رواية جمعتهم الاقدار الفصل الثلاثون 30 – بقلم فريدة احمد
: هتطلقني امتى
بص لها شويه وبعدين قال…. انتي عايزه تطلقي
قالت بتوتر وهي واقفة قدامه بتفرك ايدها… اه
وبعدين قالت بسرعه…. اصل في واحد معايا في الجامعه انا معجبه بيه وهو معجب بيا. واكيد يعني مش هنتصاحب وانا متجوزاك فطلقني عشان اشوف حياتي
ليندهش عاصي من جرأتها ويحاول يستوعب اللي قالته.. فيبصلها ويقول… قولتي ايه.. عيدي تاني كده
فتبلع ريقها بتوتر وخوف وتقول بخفوت… في واحد معايا في الجامعة معجبة بي و
اتنفضت من مكانها لما قال بزعيق مرة واحدة….ما ايه يا روح امك
ومسكها من ذراعها بغضب وقال … مين ده يا بت كلمتيه كلمك بتتقابله.. انطقييي
قالت وهي بتحرر دراعها منه….. قلت لك مش بنتكلم غير بسيط ومش راضيه اتعامل معاه عادي عشان انا واحده محترمه ومتجوزه فـ دلوقتي بقول لك طلقني عشان اقدر اتعامل معاه وما بقاش بعمل حاجه غلط….يلا لو سمحت طلقني.. اظن احنا جوازنا مش زي اي اتنين. لا انا بحبك ولا انت بتحبني. يبقي خلاص نفضها
ليمسح عاصي على وشه بغضب وهو بيحاول يهدي نفسه
و خرج من الاوضه قبل ما يقتـ لها، بس هي خرجت وراه بعصبيه وهي بتقول…. انت رايح فين بقول لك طلقني
في اللحظه دي كان خارج مراد من اوضته شافهم كده قرب عليهم وقال…. في ايه.. صوتكم عالي ليه
لتقول حلا وهي بتبص لعاصي بضيق…. البيه مش عاوز يطلقني
مراد قال…. وانتي عاوزه تطلقي ليه
ردت ببساطه وقالت …. عشان في واحد انا معجبه بيه وهو معجب بيا و
قاطعها مراد لما قال بغضب هو كمان…. معجبه بايه يا روح امك.. مين ده يا بت اللي معجبه بيه
وبيمسكها من دراعها ويقول.. انطقي
بس دفعته حلا بعصبيه وقالت… هو في ايه وانتو مالكم اساسا..هو انا مش بني ادمة زيكو
لتكمل وتقول لمراد… وبعدين وانت مالك انت اصاحب ولا ما صاحبش.. انت مالك دخلك ايه
ليقول مراد بغضب … بنت اتظبطي احنا ما عندناش الكلام ده.. عندنا اللي بتفكر تعمل كده بتد، بح علطول
ليكمل ويقول بتحذير… فخليكي محترمة. بدل ما اربيكي من جديد
لتقول حلا بسخريه….تربيني.لا ياشيخ مش لما تتربي انت الاول
كتم عاصي ضحكته ومراد قال بصدمة… قصدك ايه يابت
لتقول حلا بسخرية…مصيبة لتكون فاكر نفسك متربي. حوش حوش الاحترام اللي بيدلدق منك والنبي خليك انت علي جنب. مش ناقص غيرك هيتكلم عن الادب والاخلاق. دانت قذ، ارتك تشهد
وبصت لعاصي وقالت…. وانت هتطلقني بهدوء ولا انزل لخالو وهو يتعامل معاك
ليقول عاصي بهدوء مصطنع… ادخلي نامي يا حلا
حلا قالت… تمام
ونزلت على تحت
بقي عاصي ينادي عليها ويقول… حلا. خدي يابت
قربت حلا علي الحاج همام وقالت… ياخالو. عاصي مش راضي يطلقني
لينظر لها الحاج همام ويقول… ويطلقك ليه يابتي
لتقول حلا… ياخالو احنا مش بنحب بعض ف ليه نكمل ما هو يشوف حياته وانا اشوف حياتي
لينظر همام لـ عاصي اللي ساكت وبعدين يقولها..
