رواية احفاد عمران – الفصل السابع عشر
#احفاد عمران
بارت _17_
………………….
……………………….
آنہڪـسࢪ مجداف عمري بزحـمة الࢪوج❤️🩹
ووڪف بيـة الزمن يم اليڪرهون🖤
وخفـت همي تڪشف اسࢪاࢪ العـيون
خيطت النضـر علا يشوفـون 💔
وخـفت حـيلي يعدب يڪشف العوز
……………………
………………………..
“”قبل أيام””
ضليت ادك على اسمر مره مرتين
تلاثه
اربعه ماكو ميجاوب خليت وقفلت
موبايلي هم
ضليت كاعده بغرفتي مليت كمت
وفتحت التلفون بالي اسمر رجع الدكه
بس فتحته وخاب ضني ماكو أي اتصال
من اسمر بي اكو رسائل من هذاك الشخص المجهول
بدون تردد دخلت عليهن لكيت داز الي
صور واني……… فتحت عيوني على
وسعهن واني اشوف صوري مستحيل
هذا الشي هاي الصور مو إلي كمت مثل
المخبله ضليت اروح وارجع بالغرفه لازمه
راسي شديصير منو هذا شيريد مني
ليش هيج يسوي
ماتحملت لزمت تلفوني وبسرعه دزيت إله
_شنو غايتك من إلي دتسوي كالساعه
ادزلي صور وتهدد بيهن كاافيي فكر انت
فكر ماتفكر يجوز الدتسوي بأجر عكبه
يصير بوحده من خواتك حرام عليك
الله يخليك امسح صوري ماماذيتك
بشي لا تسوي هيج بيه اني حتى
ماعرفك ليش هيج تسوي
رجع دز مسج بنفس الدقيقه
_ ماعندي شي وياج أنا رايد اعلم اسمر درس
_ان…ي شنو دخلني باسمر
_اش لج شنو هوه شنو شدخلج بي
بالنهايه تضلين زوجته لاسمر
_خويه الله يخليك عوفني بحالي
_اش لجج وهسه شوفي شنو اريد منج
ليان:: شنووو ماسوي أي شي
_خوش لا تسوين الاكلج عليه وهاي صورج يصيرن يم حمزه ويم عمامج باسرع وكت
صرت ابجي ماعرف شنو اتصرف شلون
احلها إذا ماذبحوني لمن اسمر عافني
هسه يذبحوني كبل وحمزه شنوو يصير
بي لو شاف هيج صور بدون وعي مني
كتله
_شنو إسوي
_أي عفيه من البدايه صيري شاطره
_شنو تريد احجي بسرعه
_ اريدج تصيرين نقطه ضعفه لاسمر
_تخبلت أنت شلون اصير نقطه ضعفه
_بكل سهوله ترجعين إله وتصيرين
توهمينه على أن أنتِ تحبينه
ليان:: مستحيللل هذا الشي
_خوش هاي صورج يمي راح ادز بالسره الهم
خفت ليكون صدك يسويها كبل كتله
ليان:: أرجع ارجع إله بس عوف الصور
_عفيه…….
من بعد هذا اليوم اطريت اقبل برجعتي
عارضت الكل حتى ارجع خربت علاقتي
وي حمزه صار مايريدني صرت من اتصل
عليه يغلق تلفونه حتى مارجع اتصل
سلمت نفسي لاسمر بس حتى تقوى علاقتنه
واكدر اوصل الهدفي صرت أمثل عليه بأن
إني تغيرت ويا بس حتى مايحس أكو شي
صاير ماعرف إذا چان الشي إلي دااسوي
صح أو غلط بس بالي كله أن ماتنشر
صوري ولا انفضح
“”الحاضر””
_دكيت عليج بنص أليل وين جنتي
بحضن حبيب القلب
ليان:: الله ياخذك حقير
_دسكتي لج
ليان:: شتريد تتصل عليه
_اريدج أنتِ
ليان:: شنو تريد
_اسمر وين
ليان:: شنو دخلك
_ليان جاوبي على كد السؤال بدون
حجي زايد
ليان:: بالعياده مالته
_خوش
سديته منه يله كدرت اخذ نفس
_الخايس
رجعت كعدت يم جمانه وضليت الاعب
بيها شويه وشلتها نزلت جوه فرشت الها
فرشه صغيره بالكاع وخليتها تلعب رحت
المطبخ كلت خلي اسوي للغده برياني
طلعت الأشياء الاحتاجهن وصرت
احضر بيهن بس سمعت عيطه جمانه
ركضت عليها بسرعه لكيتها مكلوبه على
بطنها وتصرخ بسرعه رحت الها وعدلتها
وهيه على فد صرخه شلتها وصرت أمشي
بيها اريدها تسكت ماكو طلعت عمه سناء
من الغرفه وهي تدردم
