رواية أحببت من لا يرانى الفصل التاسع عشر 19 – بقلم سحر السحرتي

 رواية أحببت من لا يرانى الفصل التاسع عشر 19 – بقلم سحر السحرتي 

وصل وصل حلقة هديه عشان خاطر ادهم اللي كل الناس بتشكر في محاسنه 😄😄😄

احببت من لا يراني 

حلقة ١٩

عمار: ايه الحل اللي عندك يا سماء 

:هشوف سفر واكتب الجنين باسم كريم انا معايا لسه قسيمه جوازنا

:لا ذكية قوي … ولما تيجي تقدمي للطفل او الطفله في المدرسه و تقدمي شهاده وفاه الاب و يلاقوا التاريخ انه ميت قبل الولاده بثلاث سنين هتقولي ايه ما فكرتيش فيها دي

*بكت من اليأس 

: لا ما فكرتش … يعني اعمل ايه قولي … حاولت انزله ما نزلش .. حاولت ام-وت نفسي عنتر منعني ارمي نفسي تحت القطر يعني واستحالة اقبل اتجوزك مهما سماح قالت إنها موافقه وراضية لاني عارفه الن-ار اللي هتشعر بيها مقدرش اعمل فيها كده مقدرش 

*و ظلت تبكي … احبتها سماح أكثر من ذي قبل لطيبة قلبها

 سماح :اهدي بس … طب انا عندي فكره نقول بالك-ذب انك هتتجوزي عمار يقوم ادهم يغير ان الطفل هيتكتب باسم حد غيره

: تفتكري .. واذا الحل ده كان على هواه وما اتحركش اعمل ايه وقتها 

*يرن جرس الباب

عمار :انت مستنيه حد 

:هو اصلا في حد بيجي لي

سماح : افتح يا عمار شوف مين 

*ففتح عمار الباب وقال بصوت عال

: ادهم اهلا 

*همست سماء في اذن سماح 

:انت ما تعرفيش حاجه على ما نشوف هيعمل ايه احسن يعند

ادهم بغيرة مخفية : انت بتعمل ايه هنا 

:قاعد شويه مع سماء 

: لوحدك

: ازاي يعني هي سماء هتسمح بكدة سماح معايا طبعا 

:هي سماح هنا

:اه جوه امال هقعد مع سماء لوحدي في البيت ما انت عارف اخلاق سماء … ادخل 

:طب خد سماح وروح عند ماما عندي كلمتين مع سماء عايزها لوحدنا

*همس عمار :انت لقيت حل

:اه لقيت 

:طب هقعد اسمعه يمكن تبوظ الدنيا زي عوايدك 

:وسماح هنعمل فيها ايه 

:هخليها تروح عند خالتي 

*دخلوا واغلق الباب 

عمار  :سماح ممكن تروحي عند خالتي شويه في حاجات في الشغل عايزين نتكلم فيها مع سماء وهتقلب دماغك

:حاضر اما تخلصوا نادي لي عشان هبات معاها النهارده شكلها تعبان قوي 

بقلمي سحر السحرتي 

*بعد ان انصرفت

سماء :ايوه يا معلم ادهم جاي ليه 

:اسمعيني كويس انا مش فاكر اي حاجه خالص فعندي حلين …الاول اشوف واحد معرفه ثقه تتجوزيه 

*ردت بح-دة من هذا الاقتراح المهين

:انت بعقلك هو انا غلطت وعايزه اي واحد يط-رمخ على غلطتي وازاي  تقبل ان ابنك او بنتك يتكتب على اسم واحد ثاني 

*ونظرت لعمار بمعنى أن اقتراحه يمكن أن يكون على مزاج ادهم 

: خلاص الحل الثاني اتجوزك بس قدام الناس هنقول انك اتجوزتي واحد زميلك مسافر باره وبعت لي توكيل عشان اكتب عليك باسمه

:وده ليه مش عايز تتجوزني قدام الناس باسمك ممكن افهم السبب 

:عندي سبب شخصي

:من حقي اعرفه قبل ما اوافق او يمكن لان حضرتك مستعر تتجوزني و شايف نفسك احسن مني لاني بنت الخياطة مش ده رأيك فيا من زمان ورأي طليقتك

