رواية ساقي الود – الفصل السابع عشر
– بأنفعال واضح صحت :
و اخوج لشوكت يظل ماشي بهالدرب ها ؟
ما ناوي يتوب المن يلم بيهن ، اشو بس اني و باعني برخص التراب ، المن يلم بهالفلوس و معرض روحـه و هالشباب للخطر ؟
كفـاية :: احو ، شو انداريتي عالزلمة ، شني ويانا علينه ؟
– آني ويا الحق ، تجارة السلاح جريمة يحاسب عليها القانون ، هذا من غير المخاطرة البيها ، لو الطلقة لا سامح الله واكعة بگلبه لو واحد من الشباب رايح بيها چان شكال لروحـه ؟
كفايه :: كلامج عين العگل بس الوضع ما يتحمل ملامـه بنتي ، هذا ابوچ سواء رضيتي و المارضيتي و آنه بلغتج تا تجين تشوفينه ، الظفر ما يطلع من اللحم حبوبة
– هـه لا والله يطلع ، وينـه اخوج عني كل هالسنين ؟
كم مرة اجيته و دفعني لبعيد ، اخرها حطني هنا و دار وجهه
وعدني يحلها و غَلس ، چم شهر آني هنا ما كلف خاطرة وشال تلفون يسأل عني ، الظفر اخوج شلعة من اللحم مو آني
كفاية :: شمالج متوحشه هيج، شغيرج ؟
– من زمان توحشت من ساعة السلمني ابويه بأيد سلام
كفاية :: يعني شني ما تجين تشوفين ابوج ؟
– لا ما اشوفـه ، و اتحمديلي بالسلامة لخنجر و بس !
سديت الخط منها و أَعرف كلش زين راح تشيل بخاطرها ، گلبي يضرب بقوة ، عيوني تلومني عليه و تگلي ابچي ، رحت اقلب بحصيلة ذكرياتنا القليلة و رغم شحت حضورها بذهني و قلّة اثرها بقلبي بـچيت و أرتجفن شفايفي امسكت تلفوني
و طلعت رقمـه اكثر من مرة حاولت اتصل و مكدرت ، صرخـة بكبر الگون انحشرت بصدري ، دَخلت عالصور بالاستوديو ، مثل ام استشهد ابنها بأنفجار و راحت تدور اوصـاله ، هيج آني ادورله صورة ، كلمة ، ذكرى حتى لو مكالمة فائته ارثيه بيها ماكو ،
فـارغـة منه ، من ابوتـه من وجوده ، بس اسمـه الباقي يربطني بيه ، و بدل ما ابچي عليه ، لگيتني ابجي منه ابجي من جفاه
ليش بابا ،، ليش بعدتني عنك ؟
اجـه صوته التعبان يقاطع بكائي :
غَيـاث :: ود
– مسحت دموعي بالعجل و رحت تقربت عليـه ، احسـه بصعوبة يتحرك ، همست :
صباح الخَير ،، شلونك شتحس ؟
غَياث :: شلّوني ،، متفلش !
-ابتسم و هو يحاول يسند نفسـه حتى يكعد
غياث :: سامعـة بلي يگول گلي يوجعني
– چتفت اديـه و صحت بأستهزاء :
الظاهر الجماعة المتضارب وياهم مو هينين ؟
عگد جَبينه بأستغراب واستفسر :
غياث :: شبيج ود ، ليش اهيسج بحلكج كلام تريدين تگوليه ؟
– ويامن تضاربت غياث ؟ لـو خليني اغير صيغـة السؤال
ليا جماعة تصديت بالذات ، جماعة الدعلج لوووو …
غَياث :: جماعة ابوچ !
– اتسعت عيوني مصدومـة ، حتى ما كلّف نفسه و نكر ، غوركن عيوني بدمعهن ، همست و الغصة خانگتني :
انتَ الي صَوبت ابويـه ؟
فتح حلـگه مصدوم بكلامي ، جاوب سؤالي بسؤال :
غَياث :: ابوچ تصوب ؟
-ضحكت بسخرية و اعقبت :
لا تَغشم روحك ،، انت الي هاجمتهم البارحة مو آني !
انتفض راد يگوم و انعقچت ملامحه متألم ، رجـع كعد لازم خاصرتـه و يحجي بتعب :
غَياث :: موش آنه الي اغشم روحي ، شني خايف منچ ، اي آنه هاجمتهم ، و طحت بزلام ابوچ دوسـه ونص ، أَذيتهم و أَذوني ، طحت چتيل خاطر يلتهون بالگونه و يتأخر التسليم منا لمن تجي المكافحة ، بس مو آنه الصوبت ابوچ و لا انـه الاكاون زلمة عيان بالتفك !
بعبوس تسائلت :
مافهمت ، اذا مو انت الي صوبته منو لعد ؟
ابتسم بسخرية و اردف :
غياث :: الظاهر ابوج من شاف زلامـه التهوا ، ضحى بروحـه
و راح يسلم لوحيدته مارد يضيع الفرصـة ، و الچيلة الطاحت بي هاي من الحكومة موش مني احمدي ربچ شرد بالحمرة وما خلاهم يلزمونه ، انت ياهي الگالچ ؟
-همست بـعبرة :
كفاية ؛ تمشيت بخطى مرهقة و كعدت بصفة ، ضميت وجهي بين ايديـة وبچيت بصوت مسموع ، امتدت ايده تطبطب على گتفي و اجـه صوتـه بتبرير صادق :
غَياث :: والله و روح ابوي موش آنه الصوبته ، انه اعترف اعترضت طريقهم وخربت شغلهم عبن شرحتلج اسبابي امس بس ما توصل للچتل موش عاد ابو مرتي
-شلت راسي و ابتسمتله بمرارة :
لا تبرر ، زين سَويت اني مثلك ضد هذا الشغل ، الي قاهرني داحسّ بالخذلان من نفسي ، كارهـة الصقيع المجمد گلبي ناحيته ، المفروض هسه اموت روحي علموده ، ليش ما احس بيني و بينه شي، دا تفهمني غَياث اليوم يالّه استوعبت
آني فاقدته من زمـان و ما باقيلي منـه غير بس الأسم ،
جرني لحضنـه رغم الألم الجسدي الي دَيحس بي ، ما خلاني لوحدي ، احتضني بحزني و ضياعي ؛ دموعي تبلل صدره ، باس راسي و بقى يواسيني بصمت ، صمت وحدة مثلي تفهمة وحدة عاشت كل عمرها تبچي و تحزن لوحدها بلا ما تنطق وتگول شنو اليوجعها لان محد چان موجود يسمعها .
