رواية راعوث – الفصل الخامس والأربعون
part 45 ”
راعوث :- لبست ملابسي اخذت المداليه وطلعت من الحمام دخلت للغرفه شفت عُقاب كاعد على الجربايه مشغل اللابتوب يشتغل بي وبين اصابعه الجكاره وموبايله مشتغل على صورتي موقف الفيديو من صورني وبيدي كلبش السجن موقفه عليه
– بلعت ريكي رحت يم المرايه مشطت شعري واباوعله بالمرايه يشتغل ولا يمي رحت لجنطه فتحتها وحطيت المداليه بين الملابس سمعت موبايله اتصل فز جسمي الموبايل بمكانه فتح الاتصال وفتح الصوت يكمل بشغله ويحجي
عُقاب :- الو
رائد :- هلا شلونك عُقاب شلونك بعد
عُقاب :- الغي
رائد :- راح تروح لكربلاء
عُقاب :- خير ان شاء الله
رائد :- تاخذ المره لاهلها
عُقاب :- ليش همه وين اهلها بلا زحمه !؟
رائد :- بغداد والله نسيت بالي يم كربلاء اريد اروح اليوم وباقيه بالي
عُقاب :- تروح لكربلاء والحجيه ماتروح تخطبلك
رائد :- عليك العباس لا تصيح بس اسمعني عُقاب بداعت امك اهدى واسمعني اني اخيك لا تخرعني
عُقاب :- الغي
رائد :- خليها باجر الصبح نروح فدوه اروحلك عيب اودي امي بالليل تخطب وين صايره خليها الصبح نطلع سوه لا تروح انته لان امي تريد طب عليهم هيه ومرتك تستحي شويه بعد روحي لا تخرعني عليك الله
عُقاب :- تمام عيني
رائد :- يالله يالله وابو فاضل الزواج يهدى الأعصاب مدري شيسوي الله شوكت اتزوج وانام بحضنها العب بشعرها العب بدنيتها اكعد الصبح الكاها مسويتلي هذا شيسمونه كميره وعسيله والشمعه بنص الصينيه وكلاص الجاي واحد ما نخسر ولا نتعب اثنينه بي واكعد على صوتها صباح الحب يا زوجي الرومانسي يابوووويه اريد مررررره
عُقاب :- رحت لمقر السيارات كملت الوصيتك عليه ؟
رائد :- نعم سيدي
عُقاب :- مهدي هم حچه وياك
رائد :- لا ماكو اتصل عليه ما يجاوبني
عُقاب :- سافل جلب ابن ستين جلبه
رائد :- عليمن تحرك اعصابك على واحد جاهل على كولتك فريخ هوه من يخسر شغله يتندم اكلك منو يمك
عُقاب :- تماده هواي بالكلام عباله اني سهل ويكدر يقشمر عليه السلبوح ابن السلبوحه ، ام الفروخ يمي
رائد :- تسمع
راعوث :- باوع عليه والجكاره بين شفايفه بقه مركز بيه اخذ نفس من الجكاره ونفخ الدخان وبقه صافن بيه ورائد خبص الدنيا
رائد :- الو عُقاب تسمعني الوووو عُقاااااب جهازي عطلان لو انته ماتسمعني حاجيني بس حرررف عُقااب الووو تسمعووونه احنه مانسمعكممممم شجاي تسوي وين رحتتت عُقااااااب
عُقاب :- عاط بنفاذ صبر ، بسسسسسسسسس
راعوث :- احس كمزت لسمه ورجعت لمكاني كلبي كام يدك سريع اني متاكده انطرمت اذان رائد وانخرس راح صوته اختفى بعد لا صوت ولا حس بس صارت طكه قويه يم رائد
عُقاب :- كافي حبيبي كافي شكد تلح كول تسمعني وهاهيه عليمن هاي اللغوه كلها وره شويه اجي عليك اتوكل
راعوث :- سد الخط وكمل شغله بقيت اباوع عليه حط ايده على كصته وفركها حيل مغمض عيونه عروكه بارزه بشكل مو طبيعي وعيونه كلهن شراين حمر رحت يمه كعدت على الجربايه
راعوث :- ما راح نروح هسه
عُقاب :- اي
راعوث :- عادي ما اضوج شبيك
عُقاب :- تعبان
راعوث :- منين لعد ليش جاي تشتغل اذا تعبان عوفه شويه بين ما تصير زين
عُقاب :- اشر على الكومدي ، فتحي المجر
راعوث :- كمت فتحته وباوعتله
عُقاب :- جيبي الكارتون
راعوث :- باوعت للمجر شفت كارتون موبايل رفعته ، هذا
عُقاب :- اي جيبي
راعوث :- انطيته الكارتون وكعدت يمه فتحه وباوعلي ما نطيت أي ردة فعل عبالي اله
عُقاب :- هذا المن
راعوث :- مادري مالتك
عُقاب :- دلزمي
راعوث :- اخذت الموبايل بيدي ، حلو مالتك اشتريت جديد
عُقاب :- عوفيها هاي مالتك صدقة لامج الحلوه
راعوث :- شكول
عُقاب :- حلو عجبج ؟
راعوث :- اي يجنن
عُقاب :- تريدي
راعوث :- يعني اذا اريده عادي اخذه
عُقاب :- هوه الچ
راعوث :- شكت حلكي الضحكه ، كول والله
عُقاب :- وداعتك حبيبي
راعوث :- باوعت على الموبايل وكمزت بحضنه حضنته حيل باوعت بعيونه ردت ابوس خده حرك راسه صارت البوسه بطرف شفايفه خليت راسي على كتفه وحضنته همست
