رواية العشق الابدي كاملة بقلم لبنى دراز عبر مدونة كوكب الروايات
رواية العشق الابدي الفصل السابع عشر 17
يسألونك عن النقاء قل هو قلب أخت، و يسألونك عن الأمان قل هو عطف أخ.
🥀🥀🥀🥀🥀
و ما الأخ إلا نعمة تعجز الحروف عن وصفها هو الصديق، وهو العوض، وهو السند.
أختي أنتِ النور الذي يضيء حياتي، والنبع الذي أرتوي منه حباً وحناناً.
🥀🌱🥀🌱🥀
العشق الأبدي بقلمى✍️____________لبنى دراز
فـ ڤيلا المزرعة
حلم قاعدة فـ أوضتها و بتفتكر أمها و قد ايه وحشتها وحاسة فعلا ان الدنيا فضيت عليها و شوية الباب خبط ودخلت
فاطمة :: بحزن .. برضوا ياست البنات و أخرتها يعنى
حلم :: بتمسح دموعها .. الحمدلله يا فاطمة .. المهم خير فى حاجة؟
فاطمة:: أخواتك تحت و معاهم واحد اسمه حسام
حلم:: ماشى انزلى انتى اعملى قهوة و انا نازلة وراكى
و فعلا قامت غسلت وشها و نزلت لـ أخواتها و بترحيب .. أبيه حسام نورت بيتك يا حبيبى
حسام:: البيت منور بـ صاحبته .. عاملة ايه يا حور طمنينى عليكى يا حبيبتى
حلم:: بتنهيدة وجع .. انا كويسة ماتقلقش .. ببرود لـ هشام و أحلام .. اهلا
هشام:: بندم .. عاملة ايه يا حور
حلم::بنفس البرود .. أنت شايف ايه
هشام:: انا طلقت عزة خلاص .. أرجوكى سامحينى
حلم::ايه ده بجد طلقتها وقدرت تعملها .. و بعصبية .. بعد ايه هاااا بعد ما سرقتنى و كانت سبب فـ موووووت أميييي .. بس ماعلينا اللى اتسرق انا هعرف أرجعه من عينيها هى و الكـ لب عااابد .. و بصوتها كله بس أمى هتعرف ترجعهااااا ازااااى يا هشااااااام ازااااااى اننننطقق
حسام:: أهدي يا حور يا حبيبتى ماينفعش كدا
حلم:: بوجع وقفت قصاد حسام ..أهدى ازاى يا أبيه تقدر تقولى أهدى أزاى انتوا كل واحد فيكم عايش حياته مع نفسه .. انت مثلا هترجع تسافر لـ شغلك و عيالك اللى برة
و هشام بيه .. مايغركش شوية الندم اللى بيمثلهم دول .. ماتقلقش هيرجع بسرعة تانى زى ماكان و يعيش حياته و مش بعيد يرجع لـ عزة تانى عادى .. و أحلام هانم كل همها الدروس و الفلوس زادت الساعة دى أكتر من الساعة اللى فاتت ولا لأ.. و بدموع أنا اللى قلبى أتكـ سر و ضهرى أنحنى .. انا اللى لو دفعت عمرى كله عشان أمى ترجع بس دقيقة اشوفها و اسمع صوتها فيها مش هتأخر .. بقيت ضعيفة و هشة من غيرها .. أمى رغم انها ست بسيطة و ضعيفة بس كانت سندى و قوتى كنت بحا رب و ادوس ع اى حد يفكر يأذ ينى و كنت بمشى من غير حراسة عشان عارفة دعواتها حواليا بتحرسنى .. و بزعيق و دموع الوجع دلوقتي تقدرررروا تقولولى انا همشى ازااااااى بعد ماحرمنى منها البيه ومراته
أحلام:: بغيظ .. ايه لازمتها المحاضرة دى كلها ياست حور .. كل ده عشان الورث اييييه عايزة تاخديه لوحدك
حلم:: بصدمة .. ورث ؟ انتوا جايين عشان الورث ؟ و ضحكت بكـ سرة ههههههه أى ورث اللى بتتكلمى عنه
أحلام:: معاشها و دهبها و نصيبها فـ البيت
حلم:: قعدت مكانها بـ كسـ رة قلب .. معاشها موجود ماتقلقيش خمس سنين ماصرفتش منه جنيه و دهبها رغم انى انا اللى جيباه بس مش عايزة منه غير أخر حاجة كانت لابساها و بس و الباقي قسموه عليكوا .. اما البيت هى باعت زى ما بعتوا ولا نسيتى و عموما انا كنت عارفة ان اليوم ده هيجى و عشان كدا حضرتلكم كل حاجة .. لحظة واحدة
و راحت مكتبها و كلها وجع تجيبلهم فلوسهم و الدهب بتاع امها و الاوراق اللى تأكد ان ده كل ما تملكه أمهم و رجعت سلمتهم لـ حسام .. كل حاجة فـ الملف ده قسموهم ع بعضكم و سابتهم و طلعت أوضتها و حدفت نفسهاع سريرها حضنت مخدتها و دموعها نازلة شلال ع وشها من كتر الوجع اللى عاشته ع إيد أخواتها و شوية و الباب خبط
حلم::اتعدلت بتعب .. أدخلى يا فاطمة
حسام::فتح الباب ودخل .. ينفع حسام ولا ألف و أرجع تانى
حلم:: عدلت قعدتها .. اتفضل يا أبيه
حسام::بحزن .. انا عارف ان كل كلمة قولتيها ليكى ألف حق فيها .. بس صدقينى غصب عنى .. انا بنيت مستقبلى برة و عملت أسم هناك ليه وزنه خايف انزل هنا و معرفش أعمل اسمى تانى و أهد اللى بنيته هناك ساعتها هبقى ضعت و ضيعت عيالى يا حور
