رواية الموروث نصل حاد – الفصل العاشر
فؤاد: بوية شلونچ ؟
همام : ما تحچي .
فؤاد : ليش ما تحچي ؟
همام : مانعها الطبيب .
فؤاد : يوم لكل النسوان .
همام : شني .
فؤاد : يدگن منع من الحچي .
نزلت راسي ارجف وهمَّ كلهم يضحكون بس
وارث احسه لعبانه روحه من الدنيا ما طايقها
فركت ايدي فرك من الشيخ سألني
_ ها بوية هسة اهلچ ينتظرون مني كلمة .
اشرت على نفسي وعلى باب الشارع
بمعنى اخذني رجعني وغصيت بالبچي
وارث : بوية عندي حچي وياك تعال ويايَّ بلا امر عليك .
گعدتني ميمونة وركضت على مطبخ تجيب ماي
تقرب همام يرفع بيده وينزلها مبتسم بوجهي ويهمس
_ ول بهداي شهيق وزفير لا تموتين مرجانتي .
لاحظت وارث يفهمه مندمج بالكلام هو الشيخ فؤاد
ونظراته ما رفعها من عدنا ، اخذت گلاص الماي من
ميمونة شربت قليل منه وجفلت من صوت الشيخ صاح
بوارث ويشمر بيده وگف على حيله منفعل ما سمعت
ولا فهمت منه غير كم كلمة
فؤاد : كاميرا وووووراث شلوووون تخليهااااا شلووون .
بس سمعت كاميرا ربطت الاحداث براسي
ومتت بدمي اكيد وارث ذكر الكاميرات الي خلاها
بذاك البيت صخام بوجهي وين اودي روحي من الفشله
تمسك وارث بأيده ويحچي بصوت خافت
وبس يأشر بيده ويضرب على صدره رجع
الشيخ كعد وبطرف اصبعه يضرب براس وارث
فؤاد : حرمتها على اخوك وانتِ تگلي ما اگدر عفية عليك .
شردت للحمام سديت الباب عليَّ احس گلبي يريد يوگف
وينچ عني يمه تعاليلي خلصيني وين عفتيني
غسلت وجهي اول ما سديت الباب
وسعت عيوني من صوت وارث وهوَّ منفعل ويهدد
_ بوية لا تگلي رجعها .
فؤاد : ولك تخلي روحك واهلك بحلگ الموووت .
_ هسة لو يذبحوني ما اخليهم ياخذوها .
فؤاد : هاي بحضور اخوانك ال ضـلـيل ما ينجرعون .
وارث : على گطع رگبتي ما اسلمها .
فؤاد : هي مو بالصوت العالم البت غلط تظل عدكم
وهيَّ غريبة بين خمس زلام منو يررضاهااا .
وارث : بووية نختني احميها شلون انطيهااا شلووون ؟
فؤاد : چا اعقد عليها وخليها تفض اهلها اذا يسمعون
تزوجت من چبير الموروثين يسكتون عنها يخافوك همه .
سمعت صوت تكسير حصرت روحي بين
الباب والحايط خليت ايدي على راسي من صوت غضبه
وارث : اذا اعقد عليهااا وتصير مريتي تصير بيد
ناس ظلام اضعاف ال ضـلـيل افهمني دخيل العباس .
بيرغ : ول عليش منفعل وحگ الله اردمهم ردم
شحدو ليتگرب من واحد بينا خليهم مثل الزمايل
يحچون ما نعبرهم واريد ادحگ ابن امه يغلط ويانا .
سَــهم : واذا على سالفة اهلك بخطر عمي احنا
نعشك الخطر الخوة حگ وياك على موت انتَ بس
توجهنا وخلينا بحلگ آلموت نلعن خيرهم .
طلعت من ابتعدت اصواتهم مبين رجعوا على استقبال
وام وارث وميمونة بالمطبخ يصبن بالأكل للزلم
بقيت بمكاني بصف الدرج حتى اخاف اتحرك
لا يشوفوني ويرجعون يصيحون ويحچون
بسالفة الزواج من همام والله لو اموت ما اقبل بي
مو اكرهه بس ، اتمنى هاي المشاعر تطلع وهم
گلبي ما اتحكم بدگاته من ألمح وارث ، من اتذكر
ما كلف نفسه وحتى لو بالجذب يريدني الدنيا
كلها تسود بعيوني اخخخخ يا قهررري شسوي بروحي
ياربي دخيلك ما اريد هل مشاعر تكبر يارب ساعدني .
طلعت ميمونة من المطبخ دگت الباب طلعوا
جـبر وسهم ياخذون السفره يفرشوها
وهي راجعه شافتني اجت وبعيونها حزن على حالتي
اخذتني من ايدي وگعدتني تعدل بشالي وتبتسم
_ لا تبچين شوفي كلنا نمر بمشاكل تشيب الراس
ونحس هاي النهاية وبعد ما نتحمل نكمل بس
لو نجي نفكر بيها لا يكلف الله نفسنا الا وسعها
رب العالمين يختبرچ ويعرف انتِ گد هل ظروف
خلي ايمانچ برب العالمين جبير ما راح يعوفچ .
هزيت راسي ابتسم بوجهه وهي متمسكة بيدي قوي
لمعت عيونها ودموعها نزلت تعبر على تعبها
ميمونة : بيوم من الأيام جنت بمكانچ وصلت
المرحلة اريد انتحر لان المصايب اكبر مني
ومن كتر وصوب كلها ضدي ويضغطون عليَّ
بس شوفيني هسة اني زينة كلش زينة وفد مرتاحة .
كررت كلمة مرتاحة وهي تأشر على نفسها وتشهگ
كتمت صوتها خنگت روحها بيدها وركضت على غرفة
سدت الباب خلتني باهته من منظرها ودموعها
الكسرة بصوتها ما تنوصف حيرتني .
طلع همام من المطبخ بيده ماعون
ياكل بي ويضحك هو وام وارث ، من شافني وگف
ثواني ورجع شمر الخاشوگة واخذ وحده ثانية
تقدّم عليَّّ يضحك ويرفع بحاجبه
همام : هذا شلون ماعون تمن وبامية ولحم يرد
الروح ، ها ترا بدلت الخاشوگة اخاف ما تحبين
تاكلين بخاشوگتي ، هاچ اكلي خلي الدم يرجّع بوجهچ .
حتى ما ينطي مجال للرفض نزله بحضني
وبعده مستمر يحچي يريد يضحكني
همام : هذا وارث موتچ من الجوع مو خوش
دخيلته انتِ عود بحمايته كاعد ياكل
وانتِ جوعانة افاااا زعلني منه زعلني .
ابتسمت من الخجل وطريقته بالكلام طلع
وارث من الاستقبال ردان قميصه مكفوف
وجه نظرة انزعاج اتجاهنا وكمل طريقة
بدون ما يوگف للمغسلة اجت امه تركض وراه
_ شبسرعة كملت يمه وين اكلت .
وارث : نفسي مسدودة .
كمل وهوَ ينشف رجع وكف بصف الدرج
ونظراته على همام ردت اشمر الماعون
وارث : شعندك هنا ما تفوت تگعد تاكل انتَ والزلم .
همام : اخذت حصتي ردت افوت يمكم بس شفت
مُـرجانـة گاعدة اجيت احچي وياها ورايح .
وارث : يلة توكل بالله فوت .
درت وجهي منهم اثنينهم والماعون خليته على صفحة
غمضت عيوني من صاح بعلو صوته عبالك انذار
وارث : ميموووووووونة .
طلعت تركض وتعدل بروحها وكفت مقابيله متحيره
_ ها عيوني تصيحني .
_ اخذيها بغرفتچ .
_ منو شسمها مُـرجانـة ؟
_ چا ابووووي .
_ اي اي عيني ليش عصبي گول اخذي مُـرجانـة .
_ ميمونة امشي .
_ اوي شبيك امشي مرجانتي على گولت همام .
مشيت وياها صعدت بدون مـا أتجرأ وارفع راسي
واشوف شكله گعدتني بغرفتها بيها سرير ابو النفر
وكنتور صغير ومرايا بزاوية الغرفة طويلة
عافتني ونزلت مستعجله رجعت بيدها صينية
خلتها بالگاع وصاحت بيه انزل أكل وياها
گعدت اكلت من كل كلبي الاكل ما ينشبع منه
بطني صار ايام توجعني من اكل المطاعم
شربت گلاص لبن وطلعت غسلت ورجعت ركض
ميمونة نزلت واني من التعب والبچي شبعت
ما ادري ولا حسيت على روحي شلون غفيت .