راعوث :- شكراً
عُقاب :- هلكد فرحت جا ماتكلي اجيبلك
راعوث :- باوعتله بست خده ، مو افراح تكلي لمن يصير عمرج 18 اجيبلج موبايل بعدج صغيره
عُقاب :- اخخخ من افراح
راعوث :- ماتخليني كلشي اسوي اسم الله حتى صديقاتي بالمدرسه لازم هيه تعرفهن وتعرف اهلهن وماتخليني اروح لبيتهن
عُقاب :- انته گلش حلو
راعوث :- ركز بشفايفي عض شفته الجوه اخذ نفس جكاره وزفره
عُقاب :- عروگي و فؤادي
– حضني وشم ركبتي بقوه
عُقاب :- راحه نفسيه وچسديه
راعوث :- اخذت نفسر وزفرته رخيت جسمي بحضنه كمل شغله بالابتوب بقيت بحضنه ثواني ردت اكوم لزمني
راعوث :- چؤ عُقاب
عُقاب :- لا تتحركين بويه ثبتي
راعوث :- ما اتحرك اريد اكوم
– رخه ايده كمت من حضنه رحت طلعت تراك شفته طبك اللابتوب طفه الجكاره بالنفاضه كام طلع ملابس وراح للحمام سديت الباب لبست التراك صفنت على هوسة الغرفه اخذت العلاليك بيهن حلويات وكرزات ونزلت جوه كعدت ويا عمتي وفرح كمت اطلع وانطيهن وناكل سوه
ابتسام :- جا بطلتو يمه
راعوث :- اي باجر الصبح نروح
ابتسام :- اي على كيفكم مو استعجال هم فشله طبون عليهم بالليالي
راعوث :- اي
ابتسام :- شفتي الريف شحلاته
راعوث :- منو كالج رحنه
ابتسام :- يمه خابرته عُقاب انتو هناك وكال رحنه لبيت ابو جاسم
راعوث :- يجنن والله البقرات والبطات والدجاجات وكتكوتات اشكال هناك والله حلوه ما نروح بعد
ابتسام :- ان شاء الله فد يوم ماعدنه شي ونروح
راعوث :- البنات يخبلن والمره حبابه اكلنه سياح وروبه تجنن
– نزل عُقاب من الدرج بيده اوراق والمسدس بخصره وبين اصابعه الجكاره طلع بدون مايحجي شي
ابتسام :- وين رايح ما كالج
راعوث :- لا
ابتسام :- شو ضايج شبي
راعوث :- مادري كالي تعبان
ابتسام :- الله يساعده
راعوث :- اممم
– بقيت اسولف ويا عمتي وفرح وسوينه العشه تعشيت وكملت شفت الساعه بـ 9 كمت للغرفه رفعت شعري بالقراصه رحت كلبت جنطي كلهن بالكاع صفنت على الغراض انملت الكاع اني شسويت
– فتحت كنتوره طلعت نص ملابسه مايلبسهن خليتهن بالجنطه كعدت طلعت الملابس الي اريدهن والشتويات خليتهن بالجنطه خليت ملابسي بالكنتور رتبت كل غراضي طلعت المكياج واني حايره شسوي بي هذا كله طلعت منه العجبني خليتهن بمجر ميز التسريحه رحت غسلت وجهي وخليت ماسك ترطيب لوجهي
– نضفت الغرفه كلها ورتبت كل غراضي ملفاته مطشره بكل مكان سفطتهن وحده فوك الثانيه رحت للميز فتحته وخليت كل ملفاته والباب الثانيه خليت كل الوايرات خليت اللابتوب على الميز ورتبت مكانه شغلت كل الاضويه صارت الغرفه مضويه ضميت الجنط بالكنتور جوه الغرفه احسها غامقه رحت طلعت لصقات فراشات كبار اشتريتهن من طلعنه لسوك لصقتهن على الكنتور مو هواي بس اربع فراشات انطت لمسه حلوه رتبت الفرشه مسحت الكاع بخيت عطر كملت من كلشي الغرفه صارت راحه نفسيه
– نمت بنص الجربايه وصفنت بالسكف احس ضهري تشنج بس من اشوف الغرفه نضيفه انسه التعب شفت الساعه بـ 11 ونص
– كمت للكنتور باوعت بالملابس طلعت دشداشه قصيره مفتوحه من يم رجليه من جهة وحده والردن تعلاكه صلوخ وبي دراهم لونها رمادي غامق طلعت روب وياها رحت للحمام
– غسلت وجهي وشلت الماسك شفت مكص كدامي سحبته وكصيت من اطراف شعري حسيته شويه طولان كصيت اطرافه حسيت خربته عفت المكص وسبحت لبست رحت للغرفه ذبيت الروب شسورت شعري مشطته لبست تراجي وحجل خليت حمره باوعت على المرايه
راعوث :- اوووي شهالجمال فديتججج
– رحت نمت تغطيت باوعت لساعه راح تصير 12 سمعت باب الحمام انفتح اخذت نفس وزفرته سحبت موبايلي فتحته شفت بي خط دخلت على الارقام لكيت رقم بدون اسم وجوه رقم مكتوب عليه افراح فرحت ردت اتصل عليها بس شفت الساعه ما اتصلت شفت البرامج منزل برامج تواصل ومسويهن اليه دخلت على برنامج طلعت الرقم ما عليه اسم شفت صورة الشخصيه عُقاب ومخلي نبذه
– أنتِ مَلكيِ ؛ وملاكِيِ ؛ ومليكَتيِ ؛ ومَكمليِ ؛ وكمَاليِ ؛ وكلامِي ؛ وكُلي ..