طيب ما هو لو طلقك دلوقتي عمك هيجي ياخدك ما هو هيرجع واصي عليكي ولا نسيتي
و برغم ان الحاج همام يقدر يحميها من عمها انه ياخدها دا غير اخوها موجود يعني هيكون واصي عليها،، الا انه قالها كده بيخوفها عشان تتراجع عن موضوع الطلاق
لكن حلا مكانتش ساذجة قالت… يا خالو ما نسيتش
وبصت لمراد بضيق وقالت…. لان ببساطه في شحط اهو محسوب عليا اخويا يعني الوصايه هترجع ليه.. يعني كده او كده عمي مش هيعرف ياخدني ولو اتطلقت هيبقى الشحط ده اللي واصي عليا
لينظر لها مراد بغيظ وهي تقول لهمام … ممكن بقا تخليه يطلقني
ليهاودها الحاج همام ويقول .. خلاص اطلعي اوضتك وانا هتصرف في الموضوع ده
قالت … حاضر
وبصت لعاصي بتحدي وطلعت
بص همام لعاصي وقال…. هتعمل ايه يا ولدي
عاصي كان حاسس بغيرة مايعرفش ايه سببها، لكن اقنع نفسه انه بس اتعود علي وجودها في حياته يهزر معاها يشاكسها.لكن حب نفض من دماغه الفكرة، فهو عايش علي زكري مراته اللي استحالة ينساها بسهولة
ف اتنهد وقال ببساطة.. هطلقها مش هي عايزه كده خلاص
دخلت مرام فيلا والدها بهدوء وهي جاره شنتطها وراها
علي الكنبة كانت قاعدة اختها مشغولة مع ابنها الصغير
بمجرد ما شافتها قامت بلهفة قربت عليها
في نفس اللحظة مامتها نازلة من علي السلم واللي اول ما شافتها هي كمان سرعت خطواتها وقربت عليها بلهفة
وهي بتقول مرام.. حبيبتي
وبقت تحضن فيها هي واختها وهما بيتطمنو عليها
بعدو الاتنين وهما بيبصولها باستفهام. فقالت بهدوء… اتطلقت
لتقول مامتها براحة .. دا اللي كان لازم يحصل من بدري
بصتلها مرام بحزن وسكتت
لتتنهد مامتها وبعدين تحاوط وشها بكفوفها وتقول… اوعي تزعلي.. دا مكانش يستاهلك. عاوزاكي تنسيه. مش لازم التجربة دي تأثر فيكي تأثير سلبي ابدا. اوعي تحزني. انتي قوية مش كده
بس مرام كانت زي التايهة.. قالت.. عن اذنكم
ولسه بتتحرك ناحية السلم
اختها وقفتها وتحركت قدامها، بقت بتبصلها بقلق عليها، قالت.. مرام. انتي كويسه
هزت مرام راسها بصمت وطلعت
بقت مامتها تبص عليها بحزن وتقول… اول مرة اشوفها بالضعف ده
لتقول سالي… بتحبه ياماما واللي عمله فيها صعب. مش سهل تتخطاه
….
في اخر الليل
قدام السرايا، زين واقف بعربيته بعد ما رجع. كان حاسس بخنقة شديدة لدرجة مكانش قادر ينزل من العربية. كان مغمض عينه وهو حاطط ايده علي جبهته ومرجع ظهره علي كرسي العربية
اما في اوضة سهي.
سهي كانت الفرحة مش سايعاها وبقت تتخيل انه خلاص بقي ليها لوحدها
بس مرة واحدة استغربت تاخيره تحت فهي كانت سمعت وقت ما وصل كلاكس عربيته، فتحت البلكونة تشوفه ليه مطلعش. شافته وهو قاعد في العربية علي نفس وضعه
بقت واقفة تبص عليه بقلق وهي من جواها مش مرتاحة. فهي كانت حاسة انه بيفكر فيها. شردت وهي بتقول في نفسها بغل… ايه للدرجادي زعلان عليها
اما هو اتنهد بعد ما مسح علي وشه بتعب وبدا يشغل العربية تاني
انتبهت ليه لما لاقيته طلع بالعربية
بقت هتتشل حرفيا وهي بتقول بغضب وبتجز علي سنانها بغيظ.. يعني ايه. هيكون رايح فين. مش طلقها وخلصنا.. يعني اليوم اللي بقي ليا لوحدي سابني بردو
وبقت راحة جاية في البلكونة وهي هتتجنن
………
بعد وقت وصل قدام عمارة في مكان راقي نزل وطلع علي شقة معينة
وبمجرد ما ضغط علي جرس الباب. فتحت بنت في اواخر العشرينات بمجرد ما شافته شهقت بفرحة وقالت..مش مصدقة عيني
وبلهفة كانت هتحضنه.بس هو منعها بحركة من ايده بمعني متقربش
ودخل بتعب وهو بيطلع علبة السجاير وبيسحب سيجارة يولعها
بعدين رمي جسمه علي الكنبة وبقي يدخن بشرود وهو مهموم
كانت واقفة بتبص عليه وهي مش فاهمة ماله
…..