حلم::صدقنى انا مش زعلانة منك وعارفة يا أبيه انه غصب عنك انا بس صعبانة عليا نفسى مش أكتر
هشام::بندم .. حور ممكن تسمعينى لو سمحتى
حلم::بتبص لـ هشام و ساكتة و مافيش غير دموعها و بس
حسام::أخوكى ندم بجد يا حور أديله فرصة تانية يثبتلك انه اتغير فعلا و سامحيه خلينى أسافر و انا مطمن عليكى
هشام::صدقينى انا ندمت اوى و فعلا عرفت ان كل خسارة تتعوض إلا خسارة أمى و أختى و أن كنت خسرت أمى فـ بلاش تخلينى أخسرك انتى كمان أرجوكى و سامحينى ع كل حاجة عملتها و كل كلمة قولتها فـ حقك
حلم::بوجع حدفت نفسها فـ حضن هشام .. اااااااااااااااااه كان نفسي تفهم الكلام ده من بدرى ما كانش حصل اللى حصل ده كله ااااااااااااااه كنت محتاجة حضنك ده من زمااااان اوى
هشام::و انا مش هسيبك تانى و هفضل جنبك لغاية ما اسلمك لـ عريسك بنفسى و قام وقف باس جبينها و نزل هو و حسام عشان يمشوا يرجعوا بيوتهم و هى فضلت فـ اوضتها و من التعب غلبها النوم
تحت فـ الليڤنج
عاليا و ياسمين رجعوا من المصنع سألوا ع حلم و فاطمة حكت لهم كل اللى حصل من وقت ما أخواتها جم لغاية ما مشيوا
عاليا::هى فين دلوقتي يا بطة
فاطمة::هى يا كبدى فـ اوضتها من وقتها و لما طلعتلها من شوية كانت نامت
ياسمين::طيب يا فاطمة معلش جهزى الغدا و هاتيه فوق و انا هحاول اصحيها و نتغدا سوا فـ التراس
فاطمة::ياريت تقدرى يا انسة ياسمين تخليها تاكل لقمة الا من وقت ما رجعت من برة ما أكلتش حاجة وهى اصلا بتنزل دايما من غير فطار
ياسمين::هاتى الأكل و انا هطلع لها .. و فعلا طلعت ياسمين لـ حلم و استاذنت و دخلت شافتها نايمة بس مش نعسانة .. حور حبيبتى صاحية؟
حلم::بدموع أيوا صاحية يا ياسمين بس لو سمحتى مش قادرة اتكلم دلوقتي
عاليا::دخلت بمرحها المعتاد .. ايه ده يا مزة انتى لسة نايمة قومى قومى و انتى قمر كدا
حلم::عاليا أرجوكى مش قادرة
عاليا::اه ياختى معانا مش قادرة تتكلمى .. انما بقى لو ناس تانية هى اللى قالت .. هتقومى تنطى و تفطى زى الفرخة المجنونة و تجرى من اوضة لـ اوضة عشان تفوقى و تدورى ع اشيك حاجة تلبسيها مش كدا
حلم::ههههههههه الله يجازيكى يا عاليا ضحكتينى و انا ماليش نفس بقى بعمل كدا
عاليا::ايوا بقى ياقمر اضحكى اضحكى ماحدش واخد منها حاجة
ياسمين::ههههههههههههه يا نهار الوان انتى يابنتى بتجيبى الكلام ده منين
عاليا::عليا الطلبات و عليكى المصاريف ما اعرف بييجى منين ههههههههههههه
شوية و خبطت فاطمة و دخلت بالغدا يلا يا ست البنات الأكل الحلو اللى بتحبيه
عاليا:: بجنان .. واااااو بشاميل و جلاش باللحمة و كانلونى يا قادرة
فاطمة:: هههههههههه حصل يا انسة عاليا و الحلو بسبوسة بالقشطة
ياسمين::بمرح .. كمااااان ازاى بس يا جدعان قشطة تاكل قشطة
حلم::بتنهيدة .. اتفقتوا عليا انتوا التلاتة يعنى
فاطمة::بالله يا انسة حلم .. تاكلى حاجة و أنسي اللى حصل من أخواتك عشان خاطر ربنا
و فعلا حلم فاقت شوية و ابتدت تتكلم و تضحك و تاكل و تحاول تنسى اللى حصل بينها و بين اخواتها
__________________________
فـ بيت سالم المنصورى
خالد قاعد مع جمال و بيفكروا ياترى سلمى و هالة قدروا يخلوا شروق و ضحى يوقعوا فارس و أدهم ولا لسة و هما لسة بيتكلموا سمع رنة موبايله
خالد::الووو سلومة بنت حلال كنا لسة فـ سيرتكم انا و جمال
سلمى::تعيش يا اخويا عاملين ايه
خالد::أحنا كويسين بس طمنينا عملتوا ايه نقول مبروك ولا لسة
سلمى::بغيظ .. العيال شكلهم طاروا من إيدينا يا خالد الاربعة
خالد::بعصبية .. أزاى يعنى طاروا اتكلمى يا سلمى
سلمى::البنتين اتخطبوا و أدهم و فارس واحد بيحب دكتورة معاه فـ المستشفى و التانى بيحب بنت بنت عم نجوى اللى قاعدين معاهم فـ نفس البيت
خالد::بغضب قصدك اييييه كل حاجة راحت كل اللى بخططله من سنين يروح كدا فـ الهوا
سلمى::أهدى يا اخويا اعصابك .. و حياتك مابقاش سلمى المنصورى لو ما خليتهمش يركعوا تحت رجلينا و بـ شر من بين أسنانها .. حتى لو اللى حصل زمان نكرره تانى
هم مش هيكونوا أغلى من أحمد
خالد::أعقلى يا سلمى ما تتهوريش و أرجعوا نفكر سوا الأول و نشوف هنعمل ايه