راعوث :- بست صورته حيل وابتسمت سميته الهيبه حتى اعرفه رقم عُقاب طفيت الموبايل وخليته يمي
– صفنت ايدي كلها طالعه ورجليه اني شسويت ليش لبست هيج بالله أذاني مثل كل مره اني مو كلت بعد ما البس هيج اكوم البس شلون ردت اكوم انفتح الباب سمعت طكه قويه بسرعه غطيت كل جسمي وراسي وكمت ارجف فاتحه عيوني على وسعهن شسويت ليش لبست هيج طبك الباب حيل صار صوت قوي خفت اسمع خطوات رجليه سحب الكرسي شخط بالكاع سمعت طكه قويه شي وكع ومن بعدها صار هدوء بقيت جوه الغطه خفت وين راح وخرت الغطه شويه باوعتله
– كاعد على الكرسي مدنك راسه جسمه وشعره مبلل مغمض عيونه منتهي
– من خوفي عليه كمزت من مكاني رحت عليه بسرعه
راعوث :- شبيك عُقاب شصاير وين جنت عُقاب اصحه شبيك لا تخوفني عفيه
– ركضت جبت الخاولي نشفت شعره وجها حضني بقوه دفعته
راعوث :- شبيك حاجينييي وين جنت
– رفع راسه باوعلي باوع لجسمي من فوك لجوه حضني بقوه حط راسه على صدري دفعته حيل جرني اله بقوه وشم ركبتي ولمسات اصابعه على رجلي كزبر بدني عيونه كلها تعب وعروكه بارزه وجسمه حار خليت ايدي على خده ورفعت راسه
راعوث :- شبيك
عُقاب :- تعبان محتاجج يمي لا ترحين
راعوث :- اني يمك كوم نام حتى ترتاح
– باوع لبسي ركز برجليه تقرب من اذاني همس بصوت تعبان
عُقاب :- وچ اوفففف
– سرت قشعريره بجسمي من همسه وانفاسه الحاره
راعوث :- تره انته ماتشوف لان تعبان اني ما لابسه الملابس الجاي تشوفهن
عُقاب :- اخخخ اذا هيج التعب اريد كل يوم اتعب اريد اهد حيلي اتعب اقوه حتى اشوف بدون ملابس
راعوث :- عُقاااااب
– شالني شمرني على الجربايه اخذ نضره على جسمي ردت كعدت دفعني على الجربايه كلبت روحي وركضت اجه عليه
راعوث :- عليك الحسين عُقاب عوفني
عُقاب :- وچ تعاااااي
راعوث :- عليك الله والله اريد ابدل عوفني مو تعبان عفيه عُقااااب
عُقاب :- منو كالج تلبسين هذا اللبس مافكرتي بالباشا مافكرتي بشيب ابووووي
راعوث :- عليك الله لا تجي وخر عُقاب
– ردت اشرد سحبني من خصري شمرني على الجربايه حط راسه بركبتي كلبي يدك سريع همس
عُقاب :- كل تعبي يمج يختفي
– ايدي حاوطت ركبته باوع بعيوني باوعتله ببراءة
راعوث :- يله نام حتى نكعد من وكت ونروح لاهلي
عُقاب :- جا والباشا
راعوث :- شبي
عُقاب :- غير انسطر
راعوث :- عفيه خلي انام كوم
– راد يشك الدشداشه لزمت ايده
راعوث :- لا تشكهااااا دشداشتييي
عُقاب :- اجيبلك عشره منها
راعوث :- لا عليك الله لا تشكها
– اخذ شفايفي غمضت عيوني وشبكته حيل ..
راعوث :- كعدت الصبح اسمع صوت موبايل عُقاب يتصل صوته عالي قريب مني مديت ايدي على الكومدي ماهوه انسد الاتصال حضنت عُقاب غمضت عيوني رجع يتصل همست
راعوث :- عُقاب اكعد موبايلك
عُقاب :- يا كو** ابن الكو** يتصل هسسسسسه
– الووو هااااا خيرررر مطعم اني مطعممممم وصي يله حبيبي شتريد فطائر بالجبن لو بيض وباكله لو كباب شوي وصي اطلب شتريد ريوكك اليوم ابن ال**** اي طالع اااااي يعني انته بالباب اليوم انعل شرف شرفك اليوم احرك جدك بالخمسه جاي شعندي عييييد شعندي شنو حتى نوصلللل هاي بغداد راح طير نعلعلا يومي نعلعلا هذيج الساعه الخليتك تجيب ابو ناصر للبصره ابو افراااااح ابو افراااح وابو فاضل لو مو امك وياك جان عفتك بالباب واهد عليك جلبين بولسيات اخبلك بالعباس
– سد الاتصال شمر موبايله كام لبس
راعوث :- شبيك شكو عليمن تصيح
عُقاب :- ابن الك** رائد جاي علمود نروح لبغداد
راعوث :- ضحكت ، اي صدك همزين كعدنه خطيه ليش صيحت عليه
– باوع عليه عض شفته الجوه وضيق عيونه
عُقاب :- ولك تغطه
راعوث :- بسرعه صعدت اللحاف لركبتي طلع من الغرفه كمت لبست طلعت ملابس رحت للحمام سبحت وبدلت دخلت للغرفه لكيت عُقاب نايم كعدته
راعوث :- عُقاب وين راح رائد ليش نمت اكعد
– سحبني من خصري كعدت يمه رفع شعري وره اذاني
عُقاب :- راح لبغداد اكوم اسبح وره ما اطلع الكاج جاهزه
راعوث :- حاضر سيدي
– ابتسم بتعب سحب ايدي باسها وراح للحمام حضرت كل غراضي فتحت البرده والشباج الشمس فاتت للغرفه كعدت على الجربايه انتضره احس ببروده تصل بعضامي ونسمات هوئ بارده تدخل من الشباج
– وره شويه ودخل للغرفه اخذ الجنطه
عُقاب :- هاي شماخذه تره بس يوم واحد
راعوث :- يفيدني كلهن اريدهن
عُقاب :- يله بويه كومي
راعوث :- صعدت بالسياره حرك الستيرن وانطلقنه لبغداد فرحانه راح اشوف اهلي وضايجه راح اعوف عُقاب اكلنه بالسياره وره ساعات دخلنه لبغداد احس طرت من الفرح شفت عُقاب يتصل مدري على منو سمعته يحجي