: لا طبعا انت من احسن البنات اللي عرفتهم بس اصل

: اصل ايه اذا كان ده مش السبب يبقى ليه فاكر اني غلطت مع حد ثاني وبلبسهالك صح

: لا انت اخلاقك مفيش شك فيها

: يبقى لازم اعرف لو مش دي الأسباب عشان اتاكد انك مش بتقول ايه كلام

: عشان لمياء لو حبت ترجع لي وعرفت اني اتجوزتك انت بالذات هترفض بشده وانت عارفة العد-اوة اللي بنكم

*تظاهرت بالص-دمة من كلامه

:لمياء اااه قلتلي … تصدق انك تستاهل كل اللي عملته فيك واللي لسه بتعمله 

:ما اسمح لكيش تتكلمي معايا بالطريقه دي

*ردت بح-دة وعلى صوتها

:براحة على الحمشنة احسن يجرالك حاجه… ولما هتجوز سيادتك مش قدام الناس هقول اني حملت ازاي 

:هأجر لك شقه بعيد تقعدي فيها شهر او اثنين على انك سافرتي لجوزك و ترجعي تقولي انك حامل … عايزه تقولي انك لسه متجوزه ماشي … عايزه تقولي ان انتم ما اتفقتوش و انفصلتوا انت حره لك مطلق الحرية 

: وكده الجنين هيتكتب باسمك

:اه طبعا

: ولما يجي يدخل المدرسه الناس هتعرف مين ابوه طبعا

:وقتها هكون اتصرفت وجبت لك شقه بعيد تقعدوا فيها أو تكوني وقتها اتجوزتي واحد ثاني 

:وطبعا مفيش حلول غير الحلين دول اللي اسوء من بعض

: مفيش عندي غيرهم يا تقبلي يا ترفضي 

: طبعا انت بتضغط عليا لاني مضطره اوافق … خلاص حاضر انا موافقه … بس الطلاق يتم بعد اما اولد 

:يبقى اتفقنا … بس الاول هعمل تحليل (دي ان اي ) عشان اتاكد ان اللي في بطنك ده مني

*كادت أن تق-تلع عينيه

: انت بتشك في اخلاقي كمان  …مش كفايه اهانت-ك ليا 

:انت خاي-فه من حاجه

*كانت تراه بعين أخرى فقد بدأ النزول من نظرها وقلبها

 :لا مش خا-يفة موافقه جدا  …واذا اتأكدت انك الاب حقي هاخده ازاي

: حق ايه اللي بتتكلمي عنه 

 :حق اعت-داءك عليا ما انا ما سلمتش نفسي برضايا وحقي انك تبقى جوزي قدام الناس بطريقه تليق بيا حقوق كثير هتحرمني منها 

:اي تعويض مادي انت عايزاه انا مستعد

:تفتكر التعويض المادي بيكون كافي في الحالات دي ومش انا اللي المادة تهمني قدامك رفضت فلوس جوزي اللي كان راجل بصحيح 

: سماء 

*نظرت له بتحدي

: نعم 

: شوفي انت عايزه ايه

:مش عايزه مفيش حاجه تعوض اللي اتك-سر ولسه بيتك-سر بس ليا شروط زيك

:شروط كمان 

: حقي ولا انت شايف ايه 

: حقك اتفضلي

:اسمك بس اللي هيكون بعد اسم اللي في بطني ما لكش اي حق فيه وانا مراتك على الورق ما لكش حق عليا كل اللي بينا ورق وبس وبعد الولادة تروح تسجل الطفل وتجيب ورقة طلاقي مع شهاده الميلاد 

:موافق اي طلبات ثاني 

*خانا-تها دموعها

: لا تقدر تمشي وتتفق مع عمار على ميعاد كتب الكتاب مش عايزه اي تواصل بيني وبينك

:اول ما هلاقي شقه هنكتب على طول

: الموضوع ده برده ما لكش دعوه بيه انا عندي الحل

عمار: انا ساكت من الاول بس الكلام ده يا ادهم فيه ظ-لم كبير لسماء وده ما يرضيش ربنا 

سماء: خليه يظ-لم انا مش مسامحاه وبكره يندم لما يشوف ابنه او بنته قدامه ومش قادر يقول لهم ان انا ابوكم أو قادر يلمسه أو الطفل ينادي عليه ويقوله يا بابا … ومش هيفوق غير لما لمياء تض-ربه القلم الثاني

ادهم :سماء احترمي نفسك 

: زعلان… تفتكر قلت حاجه غلط ض-ربتك اول قلم ولسه ما فوقتش كس-رتني و ظلم-تني ومكمل خاي-ف على زعلها تفتكر ربنا هيسيبك …. عمار لو سمحت مشيه مش قادره ابص له مش مسامحاك يا ادهم مش مسامحاك وبكرة هتندم وهتشوف

