غمت
نفسها ميامين وكالت
ميامين:: ويردون بعد اخلف دشوفي
ضحكت عليه مسوي روحه زعلان بس حتى ماتصيح عليه وتبقه ساكته خطيه اخذتها
ودخلته بلحمام الجوه سبحته اني كملت
مواعين ووكفت انشف ايدي صاحت
عليه ميامين
ميامين:: اموله حبيبتي بس تكدرين تجيبيلي ملابس ليزن ماريد اطلعه من الحمام
امل::يلا هسه اجيبلج
ذبيت الخاولي من ايدي وصعدت فوك فتحت الباب ماكو احمد يا هوه مو صعد فتحت
كنتور يزن وطلعت اله تراك واخذتله مشط
وعطره وفتحت الباب دااريد انزل
بس استوقفني صوت موبايل يرن رحت
عليه هذا جهاز أحمد باوعت على الاسم
“عذراء” عرفت أحمد الحد الآن مامبطل
سوالفه وبعده وي هاي “عذراء”
لزمت الموبايل بيدي ورفضتها أحس نفسي ارتاحيت من انطيته رفض ذبيت الموبايل
ومشيت فتحت الباب وطلعت نزلت ونطيته الملابس ويزن يطفر يدور يشرد من امه وهيه لازمته وتريد تلبسه جتي امي وصاحت بي
امي:: ولك يزن شلعت كلب امك اثبتت لتكمز
يزن:: وحري وحري ماليد
وهذا يطفر هيج وهيج متنه ضحك عليه
دخل احمد من باب المطبخ ومن سمع
صوت يزن ينك صاح بي
أحمد:: كاااافييييي نعال
صاحت بي امي لأن صاح بصوت عالي وغلط
امي:: احمددد لا تصيح على الطفلل
ميامين:: شبيك أحمد
ماحجه شي وعافنه وراح صعد لغرفته
باوعت امي لميامين وكالت
امي:: صاير شي بينكم وهيج صاير مايتحاجه
ميامين:: أبد والله كل شي ماصاير
امي:: الله كريم يمه الله يهدي يجوز صارت
شغله وعصب ومن سمع يزن ينك صاح بي
ميامين:: والله ماعرف بعد ياعمه
امي:: يلا بنياتي كومن نحضر
هزينه روسنه ميامين كملت ليزن ومنعته
بعد ميطلع وجتي وياي رحنه لمطبخ صرنه
نحضر ونجيب ونخلي دزت محمد يجيب
الكدر من بيت عمو يوسف وامي خلت الحم
وخلته يفور
واني وميامين لكطنه الخضره
واني سويت كاستر حتى يجي حلو بسفره
ندك الباب ودخلو بيت عمو جاسم سلمنه
عليهم وراحت امي وعمه سناء يسولفن
واني وريم وميامين بلمطبخ نغسل
مواعين ونحضر مواعين
ريم:: شنو وين بيت عمو يوسف لحد الآن
ماجوي
ميامين:: هسه يجون
امل:: أي
وفعله اندك الباب ودخلت عمه صابرين
وليان هم سلمنه عليهن وهم عمه صابرين
انضمت لامي وعمه سناء وليان جتي يمنه
وصارت ميامين تصنف عليها
ميامين:: الخطيب اهنا
ليان بخجل:: أعرف
ريم:: روحي سلمي عليه
ليان:: ياا ولج استحي
ميامين بضحكه:: تستحي تستحي ههههه
ضلينه نشتغل ونضحك ونوب جني عماتي
عمه رنا وعمه اقبال كلهم بس إلياس
ماجاي عنده واجب
ماعدنه أحد غريب لأن بس العمام وحتى
ازواج عماتي ماجاين كامن امهاتنه وصارن
يصبن وجوي الشباب ينكلون الصياني
انتبهت على ليان ترفع راسها وتخطف
نضره على اسمر ودنك تستحي ولا
عبالك خطيبته
كملنا الصب وكعد جدو وكعدو عمامي
هم واحنه هم كعدنه صارو الزلم على
صفحه ونسوان على صفحه ماحجينه
على السفره كلها ساكته خلصو اكل
وكمت خليت القوري على الطباخ
وجتي ليان وراي
ليان:: امل سوي بدارسين يخبل يصير
امل:: هاا عبالي اخلي هيل بس يلا راح
اسوي على طريقتج
ضحكت وخليت دارسين وي المي يفور
ولمن السفره ميامين وريم
فاطمه ماجتي
لأن جان عدها موعد دكتوره كلش انقهر
عليها لأن تريد جهال وتخاف يزوج
عليها بحجه ممخلفه لاكن مو بيدها
هذا الشيء
ميامين وريم هنه إلي غسلن المواعين
وليان تعزل وياهن واني انصف الطباخ
والكاونتر خلصنه وأخيرا ورحنه كعدنه
كلها جانت تسولف وتضحك عمامي وي
جدو يسولفون ولولد ماخذيلهم صفحه