اما عند مرام
كانت واقفة في بلكونة اوضتها رافعة وشها للسما مغمضة ودموعها نازلة
قاطعتها اختها اللي دخلت تطمن عليها، قربت عليها وهي بتقول.. مرام.
بس مرام اول ما سمعتها مسحت دموعها بسرعة ولفت ليها وعلي قد ما قدرت اخفت حزنها بداخلها ف مرام بطبيعتها مش بتحب تظهر ضعفها
قربت اختها وقالت… عاملة ايه دلوقتي .. انتي كويسه
لتقول مرام…اه
فتبصلها اختها بعدم تصديق وقبل ما تسألها عن اللي حصل او تجبلها سيرة قالت مرام وهي بتوهها… قوليلي انتي. اخبارك ايه
وهي بتصطنع المرح… وجوزك اللي مهاجر ده مش ناوي يرجع. شكله اتجوز عليكي
لتضحك اختها وتقول… دانا كنت اقصقصه وحطه في أكياس
وابيع اعضائه
لتقول مرام بضحك… قادرة وتعمليها
بعدين قالت… بس انتي ليه مفكرتيش تسافري معاه
لتقول… سالي انتي عارفة مبحبش السفر. وبعدين مقدرش ابعد عنكم.
اتنهدت وقالت… هو خلاص كلها شهر ومهمته تخلص ويرجع تاني
لتقول مرام..ربنا يرجعه بالسلامة.
فتقول سالي..يارب
وتتنهد وتقول… شغله صعب اوي
…..
تاني يوم صباحا
قربت قعدت جمبه علي الكنبة مدت ايدها تحركها علي وشه بحب وابتدت تصحيه
فتح عينه وهي مدتله ايدها بتليفونه وهي بتقول…. تليفونك مش مبطل رن
اتعدل واخد الفون وهو بيقول… اعمليلي فنجان قهوة
قامت وهي بتقول… حاضر
بعد وقت حط فنجان القهوة علي الترابيزة و اخد تليفونه ومفاتيحه وخرج
خرجت من الاوضة بسرعة، بس ملحقتوش
كسي الحزن ملامحها وبقت زعلانة ومتضايقة
بعدين فاقت لنفسها وقالت لنفسها بسخرية… ايه ياجيجي فاكراه بيحبك.. مانتي عارفه انك لمزاجه بس. يعني اخرك معاه السـرير
لتبتسم تاني بسخرية وتقول… حتي ده راح ايامه. لا بقي بيقربلي ولا يلمسني
……
بعد يومين
مرام كانت واقفة قدام المراية وهي بتبص علي نفسها دموعها في عيونها..بس علطول مسحتها واخدت نفس وهي بتقول…. مش لازم تتكسـري يامرام. انتي طول عمرك قوية
وبقت تفكر ازاي بس تندمه مش هو بس وصحابها كمان. فهي قررت تنتقـم
بصت علي نفسها بصه اخيرة وهي بتظبط شعرها واخدت شنطها وخرجت
…..