بعدما قطعت شوط من البچي ، حَسيت على روحي آني حاطة راسي بثقله على صدره المتورم ، بعدت نفسي عنـه و اعتذرت:
اسفـة وجعتلك صدرك
بعد خصلة من وجهي ، عيونه تناظرني بحب :
غَياث : انتَ دوة لصدري
-ابتسمت بحزن ، سكتنا ثنينا لثواني ، صاح هو :
غياث :: ود لازم تروحين تشوفين ابوچ ، و تتحمدين الـه بالسلامة ، لو شما يصير بيناتكم يبقى ابوچ و محتاج شوفتج بهاي اللحظة
– شلون أتركك لوحدك و أَنت بهاي الحالة ؟
ابتسم بتعب :
غَياث :: لا تشيلين هَمي ،، آنه متعود عالصواب و موش اول مرة ، راح اگل لعمي ياخذج الهم
– و اذا سأل عمك ، ابوچ شبيه شكوله ؟
غياث :: خليها يَمي ، راح اگله جماعة معترضة دربهم رايده تسلبهم ، صاير رمي و أَبوها تصوب و انتِ فهمي عمتج على هذا الكلام ، خل حجيچن يصير واحد
– تتصور تعبر على عَمك هاي السالفة
تنهد و همس :
غياث :: هي ما تعبر بس آنه اعبرها عليه
– هزيتله راسي بتعب ، سند نفسـه و گام على حيلـه يتحرك بتثاقل ، صحت وراه :
وين رايح ؟
غياث :: اغسل و انزل اشوفن عمي خاطر يوديچ
– شراح تگللهم و أَنت هاي حالتك ؟
رفع تك حاجب و صاح
غياث :: شبيها حالتي ولك حنطاوي ؟
ابتسمت و اعقبت :
– مدا تشوف روحك بالگوة تمشي؟
غياث :: انت بس زهبيلي هدومي و شوفيني شلون راح اسبح و ارجعلج مثل الاسد
-هزيت راسي بأبتسامة و رحت جريت منشفـة و ناوشته :
تفضل اخذ هذهِ ويـاك بين ما احضرلك ملابس
اخذها و راح و آني مثل الچان يكابد على نفسـة بلگوه ضامـة دموعي ، كعدت ابچي بحركة و كأنه داصب روحي مو دمع
دا احس نفسي بعالم غَريب عني ، من جهة ابويـه و شغلة ومن جهة غياث و من جهة لخ حالتي النفسية الي تدهورت كلش وصرت اشوف شغلات ما ادري اذا الها وجود او لا
مسحت دموعي ، گمت اخذت علبـة العلاج الي بدأ ينفذ ، صفنت شوية و قررت احاجي غياث هالمرة ياخذني لبغداد اشوف دكتور لان العلاج ديضرني أَكثر مما ينفعني ، اخذت حباية و ضميت العلبة بجنطتي و بديت احضر غراضي الي اخذهم ويايه لبيت ابوية
كملت و لبست صايتي ، دخل ينشف بشعره و عيونـه نزلن عالجنطة بأستغراب ، ما حجـه تقدم اخذ ملابسـه ، صحت :
اساعدك تلبس ؟
غياث :: لا اخذي راحتچ كملي و لمي شعرج زين جوه الحجاب
-عقدت حواجبي و بداخلي احجي :
شوكت اني ما لامته زين ؟
صفنت عليه جان ديمشط بشعره ، سألته :
– شلون صرت ؟
غياث :: زوين
– بعدك موجوع ؟
غياث :: عادي ،، متعود
-اندار و نبهني مرة لخ :
غياث :: مثل ما وصيتج ، ما اريدن احد يعرف بالسالفة
– بس ترى مبين مالك خلك و گوة تتحرك
غياث :: محد يسأل و اذا سألوا عودن اكللهم فلاونزة بالعظم
ضحكت ..
غياث :: عَليش تضحكين
– رفعت اكتافي بعدم دراية ،
هيچ سوالفك مرات تضحكني
غياث :: جـا خوش الله يديمها، امشينا ننزل ناچلنه لگمة ، و هم احاجي عمي يوديج ،
تناوشت الجنطـة و اجت عينـه عليها تساءل بفضول :
غياث :: بس ما گلتيلي المن هاي الجنطة ؟
– اليـه ، غير رايحـة لاهلي
غياث :: و شني ناوية تسوين اقامة هناك ؟
-ذبيت الجنطة للارض و هتفت :
لا بس اريد ابقالي كم يوم هناك
ضرب لسانه بسقف حلكـه و صاح
غياث :: ماكو هيچ حجي ، بليل تردين
– صدك تحجي انت َ لو تشاقى
غياث :: مشاقي وياچ گبل ، شني بويه شعندج ظاله هلگد ، يحطونج اله بالمغذي لو يناوشوج اله ويه العلاج ؟
– دا تصنف حضرتك ؟
غياث :: لا جاي احجي صدگ ، چلمة ورد غطاها ، بياته هناك ماكوش سمعتيني يو اعيد ؟
– عضيت باطن خَدي بتوتر ، ما رديت عليه ، جر ايدي و نزلني
مشيت وياه ساكتة بس بداخلي اتوعدلـه لو آني لو هو ،
نزلنـه جوه چان الكل حاضر ، اليوم الشيخ موجود ، واصل بعد صلاة الفجر يعني ريوك جماعي ، فات هو للصالـة يم الولد
و آني رحت للمطبخ ، صبحت عليهن و ردن تحية الصباح عدا سمره ، جانن ملتهيات يحضرن الريوك ، زينب بدت حركتها تثكل رغم بعدها بشهر الخامس من الحمل ، رحت تناوشت منها السچينة و گمت اقطع بالخضروات بعصبية ، تساءلت بقلق :
زينب :: شمالچ ، لَيش هيج وجهج
– شبي وجهي ؟
زينب :: مصوفر و عيونج وارمـة چنج الليل كله جنتي تبچين
-انحدرت دَمعة مني ، حاجتني بمواساة :
زينب :: شبيج يبعد اخيتج ؟ كليلي مغثوثة يو شني ؟
-هزيت راسي بنفي ، همست :
ابويه تصوب
لطمت على صَدرها و نشغت
زينب :: ياااع ، دخيلك يبو الحسن
– كل الموجودات التفتن على حسّ نشغتها
سمرة :: شمالچ ياهو المات ؟
زينب :: فال الله ولا فالج ، بعدين شعدج خاله اذاناتج يمي
– هزت ايدها سمره بسخرية :
سمره :: مو صوجج و الله ، صوجي انه السألتج
زينب :: جـا خوش بعد لا تسألين
مد راسـه اواب من باب المطبخ
اواب :: صدك تحچن تجذبن ، راح يوذن الظهر وين اكلچن نريد انتدولچ و نولي لشغلنا
سمره :: ياااع شمالك ، تصيح نززتنا بعدين ياظهر اليوذن
و الساعة تسعة
اواب :: خو انتِ موجفـتلي مثل عظم الريس ، محد جا صوبج عيني
-هزت ايدها و اندارت تصب شكر للاستكانات ، هو خلى و راح
مدري حَسيت بسمره بدت تميل الـه او يمكن تتأثر بكلماته ،
من كل كلبي اندعيت الله يهديها عليه ،
گمنا ننقل الصحون للصالـة و تفاجئت بالبدوية كاعدة
و مترأسة السفرة و لا جن رايح گد عمرها و باب رزقها ، سابحة و متكشخة ، تسولف و تضحك والدنيـا زاهيتلها ، تجاهلتها وسلمت على الشيخ و سلم عليه بحفاوة ، باس راسي و طبطب على چتفي :
يعقوب :: هلا ،، هلا بالشيخـة مرت الشيخ
– لمعن عيوني بأفتخار ، حتى ما عرفت شنو ارد ، باوعت لغياث مبتسم فرحان اما البدوية تلاشت ابتسامتها الشفتها قبل شوي
و عيونها جدحت بغضب مكتوم ،