عُقاب :- اهلاً وسهلاً ابو افراح صباح الخير هلا بيك حبيبي احنه بغداد بعد كلبي و ام رائد وياي اي مثل ما كلتلك بعد روحي تسلم يالغالي براحتك براحتك
راعوث :- وصلنه يم باب البيت طبك السياره شفت سيارة رائد طابكه نزلت ردت اروح للباب عاط عُقاب
عُقاب :- اوكفييي
راعوث :- وكفت نزل رائد وامه رحت وكفت يم عُقاب ام رائد سلمت عليه و باستني رائد صعد بالسياره ورحنه اني وامه و عُقاب دك الباب فتحها رحت ركض اريد اشوف اخواتي لزمني عُقاب
عُقاب :- سمي بويه سمي مو جاين من السفر
راعوث :- باوعت على المره تباوعلنه وخر مني عُقاب طلعت افراح لابسه حجابها
افراح :- اهلاً وسهلاً تفضلو ليش واكفين بالباب ، حضنت ام رائد وباستها ، هلا بيج خاله تفضلي
ام رائد :- هلا يمه هلا حبيبه شونكم اخباركم شونكم بعد شلونه ابيج خطيه سمعت بي مريض عنده العافيه شلونكم بعد روحي
افراح :- الحمدالله والشكر بخير تفضلو هلا بيك عُقاب تفضل
عُقاب :- هلا بيج خويه عندي شغله بغداد وره شويه وامر بيكم اخذو راحتكم
افراح :- براحتك خويه هلا بيك
راعوث :- باوعت لـ عُقاب خزرته بعيوني طبت ام رائد وافراح تقربت منه رفعت راسي
راعوث :- وين رايح؟
– ورث الجكاره اخذ نفس صفن بعيوني
عُقاب :- انتي شتكولين
راعوث :- كلي وين رايح شنو الشغل بغداد انته شغلك بالبصره
عُقاب :- رايح اشوفها اشتاقيتلها
راعوث :- ضربته على صدره ، عُقااااب
عُقاب :- حبيبي تغار هاا تغار تريد اشتاق بس الك *** اشكه التاخذ مكانك بگلبي
راعوث :- كافي وين رايح
عُقاب :- صاحبي عسكري متصوب برجله واريد اشوفه
راعوث :- كول والله
عُقاب :- وداعتك وروح حسيم
راعوث :- تجي لو لا
عُقاب :- اشوف اذا كدرت امر عليكم
راعوث :- ماشي
عُقاب :- اصبرلي هسه جايك
راعوث :- اريد اشوف اخواتي
عُقاب :- اصبري بويه كرصيها و اوكفي
راعوث :- راح درت وجهي اريد اطب اشوف اخواتي اسمع صوت ام رائد وافراح يحجن وره ثواني ودخل عُقاب بيده شال تقرب مني رفعت راسي باوعتله رفع خصلات شعري باس كصتي دنكت فتح الشال حطه على شعري رفع راسي باوعت بعيونه والشمس كدامي
عُقاب :- اللهم صل على محمد وآل محمد
راعوث :- شنو هذا الشال المن
عُقاب :- تعلمي عليه من طلعين لبسي من تفتحين الباب خلي على راسج لحد ان تثبتين عليه ولبسي كامل انتي عرض شاربي
راعوث :- هزيت راسي بـ اي عضيت شفتي الجوه
عُقاب :- اوففف تردين الروح جنج رحمة الله
راعوث :- دنكت راسي مبتسمه حضني بقوه باسني ووخر مني
عُقاب :- روحي بويه كلبج راح يوكف على اخواتج
راعوث :- بست خده اخذ نفس وزفره بنفاذ صبر مشيت سمعته حجه
عُقاب :- حبيبي
راعوث :- درت وجهي
عُقاب :- خليتلك فلوس بالجنطه خاف تحتاج
راعوث :- ابتسمت وهزيت راسي بـ اي
– طبيت للصاله افراح باوعتلي من فوك لجوه طبيت للغرفه لكيت البنات كاعدات بسرعه كامن حضنني خليت جنطتي بالكاع وحضنتهن بقوه وبستهن شفت شمس متغيره حيل حافه وصابغه شعرها صايره تجنن
شمس :- وين جنتي صارلنه ساعه ننتضرج مشتاقيلج والله
راعوث :- جنت احجي ويا عُقاب هاي شطالعه عفيه والله حلوه يربيي شمسويه عفيه تخبلن
شمس :- ماكو غيرج حلو فدوه رحتلج
راعوث :- ردت اروح احضن ابوي نايم على فراشه وبيده كانونه ويمه العلاجات بس لزمتني شمس كعدت قريبه منه
راعوث :- شلونك بابا
– مايكدر يحجي كوه يحجي كلمه ويكح
ناصر :- هلا هلا بويه
ابرار :- والله مشتاقيلج ليش تاخرتي واجيتي
راعوث :- مو ما نلحك
شمس :- شلونج يروحي
راعوث :- الحمدالله راح اكوم اشوف المره راحت لو بعدها
شمس :- شنو سالفتها روحي شوفي
راعوث :- طلعت كعدت يم افراح
ام رائد :- بعد روحي والله دخلتي كلبي وماريد اضيعج فدوه اروحلج وافقي والله حباب ودوم شقه وضحك ما فد يوم صيح على اخواته ولا عليه بعد روحي بعد عيوني ميخالف اخليج تفكرين بس وافقي لا تكسرين خاطري حبيتج والله ييمه
افراح :- والله حتى اني جبيتج ودخلتي كلبي انتي وسوالفج الحلوه الله يخليج ويحفظ ابنج بس اني ماكدر والله يعني مستحيل اترك ابوي بهذا وضعه وصحته تعبان فد مره منتهي ماكدر اعوفه وراه عمليه اخواتي الباقيات مايعرفن شي مايعرفن لابوي وشموسه راح تتزوج عاد تفهم شويه تبقه بس رقيه وابرار مايعرفن لابوي ولا علاجاته والله العظيم ماكدر اعوف ابوي اعذريني ما راح اوافق لا يضل بالج يمي شوفي مره لابنج واخذيها اله وان شاء الله يلكه التسعده