*كانت اخر كلماتها قبل أن تجلس بانهيار على الكرسي

*خرج وحضرت سماح اخذتها بداخل حضنها وهي تبكي 

:يا ريتني ما حبيته للدرجه دي  … مش قادر يشوف غيرها وكمان بعد اللي عمله عايز يعمل تحليل يتأكد فاكرني بتبلى عليه شفتي ظل-م أكثر من كدة 

:معلش هو زي المض-روب على دماغه دايخ و بيتطوح من اللي عملته فيه

:  وانا ذنبي ايه ده كس-رني و حرمني من كل حقوقي بعد اللي عمله

: اهدي عشان خاطري هو اللي خسران

 :ما حدش خسران غيري 

:عشان خاطري اهدي هو ما يستاهلش

: فعلا عندك حق هو ما يستاهلش … يظهر ان حظي زي ماما مكتوب عليا اعيش و اربي اللي في بطني لوحدي من غير اب

: هو انت مش هتخليه يشوفه و يربيه معاكي

 : بأي صفه 

: انه ابوه

: هو اللي رفض يعرفه لما قلت له صفتك على الورق ما حاولش حتى يزعق ويقول لا دى ابني من حقي اشوفه و اربيه تفتكري عشان الطفل ده مني معقول …. بيكرهني للدرجه دي … معقول عمري ما خطرت على باله …. تخيلي كان عاوز يجيب حد ثاني يتجوزني بداله معقول شايفني رخيصه قوي كده 

:ما تزعليش نفسك انت غاليه علينا كلنا … بكره كل حاجه هتتحل 

:انا داخله انام عشان عندي مشوار مهم بكره 

: هتروحي فين 

: لمامت كريم لازم اعتذر لها اني هتجوز للاسف واحد ما يجيش حاجه جمبه وهزور قبر جوزي

بقلمي سحر السحرتي 

*في اليوم التالي ذهبت والدموع في عينيها

 *حضنتها ام كريم بقلق

: مالك يا حبيبتي فيك ايه حد اتعرضلك

 :انا اسفه يا طنط مضطره اتجوز الوحده قت-لتني والناس مش سيباني في حالي

:وزعلانه ليه ده انا افرح لك وكمان هحضر فرحك

: انا مش هعمل فرح هكتب الكتاب واسافر للعريس 

:ليه يا سماء عيشي حياتك يا حبيبتي

 :عايزه ابعد .. البعد هيخفف اني بتجوز واحد غير كريم 

:هو اكيد مبسوط عشانك .. بس حاسه ان في حاجه ثانيه

: كان نفسي كريم بس هو اللي يبقى جوزي واقابله في الآخرة 

 :يا بنتي دي اعمار وانت لسه صغيره المهم تكوني اخترتي شخص كويس

: اكيد لا

 :نعم يعني ايه 

:ما فيش حد احسن من كريم مهما دورت ….انا عارفه ان في ناس بيعدوا على حياتنا عمرنا ما بنقابل زيهم تاني .. زي الاب والام  …كريم كان بالنسبة لي الاب والزوج والحبيب حبني أكثر ما حبيت نفسي 

: بكره لما تخلفي هتعرفي ان حب الاولاد اكبر من اي حب

 :اتمنى تسامحيني

: اخص عليك بس ابقي زوريني واوعي تنسيني

: ما اقدرش يا حبيبتي 

*ذهبت لزيارة قبر كريم وكانت تبكي بحرقه 

: انا اسفة يا كريم اسفة يا حبيبي … كنت هجيلك بس عنتر منعني … مضطرة اتجوز غص-ب عني سامحيني يا اجمل من رأت عيني … هتفضل في قلبي… بعترف اني حبيتك حب من نوع خاص …. اشوفك بخير 

*بعد يومين ذهبت الى المعمل مع ادهم لتقوم بعمل التحليل 

*تحدث ادهم بحرج

:سماء انا عايزك تسامحيني اني بعمل كده انا عايز اي حاجه أتأكد اني عملت اللي حكيتيه لاني مش مصدق اني ممكن اعمل الج-ريمه دي خصوصا معاك انت  