حسيت بعد فترة بين النايمة والكاعدة
بحركة بالغرفة ما اهتميت وبقيت على نومتي
فكرتها ميمونة هاي غرفتها اكيد تفوتها
بعدني اريد اكمل نومتي ومثل ظل شخص
ضخم صار قريب مني تحركت بخوف فتحت عيوني
شهگت من شفت وارث يريد يطلع على الصوت
رجع التفت مـن شافني رجع وطبگ الباب
وگف بثبات ايده بجيوب البنطلون
انخبصت اعدل بالشال واسمعه بصوت واضح طلب
وارث : تعالي .
گعدت عدل اشرت على نفسي بمعنى تقصدني
وضعي تخربط اريد الملم روحي واثبت فشلت
وارث : اكو غيرچ ؟
صرت مقابيله متردده رفعت عيوني بعيونه
تحس گلبي يريد يطلع من مكانه توترت
هسة هذا شنو يريد جاييني مو جنت نايمة
حتى ما مصحصحة وهوَ ينزل راسه يحاچيني
وارث : اكلتي ؟
ابتسمت واحس صار خفقان بگلبي
واصابيعي ثلجت صرت اضحك بلا وعي
هزيت راسي بـ ” اي ” وبعدني مثل الزمالة
اضحك واعدل بروحي وارفع راسي حتى اشوفه
وارث : هذا دفتر وقلم يمكن تحتاجين شي وما يفهمون عليچ .
اخذتهم من ايده وايدهي شهرتني شهيرة
ترعش رفع حاجبة من شافها وطال النظر بوجهي
قلص عيونه وهوَ يسألني بأهتمام
وارث : بيچ شي ؟ ايدچ شبيها خايفة مني ؟
هزيت راسي بكل سرعتي بـ” لا ” ورجعت ابتسمت
واني ابتعد منه اريد اتنفس حتى انفاسي گطعتها
گعدت على سرير وبيدي الدفتر والقلم اريده
يطلع قبل لا اموت ، تغيرت حالتي من سمعته يگول
وارث : الغرفة بيها كاميرا نبّهتچ حتى تاخذين حذرچ .
خزرته واني ادورها بالغرفة شمرت الدفتر والقلم
ورحت اتفحص الزوايا بالغرفة ماكو صرت بوسط
الغرفة هوَ واكف يراقبني بتمعن فريت ايدي
بهدوء واشرت على غرفة كلها وعليه
اريده ياخذها ويطلع حك جانب خده ورد بهدوء
وارث : لا تحاولين ما اشيلها .
جريت الدفتر والقلم اكتب مخربط من العصبية
وصرت قريبة منه حتى يقرا قبل لا افقد اعصابي
_ مو من حقك تخلي كاميرا طلعها .
_ من حقي حتى اكدر احافظ عليچ منهم .
اريد ارجع اكتب ترك الغرفة وطلع شمرتهن على
صفحة ولفيت حجابي عدل ، يعني والله مو حالة
هاي ليل مع نهار لازم مخنوگة بهل شالات رجعت
نمت بالفراش وغطيت نفسي زين وخجلانه
شلون راح يفتح الكاميرا ويشوفني اخاف
انام وملابسي تنرفع اجه خرب نومتي
وعافني ألوب بمكاني الحد ما اجت ميمونة
فرشت فراش بالگاع ما قبلت رحت اني نمت
وخليتها ترجع بفراشها تنام طلبت منها
اطفي كل انارة الغرفة حتى انام براحة بدون ما أتكشف .
للصبح اسمع أصوات عالية بين اطلع واظل
بغرفتي احتاريت تالي مايت وطلعت وگفت
على درج اريد انزل وجمدت بمكاني استمع
لكلام بيرغ وسهم وهمام واكفين يتراددون
بيرغ : نروح انا وياكم نعتذر من وارث .
همام : واذا صار عصبي .
سَــهم : والله عيب شكو بيها يصير
عصبي غير اخونا الجبير مكسور ظهره علينا .
تذكرت كلام وارث عنهم دمعت عيوني
ياريت يسمعهم شلون يحجون عنه
كعدت حتى ما يحسون عليَّ ولا يشوفوني
همام : وحگ الله البارحة ليلي كلو ما گدرت انام
مكسور خاطري ضغطت عليه هواي بالكلام مو ؟
بيرغ : جيره بفرگك تنگط سم ردت اكتلك البارحة .
سَــهم : ها انوب انتوا تتعاركون امشوا نشوفه وين امشي .
ما اشوفهم غير صعدوا طفرت بالحمام اقرب
شي عليَّ فتحت الباب ودخلت أتنفس سريع
همزين ما شافوني ، وياريت شايفيني ولا هل
مصيبة ألي خليت روحي بيها نشف دمي بجسمي
من التفتت وصار وارث مقابيلي يلف بالمنشفه
وأصوات اخوانه برا عالي صار قريب ردت افتح
الباب اريد اطلع دخيلك ربي يمهههه كون ميته
يبووو عليه يبوووو ، جر ايدي من الباب ورفع
اصبعه على شفايفه حتى ما يسمعون همس
_ اششششششش .
غطيت وجهي بيدي ما اگدر اشوفه بهل منظر
تقرب صوتهم عرفهم فتحوا باب غرفته همس
_ مو وكتها ، هذولي شعدهم بغرفتي .
خليت بس تك ايد على عيوني احسه كلش
قريب مني گلبي يمه گلبي راح يوگف
اشرت على باب بمعنى اريد اطلع صغط
على مخارج الحروف بعصبية ونتر بيَّ
وارث : وين تطلعين غير يشوفوني وياچ
وتشتغل الفضايح شعدنا انا وياچ وحدنا بالحمام .
حصرتني البچيه مثل ما هو حصرني مدري
اني اي والله اني خليته بهل مكان وهل حصره الخايسة
نزلت دموعي يا فشلتي يا شهيرتي خززي تخزيتي
وتعزيتي يا مُـرجانـة وثول كون ثوول ثووولني ثول
هيچ لمح اول كم دمعه نزلت حط ايده على باب معصب
وارث : لاااا تزيديها وحگ الله اذا تبچين افتح الباب
واشهرچ واشهر روحي خليهم يولون ينزلون ونطلع .
شلت ايدي اريد امسح دموعي شفت جسمه
نشغت وبعد فقدت السيطرة على عيوني
راد يفتح الباب وكفت امنعه يمه اذا يشوفوني
وياه ادفن روحي ما اظل اشرد والله كتمت روحي كتم
من بيرغ تقرب من الحمام وصاح
_ يولو وارث انت هين ؟
فتحت عيوني على وسعها هوَ نزل راسه يباع بعيوني
خنگت روحي اقترب اكثر من الباب صار بصفي
وارث : اي هنا شكو ؟
بيرغ : منتظريك شوكت تطلع ؟
وارث : شعندك ؟
_ هسة شعدنا اطلع نريدك .
وارث : انزلوا دقايق وانزل وراكم .
بيرغ : لا منتظريك هنا ما نتحرك .
هزيت راسي منا ومنا انود بمكاني دگيت على راسي
خزرني درت وجهي منه انوب هو ابو الراهي
راح اموووت يااا اريددد اطلع ولكم طلعوووووني .
وارث : لا تنتظرني مطول بالحمام .
همام : شعندك مطول .
وارث : بكيفي اريد اطوووول بكيفي .
همام : اطلع هسة بس احچي وياك يمعود .
وارث : جاي اسبح ساقطين منحطين غير اسبح
اطلعععع شنوووو اطلعععع امشي ولي انت وياااا .
احس صار عندي طلوگه نزل روحه لمستواي وهمس
وارث : راح ابتلي بيچ لا تبجين لا تتنفسين اسكتي .
لزمت خاصرتي ولزكت روحي لزگ بالباب
سَــهم : حبي عدنا سالفه وياك .
وارث : اكمل وانزل سَــهم اخذهم وانززززل .
همام : امشوا ننتظره بالغرفة بين ما يطلع .
وارث : لااا غرفتي لاااا امشي انززززل .
همام : اكلك ماكو صوت ماي مو مخلص ما تطلع .