عمه سناء:: شسويتيلها ولج
ليان:: شنو عمه شسويت الها قابل كاتلتها
هيه انكلبت على بطنها وعاطت
هزت ايدها وراحت كعدت على القنفه
وماهامها شي وجمانه على صرختها انتبهت
الها خشمها صاير أحمر اخذتها وصعدت
الغرفه خليتها على الجربايه وسويت الها
ممه بس اريده تسكت بس الحمد لله
انطيتها المميه وصارت ترضع الضاهر
جوعانه
ضليت فوك باوعت لساعه صارت 12
وإني مامسويه غده اليوم شيخلصني
بعدني أريد اشيل جمانه حتى انزل
وصاحت عمه سناء بصوت عالي
عمه سناء:: ولججج شنووو اليوم انضل
بدون غده
استغفرت ربي وشلت جمانه نزلت جوا
خليتها على فرشتها وعمتي تباوع عليه
بحقد ماهتميت رحت المطبخ وطلعت
الكدر وصرت اخلي المكونات
فجأة انفتح الباب ودخل أسمر باوع عليه
وابتسم تقدم نحوي وباسني براسي
أسمر:: شلونها الحلوه
ليان:: زينه
عافني ودخل الصاله واستقبلته عمتي بالدردم
عمه سناء:: شنوو عيني تطلع أنتَ الشغلك والخاتون تنام الضهاري
أسمر:: يمه توني جاي مالي خلك
عمه سناء:: طبعا طبعا مالك خلك مو لأن
أمك تحجي على الخاتون
ولككك شلون
ترضاها امك ادنك وتمسح البيت شنو
من ابن أنتَ
فتحت عيوني بصدمه شوكت مسحت
البيت مو إني إلي مسحت مسحت
ونضفت البيت كله تقدمت على الصاله
وحجيت
ليان:: عمه شنو هذا الحجي شوكت إني
مخليتج تمسحين مو إني نظفت البيت كله
عمه سناء:: اجذبيني ولججج
ليان:: عمه إني مامجذبتج بس جاي تحجي الحقيقه إني إلي نظفت البيت كله ليش هيج تحجين
عمه سناء:: ولججج بكد الفصمه وجايه
تذبين سمج عليه…. منهي إلي صاعدة
فوك وتتخابر مادري ويامن ومخليه
الشغل على عمتها
باوعت على أسمر يباوع عليه وعاكد
حواجبه بستغراب
ليان:: أسمر إني……
اسمر:: كافي راسي يوجعني
خلانه وصعد الغرفه باوعت على عمتي
تباوعلي وتضحك بنتصار
ليان:: عمه ليش هيج حجيتي
عمه سناء:: احسن
ماحاجيته لأن إذا ارد عليها راح أزيد
الطين بله رجعت كملت الغده خلصت
التحضيرات وسويت زلاطه ويا ورحت
توضيت أريد اصلي بس
نزل أسمر من فوك مستعجل صاحت
عمه سناء بي
عمه سناء:: شبيك أسمر مستعجل
اسمر:: مو وكتها هسه
مشيت ووكفت كباله واردفت
ليان:: اسمر وين رايح
باوع عليه صفن وباوع على عمه سناء
وهو يكول
اسمر:: ريم بالمستشفى مدخليها عمليات
ضربت عمه سناء على خدها
عمه سناء:: يمهه
شنوو شو اني مادري
اسمر:: رايح أنا الها
عمه سناء:: اوكفف انتضرني بس البس
جواريبي وعبااتي واجي وياك
اسمر:: شسوين يمه ضلي اهنا وأنا اخابرج
ماهتمت عمه سناء إله وراحت دخلت
غرفتها بسرعه باوعت على اسمر مبين
عليه التوتر والقلق
ليان:: اسمر خلي اروح وياكم
اسمر:: ليان الله يخليج لا تزيديها عليه ضلي بالبيت وأنا اتصل عليج
هزيت راسي وسكتت بس بنفس الوكت
خايفه على ريم طلعت عمه سناء لابسه
عبايتها وطلعت برأ تقرب عليه اسمر
وباسني براسي وهو يوصي بيه
اسمر:: ديري بالج على نفسج وعلى
جمانه….. وقفلي البوب زين
ليان:: صار
ابتعد مني وراح على جمانه باسها
وطلع وره عمتي قفلت الباب وكعدت
يم جمانه واني افكر بريم ليش ناقليها
عمليات شبيها رجعت توضيت ووفرشت
سجادتي يم جمانه وصليت كعدت وضليت
ادعي الريم تكوم بسلامه هي وطفلها
ضليت ساعه كامله كاعده بين افكاري
افكر بالشخص المجهول منو هذا وشنو