ام رائد :- براحتج براحتج زين طلعيلي اخواتج الباقيات بس اشوفهن فدوه اروحلهن ليش ضامات روحهن مني والله ما اكل مره حالي حالهن خلي اشوفنهن
افراح :- هسه اصيحلهن مو تدللين
راعوث :- كامت افراح باوعتلي المره وحجت بتوسل
ام رائد :- بعد روحي قنعي اخيتج والله اريدنها والله دخلت كلبي
راعوث :- احاجيها والله
ام رائد :- اي بعد روحي
راعوث :- ابتسمت وكمت للمطبخ وخرت الشال نازل على ركبتي شميته حيل وابتسمت شربت مي ورحت للغرفه لكيت افراح تتوسل بالبنات يكومن يطلعن خليت الشال على الميز
افراح :- عيب طلعن المره كاعده وحدها والله فشله
راعوث :- طلعن والله حبابه المره
شمس :- اني همزين مخطوبه ومخلصه من هاي السالفه اروح اكعد يمها بين ما تتعاركن
افراح :- يله فدوه رقيه يله بعد روحي كومي
رقيه :- ما اتزوج والله معليه
افراح :- كومي يروحي بس تشوفج
رقيه :- بس تشوفني
افراح :- اي والله ما تاخذج هسه بس تشوفج وابرار صغيره ما انطيها هسه
راعوث :- قنعت رقيه كوه طلعت باوعتلي افراح حضنتني وباستني
افراح :- ما سلمت عليج يروحي شلونج شلونه رجلج
راعوث :- زينين مشتاقتلج
افراح :- يروحي والله حتى اني هسه اريد اكعد وياج كعده معدله بس خلي تروح المره
راعوث :- طلعت يم المره تباوع على رقيه ومبتسمه
افراح :- بس هاي وهذيج صغيره والله العظيم وماتقبل تطلع وهم هاي كوه مايردن يتزوجن بعدهن صغار وهم دراستهن شلون يعوفنها ويتحملن مسؤوليه زواج وبيت
راعوث :- اسمع افراح وباوع عليها عيوني دمعت و احس كلبي يتفطر
ام رائد :- والله ماعندي شي شعندي هوه اخياته الوليد يكومن وينضفن ويطبخن وهيه خليها براحتها والله ما اكومها الله يساعدنه عمري 14 اتزوجت هاي قبل حتى الملابس اغسلهن بالشط نجيب ماي من الشط ندكها مشي من البيت لشط الخبز بيدي هسه كله من السوك والتنور طين والاكل اسوي لعشرين نفر جا مثل هسه كلمن يسوي اكل لروحه
افراح :- ان شاء الله خاله الله كريم احاجيها وشوف يعني تردين استعجال على كيفنه خلي تفكر البنيه
ام رائد :- اي بعد روحي جا شلون ما اجبرها فكري وبراحتج واني كلتلج لا شغل ولا عمل نايمه 24 ساعه والوليد شفتنه الجابكم للبصره حلو ومرتب وسيارته ولبسه وشغله والله وليدي ينحب بسرعه كلها تكول فدوات اروحلج اريد تسمعيني موافقتج اجيتج من البصره لهنا فدوه لعويناتجن
افراح :- بعد روحي خاله اهلاً وسهلاً بيج نورتي بغداد والله ان شاء الله خير
ام رائد :- بعد روحي واذا تريدين تشوفين الولد من الباب باوعيله خاف ماشفتي عدل
افراح :- الله كريم خاله ان شاء الله بيها خير
ام رائد :- بعد عمري الله يحفظ ابوجن ويخلي خيمه على راسجن وينطي الصحه والعافيه و ان شاء الله صارت بنيتي بعد رقاوي اضمنها بكلبي والله العظيم وهسه لازم اروح منتضرني رائد بالباب
افراح :- لا خاله بعد وكت هستوج طبيتي دضلي للغده والله مايصير طلعين هيج
ام رائد :- لا والله لا يحبيبتي تسلمين لازم اروح يابعد عمري ولا تنسين بعد روحي وهاج هذا رقمي وتصلي عليه عود ونتفق ونشوف الحجي شنو
افراح :- بعد كلبي خاله براحتج هلا بيج
راعوث :- راحت ام رائد و رقيه صافنه رحت حضنتها وبستها
راعوث :- والله وافقي شفتي ابنها شحلاته وسوالفه تضحك والله من يخابره عُقاب اسمعه حلوه سوالفه ويوميه ياكل شي انتي تحبين الاكل اعرفج موالمه ويا والله عنده سيارته تخبل وشفتي امه شلون حبابه وتجين يمي هناك اجيج وتجيني حبابه وافقي
– حضنتني وسكتت بعد ما وصلت افراح ام رائد دخلت للصاله
افراح :- ها يمه شتكولين
رقيه :- مادري ماريد
افراح :- لا يابعد كلبي هاي راعوث مو تزوجت وجابها النه واحنه رحنالها وسأليها الزواج شحلاته ويخليج تكملين دراستج وترحين هناك يم راعوث ها يروحي
رقيه :- مادري
راعوث :- عوفيها خلي تفكر احس بيها انطيها صبر
افراح :- هاهيه براحتج عندج اسبوع كامل
راعوث :- تذكرت اول مانخطبت احس كلبي انعصر بس من اتذكر عُقاب ارتاح حضنتني افراح وباست راسي
افراح :- شفت شال على راسج منين جبتي
راعوث :- عُقاب كالي لبسي من طلعين تعودي عليه لمن تثبتين عليه والبسه كامل
افراح :- عفيه بعد روحي صار لازم تلبسين حجاب هذا رجلج ومن حقه يغار عليج زين ما جبرج خلاج براحتج تلبسي الله يخلي الج ويرزقنه بواحد مثله
راعوث :- رائد مثله حبابه رقيه وافقي
رقيه :- شمدريج مثله يمكن تطلع حقيقته بعدين
راعوث :- لا والله حبابه وافقي
افراح :- عوفيها براحتها
راعوث :- اتذكرت اني حامل باوعت لافراح وشكت حلكي الضحكه
افراح :- ها ولج خير ان شاء الله