ناس تسولف وناس تلعب بموبايلاتها
واحنه هم ضحك وسوالف بس كلها
خنست لمن حجه جدو عمران
جدو عمران:: كلكم تعرفون أنا وين راح اروح
جاسم:: أي بويه نعرف
يوسف:: أي تروح تعمر وأن شاء الله عمره
مقبوله مقدمه
جدو عمران:: تسلمون بس عندي فدشغله ثانيه
ماجد:: أي بويه اتفضل احجي
احنه عدنه من الزلم تسولف محد يدخل
لا نسوان ولا حتى ولدهم كلها تبقه ساكته
رجع حجه جدو عمران وهوه عيونه على
أسمر وليان
جدو عمران:: إذا الله كاتبلي ارجع بخير
وسلامه اريد تسون شغله
جاسم+ماجد+يوسف:: سالم ترجعلنه اتفضل
جدو عمران:: اريد منكم من هسه تبلشون بتحضيرات الزواج مال اسمر وليان
باوعت ليان على اسمر إلي جان يباوع
على جدو عمران بصدمه
وعمامي وابوي
إلي جان عدهم الشيء عادي
جاسم:: هاي هيه بويه لتريده يجرالك
جدو عمران:: ماريد أي نقص بتحضيرات بس ارجع من العمره نسوي العرس
يوسف++جاسم:: هاي هيه بويه صار
ماتحمل اسمر وكام واردف
اسمر:: جدي خليها هسه
جدو عمران:: ليش وليدي شنو اليفرق
اسمر:: جدي تعرف ليان سادس ماريد الزواج
ياثر عليها وعلى حلمها
ابتسمت ليان وفرحت على حجي اسمر
بس جدي لا وين
جدو عمران:: ماكو شي ياثر عليها وليدي
وهاي هيه من ارجع نسويلكم عرس
اسمر:: لترديه يصير جدي
آشر للولد وطلعو كلهم وعمامي وجدو راحو للاستقبال وضلينه بس احنه النسوان وولبنات
عمه إقبال:: سناء من هسه اخذي جنتج وجهزي
سناء:: هسه هوه شكد ياخر التجهيز هوه
يومين يكمل
ضلن يحجن بتجهيزات وتحضيرات واحنه
بس نستمع الهن ماتدخلنا أبدا
//////////////////////////
“”ليان””
من بعد ماطلب جدو عمران هلطلب وإني
متوتره وخايفه وأحس بحساس ماعرف
اوصفه احس راح يصير شي بس ماعرف
شنو وخايفه لا يصير شي على جدو
عمران بس دائما استغفر ربي على
هذا التفكير
جدو عمران راح للعمره واحنه بلشنه بتجهيزات
جنت نايمه وكعدتني أمي لأن اليوم اروح
وي اسمر وعمه سناء اشتري ذهب توسلت
بامي تجي وياي بس ماقبلت وكالت
_يمه هيه عمتج وخطيبج ابن عمج
ووياج إني ماكو داعي لروحتي
سبحت ولبست فستان طويل ونفش سويت
شعري ذيل حصان ولبست ساعه ووحلقتي
وطوق خليته على شعري وأخذت جنطتي
ونزلت تانيتهم شوي وشويه ودك هورن
طلعت امه كاعده بصدر وريم هم موجوده
كلش فرحت لأن إني من نوع إلي استحي
بس ماطول ريم موجوده لا شيء عادي
صار صعدت وسلمت عليهم حرك السياره
وشويه ووكف يم محل مال ذهب نزلنا
ودخلنا
دخلنا وسلمنه جان أكو بنات هم يشتغلن
رحنه يم البنات وخطيه صارن يطلعن
موديلات ويخلن كبالي بس ماعرفت
شنو اختار لأن كلهن حلوات اجه اسمر يمي
اسمر بهمس:: إذا ماعجبج شي منه اخذج لغير واحد
ليان:: لا حلوات وعجبني بس محتاره ياهو اخذ
تقدم وصار يباوع بيهن شال واحد منهن وكال
اسمر:: هذا حلو
باوعت ماقتنعت بي هزيت راسي بنفي
رجع كال للولد
اسمر:: ممكن تنزلون بعد موديلات
وخطيه ماخلو شي مانزلو أختاريت واحد
ناعم كلش أحب التخومه الناعمه ماحب
الثكيل
ليان:: ريم شنو رئيج حلو
ريم:: يخبل كلبي اخذي بالعافيه
رتبه الولد بعلبه واسمر دفع الحساب
وطلعنه صعدنه بسياره ومشينه رجعنه للبيت
ثاني يوم هم كعده ومن الصبح بس هلمره
إني وماما وعمه سناء بس رحنه نجهز
ملابس وهاي الاشياء وصلنه ودخلنا
للمحل وشتريت إني كم ملبس وهنه
اختارن الباقي ماعافن محل يعتب
على محل كله دخلنهن حتى ملابس
نوم اخذن وإني مثل الصنم بس
أمشي وراهن…..