يريد مني وشنو مستفاد من إلي جاي
يسوي معقوله عنده عداوه وي اسمر
وإذا عنده شنو يعني اني شنو دخلني
بينهن
بجت جمانه تريد ترجع تنام كمت غيرت
الها وكمطتها شلون ماجان وخليتها بحضني
شوي وغفت صعدتها الكركوتها نومتها بي
رجعت اخذت تلفوني اتصلت على اسمر
ماكو ماجاوب خليت وكعدت بالغرفه
حتى ماضل ألي نفس اكل أبدا
ضليت على كعدتي لليل ماكو خبر عنهم
كالساعه ادك على اسمر بس ماكو ميجاوب
عليه ضليت بقلق ليش مايرد صاير شي
جمانه ضلت على نومتها لليل ماكعدت
واني ضليت احوس بالبيت رجعت ادك
على اسمر ماكو ردت ادك على حمزه
علمود اشوفه هم يعرف بس تذكرت
هو مايحجي وياي ومستحيل يرد
نزلت جوه اخذت بالماعون شويه برياني
لأن أصلا محد اكل منه وحتى عمو جاسم
مارجع البيت أضن مخابري ورايح وياهم
رجعت صعدت الغرفه لكيت صوت لجمانه
تقربت عليها لكيتها تكركر لنفسها وتبتسم
ابتسمت على ابتسامتها وخليت الماعون
على الميز وشلتها فتحت كماطها وخليتها
تلعب اكلت شويه وضليت الاعب بيها
ليان:: جمانه كولي أبا
ضحكت وصارت تحرك ايدها لزمت
اديها وصرت عود اعض بيها
_اكلهن اني اكلهن لهل ادين
بالربع ساعه ودك تلفوني شفته اسمر
كبل جاوبته
ليان:: اسمر شسالفه من الظهر اتص……..
قاطع كلامي وهو يكول
اسمر:: ليان افتحي الباب
سديته منه وشلت جمانه ماكدر ابقيها
بالغرفه واني جوه نزلت فتحت باب
المطبخ ونصدمت بريم وياهم
ليان:: ريم
اسمر:: مو وكتها ليان هسه خليها ترتاح
باوعت الريم منزله راسها ولازمه بايد
اسمر ماباوعت عليه أبدا دخلها اسمر
الصاله ودخلت وراها عمه سناء شايله
طفل ودخلت جوه واني شايله جمانه
وصافنه عليهم شديصير مشيت وراهم
اسمر:: يمه غرفتج هليومين الريم بس
لمه تكدر شويه تتحرك
عمه سناء:: روح يمه روح دخلها الغرفه
خلي ترتاح
مشاها ووداها الغرفه اهله شويه وطلع
رجعت عمه سناء دخلت يمها وسدت الباب
اجه اسمر باتجاه الدرج بس استوقفته
واني احجي
ليان:: اسمر شبيها ريم
اسمر:: ليان بعدين نحجي راسي يوجعني
هسه
هزيت راسي بمعنى أي صعد هو واني
لملمت فرشات جمانه وصعدت شايلتها
دخلت الغرفه ماكو اسمر بس صوت المي
مسموع الظاهر جاي يسبح خليت جمانه
بكركوتها وكعدت على الجربايه انتضره
شويه وطلع ينشف بشعره
ليان:: اسمر جوعان اسويلك اكل
اسمر:: لا ماريد
اجه تقرب باتجاهي وكال
اسمر:: مددي رجليج
ليان:: ليش
اسمر:: يله ليان شكد تسئلين
مافتهمت عليه بس مديت رجلي راح
هوه على الطرف الثاني وومدد على
الجربايه بس خله راسه على رجلي تلمس
اديه قربهن على وجهه وباسهن وخلاهن
على شعره وهو يكول
اسمر:: ليان افركيلي راسي يوجعني
صرت افرك براسه وهو يون مبين صدك
متوجع ضليت بالنص ساعه بس بجت
جمانه ابتعد عليه وخله راسه على المخده
وهو يكول
اسمر:: روحيلها ليان
كمت عليها لكيته لازمه شعرها وتبجي
غميت نفسي وصرت احل بشعرها من
ايدها شعرايه شعرايه بالكوه يلا حليت
كل شعرها سويت الها ممه ورضعتها
وصرت اهز الكركوت بيها نومتها بدون
كماط
كلت خلي انزل اشوف ريم طلعت وسديت
الباب ورأي نزلت جوه باوعت بالاستقبال
لكيت عمو جاسم نايم بالاستقبال استغليت الفرصه ورحت على كيفي الغرفه فتحت الباب بهدوء باوعت ريم وعمه سناء نايمات وبنصهن الطفل ابتسمت على منضرهن وسديت الباب ورجعت الغرفتنه