بيرغ : ها وارث شسوي بالحمام تعال اطلع نزوجك عمي .
كلشي ما فهمت بس هو انفعل وضرب الباب
ظل يسب بيهم منفعل والثلاثي خربانين ضحك
وارث : اذا اطلع شيخلصكم من ايدي اليوم سفله .
همام : يمعود هسة انت اطلع وراضين بس اطلع .
نفذ صبره سكت منهم وراح على ماي فتحته
صار يطفر عليه وذيال دشداشتي رفتها حتى ما تتبلل
هو واكف بصف الدش واني بصف الباب ودرت وجهي
على حايط اعبر على فشلتي بالبچي ما مقسومة
يمر عليَّ يوم مرتاحه اذا ما اوگع بموقف يبچيني
سد الماي وتقرب من الباب فتحته قليل وقبل
لا يطلع تقرب مني خليت ايدي لا ارادياً على گلبي
وارث : من اطلع اقفلي الباب ابقي دقايق واطلعي .
طلع واني نفذت گعدت ادگ على راسي والموقف
هيچ فلم ويمر بعيوني لچ دگي الباب شوفي
منو موجود الله لا يوفقني على هل دگه الناقصة
تعدت الربع ساعة واني على نفس مكاني
جسمي كله نز من دگ الباب فتحته قليل ومديت راسي
وارث : تخربطتي ؟ لزگتي بالحمام ما تطلعين .
كشرت وجهي وكملت بجيتي بوجهي دفع
الباب وطلعني لازمني من طرف دشداشتي
رجعني على غرفة فوتني وعاط بيَّ
_ امچ من جابتچ جانت تبجي ؟ ورمتي كلبي .
عافني وهوَ يدردم نزل سريع على درج
اروح وارجع من اتذكر اريد اشرد منا
هسة بس لا يفكر متعمده ادخل عليَّ
عود حتى يتزوجني لو اسوي مشكلة
هوَ حتى ما سألني ليش دخلت بهل طريقة
عدلت شالي اريد انزل حتى اكحلها لازم
اوضح الثار عيب ياخذ فكرة مو حلوة
اول ما خليت رجلي على درج واشوفهم
همام وبيرغ وسهم واكفين وهوَ كاعد على
تخم بنص الصالة وامه تفتر هي وميمونة
وام بيرغ موجودة وحتى ام همام من شافني
اخذن لحظة صمت اني شفت ام بيرغ رجلي
صارت خيوط ردت ازحف على غرفة لو ما هذا همام صاح
_ مُـرجانـة وين حدري هين بساعچ .
فهيت وبقيت بمكاني والأنظار كلها متوجهه عليَّ
بس بيرغ بيهم راح گعد وما يركز ويايَّ بلعت ريگي
من اجه همام بصف الدرج ابتسمت بوجهه ونزلت
وعيوني ما شلتها من ام بيرغ كل خزره تخزرني
بيها تخليني اصك ، التفتت على ميمونة تحاجيني
فتت وياها على مطبخ گعدت بس اني وياها ناكل
التفتت على صوت همام مسوي لفة لوارث وارث
يدفع بيده وهذا يريد يوكله
همام : بالطلاگ تاكلها مني .
وارث : بالطلاگ ما اكلها لو اموت .
همام : عمي سامحني گلبك اسوووود .
وارث : گول انتَ زمال واسامحك .
همام : خاب طبك مرض لا تاكل .
رجع همام بمكانه نهض بيرغ على ركب رجله
ولزم همام من رگبته ونزلها بكل قوته حط راسه
بمستوى رجله وعاط بي
بيرغ : صار ساعة انصح لاااا تغلط تعال سَــهم
عت لسانوووو اگصه اليوم نخلص منو .
همام : خاب انتوا زمايل سفله تردون اغلط على روحي .
وارث : دمطله خل اگطع لوزته اخلي اخررس .
مدده بيرغ لازمه من راسه گاعد على صدره
وسهم لازم رجله وهوَّ يريد يرافس بيدهم
سحب وارث شعره وضربه راشدي رنان
وارث : منو زمايل ولك ؟
همام : انتوووا فاشلين تفوووو وليه مال مخانيث يمااااااااااا .
بيرغ : اليوم لو مو تصيح امك هساع لو ابوك يجي
يگلي عوفو هل ارعن ما اهدك محد يخلصك من ايدنا .
همام : بس اتنفس وارث ول ول ول عوفوني .
راحت امه تركض من ضربه وارث راشدي ثاني
ظل يفر براسه ويعيط دخت وسهم يدغدغ برجله
نزل بيرغ مدري شيحجي بأذنه ظل يزاگط الزلمة
بيرغ : بسااااع المگص المقص من المجرر اركض سَــهم .
وارث : تلاحگ لروحك .
همام : زمااايل وحگ الله بس اگوم اذا ما اخخخ اخخخ راسي .
وارث : لا تحچي ما اسمع صوتك .
همام : وارث خليهم يعوفوني .
وارث : منو زمال ؟
همام : انا زمال .
بيرغ : اريدها بصوت عالي منووو زمال .
همام : اناااااا زمال .
سَــهم : نريدها بالأسم مو شباب ؟
وارث : رأيي من رأي سَــهم منو زمال بالأسم .
همام : انا همام زماااااااااان راح اموت اختنگت .
بيرغ : وروثي اخلي سبيله ؟
وارث : لوجه الله اخلي سبيله نكسب بي اجر .
بيرغ : هاي الخاطر وروثي .
نهض منهم يتنفس سريع شعره مخربط
وملابسه شي صاعد شي نازل عض اصبعه وعاط
همام : ما تنلام بيك البت ما گالت روغااااااان
سافل منحط حاجتك يمه تعبده بعد تبيعني
الخاطر وروثي موووو خوووش
وانتَ سَــهم اطيح بيك اذا ما اگضي بيك التوبة .
وارث : شحدك وحگ بدر الهواشم اذا اطخه
حظ حظك اطيحه ، روح ولي لا اهدهم عليك .
گعد بعيد منهم يشوف برجله ويدردم
وهمه رجعوا ياكلون باع عليهم وصاح بقهر
_ انا غلطان اجيت اعتذر منك امداني .
نزل يشوف ايده ابتسم وارث ونهض همام
فز يريد يصعد عباله يضربه سحبه
وارث وباس راسه وضربه بوكس
على بطنه وهمام يبعد بي وارث يجر بي
وارث : تعال اگعد يمي شبيك نضحك وياك .
همام : شوف وجهي من ضرباتك .
وارث : تعال ابوسك تعال .
همام : اريدهن فلوس وين اصرف البوس .
وارث : هههه الراشدي بيش ؟
همام : بمعجونية .
اخذه گعده وهوَ يصيح
وارث : ميمون .
خلت الصمونة من ايدها وراحت عليهم
وارث : فلوسي فوك جيبي المحفظة .
سَــهم : هاك اخذ فد اربع راشديات بـ اربع معجونيات .
خلت ميمونة المحفظه بيده طلع مية الف
اخذهن همام خلاها بجيبه
وارث : بيرغ اضربك فد راشدي الواحد ب100 .
دفع بيرغ ايد وارث حيل وصاح بي
بيرغ : اطگك بوكس واتنازل على كل املاكي .
وارث : تخسي وحگ علي لو اموت .
بيرغ : عجل تريد تضربني شني انا نازعها الكرامة مثل همام .
همام : ضربتوني گوه مو برضاتي سفله
وبعد انا انضربت انضربت على اقل احصل فلوس .
عافهم وارث راح يغسل وهوَ يضحك
ورجع دخل على مطبخ طلب گلاص ماي
ميمونة بيدها جيس زبالة ركضت تشمره
تقربت منه وحركت ايدي اريد اكتب
اخذت تلفونه من ايده وكف ينتظرني اكمل كتبت
_ اسفة والله من صعدوا اخوانك ردت
اركض على غرفة بس الحمام صار اقرب دخلت
والله والله ما ادري بيك بالحمام من خوفي فتت بلا تفكير .
اخذ التلفون قراها ومال جسمه اتجاهي وبتلاعب ردني
وارث : وحگ علي مو انتِ خفتي انا خفت هجمتي
على حمام گلت رحت بيها يا وارث .
_ يا ترا مو قصدي شبيك .
_ استري عليَّ الله يستر عليچ .