عند عاصي في مكتبه، قاعد علي الكرسي مرجع ظهره لورا
ومغمض عينه
دخلت بنت قربت علي بتمهل وميلت باسته
فتح عينه لينصدم
……
نزلت ليالي من على السلم قربت علي الحاج همام اللي قاعد بيشرب قهوته واللي اول ما شافها قال…. على فين يا حبيبه ابوكي
ميلت باست ايده وقالت…. رايحه الشركه يا بابا
عقد حواجبه وقال… رايحة الشركة كيف يعني
قالت ببساطة… ماهو انا بشتغل في شركة مراد يابابا
بس هو قال باعتراض..لا مفيش شغل خلاص
قالت بزعل….بس انا بحب اشتغل
اتنهد وقال… انا مش عاوزك تبقي في مكان انت ومراد عايزك تبعدي عنه على قد ما تقدري مش عايزه يحتك بيكي.. فهمتي
هزت كتفها وقالت بثقة… هو ما يقدرش يعمل لي حاجه
بعدين قربت قعدت قدامه وقالت… وبعدين يا بابا انا كنت عاوزه اسالك في حاجه كده
فقال…. قولي يا قلب ابوكي
قالت…. هي الشركه دي بتاعه مراد لوحده خاصه بيه يعني ولا تبع حضرتك
قال… تبعي بس مراد شريك فيها بفلوسه اللي ورثها من ابوه اللي يرحمه وهو اللي بيدريها
فقالت…. حلو قوي انا بقى مش عايزه ابقى سكرتيره.. انا عايزه ابقى مديره الشركه زيي زييو.. ويبقى عندي مكتب زي بتاعه بالظبط
ليقول الحاج همام….. من بكره يبقى عندك مكتب احسن من بتاعه
ابتسمت بفرحة وقالت بعد ما باست خده…. ربنا يخليك ليا
يا احلا بابا في الدنيا
بعدين قامت وقالت… همشي انا بقي
بس هو وقفها وقال…. تمشي فين. مش تصبري لما المكتب يجهز
بس هي قالت… لا منا هروح اشرف عليه بنفسي.
زلسه هتمشي وقفها تاني لما قال… طيب ما هو برضو مش هينفع تروحي لحالك اكده.
قالت… مش في سواق بره.اخليه يوصلني
وقبل ما يرد عليها شاف زين نازل قال…. لا خلاص اخوكي زين هيوصلك في طريقه
وبعدين يقول ل زين…..خد يا ولدي اختك معاك وصلها الشركة
فيقرب زين ويقول… نعم. بتقول ايه ياحاج
ليقول الحاج همام بامر… بقول اللي سمعته.. خد اختك وصلها الشركة
……
في كافيه فاخر كانت قاعدة مرام مع صاحبتها اللي كانت بتقول… مش شيري اتجوزت
لتقول مرام بلامبالاه… عرفت
فتكمل صاحبتها وتقول… الز، بالة لسه علي علاقة بإيهاب بعد ما اتجوزت. انا ماشوفتش في قذ، ارتها
لتنظر لها مرام باهتمام وتسالها…. قصدك ايه. هو الزفت ايهاب رجع اصلا
لتقول صاحبتها… اه من اسبوع.. شكله فاكر انه هيفلت بعملته وراجع وهو متطمن
ولكن مرام قالت بغل…. خليه يتطمن علي الاخر
بعدين قالت بشر…. دا وديني لنت، قم منه واندمه. هعرفه ازاي اتجرأ وعمل معايا كده هو والسافلة التانية
ثم تشرد بذهنها لثواني وبعدين تبص لصاحبتها وتقولها… انتي متأكده انهم لسه علي علاقة ببعض
لتقول صاحبتها بتاكيد….اه..يابنتي كل الشلة عارفين. دول مفضوحين اصلا
لتبتسم مرام بشر وتقول…. حلو
وبعدين تقول…. انا كده عرفت هعمل ايه
لتقول صاحبتها…. مش فاهمه.. انتي ناوية علي ايه يامرام
لتنظر لها مرام وبعدين تقول… مش هما لسه مقضينها. وهي كمان بقت متجوزة
فتفهم صاحبتها ما تنويه وتقول… انتي قصدك
لتقول مرام بشر وهي بتاكدلها اللي فهمته… ان ما عملتلها ملف اداب مبقاش انا
وهي بتمسك كوب العصير اللي قدامها وبترفعه علي فمها لكن نزلته تاني وقامت تجري علي الحمام
قامت صاحبتها وراها بقلق وخضة
مرام بقت عمالة بترجع في الحمام، غسلت وشها وخرجت وهي ماسكة بطنها
صاحبتها بقلق… حاسة بايه يامرام. ومن اللي ايه حصلك ده
لتقول مرام بتوهان.. مش عارفة
يتبع…..
جمعتهم_الأقدار
البارت_ال30
بقلم_فريدة_احمد
البارت صغير عارفة بس باذن الله هعوضكو ببارت تاني بكرة
•تابع الفصل التالى “رواية جمعتهم الاقدار” اضغط على اسم الرواية