سلمى::ماشى يا خالد يومين و نكون عندكم سلم ع جمال لغاية ما نرجع
خالد::خلى بالكم من نفسكم سلام وفعلا قفل المكالمة و بص لـ جمال .. سلمى بتسلم عليك
جمال::بتوتر .. عملوا ايه مع نجوى و عيالها يا خالد
خالد::بغيظ من بين أسنانه .. فارس و أدهم أرتبطوا و كمان عاليا و ياسمين أتخطبوا
جمال::يـ يـ يعنى خلاااص كـ كـ كل اللى خططناله راح و مش هنعرف ناخد الفلوس والارض اللى بابا كتبهالهم
خالد::بشرود .. انا قولت هاخد فلوسى من عينيهم ومش هسيبهالهم ابدا
جمال::بأندهاش فلوسك !! فلوسك ازاى يعنى
خالد:: بأنتباه .. قصدى فلوسنا كلنا .. و جواه أخد بس الفلوس اللى مع فارس و اخلص منه و أفضالك انت كمان يا جمال
__________________________
فـ مكتب فارس
فارس بيراجع ملفات القضية مع رجالته و بيحط خطته للقبض ع المُقنع و شوية خبط الباب ودخل أمين
فارس:: فى حاجة يا أمين
أمين:: فى ناس برة عايزة تقابل حضرتك
فارس:: بعدم انتباه ما قالوش مين
أمين:: قالوا يافندم .. حسام الرشيدي و هشام الرشيدي
فارس:: تمام خليهم يتفضلوا .. و لـ رجالته معلش يا شباب ارجعوا ع مكاتبكم شوية .. و لـ سيف خليك معاهم ركزوا فـ النقط اللى قولت عليها
و بالفعل خرج أمين بلغ حسام و هشام يدخلوا و هما داخلين شافوا رجالة فارس خارجين
حسام:: السلام عليكم
فارس:: و عليكم السلام اتفضلوا
هشام:: بصراحة انا مش عارف ابتدى منين
فارس::بهدوء .. خير يا استاذ هشام
حسام:: بصراحة يا فارس و اسمحلى يعنى اقول فارس كدا من غير القاب
فارس:: أكيد طبعا .. اتفضل تحت أمرك
حسام:: الأمر لله .. بصراحة احنا جايين النهاردة عشان هشام عايز يعتذرلك عن السوء الفهم اللى حصل و الكلام اللى قاله هو و مراته
هشام::بتوضيح .. كانت يا حسام كانت مراتى و خلاص طلقتها .. و لـ فارس .. انا بجد مش عارف أقولك
فارس:: أخد نفس قوى وخرجه بهدوء .. المفروض اللى تعتذرلها هى أختك اللى انت غلطت فيها .. انا لغاية دلوقتي مش عارف انت ازاى قدرت تطعن فـ سمعتها و شرفها بالطريقة دى .. و مشيت ورا كلام واحدة حقودة و طماعة و مافكرتش .. و اتكلمت قصادنا انا و اخويا و احنا اتنين شباب و أغراب بالنسبالكم و انا كنت اول مرة اشوفها و برضوا مافكرتش ان كان ممكن حد فينا يصدق كلامك و يأ ذى أختك
حسام::بمقاطعة .. اسف طبعا انى قاطعتك بس لما هشام حكالى الموضوع عاتبته و فهمته غلطه و هو طلب انه يجى يعتذرلك بنفسه
هشام:: انا كنت معمى يا فارس و الشيـ ـطانة اللى كانت معايا سمـ ـمتلى أفكارى ماكنتش شايف ولا سامع غيرها
فارس:: لـ هشام انت عارف انا من اول ماجيت هنا و انا كنت بسمع عن اختك قد ايه قوية و عنيدة و لما شوفتها لـ اول مرة بعد شهر تقريبا شوفت واحدة ضعيفة و مكسـ ورة .. قولت لنفسى معقول هى دى اللى بسمع عنها دى واحدة أضعف مايكون واحدة هشة .. للاسف أختك بتمثل القوة عشان تقدر تحمى نفسها لانها مش لاقية اللى يسندها و يحميها
حسام:: حلم طول عمرها قوية و حتى لو ضعفت شوية بتقوم بسرعة
فارس::بالظبط بتقوم بسرعة .. لازم تقوم بسرعة يا حسام عشان تسند نفسها و ماتديش فرصة لـ حد يستغل ضعفها لكن لو فى حد بيحبها بجد و سند ليها هتطمن و تحس بالأمان و للاسف ده مش موجود فـ حياتها رغم وجودكم و انا اسف انى بقولكم الكلام ده .. و لأنى أخ زيكم عارف يعنى ايه أكون سند لـ أختى لكن انتوا للاسف بعيد عنها
حسام:: انا غصب عنى حياتى كلها برة و نزولى ده كان بس عشان الظرف اللى مرينا بيه
فارس:: و ده كمان كان غلط يا حسام لان والدتك الله يرحمها كانت دايما تقول انها نفسها تشوفك و تشوف ولادك .. للاسف انت حرمت نفسك من نظرة عينيها و هى بتدعيلك صدقنى ليها طعم تانى خالص غير لما تسمعها منها فـ مكالمة تليفون كل 3 او 4 شهور .. صدقنى انا لما أقعد بين إيدين امى و تدعيلى و هى بتبصلى و اشوف عينيها قد ايه فرحانة و مليانة حب حقيقى بالدنيا و مافيها للاسف انتوا حرمتوا نفسكم من كل ده حرمتوا نفسكم من خير كتير و نعمة كانت بين إيديكم و راحت منكم
هشام::بندم .. صدقنى انا ندمت ع كل لحظة زعّلت امى و أختى فيها و كلامك ده زود ندمى و وجعى