:لا مش مسامحاك ولا مسامحه نفسي اني غلطت في حقها لما سكت … لو كنت بلغت عنك كنت هتصدق انك عملتها وتت-فضح فض-يحه اكبر من اللي لمياء عملتها … بس عملت اعتبار لبابا و لأنك كنت مش في وعيك يومها  …. وده كان جزائي اعمل تحليل عشان أثبت أن اللي في بطني منك واني ما غلطتش مع حد ثاني وبلبسهالك

*صمت لم يستطع النطق لانها محقه

*ظهرت نتيجه التحاليل بعد عده ايام وتأكد ادهم انه الاب 

*حدد موعد كتب الكتاب واتفق مع الماذون ان يقول امام الناس

 :هل تقبلين ادهم وكيل العريس 

*كي يعتقد الناس ان العريس ارسل له توكيل

*وفي حفل صغير داخل منزل سماء تم عقد القران التي كانت حزينه لا تصدق انها تتزوج ممن أحبت بطريقة مهينة 

*كم تمنت الزواج منه لكنها لم تتخيل أن يكون الزواج بهذا الشكل 

*تمنت لو ظل حلما بعيدا افضل من ذلك 

*لاحظت والدة ادهم شرودها وعدم سعادتها مثلما كانت يوم زواجها من كريم 

فوزيه : مالك يا سماء هو انت مش فرحانه يا حبيبتي امال بتتجوزي ليه … لو الجواز مش على هواك أوقفه انا معاكي زي ماما 

: لا انا زعلانه عشان ماما وبابا مش معايا

: ما احنا جنبك بس كنتي عملتي فرح عشان نفرح بك

: ازاي والعريس مش هنا وماليش حد غيركم وانتم معايا فرحانين ليا هنا او في مكان ثاني 

:هتسافري امتى

:كمان اسبوع يكون بعت التاشيره 

*جذبها ادهم ليتحدث معها بهمس في اذنها 

:هو انت قلت ليه انك مسافره بعد اسبوع 

:عشان ابقى كملت شهرين واولد في السابع

:فاتتني دي

:هي دي بس اللي فاتتك 

*اخرج لها ظرف سميك

:خدي دول خليهم معاك 

:ايه ده

:مبلغ اصرفي منه لانك مش هينفع تروحي الشغل الفتره دي

: لا شكرا معايا فلوس … بابا سايب لي غير فلوس ماما اللي في البنك وما تشغلش نفسك كل اللي كنت محتاجاه منك اسم وبس ولو كنت اقدر استغنى عنه كنت عملتها

:اللي في بطنك ده ابني او بنتي لازم اصرف عليه

: ده ما كانش اتفاقنا واذا ناسي اسال عمار قدامك اهو

*تركته وذهبت لعمار 

:مالك يا سماء شكلك متنرفز

:صاحبك بيديني فلوس عشان اصرف منها

:وماله مش بقيتي مراته

:لا اتفقنا اللي كان قدامك أنه على الورق بس صح هو وافق وانت كنت شاهد على كدة 

:خلاص ما تضايقيش هكلمه … هتروحي فين الشهرين دول 

:هتصرف ومش هقول لحد

: هو انا اي حد 

:لا بس سيبني على راحتي عشان لو سالك تبقى صادق وانت بتقوله معرفش

: لازم اطمن عليك وسماح تقدر تجي لك تطمن

:هبقى اتصل بيها و اقول لها 

*بعد اسبوع تظاهرت انها ستسافر وذهبت لتجلس في شقتها مع كريم 

*كانت سماح تذهب لتطمئن عليها

: هو انت هترجعي امتى الشهرين خلصوا خلاص 

:مش هقدر ارجع بطني ظهرت وانا في الرابع مش معقول دي بطن حامل في شهرين

: امال هتفضلي هنا لامتى

:هرجع قبل الولاده بشهر أو شهرين على اساس اني نازله اولد في مصر 

:طب وشغلك

:لا ما انا اشتغلت في عياده بيطريه قريبه من هنا ولها اسمها لان شغل المزرعه هيكون صعب عليا في وضعي ده

:بس تصدقي كريم كان بيفهم جايب شقه في مكان تحفه

: هوكان طول عمره بيحب يعيش كويس وعنده ذوق عالي و اهو يا حبيبي ما لحقش يقعد فيها وانا زي الهب-له ما حبيتهوش زي ما حبيت المتخ-لف اللي ما يستاهلش 