رحت كعدت بصفـه و عيوني ما نزلت منه ، چان مبين عليه تعبان و دا يتحامل على وَجعـه ، توقعت راح يلاحظون هالشي لكن خابت توقعاتي ، محد لاحظ تعب وَجهـه و لا حركتة البطيئة وهو يتناوش الاكل من الصحن و ملامحة الي تنكمش بين لحظة و لحظة ، انمرد گلبي عليه ، لعد شكد كابد بحياته و شگد تجرع مرارات و محد حسّ عليه ، و السبب لانه انسان يتحمل ، يحملونه اكثر و لانه ينوجع بصمت محد يسمع صدى معاناته ،
قاطع شرودي صوتـه وهو يخاطب عمـه مهران :
غياث :: عمي بلا أَمر عليك ، بلچن تودي ود لاهلها
-باوعلي مهران و رد عليه بأستغراب :
مهران :: سلامات ،، خما صاير بينكم شي ؟
غياث :: يسلم عمرك عمي ،، ما صاير شي بس جماعة مسلحة معترضة طريج ابوها امس رايدة تسلبه و متچاتل وياهم ، طايحة چيلة بچتفه و مصوبته
يعقوب :: لا حول و لا قوة الا بالله ،، و هسع شلونـه ابوچ
همست بحرج :: لا الحمدلله حالتـه مستقرة ، بس احنا نخاف لانو بي سُكر
قاطع حديثنا صوتها الي اجه بنبرة مستفزة ::
البدويـة :: و هو سليمان شعنده و الوادم تعترض دربه ،
يبوكون التمرات لو يسطون عالخشبات
فرقت شفايفي ردت أردحلها لكن غياث قاطعني :
غياث :: اسمـه ابو ود ، و عنده فلوس قيامة الله و هذا سبب كافي يخلي النفوس الضعيفة تترصدله
البدوية :: چا خوش الله يچثر خيره و يچفينه شره
– اجيت احجي ، لكنه عصر ايدي حيل ، باوعتله بعتب ، رمش وهز راسه بخفـه عود لخاطري سكتي
رمقها الشيخ بنظرة تحذيريـة خلّتها تلصم ، صاح موجـه كلامه اليه :
يعقوب :: الحمدلله على سلامته بنيتي ، الف لا باس و اذا محتاجين شي ما يردكم الا لسانكم
مهران :: و انتَ الصادك شيخ ، بنيتي ود ، احنا هم اهلچ شتحتاجون حاضرين
اواب :: حمدلله على سلامة ابوچ خيتي ، مايشوف شر
همست بخفوت :: تسلم ربي يحفظك
غياث :: كفو منكم يابـه
هارون :: حمدلله على سلامة الوالد و حنا اخوتچ هنا ، اي شي تحتاجونـه ركابنا سداده و ما نكصر ان شاء الله
غياث :: مامنك كصور عضيد
– تشكرت منهم بصوت خافت ، لطفهم و اخلاقهم خلّتني ما الكى رد مناسب ، حسيت برغبة انه ابجي من الفرحة هلكد ما شعرت بالاهتمام منهم و كأني فرد حقيقي من هذهِ العائلة ، قاطع شرودي صوتـه و هو يخاطب جده :
غياث :: اي شيخي شصار على سالفة هيثم كون انحلت على خَير ؟
يعقوب :: والله شگلك ابن عمك داكله دگة ناقصـة طلعت البت المتحارش بيها على ذمة رجال و هي موصله حجايته لاهلها
ورجلها و حالفين يمين يچتلونه عبنّه موش اول نوبه يتعرضلّهه ، حولنا عليهم و الناس طلعوا اجاويد صاحبين حظ و بخت ، قدروا جيتنا و طيحوا الفصل جوه الفرشه شرط ابنا بعد ما يدش لبغداد و يترك حتى دوامه و ان شافوه لو لمحوا خياله يحطون جيلة براسة و يچتلوه
غياث :: والله ما طلبوا الا حكهم ، هالزلمة لشوكت يظل مهرفل هشكل و عينه وصخة عالنسوان
اواب :: و انت الصادك يخوي ، آنه هم من شفته مزورك بگلبي گلت حرامات لو مچسرينة بعد
مهران :: ليش يفيد ؟ ،، صابر رخالة الحبل و خلاه يتفوسد
و يشوف رويحته عالوادم ، هذا غياث موش درس بالولاية
و خلصاله فترة عايش هناك شو ما اتفرعن هيچ علينا
يعقوب :: لا الحك ما يزعل ،، و ابنا غلطان من ساسه لراسه ، هل رديته للديرة و راح احاجي ابوه يشوفله مرة يزوجـه بلچن يعقل و يستچن
ضحك غياث بسخرية و صاح ::
غياث :: ابو طبع اسأل على سلامته ، و الله حرام تظلمون الحرمة التجيبونها اله ، اذا هو ما فلح بدراسه لو شغل تردونه يفلح بزواج ؟
يعقوب :: غصباً عنه يفلح زلمة طول بعرض شمتاني ، انه راح اشوفن دبره وياه
-بالبداية ما فهمت الحديث ، لكن اتضح فيما بعد ان المقصود هو اخو احلام الي يدرس ببغداد و الواضح مسويلة مكسورة ويا بنية تدرس وياه و الظاهر جايبينه و جايين للديرة ، قاطع شرودي صوت عمه :
مهران :: ها بنتي كملتي ، حتى نروح ما زال الوكت طيب ؟
-هزيت راسي بقبول ، و تذكرت علاجي بقى بالجنطة ، صحت :
بس اجيب جنطتي من فوك ، صدت عيني بعين غياث لكيته رافع حاجبة اعرف غثته سالفة الجنطة ، صعدت بسرعـة اخذتها و نزلت اركض تلاكيت وياه بنهاية الدرج ، قطع الطريق عني ، همس بتوعد :
غياث :: بيتـه ماكو ، بليل اجيج اخابرج تطلعيلي بالباب
– واذا اجيت و ما طلعتلك شراح تسوي ؟
صفن بوجهي ثواني ، رد :
غياث :: لا ابوچ و لا حراسـه يخلصوج مني ، اطلعلج من جوه الكاع و اردج وياي
– ديربالك على نفسك ، مشيت و جذبني حيل من الجنطة انداريت اباوعله مستغربة ، باس كصتي حيل و بلهجة تهديد گال :
غياث :: بليل تردددين !
– بوسته خلّتني اتصنم بمكاني ، اضطربت و أَحس العالم دَيدور بيـه ، قلبي يخفق بقوة ومغص لذيذ اصاب معدتي ،، باوعتله ، واكف مبتسم بخبث ، ايده بجيوبه ونظرة انتصار تسلّطت على محياه مثل الي ديكولي : شوفي الشروكي شلون من يعشگ شلون يخطط و يقاتل و يغتنم !
اجـه صوتـه العابث ، رجعني لوعيي :
غياث :: شمالچ جمدتي ، يلا يابه متانيج برا
– غمزلي و شعل بيه نار ، مشيت من يمـه و آني اتوعدله بگلبي
سهلة ، دا تشتغلني مو ؟ الا اراويك
صعدت ويه مهران ، و طول الطريق يحجي وياي و يواسيني
بأمثال و قصص عن الصبر عن ابتلاءات الدنيا و مصايبها لكني مجنت وياه بذهني ، فقد جسدي جالس بالسيارة ، عقلي و حواسي كلهن ظلن يمـه ، اسأل روحي من بعد كل هالسنين الما مرني العشك بيها شلون عشكته ؟
اكره هذا الضعف ، اكره كوني كتاب مكشوف گدامه و دا يستمتع بقرائتي و استكشافي على مهل ، اكره فكرة آنه اسرني
و اخذ كل تفكيري و اجتاح حياتي بهالشكل !