وجهي احس اشتعل نار وهوَ يشنج بوجهه
حتى ما يضحك بوجهي شمرت التلفون على
صدّره اخذهـا واني شردت اريد اطلع واندفر
الباب مال شارع صرخت ميمونة ولزگت بالحايط
دخل رجال ضخممم طويل وجهه اسمر وجناته سود
وحواجبة ثخينة مابي ذرة رحمة بملامحه عت
ميمونة بكل قوته من دشداشتها وفرها بيده
_ العارية اخووووتچ وينهمم .
سحب وارث الكرسي وجر ايدي رجعني وطلع
شمر الكرسي بتجاه الرجال اجه قريب منه
بعده ما طالع وانفتح باب الاستقبال
ركض همام متخبل وبيرغ وسهم وراه
اخذ ميمونة من ايده ودفعه
همام : خلف ايدك اذا ترفعها وطخ اختي طخه
اكلك اكل بسنوووووني اذبحك والله اذبحك .
رفع ايده خلف ويأشر بمعنى روح مو طريقي
عبره وراح على وارث يهف بعباته
ام وارث : خلي يولي يمه وارث العباس عليك تجاهله
الخاطري يمه الخاطري .
خلف : ها يا منبوذ طالع صيتك وصوتك
تخطف نسوان وتسود سمعة أراضي اخوي .
وارث : وين اليوجعك خلف دليني بي ابدي بيك دگ منه .
خلف : طلع البت نزلت روسنا بين العشاير طلعها .
وارث : روح منا ساكت الخاطر شيباتك روح لا اهينك .
اني اتراجع وما احس غير ايدي انمردت مرد
درت عيوني برهبة من شفت ام بيرغ سحب بيَّ
وشمرتني على باب وگعت بكل حيلي جوا رجل وارث
وهذا خلف واسمع صوتها تصيح
_ اخذوها ما عايزين مشاكل بين العشاير مشاكلنا كافي .
لزمني عمهم من ايدي صارت ايد وارث على ايده
وارث : عوفها ايدك منها .
خلف : يريدون بتهم ول يردوها .
وارث : خلففففففف ايدك منهااااااااا عوووووفها .
خلف : هذا مسودن ول يذبحوكم غير بتهم .
وارث : وبدر الهواشهم اذا ايدك ما تعووووف ايدها
هنا امددك وانعل خيرررررك انت وياهو يطلع وراك .
جرني خلف يريد يطلعني جر وارث البشت مالته
وبيرغ راح على باب يركض قفله وهمام وسهم
صاروا بوجهه ضربة اكثر من خمس بوكسات
على ايده حتى يفكها احس ايدي تملخت تملخ
من ضرباته اول ما فتحها متأذي يصيح
جرني وارث يتفحص بيدي ويمسح بيها بلا وعي
وارث : تأذيتي اجت ضربة من الضربات بيچ
باعي مُـرجانـة حاجيني ايدچ توجعچ ؟
ركضت ميمونة سحبتني منه وفوتتني وام
بيرغ تضرب بيها على راسها وهي تدفع بيها
حتى ما تلوحني دفعتني فوك بقيت ازحف
بس اريد اصعد رجلي توجعني من رهبة الموقف
وصوت ميمونة هز البيت هز تهدد بيها
_ الله لا يوووفقچ سميتي اطفاله وسكت
وسامحچ الخاطر بيررررغ مااا وگفت بعينچ
انتِ شنووو من بشررر الله ينتقم منچ
جهزي روحچ هسة هم راح يطررردچ .
ام بيرغ : طلع صوتچ والله ورجع صوتچ يلعلع
صبررريلي يا بنت ساجر اذا ما افوت عليچ
صگارچ تعررفي مووو اخلي يگطع لسانچ
هوو دمه حامي عليچ يفتر يدورچ اخاف
ما يحچون يمچ تررررا رجععع يحوووم
بيوغ مقيدة سهلة انااا اعلمچ .
اجت ام وارث تضرب على وجهه من شافت
ميمونة گعدت على درج مخروعه مركزه بكلام ام بيرغ
ام وارث : ولچ اسكتي لل يسمعون ويتخبلون
استري عليناااااا عوفيها الولد تذابحوووووا .
ام بيرغ : لاااا وحگ الله ما اسكت تسبني ميمونة تسبني
امداني اي والله امداني خليني افوخ كلبي بيها
ول اسمعي وحگ هذا الله رجع ويفتر بس يريد
يعرف مكانچ وتعررفين اذا اطيحين بيده يشرب
من دمچ بركان ومفجوووور تعرفين شني بركان
ومفجورررر ذاك اليوم رايد يوصل للبيت وبيرغ
لزمه وضربة طلقة مدري سجين وشارد يريدچ
ما يعووفچ لووو تموووتين وراچ وراچ .
بيرغ : يمهههههههههه ول يمههههههههه .
حجاها وهو يصعد يركض على ميمونة
حالتها تصحب على عدو جسمها كله يهتز
وايدها قابضتها وخلتها على شفايفها فاتحة
عيونها وتباع على بيرغ تهز راسها وتصرخ
ميمونة : رجعععععع راح يموووتني رجععععع
بيرررغ رجععععع يمهههههه لااااا لااااااا .
دخلوا على صوتها همام وامها بالمطبخ تصيح
وتدعي على ام بيرغ دخل وارث من شافها
نظر نظره على ام بيرغ ركضت للغرفة وسدت بابها
صعد جرها من ايد همام وبيرغ حضنها وهي تصيح
ميمونة : طلعوني منا اخذوني بعيد ابوس ايدك
وارث حباب لا ترجعني الله يخليك راح يموووتني .
رفع وجهه يمسح بدموعها ويبوس بيدها
وارث : منوو يموتچ و وارث اخوچ ميمونة
اجلده ياهو يلزم ويگطع خصله من شعرچ اجلده
وحگ العباس بحمايتي انتِ بحمايتي ميمونة .
مسح همام على راسها وايده على ظهرها
وبيرغ نزل يركض على غرفة امة دفرها وفات
صعدها وارث حاضنها فوتها للحمام يغسل بوجهه
ودخلها على غرفة وهي تسأل بي
_ هو ليش رجعععع ليشش .
گعد يمها لزم ايدها وبصوت خافت يفهمها
_ صح رجع بس ما يكرهچ ولا حاقد عليچ .
عصرت عيونها حيل سدتها وهزت راسها
_ شلون مو حاقد والله اذا يلزمني يموتني
اني اعرفه انتوا كلكم ما تعرفونه بندر مجرم .
خطف نظرة على باب شافني بس اني
موجودة وكلهم جوة همس بصوت ناصي بينه وبينها
_ ومثل ما انتِ تعرفي انا اعرفه .
_ شفته ألتقيت بي مو ؟
_ اي .
_ يريد يموتني دخيلك اخذني منا .
_ توسل بيَّ يريد يشوفچ حتى لو من بعيد .
رفعت اصبعها تدفع بيده وهو يلزم بيها صاحت
_ احلفك بالله لااااا لاااا حتى من بعيد لااااا
اذا يشوفني راح يزيد ويتخبل الحد ما يوووصل
وياخذني اذا ، اسمعني بس اسمع وارث
اذا بندر اخذني اموووت روحي ما اريددده .
حضن وجهه وصاح بيها
وارث : ميمونة بلغته والله بلغته انتِ تكرهي ما تريدي
وراح بعد ما يرجععع راح رجع اختفى كافي اشششش
انسي انتِ بنص اخوانچ ما يلوح ظلچ .
من دخل همام عليها وارث طلع وهوَ يسحبني
من طرف ثوبي وگفني بصف الحايط وهمس
_ بالله اشوف ايدچ .
رجعتها خلف ظهري وهزيت راسي بمعنى ” مابيها شي ”
يريد يسحب ايدي وبصعوبة تمالك نفسه مبتعد
وارث : اشوفها بس اشوف شصار بيها .
مديت ايدي المعصم متشخط من اظافر هذا الخايس
هز راسه ونزل مستعجل صوته عالي
_ بيرغ لا تگلي خاطررك ما خاطرك طلع امك .
_ حقك والله حقك بس هاي امي ومكان ثاني ما عدها .
_ چاااا ما تحترررم روحهااااا وتگعد
شلووون تشمرر البت على خلف عمك العااار
شلون شمرتهاااا وخلت ميمونة تتخبل صاحية امك بعقلهاا .