راعوث :- اني حامللل
– افراح شكت حلكها الضحكه حضنتني بكل قوتها
افراح :- صدككك صدك راعوث صدك لو تشاقين انتي حامل كولي والله
راعوث :- والله حامل
افراح :- يمممه بنيتي حامللل يمه فدووووه ولج شوكت هاي اللهم صل على محمد وآل محمد ولج كلبي راح يطلع من الفرحه صدك تحجين غير تكولين ديربالج على روحج يمه والله اخاف عليج حامل ومادري فدوه اروحلج
راعوث :- شفت ابرار وافراح يبجن وشمس مبينه فرحتها على وجها رقيه تباوعلي خوف مدري ندم نضره غريبه ومبتسمه
راعوث :- شكو تبجن اسم الله عليمن
ابرار :- صرتي حامل وراح تصيرين ام هذاك اليوم نلعب سوه ليش اكو زواج ليش تزوجتي وعفتيني
راعوث :- احس دمعتي بطرف عيني رحت حضنتها واختنكت حيل احس اريد ابجي اريد العب ويا ابرار ماريد اتزوج
افراح :- شنو هذا الحجي ابرار بعد اتزوجت وحتى انتي راح ازوجج صرتن كبار هوه الصوج مني كضيت عمري كله صغار وصغار كبرتن كلجن ولازم تزوجن وتحبلن وتجيبن وتعيشن حياتجن كافي مزعطه ولعابات
ابرار :- احبها والله راح اصير خاله يربييي فدوه شو ماكو بطن وينه هذا
راعوث :- بعده صغيرون
ابرار :- والله مشتاقتلج يربي كون هسه احضنج حيل وجعصج انتي وابنج
راعوث :- كله ولا فريخ عُقاب
افراح :- ولج شنو فريخ طفل
راعوث :- هوه يسمي فريخ شمدريني
افراح :- من شوكت عرفتي حامل
راعوث :- قبل جم يوم
افراح :- الف مبروك يروحي والله ماتتخيلين شكد فرحانه
راعوث :- شفت ابوي باب الغرفه لازم عكازه ويباوعلي مبتسم
افراح :- ها بابا شلون تكوم وحدك ماصحتلي
ناصر :- من سمعت هذا الخبر كمت على حيلي وراح كل الوجع بنيتي الصغيرونه حامل المدلله حامل يالله الف الحمد والشكر مافشلتني خفت حيل من مستقبل راعوث بس طلع احلى مستقبل والجاي احسن بأذن الله
راعوث :- ليش خفت
ناصر :- بعد الصار يبنيتي والخطفوج ماتوقعت راح تتزوجين ادري كلامي يمكن يأذيج بس هاي الحقيقه وحتى عُقاب كلت يرجعج لان جان بالي هواي اشياء ومن رجعتيلي ماكدرت احجي وياج واخذ منج اجوبه من اسأله بالي لان جانت نفسيتج مدمره ماريد ازودها عليج وماريد اسمع منج جواب يكسر خاطري الف الحمد والشكر على كل شيء
راعوث :- دنكت احس اريد ابجي
افراح :- هسه انسو الماضي رقيه سوي الغده اني اريد اشوف شنو ناقص شمس وابرار شوفي شكو ماكو بالبيت وبابا ارتاح نام
راعوث :- واني
افراح :- انتي كلشي لا تسوين ديربالج على ابنه لا يصير بي شي
راعوث :- لا بالله اساعد رقيه
افراح :- يله هاهيه هسه كومن بعد ماكو وكت
راعوث :- زين وين العرس منو يجي عمتي كالت اجي الخميس
افراح :- هلا بيها العرس مو هنا بيتنه الثاني احسن من بيتنه هذا يفشل واليجن هنه جوارينه وكرايب الولد واهله
راعوث :- يا بيت تحجين عليه؟
افراح :- لكيت بيت قريب من منطقتنه ومناسب جمعت فلوس وهم الله ينطي الخير عُقاب مو ينطي لابوي بين فتره وفتره جمعت عليهن واشتريناه
راعوث :- صدك
افراح :- وداعتج الله يخلي الج عُقاب يجي لو لا باجر
راعوث :- مادري ما كال يمكن مايجي
افراح :- براحته خاف عنده شغل
راعوث :- اي اسم الله شغل شغل كل حياته شغل وجكاير
افراح :- جا شلون يكعد بالبيت دكومي يم رقيه
راعوث :- صبريلي خلي اشوفج شجابلي
– كمت طلعت الموبايل وشوفتها ابتسمتلي وحضنتني
افراح :- بالعافيه يروحي تستاهلين اكثر
ابرار :- انطينيا اشوفه
راعوث :- رحت انطيتها الموبايل وحجيت بصوت ناصي ، عود خابري كروري حتى تنشكين
– تغيرت ملامحها ودنكت فتحت الموبايل رحت للمطبخ شفت رقيه تطبخ وصافنه
راعوث :- هنيال رائد
رقيه :- كااافي ما اتزوج لا تحجين بي
راعوث :- ليش ما تتزوجين يعني ابد لو رائد ماتريدي
رقيه :- ابد
راعوث :- ليش والله احسن تتزوجين يشتريلج ويطلعج ويحبج شكو بعد كاعده هنا
رقيه :- يحبج عُقاب
راعوث :- صفنت ابتسمت ، اي كلش صرت احسه يهتم بيه اكثر من افراح وابوي طلعني واشترالي كلشي بنفسي وحتى بليل اذا اشتهيت شي يطلع يجيبلي حيل حلو الحب
رقيه :- اممم راعوث
راعوث :- ها
رقيه :- تحبين عُقاب
راعوث :- سكتت رتبت الغراض على الميز باوعتلها تباوعلي
رقيه :- راعوث اذا احجيلج شي كولي والله ماتضوجين مني
راعوث :- والله ما اضوج شكو
رقيه :- اني اسفه
راعوث :- شبيج احجي عاد
– اجت حضنتني وكامت تبجي خفت حيل
راعوث :- شبيج عفيه احجي والله كلبي كام يوجعني راح يوكع الطفل