مهران :: وصلنـا عمي ، انزلي و آنه اجيبن جنطتج
– تمام عمو ، مشكور مقدماً
مهران :: العفو يابه ، شمسوي
– نزلت من السيارة و عيني تعلّكت على بيتنا ، احسّ بشعور غريب ما يتفسر ، ما ادري افرح لان مسيرة على بيتنه لو احزن لان هذا البيت خيب ظني مرتين سابقاً ؟
لكيت بس واحد من الحُراس ، لا جلال و لا خنجر موجودين ، بس شافني فتحلنا الباب و فتت و بدخلتي شفت كفاية واكفـة بنص الطارمـة و مسطرة كم سلاح رشاش على الارض و جاي تفصخ بيهم ، صحت بأستغراب :
شدسووين كفاية ؟
جفلت و رفعت السلاح بوجهي رأساً ، اجزاء من الثانية حتى استوعبت و نزلت سلاحها بتك ايد و الايد اللخ غَطت عيونها
من الشمس ، صاحت :
كفاية :: هلااا يمه ودة
– ايدي على گلبي ، اتنفس سريع ، صحت :
انتِ خليتي بيها يمه ، زوعتيني العافية !
اجـه صوت مهران وراية ممازح :
مهران :: حيي الله التفاكة بويـه !
-ذبت السلاح عالارض و صاحت :
كفاية :: حي الله اصلك ابو فاطمة خوية ، هلا بيكم نورتونا
اقتربنا كلش و القينا التحية و هي ردت بصوت ممزوج بخجل ، شكلها ما متوقعة يجي احد ويايه حسيتها ارتبكت بس سيطرت عالوضع ، دخلتنا للديوانية و جانوا خالين سرير مال مرضى و ابويـه ممدد عليها ، انخمش گلبي و عيوني انفتحن شلالات من الدموع :
قرفصت بمستوى السرير ، و باوعتله جان وجهه تعبان ،
والتجاعيد ظاهرة منطيته عمر أكبر من عُمره ، نحلان و مبين متأذي ، حطيت راسي بمستوى بطنـه و ظليت اشهك ، حَسيت بلمسـة خَفيفـه على راسي و صوت ثقيل خرج بنبرة نادمـه :
سليمان :: لا تبچين بويـه ،، آنـه زين ما بيه شي
مهران :: الحمدلله عالسلامـه يبو ود ، ما يجيسك شر ان شاء الله
سليمان :: الله يسلمك يخوي ، سهلة بالريش
رفعت راسي الـه ، اتمنى اكدر اواسيه و اخفف عنـه ، حسيت نفسي محرجة ، استحيت امد ايدي و أَحتضن چف ايده استحيت ادنك وابوس جبينـه ، بس دموعي تجري و بهذه اللحظة الدموع ابلغ من كل الكلام ، همست بتكلف :
-متشوف شر حجي
غمض عيونـه بأمتنان ،
سليمان :: عسا لايصيبج شر جوهرتي
-ارتجفن شفايفي بأبتسامـة مُزيفة .
كفاية :: تفضل خويـة ليش واكف !
-انداريت لكيتها شايلة صينية بيها عصائر ، حتى ما انتبهت شوكت راحت جابتهم من المطبخ ، كعدنا كلنا محاوطين ابويه
الي جان يجاهد حتى يسند نفسه و يكعد ، اخر شي كام مهران ساعده عالنهوض و حطله مخدتين ورا ظهره ، بگلبي اندعي لمهران گدما زلمة معدل و گلبه طيب.
لحظات معدودة تبادلنا بيها احاديث رَسمية و ما تطرقنا للحادث بشكل عميق بأستثناء سؤال مهران عما اذا كمشوا الي سووها لو بعد و جان جواب ابويـه دبلوماسي
سليمان :: قدمنـا شكوى و متانين القانون ياخذ مجراه
ضيقْت عيوني عليه و كأني اكوله علينا سليمان افندي
لولا نبهتني كفاية وهي تعض بشفتها و تأشرلي عود عيب منا ضيوف ،
سليمان :: شمتانيات روحن زهبن الغدا ،
مهران :: لا خويـه انتَ مريض و صوابك ثچيل ، رحم الله من زار و خفف
كفاية :: لا خويـه هاي ما مرجيـه منك اول دشتك علينا و وكت غدا و ما تتغدا
صفن ثواني ، مثل الي تذكر شيء و رد بوقار وهو يحط ايده على صدره :
مهران :: غداج وصل يا بنت الاجاويد ، حنا اهل ما بينا هالامور
اني فاتحة حلكي عليهم شديحجون و تذكرت سبحان الله حجه نفس كلامها من اجتي ذاك اليوم ، شنو صدفة لو بسمار ، افتر دماغي ؟
مهران :: آنه ارفع الزحمة يخوي و هاي جدام بنتك ، اي شي تحتاج لا تفكر ركابنا و زلمنه سداده
سليمان :: كفو منك يالمعدّل ما تكصر
-ترخص و مشى و طلعنا وراه آني و كفاية ، صحت وراه :
عمو مهران ممكن طلب عفية ؟
اندار و رد بـأبتسامة ،
مهران :: گولي يبعد عمچ ؟
-اريد ابات هالليلة ، ممكن تحجي ويا غَياث ما يجي ياخذني
ابتسم و هتف:
مهران :: بووووية شيورطني وياه ؟
ضحكت و رديت بخفوت :
-هو يحبك و يسمع منك ، عفية مشتاقه لعمتي و صار هواي ما جايـه
رفـع عينـه للي واكفـه ورايه ، صفن شويـه ورد :
مهران :: صار بويـه انه احاجيـه ، و كولي لعميمتج خلي اتاني الشمس تنزل و تطلع تنظفهن ، حارة و هوا شرجي مازين عليها
-انداريت الها ، رأساً دنكت ، رجعت باوعتله بأستغراب ،
و راودت عقلي فكرة غريبه ، همست بخفوت :
صار اكللها ان شاء الله
مهران :: يلا في امان الله
-مع السلامة ، رحت تخوصرت يمها و همست ممازحة :
عيني يكولون هوا شرجي و شمس حارة موزين عليج ، نظفي سلاحج العصر !
شالت راسها مغطيه عيونها بكف ايديها من الشمس :
كفاية :: و شمالج تحجين هَيچ ولچ ، اكفي عدل لا اكوم انيم التفكه براسچ
لويت شفايفي و باوعتلها بنص عين
استقامت و جرتني بحضن قوي ، تبوس بيه و تضحك
كفاية :: دَهر فرچ شگد مشتاگتلج !
دخلنا سوا للبيت ، هسه يلا حسيت نفسي مفتقده بيتنا رغم اللحظات القليلة الي عشتها هنا ، ابويـه تغده ، اخذ دواه و نام
و بقينا آني وياها نتبادل الاحاديث ، سألتها عن خنجر و جلال
كفاية :: بالمشتمل اليم البستان ، من شوي وديتلهم الغده بيد سعد
بعبوس تساءلت :
– سعد هذا منو ؟
كفاية :: الوليد الصغير الجان واكف بالباب
تنهدت و همست :
– حيل صغير هذا كفاية ، شنو هاي العالم بزعانة من جهالها
زين ابويـه لشوكت يستغلهم هيج
كفاية :: ليش ما تكولين مسويلهم سبوبة عيشة ، الوادم ما لاكية تاكل و ابوج ديشغلهم عايشين و معيشين عوائلهم
-وتعتبرين هذا شغل ، هاي نار و بأي لحظة يموتون !