بعدهم يحچون ودخل جـبر يركض
ملابسه وجهه مصخمات صاح بصوت هز البيت بي
جـبر : وارث بيرررغ ال ضـلـيل حرگوا اراضينا .
وكفت على درج وارث رفع وجهه شافني ورد
_ ال ضـلـيل اعلنوا الحرب واحنا جاهزين .
دخل خلف وياه ست شباب بعمر بيرغ وهمام
وبيهم اكبر منهم لوسط البيت وارث يستمع للكلام
وركض صعد فوك للغرفة صاحوا
_ ما نساندكم على غلط عدهم حگ
رد البت وكف الشر لا تخليها تصير دم .
طلع بيده سلاحه وهمام بظهره وبصوت
جلجل البيت يدوي صاح بيهم وانا فوك يشوفوني
وارث : دخيلة ولاذت عندي بنت ال ضليل
بحمايتي ما اسلمها خليهم يهدروني دمي قبل دمها .
غـاليـة ..
فتحت الجامة بس دخلنا المنطقة ونقش الطريق
كُله تتذمر ما راضية على خطوتي
_ ماما والله خايفة عليچ عصبي صاير نار
اهله مطلعهم مايريدچ ولا يريد امه ولا اخو
شلون ترجعين وهوَ منبه ممنوع ترجعون
گلبي قابضني عليچ لا تفوتين ، يمه راح يعرف اجيتي
علمود مرجانة وتعرفي شگد يضوج من تتنازلين
الخاطر المصلحة راح يعصب بالزايد .
وگفت السيارة مقابيل الباب وجاوبتها قبل لا انزل
غـاليـة : اكلتي راسي اكل يبووو عليچ وعلى عنادچ
هسة شعليچ قابل شيسوي يموتني خلي يضرب
خلي يضرب بالله نشوف تاليها وياه وين يوصل .
دفعت الباب الگراج مغسول والديوان يطلع منه
دخان بخور منتشره بكل مكان دفعت باب المطبخ
عفاف ودلال گاعدات وياهن سماهر وامها يتغدون
ضحكت على ملامحهن شلون تحولت من الضحك
للصدمة متعجبات من دخلتي
غـاليـة : الف عافية ببطونكم شهل لمه الحلوة تنگط عسل .
وكفت عفاف تباع من الشباك ورجعت تستفسر مني
_ شني ضـلـيل رجعچ .
غـاليـة : لا انا رجعت وحدي من ذاتي .
دلال : يا يمه غير يذبحچ ما يقبل امشي ارجعي بساعچ .
نزعت حذائي الرياضي شلتها ودخلت نقش اخذتها من ايدي
مشيت على غرفة ضليل سماهر وامها وجوهن
ما تتفسر بعد وبلا خجل اسمع ام سماهر تحچي
_ هاي لو كوثر تدحگ عليها شلابسه تلزمها وتكتلها .
دلال : البغدادية تصغر بروحها .
عفاف : بالله ما تستحي لابسه فستان مخصر
على جسمها كلو مبين عود شوفوني صغيرة .
رجعت عليهن ورفعت الفستان من الطرف
غـاليـة : شبي الفستان عجبكم تريدي
حتى لو تاخذي ما يجي على قياسچ البس xL
انتِ كم اكس تلبسي دبل إكسات لارج غثچ الفستان غثچ ؟
عفتهن يتهاددن ويتراددن والسب وووو دخلت
للغرفة وصوت التلفونات صارت تتراگع كوثر
من صوب وتمار اخر شي دخل مقتدر دگ
باب الغرفة بكل قوته عباله اخاف فتحته اريد احچي عاط
مقتدر : شعندچ هين مهبولة انتِ تريدي يدخل
بيچ سجون على يا اساس تردين والزلمة ما راضي .
غـاليـة : خوية اطلع منها لا تدخل انا والزلمة نجازه .
مقتدر : امشي اردچ انا اردچ البغداد قبل لا يرجع
هو هساع عندو گعده وملتهي بيها عصبي
وحگ هذا الله ماا يتفاهم يمكن بنتچ هم حجت
عصبي ما طايق روحوو تكفي الشرر وردي لبيت امچ .
غـاليـة : ما اطلع وعيب تحاجيني وتريد اطلعني
اذا رجع شيخكم وگال اطلعي عود بذاك الوكت اطلع .
عافني وهو يصيح وراح وياهن يعيط نصحتها
وما تنحمل ولا تنرد سديت الباب بالساعة
وسمعت صوته يتجادل هو ومقتدر
ضـلـيل : الوجوه تتلاطم خيركم .
قبل لا يجاوبون ركضت على باب اتأكد
من الصوت يااا يااا هاي امه اجت عزززا
مو وكتهاااا وتمار هم هاي اصواتهم
ضـلـيل : شكووووو هنااااا مقتدر اخذهم ما اريد اتجاوز .
كوثر : تطرد امك واخوك وبنت ذياب مگعدها بالبيت يا .
مدري شنو كسر بحيث ركضت گعدت على سريع بخوف
ضـلـيل : بنت ذياب بيت امهااااا يمتى رجعتها انااااا .
مقتدر : غـاليـة بغرفتك خوية .
شگد ما اقوي بروحي بس اخاف من ردات فعله
صوته راح ما اسمع بعد ولا واحد بيهم بس
اريد اتحرك والباب انفتح دخل حسيت نظراته
اخترقتني ما مصدك بوجودي ثبتها عليَّ
وترك الباب مفتوح ودخل يمشي خطوة بخطوة
مرجع ايده خلف ظهره صار گدامي خليت عيني
بعيونه رفع حاجبه وغمز وبكل هدوء يحاجيني
ضـلـيل : على شنو ناوية بنت ذياب ؟
غـاليـة : الله يساعدك .
ضـلـيل : رجعتچ شني معناتها ؟
_ بيت زوجي وابو بنتي واجب عليك
تبقيني بنص بيتك وفي حـال ما تريدني ننفصل
حتى بعد رسمي مايصير افوت بيتك .
اريد اكمل كلامي رفع ايده بوجهي غمضت
عيوني من علو صوته حسيت عبالك كفخني
ضـلـيل : ول شااااااااااهين وينووو هذا شاااهين .
شاهين : ها عمي ؟
_ بكيفك ترجعها وياك ؟
شاهين : عمي رحت وصلت نقش الشيخة اصرت ترجع ويايَّ .
كوثر : شيخة ياهي شيخة ابن النعال .
غطيت راسي من شال تحفية كزاز
طشرها بنص الصالة تفلشت تفلش صار عدهم كتم
ضـلـيل : امشي شغل سيارتك رجعها لبغداد
وانتَ مقتدر رجع امك اريد كلشي يرجع مثل الصبح يلة .
اعتصر گلبه منه بودي اوگف اصرخ واهجم
المهجوووم على راسهم بس مجبوره اسلكها
طلع شاهين وهو يعض شفته يريدني اسكت
درت وجهي عدلت گعدتي رجع وگف منتظر اطلع
ضـلـيل : الولد شغل السيارة .
_ ما اروح خلي يطفيها .
_ عود تمشين كلمتچ عليَّ .
_ لا وين .
_ تفرضين رجعتچ تخليني امام امر الواقع ؟
وگفت اخذت ايده جرها مني حيل جاوبته
_ لا ضـلـيل لا كافي يا عيني .
_ بنت ذياب بعدني احچي وياچ عدل
امشي ولي منااا تكفي شررري امشي .
_ ليش تصير عصبي بس هدي نتفاهم حباب .
رجعت گعدت تمالكت اعصابي بمعجزة
غـاليـة : ما اروح ضـلـيل ما ارجع لبغداد .
لزمني من زندي وسحبني وگفني وياه جسمي
انضرب بجسمه وبيده الثانية ضب على وجهي
ضـلـيل : لا وحگ الله تروحين وكلمتچ ما تمشيها
ولو انا لو انتِ هين هسة راسچ اقلعوووووو .
غـاليـة : تريد تضرب لا تحچي سويها
تريد تموتني لا تهددني موتني ما اطلع يعني ما اطلع .
شمرني على سرير وراح بعيد شمر البشت
وجر الشماغ والعگال بيده باقي ويمشي
بالغرفة وما عاف واحد يعتب عليه بالمسبات
ضـلـيل : اريد اخلص تبديل وما صايررر
حل انعل خيركم ما تبقون لا انتِ ولا همَّ ما اريدكم
ومحمد إذا تظلون لا ابقي بيت لا سياراتكم
تفليش اخدكم حاصل فاصل
بالبيت ما تباااااااتووون خوووووش ما تبقون .