مرت الأيام وإني كل شيء جهزت حتى
البدلات وصالون ومدرسه أخذت اجازه
مرضيه
ونكدر نكول كلشي تمام بس اسمر
ماعرف شبي تعامله وياي صاير بارد ومن
نلتقي إني ويا بسرعه يطلع عنده شغله
ويعوفني ويروح حاولت اعرف شبي
هاي الفتره بس ماعرف ومن اسئله
مينطي جواب كلت بلكي بعد الزواج
يتغير وياي ويبطل هذا اسلوبه
واليوم جدو يرجع من العمره سوينه
تجهيزات وتوزيعات لناس إلي تجي لجدو
كلها انجمعت يم بيت عمو ماجد ويوم
صار يخبل
استقبلنه بفرحه واشتياق….
اسمر الوحيد ماموجود ويانه
ردت أعرف وين هاي الأيام يروح بس
ماعرفت حتى العياده مافاتحه هاي
الايام لعد وين يختفي……
/////////////////////////
“” امل””
بلشت تجهيزات الحنه مال اسمر وليان
رحنه من الصبح لصالون نتجهز ونتحضر
إني وريم وليان
ليان اختارت بدله لون
ماروني لأن الحنه بلشت باليان أول
وحده لانو عروسه وبعدين بينه
بلشت لبسنه إني وريم نفس الفساتين
بس الالوان تختلف كملت ليان المكياج
وراحت تلبس البدله
شويه وطلعت والبنات الموجوده كلها ضلت
تباوع عليها لأن حرفيأ طالعه تخبل خفت
عليها من العين خفت لا يحسدوها رحت
يمها وصرت اقرآ آيات عليها وهي تضحك
وتكول
ليان:: شبيج مثل العجايز
أمل:: دسكتي سكتي
خلصنه كلشي وخابرت ليان على عمر من جهاز امها لأن جايبته وياها وكالت شويه ويوصل
شويه واجه طلعنه وصعدنه بسياره وهو
مشغل اغاني وإني وريم ماقصرنه بلركص
ماشالله أصلا نستحي من ولد عمنه
وصلنا ونزلنه لزمنه البدله إني وريم حتى
لتروح تعثر وتوكع دخلنا وصارت الهلال
تركع وجكليت الي فشخنه كعدناها على
الكوشه ورحنه إني وريم ذبينه صاياتنه
ودخلنا بنص الصاله نركص شويه ورحنه
على ليان وكومناها تركص مالت شويه
بخصرها ورجعت كعدت حسيته ضايجه
أو متوتره من شي ماضغطنه عليها وضلينه
نركص نوب جوي بيت عمو جاسم وصارت الاهلاهل بصوت عالي دخلن خالاته يهوس
_ جبنالك ورده اشتم بيها بس كون
الورده اداريها
_واحد واحد واحد اسمر أحلى واحد وحده
وحده وحده ليان أحلى وحده
وضلن يهوسن دخل اسمر بهيبته وكشخته
تقرب على ليان وباسها من كصتها وكعد
يمها خلو الطبله كدامهم وجاوبو الصينيه
بيها حنه وكيكه وشكر ومن هاي السوالف
مرتبيها
قطعو الكيكه ووكلته وكلها بس احسهم
مو على بعضهم وبعدين خله بيدها الحنه
وهي خلت على اصبعه واخذو كم صوره
وكام فلت واحنه ضلينه نركص لليل…
مارحنه لبيت عمو جاسم وحتى ماشفنه ركص الزلم وچوبي ضلينه يم ليان وحتى بتنه يمهم
لصبح رحنه لصالون وهم كملنا بس ليان
طلعت احلا بس من الحنه بدلتها البيضه
وخلصنه واجه حمزه اخذنه
ووصلنا للبيت شافتها عمه صابرين وحضنتها وبجت وليان هم بجت وحتى حمزه وعمر
إلي جانو واكفين هم نزلت دمعتهم
سحبنه ليان من عمه صابرين لا راح
يخرب المكياج
