رواية راعوث – الفصل الرابع عشر
راعوث :- كعدت على صوت افراح
افراح :- راعوث يمه كعدي اكلي مايصير تبقين بدون اكل ما اكلتيلج شي من اجيتي ليهسه يمه شبيج مصخنه كومي بردي روحج
راعوث :- كعدت عيوني كوه فاتحتهن احس راسي ينفجر اذا افتحهن أردفت بصوت كله تعب وذبلان ، ما اشتهي ايشي حبابه لا تجيبين سيرة الاكل يمي روحي تلعب افراح اخاف والله
افراح :- بس ضوكي الاكل مايصير ماتاكلين يابعد امج لا تموتيني على ايدج ماصدكت ترجعين اكلي خلي تردلج عافيتج
راعوث :- تذكرت التشريب والشعر دفعتها وركضت للحمام استفرغت وغسلت وجهي واحس الدنيا تفتر ثكلت اريد اوكع لزمت بالمغسلة
– افراح اجت تركض تغسلي وتفرك بايدي طلعتني لصاله ارجف من البرد كعدت بالكاع ودايره وجهي عن صينيه الاكل جاي يتغدن البنات جابتلي جرجف لفيت روحي ومدنكه سوتلي لفة كباب ما اكلتها اشم ريحة الاكل اريد اموت مادري شصارلي ما اشتهي ايشي كارها الحياه بس اصفن اكول المن عايشين ونهايتنه الموت اريد اموت واخلص
افراح :- راعوث
راعوث :- همم
افراح :- شبيج
راعوث :- مابيه شي بس لا تشوفيني الاكل
افراح :- استغفرالله حرام راعوث
راعوث :- وين بابا
افراح :- بالشغل كال من وكت اجي وجايب غراض لراعوث
راعوث :- شنو راح يجيبلي
افراح :- مادري ما كلي صدك حبيبي راعوث هذني السترتين مال منو والملابس منيلج
راعوث :- الملابس من هذولاك الناس ذبيهن ماريد اشوفهن والستره مالت ابو شوارب
افراح :- يا ابو شوارب
راعوث :- الجابني
افراح :- ها الرائد الله ينطي الخير لكيت بالجيب باكيت جكاير ومداليه جمجمه وسلاح وبعد مادري شنو جهاز صغير ماعرفته يجي بابا واسئله
راعوث :- نسيت انطي جاكيته
افراح :- ولج اني نسيت حتى روحي من شفتج والله العظيم تخبلت الله يساعدج يابعد طولي
راعوث :- ادنيت على الحايط وحضنت روحي اباوع على التلفزيون واتذكر شكله شواربه صوته عيونه رموشه خشمه طوله عصبيته شراين ايده
راعوث :- اريد اسبح
افراح :- خاف مو زين تتخربط دورتج اكثر
راعوث :- مادري مخنوكه اريد اسبح ارتاح بس اخاف
افراح :- مين تخافين
راعوث :- مادري خاف من اطب تعوفوني او يصير انفجار
افراح :- أطمني مايصيرلج شي اني يمج كومي يروحي كومي للحمام واني اجيبلج ملابسج
راعوث :- رحت للحمام اباوع يمنى ويسرى خايفه مادري مين فتحت الدوش كاسرته دفيت المي وطبيت جواه احس ارتاحيت من نزل المي على جسمي وبحمامنه وبيتنه بين اهلي افراح جابتلي ملابسي علكتهن وبقيت اسبح
افراح :- اندكت الباب كمت حطيت شال على راسي وطلعت منو
ابو جاسم :- اني بويه اني جيرانكم ابو جاسم
افراح :- تفضل ابوي مو هنا
ابو جاسم :- بويه الوالد متخربط شويه وحالياً بالمستشفى ويريد واحد من البنات تروح يما
افراح :- لطمت على وجهي احجي عفيه عمو ابوي بي شي عفييه بداعت غاليك صاير شي بابوي
ابو جاسم :- لا اله الا الله اهدي بويه والله مابي شي بس تخربط شويه لبسي وتعاي منتضرج بالباب
افراح :- طبيت اركض ابوي تخربط ابووي مادري شبي ياربي سترك ياربي احفضلنه ابوي يارب ماعدنه غيره
شمس :- احجييي شكو شصاير وين راح ترحين شبي ابووي احجي افرااااح
افراح :- لبست بشت على ملابسي وصيحت مادري مادري متخربط سوده بوجهي ديربالجن على راعوث لا تكللها ابوس ايدجن هسه نجي يارب ادعن لابوي يارربي احمي ابووي ياارب لفيت الشال ورقيه جلبت بيه تبجي اله تروح تشوف ابوي اخذتها وطلعت ركض صعدنه بالسياره ونطلق للمستشفى
راعوث :- كملت سبح لبست وطلعت ملفلفه روحي وكعدت يم الصوبه اخواتي ساكتات بس شمس وابرار وملامحهن مدري شبيهن وخايفات همست ، شبيجن
شمس :- مابينه شي راحت افراح ورقيه يشترن خبز ومدري شنو بعد يردن
راعوث :- شهكت وصحت ، ليششش طلللعن ليشش ليش
شمس :- شبيج واذا اسم الله راعوث