رقيه :- اني اسفه والله اسفه راعوث لا تضوجين مني ردت أذيج واخرب بينج وبين عُقاب بس سمعيني والله جنت مادري شبيه عُقاب عجبني من اول ما شفته ومن اخذتي حقدت عليج هواي وصرت ادعي تطلكين منه حتى لو ما اتزوجه المهم تعوفي مادري الشيطان جان يوسوس براسي والله هسه اعتبره مثل اخوي الجبير بس سامحيني لان فكرت هيج تفكير كولي مسامحتج اريد ارتاح
راعوث :- فتحت عيوني على وسعهن استوعب معقوله اختي وهيج تفكر باوعت لوجها تبجي وتمسح بدموعها بقيت ساكته وصافنه عليها استوعب كلامها واتذكر نضراتها واول ما شافت عُقاب وشلون انخبصت بس ابد ما فكرت هيج تفكر وبقت معجبه بي لحد ان تزوجته
رقيه :- عفيه راعوث لا تزعلين والله هسه اعتبره اخونه الجبير الله يسعدكم سوه اني اسفه
راعوث :- هسه هوه مو بالج
رقيه :- والقران ابد مو بالي استغفرالله مادري شلون جنت هيج افكر بس عجبني والله مو حب هوه بس الج و ان شاء الله التحاول تاخذه منج الله ياخذ روحها
راعوث :- ماتدرين شكد أذيتيني بس المهم اعترفتي جنت شاكه بنضراتج بس ماتوقعت
رقيه :- عليج القرآن سامحيني احلفج بروح امي تسامحيني
راعوث :- تعرفيني كلش زين ما اعرف احقد ولا ازعل ولا اضوج خصوصاً منجن ف مازعلت منج همزين حسيتي قبل لا يفوت الأوان وتأذيني وهاهيه سدي الموضوع
– حضنتني ماحضنتها باستني وهمست بهدوء
رقيه :- اسفه
راعوث :- وخرت منها وطلعت رحت غسلت وجهي احس بلعبان نفس ومقهوره حيل صعبه اختي اثق بيها ومستحيل اتوقع يجي يوم تغدرني او تخوني وفد يوم اسمع بيها محاوله تغدرني وتأذيني وتفكر بزوجي كل هاي المده منا زينب زوجته السابقه يمكن بعدها تريده وخايفه منها ومن الكوابيس الاشوفهن بيها ومنا سالفة رقيه الطلعتلي راسي كام يوجعني دخلت ابرار صفنت عليه
ابرار :- هاي شنو الاثار بوجهج حمر
راعوث :- وين
– باوعت على المرايه يبين كدامي بقع حمره غسلت وجهي وتوترت حيل
راعوث :- مادري
ابرار :- الهيبه دزلج رساله عيني
راعوث :- شدز
ابرار :- مادري ماشفت
راعوث :- اي ابد ماشفتي واضح
ابرار :- ههههه هاج هاج
راعوث :- اخذت الموبايل دازلي
– هلا باليسطر سطر وكلش خطر
راعوث :- شفتها ومارديت طلعت يم افراح وشمس اسمعهن يحجن ومتوترات ومستعجلات بالي كله مو يمهن صافنه بسالفه رقيه انفتح الموبايل شفت مسج من الهيبه ابتسمت من شفت المكتوب
– ثكيله بت العسل
راعوث :- باوعت لافراح غمزتلي وضحكت
شمس :- تحمست اتزوج والله
راعوث :- هههههههههههههههههه
افراح :- يا عزه العزاني بس لا تضحكين هيج هناك
راعوث :- لا لتخافين شمس شسمه زوجج شو حتى ما شفته
شمس :- اسمه عقيل من يجي تشوفي بالعرس
– اجه مسج من عُقاب
افراح :- ردي عليه شلعتي كلبه
راعوث :- ضحكت شفته داز
– نسه العشره والبوسات
– رديت عليه ، كافي ملحه
– شافها دقيقه و رد
– والله لو ما جاي اسوق جا اعرفج على منو تكولين كافي ملحه
– مو عليك بالغلط
– المن تردين دزيها؟
– لا والعباس
– راجع للبصره
– ما تجي يعني
– اتصلي
افراح :- اريد اطلع لسوك اجيب كم شغله اجي الكه الغده مكملاته وشمس غراضج لامتهن خوش
راعوث :- اروح وياج
افراح :- تكدرين
راعوث :- اي
افراح :- شو اخاف عليج
راعوث :- لا عادي اروح وياج اريد اشتري فستان ماشتريت
افراح :- يله كومي بس اول شوفي رجلج يقبل
راعوث :- كمت من يمهن طلعت بالحوش سحبت كرسي كعدت اتصلت عليه بسرعه جاوب
راعوث :- هلو
– هلا بالزقچه هلا بالبربوگه
– اممم ليش ما اجيت
– خابروني على شغل واذا اجيت يمك بعد ماعوفك
– عُقاب
– هلا ابوي
– راح اطلع ويا افراح لسوك
– شوكت و ليش
– هسه نطلع افراح محتاجه غراض واريد اشتري فستان
– خوش حبيبي اخذ فلوس من الجنطه واشتري اليعجبك عندي اتصال مهم ابني
– ماشي
راعوث :- سده كمت للغرفه سحبت الشال صفنت البسه لو لا خليته على شعري شلون ما جان نص شعري طالع
افراح :- ها يقبل
راعوث :- اي
افراح :- يله امشي بس ابقي لازمتني ولا تعوفيتي ابد عفيه
راعوث :- اي والله شبيج خايفه
– طلعت نص من الفلوس انطيتهن لافراح خلتهن بجنطتها وطلعنه اشترت افراح الغراض التحتاجهن دخلنه محل فساتين هم تريد تشتري لابرار وهم اليه
افراح :- شرأيج بهذا لابرار
راعوث :- لا مو حلو ماتحب هيج
افراح :- اخخ منجن جا شتحبن
راعوث :- اني اعرف هسه صبريلي خلي اختار
– كلبت الفساتين كلهن وما عجبني شي بس اختاريت لابرار واحد الشال راح بوسط العلاليك مامتعوده عليه احس تبهذلت كل ساعه يوكع نزعته وخليته بالعلاكه
افراح :- ها راعوث ما اختاريتي شي
راعوث :- لا نشوف غير محل
افراح :- يله ولج تعبتيني كسرتي رجليه