فارس:: انا اسف مقصدش طبعا ازود وجعك بس كنت حابب اوضحلك ان اللى لازم تعتذرله هى حلم مش انا .. انا مافيش بينى و بينك حاجة و موقف و عدى لكن الجرح انت سببته لـ اختك و هى احق بالاعتذار ده منى
هشام::انا روحتلها و اعتذرتلها و هى قبلت اعتذارى و سامحتنى و وعدتها انى مش هسيبها و بأبتسامة فهمها فارس .. لغاية ما اسلمها لـ عريسها
فارس::أبتسم .. ان شاء الله و جواه قريب اوى هيجى اليوم ده ان شاء الله
حسام::طيب نستأذن احنا و أسفين عطلناك عن شغلك
فارس::ابدا ولا يهمك تحت أمركم فـ أى وقت
و فعلا خرج حسام و هشام من عند فارس اللى شرد بتفكيره فـ حلم و فـ جملة هشام الأخيرة(لغاية ماأسلمها لـ عريسها)
_________________________
فـ شقة فارس
بعد يومين
أدهم رجع من المستشفى وداخل الشقة شاف ضحى و شروق قاعدين فـ الليڤنج
وما اتكلمش دخل ع طول ع أوضة أمه .. السلام عليكم يا نوجة
نجوى::قلب نوجة و عليكم السلام يا نور عيني حمد الله ع السلامة
أدهم::قوليلى يا قمرى قاعدة ليه لوحدك مش قاعدة مع الناس اللى برة
نجوى::عمتك ومرات عمك سافروا الصبح وسابوا البلو تين اللى معاهم و مش عارفة أعمل ايه مش مرتاحالهم
أدهم::تؤ ماتقلقيش منهم دول أخرهم نفخة .. خليهم بس يعملوا حاجة وحياتك يا نوجة بـ حقنة زُنُفل واخلصك منهم هههههههههههه
نجوى:: بضحك ههههههههههههه يا واد انت بتجيب الكلام ده منين بس
أدهم::لأ لأ انا احتج كدا .. يعنى بذمتك يعنى عندى قردة زى عاليا و بتسألينى بجيب الكلام ده منين ههههههههههههه
نجوى::بحنين .. اخواتك وحشونى أول مرة ابعد عنهم كدا
أدهم::ايه رأيك تروحيلهم تقعدى معاهم
نجوى::كنت ناوية يابنى بس البلو تين اللى برة دول مش عارفة اعمل فيهم ايه
أدهم:: امممممم ومسح ع شعره بتفكير .. ماتقلقيش هفكرلهم فـ حاجة .. المهم انا جعان ياقمر فى أكل ولا نقضيها دليفيرى ههههههههههههه
نجوى::لأ فى يا حبيبى فاتن عاملة أكل حلو .. ع ماتاخد شاور وتغيّر هدومك وتصلى يكون فارس وصل ونتغدى كلنا
أدهم::قام باس إيدها و راسها.ماشى ياست الكل عن أذنك وفعلا خرج راح اوضته يغيّر هدومه ويصلى لغاية ما يرجع أخوه و يفكروا سوا ازاى يقفوا قصاد مخطط أعمامهم
___________________________
فـ شركة عابد فـ نفس الوقت
قاعد فـ مكتبه بيفكر ازاى يطول حلم بأى طريقة وقطـ ع تفكيره خبط ع الباب و كانت
مروة:: مستر عابد فى واحدة برة عايزة تقابلك
عابد:: ماقالتش مين؟
مروة:: قالت واحدة ليك معاها مصلحة
عابد:: خليها تتفضل يامروة
مروة:: حاضر يا مستر .. و بالفعل خرجت و سمحت للى جاية تدخل
عابد:: بأبتسامة مكر كنت متأكد انك هتيجى تانى
عزة:: و ايه اللى أكدلك انى هاجى تانى
عابد:: ضحك بـ شر هاهاهاهاهاهاهاهاها حبك لـ حلم
عزة:: ده انت واثق بقى ههههههههههههه
عابد:: أكيد ..المهم خير
عزة:: حلم
عابد:: اممممم مالها
عزة::هشام طلقنى بسببها و عايزة أنتـ قم منها وأرجع لـ جوزى
عابد:: رسيني ع الدور
عزة:: حلم مليونيرة و عندها كتير اوى و شكلها كدا ابتدت تحب و من بين أسنانها .. لااازم قبل ما تتجوز ..تتقـ تل او تتخـ طف و أخلص منها عشان ارجع لـ هشام والليلة دى كلها ما تروحش مني
عابد:: شرد بتفكير .. اممممم تتخـ طف .. حلو اوى هو ده أبوسك منين قوليلى
عزة:: بدلع .. مكان مايعجبك ههههه المهم هتعمل ايه
عابد:: لا لـ حد هنا وانتي كتر الف خيرك سيبيلي انا بقى الطلعة دي
عزة:: بس انا عايزة أنول شرف المساعدة
عابد:: لا معلش لو احتجتلك هقولك أكيد يا بيبي
عزة:: قامت طيب يا بودى هستنى اسمع خبر حلو و خرجت
عابد:: رجع تانى لتفكيره و بعدين ابتسم بـ شر و طلع موبايله و اتصل بـ رانيا .. الوو رنوش فينك
رانيا:: موجودة يا قلب رنوش
عابد:: خدمة لـ أخوكى .. ممكن تعمليهالى
رانيا:: بخصوص حلم مش كدا
عابد:: بحب فيكي فهمك السريع يا رنوشة
رانيا:: أؤمرنى يا دنچوان الدفعة ههههههه
عابد:: انتى لسة فاكرة ههههههه
رانيا::طبعا يا دنچوان هى دى حاجة تتنسي المهم قولى عايز ايه
عابد::بحب مصطنع .. حلم وحشتنى اوى يا رانيا و عايز اطمن عليها و لما روحتلها المستشفى حازم منعنى