كفاية :: سعد ماله غرض بشغل ابوج ، شغيلته بس يحرس بالباب
– آني داحجي بصورة عامـة ، الشغل هذا مو خوش و ديودي ارواح عالم للتهلكة ، كل من هبّ و دب صار يشيل سلاح و أقل مشكلة صار المراشك بفلس منو يروح بيها غير المساكين ،
فجأة خطرت على بالي بنين و نزلت دمعتي ، همست :
بنين مثلاً ،، بسبب منو راحت مو بطلقة تايهة من ولد اخوج
كفاية :: كلامج عدل يمـه بس ما راح يغير شي ، ابوج تعلم على هذا الكار ضيع نفسه و جاي يضيعنا وياه
-مسحت عيوني و تساءلت :
و هسه خنجر و جلال شلونهم ؟
كفاية :: شلونهم ، مجسرين تچسر ، المگوار الله يهديه كاضي بيهم التوبه ، بس خنيجر يگول انه هم طحتله وين التوجعة
رديت بأنفعال واضح :
– هم الهم عين يحجون و هم رايحين بهالشغلة العوجة !
كفاية :: و انتِ شمالج جاية حامية علينا ، شني تشتغلين عد الحكومة وما نعرف ؟
– لا مو مسألة حاميه بس موقفي حدي تجاه هذا الامر ، عموماً خما عدهم اصابة خطرة ؟
كفاية :: لا بالريش رضوض على فشخات
-ضحكت بأستهزاء :
لا ابد ما بيهم شيء
قلصت عيونها بعدم رضا
كفاية :: زلامنا متعوده عالكونات يطكون و ينطكون چا شلون ينرم عظمهم ؟
– اتركينا منهم هسه و كوليلي ولد اخوج شخبارهم ، شوكت يطلعون ؟
كفاية :: المحامي يگول ماظل شي و يطلعون ، و حجي ابيناتنا خايفة منهم و من طلعتهم
بأستغراب رَديت :
– خايفـة ، ليش خايفة مو انحلت سالفتهم
كفاية :: اسمعي مني بس ما اريدن الكلام يوصل ، هذا شهيب شال روحـه و دَكها من سمع بيهم خذوج ….
-ابتسمت بألم :
كمليها و لا تستحين من خذوني فصلية !
حطت ايديها على حلكي و بندم صاحت :
كفاية :: لا حبوبـة لا ! و روح ابوي طلعت بالغلط ، انت مو فصلية رحتي عروس معززة مكرمة
-زفرت انفاسي بتعب :
لا يظل ابالچ شلون ما رحت رحت بعد !
كفاية :: اهيس حالج مو تمام ، و چثير حجي بعيونج سولفيلي شلونه وضعج و شلونه زلمتج وياج ؟
-تنهدت بـحيرة و خوف من المجهول ، حسيت محتاجة افضفض رحت اتقيأ كل مخاوفي گدامها :
آني مريضة كفاية ، مريضـة كلش و علّتي الظاهر مالها علاج
باوعتلي بفزع و عيونها تتفحص كل شبر بيه ،
كفاية :: يمه اسم الله الزهرة ،، احجيلي يبعد چبدي شمالج شيوجعج ، شني علّة يا ساتر ؟
– العلّة بعقلي كفاية ، صايرة اتخيل شغلات مدري موجودة مدري لا ، احلامي كوابيس هاي اذا ما جانت احلام يقضة
و الدوة الچنت اخذة اي فايده مابي يضر ما يُمر !
كفاية :: دخيلك يالعباس اخافن بيچ تابعة يو شي ؟
-تابعة شنو ؟
كفاية :: سولفيلي شتشوفين ؟
-سولفتلها كل تخيلاتي و كوابيسي ، ظلت تباوعلي محتارة تضرب اخماس بأسداس
كفاية :: والله شگلّج ،، اعراضج هاي مال تابعه ، تخليني اوديج
لبيت سيد **** هذا رجال بخيت واذا چان عندج تابعة يعرف يخلصج منها
هزيت راسي برفض :
لا ،، المسألة مو مسألة تابعة ، اعرف هاي هلوسة و هاي اعراض متقدمة من المرض
كفاية :: جـا شمتانية ما تگلين لزلمتج خل يشوفلج دكتور يو يوديج لدكتورج ببغداد ؟
– هو اريد اكوله ، بس ماكو فرصة ، وهم علاقتنا …..
عكدت حواجبها بأستفهام :
كفاية :: شمالها علاقتكم لا دكليلي بعدكم ما …..
هزيت راسي بـأي محرجة
ضربت صدرها و نشغت :
كفاية :: شلوووون ،، هاي بعدج لحد هساع مانعته منج
– ما اكدر اخطي هيچ خطوة ،، افهميني !
كفاية :: شنهي لهسه ما رايدته ؟ مالچ نفس بي ؟
– مو مسألة نفس و غيرها ،، بس اهله
ضربت راسها و صاحت بقلّة صبر :
كفاية :: يا طلابه اهله الما تفض !
– شسالفة كفاية ،، ليش متفهين الامور لهذا الحد ، بعدين مو على اساس ابويه ما يبقيني عدهم و متاني عزيز يصحى اشو داشوفج مستقتله حتى يتم زواجي ؟؟
فلت وجهه و ارتبكت :
كفاية :: هاااه ،،. لا حبوبـه لا مستقتله ولا شي بس اشوفنج صرتي تميلين الـه و هو هم مبين رايدج گلت بلچن الله
و تستقرين احسن من شلّة الحال وسالفة الماضي التودي
و تجيب بيچ
ابتسمت بمرارة و اعقبت :
– شفتي رجعتي تفهين الماضي ،، و كأن الصار بي مجرد حدث عرضي ، انسانه على الهامش ماتت و اندفنت ، انتِ مستوعبـه الي ديصير بيه ؟ مستوعبة شلون وكعت وكعـة ؟ اني حبيته كفايه ،، تعرفين شنو يعني حبيته ، حبيت رجال من نسل الي كتلوا امي ، حبيت الرجال الي جنت اشوفه كابوسي واشوف امـه جحيمي بالحياة ، المشكلة بديت اضعف بديت انجذبله
وخايفـة من نهاية هذا الطريق !
كفاية :: يايمـه لا تسوين بروحج هيج ، ربج چريم و يزرع المحبة من بعد كره شمدريج شضاملج ويه هالزلمة يجوز يعوضج بدل الضيم الشفتيه .
انتفضت و وكفت گدامها اتكلم برجيف :
يعوضني ؟! شكد يريد يعوض سنة سنتين عشرة ذني 18 سنة
بعدين متخيله كسرتي بعيون البدوية لو ابنها اخذني ؟
لا و احتمال يردوني اجيبلهم جهال حتى تصير ذروة انتصارها هاي ،
كامت اخذت بأيدي و جَرتني لحضنها ، صرخت ما اعرف شأريد
بس اعرف تمام المعرفـة اني حبيته و مستحيل اكدر اتلاحك لگلبي بعد ، بـچيت وآني اعلن اول انهزامي بهالمعركة ، وصرحت بخسارتي امامها :
احبـه كفاية ، احبـه كلش
كفاية :: بسّج يمـه ، ذكري الله ما تعرفين حكمة ربچ و مدام حبيتيه يعني خوش زلمة و گدر يسكي عروك گلبچ اليبسن بالحقد و الغل مال سعاد و اخيها ، گولي يا الله و انطي لروحج فرصة بلچن تنسعدين وياه ،
مرت ساعات ما حسيت على الوقت ، آني نايمه بحضنها فتحت شعري و صارت تفليلي ، و تسولفلي على اجدادي وحكايات من نساء العشيرة و امثله بالصبر و الايثار ، فجأة خطرلي اسألها سؤال :
– رجلج المرحوم خذتيه عن حُب لو زواج تقليدي ؟
احمرن خدودها بأستيحاء و اجـه جوابها بصوت يرتجف خجلاً
كفايـة :: يا حبوبة وين شفته و حبيته ، امه شافتني و عجبتها وخطبتني الـه و الشاهد اله طلع خوش ازلمة سبع و اخو خيته بس الله يرحمه جان يابس وياي ،
– شلون يعني ؟
كفاية :: اكصد بالكلام و التعامل شلون افهمنچ
-قصدج ما عنده اهتمام و رومانسيات و غزل ؟
ضحكت و غطت وجهها ..