:انت بتقولي على اخويا متخ-لف

:غلطت يعني

: الحقيقه لا …. انا مش عارفه هيفوق لنفسه امتى

: يفوق او لا ما يهمنيش المهم ان انا اللي افوق لنفسي وابطل احبه عشان اعرف اربي اللي في بطني احسن تربيه واخليه مش محتاج حاجه او حد

: طب هو بيسال عليك كل شويه

 :وانت بتقولي ايه

: بقول له بكلمك على النت لان مكالمات الدولي غاليه 

:كويس خليه ما يعرفش انا فين ولا يحس أنه مسؤول عني

: صحيح يا سماء هو كريم بطل يجيلك في الحلم زي زمان 

: اسكتي انا زعلانه قوي اخر مرة قبل كتب الكتاب بيوم كان بيودعني باسني على راسي و حسيت بيها زي ما كان بيعمل زمان وقالي هتوحشيني

: طب ايه اكتر مرة حسيتي بيه قوي غير المرة دى 

: يوم الحادثة بعد اللي اخوكي عمله فيا كنت بصلي وبعيط ونمت مكاني على سجادة الصلاة جالي وقالي كله خير هتعدي ما تقلقيش انا جمبك يمكن ده اللي خلاني كملت حياتي ولما حاولت انت-حر كان زعلان قوي مني حاولت اصالحه رفض صحيت بعيط أنه زعلان… ثاني يوم جالي وخلاني اوعده انها ما تتكررش

: ياااه هو في حب كده 

: حب اغرب من الخيال واهو راح الله يرحمه 

*بعد انقضاء خمس شهور عادت سماء الى شقتها وتظاهرت سماح بالترحيب بها 

*شعر ادهم بسعاده غريبه عند عودتها فقد افتقد الى احاديثهم معا فصعد اليها وطرق الباب ففتحت 

:نعم خير 

:مش هتدخليني

:انت قدام الناس شخص غريب وانا لوحدي وست متجوزه 

*ازاحها بيده ودخل

:ما حدش شايفنا لكن وقفتي دي ماما ممكن تسمعنا 

:هو في كلام بينا عشان تسمعنا

:اه عايز افهم غيبتي كل ده ليه انت مش قلتي شهرين بس 

:بطني كانت بدات تظهر قلت ارجع والناس تفتكرني في الخامس يبقى فاضل شهرين واولد في السابع

: عملتي متابعه للحمل 

:اه بتسال ليه 

:ينفع اكون معاكي المره الجايه 

:لا لانه اخلال باتفاقنا وحاول تحافظ على اللي اتفقنا عليه زي ما انا محافظة على الاتفاق 

:انت ليه عايزه تحرميني اني اشارك في حياة اللي في بطنك 

:مش انا اللي حرمتك انت اللي حرمت نفسك لما خبيت عن الناس انك ابوه واظن اني ملتزمه باتفاقنا فحاول انت كمان تلتزم غير انك مش متفاجئ من تصرفي انا شرطت وانت وافقت مش جديد الكلام عليك أو اتغير

: كده ح-رام عليك وقتها كنت مش متاكد انه مني

 :طيب واديك اتأكدت اتمنى كل واحد يعرف ايه اللي ح-رام عليه وبيعمله ومكمل فيه … ممكن تتفضل بقى عشان عايزه اوضب هدومي وانزل عندي شغل

: شغل ايه انت هترجعي المزرعه كده ببطنك دي

 :رغم انه شيء ما يخصكش لكن لا مش راجعه المزرعه شغلها خطر عليا دلوقتي

: امال رايحه فين

: انت كده بتطلب اكتر من حقك و بتتعدى حدودك انا جاوبت على اسئلتك رغم اني غير ملزمة… اتفضل يا معلم ادهم مع السلامه 

*كانت تتحدث بح-دة فتألمت ووضعت يدها على بطنها

: اااه

*بدون وعي وضع يده هو الآخر  فوق بطنها وشعر بحركة الجنين 

: مالك حاسه بايه 

*ابعدت يده

: لو سمحت أخرج العصبية بتأثر عليا ووجودك نفسه قدامي بيعصبني

*خرج وهو يستشيط غض-باً من تعاملها الجاف معه 

*وبعد مده وجد اتصال من عمار 

:ادهم .. سماء كلمتني هو انت مش اتفقت معاها على انك زوج على الورق

: ايوه يا عمار بس لما شفتها وشفت بطنها بصراحه ما بقتش قادر  ..نفسي اسمع دقات قلب اللي في بطنها ..  اعرف نوعه … اشتري هدومه …. مش مصدق اني حسيته بيتحرك النهارده بأيدي 