رانيا:: بغيظ منه .. انت اللى غبى يا عابد انا لما قولتلك .. عرفتك ان باقى الشلة موجودين .. و قولتلك ماتجيش الا لما يمشوا عشان الحساسية اللى بينكم
عابد:: خلاص بقى يا رانيا خلينا فـ المهم انا عايز اشوف حلم و اطمن عليها بس ياريت تكون بعيد عن المزرعة عشان حازم ما يمنعنيش تانى ممكن؟
رانيا:: اشطاااات هظبطلك الدنيا و أعرفك
عابد:: رانيا ممكن ما تعرفيهاش انى انا اللى عايز اشوفها
رانيا:: أكيد عارفة لانها لو عرفت مش هتوافق اصلا تقابلك
عابد:: هحبك اكتر من كدا ايه بس .. سلام ياقمر .. و بالفعل قفل المكالمة وابتدا يفكر هينفذ ازاى مخططه
______________________
فـ المزرعة
فارس بعد ما خلص شغل راح المزرعة يطمن ع أخواته البنات و يشوف حلم عمره و يطمن عليها و هو ماشى فـ الطريق اتصل بـ أمه .. السلام عليكم ياقمر
نجوى:: قلب القمر و عليكم السلام يا نور عيني
فارس:: حبيبتى ما تستنونيش ع الغدا النهاردة هتأخر شوية
نجوى:: خير ياحبيبى .. عندك شغل كتير ولا ايه
فارس:: لا ياست الكل بس رايح المزرعة اطمن ع البنات و أشوفهم لو محتاجين حاجة
نجوى:: بمكر .. تطمن ع البنات بس يا ريزو
فارس:: بأبتسامة .. مش ساهلة انتى برضوا يا نوجة ههههههه
نجوى::ربنا يسعدك ياحبيبى و يفرح قلبك يارب
فارس::تسلمى لـ قلبى يا ست الكل يلا بقى هقفل عشان سايق و لما اوصل هكلمك اطمنك
نجوى:: توصل بالسلامة يا حبيبى خلى بالك من نفسك و سلملى ع البنات
فارس:: يوصل يا قمر .. و فعلا قفل المكالمة مع أمه و بعد شوية وقت وصل فعلا المزرعة و راح الڤيلا رن جرس الباب
فاطمة:: فتحت و بترحيب .. فارس باشا يا دى النور حمد الله ع السلامة يا باشا اتفضل
فارس:: الله يسلمك يا فاطمة .. حلم و البنات لسة ما رجعوش من المصنع ؟
فاطمة:: لأ رجعوا أنسة حلم فـ المكتب و اخوات حضرتك فوق فـ اوضتهم
فارس:: طيب ممكن تبلغيهم انـ… و قطـ ع كلامه نزول عاليا و ياسمين
عاليا:: بفرحة أبييييه فاااارس وحشتنى اوى جدا خالص
فارس:: فتحلها دراعه و انتى يا قلب فارس وحشتينى جدا يا حبيبتى و لـ ياسمين ايه سمسمة ما وحشتكيش ولا ايه
ياسمين:: جريت عليه و اتعلقت فـ حضنه اكيد وحشتنى اوى يا فارس و ماما و أدهم كلكم وحشتونى
فارس:: و انتوا كمان يا قلب فارس من جوة وحشتونا اوى .. المهم بقى اتغديتوا ولا لسة أخوكى بصراحة واقع
عاليا:: بمكر .. واقع جووع و بغمزة ولا واااقععع …
فارس:: ضـ ربها بخفة ع دماغها … بت انتى ماتشغليش دماغك عليا ماشى ولا اييييه
عاليا:: باستسلام رفعت إيدها .. بريء يابيه خلاص
ياسمين:: بضحك .. الناس اللى بتجيب ورا من قبل القلم ههههههههههههه
فارس:: المهم بجد انا جعان و جاي اتغدا معاكم .. اتغديتوا ولا لسة
ياسمين:: احنا لسة راجعين وما اتغديناش
عاليا:: هروح أقولهم يعملوا حسابك معانا و نتغدى فـ الجنينة ايه رأيكم
فارس:: فكرة حلوة و انا هخرج استناكم برة
و بالفعل خرج الجنينة استناهم و راحت عاليا تبلغ فاطمة ان الغدا فـ الجنينة و ياسمين دخلت لـ حلم تبلغها بـ وجود فارس و خرجت جرى عند اخوها
حلم::بمجرد ما عرفت بـ وجوده ضربات قلبها زادت بسرعة ملحوظة .. ولـ نفسها أهدى يا حور و أخرجي .. و بالفعل أخدت نفس و خرجته بهدوء و خرجت الجنينة و عينيها عليه قد ايه واحشها
فارس:: عينيه عليها من اول ما خرجت من باب الڤيلا لغاية ما وصلت عنده
و للعيون لغه لا يفمها إلّا العاشقين .. يخيّم الصّمت فيها عندما تبدأ بالكلام.
حلم:: وحشتنى اوى
فارس:: وانتى وحشتينى أكتر .. طمنينى عنك
حلم:: محتجالك اوى
فارس:: جنبك لـ أخر عمرى
حلم:: مش هيجى يوم و تتخلى عنى
فارس:: عمرى كله فداكى
حلم:: غمضت عينيها .. و جواها ااااااه يا فارس و رجعت تانى بصت لـ عينيه .. أحبّك بكلّ ما تحمل الكلمة من معنى، أحبّك بكلّ إحساس يتلّهف لرؤيتك، أحبّك بكلّ شوق و اشتياق لِسماع صوتك، أحبك بكل ما فيها من نغمات موسيقية، أحبك بكلّ ما تخبئه الكلمة من عَناء، أقولها لك وحدك ولا أريد سماعها من غيرك، فمهما قيلت لم أشعر بها مثلما شعرت بها معك، فأنت الحب و الإحساس يا من علمني كيف يكون الإحساس .