شويه وجوي وودك الهورنات ولاغاني
يركع دخل اسمر بقاطه الابيض كامت
ليان من شافته وهو هم تقرب منها
بس باسها بخدها ولزمها واردو يطلعون
بس اجه حمزه وكف يمه وكاله
حمزه:: اليوم سلمناك اغله ماعدنه ونريدك
تحافظ عليها وإذا صار وشفت بعيني
دمعه وحده نازله من عينها الخضره
اعتبرني نسيت عندي ابن عم
وبوكته
اتحاسب وياك بطريقتي _بضحكه_
اسمر:: بعيني اخليها
استغربت بس هيج……
/////////////////////////
“” ليان””
واكفه بدلتي البيضه كدام المرايه
_هاي هيه يعني
_راح تصيرين مرته لاسمر
_حياة الابنيه العادية لازم تنسيها
وتفكرين بحياة الزوجيه
كملن البنات ولبسن صاياتهن وشالاتهن
وإني خلولي البركع اجه حمزه اخذنه
ورجعنه لبيت دخلني البنات للبيت بس
لمحت أمي شلت لبركع من راسي لكيته
تبجي حضنتها حيل اريد اضمه بكلبي
وصرت ابجي وياها
سحبني البنات وخلني اكعد جني خالاتي
وبناتهن يباركلي وشويه وصارت الهورنات والاغاني وهلاهل وهذا يدل على أن وصلو
دخلن النسوان وهن يهوسن وشويه وفتحوا الطريق دخل اسمر مارفعت راسي ولا باوعت
عليه غمضت عيوني لمن قرب شفايفه
على كصتي وباسني
وإني كل هذا ماباوعت عليه وكالو
_يله
لزمني من أيدي ومشينه ردنه نطلع بس
حجه حمزه وامني يم اسمر واجه باسني
ووخر من طريقنه مخلين سياره اسمر بباب
البيت حتى كبل نصعد صعدني ورجع
صعد حرك السياره وصار يمشي بس
كل هذا إني اباوع على رجفه ايده
لزمت ايده واردفت
ليان:: اسمر بيك شي
وخر ايده مني وكال
اسمر:: مابيه شي
ضليت صافنه عليه شبي وليش يحجي
وياي برود ماهتميت ووضليت اباوع على السيارات وصلنا للقاعه ونزلنا ودوني لغرفه لاستراحه ضليت كاعده هناك شويه ودخل
اسمر وكال
_يله كومي
كمت ويا وعدلت بدلتي ولزمت الورده بايدي
لزم ايدي ومشاني ويا فتحو الباب وصارت
ناس تصفك وناس تهلهل وإني صرت ارجف ومتوترا ضغطت على أيد اسمر حيل ومشينه ووصلنا للنص وشغلو اغنيه خله ايد على
خصري وأيد بيدي وإني ايد على كتفه
وأيد بايده
_عبالي حبيبي
_عبالي حبيبي
_إغمرك ما إتركك
_إسرقك مارجعك
_إحبسك ماطلعك من قلبي ولا يوم
_إخطفلك نظراتك ضحكاتك حركاتك
_علقهن بغرفتي نيمهن عفرشتي
_إحلمهن بغفوتي تيحلى بعيني النوم
_عبالي حبيبي
صافنه بعيونه وادندن وي الاغنيه بس
هو
يدير وجه عليه خلصت الاغنيه وكلها
صفكت لزم ايدي ومشينه بتجاه الكراسي
مال العرسان كعدنه وشغلو غير اغنيه
وصارو يركصون شويه وطلعو الولد كلهم
بس اسمر شويه يلا طلع والبنات اخذن
راحتهن ووصارن يركصن وكلساعه تجي
وحده تريد تسحبتي واني ماكدر
أحس خايفه من شي ماعرف شنو هوه
شويه ودخلو الولد يركصون اجه اسمر
سحبني من ايدي ومشاني ويا أول ما
طلعنه من القاعه نزل البركع على راسي
وصعدني بسياره متوجهين لفندق
الولد ماقصرو وسووها أحلى زفه يركصون ويصفكون وحتى يهلهلون وصوت الهلاهل