:انت اللي حرمت نفسك يا ادهم وبأيدك تصلح ده لما تعترف قدام الناس إنك جوزها 

:ما اقدرش انت عارف ليه 

:طالما متمسك برأيك و بواحدة باعتك هي كمان من حقها تتمسك باتفاقها معاك هي غير ملزمة تعيش زوجة في السر وانت تتمتع بكل الصلاحيات

 :هو انت مع مين فينا 

:مع الحق انت ظلم-تها ولسه بتظ-لمها انا هقفل قبل ما نتخ-انق و نخ-سر بعض بس ابعد عنها هي اعتبرتني اخوها و لجأت ليا مقدرش اخذلها

بقلمي سحر السحرتي 

*اغلق معه وظل ادهم يفكر في كلامه لكنه لم يتوصل الى حل 

*كانت تعامل سماء معه جاف كان يلمحها تجلس في البلكونه أراد أن يتحدث معها كما في السابق لكنه يعلم تمام المعرفة أنه إذا دخل البلكونه كانت ستتركه وترحل 

*كانت دائماً شاردة حزينة تبكي وضعته في حيرة هو لا يتذكر اي شئ ما حدث له جعله ضائع تائه 

*هل ظلمها حقا باخفاء زواجهم ؟ هل لمياء حقا ستعود إليه ؟ هل لمياء أحبته في يوم من الايام ؟ هل هو أيضا احبها ام مجرد تعود منذ الطفولة ؟

*ذات يوم كانت تصعد على السلم فقابلها

: سماء 

*بفتور 

: نعم 

: انت كل يوم بتنزلي بالليل كدة بتروحي فين 

: مش قلنا مالكش دعوه بيا ولا هو كل شويه لازم افكرك

: لازم اعرف عشان الناس بتتكلم قدامي وطبعا بحكم اني زي ابن عمك لازم اعرف عشان اقدر ارد عليهم 

: الناس ملهاش دعوه بيا انا دلوقتي ست متجوزة أما لو السؤال لك و بتشك في اخلاقي زي ما عملتها قبل كده احب اطمنك أن سمعتي بعيدة تماما عنك لانك ببساطة مش ابن عمي 

: مسئلة اني بشك في اخلاقك دي انا اسف عليها الكلام وقتها من الص-دمة خرج من لساني من دون أي تفكير انت بعيدة تماما عن سؤ الاخلاق 

: آمال بتسال ليه وعايزه الصراحه 

: لو قلت اني عايز اطمن عليك هتصدقيني

*وجدت ندم على ما فعله في كلماته 

: اذا كان كده هحترم ده و اقولك بنزل اتمشى لان الولادة قربت والدكتور قال لازم امشي كثير وطبعا محدش يعرف لاني بحكم الكذبة لسة في السابع 

: طب بتنزلي متأخر ليه

: انا بنزل بعد المغرب يكون الجو بقى كويس لان الحر بيدوخني وممكن اقع من الهبوط

: ينفع اكون معاكي من بعيد حتى عشان ابقى مطمن

: لا لحد كده وكفايه انا جاوبتك لما احترمت رغبتك انك بتطمن عليا أكثر من كدة انا رافضة يكون لك دور في حياتي 

: سماء ارجوكي 

: ارجوك انت راعي نفسيتي انا لسة بعاني من ظل-مك ليا التفكير هيشلني لو جرالي حاجه اللي في بطني ده مصيره ايه

: ما انا عشان كده بحاول اكون جمبك احسسك بالامان 

: عمر وجودك جمبي ما حسسني بالامان خصوصا الفترة اللي فاتت عن اذنك ظهري واجعني محتاجة اطلع انام

: مش محتاجه حاجه 

: منك اكيد لا انا معايا ربنا اللي احسن من الكل وهو اللي رزقني بسماح بتطل عليا اخت بصحيح وليا الحمد لله أصحاب كمان بيطمنوا من فتره للتانية يعني مش وحيدة

*تركته وصعدت ليشعر بخيبة والم في ضميره 

*قبل الولاده باسبوع كانت سماء تجلس على السلم وتبكي وكان ادهم يصعد فف-زع من منظرها واسرع يمسك يدها

: سماء مالك في ايه

: ابدا بريح السلم عالي وبقى متعب دلوقتي بالنسبة لي 

: وده يخليك تعيطي 

: اكيد لا

: طب بتعيطي ليه

: يمكن عشان مش معايا لا ام ولا زوج اللي المفروض يكونوا اقرب اثنين ليا معايا دلوقتي 

: انا موجود وقلت لك قبل كده 

: موجود ازاي باي صفه 

: جوزك وأبو اللي في بطنك

: هتبقى قدام الناس تمسك ايدي وانا ماشية وتسندني ونتمشى سوا زي اي اتنين متجوزين 

: …….