كرصت خدها و غمزت :
فديت الخجووولة !
كفاية :: يسمونا حيا يالمفلوكة
بعدني بحضنها و رنّ تلفوني بلا ما اشوفة توقعته غَياث
رفعت خط ، هي تركتني و طلعت :
– الوو
غياث :: أطلعيلي
– هااه ؟
غياث :: هو شني الهاااه ، جاي اكلچ اطلعيلي آنه متانيچ بالباب
– بس ،، آني وَصيت عمك يگلك اريد ابقى
غياث:: ااي گالي و آنه مارضيت ،، متانيج يلا لا تبطين
دمعت عيوني و صحت :
– شسالفة غَياث ،، گتلك بس هالليلة حتى بعدني ما متعشية
غياث :: آحد گالج ما عدنا عشا بويـه ، يلا ود
-زين انطيني صبر ، الملم غراضي اشوف ابويـه و اسلم عليه
غياث :: تمام متانيج
– شنو متنزل تسلم عليه؟
غياث :: ود ،، ما بيني و بينج شي و بين اهلچ شي ثاني
دَمعت عيوني ، عرفت قصدة سالفة الثار و حقه ما الومـه اول
و تالي خسر بنته بسبب شغل ابويه و تهور ولد عمي !
سديت الخط و گمت الملم بأشيائي و الدمعة بعيني ، گوة جاي اتقبل هذه الوضع اني وين جنت براحتي و هسه وين ، احس بديت اختنك من حياتي ، و صرت احن لبغداد و عيشتي قبل
تعوذت من الشيطان ، لبست و نزلت لگيت كفاية منتظره
وكأنها تعرف راح يجي ياخذني الظاهر فاهمة وضعي أكثر مني
رحت لابويـه لگيته كاعد ، سألته :
– شلون صرت ؟
هز راسـه و همس :
سليمان :: احسن الحمدلله
-تقربت منه و تشجعت اكله كلام جنت اخاف احجيه :
بابا اتمنى تترك هذا الشغل ، راح يوديك و يودينا للتهلكة
خزرني و رد بعبوس :
سليمان :: لا تتدخلين بشغلات اكبر منج !
– هاي الشغلات راحت ناس ابرياء بسببها ، بنين ماتت و آني فصالة و خنجر و جلال جان ماتوا ، حتى انت جان متت !
سليمان :: امشي ولي ويه زلمتج و مالچ غرض بيه
-بچيت گدامـه بضعف و استنجدت بي :
الله يخليك كافي ، كون اب حقيقي ولو مرة بحياتك
ابتسم بسخرية و رد :
سليمان :: انه كلشي ماعرف اصيرن غير سليمان ، لا گدرت اصير صاحب بي حظ و لا زوج زين و لا ابو كفو ، الله خلقني هيج و لله في خلقه شؤون !
– شفت الكلام ضايع وياه ، تركته ومشيت لحكتني كفاية
و جرتني لحضنها
كفاية :: انه ما اعوفنج ،، و رح انشد السيد بلچن ياخذلج خيرة و يعرف شبيج
– هزيت راسي بيأس :
الله كريم كفايـه الله كريم !
كفاية :: هاج اخذي هاي العليجة سويتهن الج
– فتحت الكيس و باوعت ملابس سود ، شلت راسي و تساءلت :
شنو ذني ؟
كفاية :: دشاديش سود خيطتهن الچ ، عبن اعرف ذوقج صعب سويتهن نازكات ، محرم بعدله اسبوع و احنا هنا نلبس اسود
هزيت راسي بأمتنان و تشكرت منها ، بوستها وطلعت لكيته متانيني بالسيارة و يجر دخان ، صعدت يمه لا سلمت و لاهو حجه ، شغل سيارته و انطلق للبيت ،
نزلت و ركعت الباب حيل ، تعبيراً عن حالة الغضب الي آني بيها ، دخلت ما لكيت احد بالمطبخ ، بوجهي صعدت فوك
ذبيت صايتي و حجابي ، دخل هو شايل غراضي يباوعلي
سد الباب برجلـه و راح خلاهن عالسرير ، توجه عليه وكف گدامي يحجي بنبرة باردة :
غياث :: نورتي بيتچ ست
– منور بيك استاذ ، كون ارتاحيت لمن سحلتني بهالليل لهنا ؟
ضحك من گتله هيج ،
غياث :: هاي تسمينها سحلـة ؟
– لعد شيسمونها ؟
اقترب و تبدلت نظرته ، امتدت ايده و جر المشبك مال شعري ، نزل گله ، هز راسـه و همس :
غياث :: فاتحـة الكصيبة ؟
-كفاية مشطت لي و …
قاطعني بحدة :
غياث :: محد يمشطه غَيري ،، و لا تفلين شعرچ گدام خلك الله ، العين حق و الحسد مذكور بالقرآن
– هاي عمتي
غياث :: لو ابوچ هم ما تخلينه يلزمـه
– ها يعني ملكية بأسمك ؟
بثانيـة خطف خصري وصرت بحضنه ، يهمس ببحـة ذوبتني :
غياث :: گلچ ملك صرف بأسمي
– من نظرة عيونـه عرفت على شنو ناوي ، خُفت من هذهِ الرغبة المجنونة و ادركت اذا ما اخلص نفسي بهذهِ اللحظة راح يهزمني ويمكن للابد
امسكت بذراعـه احاول انتزع روحي منه و همست بشفاة مرتجفـة : زين ممكن تتركني هسه ؟
غياث :: لشوكت ،، گليلي لشوكت تظلين تكابرين
– ششنو مدا افهم قصدك ؟
غياث :: فاهمتني و داعت الدا ، و فاهمة شرايد هسه منچ مثل ما آنه فاهم شجاي يصير بيچ هسه و انتِ بحضني
-غلطان ،، مدا يصير بيـه شي، و وخر عني
غياث :: و رجفتچ هاي ، دگات گلبچ المسموعـة و عيونج الذابت على وَجهي والچلمة الواكفـة بطرف شفايفج گوليها و اعوفنج وعد مني .
-افالت منـه ما اكدر ، مثبتني بأحكام بحضنـه بأحكام ، مثل واحد وكع بمأزق عاجز يطلع منـه وين اولي بروحي برجفتي بنظرات عيوني الفضحني يمـه
ابتسملي بمكر واثق من نفسـه و همس:
غياث :: الصياد نومتـه خفيفه و يهيس على دبيب النمل لو تمشى على جسمه موش عاد حوريـة انچفت بشعرها الطويل عليه و …..
اتسعت عيوني و شهكت ، بداخلي العن بروحي يعني جان كاعد لا ارادياً حطيت ايدي على حلگة مانعته يكمل و على اساس اذا ما كمل راح ينسى السالفه السويتها !