وصلنا لفندق وهمه يركصون نزلني امي
وعمه زهور ماعرف عمه سناء ليش
ماجتي ليهنا
دخلنا الفندق وصعدنه على
رقم الغرفه دخلني وكعدني على الجربايه
ورتبن الملابس مالاتنه
جتي امي تحجي
وياي وعود تنطيني نصائح بس اني وين
كلشي ماسمعت منها وشارده بتفكيري
ندك الباب وكامت عمه زهور فتحته دخل
اسمر وهنه ضحكن وطلعن ضلينه بس اني
ويا بالغرفه ماباوع عليه ولا حجه شي راح
كبل الحمام ضليت بدلتي كاعده وانتضره
ساعه كامله يلا طلع ينشف برأسه شمر
الخاولي واجه عليه لزم وجهي بثنين
اديه واردف
اسمر:: أنا اسف ليان
باوعت بعيونه ما عرفت افسر حالته ليش
يتاسف
ليان بستغراب:: على شنو اسف شبيك اسمر
اسمر:: ليان انا اسف على إلي راح اسوي
ليان:: شتسوي اسمر احجي فدوه لتخوفني
اسمر:: ماكدر اكمل وياج والله ماكدر
فتحت عيوني على وسعهن نصدمت من
حجايته مايكدر ليش ازوجني لعد دفعت
ايده من وجهي وصحت بي
ليان بصياح:: ماتريدني ماتريد تكمل وياي
ليش ازوجتنييييي ها ليشششش
اسمر:: ماكدر انجبرت عليجج ولجج ماكدررر
وأنا أحب وحده ثانيه ماكدر احبج أنتِ
نزلن دموعي رحت عليه لزمت وجه واحجي وابجي بنفس الوكت كلبي محروك
ليان:: اسمر اسمر أحبك والله أني احبك
لا تعوفني الله يخليك لا ادمرني
دفعني حيل وكعت بلكاع وصاح
اسمر:: ماكددررر إذا أبقى وياج تدمر
حياتيييي ماحبج أنا ماحبجججج
ليان ببجي:: اسمر الله يخليك لا تعوفني
والله اني احبك فدوه لتعوفني
اجه كعد بصفي ولزم وجهي صار يمسح
دموعي بيده ويحجي
اسمر:: ماكدر ليان حسي بيه ماكدر اكمل وياج
ليان:: لا تسوي بيه هيج لا تخليني اكرهك
اسمر:: اكرهيني أي اكرهيني وهسه انا رايح وماراح اخليج تشوفين وجهي بحياتج كلها اكرهيني احقدي عليه لا تفكرين بيه من اجي
بالج اغلطي عليه سبيني لا تحجي عليه
بشي الزين ليان انا اسف اسف
ليان ببجي:: راح تعوفني علمودها
اسمر:: احبها ليان احبها
ليان:: أن شاء الله ماتتهنون أنتَ وياها
وخر من يمي وصاح بصوت عالي
اسمر:: لا تدعين هيج لا تدعينننن
كمت ردت اروح لحمام اني وبدلتي إلي
ماتهنيت بيها
بس سحبني من ايدي
ورجعني عليه باوع بعيوني وكال
اسمر:: هذا جهازي اخذي والصبح خابري
حمزه لو عمر يجي ياخذج
طلع الموبايل من جيبه وخلا بيدي شمرته على الجربايه وباوعت عليه ميلت راسي على كتفي واردفت
ليان بدموع:: يعني راح تعوفني
اسمر:: سامحيني ماكدر ماكدررر
ليان:: دمرتني
اسمر:: محد مدمر غيري
ليان:: روحلها
اسمر:: راح اروح
عافني أي عافني وراح أي راح
دمرني دمر مستقبلي دمر كلشي جان
حلو بحياتي………
يتبععع……….
///////////////////////////
شاركونه توقعاتكم
الفصل التالي: اضغط هنا
يتبع.. (رواية احفاد عمران) اضغط على اسم الرواية لتجد الفهرس كاملاً بجميع الفصول.