: ما تتعبش نفسك تدور على رد اطلع كمل طريقك انا هريح واطلع … اتفضل

*مازال كلما رائها يشعر بتأنيب الضمير لكن ليس لديه حل فهو في حيرة كبيرة 

*بعد مرور شهرين من عودة سماء لمنزل سلطان كما كانت تحسبها شعرت بآلام الوضع وسمع ادهم ص-راخها المكتوم من غرفتها فاسرع ودخل شقتها 

:انت كويسه يا سماء 

:لا شكلي بولد مش قادره الوجع جامد جدا 

: طب اسندي عليا هوديك المستشفى

:لا انا كلمت الاسعاف هتيجي توديني المستشفى اللي بتابع فيها 

:ما انا موجود اوصلك اسرع

 :مش قادره اتحرك 

*بشعور تلقائي حملها بين ذراعيه وقبل راسها لا يعرف لماذا واحتضنها لتشعر بالامان 

:نزلني يا ادهم الناس هتقول ايه 

:في داهيه المهم انت وصحتك 

*قبل ان ينزل بها كانت سياره الاسعاف قد وصلت حملوها بدلا عنه 

:انا هركب معاكي عربيه الاسعاف 

:ما فيش داعي انا كلمت سماح وعمار و هيحصلوني 

:بطلي مجادله بقى انا جاي معاك

*صعد معها داخل السياره رغم رفضها وامسك يدها وهي تتألم 

:ادهم لو سمحت عايزه اوصيك لو جرى لي حاجه ولادي اديهم لسماح تربيهم ارجوك 

:ولادك ازاي يعني مش فاهم

: انا حامل في توأم  …وزي ما قلت لك اديهم لسماح دى وصيه مي-ت لازم تنفذها عارفه الخلاف اللي بنا وانك مش بتحبني بس اللي في بطني ولادك مصلحتهم أنهم يبقوا مع سماح خصوصا لو عرفت انها عمتهم

:مش هيجرى لك حاجه و هتقومي بالسلامه ومين فهمك اني مش بحبك 

: مش وقته عتاب بس لو جرالي حاجه انا مسمحاك بس نفذ وصيتي 

*وصلت السياره وتم ادخالها الى غرفه العمليات

*تفاجأ ادهم ان سماء كانت تعد كل شيء فقد دفعت مصاريف المستشفى مقدما وسجلت البيانات لم يكن عليها سوى الحضور فقط للولاده 

*وكأنها تخبره انها وحيدة في هذه الحياة لكنها تستطيع الاعتناء بنفسها واطفالها

*شعر بظل-مه الكبير لها لكن ماذا يفعل؟ 

*وصلت سماح هي وعمار وجدته متوترا

سماح : ايه يا ادهم بقالها كتير جوه

: مش عارف الدقيقه بتعدي عليا ساعه

*ارادت سماح ايقاظ ضميره 

:وانت مالك قلقان كده ليه ده جوزها لو كان هنا مش هيعمل في نفسه اللي انت عامله ده … اهدى شويه يا اخويا الناس ممكن تفتكر انك انت جوزها