نهضت على سريع اريد اسد الباب عباله راح
اطلع سكت من وصلت للباب ابتسمت وطبگته
ورجعت امشي رجعت اخذت ايده جرها مني
غـاليـة : والله العظيم هاي العصبية مو طبيعية
مايصير شاب راسك من الصوت العالي .
ضـلـيل : على اسااااس اهمچ العرمة .
غـاليـة : بس اگعد نحچي انا وياك اذا كلامي
ما عجبك بدون ما اعاند بسررعة اطلع .
ضـلـيل : مو بكيفچ انا بكيفي .
غـاليـة : براحتك وبرأيك كلنا نمشي والله بس اگعد .
عگط الشماغ بالگاع وگعد فاتح رجله وجر
الباكيت يورث جگاره صرت قريبه منه اخذت
الجداحة شغلت الجگارة ورجعتها وانا
واگفه بين رجله رفعت وجهه بيدي بكل هدوء
أبتسمت وانا اركز بعيونه مسحت بطرف اصبعي
تحت الجفن ومشيت ايدي قبل لا يسحبها
دخلت اصابي بين شعره وبحركة بطيئة أحركها
غمض وجسمه كله هفت مرتخي براحة همست
وانا ابتسم بعد ما شفت تأثير لمساتي عليه
غـاليـة : تعبان .
_ لا .
_ عبالي تعبان ردّت ابوسك .
فتح عيونه يريد يتأكد احچي صدك لو استفز بي
قدمت اصابعي على حاجبة ادلك براسه
ضـلـيل : شعندچ غـاليـة .
_ ماعندي شي ارتاح .
ضـلـيل : اعرف ليش رجعتي .
گعدت على رجله من فتح عيونه يتابع تحركاتي
وينتظر جوابي تقربت من اذنه وهمست
_ شيخهم ما اشتاقيت الغالية ؟
تشنج كل جسمي من شالني بكل قوته گعدني مكانه
ضـلـيل : بنت ذياب اعرف عليمن راجعه
ومن هسة ابلغچ ما تحصلين مني لا شر ولا خير .
ردت ارجع بس اگدر اسيطر على غضبه
اول ما وگفت جر فستاني بين ايده ومرد وجهي
بيده الثانية عيونه صايرة دم تبث الغضب منها صاح
ضـلـيل : لا تستغلين ضعفي لا انعل والدي والديچ .
دفعني هنا كل صبر بعد ماعندي تورم گلبي صرخت
_ شبيك ضـلـيل هااااا شبيك .
ضـلـيل : لا اريدچ ولا اريدهم امشي ارجعي .
_ لازم عجبتك خلواتك انتَ وسماااااااهرررررر .
تقدم بخطوات سريعة جر ايدي بكل قوته ونتر بعصبية
ضـلـيل : شگلتي .
_ عجبتك بنت خالتك يمكن حلالكم الجوو وحـ ؟
سد حلگي بيده والثاني خلها خلف راسي يضغط عليها
ضـلـيل : اششششش ول اششششش صوتچ .
بقيت املخ بيده اريد يفكني اريد احچي
ضـلـيل : بنت ذياب تريد تهجمين البيووووت .
ضربت ايده بكل قوتي وهو يقوي بالضغط
من شاف حركتي شلون صارت عرفني مو صدك
صرت عصبية وهووو يعرف اذا اصير عصبية
اخرب الدنيا على راسه وراسهم جرها واني صرخت
غـاليـة : على اسااااااس شلوووون بيووووت
تخاااف ينهجمن لو عدهم بيوووت ما يبقن اسبوع
مدري اسبووووعين هناااا شيسووون هناااا
هااا صار اسبوووع شيسووون جاوب .
اني گاعدة هو واگف يحني نص جسمه بمستواي
ضـلـيل : غـاليـة ول شهل تخررربط صمي حلگچ
لااا تصير دم ول اسكتي هذا كلامچ يفلش عشاير .
غـاليـة : انعل عشيرررتهن يا عشيرررررررة
هاااي يا عشيرة لا تخبلني خررررررب .
ضـلـيل : تردين اطمين طرگاعتچ فريتيهااا مو رجعتچ
هاي رجعتچ على شنووو ليش تفررريهاا ؟
غـاليـة : اجيت وتعرف على شنوو اجيت مو تگول
اعرف ليش رجعتي ، بس من شفتهن شلون
گاعدات بالبيت وانتَ عاجبك الووضع مبين
تصيح اريد يرجع الوضع مثل اليوم الصبح
عاجبك وضع الصبح عاجبك ضـلـيل موو ؟
رگع ايده بالكنتور فلشه تفلش ورجع لا يخلي
مرايا لا مجرات ما شمرها ما مهتم عبرهم
من شافني ثابته بمكاني ما خفت ولا تحركت
ضـلـيل : هذا كلامچ اذا تعيدي وحگ الله تصير مو زينة .
غـاليـة : اطردهن .
_ شنوووووو .
_ اطررررردهن وحق الله اذا ما يطلعن من البيت اتخبل
امك بيت خوالك ليش باقيات عندك عووود فهمني .
طبگني على حايط ومن العصبية عيونه
فاتحها تريد اطگ وشرايين وجهه حتى براسه برزت
ضـلـيل : مو بكيفچ ول مووو بكيفچ شهل
صلافة يعرررررمة هم مجفصه وفوكاها تتأمرين .
غـاليـة : ضـلـيل طردهن لا تصير مو زينة
وروح ذياب لو انت لو هل حثالة .
ضرب على صدره وصاح بوجهي درت منه
_ بيتي هذا بيتي بكيفي افوت الي يعجبني
واطلع ألي يعجبني انااااا هنا الأمر الناهي .
دفعته من صدره وانا اهدده
غـاليـة : خوش يعني انا تريد اطلع وهاي
هي وامهااا تظل عندك حلوووو تمام صار تدلل تأمر
وتذكرررر انتَ اختاريت ضـلـيل انتَ اختاريت .
رفعت اثبت واسمع ملخت روحي ملخ من بين
ايده اجر بيها جر وهو يسحب يريد يحچي
وصلت للباب ثبتني وفلش عطرين طشرهن
ضـلـيل : على شنووو ناوووويه احچي وياچ
اخخخخخخخ الله ااخخخخ يا محمد غلطانة
ول غلطانة وعررررمة تهددددددد ول تهدددددني .
رفعت روحي انضربت بجسمه وبنبرة تهديد رديته
غـاليـة : انا رايحه .
_ اي .
_ بس حتى بيت امي ما اروحله .
_ خرب راح املخهااا استري على روحچ .
_ وروح ابوية ما ارجع على بيته اهج
واخليك ادورني ولوووو تمووت ما اخليك بعد تلمح ظلي .
ما اعرف شلون وصلت على سرير
حسيت بنار تاكل بجسمي وهو يثبتني
تشنجت والقشعريرة احتلت جلدي
عرفني من رجفتي وتجمد حركتي تذكرت
اول ليلة تقرب بيها مني ، سرت رعشه
بكل جسمي من همس بأذني
_ لا تجبريني اعيدها لا تهدديني ، لا تخلين ايدي مربوطة
حتى ما اكسررر راسچ لا تفقديني اعصابي
لا تخلين هذذذذذا عنادچ يتغلب عليچ ترا گادر احطم ابوو .
وهوَ يبتعد وانا جمدت مهضومة
_ بمزاجي اخلي صوتچ يعلى على صوتي
واگدر اسحب هل قووووة واخليچ هيچ گدامي
جامدة لا روح ولا حس بنت ذياب ضليل لا تهددي .
ايده دافية عكس برودت جسمي سحبني
جريت ايده منه وبصوت خافت كمل كلامه
_ فكيها لا تخافين ما سويت شي بس گطعت لسانچ .
سحبت ايدي منه نترتها وطلعت امشي سريع
اخوانه واگفين اثنينهم خايفين عليَّ من صوت
التكسير وعبالهم اطلع ميته خابت أمالهم
بس صعدت من الباب عطت على نقش
_ امشي شوفي وين شاهين امشي بسرررعة .