فارس:: إليكِ يا من أحبكِ القلب، إليكِ يا من احتوتكِ العيون، إليكِ يا من أعيش لـ أجلها، إليكِ يا من طيفكِ يلاحقني، إليكِ يا من أرى صورتكِ في كل مكان
في كتبي، في أحلامي و في صحوتي، إليكِ يا من يرتعش كياني من شدة الشوق إلى رؤياكِ أحبّك بكل وجدانى
عاليا::بعلو صوتها الووووو اصحوووو يا بشر الاكل هيبرد
فارس و حلم فاقوا ع صوتها
فارس:: لـ عاليا بتزعقى ليه يابت انتى
عاليا:: بترقص حواجبها .. جعانيين يا باشا
حلم:: بأحراج .. أحم و هو حد منعك تاكلى ما الاكل قصادك أهو كلى براحتك
عاليا::ع نفس وضعها .. و دى تيجى يا مزة برضوا ناكل من غيركوا
فارس::ضـ ربها بخفة ع دماغها .. طب كلى و انتى ساكتة و بطلى لماضة
ياسمين:: بضحك ما تبقاش عاليا لو سكتت ههههههههههههه
عاليا::لـ ياسمين .. نينينيني خفة يابت حد شاف جمالك النهاردة
ياسمين:: اه ياختى كتير هههههههههههه
فارس:: هاااا خلاص بقى ناكل و احنا ساكتين .. و لـ حلم ممكن بعد الغدا نتمشى شوية عايزك فـ كلمتين
حلم:: هزت دماغها بمعنى ممكن من غير ما تتكلم
و كان وقت الغدا مميز جدا عدى مابين ضحك و هزار وشقاوة ومرح بينهم كلهم و فعلا بعد الغدا قامت حلم تتمشى مع فارس برة الڤيلا
حلم:: ها قولّى بقى عايزنى فـ ايه
فارس:: وحشتينى
حلم:: بخجل .. و بعدين معاك بقى يا فارس
فارس:: بيبصلها بأبتسامة و ساكت
حلم:: بصتله بخجل و لفت وشها و رجعت تانى .. الله بقى فى ايه يا فارس بتبصلى كدا ليه
فارس:: هو انا ممنوع أبص ع القمر .. بس تعرفى أول مرة أعرف أن أسمى حلو اوى كدا .. قوليه تانى عشان خاطرى
حلم:: بس بقى يا فارس بطل تكسفنى الله
فارس:: ياااااااه ع فارس دى و هى طالعة من بين شفايفك بحس كأن روحى طايرة فـ السما و ترجع ترد فيا من تانى
حلم:: و بعدين بقى هتفضل كدا كتير .. انا ماقدرش ع الكلام الحلو ده
فارس:: الكلام الحلو ده اتخلق عشانك و بس .. و بعدين انتى وحشتينى طيب أعمل ايه
حلم:: بخجل .. برضوا مصمم تكسفنى .. المهم قول عايزنى فـ ايه
فارس :: طلع علبة من جيبه .. ممكن تقبلى مني الهدية دى
حلم:: بأندهاش .. هدية !! هدية عشانى انا
فارس:: أفتحيها
حلم::فتحت العلبة و شافت سلسلة شكلها جميل اوى ع أسم أمينة .. بدموع لـ فارس مش عارفة أقولك ايه .. كلام الدنيا كله ما يكفيش قصاد اللى بتعمله معايا
فارس:: أول ما شوفتها عجبتنى اوى و شوفتك فيها اتمنى تعجبك
حلم:: رفعت عينيها .. انت عندى بـ كنوز الدنيا بحالها و كفاية انها منك .. ربنا ما يحرمنيش منك ابدا يا حبيبى
فارس::أسمحيلى ألبسهالك ممكن ؟
حلم::بخجل هزت راسها بالموافقة
فارس:: وقف وراها و فعلا لبسها السلسلة بحرفية من غير ما يلمسها و رجع وقف قصادها و بهمس زاد حلاها لما لبستيها .. بحبك يا أحلى حلم فـ عمري
و بعد شوية وقت رجعوا الڤيلا تانى وسلم ع ياسمين و عاليا و ركب عربيته و رجع بيته بعد ما اطمن عليهم و أدالهم هما كمان كل واحدة سلسلة بأسم حبيبها
___________________________
فـ المصنع
بعد أسبوع حلم بتتابع انتاج المصنع مع العمال و شغالة بأيديها زى عادتها و سمعت رنة موبايلها و شافت أسم رانيا
حلم:: السلام عليكم
رانيا:: و عليكم السلام ورحمة الله .. لوومى ازيك وحشتينى
حلم:: رنوش عاملة ايه ياقلبى انتى أكتر يا حبيبتى
رانيا:: بتوتر .. انا الحمدلله كويسة .. كويسة اوى
حلم:: حست بتوترها .. مالك يا رانيا صوتك ماله انتى تعبانة ولا حاجة فيكى ايه
رانيا:: ابدا يا حور مافيش حاجة بس كنت عايزة انزل اشترى شوية حاجات و كنت عايزاكى معايا