نمت بصف اسمر وضليت صافنه بوجهه
معقوله يجي يوم واسمر يصير يكرهني
بس حقه إذا كرهني اني دااضحك عليه
واعيشه باوهام شراح يصير من يعرف
طردت الافكار من راسي ونمت لحد
ماسمعت صوت جمانه كمت سويت الها
ممه رضعتها الممه ورجعت نمت الصبح
يلا كعدت جان اسمر مارايح العياده على
مااعتقد لأن بليل اتاخرو بالجيه وهم
جان تعبان
كمت غسلت وجهي ونزلت لكيت عمه
سناء جاي تحضر ريوم
ليان:: صباح الخير عمه
عمه سناء:: صباح النور
اتفاجئت بيها البارحه جانت تذب تهايم
عليه واليوم تصبح عليه عادي
ليان:: عمه ليش أنتِ كاعده تسوين ريوك
روحي ارتاحي اني اسوي
عمه سناء:: لا اني هم جاي الهي
نفسي…… حضري صينيه اوديها
لريم لأن ماتكدر تكوم
هزيت راسي بمعنى أي وحضرت الصينيه
الريم كملت عمه سناء ونقلت الاكل الميز
شويه واجه عمو جاسم وهو يصبح علينه
عمو جاسم:: صباح الخير
سناء+ليان:: صباح النور
كعد على الطاوله واني اخذت الصينيه
الريم فتحت الباب بعكس أيدي ودخلت
لكيته مخليه ايدها على خد ابنها إلي
ماعرف اسمه رفعت راسها رئسه من
دخلت ابتسمت الها وكلت
ليان:: صباح الخير
ريم:: صباح النور
تقربت الها هي شويه ابتعدت وخلت
مسافه اخلي بيها الصينيه
خليت الصينيه وكعدت بعيد عليها
ريم:: تعالي اكلي وياي
ليان:: ماشتهي اكلي أنتِ
هزت راسها واكلت شويه وبعدت الصينيه منها
ليان:: شنووو هاييي تضحكين علينه بهل
لكمتين
ريم:: هاي هيه شبعت
باوعت عليها ومتردده اسئلها بس
لازم اعرف
ليان:: ريم شصاير شلون طلعوج
من المستشفى خلال ساعات
ريم:: اسمر سجل خروج على حسابه
ليان:: شلون وليش
ريم:: لأن اني ماردت اضل واليأس موجود
ستغربت شنو صاير بينها وبين إلياس
حتى مارادت تضل بالمستشفى
ليان:: شنو صاير ريم احجيلي
ريم:: ليان راح احجيلج بس ماريدج
تكولين لا الأسمر ولا ولامي لأن اني
كل شي ماحجيت الهم مجرد كلت تعاركنه
كمت وخرت الصينيه من يمها وكعدت
قريب عليها وصارت تحجيلي إلي صار
…….. صحت بيها
ليان:: شنوووو ريممم تخبلتتييي كل
هذا يصير وأنتِ ماتحجين
ريم:: ليان صوتج راح يسمعوج
ليان:: خلي يسمعوني وإذا سمعوني
شلون هيج يسوي
ريم:: خلاص ليان اني بعد مارجع إله
ليان:: هههههه سمعناها هواي قبل
ريم:: لا هاي المره اني راح اطلب الطلاق
صفنت بيها هاي تحجي صدك
ليان:: وانتِ شنو مفكره راح يطلكج
ريم:: غصبآ ماعليه
ليان:: ماعرف ماعرف اني بس انصحج
تحجين لاسمر احسن ماتكبر هاي السالفه
ولا تنسين هسه إنتو عدكم طفل فكرو بي
ستغربت من نفسي كاعده انصح بيها
وإني مشاكلي فوك من راسي عفتها
واخذت الصينيه وطلعت لكيتهم
متريكين وباقي بس أسمر على
الطاوله غسلت المواعين وكعدت يمه
ليان:: شبيك أسمر
اسمر:: مابيه شي
كمت وعفته صعدت فوك عزلت الغرفه
ونضفتها وجمانه على فد نومه دخل
أسمر وراح تمدد على السرير كملت
تنظيف الغرفه ورحت يمه تمددت
سحبت ايده الازم بيها الموبايل
وصرت العب بصابيعه واحجي
ليان:: أسمر
أسمر:: همم
ليان:: اريد اسئلك سؤال
أسمر:: اسئلي
ليان:: لو غلطت غلطه جبيره راح تسامحني
التفت عليه وباوع بستغراب
أسمر:: شنو هذا الكلام هسه
ليان:: ياااا أسمر يعني إني جاي اسئلك
جاوب..