نزلت دمعتي محروجـة و رحت اتوسل بي يتركني :
غياث :: كوليها و اعوفنج
باوعت بعيونـه بقلّة حيلة ، رخى قبضته مني ، انزلقت من بين ايديـه ردت اشرد لكن جان اله رأي آخر ، امسك بأيدي ورجعني اله ماحسيت غير بشفايفي تذوب داخل شفايفه ، شعرت ان الارض وكفت و بس آحنا ندور حواليها ، جان سريع و جامح بإيقاعـه على عكس تباطئ نبضات قلبي ، طايفـه بالهوا وايده بس الي مثبتتني ، گلبي يخفق بقوة وأَحاسيس جمه خالجتني ، ضعف ، هزيمة ندم و رغبة ماكدرت اجاريه چان يسبقني بسنين ضوئية لان جان يعرف شنو يريد على عكسي فجنت انطحن ما بين عقل رافض و قلب مؤيد ، تجرأت لمساتـه
و صرح بنواياه بكل وضوح :
غياث :: مشتاكلج ،، اريدج ابقي وياي و لا تروحين لبعيد
– راحت ايده تتجول براحة و تحاول تجردني من ملابسي ، اندمجت وياه ، لولا اجـه صوت عقلي و كأنه يكولي :
غبية ،، ارجعي لوعيك وين وعدك و ين شعاراتك الرنّانة بالانتقام ، هسهسات تتلاطم براسي مثل صوت الضمير الحي
لكيتني ادفعـه و اصيح :
عوفنييي ،، ما اكدر !
توقف كلشي ، الارض رجعت تدور و احنا كلمن رجع لمكانه
وكف يباوعلي بخيبه او صدمـة ما كدرت اميز نظرته ساعتها
كل الي ردت اسويه الملم نفسي ، ملابسي مشاعري الفاضت
وانفضحت قبل شوية گدامـه !
مرر ايده يرتب شعره ، يتنفس سريع وعيونـه لمعن بغضب عارم
غياث :: ارتاحيتي ،، وصلتي للشي الي تريدينه ؟
هزيت راسي بعدم فهم ، بس دموعي تنزل
غياث :: نفذتي وعدج الي لو بعد احجييي ؟!
– طلكني غياث ،، آني وياك ما النه قسمة غلط زواجنا
ضحك بسخرية و حقد عظيم ارتسم على محياه :
غياث :: طلاك ما اطلك ،، بس وعد مني بعد ما اتدنالج لو تظلين بس انتِ مرة بالكون !
– اخذ منشفه وملابس و طلع ، دفنت وجهي بالمخده
وصرخت و الصراخ تحول لشهقات ، ما اعرف شگد مر وقت و لا شگد بچيت ، و لاحتى شلون نمت ، بس فتحت عيوني جانت ظلمـه كلش واصابع خشنه تتلمس بجسمي ، ثوبي نرفع فوق فخذي ، عگدت حواجبي و بديت اصحى معقولـة هو ؟
مديت ايدي احاول اوخره بس ماكو شي اكدر المسـه ، انداريت بتململ و اهمس : گتلك عوفنيي و اذا بيها نفس المرأة القبيحة تحتضن جسمي بطريقة مقززة ، طلعت صرخـة مجروحـة من زردومي و بعدها انخرست وعيوني انفتحت على وسعها كأن اكو شي علق بداخل حنجرتي ، ارافس برجليه اريد هوا ،جانت لحظات اشبه بالموت حتى صار گدامي وجهه المرعوب و هو يضرب على خدي بقوة
غياث :: اصحييي ،، اسم الله بويه شبيييج ؟
رفع جسمي و صار يضرب على ظهري و يرجع يفرك صدري
الى ان بدأ يجيني الهوا على شكل دفعات شحيحة ، اشهك بقوة و اسأله عنها : وووين راحت ؟
اتلفت و ادور عليها ، هو يباوعلي مصدوم
غياث :: هي منيه ؟ يابه ترى مكوبسه انتِ
اهز راسي بعنف و احلفله بأني حسيت حتى بلمساتها ، وعيونه تباوعلي بشك دمرتني ، سألته :
انت الي جنت تمرر ايدك على جسمي ، انتَ الي رفعت ثوبي ؟
غياث :: كفيلج العباس چنت نايم ، انه وعدتج ما ادنالج هذا عقلج الباطن يصورلچ هالاحلام !
– ضميت وجهي بين اديـه ابجي واحجي سوه :
تعبت وديني لبغداد ،، اريد اروح لدكتوري هو يعرف حالتي
غياث :: صار ، اوديج بس مو هسه تانيني الما تخلص العشرة
– وديني هاي الايام
غياث :: هالايام راسي ما احكـه ، لازم احضر للمواكب وللاعمال
بس لا تضوجين وعد مني اوديج
هزيت راسي بقلّة حيلة ، حاوط اكتافي و رجعني للفراش
و غطاني ، همس ممازح :
غياث :: نامي و آنه راح اطلع ادخن برا ، اريدن بت امها التوصلّج
– انتَ ممصدگني ؟
غياث :: نامي ود ،، ربچ يحلّها
***
– من بعد هذهِ الليلة كلش التهى عني انشغل بالتحضيرات لشهر محرم الي صار على الابواب الولد التهوا عدهم موكب طبخ للزوار و موكب زنچيل ، ماشفته طول هذهِ الايام بالنهار شغل و بليل حتى من عنده وقت فراغ يقضيه ويا الولد جوه بالديوانية او يروح لسعدية او يطلعله شغله من جوه الكاع
ويكضي الوقت بيها ، و قت النوم ينتظرني انام يلا يدخل للغرفـة و الصبح الكاه كاعد قبلي مصلي و نازل جوه يتمرن
او يم جده ، افتقده كلش ، افتقدت وجوده و صوته و غزله ، حسيت بالجوع لاهتمامه ، بس هو قرر يبتعد و آني احترمت قراره ،
الى ان دَخلنـه اخيراً بشهر محرم وكأنـه دخلنـا بعالم من ثاني من الحزن السرمدي الهوا مشبع برائحة البخور وأصوات المراثي الحسينية الي تتردد من بعيد، و كأن الديرة تتنفس الحزن ، جانت الأضوية الخافتة تنعكس على واجهات الحسينيات، وأصوات تلاوة القرآن الكريم تملأ الأجواء، ممزوجة بقصائد حسينية تحاكي واقعة الطف وشهادة الإمام الحسين عليهِ السلام ،
تحولت الديرة إلى گلب ينبض بالذكرى والوفاء ، مواكب العزاء تسير في الشوارع الرئيسية ، رجال ونساء واطفال لابسين السواد، و يرددون الاناشيد بأصوات تخترق القلب ، الرايات الحمر والسود ترفرف بالهوا ، تحمل كلمات الحزن والتضامن ؛ كل خطوة في الموكب چانت تعبير عن رفض الظلم، عن تمسك بمبادئ الحسين الي ما تموت.
اما بالحسينيات القريبة، جانت المجالس تقرأ المقتل الحسيني، و الخطباء تروي بصوت مخنوك قصة الشهادة ، الكلمات جانت تتساقط مثل الدموع ، تحجي قصة تضحية وصمود ، حتى البيوت هنا تتحول إلى فضاءات للعزاء، يجتمعون الأهالي لتلاوة القرآن وإلقاء القصائد الي تحمل بطياتها الألم والفخر ، هنا ما نحيي عاشوراء وبس ، هنا نعيشه بكل تفاصيله ،
الشوارع مزدحمة ، الأهالي يوزعون الاكل والشرب على الزوار ، ريحة القيمة و الهريسة ماليه الأجواء، و الچاي العراقي يُنقل بحب وكرم إلى المعزين المتعنين من مكان بعيد ، بديرتنا نتقاسم الاكل مثل ما نتقاسم الحزن و كأننا عائلة موحدة بهذا المصاب ،
ببعض الاماكن يسوون تشابيه تصوّرلنا مشاهد من واقعة الطف و وياهم شعراء شباب يتغنون بقيم الحسين مثل العدل، الحرية، ورفض الاضطهاد و هاي مو طقوس وثنية مثلما يدعي البعض هذه تذكير بأن الحسين ليس مجرد تاريخ بل فكرة حية ما تموت ،
و على عكس الهدوء الي يصاحب فترة الليل ؛ بهذا الشهر تزايدت الحركة الشعبية بالديرة و الشوارع الي چانت هادئة بالايام العادية، صارت تعج بالحياة، و الاصوات ، بالوجوه الي تحمل تعابير الشجن ، مدينتنا بمحرم مو مجرد ديرة ، لا تصير مسرح إنساني يروي قصة خالدة ، هنا، نرفض الظلم بكل خطوة، بكل كلمة، بكل دمعة و بكل مفهوم .