حلم:: امممم و ده بقى اللى قلقك كدا ماشى ياستى ماعنديش مانع بس عايزة تنزلى أمتى
رانيا:: النهاردة
حلم:: النهاردة صعب يا رنوش عندى شغل كتير فـ المصنع معلش لو الحاجة مش ضرورى خلينا يوم تانى
رانيا:: بتسرع .. لالالالالالا .. ده لازم النهاردة لان الحاجات دي عايزاها ضرورى النهاردة
حلم:: لازم النهاردة ازاي يعنى .. أنا عندي شغل كتيرر و مش هينفع خالص
رانيا:: علشان خاطرى يا حلم عايزة أجيب شوية طلبات ضرورية (جواها انا لازم استغل نقطة ضعف حلم أنها مش بتعرف تسيب حد محتاجلها) بس خلاص لو مش عايزة تيجي براحتك عادي أنا أصلا عارفه أني مش مهمة بالنسبة لـ اى حد .. خلاص يا حلم أقفلي و أنا هتصرف شكراً لـ حضرتك جداً
حلم::بأستسلام و قلبها مش مطمن .. أنتي هبلة يا رانيا ايه اللى بتقوليه ده أنتي بالنسبالي أكتر من أختي و انتى عارفة كدا كويس .. و حاضر يا ستى هحاول اجيلك بس فين
رانيا:: بتسرع .. لأ يا حلم مافيش هحاول لازم تقدرى و دلوقتي حالا
حلم:: يا بنتى دلوقتي صعب اصبرى طيب أخر النهار حتى
رانيا:: يا حلم انا بكلمك و انا نازلة اصلا .. أخلصى بقى و تعالى بسرعة هستناكى فـ مول(….) يلا بسرعة
حلم:: بصدمة نععععم .. انتى اتهبلتى ازاى يعنى تكلمينى بعد ما تنزلى .. كان المفروض قبل ما تنزلى تعرفينى ع الاقل عشان أعرف افضي نفسى
رانيا:: اللى حصل بقى اخلصي و تعالى ولا مش عايزة تقفى معايا يعنى و تساعدينى فـ حاجة بسيطة زى دى
حلم::بقلق من إصرار رانيا .. أمرى لله حاضر يا رانيا هجيلك سلام .. و بالفعل بعد ما قفلت المكالمة خرجت من المصنع بعد ما بلغت حازم و الاء بمكالمة رانيا
الاء:: بقبضة قلب .. حازم قلبي مقبوض و خايفه علي حلم أوي
حازم:: يا بنتي ما تخافيش دي تلاقيها هرومانات الحمل بس .. بقولك ايه هخلص الحسابات دى و هجيلك
الآء :: مااشي .. لـ نفسها لا قلبي مش مرتاح انا هروح وراها .. و بالفعل مشيت بسرعة وراها بس حست بطنها بتشد عليها بسبب سرعتها و هى ماشية خبطت فـ هشام
هشام:: أنا أسف .. ممكن توصلني بحور
الاء:: بدموع بتهـ دد بالنزول .. حور خرجت و قلبي مقبوض أوي و خايفة عليها و كنت طالعة اشوف اى عربية و اروح وراها
هشام :: بخوف .. طيب تعالى أنا معايا العربية يلا نلاحقها
الاء:: يلا .. و ركبت مع فعلا مع هشام عشان يلحقوا حلم
عند حلم
ركبت عربيتها واتصلت بـ فارس
فارس:: السلام عليكم .. حبيبى عاملة ايه
حلم:: و عليكم السلام ..الحمدلله يا فارس انت عامل ايه
فارس:: تايه من غيرك يا حلم عمرى
حلم:: بأبتسامة .. انت بتجيب الكلام ده منين بس
فارس:: تصدقى انا نفسى مش عارف .. بس بمجرد ما اشوفك او اسمع صوتك بنسى نفسى
خطـ فتينى و شقلبتى كيانى و غيرتينى خالص يا بنت الرشيدي
حلم:: بضحك .. بصراحة انت فعلا اتغيرت خالص و ما بقيتش مستفز زى الاول ههههههههههههه
فارس:: بقى انا مستفز يا حور ماااشي
حلم::حصل ههههههههههه كنت مستفز اوى و بتقلده .. اختى لو طلبت منك حاجة اقـ تـ لها
فارس::ههههههههههههه انا بعمل كدا
حلم::ايوا .. ولا و انت بتقول و بتقلده برضوا. ايه خلصنى دى .. هو انتى ع ذمتى
فارس:: بضحك .. تعرفى انى كنت قاصد فعلا استفزك مش عارف ليه
حلم:: شايفة فـ مراية العربية فى عربية تانية وراها بتقرب منها و سكتت فجأة بتحاول تركز فـ الطريق
فارس::بتساؤل .. حور مالك سكتى ليه
حلم:: بقلق .. مش عارفة يا فارس فى عربية ماشية ورايا مش مرتاحلها
فارس:: بعدم فهم .. عربية ايه هو انتى اصلا فين ؟!!!