أسمر:: باعي ليان غلط على غلط مثلا………
ليان:: اهه باع أسمر شنو رئيك نجيب
كركوت الابن ريم
غيرت السالفه لأن بس يحجي راح يكشفني
أسمر:: خوش فكره
ابتسمت اله وتقربت عليه خليت راسي
على كتفه ذب الموبايل ولوف اديه
حاوطني
أسمر:: ليان
ليان:: ها
أسمر:: عندي الج مفاجئه
ليان:: شنو هيه
أسمر:: مو هسه الوكته تعرفينه
كمت وكعدت على حيلي
ليان:: أسمر ماكدر إذا مااعرفها هسه
أسمر:: شنو تورطت حجيت
برطمت شفايفي عود زعلت ضحك
عليه وكام طلع ياا هاذا مايهتم الزعلي
واخيرا كعدت جمانه كمت الها ونزلتها جوا كبل……..
مرت ايامنه ريم وزيد يمنه “”نسيت
اكول الكم ريم سمت ابنها زيد”” إني
واسمر مستمره علاقتنه عود زينه بس
كلها جذب
الشخص المجهول بعده مستمر بتخويفي
وإني اسوي كل شي يريده بس لأن
اخاف منه
قرب عرس أمل إلي هيه طايره من
الفرح بي ومتانيه لحضه لحضه الهذا
اليوم
جمانه بلشت تكعد بس تهوه وتوكع
واسمر يمكن هو اكثر شخص فرحان بيها
ريم شالت الخيط وصارت تكدر
تمشي وتتحرك على راحتها جنه
كاعدين بالمطبخ إني وياها
ونلف كبه ونسولف ونضحك
بس اختفه ضحكنه وي دخول أسمر
وهو يباوع على ريم ويحجي
أسمر:: ريم إلياس يريد يحجي وياج
ضروري
ريم:: مو تشوفني جاي اشتغل مافارغه
أسمر:: ريم ترا مصختيها لا انتِ تحجين
شنو صاير بينكم ولا ترضين تحجين ويا
ريم:: أسمر مالي خلك عوفني هسه
ماعرف منين اجتني القوه وكمت أريد
أروح اواجه إلياس واكول إله كل شي
على المجهول وواكيد هوه لأن ضابط
راح يحلها
رحت الطارمه جان واكف يم الباب
بس من الداخل تقربت عليه وإني اكول
ليان:: السلام عليكم
إلياس:: وعليكم السلام هلا
ليان:: شلونك الياس
إلياس:: الحمدلله…. وانتِ شخبارج
ليان:: زينه……. إلياس ممكن احجي
وياك بموضوع
إلياس:: أي احجي اسمعج
ليان:: شوف إلياس اني وكعت بمشكله
ألياس:: شنوو تحجين
ليان:: إلياس فدوه صوتك ليسمع أسمر
إلياس:: ولج شنوو احجي شنو من مشكله
ليان:: جاي اتهدد بصوري
تقرب بسرعه ولزم ايدي عصرها حيل
وهو يحجي بعصبيه
إلياس:: شلوننن هيج يصير وماتحجين
أسمر:: ايدككك لا اكسرها الك…..
يتبع…..
بقلمي ضحى اليوسف
أحفاد عمران
الفصل التالي: اضغط هنا
يتبع.. (رواية احفاد عمران) اضغط على اسم الرواية لتجد الفهرس كاملاً بجميع الفصول.