راعوث :- يربييي غطيت وجهي بيدي ودنكت الله ياخذني واخلص من الوسواس كمت اخاف من كلشي اوسوس بكلشي البنات ماعرف شبيهن خايفات وحده تباوع لثانيه وره ساعتين اسألهن يكولن مادري وخوفي يزيد ليصير بيهن نفس الصار بيه تنخطف وحده او يصير انفجار اندكت الباب واني كمت ركض قبلهن كلهن فتحتها شفت ابوي ايده محاوطه كتف افراح وبيده كانونه وتعبان كوه مفتح عيونه وابو جاسم وراه يحجي
ابو جاسم :- انشاء الله سلامات ماكو شي ماكو شي بس تحتاجون شي خابروني الله يكومه بالسلامه
راعوث :- مصدومه شصاير طببته نام بالصاله غطته ويون واكفه باب الصاله وصافنه شبي ابوي ليش مايكلولي مريض متخربط راح يموت اول مره اوف ابوي هلكد ضعيف ومنتهي راحت تركض افراح سوتله كمادات وكلهن كاعدات داير ما داير ابوي يبوسن بايده وراسه واني صافنه ليش محد كالي
ناصر :- بوويه راعوث تعاي يمي خلي اشمنج قبل لا اموت
راعوث :- رحت كعدت يما اخذ ايدي باسها واني صافنه عليه واحس راسي يريد ينفجر وتفكير البالي هواي أردفت بصوت هادئ ، شبيك
افراح :- ماله خلك متخربط مايصير يحجي هواي ارتاح بابا
راعوث :- شصار ليش ماتكلولي وين جنتو
افراح :- بالمستشفى
راعوث :- باوعت على ابوي متغير فد مره منتهي حطيت راسي على صدره صاح اخخخ كمت ابجي وافراح توخر بيه ما اقبل ملزمه بي وابجي دموعي تنزل على صدره حط ايده على شعري ويلعب بخصلات شعري ويهمس
ناصر :- عوفيها عوفيها
– ابجي واشهك على صدره حسيت ابوي بي شي وراح يعوفنه مادري ليش عندي هاذا الاحساس اباوع افراح تبجي واضم بوجها ماتريد واحد يشوفها بست خده
راعوث :- لا تعوفنه اخاف
ناصر :- ماعوفج بويه ماعوفج
افراح :- كومي راعوث فدوه رحتلج بابا ماله خلك
راعوث :- كمت للغرفه كعدت بالزاويه حضنت روحي وابجي واتذكر العشته واخاف ابوي يعوفنه ويرجعون ياخذوني ابجي بهستيريا وره شويه وطبت افراح حضنتني وتبجي
راعوث :- شبي بابا عليج الله كليلي حبابه ابوس ايدج ، تبجي وتشهك وكالت بصوت يرجف
افراح :- بابا عنده سرطان الرئه
راعوث :- ماعرف شنو هاذا المرض ماعرف اذا يخوف او عادي او اله عمليه لو يطيب بعدين بس بوقتها بجيت بجي مو طبيعي واشهك حسيت اختنكت وراح اموت اسم المرض مرعب خله جسمي كله يرجف
افراح :- يحتاج جلسات وعمليه وفلوس ماعنده ابوي راح يروح من ايدنه
راعوث :- جسمي كله يرجف احس ماكدر احجي انفجر جان يوم سيئ كلنه نباوع لابوي بخوف خايفين لا نفقده نريد نحفظ ملامحه بذاكرتنه كلنه كلبنه مقبوض وكانو كالولنه راح يموت ومايعيش ما عبالك بس مريض ونندعيله ويسوي عمليه يتشافه هاي اول مره يغفة ابوي واحنه كاعدين نباوعله جان دائماً يبقه كاعد لحد ما يشوفنه كلنه نايمين ويبقه يقره قرآن وينام هلمره نمنه ودمعه بطرف عينه ونفكر شلون نكدر نساعد ابوي
– بعد مرور اسبوع حيل صحة بابا تعبت وماكو فلوس يداوه كوه ياكل لكمه ومايكدر يتنفس يبجي من صدره مرات موبايله يتصل ويطلع ترك شغله بس ما جنه نعرف وين يروح …
راعوث :- كعدت الصبح راسي يوجعني اخذتلي صفنه وكمت لصاله شفت بابا على الكرويته كاعد ويما صينيه جاي يتريك ايده ترجف من يسوي اللفه وياكلها رحت للمطبخ لكيتهن جاي يسون ريوك الهن رحت غسلت وجهي وفرشت سنوني باوعت على المرايه من زمان مامركزه بشكلي شفت عيوني حمر من البجي نشفت وجهي وطلعت كعدت يم ابوي باوعلي ابتسم ونطاني اللفه الي بايده
– هزيت راسي بـ لا
ناصر :- اكلي بويه ليش ماتاكلين من اجيتي لهسه ماشفتج تاكلين
راعوث :- عفيه بابا وﷲ ما اشتهي اكل بالعافيه
ناصر :- شونج انتي بويه زينه
راعوث :- هزيت راسي بـ اي وابتسمت بقيت اباوعله وهوه ياكل ويكح هواي ولازم صدره كلساعه صاح اخخ لفه صغيره كوه يكملها اباوع عليه وسمعت اندكت الباب
ناصر :- كومي بويه خاف ابو جاسم اجه
راعوث :- طلعت صحت منو وفتحت الباب شفته كدامي جسمه الضخم وشواربه وجكارته الي متفارك اصابعه شهكت ورجعت لوره من الخوف وبقيت صافنه عليه ..
الفصل التالي اضغط هنا
يتبع.. (رواية راعوث) اضغط على اسم الرواية لتجد الفهرس كاملاً بجميع الفصول.