حلم:: انا خارجة من المزرعة رايح مول(…) لـ رانيا
فارس:: بزعييق ..انتى اتجننتى .. ازاى تخرجى من غير ما تعرفينى .. هو ده اللى احنا أتفقنا عليه يا حور
حلم:: انت بتزعق ليه دلوقتي .. صاحبتى و قصدتنى فـ ….و فجأة قطـ عت كلامها لما شافت عربية تانية قريبة منها بتزنّق عليها من ناحية والعربية اللى كانت وراها بتزنّق عليها من الناحية التانية و بتحاول تزود سرعتها عشان تهرب منهم
فارس:: مازال معاها ع الفون و قلقان .. حللللم فى ايييه ردى عليا
حلم:: مش عارفة يا فارس فى عربيتين بيقربوا مني جامد .. ااااااه .. حاسب يا حيييوان .. و لـ فارس بخوف ألحقنى يا فارس العربيتين فيهم ناس شكلهم غريب و بيخبطوا فـ عربيتى من كل ناحية
فارس:: بسرعة قام وقف و جرى خرج من مكتبه و ركب عربيته .. انتى فين حدديلى مكانك بالظبط
حلم::انا فـ الصحراوى لسة ما وصلتش
فارس:: حاولى تهدى و سيبى المكالمة مفتوحة و انا هحدد مكانك ما تقلقيش هوصلك بسرعة
حلم:: بقلق و خوف .. بسرعة يا فارس .. و بتحاول تهرب من العربيتين مش عارفة كل ما تزود سرعتها يلحقوها و فجأة حصل ضـ رب نار عليها و مش عارفة تعمل ايه و بتلعن فـ حظها و بتخبط ع الدركسيون .. غبية ازاى انسى سـ لا حى ازاااااى غبييية و بتجرى بعربيتها تحاول تفادى الضـ رب
فارس:: معاها ع الموبايل و سامع صوت الـ ر صا ص حووور ما تقفيش سامعانى اوعى تقفى اجرى بأقصى سرعتك و انا جايلك فـ السكة ما تقلقيش
حلم:: ……………
و فجأة شافت عربية تالتة طالعة من قلب الصحرا تقطـ ع عليها الطريق و لاقت نفسها متحاصرة من كل ناحية و مش عارفة تتصرف ازاى وقفت مكانها و قفلت عربيتها عليها .. و شافت ناس شكلهم غريب نزلوا من العربيات و رايحين ناحيتها
حلم ::فااااااارررس الحقني يا فارس
فارس:: سايق بأقصى سرعته متخافيش ياقلبي انا في الطريق .. اااااه ياولاد الـ… إيدي تطولكم بس
حلم:: حد كـ سر شباك عربيتها و رش عليها مخـ در و بدموع .. لـ فارس وهى بتغيب عن الوعى .. خلاص يا فارس خـ خلاص كل حاجة أنتهت اااااااه
فارس::بخوف ..حووووررررر ردى عليااااااا اننننطقى ساااااكتة ليييييه
مجهول:: بضحكة شر لـ نفسه ياااه ده الباشا دافع كتير علشان نجيبك يا حلوة .. بس بصراحة تستاهلى التعب دا كله يا بختك يا باشا الليلة ليلتك .. و هو بيكلم نفسه سمع صوت فارس و مسك الموبايل و ضحك عايزها تعال خدها ده لو عرفت هاهاهاهاهاهاهاهاها
فارس:: بغـ ـضب جحـ ـيمى .. أقسم بالله العظيم لو لمستها هقتـ لك انت و الکلـ ب اللى مشغلك انت فااااااااهم ..الفون اتفقل و هو بيتكلم .. لـ نفسه ااااه يا كلاااااااااب هقتـ لكم كللللكم
هشام:: بقلق سايق بسرعة و معاه ألاء و فجأة صرخت عربية حللللم أهى يا هشام .. و نزلت جرى من العربية هى و هشام و شافوا العربية متبهدلة بسبب ضـ رب الـ نـ ار و الازاز المتـ كسـ ر
الاء:: بقلق .. ياترى انتى فين يا حلم .. يارب طمنى عليها انا هموت لو حصل لها حاجة
فارس:: وصل فـ نفس اللحظة و شاف هشام و الاء واقفين .. بـ شك انتوا مع بعض ازاى ؟ و بتعملوا ايه هنا ؟
هشام:: بخوف .. انا كنت جاى لـ حور و لاقيت مدام ألاء بتجرى و بتقول عايزة تلحقها اخدتها معايا و جرينا وراها بس وصلنا متأخر و ملحقناهاش
فارس:: تصدق عجبتنى و تمثيلك عجبنى اوى .. و بغـ ـضب انت هتحوووورر عليااااا اننننطقق قول حووووررر فيييين والا هد فنك مكانك و أحلف أنى ما شوفتكش اخللللص
هشام:: بقلق ..انا و الله ماعرفش حاجة ..انا اصلا كنت جاى عشان اطمن عليها و اتفاجئت باللى حصل
فارس:: بغـ ـضب أكبر .. مسك هشام من ياقة قميصه لدرجة انه كان هيمـ وت فـ إيده .. اقسم بالله لو عرفت انك ليك يد فـ خطـ ـفها هندمك ندم عمرك و هخليك تكره اليوم اللى اتولدت فيه
الاء::بدموع .. والله يا فا…..
فارس:: قطـ ع كلامها بنفس غضـ ـبه .. و بيشاور عليها ..انتى تخرسى خاااالص لو عرفت انك كنتى معاه هخليكى تقضى عمرك كله و ماحدش عارفلك طريق انتى فاهمة .. و سابهم و راح يركب عربيته اتفاجئ بـ هشام بيركب معاه .. نعم خييير
هشام::أرجوك صدقنى انا ماليش علاقة بخطـ فها دى أختى و مهما حصل بينى و بينها عمرى ما أفكر أءذ يها و الله مش بكدب عليك
فارس:: بخبرة ظابط .. شاف الخوف فـ عين هشام .. و قال كل حاجة هتبان .. و طلع موبايله و اتصل بسيف
سيف:: الووو فارس انت فين يابنى
فارس:: بسرعة يا سيف ع مكتبى اللاب بتاعى هاته معاك و هات قوة و تتبعوا الـ GBS اللى عليه و قابلنى فـ المكان اللى هيقف فيه الـ GBS
سيف::بقلق ..فى ايه يا فارس قلقتنى
فارس:: بوجع .. حلم اتخطـ فت يا سيف بسرعة لازم نلحقها. و قفل المكالمة و جرى بأقصى سرعة و ساب الأء منهارة بسبب قلقها ع حلم و كمان كلامه وجعها و اضطرت تركب عربية هشام و ترجع بيها المزرعة
بقلمى✍️_________________لبنى دراز
المُقنع::هاهاهاهاهاهاهاهاها واخيرا الاسطورة وقعت تحت ايدى
حلم::انت ؟؟؟؟؟؟؟
- تبع الفصل التالي اضغط على ( رواية العشق الابدي) اسم الرواية
تعليقات
إرسال تعليق