: ابدا … هو بس اول مره اتعرض لموقف زي ده واشوف حد بيولد 

:حد بيولد … طيب روح انت على البيت بقى احنا جنبها خلاص 

: بصفتك ايه

 :صاحبتها وزي اختها وهي اللي مكلماني وموصياني اكون معاها 

:وانا ابقى 

*سكت ولم يكمل

: ايه يا ادهم تبقى ايه 

:ابن عمها

: لا انت مش ابن عمها ومش ملزم تستنى

:عشان يبقى معاها راجل لو احتاجت حاجه 

:وعمار اللي واقف هناك ده بيعمل ايه راجل بصحيح يملى العين والقلب

*رد بحده 

 :انت عايزه تروحيني ليه

: مش عايزه اتعبك خصوصا انك مش ملزم

:طب اسكتي و اطلعي منها انا عمي موصيني عليها 

*خرجت الممرضه

 :مين ابو الاطفال 

*رد ادهم سريعا بلا وعي

:انا ابوهم 

:طيب هجيبهم عشان تأذن في ودنهم

سماح: انت قلت للممرضه ليه انك ابوهم 

*رد بتوتر: مش انا كنت وكيل ابوهم في الجواز 

*غمز عمار لها الا تضغط عليه أكثر من ذلك 

:اه صحيح تبقى في مقام ابوهم 

*أتت المممرضة و هي تحمل صبي وفتاه

:اتفضل دقائق و هرجع اخدهم  عشان يروحوا الحضانه

: ليه هما محتاجين حضانه

: لا بيفضلوا فيها على بال الام ما تفوق وتقدر تهتم بيهم

:طب هي عامله ايه دلوقتي 

:كويسه هي تعبت شويه بس بقت احسن

*حمل ادهم الصبي وبكى من الفرحة وحملت سماح الفتاه وبكت بدورها 

*أذن ادهم في اذن الصبي و امسكه لعمار وحمل الفتاه من سماح وأذن في اذنها هي الاخرى 

سماح :ما شاء الله زي القمر حبيتهم قوي وكأنهم من دمي  … بس القرده ما قالتش كل لما اسالها تقول لي خليها مفاجاه وفعلا طلعت مفاجاه حلوه 

*عادت الممرضه و حملتهم 

*خرجت سماء من غرفه العمليات ودخلت غرفه عاديه 

*دخلت سماح معها وكاد ادهم ان يدخل فمنعته

: انت رايح فين

:هتطمن عليها 

:خليك بره مع عمار هتدخل بصفه ايه يمكن وهم بينقلوها تتكشف عليك وانت راجل غريب 

*دخلت و اغلقت الباب

:طيب يا سماح الكل-ب 

عمار: مبروك يا ادهم

: شفت مراتك عملت ايه 

:و هتعرف منين ان سماء مراتك 

:طب خدها ابعدها شويه عايز ادخل اطمن على سماء 

*طرق عمار الباب فخرجت سماح 

: نعم

:هي فاقت

: لا لسه

:طب تعالي نجيب قهوه نشربها على ما تفوق

سماح : طيب يلا يا ادهم تعالي معانا 

 :لا روحوا انتم و هاتوا لي معاكم 

*دخل لم يستطع ان يقاوم مشاعره و احتضنها وقبل راسها ويدها 

*كانت بدات في تحريك راسها

 *في الخارج 

سماح: انا حاسه انك سحبتني من عند سماء … ليه 

:كان عايز يدخل يطمن عليها 

:وسمحت له يا عمار بعد اللي عمله معاها … لازم يتعاقب على ظل-مه ليها

: سيبيه يحن لها و يحن للعيال يمكن يتغير وينسى وجايز يعترف بجوازه منها 

: تفتكر ممكن 

: اه ما شفتيش لهفته ودموعه وهو شايلهم

 :انا نفسي اتفتحت لما شلتهم ايه رايك نجرب 

:اللي تشوفيه يا حبيبتي بس نأجلها شهر عشان تعرفي تكوني جنبها هي ما لهاش حد غيرنا 

:عندك حق طول عمرك راجل وصاحب صاحبه … يلا نرجع كفايه عليه كده 

*عندما عادت وجدت سماء قد استيقظت

: مبروك يا قلبي عامله ايه 

:الحمد لله مين اللي أذن لهم

: ادهم عشان ابوهم قصدي وكيل ابوهم  … صحيح قررتي انت و ابوهم هتسموهم ايه 

:كريم و كرما

: حلو قوي الاسماء دي 

ادهم :نعم هو ابوهم موافق على كده 

سماء :ايوه ده هو بنفسه اللي اقترح عليا اسم كريم لما عرف هو كان راجل قد ايه معايا 

سماح :انا هروح ابص عليهم واقول للممرضه تجيبهم عشان تشوفيهم .. تعالى معايا يا عمار 

*همس لها :خرجتينا ليه

 :شكله هيت-خانق معاها عشان سمت الولد كريم قلت اسيبهم عشان لو قال حاجه غلط ما تتحرجش قدامنا 

: ربنا يستر

$ ما هو رد فعل ادهم على ما قالته سماء ؟ وهل سيستمر اسم الولد كريم ام سيغيره؟

• تابع الفصل التالى ” رواية أحببت من لا يرانى  ” اضغط على اسم الرواية