نفش : يمه كون ضربچ تريدين ماي يمه .
_ امشي نقششش فدوة بس صيحي شاهين .
نزلت بسرعة وصعدت هيَّ وياه شافني
اطلع بعباتي ألبس بيها
شاهين : شمريها منچ عمه ما يقبل تطلعين من البيت .
غـاليـة : هوو گال روحي شبيك شاهين تتعاجز توصلني .
شاهين : جدتي وابوي راحوا رجعوا البيت اخوها
وحتى عمي طلع من البيت وانا بالباب گال غـاليـة
ما تعتب رجلها باب البيت اكسر رجلك اذا عتبتها .
غـاليـة : فدوة تلفونك اريد امي .
بسرعة طلع وقمها خابرتها خليهم يطلعون
هو ونقش جاوبتني امي حجيت الصار
كلشي بالتفصيل بقت توجهني احس من
كلامها النار بداخلي هفتت وصحيت على زماني
بدلت ونزلت شاهين گاعد يشرب جاي ونقش
كاعدة على نار تنتظرني رجعت تلفونه
ودخلت للمطبخ عطشانة اشرب بالماي
وام سماهر تنگط بسمها
_ طلعتي شيخ ال ضليل من البيت وطلعتي
امه واخووو وبقيتي موجودة البغدادية .
غـاليـة : اطردهم كلهم وغصباً عليكم باقية
وبعدددد وبعدددد دام انتِ واختچ تريدوها
بخبث اصير اخبث منچ ومنها طردتكم
انتِ وبنتچ على ايدي .
دلال وعفاف يلملمن بالگزاز مال غرفة
من دخلن صاحن على ام سماهر
_ اشششش رجع ضـلـيل لا يسويها فاتحة .
والواضح ام سماهر ما تعرفني بحيث من الباب
بعده ما داخل راحت تركض عليه وسماهر اجت
وگفت وراها صافنه بوجهه تمسح بطهر امها
ام سماهر : جانك ترضى خالتك تنهان اسكت الخاطرك
حرمتك غـاليـة تگلي طردتكم انتِ وبنتچ عاى ايدي .
غسلت الگلاص ورجعته مريت منهم ومسحت
على طهرها اقلد حركات سماهر شلون تتمايل
بجيمها بحجة تموسح بظهر امها الزينة
غـاليـة : امشي من هسة جهزوا جنطكم .
حجيتها ومريت على نفش سألتها
_ اختچ وينها .
نقش : هاي نايمة بالاستقبال جانت ويه عمو .
رجعت صعدت بس كلبي يلعب منهن
كوثر ما تروح هيچ بسهولة اذا ماكو خطة براسهن
اجت نقش بس كل شوية تروح وانوب تفوت
الحد ما صارر الساعة ب1 جرتني من ايدي
نقش : امشي يمه انزلي دخلن سماهر على عمو
ضـلـيل متعمداا وراح تجي عفاف عود تنطيچ
خبر عدهن لعبة روحي حبابة روووحي .
كفيت رداني وانا انزل عليهن من شفتهن
ضحكت عكس بهتتهن وسويت نفسي
ما اعرف بلعبتهم وهيچ انا من ذاتي رايحة
على غرفة ضـلـيل وحتى هوو اليوم احولها
عليه فاااتحة والله اذا ما اخبله واخبلهممم .
دفعت الباب ودخلت ضـلـيل داير وجهه منها
وگاعد يدخن وبيده الثانية ورقة يشتغل بيها
وسماهر لابسه فستان قصير بنفسجي وشعرها
مفتوح مسرحته والمكياج على اخر حبايه
مبين توها فايته وهوَ واگع غلط عليها
بحيث اني دخلت سمعت اربع كلمات منه
قشعر بدني على كمية القذارة مالتهاا .
ضاقت نظراتي وابتسمت قبل لا اطلع
غـاليـة : اعتذرررر اعتذررر دخلت عليكم
گطعت خلوتكم المميزة اجيت الناس غلط ومكان غلط .
انا طلعت بس حسيت نار وشبت بداخلي
مو غيرة امشي واهمس وروح ابوية مو غيرررة
بس اتعجب على صلافتهن وشلون يريدن
يورطن شيخ الناس تهابه وياهن
گطع طريقي يمنعني اروح خايف
ضـلـيل : غـاليـة وداعت ننوس وداعتچ
هاي اول مرة بس دحگي بعيوني وحگ
كل حرف بالقران ماكووو هيچ فهمتي غلط .
غـاليـة : مايهم فلا يهمني .
ضـلـيل : لااا انا يهمني امرچ يهمني
لا تظنين بيَّ سوء اوگفي احچي انتبهي غـاليـة .
طلعت امها عود من الاستقبال نايمة هناك
وسماهر بنفس الوقت طلعت من الغرفة
بقت تلطم بهتت وانا اباع عليهم شلون يمثلن
اثنينهن ركضت على بنتها تكفش بيها
وتروح على ضـلـيل تريد تبوس بيده
سماهر : ما كفرررت جنت احجي وياه .
لزمني من خصري حضني هوَّ يدفعني على
غرفة گعدني على مجرات بصف السرير
ويقيد بحركة ايدي وانا من جذبهاا تهسترت
غـاليـة : بسسسس عوووووفني اكتلهااااا
خررررررب ايدك ضـلـيل ايدددددددي عووووفها .
ضـلـيل : اطردهن لعيونچ اطردهن بس اهدي .
غـاليـة : اكتلهاااا ما اخليها تطلع اذا ما املخخخها
جذابااااات لك جذابه هاي تمثل تريد تبليك
متفقات كلهن متفقات بس عوووووفني خرررررب عوفني .
فات شاهين ومقتدر وزوجته يحچون وياها
وسماهر تبچي وتگلهم غلطت والله اسفة
وامها تكفش بيها وتلطم على وجهه تصيح
شلون اخلي عيوني بعد بعيون الشيخ
غـاليـة : بربوووووك غير انتِ مجهززززتهااااا
غير يعووفني انتَ ليش ما تعوووفني عووود شبيك
بس خليني اتفاهم وياهن هي هاي هب جهزتها
عدهن لعبة عفاف ودلال وروح ابوية يعرفن
بس صيحن هاي امك اتفقت وياهن عود
فد شوية يريدن بصيحني واشوفكممممم
عبالهن انتَ تهمني خرررب بيهن ايعععععع
لعبت رووووحي والقررران لعبت روحي .
ضـلـيل : مقتدرررررر طلعهن ول طلعهن .
ام سماهر : خالة ضـلـيل شيخنا .
غـاليـة : ياااا ياااااا بعدها تمثل ياااااااا .
ضـلـيل : راح تتخرررربط امشن اطلعن
****** انعل ****** اطلعن ****** .
اخذت بتها وهو صرخ على عفاف ودلال
وبعدني بين ايده يضب بيدي وبرجله مقيد حركة رجلي
من ثاني تهديد دلال اعترفت على كوثر
بقيت أتنفس يثقل دخلت نقش وكفت
تريد تاخذني ومقتدر فات يتوسل بضليل
يبقن لان الوقت تاخر وعيب يرجعهن لو يوصلهن
على بيت خواله ، عافني وراح يهش بيهم
وطبگ الباب بگل قوته
غـاليـة : الله لا يوفقك ضـلـيل ولا يوووفقهممممم .
راح هلى جگاير رحت اخذت الباكيت كله
مردته مرد بيدي وصرخت بوجهه
_ والله انت مررررتاح على حرررام وخليتهن .
حجيتها واريد اطلع راح على تلفون شغله
واجه يسد بحلگي حتى اسمع مسجل
صوتها من اول ما دخلت عليَّ شلون
تتودد وبحجة جاي وعدها شغله تريده
يحلها وهو نفس شخصيته حتى ويه
اخوانه وبناتي بارد لو يهمس بـ اممم لو اي
حتى مو دخلت عليهم الصوت موجود
من كمل التسجيل ضرب الحايط بكل قوته
_ احچي بعددددد احچي احب الحرام مووو احبه
بنت الساقطين ما اتگرب من الحرام لو على مووتي
اگدر كلشي اسوي بس بالحلال .
غـاليـة : روح شتريد تسوي روح وروح ابوية مايهمني .
_ اريد بنت ذياب مالي نفس بغيرها .