جنت واكفة بالسطح و صافنـة بالسما ، جانت مضوية بنجومها و لثواني تخيلت كل نجمة تحمل روح شهيد من شهدائنا الابرار ، تأثرت و نزلت دمعتي قريت الفاتحة وهديتها لأموات المسلمين و المسلمات و على روح امي و بنين ،
واندعيت لنفسي بكل حرقة گلب بأن اشفى من هذا المرض الي افتك بكل خلية من خلايا عقلي و خلاني ما اميز الحقيقة من الخيال ، مسحت دموعي و نزلت ، چان البيت مكتظ ، ليلة العاشر حجة و مسوين مجلس عزاء و طبخ برا و احنا النساء جوه ، نتبادل قصص اهل البيت و ذكر الفاجعة و كلما يشتد الحزن يبدي اللطم و النوح و حتى الاطفال يبچون بصمت مؤثر و كأنهم يفهمون وقع هذه الليلة في النفوس ، ابلغ ما يوصف هذهِ الليلة بأنها ليلة الندم و الألم ، العبرة و اليقضة ، الرجوع الى النفس و الزهد عن مغريات هذهِ الدنيا ، حتى حزنك الي تشوفة عظيم راح يصغر و يتلاشى و يختفي امام فجيعة هذا اليوم ، هذا اليوم يستشهد فيهِ سبط الرسول و يقتل اصحابهِ و تسبى نساء بيتهِ ، بهذا اليوم يموت الطفل عطشان و الاخو مكسور الفؤاد و الابن عريس ، بهذا اليوم تموت الارواح الطاهرة لتحيا الكلمة و تدرء الفتنة و تُرفع رايـة الاسلام ، هذا اليوم الي بقى عايش بأعماقنا عبر السنين و راح يبقى ،
وسط هذا الزُحام و الأنين الصادر من اعماق قلوب الحاضرين لفتني صوتـه القادم من الطابق الفوك ، صار كم يوم مشايفته التهى ما بين الزيارة و بين تحضيرات الموكب مالته ، تركت كل شي من بين ايديـه و قبل لا اصعد استوقفتني ايدها :
سمره :: عوفي متعود كل ليلة عاشر يختلي بروحـه
و ضيمه و السنة هاي انتِ زيدتي ضيمـه
-حررت ايدي بنترة منها و همست بتعب :
آني مو أي احد ، و مرة لخ اذا لزمتيني هيچ اكسر ايدج
تركتها مصدومة وصعدت اذا بغرفة من الغُرف المقفولة صوتـه جاي من عدها ، اخذتني رجليه اله ، فتحت الباب بمقدار قليل ، ما گدرت افوت من شفته شلون كاعد مهدول الاكتاف بدشداشته السوده و لاف شماغ اسود ، ينشد حسينية لباسم الكربلائي بصوت يمزق الگلب بقيت استمع و أبچي بصمت صامة حلگي بقوة الى ان انهاريت بهذا المقطع تحديداً و مدري ليش صورلي معاناته :
غياث :: إذا ما ينذبح ابني على صدري
صعب ترسم احساسك قافية شعري،،
إذا ما ينكسر عالمشرعه ظهري،،
أسولف عالأخوه و آني ما أدري ،،
مته ما خيامي…يسعرن أمامي
أحس شنهو اليعذبك ،،
أريد أعطش و أكتبك ،، خيالك إجاني
نسيتك ثوآني ،، خيالك اجاني
-مگدرت اضم شهكتي ، طلعت صرختي على شكل نَدم عارم ، ندم اني دخلت حياته بدافع الانتقام و سلبته أثمن الاشياء الي يملكها بنته الي راحت بشكل من الاشكال بسببي و گلبه الي عجزت شلون احتويه او ارجعـه اله فهو ضحية مثلي عاجز يتخطى ألمـه و فراق احبابه و الدليل كعدته هنا بمكتبة ابوه المرحوم و الي كل شيء بيها ظال على حاله ما متغير بأستثناء غياب صاحب المكتبة ،
اندار على صوت شهكاتي و نهض رأساً وهو يمسح وجهه المبلل بدموعة ، صاح بنبرة مخنوگه :
غياث :: ها يابـه موچفه هنا ، محتاجـة شي ؟
تكلمت بصوت مخنوگ و الغصـة محبوسة بصدري :
-سلامتك ،، و آسفـة گالولي ميقبل احد يصعد بس مگدرت اقاوم صوتك و الخشوع الي بيـه ، باوعلي بتمعن ، دمعتـه و دَمعتي نزلن سوا :
غياث :: الليلة موش اي ليلة ياود ، تحسين بثگل جاثم على صدرج ، حتى الحزن ما يشبه اي حزن و لا الدموع تشبه باجي الدموع ، اااخ الله يساعد گلبج يا مولاتي يا زينب ، شلون حملتي هالوجعـة !
باوعلي ثواني و استرسل :
غياث :: لو أَونن دهر كامل لو انوحن عمري گله ما انطي حك هالليلة يا ود ، و لا أردن فضل الحسين عليه ،
– لزم گلبه و بعبرة گال :
غياث :: احنا بليـه الحسين ما نسواش ، چان ما حملت هالضيم كله ، من اشوفن هظيمته تهون عليه المصايب
ومن اتنوع شفگد اتحمل الشدايد ، ابچيله ود يستاهل الدمعة
وخلي دمعتج دمعة وعي و تطهير من كل ملذات هاي الدنيا وشهواتها ، الليلة عصيبة و ما يهون جرحها الا الدموع .
– يسولف ودموعي تجاوبـه و كل كلمة يحجيها انحفرت بداخلي ،
وكف و عيونـه تباوع بحزن لـ ميز دراسي قديم وعليه شغلات مبينه مو مال جيلنا ، طوابع بريديـة ، اقلام حبر شايفة منها عد خالو سلام ، و دفتر ثخين مجلد بجلد بُني اطرافـة متزلغة ، بالاضافة لمجموعـة گُتب لعلي الوردي و نجيب محفوظ و محمود درويش ،
چانت الغرفـة قَديمة و حيطانها مامصبوغـة و اثاثها تعبان بس بيها روحانيـة غَريبة و ريحة طيبة ، صاح بصوت حزين :
غياث :: هاي حجرة ابوي ، چان يكعد هنا يدرس لو يقرأ لو يكتب مذكراته
-بلعت ريكي ،، و التفتت للدفتر احاجي نفسي ، هذا الدفتر الي حجالي عليه مرة
رأسـاً سألته بلا وعي : هذا الدفتر الي …..
قاطعني بصوت مخنوك :
غياث :: هذا الي حط راسـه عليه جابر و مات
وآني خليتهم و اجيت 🗡️🥀
الفصل التالي اضغط هنا
يتبع.. (رواية ساقي الود) اضغط على اسم الرواية لتجد الفهرس كاملاً بجميع الفصول.