راعوث :- طلعنه من المحل شفت رجال من طلعنه من البيت لحد لهنا وهوه يمشي ورانه وابد نضراته مو مال تحرش اصلاً من اباوعله يدنك رحنه لمحل غيره اول ما دخلت عجبني فستان
– اسود قصير من جوه تول والردن بي اثنين الاول خيوط والردن الثاني اكدر اصعده او انزله صاير تول شوي منفوش
راعوث :- اريد هذا
افراح :- هذا ماكو غيره اله هذا اسود
راعوث :- عفيه عجبني
افراح :- تلبسي متأكده
راعوث :- اي بس نسوان غير
افراح :- بكيفج بس غالي
راعوث :- عادي
افراح :- صرتي مرت عُقاب بعد ، حطلي هذا الفستان بعلاكه بلا زحمه
راعوث :- طلعنه من المحل شفت محل احذيه رحت عليه
افراح :- ولج اوكفيلي شلعتي كلبي لا ترحين وحدج بعيد
راعوث :- دخلت للمحل عجبني كعب اسود بي خيوط ينشدن على الرجل اشتريته وطلعنه شفت الرجال نفسه واكف قريب من يم المحل مشينه حجيت بصوت خافت
راعوث :- افراح
افراح :- ها بعد طلبي
راعوث :- هذا الرجال شبي يمشي ورانه
افراح :- وينه يمه
راعوث :- هذا ديري وجهج تشوفي من طلعنه من البيت لهسه يمشي ورانه
– دارت وجها افراح لزمت ايدي ومشت حيل طلعنه من السوك وهوه بعده يمشي ورانه افراح لزمتني حيل ومشت لشرطة المرور
افراح :- السلام عليكم خويه هذا الرجال يمشي ورانه وين مانروح لاحكنه
– وين خويه وين واكف لا تأشرين عليه بس كليلي شلابس
افراح :- لابس اسود هذاك واكف يم السياره
– امشي خويه معليج بي هسه اني رايح اشوفه
راعوث :- مشينه اريد ادير وجهي وافراح ماتقبل تصيح امشي بس اريد اباوع درت وجهي شفت الشرطي يحجي ويا الرجال طلعله موبايله وخابر يباوع علينه
– رجعنه للبيت غسلت وتغدينه وره الغده نضفنه وكملنه ماعدنه شي ابرار قاست بدلتها واني هم شفتها صارت اخذنه الغراض النحتاجهن ورحنه للبيت الثاني يجنن جبير وبي غرف فوك والاستقبال جبير واثاثه حلو
راعوث :- صدك هذا بيتنه الجديد
افراح :- اي والله
راعوث :- يجنن
افراح :- بفضل ربي وبفضل عُقاب صار عدنه هذا البيت الحمدالله والشكر
راعوث :- اممم
– بدينه نجهز البيت وافراح تعزم وتشوف شناقص وخابرو اهل الولد واتفقو وره العشه رحت اباوع بالغرف شكد حلوات لكيت ابرار كاعده وحدها وصافنه
راعوث :- شبيج
ابرار :- مابيه شي
راعوث :- لا بيج احجيلي
ابرار :- ماكو شي راعوث كافي
راعوث :- صاير شي ليش ماتسولفيلي مو جنه كله سوه وتحجيلي كل اسرارج
ابرار :- كرار
راعوث :- شبي
ابرار :- عليج الله لا تحجين احلفج بالحسين لا تحجين لواحد
راعوث :- سديت الباب وكعدت يمها ، شصاير عفيه احجي
ابرار :- كرار جاي يهددني
راعوث :- يهددج بشنو
ابرار :- بصوري
راعوث :- شلون شلون ابرار؟ دازتله صورج شوكت وليش؟
ابرار :- هوه طلب يشوفني والله وصورت ودزيتله عادي مو شايفني بالواقع حلف يحذفهن ويوم بعد يوم كمت ادز اكثر من صوره صار يطلب الصبح والعصر وبليل واني ادز مادري راح يضحك عليه وهسه مسجل كل اتصالاتنه وصوري كلهن يمه وهددني بيهن
راعوث :- شلوووون دزين صورج شلوووون كدرتيييي ابرار لا تخليني اصيح كولي جذب عفيه والله كلبي يوجعني
ابرار :- والله ما جذب والقران صدك الله يعلم شصاير بيه اذا مو انتي وهيج خفتي شسوي عفيه علميني راح اموت خوف وتفكير
راعوث :- زين شيريد منج
ابرار :- فلوس خمسه وعشرين واطلعله اونسه تفهمين شنو اونسه
راعوث :- ابرار شنو هذا الكلام انتي منين تعرفي منو علمج عليه؟
ابرار :- اعرف كلشي راعوث عفيه ساعديني ابوس ايدج خلصيني من هاي المشكله ما جاي اكدر انام ولا اكعد ولا اكل براحه احس بذنب ليش سويت هيج ليش خلصيني ابوس ايدج والله جاي اموت الف موته باليوم بس خلصيني ساعديني
راعوث :- من شوكت مهددج
ابرار :- من زمان
راعوث :- بيته اندله اسمه اعرفه اني اعلمه والله اله اخلي ينسحل بالسجون شلون يهدد اختي والله اله اخلي ينسحك على راسه بالقندره
ابرار :- شراح تسوين
راعوث :- معليج
– حضنتني بكل قوتها حسيت بنبضات كلبها وخوفها حضنتها وبستها
ابرار :- والله بدونج اضيع انتي سندي اني اسفه لان دزيت صوري جم مره كلتيلي لا تخابري وجذاب بس ماصدكتج
راعوث :- همزين مارحتي والله تموتين اذا رحتي او خفتي منه هذا الجلب همزين سولفتيلي
– بستها وكمت من يمها رحت سبحت لبست تراك نوم فرشت بالغرفه الكاعدات بيها البنات يحجن ويصبغن اضافرهن ويحضرن لباجر خليت مخدتي ونمت احس جسمي متكسر وبطني تأذيني غمضت عيوني و انتهيت بنومه عميقه ..
الفصل التالي اضغط هنا
يتبع.. (رواية راعوث) اضغط على اسم الرواية لتجد الفهرس كاملاً بجميع الفصول.