دفعته من صدره وصعدت بعدهن گاعدات
احسهن بس يريدن يرجعن على غرفته
دخلت على غرفة ننوس من شافتني
بقت تگمز تبوس بوجهي اخذتها بحضني
بعد ماعندي حيل حتى احجي غفت بين ايدي
بعدني صافنه وبخفوت الباب انفتح
دخل ضـلـيل استدار على جهة ننوس وتمدد
يمها سحبها من ايدي جريتها وهوَ اخذها بحضنه
حضنها يبوس بيها ويشمها وهيَ تعودت مبين
التفتت وحضنته صدت عيني بعينه همست
_ شعندك هنا .
_ اختل يمچ بنت ذياب احميني .
درت وجهي وجسمي يختض من الضحك
وهو يهز بيده ، بقيت دقايق اتگلب الحد ما نمت
الثاني يوم الصبح اريد اتحرك حركتي متقيده
فتحت عيني صار رگبته بوجهي وايده محاوطه
خصري نايم من كل گلبه متت بدمي خفت البنات يشوفون
هو مو نام بالدشداشة وينها دشداشته صخام بعيني
درت وجهي بصعوبة شفت الغرفة فارغة بس
انا وياه ودافية نورها خفيف .
تحركت اريده يعوفني يقيدني اكثر انوب فززني
صوته خشن كفخني على راسي بخفه
_ تموتين اذا تظلين موو يطير ربعچ .
گعد واني فزيت عود شنووو باقي هيچ يمي
ضـلـيل : اليوم تردين ؟
عفته وطلعت من الغرفة اخذت ملابس ومنشفة
سبحت ورجعت اسرح بشعري وراح هوَ سبح
وفرش السجادة يصلي بالغرفة بس كمل
دخلت ننوس شمرت روحها بحضنه
ننوس : هبيبي .
ضـلـيل : نظر عيونه .
ننوس : جنت نايمة فتحت عيوني هيچ
جان اشوف هبيبي نايم يمي درت شفت ماما يمي
اني ضحكت ها مشيت على كيف رحت على نقش
ضربتها اشرت عليكم وهاي خايس نقش اخذتني
كالت امشي نلعب جوا عوفيهم ما خليني اصعد .
كعدت مبتسمة مصدومة ننوس لان بعمرها
ما نامت بيني وبين ابوها لو عندي لو عنده
مسح على راسها فتحت شعرها تريده يشوفه
وهوَ يلملم بي ويشمه يصيح افيشششششش
صعدت نقش صينية ريوك بيض عيون مثل
ما يحب خلتها بالوسط
نقش : اكلوا هنا لان بس تنزلون تعلگ
وبعد تنحرمون من الاكل .
ضـلـيل : شكو ؟
_ هذني بعدهن موجودات .
غـاليـة : ابو البيت راضي على مهزلة هههههه .
ضـلـيل : انعل رووووح ابو البيت يموت ويخلصصص .
نقش : اعصابكم يمه كافي فدوة .
كف السجادة وطلع من فوك صاح
_ مقتددددددددر .
شاهين : بالباب عمي تريد شي .
ضـلـيل : وينهن وصلتوووهن على بيوتهن .
ام سماهر : ردت تنزل عندي حجي وياك .
ضـلـيل : توكلوا وغير مرة عود احجي
هسة الحجي هووواي براسي والمشاكل مقبط .
كمل ورجع دفر الباب واني فاتحة الكنتور اعدل بي
ضـلـيل : كفي شررررج عني بنت ذياب كفي .
غـاليـة : يمك انا تشمرون بلاكم عليَّ .
ضـلـيل : تهجمين بيوت وحگ الله بيوت وعشايررر
ياهوووو يگدر عمي عليچ عرررررمة خرب روحچ .
راد يطلع وهاي نقش تتوسل وننوس تبچي
گعد وياها ومن المرايا اشوفه يأشر حتى نقش
تصيحني ، قبل لا تحچي گعدت وياهم
خلص قبلنا وراح يغسل خليت نقش
تاخذ اختها والصينية نزلتها
وقبل لا ينزل صحته عافني ونزل
جريت شالي ورحت وراه دخلت على غرفة
غـاليـة : ضـلـيل عندي حجي وياك .
ضحك من كمل تبديل ويلف بالشماغ
صرت قريبة منه اركز بي شلون يلفها
ضـلـيل : غايتچ اعرفها ومن البارحة
گلت ما تحصلين مني لا شر ولا خيررر .
غـاليـة : احمي مُـرجانـة اني تزوجتك
حتى تحمي بناتي احميهن ليش تخلف .
رجع لنفس العصبية والتكسير ولسانه
ما يتفاهم يريد يطلع منعه نتر بوجهي
ضـلـيل : ما اساعدچ هسة لو تمووووتين .
غـاليـة : راح يموتووووهااااا ضـلـيل .
ضـلـيل : مو اتفقتي وياهم عليَّ هااا صرتوا
حبايب اتفاقات اخذوج يسجلون بيت بأسمچ
ورحتي وياهم هاي كلها بالتفاهم والتراضي
يعني عندج القوة الكافية تواجهيهم وتتفاوضين
وياهم وتتفقين حتى يعوفون بنتچ مو صح .
غـاليـة : ضـلـيل هذا منطق ؟
ضـلـيل : غـاليـة موووو اتفقتوا لو غلطاااان
روحي فاوضيهممم شايل ايدي منچ وين ما تروحين
تتفقين ترجعين بيت تتنازلين صخام بكيفچ .
غـاليـة : اروح اذا ما تسند عادي اروح .
ضـلـيل : توكلي .
طلعت منه صعدت بدلت وهوَ بالديوان فتت عليهم
غـاليـة : شاهين بلا امر عليك وصلني على بيت
خوال ابوك اشوف بيبيتك .
بهت شاهين عكس ضـلـيل داير وجهه مني
شاهين : عمي سمعت .
ضـلـيل : وين ماتريد اخذها توكلوا .
طلعت مقهوره صعدت بالسيارة
احس الدنيا اسودت بعيوني وكلام امي
يتردد بعقلي الرجال من تعاندي يعاندچ
دام تمنعي منچ يشتغل وياچ بخبث
واذا اشتاق يدمررر وضليل واصل لهل
مرحلة بگد ما يشتاق ويكبد كلام ومشاعر
واشتياق بداخله يتهستر حتى تفكير بعد ما يفكر .
نزلت وشاهين ويايَّ دگيت الباب طلع رجال صاح
_ غـاليـة حرمة الشيخ هين خوية كووثر .
دخلت للبيت طلعت تضرب بعكازتها
وتمار طلع وراها شايط يريد يهجم عليَّ
رفعت عكازتها تمنعه يتقدم اكثر
كوثر : شعندچ جيتي عندي مو ظل البيت
فارغ انتِ وبناتچ بي شتردين بعد على شني ترسمين .
غـاليـة : مُـرجانـة عوفي بنتي واي شي تأمرين بي اسوي .
كوثر : وروح ابوي يا غـاليـة يا بنت ذياب
اطلع انا مو بنت ابوي اذا ما اخلي هل زلام
تذبح بنتچ وأجيبها عندچ هذا شرف ودمها مهدور
اخلي النار تشب بگلبچ مثل ما اخذتي وليدي
جبيري شيخنا وخليتي تحت امرچ احرگ گلبچ
لو عسى ما يظل بس يووووم واحد بحياتي .
غـاليـة : ابنچ اما ما اريده ولا هوَ يريدني بعد و.
كوثر : يريدچ لا تخافين يعوف اخو امه بس ما يعوفچ .
غـاليـة : صدگي ما يريدني وانا اروح منكم
بس عوفيهاا انسيهاا مُـرجانـة .
تمار : نزلتي راسناااااااا خرررررررب اهلچ
انعل ابوچ لابووو روووح اخوووي من عرررفنا عليچ .
صد شاهين يمنعه هو فقد هجم عليَّ خنگني
خنگ يضغط على رگبتي بكل قوته حسيت روحي
راح تطلع من عيوني ويدفر ويضرب بوكسات
وشاهين يسحب بي قوته ما ادري منين صارت
عنده حيل صرت ارافس اريد نفس وكوثر
صامدة مخليه ايد على ايد على عكازتها ورافعه
راسها تروي غليلها ، انگطع النفس واحس صرت
افقد بين ايده واسمع بس صوت شاهين يصيح
_ عووووفهااا راح تموووت بيدك بووووية .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.